ဢွၵ်ႇၵႂႃႇ 19
19
ၵူၼ်းဢီႉသရေႇလႃႉၶဝ်ၶျႃးပၢင်တီႈလွႆသီႉၼႃႉ
1ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ၊ လိုၼ်းသေၶဝ်ဢွၵ်ႇသေၵႃႈၼႂ်းမိူင်းဢေႇၵိပ်ႉတူႉၵႂႃႇၼၼ်ႉ၊ လိူၼ်တႃႉတီႉယႃႉ လႆႈဝၼ်းၼိုင်ႈႁွတ်ႈထိုင်ၵႃႈတီႈထိူၼ်ႇသီႉၼႃႉဢေႃႈ။- 2ၶဝ်ဢွၵ်ႇသေၵႃႈတီႈရေႇၽီႉတိမ်ႇၼၼ်ႉၵႂႃႇသေယဝ်ႉ၊ ႁွတ်ႈထိုင်ၵႃႈတီႈထိူၼ်ႇသီႉၼႃႉလႄႈ ၶျႃးတပ်ႉၵႃႈတီႈထိူၼ်ႇၼၼ်ႉဢေႃႈ။ ၵႃႈတီႈၼၼ်ႈၼၼ်ႉ ၵူၼ်းမဵဝ်းဢီႉသရေႇလႃႉတင်းလၢႆ ၶျႃးတပ်ႉၶဝ်ၵႃႈတီႈၽၢႆႇၼႃႈလွႆဢေႃႈ။- 3မူဝ်းသေႇၶိုၼ်ႈၸူးၵႃႈတီႈၽြႃးပဵၼ်ၸဝ်ႈလႄႈ ထႃႇဝရႃႉၽြႃးယူႇၵႃႈၼႂ်းလွႆၼၼ်ႉသေလႄႈ ႁွင်ႉတီႈမၼ်းလႄႈဝႃႈ၊ ဢမိင်ႉၸဝ်ႈ ဢၼ်မႂ်းတၵ်းလႆႈၶိုၼ်းလၢတ်ႈတီႈၸိူဝ်ႉၶိူဝ်းယႃႇၵုပ်ႈ မွၵ်ႇလၢတ်ႈတီႈၵူၼ်းမဵဝ်းဢီႉသရေႇလႃႉၸိူဝ်းၼၼ်ႉလႄႈဝႃႈၸမ်ႉ၊- 4သူလႆႈႁူႉလႆႈႁၼ်လွင်ႈဢၼ်ၵဝ်ႁဵတ်းတီႈၵူၼ်းဢေႇၵိပ်ႉတူႉၸိူဝ်းၼၼ်ႉ ဢိၵ်ႇတင်းလွင်ႈဢၼ်ၵဝ်ဢဝ်တင်းပိၵ်ႇၶၢင်ႇလေႃးႁပ်ႉဢဝ်သူလႄႈ ဢဝ်သူမႃးတီႈၵဝ်ၼၼ်ႉယဝ်ႉ။- 5ပိူဝ်ႈၼႆလႄႈ တေႃႈလဵဝ်ၼႆႉပေႃးသူတၵ်းဢဝ်ထွမ်ႇၵႂၢမ်းၵဝ်ဢမၢၼ်ႇၶၼ်ပဵၼ်လႄႈ ပႂ်ႉၵမ်ပႂ်ႉၸွမ်းပတီႉၺိၺ်ႇၵဝ်ၸိုင်၊ သူတၵ်းလႆႈပဵၼ်ၽၼ်ႇတႃႇဢၼ်ၵဝ်ထိူၵ်ႈပိူင်ႇလိူဝ်တွၼ်းသေ မဵဝ်းၵူၼ်းတၢင်ႇတီႈတၢင်ႇလႅၼ်ၵူႈၸိူဝ်ႉၵူႈၶိူဝ်းဢေႃႈ။ လိၼ်မိူင်းၵႃႈမီးတင်းသဵင်ႈတင်းလူင်ၼႆႉပဵၼ်ဢုၵ်ႉၸႃႇၵဝ်ဢေႃႈ။- 6သူၵေႃႈတၵ်းလႆႈပဵၼ်မဵဝ်းယိတ်ႈပရေႃးႁဵၵ်ႈ ဢၼ်မီးၸေးၸိမ်ႇၶုၼ်၊ မဵဝ်းၵူၼ်းဢၼ်မူတ်းၸၢင်ႇတီႈၵဝ်ဢေႃႈ။ ၵႂၢမ်းဢၼ်ဝႃႈ ၸိူဝ်ႉၼင်ႇၼႆၼၼ်ႉၸိုင်၊ ပဵၼ်ၵႂၢမ်းဢၼ် မႂ်းတၵ်းလႆႈသင်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆဢေႃႈ၊ ဝႃႈၼင်ႇၼႆဢေႃႈ။
7ၵမ်းၼၼ်ႉ မူဝ်းသေႇၶိုၼ်းမႃးလႄႈ ႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းတင်းလၢႆၸိူဝ်းၼၼ်ႉသေယဝ်ႉ၊ ၶိုၼ်းမွၵ်ႇလၢတ်ႈၵႂၢမ်းဢၼ်ထႃႇဝရႃႉၽြႃးသင်ႇလၢတ်ႈဝႆႉ တင်းသဵင်ႈတင်းလူင်ၼၼ်ႉ ၵႃႈတီႈၽၢႆႇၼႃႈၶဝ်ဢေႃႈ။- 8ၵူၼ်းတင်းသဵင်ႈတင်းလူင်ၵေႃႈ ၽွမ်ႉၵၼ်ၶိုၼ်းလၢတ်ႈလႄႈဝႃႈ၊ ႁဝ်းၶႃႈတၵ်းဢွၼ်ၵၼ်ႁဵတ်းၸွမ်းၵႃႈဢၼ်ထႃႇဝရႃႉၽြႃးမီးဢမိင်ႉၼၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။ မူဝ်းသေႇၵေႃႈဢဝ်ၵႂၢမ်းၵူၼ်းၸိူဝ်းၼၼ်ႉၶိုၼ်းလဝ်ႊလၢတ်ႈတီႈထႃႇဝရႃႉၽြႃးဢေႃႈ။- 9ထႃႇဝရႃႉၽြႃးလၢတ်ႈတီႈမူဝ်းသေႇလႄႈဝႃႈ၊ တူၺ်းလူး၊ ၵဝ်တၵ်းယူႇၼႂ်းမွၵ်ႇၵုမ်ႈဢၼ်လပ်းသိင်ႇၽိတ်းၽိတ်းၼၼ်ႉမႃးတီႈမႂ်း ႁႂ်ႈၵူၼ်းတင်းလၢႆလႆႈငိၼ်းလႄႈယုမ်ႇမႂ်းယူႇသေႇသေႇ ၼႂ်းမိူဝ်ႈဢၼ်ၵဝ်လၢတ်ႈၵႂၢမ်းတေႃႇၵၼ်တင်းမႂ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။ မူဝ်းသေႇၵေႃႈဢဝ်ၵႂၢမ်းထႃႇဝရႃႉၽြႃးၼၼ်ႉ ၶိုၼ်းမွၵ်ႇလၢတ်ႈတီႈၵူၼ်းတင်းလၢႆဢေႃႈ။
10ထႃႇဝရႃႉၽြႃးၵေႃႈမီးဢမိင်ႉတီႈမူဝ်းသေႇလႄႈဝႃႈ၊ ၵႂႃႇတီႈဢၼ်ၵူၼ်းတင်းလၢႆမီးၼၼ်ႉလႄႈ၊ ႁႂ်ႈၶဝ်မူတ်းၸၢင်ႇၼႂ်းဝၼ်းမိူဝ်ႈၼႆႉဢိၵ်ႇတင်းဝၼ်းမိူဝ်ႈၽုၵ်ႈတႃႉ။ ႁႂ်ႈၶဝ်သၵ်ႉလွႆးၶူဝ်းၼုင်ႈၶဝ်လႄႈ၊- 11မႄးႁဵတ်းမႄးႁႅၼ်းႁႂ်ႈမီးဝႆႉၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉတႃႉ။ လွင်ႈမၼ်းၸမ်ႉ ၼႂ်းဝၼ်းဢၼ် ထူၼ်ႈထိုင်သၢမ်ဝၼ်းၼၼ်ႉ ထႃႇဝရႃႉၽြႃးတၵ်းလူင်းမႃးၵႃႈၼိူဝ်လွႆသီႉၼႃႉ သိုဝ်ႈၼႃႈတႂ်ႈတႃ ၵူၼ်းတင်းသဵင်ႈတင်းလူင်ဢေႃႈ။- 12မႂ်းတၵ်းလႆႈၸီႇယၢင်ႇတၢင်းဢၼ်ႁႄႉဢၼ်ၶႅၼ်ဢၼ်ၵူၼ်းတင်းလၢႆ တၵ်းဢမ်ႇလႆႈၶၢမ်ႈၵႂႃႇၸိူဝ်းၼၼ်ႉ ဝႆႉႁႂ်ႈႁွပ်ႈလွႆသေလႄႈ လၢတ်ႈဝႃႈ၊ သူဢွၼ်ၵၼ်ႁဵတ်းသတီႉႁႂ်ႈဢမ်ႇလႆႈၶိုၼ်ႈၵႂႃႇၵႃႈၼိူဝ်လွႆ၊ ႁႂ်ႈဢမ်ႇလႆႈတိူဝ်ႉထုၵ်ႇတိၼ်လွႆတႃႉ၊ ဝႃႈၼင်ႇၼႆဢေႃႈ။ ၽူႈလႂ်သေဢမ်ႇဝႃႈ၊ ၵေႃႉဢၼ်တိူဝ်ႉထုၵ်ႇလွႆၼၼ်ႉၸမ်ႉ၊ ႁႂ်ႈၶၢမ်ႇတၢင်းတၢႆဢမၢၼ်ႇၶၼ်ပဵၼ်တႃႉ။- 13ၵူၼ်းၼၼ်ႉၸိုင်ဢမ်ႇလႆႈဢဝ်တင်းမိုဝ်းတိူဝ်ႉ။ တၵ်းလႆႈဢဝ်တင်းမၢၵ်ႇႁိၼ်ထိမ်ႈမၼ်းဢမၢၼ်ႇၶၼ်ပဵၼ်ဢေႃႈ။ ဢမ်ႇၼၼ်ၵေႃႈ တၵ်းလႆႈဢဝ်တင်းႁွၵ်ႇတႅင်းသႂ်ႇဢေႃႈ။ ပဵၼ်ၵူၼ်းသေဢမ်ႇဝႃႈ၊ ပဵၼ်တရိၵ်ႈသၢၼ်ႇသေဢမ်ႇဝႃႈ၊ ဢသၢၵ်ႈဢမ်ႇလႆႈလိပ်း။ မိူဝ်ႈဢၼ်သဵင် ၼႄးၶရႃႇ မေႃးလင်ႁိုင်ၼႃႇလူင်လၢင်ၼၼ်ႉၸိုင်၊ ၶဝ်တၵ်းလႆႈဢွၼ်ၵၼ်မႃးလႄႈ ၶိုၼ်ႈၵႃႈၼိူဝ်လွႆဢေႃႈ၊ ဝႃႈၼင်ႇၼႆဢေႃႈ။- 14မူဝ်းသေႇလူင်းသေၵႃႈၼိူဝ်လွႆၵႂႃႇၸူးတီႈဢၼ် ၵူၼ်းတင်းလၢႆမီးၼၼ်ႉလႄႈ ႁႂ်ႈၶဝ်မူတ်းၸၢင်ႇဢေႃႈ။ ၶဝ်ၼၼ်ႉၵေႃႈ ဢွၼ်ၵၼ်သၵ်ႉလွႆးၶူဝ်းၼုင်ႈၶဝ်ဢေႃႈ။- 15မၼ်းၵေႃႈလၢတ်ႈတီႈၵူၼ်းတင်းလၢႆၼၼ်ႉလႄႈဝႃႈ၊ ဢွၼ်ၵၼ်မႄးႁဵတ်းမႄးႁႅၼ်းႁႂ်ႈမီးဝႆႉၼႂ်း ဝၼ်းဢၼ်ထူၼ်ႈထိုင် သၢမ်ဝၼ်းၼၼ်ႉတႃႉ။ ယႃႇပေသုတ်ႉၸပ်းသုတ်ႉၸူးတီႈမေးသူ၊ ဝႃႈၼင်ႇၼႆဢေႃႈ။
16ၶိင်ႇၵၢင်ၼႂ် ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ မီးတၢင်းဢၼ်ၽႃႉလင်၊ ဢိၵ်ႇတင်းတၢင်းဢၼ်ၽႃႉမႅပ်ႈ တင်းမွၵ်ႇၵုမ်ႈဢၼ်လပ်းသိင်ႇၽိတ်းၽိတ်း ၵႃႈၼိူဝ်လွႆ၊ တင်းသဵင်ၼႄးၶရႃႇ ဢၼ်မေႃးလင်ယႂ်ႇၼႃႇၼၼ်ႉလႄႈ ၵူၼ်းၵႃႈဢၼ်မီးၵႃႈၼႂ်းတပ်ႉတင်းသဵင်ႈတင်းလူင်ၵူဝ်သၼ်ႇယူႇဢေႃႈ။- 17မူဝ်းသေႇၵေႃႈဢဝ်ၵူၼ်းတင်းလၢႆဢွၵ်ႇသေၵႃႈၼႂ်းတပ်ႉ ႁႂ်ႈၶဝ်ထူပ်းၵၼ်တင်းၽြႃးပဵၼ်ၸဝ်ႈလႄႈ ၶဝ်ၼၼ်ႉဢွၼ်ၵၼ်ၸုၵ်းယူႇၵႃႈတႂ်ႈတိၼ်လွႆဢေႃႈ။- 18ၵွပ်ႈပိူဝ်ႈဢၼ်ထႃႇဝရႃႉၽြႃးပႃးတင်းၽႆးလူင်းမႃးၵႃႈၼိူဝ်လွႆသီႉၼႃႉလႄႈ၊ လွႆတင်းလွႆၼၼ်ႉဢွၵ်ႇၵႂၼ်းၽႆးယူႇဢေႃႈ။ ၵႂၼ်းၽႆးၼၼ်ႉၵေႃႈၶိုၼ်ႈယူႇမိူၼ်ၸိူဝ်ႉၼင်ႇ ၵႂၼ်းၽႆးၵႃႈတီႈမုၵ်ႉၽႆးလႄႈ လွႆတင်းလွႆသၼ်ႇၶွၼ်းဝႆၼႃႇလူင်လၢင်ယူႇဢေႃႈ။- 19မိူဝ်ႈဢၼ်သဵင်ၼႄးၶရႃႇမေႃးလင်ႁိုင်ၼႃႇလႄႈ သဵင်ယဵင်ႈၶႅၼ်းယႂ်ႇမႃးယူႇၼၼ်ႉၸိုင်၊ မူဝ်းသေႇႁွင်ႉလႄႈၽြႃးပဵၼ်ၸဝ်ႈဢဝ်တင်းသဵင်ၵႂၢမ်းဢိူဝ်ဢေႃႈ။- 20ထႃႇဝရႃႉၽြႃးလူင်းမႃးၵႃႈၼိူဝ်လွႆသီႉၼႃႉ ၵႃႈတီႈၼိူဝ်ပၢႆၸိၵ်းလွႆၼၼ်ႉသေလႄႈ ထႃႇဝရႃႉၽြႃးႁွင်ႉဢဝ်မူဝ်းသေႇၶိုၼ်ႈၵႃႈၼိူဝ်ပၢႆၸိၵ်းလွႆၼၼ်ႉလႄႈ မူဝ်းသေႇၵေႃႈၶိုၼ်ႈၸူးဢေႃႈ။- 21ထႃႇဝရႃႉၽြႃးၵေႃႈမီးဢမိင်ႉတီႈမူဝ်းသေႇလႄႈဝႃႈ၊ ၵွပ်ႈပိူဝ်ႈဢၼ်ၵူဝ်ၵူၼ်းတင်းလၢႆတၵ်းၶၢမ်ႈၶဝ်ႈမႃးၸူးၵႃႈတီႈထႃႇဝရႃႉၽြႃး ႁႂ်ႈလႆႈလူတူၺ်းလႄႈ ၵူၼ်းၼမ်ၼႃႇတၵ်းတၢႆၼၼ်ႉလႄႈ၊ လူင်းၵႂႃႇပၼ်သတီႉတီႈၶဝ်တႃႉ။- 22ယိတ်ႈပရေႃးႁဵၵ်ႈဢၼ်သုတ်ႉၸပ်းသုတ်ႉၸူးၵႃႈတီႈထႃႇဝရႃႉၽြႃးၸိူဝ်းၼၼ်ႉၵေႃႈ၊ တၵ်းလႆႈႁႂ်ႈတူဝ်ၸဝ်ႈၵဝ်ႇမူတ်းၸၢင်ႇဢေႃႈ။ ပေႃးဢမ်ႇၼၼ် ထႃႇဝရႃႉၽြႃးတၵ်းပၼ်တၢမ်ႇတီႈၶဝ်ဢေႃႈ၊ ဝႃႈၼင်ႇၼႆဢေႃႈ။- 23မူဝ်းသေႇၵေႃႈၶိုၼ်းလဝ်ႊလၢတ်ႈတီႈထႃႇဝရႃႉၽြႃးလႄႈဝႃႈ၊ ၵူၼ်းတင်းလၢႆဢမ်ႇၶိုၼ်ႈၵႃႈၼိူဝ်လွႆသီႉၼႃႉလႆႈတီႈၶႃႈ။ လွင်ႈမၼ်းၸမ်ႉ ၸဝ်ႈႁဝ်းသင်ႇလၢတ်ႈဝႆႉလႄႈဝႃႈ၊ ၸီႇယၢင်ႇတၢင်းဢၼ်ႁႄႉဢၼ်ၶႅၼ်ဢၼ်ဢမ်ႇလႆႈၶၢမ်ႈၸိူဝ်းၼၼ်ႉဝႆႉ ႁွပ်ႈလွႆလႄႈ ႁႂ်ႈမူတ်းၸၢင်ႇတႃႉ၊ ဝႃႈၼင်ႇၼႆဝႆႉတီႈၶႃႈယဝ်ႉ၊ ဝႃႈၼင်ႇၼႆဢေႃႈ။- 24ထႃႇဝရႃႉၽြႃးၵေႃႈမီးဢမိင်ႉတီႈမၼ်းလႄႈဝႃႈ၊ ၵႂႃႇလႄႈလူင်းတႃႉ။ မႂ်းဢိၵ်ႇတင်းဢႃႇရုၼ်ႇၵူၺ်းတၵ်းလႆႈၶိုၼ်ႈဢေႃႈ။ ယႃႇပေႁႂ်ႈယိတ်ႈပရေႃးႁဵၵ်ႈဢိၵ်ႇတင်းၵူၼ်းတင်းလၢႆၸိူဝ်းၼၼ်ႉ ၶၢမ်ႈၶဝ်ႈႁႂ်ႈလႆႈၶိုၼ်ႈၸူးၵႃႈတီႈထႃႇဝရႃႉၽြႃး။ ပေႃးဢမ်ႇၼၼ် မၼ်းၸဝ်ႈတၵ်းပၼ်တၢမ်ႇတီႈၶဝ်ဢေႃႈ၊ ဝႃႈၼင်ႇၼႆဢေႃႈ။- 25ၼင်ႇၼၼ်လႄႈ မူဝ်းသေႇလူင်းၸူးၵႃႈတီႈၵူၼ်းတင်းလၢႆသေလႄႈ မွၵ်ႇလၢတ်ႈတီႈၶဝ်ဢေႃႈ။
Currently Selected:
ဢွၵ်ႇၵႂႃႇ 19: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
