ဢွၵ်ႇၵႂႃႇ 21
21
ပိင်းၺၢပ်ႈတြႃးဢၼ်ႁဵတ်းတေႃႇၶႃႈ
(တူၺ်း၊ ႁေႃး 15:12-18)
1ထမ်ႇမသၢတ်ႈဢၼ်မႂ်း တၵ်းလႆႈၸီႇယၢင်ႇဝႆႉၵႃႈတီႈၽၢႆႇၼႃႈၶဝ်ၼၼ်ႉၸမ်ႉ၊- 2ပေႃးမႂ်းသိုဝ်ႉဢဝ်ၶႃႈ ဢၼ်ပဵၼ်ၸိူဝ်ႉၶိူဝ်းႁေႇပြႄးၸိုင်၊ မၼ်းတၵ်းလႆႈၶၢမ်ႇႁဵတ်းၶႃႈႁူၵ်းပီႊၵူၺ်းဢေႃႈ။ ပေႃးထိုင်ႁွတ်ႈပီႊသတ်ႉတမႃႉၸိုင်၊ မၼ်းယင်းဢမ်ႇပၼ်ၵႃႈတူဝ်ၶၼ်တူဝ်မၼ်းလႄႈ တၵ်းလႆႈဢွၵ်ႇသေဢေႃႈ။- 3မိူဝ်ႈဢၼ်ၸႃႉၶၢမ်ႇႁဵတ်းၶႃႈၼၼ်ႉ၊ ပေႃးမၼ်းၶၢမ်ႇၵေႃႉလဵဝ်ၵူၺ်းမၼ်းၸိုင်၊ တၵ်းလႆႈဢွၵ်ႇၵေႃႉလဵဝ်ၵူၺ်းမၼ်းဢေႃႈ။ ပေႃးမၼ်းပႃးမေးၸိုင်၊ မေးမၼ်းၼၼ်ႉၵေႃႈတၵ်းလႆႈဢွၵ်ႇလူၺ်ႈၵၼ်တင်းမၼ်းဢေႃႈ။- 4ဢမ်ႇၼၼ် ပေႃးၸဝ်ႈမၼ်းဢဝ်မေးပၼ်တီႈမၼ်းလႄႈမေးၼၼ်ႉ ၵိူတ်ႇလဵင်ႉလုၵ်ႈလဵင်ႉလၢင်းမႃးၸိုင်၊ ၸဝ်ႈမၼ်းတၵ်းလႆႈ ပိူင်ႇဢဝ်မေးမၼ်း တင်းလုၵ်ႈလၢင်းမၼ်းၸိူဝ်းၼၼ်ႉဝႆႉဢေႃႈ။ ၶႃႈၼၼ်ႉၸမ်ႉ၊ တၵ်းလႆႈဢွၵ်ႇၵေႃႉလဵဝ်ၵူၺ်းမၼ်းဢေႃႈ။- 5ဢမ်ႇၼၼ် ပေႃးၶႃႈမၼ်းၼၼ်ႉ လၢတ်ႈလႅင်းလႅင်းလႄႈဝႃႈ၊ ၵဝ်ၶႃႈႁၵ်ႉၸဝ်ႈၵဝ်ၶႃႈဢိၵ်ႇတင်းမေးတင်းလုၵ်ႈလၢင်းၵဝ်ၶႃႈၶႃႈဢေႃႈ။ ဢမ်ႇၶႂ်ႈဢွၵ်ႇၵႂႃႇၶႃႈ၊ ဝႃႈၼင်ႇၼႆၸိုင်၊- 6ၸဝ်ႈမၼ်းၼၼ်ႉ တၵ်းလႆႈဢဝ်မၼ်းၵႂႃႇၵႃႈတီႈ ၽၢႆႇၼႃႈၽြႃးပဵၼ်ၸဝ်ႈယဝ်ႉ၊ သမ်ႉဢဝ်ၵႂႃႇၵႃႈတီႈၽၵ်းတူႁိူၼ်းဢၼ်ဝႃႈ သဝ်ၽၵ်းတူႁိူၼ်းလႄႈ ဢဝ်လဵၵ်းၸီး ၸီးဝၢၼ်ႁူမၼ်းသေယဝ်ႉ၊ ၶႃႈၼၼ်ႉတၵ်းလႆႈၶၢမ်ႇႁဵတ်းၶႃႈယူႇသေႇသေႇဢေႃႈ။
7ပေႃးသေၵေႃႉသေၵူၼ်းဢဝ်လုၵ်ႈယိင်းမၼ်းၶၢႆပႅတ်ႈ ႁႂ်ႈလႆႈၶၢမ်ႇႁဵတ်းၶႃႈၸိုင်၊ မႄႈယိင်းၼၼ်ႉ တၵ်းလႆႈဢွၵ်ႇမိူၼ်ၸိူဝ်ႉၼင်ႇၶႃႈၵူၼ်းၸၢႆးဢမ်ႇၸႂ်ႈ။- 8ပေႃးမၼ်းဢမ်ႇထုၵ်ႇၸႂ်ၸဝ်ႈမၼ်းဢၼ်သိမ်းဢဝ်မၼ်းဝႆႉပုၼ်ႈတူဝ်ၸဝ်ႈၵဝ်ႇယဝ်ႉၼၼ်ႉၸိုင်၊ ၸဝ်ႈမၼ်းၼၼ်ႉ တၵ်းလႆႈပၼ်ဢၶႂၢင်ႉဢၼ်ပိူၼ်ႈတၢင်ႇၵေႃႉလႆႈထုတ်ႇဢဝ်မၼ်းဢေႃႈ။ ပိူဝ်ႈဢၼ်လႆႈပႅတ်ႉလႆႈလႅၼ်မၼ်းယဝ်ႉလႄႈ၊ ဢမ်ႇမီးဢၶႂၢင်ႉဢၼ်လႆႈၶၢႆပၼ် တီႈၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉ။- 9ပေႃးဢဝ်မၼ်းပၼ်တီႈလုၵ်ႈၸၢႆးတူဝ်ၸဝ်ႈၵဝ်ႇၸိုင်၊ တၵ်းလႆႈဢဝ်မၼ်းႁဵတ်းမိူၼ်ၸိူဝ်ႉၼင်ႇလုၵ်ႈယိင်းဢေႃႈ။- 10ပေႃးသမ်ႉသိမ်းဢဝ်မႄႈယိင်းတၢင်ႇၵေႃႉထႅင်ႈၸိုင်၊ တီႈမႄႈယိင်းဢၼ်သိမ်းဢဝ်ဢွၼ်တၢင်းၼၼ်ႉၵေႃႈ၊ ဢမ်ႇလႆႈသုတ်ႈလႆႈယွမ်းတၢင်းၵိၼ်၊ တၢင်းၼုင်ႈ၊ ဢိၵ်ႇတင်းဝၢတ်ႈမေး။- 11ပေႃးဢမ်ႇႁဵတ်းသၢမ်ပိူင်ၼႆႉၸိုင်၊ မေးၼၼ်ႉယင်းဢမ်ႇပၼ်ၵႃႈတူဝ်ၶၼ်တူဝ်မၼ်းလႄႈ တၵ်းလႆႈဢွၵ်ႇသေဢေႃႈ။
ပိင်းၺၢပ်ႈတြႃးပုၼ်ႈၵေႃႉဢၼ်ႁဵတ်းၵျၢမ်းထၢမ်း
12ၵေႃႉဢၼ်ပေႃႉယႅၼ်ႉၵူၼ်းႁႂ်ႈတၢႆၼၼ်ႉ တၵ်းလႆႈၶၢမ်ႇတၢင်းတၢႆဢမၢၼ်ႇၶၼ်ပဵၼ်ဢေႃႈ။- 13ပေႃးမၼ်းယင်းဢမ်ႇလွမ်တဵတ်ႇလွမ်မႅပ်ႉပႂ်ႉလႄႈ ၽြႃးပဵၼ်ၸဝ်ႈဢဝ်ဢသၢၵ်ႈၵူၼ်းဢၢပ်ႈပၼ် ၵႃႈၼႂ်းမိုဝ်းမၼ်းၸိုင်၊ ၵဝ်တၵ်းၶၢၼ်းဝႆႉတီႈဢၼ်မၼ်း တၵ်းလႆႈလႅၼ်ႈပၢႆႈၵႂႃႇၸူးၼၼ်ႉဢေႃႈ။- 14ၵေႃႉဢၼ်ႁဵတ်းၵျၢမ်းၼႃႇတီႈၵူၼ်းႁိူၼ်းၸမ်ၵၼ်လႄႈ ဢဝ်တင်းပရီႉယႄႇ ဢဝ်တၢႆၼၼ်ႉၸမ်ႉ၊ မီးယူႇၵႃႈတီႈယိတ်ႈပလၢင်ႇၵဝ်သေၵေႃႈ၊ တၵ်းလႆႈတိုတ်ႉၸၼ်ဢဝ်မၼ်းသေလႄႈ ဢဝ်တၢႆဢေႃႈ။
15ၵေႃႉဢၼ်ပေႃႉယႅၼ်ႉပေႃႈမၼ်းမႄႈမၼ်းၼၼ်ႉ တၵ်းလႆႈၶၢမ်ႇတၢင်းဢၼ် ဢဝ်တၢႆဢမၢၼ်ႇၶၼ်ပဵၼ်ဢေႃႈ။
16ၵေႃႉဢၼ်လၵ်ႉဢဝ်ၵူၼ်းၼၼ်ႉ၊ ၶၢႆပႅတ်ႈသေဢမ်ႇဝႃႈ၊ ထူပ်းႁၼ်မီးယူႇၵႃႈၼႂ်းမိုဝ်းမၼ်းသေဢမ်ႇဝႃႈ၊ တၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။
17ၵေႃႉဢၼ်ၵိၼ်ႇလႃႇပေႃႈမႄႈမၼ်းၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။
18ပေႃးၵူၼ်းၼင်ႇၵၼ်ၵၼ် ၽိတ်းၵၼ်လႄႈ၊ ၵေႃႉၼိုင်ႈဢဝ်မၢၵ်ႇႁိၼ်ထုပ်ႉသေဢမ်ႇဝႃႈ၊ ဢဝ်တႃမိုဝ်းတမ်သေဢမ်ႇဝႃႈ၊ ၵေႃႉဢၼ်လႆႈၶၢမ်ႇတၢင်းဢၼ်ထုပ်ႉဢၼ်တႅင်းၼၼ်ႉ ယင်းဢမ်ႇတၢႆလႄႈလႆႈၼွၼ်းယဵတ်ႇယူႇၵႃႈၼိူဝ်တီႈၼွၼ်း၊- 19ပေႃးမၼ်းသမ်ႉလုၵ်ႉလႆႈလႄႈ ဢဝ်တင်းၶွၼ်ႉတဝ်ႉ တဝ်ႉဢွၵ်ႇၵႃႈၼွၵ်ႈၸိုင်၊ ၵေႃႉဢၼ်ပေႃႉယႅၼ်ႉၼၼ်ႉတၵ်းလႆႈလွတ်ႈဢေႃႈ။ ၵူၺ်းၵႃႈ တၵ်းလႆႈဢဝ်ငိုၼ်းယေႃႇသေ ပုၼ်ႈလွင်ႈတၢင်းဢၼ်မၼ်းၼၼ်ႉလႆႈၼင်ႈယူႇၼၼ်ႉလႄႈ ႁႂ်ႈမၼ်းလႆႈႁွတ်ႈထိုင်တၢင်းဢၼ်တၢင်းၸဵပ်းတၢင်းပဵၼ်မၼ်းၼၼ်ႉလႆႈၶႅၼ်းမႃးမူတ်းမူတ်းၼၼ်ႉဢေႃႈ။
20ပေႃးသေၵေႃႉသေၵူၼ်း ဢဝ်တင်းၶွၼ်ႉပေႃႉယႅၼ်ႉၶႃႈၵူၼ်းၸၢႆးမၼ်း၊ ဢမ်ႇၼၼ် ၶႃႈၵူၼ်းယိင်းမၼ်းလႄႈ မၼ်းၼၼ်ႉ တၢႆလူၺ်ႈမိုဝ်းမၼ်းၸိုင်၊ ၵေႃႉၼၼ်ႉ တၵ်းလႆႈၶၢမ်ႇတၢမ်ႇ ဢမၢၼ်ႇၶၼ်ပဵၼ်ဢေႃႈ။- 21ၵူၺ်းၵႃႈ ပေႃးၶႃႈၼၼ်ႉယူႇဝၼ်းၼိုင်ႈ၊ သွင်ဝၼ်းလႄႈဢမ်ႇတၢႆၸိုင်၊ ၸဝ်ႈမၼ်းၼၼ်ႉတၵ်းလႆႈၵၢင်းလွတ်ႈ တင်းတၢမ်ႇၵွပ်ႈပိူဝ်ႈဢၼ်ၶႃႈၼၼ်ႉ ပဵၼ်ငိုၼ်းမၼ်းၼၼ်ႉဢေႃႈ။
22ပေႃးၵူၼ်းၼင်ႇၵၼ်ၵၼ်ၽိတ်းၵၼ်လႄႈ တိူဝ်ႉထုၵ်ႇမႄႈယိင်းဢၼ်တူဝ်ဢမ်ႇသႃႇၼၼ်ႉမႅၼ်ႈသေယဝ်ႉ၊ လုၵ်ႈလၢင်းမၼ်းလူႉၵႂႃႇလႄႈ မၼ်းဢမ်ႇပဵၼ်တၢင်းၶႆႈတၢင်းပဵၼ်တၢင်ႇၸိူဝ်ႉတၢင်ႇပိူင်ၸိုင်၊ ၵေႃႉၼၼ်ႉ တၵ်းလႆႈၶၢမ်ႇတၢမ်ႇၸွမ်းၵႃႈၼင်ႇဢၼ် ၽူဝ်မႄႈယိင်းၸီႇယၢင်ႇၼၼ်ႉဢေႃႈ။ ၸွမ်းၵႃႈၼင်ႇဢၼ်ၶုၼ်ၸီႇယၢင်ႇၼၼ်ႉၵေႃႈ၊ ၵေႃႉၼၼ်ႉတၵ်းလႆႈယေႃႇလႆႈသေငိုၼ်းဢေႃႈ။- 23ပေႃးပဵၼ်တၢင်းၸဵပ်းတၢင်းပဵၼ်တၢင်ႇၸိူဝ်ႉတၢင်ႇပိူင်ၸိုင်၊ မႂ်းတၵ်းလႆႈပၼ်တၢမ်ႇဢသၢၵ်ႈပုၼ်ႈဢသၢၵ်ႈ၊- 24မၢၵ်ႇတႃပုၼ်ႈမၢၵ်ႇတႃ၊ ၶဵဝ်ႈပုၼ်ႈၶဵဝ်ႈ၊ မိုဝ်းပုၼ်ႈမိုဝ်း၊ တိၼ်ပုၼ်ႈတိၼ်၊- 25တၢင်းဢၼ်ၽႆးမႆႈပုၼ်ႈ တၢင်းဢၼ်ၽႆးမႆႈ၊ တၢင်းဢၼ်တိူဝ်ႉဢၼ်မၢတ်ႇပုၼ်ႈ တၢင်းဢၼ်တိူဝ်ႉဢၼ်မၢတ်ႇ၊ ႁွႆးၸဵပ်းပုၼ်ႈႁွႆးၸဵပ်းဢေႃႈ။
26ပေႃးသေၵေႃႉသေၵူၼ်း ပေႃႉယႅၼ်ႉသႂ်ႇမၢၵ်ႇတႃၶႃႈၵူၼ်းၸၢႆးမၼ်း၊ ဢမ်ႇၼၼ် မၢၵ်ႇတႃၶႃႈၵူၼ်းယိင်းမၼ်းႁႂ်ႈမၢၵ်ႇတႃလူႉၵႂႃႇၸိုင်၊ ၵွပ်ႈပိူဝ်ႈဢၼ်မၢၵ်ႇတႃမၼ်းလူႉၵႂႃႇၼၼ်ႉလႄႈ၊ ၵႃႈမၼ်းၶၼ်မၼ်းယင်းဢမ်ႇပႃးလႄႈ၊ တၵ်းလႆႈပွႆႇမၼ်းလွတ်ႈသေဢေႃႈ။- 27မိူၼ်ၼင်ႇၼၼ် ပေႃးပေႃႉယႅၼ်ႉသႂ်ႇၶဵဝ်ႈ ၶႃႈၵူၼ်းၸၢႆးမၼ်း၊ ဢမ်ႇၼၼ် ၶဵဝ်ႈၶႃႈၵူၼ်းယိင်းမၼ်း ႁႂ်ႈၶဵဝ်ႈလူႉၵႂႃႇၸိုင်၊ ၵွပ်ႈပိူဝ်ႈဢၼ် ၶဵဝ်ႈမၼ်းလူႉၵႂႃႇၼၼ်ႉလႄႈ၊ ၵႃႈမၼ်းၶၼ်မၼ်းယင်းဢမ်ႇပႃးလႄႈ တၵ်းလႆႈပွႆႇမၼ်းလွတ်ႈသေဢေႃႈ။
ပိင်းၺၢပ်ႈတြႃးပုၼ်ႈၸဝ်ႈဝူဝ်း
28ပေႃးဝူဝ်းတေႃးၵူၼ်းၸၢႆး၊ ဢမ်ႇၼၼ် ၵူၼ်းယိင်းမႅၼ်ႈလႄႈ ၶဝ်ၼၼ်ႉတၢႆၸိုင်၊ တၵ်းလႆႈဢဝ်တင်းမၢၵ်ႇႁိၼ်ထိမ်ႈဝူဝ်းၼၼ်ႉတၢႆဢမၢၼ်ႇၶၼ်ပဵၼ်ဢေႃႈ။ ၼိူဝ်ႉမၼ်းၵေႃႈဢမ်ႇလႆႈၵိၼ်။ ၸဝ်ႈဝူဝ်းၼၼ်ႉၸမ်ႉ၊ တၵ်းလႆႈၵၢင်းလွတ်ႈတင်းဢပႅတ်ႈဢေႃႈ။- 29ၼႂ်းဝႃႈၼၼ်သေၵေႃႈ ပေႃးဝူဝ်းၼၼ်ႉ ယၢမ်ႈတေႃးမိူဝ်ႈဢွၼ်ၼႆႉၼၼ်ႉလႄႈ ၸဝ်ႈမၼ်းလႆႈႁူႉငိၼ်းလွင်ႈဢၼ် မၼ်းၸၢင်ႈတေႃး ၼၼ်ႉယူႇသေလႄႈ၊ ယင်းဢမ်ႇမတ်ႉဢမ်ႇၽုၵ်ႇ ပွႆႇလွတ်ႈဝႆႉလႄႈ ဝူဝ်းၼၼ်ႉဢဝ်ၵူၼ်းၸၢႆးဢမ်ႇၼၼ် ၵူၼ်းယိင်းတၢႆၸိုင်၊ တၵ်းလႆႈဢဝ်တင်းမၢၵ်ႇႁိၼ်ထိမ်ႈဝူဝ်းၼၼ်ႉတၢႆဢေႃႈ။ ၸဝ်ႈဝူဝ်းၵေႃႈတၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။- 30ဢမ်ႇၼၼ်ၵေႃႈ ပေႃးၸီႇယၢင်ႇႁႂ်ႈယေႃႇငိုၼ်းသေငိုၼ်းၸိုင်၊ တၵ်းလႆႈယေႃႇငိုၼ်းသေငိုၼ်းပုၼ်ႈဢၼ်ထုတ်ႇဢဝ် ဢသၢၵ်ႈတူဝ်ၸဝ်ႈၵဝ်ႇၼၼ်ႉ ၸွမ်းၵႃႈၼင်ႇဢၼ် ၸီႇယၢင်ႇၼၼ်ႉဢေႃႈ။- 31ပေႃးတေႃးလုၵ်ႈၸၢႆးပိူၼ်ႈ၊ လုၵ်ႈယိင်းပိူၼ်ႈၸိုင်၊ တၵ်းလႆႈၶၢမ်ႇၸွမ်းၵႃႈၼင်ႇဢၼ် ၸီႇယၢင်ႇၼႆႉဢေႃႈ။- 32ပေႃးဝူဝ်းၼၼ်ႉတေႃးၶႃႈၵူၼ်းၸၢႆး၊ ဢမ်ႇၼၼ် ၶႃႈၵူၼ်းယိင်းၸိုင်၊ ၸဝ်ႈဝူဝ်းတၵ်းလႆႈပၼ်ငိုၼ်းၵျၢပ်ႈသၶေးလႃႉသၢမ်သိပ်းၵျၢပ်ႈ တီႈၸဝ်ႈၶႃႈၼၼ်ႉဢေႃႈ။ ဝူဝ်းၵေႃႈတၵ်းလႆႈဢဝ်တၢင်းမၢၵ်ႇႁိၼ်ထိမ်ႈတၢႆဢေႃႈ။
33ပေႃးသေၵေႃႉသေၵူၼ်း ၽုၺ်ႇႁူးၽုၺ်ႇၶုမ်ဝႆႉ၊ ဢမ်ႇၼၼ် ၶုတ်းႁူးၶုတ်းၶုမ်ဢမ်ႇႁူမ်ႇဝႆႉသေယဝ်ႉ၊ ဝူဝ်းပိူၼ်ႈလီႈပိူၼ်ႈတူၵ်းသႂ်ႇၵႃႈၼႂ်းႁူးၼႂ်းၶုမ်ၼၼ်ႉၸိုင်၊- 34ၸဝ်ႈႁူးၸဝ်ႈၶုမ်ၼၼ်ႉတၵ်းလႆႈပၼ်ငိုၼ်းတီႈၸဝ်ႈဝူဝ်းၸဝ်ႈလီႈၼၼ်ႉလႄႈ တူဝ်ဢၼ်တၢႆၼၼ်ႉ တၵ်းလႆႈပဵၼ်ဢုၵ်ႉၸႃႇမၼ်းဢေႃႈ။
35ပေႃးဝူဝ်းသေၵေႃႉသေၵူၼ်း တေႃးဝူဝ်းပိူၼ်ႈတၢႆၸိုင်၊ သွင်ၶႃတၵ်းလႆႈၶၢႆဝူဝ်းဢၼ်ဢသၢၵ်ႈလိပ်းၼၼ်ႉသေလႄႈ ဢဝ်ၵႃႈမၼ်းၶၼ်မၼ်း ၽႄမႅင်ႇၵၼ်ဢေႃႈ။ ဝူဝ်းဢၼ်တၢႆၼၼ်ႉၵေႃႈ တၵ်းလႆႈၽႄမႅင်ႇၵၼ်ဢေႃႈ။- 36ၼႂ်းဝႃႈၼၼ်သေၵေႃႈ ပေႃးၸဝ်ႈဝူဝ်းႁူႉလွင်ႈဢၼ် ဝူဝ်းမၼ်းယၢမ်ႈတေႃးမိူဝ်ႈဢွၼ်ၼႆႉၼၼ်ႉယူႇလႄႈ၊ ယင်းဢမ်ႇမတ်ႉဢမ်ႇၽုၵ်ႇ ပွႆႇလွတ်ႈဝႆႉၸိုင်၊ မၼ်းတၵ်းလႆႈဢဝ်ဝူဝ်းယေႃႇပၼ်ပုၼ်ႈဝူဝ်းတူဝ်ၼိုင်ႈၼၼ်ႉဢမၢၼ်ႇၶၼ်ပဵၼ်လႄႈ ဝူဝ်းဢၼ်တၢႆၼၼ်ႉ တၵ်းလႆႈပဵၼ်ဢုၵ်ႉၸႃႇမၼ်းဢေႃႈ။
Currently Selected:
ဢွၵ်ႇၵႂႃႇ 21: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
