ဢွၵ်ႇၵႂႃႇ 20
20
ပိင်းၺၢပ်ႈၸဝ်ႈသိပ်းပႃးဢၼ်ထႃႇဝရႃႉၽြႃးပၼ်ဝႆႉ
(တူၺ်း၊ ႁေႃး 5:1-21)
1ၽြႃးပဵၼ်ၸဝ်ႈဢဝ်ၵႂၢမ်းတင်းသဵင်ႈတင်းလူင်ၸိူဝ်းၼႆႉ မီးဢမိင်ႉဝႆႉလႄႈဝႃႈၸမ်ႉ၊- 2ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈမႂ်းဢၼ်ၼုၵ်ႈဢဝ်မႂ်းဢွၵ်ႇသေၵႃႈၼႂ်းမိူင်းဢေႇၵိပ်ႉတူႉ၊ တီႈဢၼ်မႂ်းၶၢမ်ႇႁဵတ်းၶႃႈၼၼ်ႉဢေႃႈ။- 3လိူဝ်သေၵဝ်ၼႆႉ ယႃႇပေၵူဝ်းၵႂၢႆႇၽြႃးတၢင်ႇသူႇတၢင်ႇပႃး။
4ယႃႇပေႁဵတ်းရုၵ်ႈထူႉသၢင်းထူႉပုင်ႇႁၢင်ႈၶိူင်ႈပိူင်ဢၼ်မီးၵႃႈၼိူဝ်တီႈၽႃႉၵၢင်ႁၢဝ်၊ ဢၼ်မီးၵႃႈတႂ်ႈတီႈလိၼ်မိူင်း၊ ဢၼ်မီးၵႃႈၼႂ်းၼမ်ႉတႂ်ႈလိၼ်မိူင်းၸိူဝ်းၼၼ်ႉ ပုၼ်ႈတူဝ်ၸဝ်ႈၵဝ်ႇ။- 5ယႃႇပေၵူမ်ႈႁူဝ်ၵွမ်းႁူဝ်တီႈၶဝ်။ ယႃႇပေႁဵတ်းဝူတ်ႈႁဵတ်းဝၢတ်ႈတီႈၶဝ်။ လွင်ႈမၼ်းၸမ်ႉ ၵဝ်ထႃႇဝရႃႉၽြႃး ၽြႃးပဵၼ်ၸဝ်ႈမႂ်းၼႆႉ ပဵၼ်ၽြႃးဢၼ်ယုမ်ႇငၢႆႈလွင်ႈဢၼ်ဢပႅတ်ႈမီးတီႈမႂ်း၊ ၽြႃးဢၼ်ၸီႇယၢင်ႇတႅၼ်းပၼ်ဢပႅတ်ႈပေႃႈတင်းလၢႆတီႈလုၵ်ႈလၢင်း ၸိူဝ်ႉၶိူဝ်းၶဝ်ၸိူဝ်းဢၼ်ၸင်းၵဝ်သိုပ်ႇသိုပ်ႇတၢမ်းတၢမ်းတေႃႇထိုင်ႁွတ်ႈသိုပ်ႇတူႉတီႉယႃႉ သိုပ်ႇၸတုၵ်ႉထႃႉၼၼ်ႉ၊- 6ၽြႃးဢၼ်ၼႄပျႃးၵရူႉၼႃႇ တီႈၸိူဝ်ႉၶိူဝ်းၶဝ်ၸိူဝ်းဢၼ်ႁၵ်ႉၵဝ်လႄႈ ၵမ်ၵျၢင်ႉပိင်းၺၢပ်ႈၵဝ်တင်းလၢႆၼၼ်ႉသိုပ်ႇသိုပ်ႇတၢမ်းတၢမ်း တေႃႇထိုင်ႁွတ်ႈသေႁဵင်သိုပ်ႇသေမိုၼ်ႇသိုပ်ႇၼိုင်ႈဢေႃႈ။
7ယႃႇပေၼပ်ႉတေႃႈဢဝ် ၼႃႇမႃႉၸိုဝ်ႈသဵင်ထႃႇဝရႃႉၽြႃး ၽြႃးပဵၼ်ၸဝ်ႈမႂ်းၼၼ်ႉလၢတ်ႈဝႃႈ လၢႆလၢႆလွၵ်ႇလွၵ်ႇ။ လွင်ႈမၼ်းၸမ်ႉ ထႃႇဝရႃႉၽြႃးဢမ်ႇမၢတ်ႈၵေႃႉဢၼ် ၼပ်ႉတေႃႈဢဝ်ၼႃႇမႃႉၸိုဝ်ႈသဵင်ၸဝ်ႈလၢတ်ႈဝႃႈ လၢႆလၢႆလွၵ်ႇလွၵ်ႇၼၼ်ႉဢမ်ႇမီးဢပႅတ်ႈၼၼ်ႉ။- 8ၶုၵ်းၸႂ်လႆႈၶႆႈၸႂ်ထူပ်း ဝၼ်းၵမ်သိၼ် ႁႂ်ႈဝၼ်းၼၼ်ႉလႆႈမူတ်းၸၢင်ႇတႃႉ။- 9ၼႂ်းႁူၵ်းဝၼ်း ၵႆႉၵျူဝ်းၸႃးလႄႈႁဵတ်းတၢင်းႁဵတ်းၵူႈၸိူဝ်ႉၵူႈပိူင်တႃႉ။- 10ဝၼ်းသတ်ႉတမႃႉပဵၼ်ဝၼ်းၵမ်သိၼ်ထႃႇဝရႃႉၽြႃး ၽြႃးပဵၼ်ၸဝ်ႈမႂ်းဢေႃႈ။ ၼႂ်းဝၼ်းၼၼ်ႉၸႃႉၸဵမ်မႂ်းလႄႈလုၵ်ႈၸၢႆးမႂ်း၊ လုၵ်ႈယိင်းမႂ်း၊ ၶႃႈၵူၼ်းယိင်းမႂ်း၊ ၶႃႈၵူၼ်းၸၢႆးမႂ်း၊ တရိၵ်ႈသၢၼ်ႇမႂ်း၊ ဢိၵ်ႇတင်းၶႅၵ်ႇဢၼ်မီးယူႇၵႃႈၼႂ်းၽၵ်းတူၼၼ်ႉ ဢမ်ႇလႆႈႁဵတ်းၵၢၼ်တၢင်းႁဵတ်း။- 11လွင်ႈမၼ်းၸမ်ႉ ၼႂ်းႁူၵ်းဝၼ်း၊ ထႃႇဝရႃႉၽြႃးႁဵတ်းပဵၼ်ၽႃႉၵၢင်ႁၢဝ်၊ လိၼ်မိူင်း၊ ၼမ်ႉသမ်ႇမုၵ်ႉတြႃႇ ဢိၵ်ႇတင်းၵႃႈဢၼ်မီးၵႃႈၼႂ်းမၼ်းၸိူဝ်းၼၼ်ႉလႄႈ၊ ဝၼ်းသတ်ႉတမႃႉၼၼ်ႉ မၼ်းၸဝ်ႈယူႇၼိမ်ၼိမ်လီလီသေဢေႃႈ။ ပိူဝ်ႈၼႆလႄႈ ထႃႇဝရႃႉၽြႃးပၼ်တၢင်းလီဝၼ်းသတ်ႉတမႃႉလႄႈ ႁႂ်ႈမူတ်းၸၢင်ႇဢေႃႈ။
12လွင်ႈၼင်ႇႁိုဝ်ဢသၢၵ်ႈမႂ်း တၵ်းယိုၼ်းယၢဝ်းၵႃႈၼႂ်းမိူင်းဢၼ်ထႃႇဝရႃႉၽြႃး ၽြႃးပဵၼ်ၸဝ်ႈမႂ်းပၼ်ၼၼ်ႉၸိုင်၊ ႁဵတ်းရူဝ်ႇသေႇၵူဝ်ယမ်ပေႃႈမႄႈမႂ်းတႃႉ။- 13ယႃႇပေဢဝ်ဢသၢၵ်ႈၵူၼ်းတၢႆ။- 14ယႃႇပေၽိတ်းပိူင်ႈမေးပိူၼ်ႈ။- 15ယႃႇပေလၵ်ႉဢုၵ်ႉၸႃႇၶူဝ်းလဵင်းပိူၼ်ႈ။- 16ယႃႇပေယူႇၽၢႆႇၼိုင်ႈသေလႄႈ ၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈလူၺ်ႈလွင်ႈ ၵေႃႉဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉ။
17ယႃႇပေမီးၸႂ်ဢၼ်ၸပ်းၸွႆးၶႂ်ႈလႆႈႁိူၼ်းယေး ၵေႃႉဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉ။ ယႃႇပေမီးၸႂ်ဢၼ်ၸပ်းၸွႆးၶႂ်ႈလႆႈ ၸႃႉၸဵမ်မေးၵေႃႉဢၼ်ၸၢပ်ႈသႅင်ႇၵၼ်တင်းမႂ်းလႄႈ ၶႃႈၵူၼ်းၸၢႆးမၼ်း၊ ၶႃႈၵူၼ်းယိင်းမၼ်း၊ ဝူဝ်းမၼ်း၊ လီႈမၼ်း တင်းဢုၵ်ႉၸႃႇၶူဝ်းလဵင်း ၵေႃႉဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉ သေၸိူဝ်ႉသေပိူင်၊ ဝႃႈၼင်ႇၼႆဢေႃႈ။
18ၵူၼ်းတင်းသဵင်ႈတင်းလူင် ႁၼ်တၢင်းဢၼ်ၽႃႉလင်၊ တၢင်းဢၼ်ၽႃႉမႅပ်ႈ၊ တၢင်းဢၼ်သဵင်ၼႄးၶရႃႇမေႃးလင်၊ တၢင်းဢၼ်ၵႂၼ်းၽႆးဢွၵ်ႇၵႃႈၼႂ်းလွႆယူႇၸိူဝ်းၼၼ်ႉလႄႈ ၶဝ်ႁၼ်သေယဝ်ႉ၊ ဢွၼ်ၵၼ်ၶၢႆႉတီႈသေလႄႈၸုၵ်းယူႇၵႃႈတီႈဢၼ်ၵႆၵႆၼၼ်ႉဢေႃႈ။- 19ၶဝ်ၼၼ်ႉဢွၼ်ၵၼ်လဝ်ႊလၢတ်ႈတီႈမူဝ်းသေႇလႄႈဝႃႈ၊ ၸဝ်ႈႁဝ်းမီးဢမိင်ႉပၼ်တီႈႁဝ်းၶႃႈသေၵမ်းၶႃႈ။ ႁဝ်းၶႃႈတၵ်းထွမ်ႇဢဝ်ၶႃႈဢေႃႈ။ ယႃႇပေႁႂ်ႈၽြႃးပဵၼ်ၸဝ်ႈမီးဢမိင်ႉပၼ်တီႈႁဝ်းၶႃႈသေၵမ်းၶႃႈ။ ႁဝ်းၶႃႈၵူဝ်လႆႈတၢႆၶႃႈဢေႃႈ၊ ဝႃႈၼင်ႇၼႆဢေႃႈ။- 20မူဝ်းသေႇၵေႃႈလၢတ်ႈတီႈၵူၼ်းတင်းလၢႆလႄႈဝႃႈ၊ ယႃႇပေၵူဝ်ပေႁႄ။ ၽြႃးပဵၼ်ၸဝ်ႈမႃးႁႂ်ႈလႆႈၸၢမ်းတူၺ်းသူ ဢိၵ်ႇတင်းႁႂ်ႈသူၵူဝ်ႁႄမၼ်းၸဝ်ႈ ႁႂ်ႈလႆႈၵၢင်းလွတ်ႈတင်း တၢင်းဢၼ်ၽိတ်းပိူင်ႈဢေႃႈ၊ ဝႃႈၼင်ႇၼႆဢေႃႈ။- 21ၵူၼ်းတင်းလၢႆၼၼ်ႉၸုၵ်းယူႇၵႃႈတီႈဢၼ်ၵႆၵႆဢေႃႈ။ မူဝ်းသေႇၸမ်ႉ၊ သုတ်ႉၸပ်းသုတ်ႉၸူးတီႈဢၼ်လပ်းသိင်ႇၽိတ်းၽိတ်း၊ တီႈဢၼ်ၽြႃးပဵၼ်ၸဝ်ႈမီးယူႇၼၼ်ႉဢေႃႈ။
ပိင်းၺၢပ်ႈတြႃးလွင်ႈယိတ်ႈပလၢင်ႇ
22ထႃႇဝရႃႉၽြႃးၵေႃႈမီးဢမိင်ႉတီႈမူဝ်းသေႇလႄႈဝႃႈ၊ ၵႂၢမ်းဢၼ်မႂ်းတၵ်းလႆႈမွၵ်ႇလၢတ်ႈတီႈၵူၼ်းမဵဝ်းဢီႉသရေႇလႃႉၸိူဝ်းၼၼ်ႉလႄႈဝႃႈၸမ်ႉ၊ တူဝ်သူႁူႉႁၼ်လွင်ႈဢၼ်ၵဝ်ယူႇၵႃႈၼိူဝ်ၽုင်ႇၵၢင်ႁၢဝ် လၢတ်ႈတေႃႇၵၼ်တင်းသူၼၼ်ႉယဝ်ႉ။- 23သူဢမ်ႇလႆႈႁဵတ်းၽြႃးတၢင်ႇသူႇတၢင်ႇပႃးဝႆႉၼႂ်းဢရႃႇၵဝ်။ သူဢမ်ႇလႆႈႁဵတ်းၽြႃးငိုၼ်း ၽြႃးၶမ်းဝႆႉတီႈသူ။
24မႂ်းတၵ်းလႆႈတႄႇႁဵတ်းယိတ်ႈပလၢင်ႇလိၼ်ပုၼ်ႈၵဝ်ဢေႃႈ။ တၵ်းလႆႈဢဝ်ယိတ်ႈဢၼ်တုတ်ႇၽႆး တင်းယိတ်ႈမိၵ်ႉသႃႇႁႃယႃႉမႂ်း ဢၼ်ဝႃႈယိတ်ႈသူဝ်း၊ ဝူဝ်းမႂ်းၸိူဝ်းၼၼ်ႉ ပုၵ်ႈၸေႃႇၵႃႈၼိူဝ်ယိတ်ႈပလၢင်ႇၼၼ်ႉဢေႃႈ။ ၵဝ်တၵ်းမႃးတီႈသူ ၼႂ်းတီႈဢၼ်ၵဝ်ႁႂ်ႈ ၶုၵ်းၸႂ်လႆႈၶႆႈၸႂ်ထူပ်းၼႃႇမႃႉၸိုဝ်ႈသဵင်ၵဝ် ၵူႈတီႈၵူႈလႅၼ်ၼၼ်ႉသေလႄႈ ပၼ်တၢင်းလီဢေႃႈ။- 25ပေႃးမႂ်းတႄႇႁဵတ်းယိတ်ႈပလၢင်ႇမၢၵ်ႇႁိၼ်ပုၼ်ႈၵဝ်ၸိုင်၊ မႂ်းဢမ်ႇလႆႈဢဝ်တင်းမၢၵ်ႇႁိၼ်ဢၼ်ထၢၵ်ႇဢဝ်သိၼ်ဢဝ်ၼၼ်ႉလႄႈႁဵတ်း။ ပေႃးမႂ်းယုၵ်ႉၶိူင်ႈလဵၵ်းသႂ်ႇၵႃႈၼိူဝ်မၼ်းၸိုင်၊ မႂ်းႁႂ်ႈမၼ်းၵူဝ်ႈၵိူၵ်ႇဢေႃႈ။- 26လွင်ႈၼင်ႇႁိုဝ်တၢင်းဢၼ်တူဝ်ပူၺ်မႂ်း တၵ်းဢမ်ႇလႆႈပေႃႇလႆႈမီးၵႃႈၼိူဝ်မၼ်းၸိုင်၊ မႂ်းဢမ်ႇလႆႈၵၢႆႇၶူဝ်လႆၶိုၼ်ႈၵႃႈၼိူဝ်ယိတ်ႈပလၢင်ႇၵဝ်။
Currently Selected:
ဢွၵ်ႇၵႂႃႇ 20: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
