ဢွၵ်ႇၵႂႃႇ 22

ပိင်းၺၢပ်ႈတြႃးလွင်ႈဢၼ်ယေႃႇဢၼ်တႅၼ်း

1ပေႃးသေၵေႃႉသေၵူၼ်းလၵ်ႉဢဝ်သူဝ်းဝူဝ်းၸိုင်၊ ဢဝ်တၢႆသေဢမ်ႇဝႃႈ၊ ၶၢႆပႅတ်ႈသေဢမ်ႇဝႃႈ၊ တၵ်းလႆႈတႅၼ်းပၼ် ပုၼ်ႈဝူဝ်းတူဝ်ၼိုင်ႈ ဝူဝ်းႁႃႈတူဝ်၊ ပုၼ်ႈသူဝ်းတူဝ်ၼိုင်ႈ သူဝ်းသီႇတူဝ်ဢေႃႈ။

2ပေႃးထူပ်းႁၼ်ၽူႈလၵ်ႉ ၼႂ်းမိူဝ်ႈဢၼ်မၼ်းယင်းတိုၵ်ႉၸီးမူင်ႇႁိူၼ်းယူႇၼၼ်ႉလႄႈ ပေႃႉယႅၼ်ႉမၼ်းၼၼ်ႉတၢႆၸိုင်၊- 3ဢမ်ႇလႆႈႁႂ်ႈၶၢမ်ႇတၢႆၵွပ်ႈပိူဝ်ႈမၼ်းၼၼ်ႉ။ ၼႂ်းဝႃႈၼၼ်သေၵေႃႈ ပေႃးၵၢင်ဝၼ်းဢွၵ်ႇယဝ်ႉၸိုင် တၵ်းလႆႈႁႂ်ႈၶၢမ်ႇတၢႆၵွပ်ႈပိူဝ်ႈမၼ်းၼၼ်ႉဢေႃႈ။ လွင်ႈမၼ်းၸမ်ႉ မီးလွင်ႈဢၼ်တၵ်းလႆႈတႅၼ်းပၼ်ဢေႃႈ။ ပေႃးမၼ်းၼၼ်ႉ ဢမ်ႇမီးဢုၵ်ႉၸႃႇလႃးလႃးၸိုင်၊ တၵ်းလႆႈၶၢႆတူဝ်မၼ်းပႅတ်ႈပုၼ်ႈ ဢုၵ်ႉၸႃႇဢၼ်မၼ်းလၵ်ႉၼၼ်ႉဢေႃႈ။- 4ဢုၵ်ႉၸႃႇဢၼ်မၼ်းလၵ်ႉၼၼ်ႉပဵၼ်ဝူဝ်းသေဢမ်ႇဝႃႈ၊ ပဵၼ်သူဝ်းသေဢမ်ႇဝႃႈ၊ ပေႃးထူပ်းႁၼ်ဢသၢၵ်ႈလိပ်းယူႇၵႃႈၼႂ်းမိုဝ်းမၼ်းၼၼ်ႉၸိုင် မၼ်းၼၼ်ႉတၵ်းလႆႈတႅၼ်းပၼ်သွင်ပုၼ်ႈဢေႃႈ။

5ပေႃးသေၵေႃႉသေၵူၼ်း ႁႂ်ႈၵိၼ်ႁႆႊၵိၼ်ၼႃးပိူၼ်ႈ၊ သူၼ်ဢူးယဵၼ်ႇၸပိတ်ႈပိူၼ်ႈ၊ ပေႃးပွႆႇတရိၵ်ႈသၢၼ်ႇတူဝ်ၸဝ်ႈၵဝ်ႇပႅတ်ႈလႄႈ တူဝ်ၼၼ်ႉၵႂႃႇၵိၼ်ႁႆႊၵိၼ်ၼႃးပိူၼ်ႈၸိုင်၊ မၼ်းတၵ်းလႆႈဢဝ်ဢၼ်လီသေပိူၼ်ႈၵႃႈၼႂ်းႁႆႊၼႂ်းၼႃးမၼ်း၊ ၵႃႈၼႂ်းသူၼ်ဢူးယဵၼ်ႇၸပိတ်ႈမၼ်းဢွၵ်ႇလႄႈ တႅၼ်းပၼ်ဢေႃႈ။- 6ပေႃးသႂ်ႇၽႆးလႄႈၽႆးၸပ်းတီႈယုမ်းၼၢမ်မႆႈလၢမ်းၵႂႃႇလႄႈ မႆႈပုမ်ႇၶဝ်ႈ၊ တူၼ်ႈၶဝ်ႈတင်းၵႃႈဢၼ်မီးၵႃႈၼႂ်းတူင်ႈၼႃးၸိုင်၊ ၵေႃႉဢၼ်သႂ်ႇၽႆးၼၼ်ႉ တၵ်းလႆႈတႅၼ်းပၼ်ဢမၢၼ်ႇၶၼ်ပဵၼ်ဢေႃႈ။

7ပေႃးသေၵေႃႉသေၵူၼ်း ဢဝ်ငိုၼ်းၶမ်းဢုၵ်ႉၸႃႇသေၸိူဝ်ႉသေပိူင်ၽၢၵ်ႇဝႆႉ ၵႃႈတီႈၵူၼ်းႁိူၼ်းၸမ်ၵၼ် ႁႂ်ႈလႆႈပႂ်ႉဝႆႉလႄႈ ၽူႈလၵ်ႉ လၵ်ႉဢဝ်ၵႃႈၼႂ်းႁိူၼ်းမၼ်းၼၼ်ႉၵႂႃႇၸိုင် မိူဝ်ႈဢၼ်ထူပ်းႁၼ်ၽူႈလၵ်ႉၼၼ်ႉ၊ မၼ်းတၵ်းလႆႈတႅၼ်းပၼ်သွင်ပုၼ်ႈဢေႃႈ။- 8ပေႃးဢမ်ႇထူပ်းဢမ်ႇႁၼ်ၽူႈလၵ်ႉၸိုင်၊ ၸဝ်ႈႁိူၼ်းၼၼ်ႉ တၵ်းလႆႈမႃးၵႃႈတီႈၽၢႆႇၼႃႈၽြႃးပဵၼ်ၸဝ်ႈလႄႈ ၶၢမ်ႇတၢင်းဢၼ်ၸႅတ်ႈထၢမ်လွင်ႈဢၼ်မၼ်းလႆႈဢဝ်ဢုၵ်ႉၸႃႇၵူၼ်းႁိူၼ်းၸမ်ၵၼ်ႁိုဝ်။ ဢမ်ႇလႆႈဢဝ်ႁိုဝ်ၼၼ်ႉဢေႃႈ။- 9ၼႂ်းလွင်ႈဢၼ်ၽိတ်းပိူင်ႈလူၺ်ႈဢုၵ်ႉၸႃႇပိူၼ်ႈၼၼ်ႉ၊ ပေႃးသေၵေႃႉသေၵူၼ်းထူပ်းႁၼ်ဝူဝ်း၊ လီႈ၊ သူဝ်း၊ ၶူဝ်းၼုင်ႈ၊ ဢုၵ်ႉၸႃႇဢၼ်ႁၢႆၵႂႃႇၼၼ်ႉ သေၸိူဝ်ႉသေပိူင်လႄႈဝႃႈ၊ ဢၼ်ၼႆႉၸမ်ႉ၊ ပဵၼ်ဢုၵ်ႉၸႃႇၵဝ်ဢေႃႈ၊ ဝႃႈၼင်ႇၼႆၸိုင်၊ ဢမူႉသွင်ၶႃၼၼ်ႉ တၵ်းလႆႈႁွတ်ႈထိုင်ၵႃႈတီႈ ၽၢႆႇၼႃႈၽြႃးပဵၼ်ၸဝ်ႈလႄႈ ၵေႃႉဢၼ်ၽြႃးပဵၼ်ၸဝ်ႈႁႂ်ႈသုမ်းၼၼ်ႉ တၵ်းလႆႈတႅၼ်းပၼ်သွင်ပုၼ်ႈဢေႃႈ။

10ပေႃးသေၵေႃႉသေၵူၼ်း ဢဝ်လီႈ၊ သူဝ်း၊ ဝူဝ်း၊ တရိၵ်ႈသၢၼ်ႇသေၸိူဝ်ႉသေမဵဝ်း ၽၢၵ်ႇဝႆႉၵႃႈၼႂ်းမိုဝ်းၵူၼ်းႁိူၼ်းၸမ်ၵၼ်လႄႈ၊ တူဝ်ၼၼ်ႉတၢႆသေဢမ်ႇဝႃႈ၊ တိူဝ်ႉထုၵ်ႇမႅၼ်ႈလႄႈပဵၼ်ၸဵပ်းပဵၼ်သႅပ်ႇသေဢမ်ႇဝႃႈ၊ ၽူႈလႂ်ယင်းဢမ်ႇႁၼ်လႄႈ ပိူၼ်ႈတၢင်ႇၵေႃႉ ႁေႃႈဢဝ်ၵႂႃႇသေဢမ်ႇဝႃႈ၊- 11တၢင်းဢၼ်မၼ်းၵိၼ်ႇဝႃႈၵႃႈတီႈၽၢႆႇၼႃႈထႃႇဝရႃႉၽြႃး လွင်ႈဢၼ်မၼ်းဢမ်ႇလႆႈဢဝ်ဢုၵ်ႉၸႃႇၵူၼ်းႁိူၼ်းၸမ်ၵၼ်တင်းမၼ်းၼၼ်ႉ တၵ်းလႆႈမီးဝူင်ႈၵၢင်ၶဝ်သွင်ၽၢႆႇသွင်ပႃႈဢေႃႈ။ ၸဝ်ႈဢုၵ်ႉၸႃႇတၵ်းလႆႈႁပ်ႉတုင်းဢဝ်လႄႈ မၼ်းၼၼ်ႉၵေႃႈ၊ ဢမ်ႇလႆႈတႅၼ်းလႆႈပၼ်။- 12ၵူၺ်းၵႃႈ ပေႃးပိူၼ်ႈတၢင်ႇၵေႃႉလၵ်ႉဢဝ်ၵႃႈၼႂ်းမိုဝ်းမၼ်းၼၼ်ႉၵႂႃႇၸိုင်၊ မၼ်းၼၼ်ႉတၵ်းလႆႈတႅၼ်းပၼ်တီႈၸဝ်ႈဢုၵ်ႉၸႃႇဢေႃႈ။- 13ပေႃးတူဝ်ၼၼ်ႉ ၶၢမ်ႇတၢင်းဢၼ်ၶူပ်းယွၵ်းၶူပ်းယွႆႈပႅတ်ႈၸိုင်၊ ႁႂ်ႈဢဝ်တူဝ်တၢႆၼၼ်ႉၼႄပျႃးပုၼ်ႈသၢၵ်ႈသေႇတႃႉ။ မၼ်းၼၼ်ႉ ဢမ်ႇလႆႈတႅၼ်းလႆႈပၼ်ပုၼ်ႈတူဝ်ဢၼ် ၶၢမ်ႇတၢင်းဢၼ်ၶူပ်းယွၵ်းၶူပ်းယွႆႈပႅတ်ႈၼၼ်ႉ။

14ပေႃးသေၵေႃႉသေၵူၼ်း ယိမ်ဢဝ်တူဝ်ၵႃႈသင်သေဢမ်ႇဝႃႈ တီႈၵူၼ်းႁိူၼ်းၸမ်ၵၼ်လႄႈ ၸဝ်ႈမၼ်းယင်းဢမ်ႇပႃး၊ တိူဝ်ႉမၢတ်ႇမႅၼ်ႈလႄႈ ပဵၼ်ၸဵပ်းပဵၼ်သႅပ်ႇသေဢမ်ႇဝႃႈ၊ တၢႆသေဢမ်ႇဝႃႈ၊ တၵ်းလႆႈတႅၼ်းလႆႈပၼ် ဢမၢၼ်ႇၶၼ်ပဵၼ်ဢေႃႈ။- 15ပေႃးၸဝ်ႈမၼ်းပႃးယူႇၸိုင်၊ မၼ်းၼၼ်ႉဢမ်ႇလႆႈတႅၼ်းလႆႈပၼ်။ ပေႃးပဵၼ်တူဝ်ဢၼ်လႆႈဢဝ်တင်းၵႃႈမၼ်းၶၼ်မၼ်းၶၢတ်ႈဢဝ်ၸမ်ႉ၊ ပဵၼ်တူဝ်ဢၼ်မႃးၵွပ်ႈပိူဝ်ႈၵႃႈၶၼ်ဢၼ်ၶၢတ်ႈဢဝ်ၼၼ်ႉၵူၺ်းဢေႃႈ။

ပိင်းၺၢပ်ႈတြႃးဢၼ်ၸၢပ်ႈသႅင်ႇၵၼ်တင်းသိၼ်ထမ်း

16ပေႃးၵူၼ်းၸၢႆးသေၵေႃႉသေၵူၼ်း ၶျေႃးဢဝ်ၽူႈသၢဝ်ဢၼ်ၽူႈလႂ်ဢမ်ႇပႆႇမၢႆဝႆႉၼၼ်ႉလႄႈ တိူဝ်ႉထုၵ်ႇၵၼ်တင်းမၼ်းၸိုင်၊ တၵ်းလႆႈပၼ်ငိုၼ်းၵၼ်ႇတေႃးသေလႄႈ ဢဝ်မႄႈယိင်းၼၼ်ႉ ယွင်ႈဝႆႉၼႂ်းဢရႃႇမေးဢေႃႈ။- 17ပေႃးပေႃႈမၼ်းဢမ်ႇမီးသၽေႃး ဢၼ်ၶႂ်ႈဢဝ်ပၼ်ၵၼ်ၸိုင်၊ ၵေႃႉၼၼ်ႉတၵ်းလႆႈယေႃႇငိုၼ်းသေငိုၼ်းၵႃႈၼင်ႇဢၼ် တၵ်းလႆႈၵၼ်ႇတေႃးပုၼ်ႈၽူႈသၢဝ်ၼၼ်ႉဢေႃႈ။

18မႂ်းဢမ်ႇလႆႈပၼ်ဢၶႂၢင်ႉႁႂ်ႈမႄႈၽိူဝ်ႉဢသၢၵ်ႈလႆႈလိပ်းယူႇ။

19ၵေႃႉဢၼ်သိူၵ်ႈသမ်ႇၵၼ်တင်းတရိၵ်ႈသၢၼ်ႇၼၼ်ႉၸိုင် တၵ်းလႆႈၶၢမ်ႇတၢင်းဢၼ်ဢဝ်တၢႆ ဢမၢၼ်ႇၶၼ်ပဵၼ်ဢေႃႈ။

20လိူဝ်သေတီႈထႃႇဝရႃႉၽြႃးပႃးလဵဝ်ၵူၺ်း၊ ၵေႃႉဢၼ်ပုၵ်ႈၸေႃႇယိတ်ႈတီႈၽြႃးတၢင်ႇသူႇတၢင်ႇပႃးၼၼ်ႉၸိုင်၊ တၵ်းလႆႈၶၢမ်ႇတၢင်းဢၼ်ယႃႉပႅတ်ႈမူတ်းမူတ်းဢေႃႈ။

21မႂ်းဢမ်ႇလႆႈယႃႉလႆႈယူၵ်ႉၶႅၵ်ႇ ဢၼ်ပဵၼ်ၵူၼ်းတၢင်ႇဝၢၼ်ႈတၢင်ႇမိူင်းၼၼ်ႉ။ ဢမ်ႇလႆႈၼိၵ်ႈၸၢၵ်ႈငႅၼ်းသႄးမၼ်း။ လွင်ႈမၼ်းၸမ်ႉ သူယၢမ်ႈလႆႈပဵၼ်ၶႅၵ်ႇၵႃႈၼႂ်းမိူင်းဢေႇၵိပ်ႉတူႉမႃးယဝ်ႉ။

22သူဢမ်ႇလႆႈယႃႉလႆႈယူၵ်ႉမႄႈမူၵ်းမႄႈမၢႆႈ ဢိၵ်ႇတင်းလုၵ်ႈဢွၼ်ႇၵေႃႉဢၼ်ဢမ်ႇမီးပေႃႈမီးမႄႈၼၼ်ႉ။- 23ပေႃးမႂ်းႁဵတ်းတၢင်းဢၼ်ယႃႉယူၵ်ႉသေၸိူဝ်ႉသေပိူင်တီႈၶဝ်လႄႈ ၶဝ်ႁွင်ႉသႅၼ်ႇတီႈၵဝ်သေဢိတ်းၸိုင်၊ ၵဝ်တၵ်းငိၼ်းသဵင်ၶဝ်ၼၼ်ႉ ဢမၢၼ်ႇၶၼ်ပဵၼ်လႄႈ၊- 24ၸႂ်မႆႈၶႆႈၸႃႉၼႃႇလူင်လၢင်ယူႇသေလႄႈ ဢဝ်သူတၢႆလူၺ်ႈၽေးလၢပ်ႇဢေႃႈ။ မေးသူတင်းလၢႆၵေႃႈ၊ တၵ်းဢွၼ်ၵၼ်ပဵၼ် မႄႈမူၵ်းမႄႈမၢႆႈလႄႈ လုၵ်ႈဢွၼ်ႇသူတင်းလၢႆၵေႃႈ၊ တၵ်းဢွၼ်ၵၼ်ပဵၼ်လုၵ်ႈဢွၼ်ႇ ဢၼ်ဢမ်ႇမီးပေႃႈမီးမႄႈဢေႃႈ။

25ပေႃးမႂ်းပၼ်ၵူၼ်းယၢၵ်ႈၵူၼ်းၽၢၼ် ဢၼ်ပဵၼ်ၵူၼ်းၵဝ်မိူၼ်ၼင်ႇမႂ်းၼၼ်ႉ ၵူႈဢဝ်ငိုၼ်းမႂ်းၸိုင်၊ မႂ်းဢမ်ႇလႆႈႁဵတ်းၸိူဝ်ႉၼင်ႇ ၵေႃႉဢၼ်ၵိၼ်ၶီႈငိုၼ်းၼၼ်ႉတီႈမၼ်း။ မႂ်းဢမ်ႇလႆႈယွၼ်းဢဝ်ၶီႈတီႈမၼ်း။- 26ပေႃးၵူၼ်းႁိူၼ်းၸမ်ၵၼ် ဢဝ်ၽႃႈႁူမ်ႇၽႃႈမႆ ပွင်ႇဝႆႉၵမ်ႉဝႆႉတီႈမႂ်းၸိုင်၊ မႂ်းတၵ်းလႆႈၶိုၼ်းပၼ်တီႈမၼ်း ၸူဝ်ႈဢၼ်ၵၢင်ဝၼ်းဢမ်ႇပႆႇတူၵ်းၼၼ်ႉဢေႃႈ။- 27လွင်ႈမၼ်းၸမ်ႉ လိူဝ်သေၼၼ်ႉမၼ်းဢမ်ႇမီးပုၼ်ႈဢၼ်တၵ်းႁူမ်ႇတၵ်းမႆတၢင်ႇၸိူဝ်ႉတၢင်ႇပိူင်။ ပဵၼ်ပုၼ်ႈဢၼ်တၵ်းႁူမ်ႇၼိူဝ်ႉ ႁူမ်ႇၼင်မၼ်းဢေႃႈ။ မၼ်းတၵ်းႁဵတ်းၸိူဝ်ႉၼင်ႇႁိုဝ်လႄႈၼွၼ်းလႆႈ။ ပေႃးမၼ်းႁွင်ႉသႅၼ်ႇတီႈၵဝ်ၸိုင်၊ ၵဝ်တၵ်းငိၼ်းဢေႃႈ။ ၵဝ်မီးသၽေႃးဢၼ်ဢဵတ်းလူဢေႃႈ။

28မႂ်းဢမ်ႇလႆႈလၢတ်ႈပူၼ်ႉလၢတ်ႈလိူဝ် ၽြႃးပဵၼ်ၸဝ်ႈလႄႈ ဢမ်ႇလႆႈၵိၼ်ႇလႆႈလႃႇ ၶုၼ်ဢၼ်ဢုပ်ႉပိူင်ႇၸိူဝ်ႉၶိူဝ်းမႂ်းၼၼ်ႉ။- 29ယင်းဢမ်ႇႁဵတ်းၵွႆႈႁဵတ်းထိူင်းလႄႈ မႂ်းတၵ်းလႆႈဢဝ်မၢၵ်ႇဢၼ်သုၵ်းဢွၼ်တၢင်းပိူၼ်ႈ ဢိၵ်ႇတင်းတၢင်းဢၼ်ပဵၼ်ၼမ်ႉ ဢၼ်မိပ်ႇဢွၵ်ႇဢွၼ်တၢင်းပိူၼ်ႈၼၼ်ႉ သၢၵ်ႈၵၢပ်ႈဢေႃႈ။ လုၵ်ႈၸၢႆးဢၼ်ၵိူတ်ႇလဵင်ႉမႃးဢွၼ်တၢင်းၼၼ်ႉၵေႃႈ၊ မႂ်းတၵ်းလႆႈသၢၵ်ႈၵၢပ်ႈတီႈၵဝ်ဢေႃႈ။- 30မိူၼ်ၼင်ႇၼၼ် မႂ်းတၵ်းလႆႈဢဝ်သူဝ်းဝူဝ်းမႂ်းတင်းလၢႆႁဵတ်းဢေႃႈ။ ၸဵတ်းဝၼ်းတဵမ်တဵမ် ႁႂ်ႈသူဝ်းဢွၼ်ႇဝူဝ်းဢွၼ်ႇယူႇလူၺ်ႈၵၼ်တင်းမႄႈမၼ်းလႄႈ မိူဝ်ႈဢၼ်ႁွတ်ႈထိုင်ဝၼ်းဢႃႉထမႃႉၼၼ်ႉၸိုင်၊ တၵ်းလႆႈသၢၵ်ႈၵၢပ်ႈတီႈၵဝ်ဢေႃႈ။

31သူတၵ်းလႆႈပဵၼ်ၵေႃႉဢၼ် မူတ်းၸၢင်ႇတီႈၵဝ်ဢေႃႈ။ ပိူဝ်ႈၼႆလႄႈ မႂ်းဢမ်ႇလႆႈၵိၼ်ၼိူဝ်ႉဢၼ်တူဝ်ထိူၼ်ႇၶူပ်းယွၵ်းၶူပ်းယွႆႈပႅတ်ႈၵႃႈတီႈထိူၼ်ႇၼၼ်ႉ၊ တၵ်းလႆႈဢဝ်ထိမ်ႈပၼ်တီႈမႃသေဢေႃႈ။

Currently Selected:

ဢွၵ်ႇၵႂႃႇ 22: CBMS

Highlight

Compare

Copy