ဢွၵ်ႇၵႂႃႇ 18
18
ယေႇသရေႃးၵႂႃႇၸႂ်းမူဝ်းသေႇ
1 ယေႇသရေႃးယိတ်ႈပရေႃးႁဵၵ်ႈမိူင်းမီႉတျၼ်ႇဢၼ်ပဵၼ်ပူႇၼၢႆးမူဝ်းသေႇၼၼ်ႉ ငိၼ်းၵႃႈဢၼ်ၽြႃးပဵၼ်ၸဝ်ႈႁဵတ်းပုၼ်ႈၸႃႉၸဵမ် မူဝ်းသေႇလႄႈၵူၼ်းမၼ်းၸဝ်ႈ ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ ဢိၵ်ႇတင်းလွင်ႈဢၼ်ထႃႇဝရႃႉၽြႃးၼုၵ်ႈဢဝ် ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉဢွၵ်ႇသေၵႃႈၼႂ်းမိူင်းဢေႇၵိပ်ႉတူႉမႃးၼၼ်ႉသေယဝ်ႉ၊- 2ယေႇသရေႃးပူႇၼၢႆးမူဝ်းသေႇၼၼ်ႉ ဢဝ်ၸီႉပေႃးရႃႉမေးမူဝ်းသေႇဢၼ်မူဝ်းသေႇဝႆႉၵိုတ်းၵႃႈတီႈမၼ်း ဢိၵ်ႇတင်းလုၵ်ႈၸၢႆးမၼ်း သွင်ၵေႃႉၼၼ်ႉၵႂႃႇဢေႃႈ။- 3လုၵ်ႈၸၢႆးၵေႃႉၼိုင်ႈၸမ်ႉ၊ လႆႈၸိုဝ်ႈၵေႇရသုၼ်ႇဢေႃႈ။ လွင်ႈမၼ်းၸမ်ႉ မၼ်းဝႃႈ၊ ၵဝ်လႆႈပဵၼ်ၶႅၵ်ႇဢႃႇၵၼ်ႇတူႉတၢင်ႇတီႈတၢင်ႇမိူင်းယဝ်ႉ၊ ဝႃႈၼင်ႇၼႆဢေႃႈ။- 4လုၵ်ႈၸၢႆးၵေႃႉၼိုင်ႈၸမ်ႉ၊ လႆႈၸိုဝ်ႈဢေးလျႃႇၸႃႇဢေႃႈ။ လွင်ႈမၼ်းၸမ်ႉ မၼ်းဝႃႈ၊ ၽြႃးပဵၼ်ၸဝ်ႈပူႇမွၼ်ႇၵဝ် ၸွႆႈထႅမ်ၵဝ်လႄႈ ပွႆႇၵဝ်လွတ်ႈသေၵႃႈၼႂ်း ၽေးလၢပ်ႇၶုၼ်ႁေႃၶမ်းၽႃႇရေႃးယဝ်ႉ၊ ဝႃႈၼင်ႇၼႆဢေႃႈ။- 5ယေႇသရေႃး ပူႇၼၢႆးမူဝ်းသေႇၼၼ်ႉ ဢဝ်မေးမၼ်းဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉမႃးႁွတ်ႈမႃးထိုင်ၵႃႈတီႈထိူၼ်ႇတီႈဢၼ်မူဝ်းသေႇၶျႃးတပ်ႉယူႇၵႃႈတီႈႁိမ်းလွႆၽြႃးပဵၼ်ၸဝ်ႈၼၼ်ႉသေယဝ်ႉ၊- 6မွၵ်ႇလၢတ်ႈတီႈမူဝ်းသေႇလႄႈဝႃႈ၊ ၵဝ်ၶႃႈယေႇသရေႃးဢၼ်ပဵၼ်ပူႇၼၢႆးၸဝ်ႈႁဝ်း ဢိၵ်ႇတင်းမေးၸဝ်ႈႁဝ်း တင်းလုၵ်ႈၸၢႆးၸဝ်ႈႁဝ်းသွင်ၵေႃႉမႃးႁွတ်ႈမႃးထိုင် ၵႃႈတီႈၸဝ်ႈႁဝ်းၼႆႉယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊- 7မူဝ်းသေႇဢွၵ်ႇၵႂႃႇႁႂ်ႈလႆႈႁပ်ႉႁူဝ်တၢင်းပူႇၼၢႆးမၼ်းသေလႄႈ ၵူမ်ႈၵွမ်းႁူဝ်လႄႈၸုပ်ႇၼူမ်သေယဝ်ႉ၊ ၵေႃႉၼိုင်ႈလႄႈၵေႃႉၼိုင်ႈ တွင်ႈထၢမ်လွင်ႈဢၼ်ယူႇလီၵိၼ်ဝၢၼ်တီႈၵၼ်လႄႈ ဢွၼ်ၵၼ်ၶဝ်ႈၵႃႈၼႂ်းမူဝ်းၵႃႇဢေႃႈ။
8 မူဝ်းသေႇမွၵ်ႇလၢတ်ႈၵႃႈဢၼ်ထႃႇဝရႃႉၽြႃးႁဵတ်းတီႈၶုၼ်ႁေႃၶမ်းၽႃႇရေႃး တင်းၵူၼ်းဢေႇၵိပ်ႉတူႉၶဝ် ၵွပ်ႈပိူဝ်ႈၵူၼ်းမဵဝ်းဢီႉသရေႇလႃႉတင်းလၢႆ ဢိၵ်ႇတင်းတုၵ်ႉၶႃႉတၢင်းၽၢၼ်ၵႃႈဢၼ်ႁွတ်ႈထိုင်ၵႃႈၼိူဝ်ၶဝ် ၵႃႈတႃႈၵႃႈတၢင်းဢိၵ်ႇတင်း လွင်ႈဢၼ်ထႃႇဝရႃႉၽြႃးၵႄႇသႄႇၶျွတ်ႈဢဝ်ၶဝ်ၼၼ်ႉ တီႈပူႇၼၢႆးမၼ်းဢေႃႈ။- 9ယေႇသရေႃးၸူမ်းသိူဝ်းၵွပ်ႈပိူဝ်ႈၵျေးၸူးဢၼ်ထႃႇဝရႃႉၽြႃးႁဵတ်းတီႈၵူၼ်းမဵဝ်းဢီႉသရေႇလႃႉဢၼ်မၼ်းၸဝ်ႈၵႄႇသႄႇၶျွတ်ႈဢဝ်ၶဝ် လွတ်ႈသေၵႃႈၼႂ်းမိုဝ်းၵူၼ်းဢေႇၵိပ်ႉတူႉၸိူဝ်းၼၼ်ႉလႄႈ လၢတ်ႈဝႃႈ၊- 10ႁႂ်ႈထႃႇဝရႃႉၽြႃးဢၼ်ၵႄႇသႄႇၶျွတ်ႈဢဝ်သူလွတ်ႈသေၵႃႈၼႂ်းမိုဝ်းၶုၼ်ႁေႃၶမ်းၽႃႇရေႃး ဢိၵ်ႇတင်းမိုဝ်းၵူၼ်းဢေႇၵိပ်ႉတူႉၶဝ်၊ ဢၼ်ၵႄႇသႄႇၶျွတ်ႈဢဝ်ၵူၼ်းတင်းလၢႆ လွတ်ႈသေၵႃႈၼႂ်းမိုဝ်းၵူၼ်းဢေႇၵိပ်ႉတူႉၸိူဝ်းၼၼ်ႉၼၼ်ႉ မီးမင်ႇၵလႃႇသေၵမ်းလူၺ်ႈ။- 11တေႃႈလဵဝ်ၼႆႉ ၵဝ်ႁူႉလွင်ႈဢၼ်ထႃႇဝရႃႉၽြႃးယဵင်ႈၶႅၼ်းယႂ်ႇမျၢတ်ႈၼႃႇသေ ၽြႃးတၢင်ႇသူႇတၢင်ႇပႃးၵႃႈမီးတင်းသဵင်ႈတင်းလူင်ၼၼ်ႉယဝ်ႉ။ လွင်ႈမၼ်းၸမ်ႉ မၼ်းၸဝ်ႈပဵၼ်ၸိူဝ်ႉၼင်ႇၼႆၼႂ်းလွင်ႈတၢင်းဢၼ်ၶဝ်ၼၼ်ႉ ပႃးတၢင်းဢၼ်ၸႂ်မႃႇၼႃႉ ၽႅၼ်သုင်သေလႄႈ ႁဵတ်းတီႈၶဝ်ၼႆႉၼၼ်ႉယဝ်ႉ၊ ဝႃႈၼင်ႇၼႆသေယဝ်ႉ၊- 12ယေႇသရေႃး ပူႇၼၢႆးမူဝ်းသေႇၼၼ်ႉ ဢဝ်ယိတ်ႈဢၼ်တုတ်ႇၽႆးဢၼ်ၼိုင်ႈ ဢိၵ်ႇတင်းယိတ်ႈပုၼ်ႈၽြႃးပဵၼ်ၸဝ်ႈၼမ်ၼႃႇမႃးလႄႈ၊ ဢႃႇရုၼ်ႇဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ် ၼႂ်းၵူၼ်းမဵဝ်းဢီႉသရေႇလႃႉၸိူဝ်းၼၼ်ႉတင်းသဵင်ႈတင်းလူင် ဢွၼ်ၵၼ်မႃးႁႂ်ႈလႆႈၵိၼ်ၶဝ်ႈမုၼ်းလူၺ်ႈၵၼ်တင်းပူႇၼၢႆးမူဝ်းသေႇၼၼ်ႉၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။
တၢင်းဢၼ်ၶၢၼ်းၵူၼ်းလူင်ဢၼ်ၸီႇယၢင်ႇတြႃး
(တူၺ်း၊ ႁေႃး 1:9-18)
13ၼႂ်းဝၼ်းမိူဝ်ႈၽုၵ်ႈ မူဝ်းသေႇၼၼ်ႉ ၼင်ႈယူႇႁႂ်ႈလႆႈၸီႇယၢင်ႇတြႃးတီႈၵူၼ်းတင်းလၢႆဢေႃႈ။ ၵူၼ်းတင်းလၢႆၵေႃႈဢွၼ်ၵၼ်ၸုၵ်းယူႇၵႃႈတီႈႁိမ်းမူဝ်းသေႇ ၸႃႉၸဵမ်ၶိင်ႇၵၢင်ၼႂ်လႄႈတေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။- 14မိူဝ်ႈဢၼ်ပူႇၼၢႆးမူဝ်းသေႇၼၼ်ႉ ႁၼ်လွင်ႈၵႃႈဢၼ်မူဝ်းသေႇႁဵတ်းတီႈၵူၼ်းၸိူဝ်းၼၼ်ႉၸိုင်၊ မၼ်းလၢတ်ႈလႄႈဝႃႈ၊ လွင်ႈတၢင်းဢၼ်မႂ်းႁဵတ်းတီႈၵူၼ်းတင်းလၢႆၼႆႉ ပဵၼ်ၸိူဝ်ႉၼင်ႇႁိုဝ်။ ႁဵတ်းသင်လႄႈမႂ်းၵေႃႉလဵဝ်ၵူၺ်းၼင်ႈယူႇလႄႈ ၵူၼ်းတင်းသဵင်ႈတင်းလူင် လႆႈယူႇၵႃႈတီႈႁိမ်းမႂ်းၸႃႉၸဵမ်ၶိင်ႇၵၢင်ၼႂ်လႄႈ တေႃႇထိုင်ႁွတ်ႈၶိင်ႇႁူဝ်ၶမ်ႈၼၼ်ႉၼင်ႇႁိုဝ်။ ဝႃႈၼင်ႇၼႆဢေႃႈ။- 15မူဝ်းသေႇၵေႃႈလၢတ်ႈတီႈပူႇၼၢႆးမၼ်းလႄႈဝႃႈ၊ ၵွပ်ႈပိူဝ်ႈဢၼ်ၵူၼ်းတင်းလၢႆ ၶႂ်ႈၶၢမ်ႇဢယူႇတီႈၽြႃးပဵၼ်ၸဝ်ႈလႄႈ မႃးထၢမ်တီႈၵဝ်ၶႃႈၼႆႉၼၼ်ႉလႄႈ၊ ၸင်ႇပဵၼ်ၸိူဝ်ႉၼင်ႇၼႆဢေႃႈ။- 16ပေႃးၶဝ်မီးဢမူႉၸိုင်၊ ၶဝ်မႃးတီႈၵဝ်ၶႃႈလႄႈ ၵဝ်ၶႃႈလႆႈၸီႇယၢင်ႇတႅပ်းတတ်းတြႃးၵႄႈဝူင်ႈၵၢင်ၵေႃႉၼိုင်ႈလႄႈၵေႃႉၼိုင်ႈဢေႃႈ။ ၵဝ်ၶႃႈလႆႈသွၼ်ပၼ်ထုင်းၽိင်ႈတြႃးၽြႃးပဵၼ်ၸဝ်ႈ ဢိၵ်ႇတင်းပိင်းၺၢပ်ႈတြႃးမၼ်းၸဝ်ႈၸိူဝ်းၼၼ်ႉတီႈၶဝ်ဢေႃႈ။ မိူဝ်ႈဢၼ်ဝႃႈၼင်ႇၼႆၸိုင်၊- 17ပူႇၼၢႆးမူဝ်းသေႇၼၼ်ႉလၢတ်ႈတီႈမၼ်းလႄႈဝႃႈ၊ လွင်ႈတၢင်းဢၼ်မႂ်းႁဵတ်းၼႆႉ ပဵၼ်ဢၼ်ဢမ်ႇထုၵ်ႇဢမ်ႇလီဢေႃႈ။- 18ၸႃႉၸဵမ်မႂ်းလႄႈၵူၼ်းဢၼ်ပႃးလူၺ်ႈၵၼ်တင်းမႂ်းၸိူဝ်းၼႆႉ ႁႅင်းတၵ်းဢူၼ်ႈၵႂႃႇဢမၢၼ်ႇၶၼ်ပဵၼ်ဢေႃႈ။ လွင်ႈတၢင်းၼႆႉၼၵ်းၼႃႇတီႈမႂ်းဢေႃႈ။ ပဵၼ်လွင်ႈတၢင်းဢၼ်မႂ်းၵေႃႉလဵဝ်ၵူၺ်းတၢတ်ႈၼိူင်ႇလႆႈဢမ်ႇၸႂ်ႈ။- 19ထွမ်ႇဢဝ်ၵႂၢမ်းၵဝ်တႃႉ။ ၵဝ်တၵ်းပၼ်တၢင်းၵျၢမ်ႇတၢင်းပွင်ဢေႃႈ။ ၽြႃးပဵၼ်ၸဝ်ႈၵေႃႈတၵ်းမီးယူႇလူၺ်ႈၵၼ်တင်းမႂ်းဢေႃႈ။ မႂ်းတၵ်းလႆႈပဵၼ်ၵေႃႉဢၼ်ဢွၼ်ႁူဝ်ၵူၼ်းတင်းလၢႆ တီႈၽြႃးပဵၼ်ၸဝ်ႈလႄႈ ဢဝ်ဢမူႉၶဝ်ၶဝ်ႈၸူးလဝ်ႊလၢတ်ႈတီႈၽြႃးပဵၼ်ၸဝ်ႈဢေႃႈ။- 20မႂ်းတၵ်းလႆႈသင်ႇသွၼ်ပၼ်ထုင်းၽိင်ႈတြႃးၸဝ်ႈ ဢိၵ်ႇတင်းပိင်းၺၢပ်ႈတြႃးၸဝ်ႈတင်းလၢႆတီႈၶဝ်လႄႈ ၼႄပျႃးသဵၼ်ႈတၢင်းဢၼ်ၶဝ်တၵ်းလႆႈၵႂႃႇ ဢိၵ်ႇတင်းလွင်ႈဢၼ်ၶဝ်တၵ်းလႆႈႁဵတ်းၼၼ်ႉတီႈၶဝ်ဢေႃႈ။- 21လိူဝ်သေၼၼ်ႉ မႂ်းတၵ်းလႆႈလိူၵ်ႈၵဵပ်းဢဝ်ၶဝ်ၸိူဝ်းဢၼ်ႁဵတ်းလႆႈပဵၼ်လႆႈ၊ ၵူဝ်ယမ်ၽြႃးပဵၼ်ၸဝ်ႈ၊ ပျေႉၸုမ်ႇတၢင်းသဵတ်ႈၸႃႇ၊ လီႁင်ႈလေႃးၽႃႉၸိူဝ်းၼၼ်ႉၵႃႈၼႂ်းၵူၼ်းတင်းသဵင်ႈတင်းလူင်ၼၼ်ႉလႄႈ ၶၢၼ်းဝႆႉၼႂ်းဢရႃႇ ၵူၼ်းဢၼ်ဢုပ်ႉၵႃႈၼိူဝ်ယေႈႁဵင်၊ ၵူၼ်းဢၼ်ဢုပ်ႉၵႃႈၼိူဝ်ယေႈပၢၵ်ႇ၊ ၵူၼ်းဢၼ်ဢုပ်ႉၵႃႈၼိူဝ်ယေႈႁႃႈသိပ်း၊ ၵူၼ်းဢၼ်ဢုပ်ႉၵႃႈၼိူဝ်ယေႈသိပ်းဢေႃႈ။- 22ႁႂ်ႈၶဝ်ၼၼ်ႉၸီႇယၢင်ႇတြႃးတီႈၵူၼ်းတင်းလၢႆၵူႈၶိင်ႇၵူႈၶႃႇတႃႉ။ ၵႃႈပဵၼ်ဢမူႉဢၼ်ယႂ်ႇဢၼ်လူင်ၼၼ်ႉၸိုင်၊ ႁႂ်ႈၶဝ်ဢဝ်မႃးၸူးတီႈမႂ်းတႃႉ။ ၵႃႈပဵၼ်ဢမူႉဢၼ်လဵၵ်ႉဢၼ်ၼွႆႉၼၼ်ႉၸိုင်၊ ႁႂ်ႈၶဝ်ၸီႇယၢင်ႇ ႁင်းၽႂ်ႁင်းမၼ်းတႃႉ။ ၼင်ႇၼၼ်လႄႈ မႂ်းတၵ်းသၢၵ်ႈသႃႇလႄႈ ၶဝ်ၼၼ်ႉတၵ်းၽွမ်ႉၵၼ် ၸွႆႈထႅမ်ႁၢပ်ႇဢမူႉလူၺ်ႈၵၼ်တင်းမႂ်းဢေႃႈ။- 23ပေႃးမႂ်းႁဵတ်းၸိူဝ်ႉၼင်ႇၼၼ်လႄႈ ၽြႃးပဵၼ်ၸဝ်ႈပၼ်ဢၶႂၢင်ႉၸိုင်၊ မႂ်းတၵ်းမၼ်ႈၶိူင်ႇဢေႃႈ။ ၵူၼ်းတင်းသဵင်ႈတင်းလူင်ၸိူဝ်းၼႆႉၵေႃႈ တၵ်းလႆႈၵႂႃႇၼိမ်ၼိမ်လီလီ ၸူးၵႃႈတီႈမိူင်းဢၼ်ၶဝ်တၵ်းယူႇၼၼ်ႉဢေႃႈ၊ ဝႃႈၼင်ႇၼႆဢေႃႈ။- 24မူဝ်းသေႇၵေႃႈထွမ်ႇဢဝ်ၵႂၢမ်းပူႇၼၢႆးမၼ်းလႄႈ ႁဵတ်းၸွမ်းၵႃႈၼင်ႇဢၼ်ၵႂၢမ်းမၼ်းမီးၼၼ်ႉဢေႃႈ။- 25မူဝ်းသေႇလိူၵ်ႈၵဵပ်းဢဝ်ၶဝ်ၸိူဝ်းဢၼ်ႁဵတ်းလႆႈပဵၼ်လႆႈၼၼ်ႉ ၵႃႈၼႂ်းၵူၼ်းမဵဝ်းဢီႉသရေႇလႃႉသေယဝ်ႉ၊ ၶၢၼ်းဝႆႉၼႂ်းဢရႃႇ ၵူၼ်းဢၼ်ဢုပ်ႉၵႃႈၼိူဝ်ယေႈႁဵင်၊ ၵူၼ်းဢၼ်ဢုပ်ႉၵႃႈၼိူဝ်ယေႈပၢၵ်ႇ၊ ၵူၼ်းဢၼ်ဢုပ်ႉၵႃႈၼိူဝ်ယေႈႁႃႈသိပ်း၊ ၵူၼ်းဢၼ်ဢုပ်ႉၵႃႈၼိူဝ်ယေႈသိပ်းဢေႃႈ။- 26ၶဝ်ၼၼ်ႉလႆႈဢွၼ်ၵၼ်ၸီႇယၢင်ႇတြႃးတီႈၵူၼ်းတင်းလၢႆၵူႈၶိင်ႇၵူႈၶႃႇဢေႃႈ။ ၵႃႈပဵၼ်ဢမူႉဢၼ်ယၢပ်ႇဢၼ်ၽိုတ်ႇၼႃႇၼၼ်ႉၸိုင်၊ ၶဝ်ဢဝ်မႃးၸူးတီႈမူဝ်းသေႇဢေႃႈ။ ၵႃႈပဵၼ်ဢမူႉဢၼ်လဵၵ်ႉဢၼ်ၼွႆႉၼၼ်ႉၸိုင်၊ ၶဝ်ၸီႇယၢင်ႇႁင်းၽႂ်ႁင်းမၼ်းဢေႃႈ။- 27လိုၼ်းၼၼ်ႉ မူဝ်းသေႇပၼ်ဢၶႂၢင်ႉဢၼ်လႆႈၵႂႃႇၼၼ်ႉတီႈပူႇၼၢႆးမၼ်းလႄႈ မၼ်းၼၼ်ႉ ၶိုၼ်းမိူဝ်းၵႂႃႇၸူး ၵႃႈတီႈတီႈယူႇမၼ်းၼၼ်ႉသေဢေႃႈ။
Currently Selected:
ဢွၵ်ႇၵႂႃႇ 18: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
