ဢွၵ်ႇၵႂႃႇ 23

တြႃးတၢင်းဢၼ်ႁဵတ်းၽဵင်ႇၽဵင်ႇ

1မႂ်းဢမ်ႇလႆႈမွၵ်ႇလႆႈလၢတ်ႈသတၢင်းသဵင်ၶၢဝ်ႇ ဢၼ်ၽိတ်းဢၼ်ပိူင်ႈၼၼ်ႉ။ မႂ်းဢမ်ႇလႆႈတူပ်းမိုဝ်းၵၼ်တင်းၶဝ်ၸိူဝ်းဢၼ်ဢမ်ႇတြႃးလႄႈ ၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈ။- 2မႂ်းဢမ်ႇလႆႈၸွမ်းလင်ၵူၼ်းၼမ်ၼႃႇလႄႈ ႁဵတ်းဢၼ်ဢမ်ႇတြႃး။ ၼႂ်းလွင်ႈဢၼ်လၢတ်ႈဢမူႉၼၼ်ႉ၊ မႂ်းဢမ်ႇလႆႈယူႇၽၢႆႇၵူၼ်းယႂ်ႇၵူၼ်းၼမ်သေလႄႈ လၢတ်ႈႁႂ်ႈပိူင်ႈသဵၼ်ႈတၢင်းတြႃး။- 3ၽၢႆႇၵူၼ်းဢၼ်ယၢၵ်ႈဢၼ်ၽၢၼ်ၵေႃႈ မႂ်းဢမ်ႇလႆႈလူၼႃႈ။

4ပေႃးမႂ်းထူပ်းႁၼ်ဝူဝ်း၊ လီႈ၊ ရၢၼ်ႇသူႇမႂ်းၽိတ်းတၢင်းပိူင်ႈတၢင်းၵႂႃႇၸိုင်၊ မႂ်းတၵ်းလႆႈဢဝ်ၶိုၼ်းသူင်ႇပၼ်တီႈမၼ်းၼၼ်ႉ ဢမၢၼ်ႇၶၼ်ပဵၼ်ဢေႃႈ။- 5ပေႃးမႂ်းထူပ်းႁၼ်လီႈ ၵေႃႉဢၼ်ၸင်းမႂ်းၼၼ်ႉ လူမ်ႉယူႇၵႃႈတႂ်ႈ တင်းၶူဝ်းဢၼ်တၢင်ႇဝႆႉၼၼ်ႉၸိုင်၊ ပိၵ်ႉသမ်ႉမႂ်းဢမ်ႇမီးဢလူဝ်ႇၶႂ်ႈၸွႆႈၶႂ်ႈထႅမ်သေၵေႃႈ မႂ်းတၵ်းလႆႈၽွမ်ႉလူၺ်ႈၵၼ်တင်းမၼ်းလႄႈ ၸွႆႈထႅမ်ဢေႃႈ။- 6ၼႂ်းမိူဝ်ႈဢၼ်ၵူၼ်းယၢၵ်ႈၵူၼ်းၽၢၼ် လၢတ်ႈဢမူႉတြႃးတီႈမႂ်းၼၼ်ႉ၊ မႂ်းဢမ်ႇလႆႈဝႄႈပိူင်ႈသဵၼ်ႈတၢင်းတြႃးသေလႄႈၸီႇယၢင်ႇ။- 7မႂ်းတၵ်းလႆႈဝႄႈပႅတ်ႈ ဢမူႉဢၼ်ဢမ်ႇၸိုဝ်ႈဢမ်ႇၸႂ်ႈဢေႃႈ။ မႂ်းဢမ်ႇလႆႈဢဝ်ၵေႃႉဢၼ်ဢမ်ႇမီးဢပႅတ်ႈ၊ ၵေႃႉဢၼ်သိုဝ်ႈတေႃႇၼၼ်ႉတၢႆ။ လွင်ႈမၼ်းၸမ်ႉ ၵဝ်တၵ်းဢမ်ႇပွႆႇၶဝ်ၸိူဝ်းဢၼ်ဢမ်ႇတြႃးၼၼ်ႉလွတ်ႈဢပႅတ်ႈလႃးလႃးၵူၺ်ႉ။

8မႂ်းဢမ်ႇလႆႈၵိၼ်လၢၵ်ႈသွင်ႇ။ လၢၵ်ႈသွင်ႇၸိုင်၊ ၸၢင်ႈႁႂ်ႈတႃၶဝ်ၸိူဝ်းဢၼ် မီးပိင်ႇၺႃႇၼၼ်ႉလပ်းၵႂႃႇမွတ်ႇၵႂႃႇလႄႈ ၸၢင်ႈႁႂ်ႈၵႂၢမ်းၶဝ်ၸိူဝ်းဢၼ်သိုဝ်ႈတေႃႇၼၼ်ႉ ပိူင်ႈၵႂႃႇၽိတ်းၵႂႃႇဢေႃႈ။- 9မႂ်းဢမ်ႇလႆႈၼိၵ်ႈၸၢၵ်ႈငႅၼ်းသႄး ၶႅၵ်ႇဢၼ်ပဵၼ်ၵူၼ်းတၢင်ႇဝၢၼ်ႈတၢင်ႇမိူင်းၼၼ်ႉ။ ပိူဝ်ႈဢၼ်သူယၢမ်ႈလႆႈပဵၼ်ၶႅၵ်ႇ ၵႃႈၼႂ်းမိူင်းဢေႇၵိပ်ႉတူႉမႃးယဝ်ႉလႄႈ သူႁူႉၸႂ်သၽေႃးၶႅၵ်ႇယူႇဢေႃႈ။

ပီႊဢၼ်ထူၼ်ႈၸဵတ်းပီႊလႄႈဝၼ်းဢၼ်ထူၼ်ႈၸဵတ်းဝၼ်း

10ႁူၵ်းပီႊတဵမ်တဵမ်မႂ်းတၵ်းလႆႈႁဵတ်းႁႆႊႁဵတ်းၼႃးလႄႈသိမ်းဢဝ်မၢၵ်ႇဢဝ်ႁူင်းဢေႃႈ။- 11ပီႊသတ်ႉတမႃႉၸိုင်၊ မႂ်းဢမ်ႇလႆႈႁဵတ်းၼႃးလႄႈတၵ်းလႆႈပွႆႇဝႆႉၽႃႈဝႆႉဢေႃႈ။ ပေႃးႁဵတ်းၸိူဝ်ႉၼင်ႇၼၼ်ႉၸိုင်၊ ၶဝ်ၸိူဝ်းဢၼ်ယၢၵ်ႈဢၼ်ၽၢၼ် ၼႂ်းၸိူဝ်ႉၶိူဝ်းမႂ်းၼၼ်ႉ တၵ်းမီးဢၶႂၢင်ႉဢၼ်လႆႈၵိၼ်ဢေႃႈ။ ဢၼ်ၶဝ် ဝႆႉၵိုတ်းဝႆႉၵျၢၼ်ႇၼၼ်ႉၵေႃႈ တရိၵ်ႈသၢၼ်ႇဢၼ်မီးၵႃႈၼိူဝ်လိၼ် တၵ်းလႆႈၵိၼ်ဢေႃႈ။ မိူၼ်ၼင်ႇၼၼ် တီႈသူၼ်ဢူးယဵၼ်ႇၸပိတ်ႈတင်းသူၼ်ဢူးယဵၼ်ႇသၢၼ်ႇလုၼ်ႇၵေႃႈ၊ မႂ်းတၵ်းလႆႈႁဵတ်းဢေႃႈ။- 12ႁူၵ်းဝၼ်းတဵမ်တဵမ် မႂ်းတၵ်းလႆႈႁဵတ်းတၢင်းႁဵတ်းဢေႃႈ။ ဝၼ်းသတ်ႉတမႃႉၸိုင်၊ တၵ်းလႆႈယူႇၼိမ်ၼိမ်လီလီဢေႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ဝူဝ်းမႂ်း၊ လီႈမႂ်းၼၼ်ႉ တၵ်းမီးဢၶႂၢင်ႉဢၼ်လႆႈယူႇၼိမ်ၼိမ်လီလီလႄႈ လုၵ်ႈၸၢႆးၶႃႈၵူၼ်းယိင်းမႂ်း တင်းလၢႆ ဢိၵ်ႇတင်း ၶႅၵ်ႇတင်းလၢႆၵေႃႈ တၵ်းလႆႈတၢင်းဢၼ်သၢၵ်ႈသႃႇဢေႃႈ။- 13ၼႂ်းၵႃႈဢၼ်ၵဝ်ပိင်းၺၢပ်ႈဝႆႉၼႆႉ၊ ႁဵတ်းသတီႉတႃႉ။ ၼႃႇမႃႉၸိုဝ်ႈသဵင်ၽြႃးတၢင်ႇသူႇတၢင်ႇပႃးၸိုင်၊ ယႃႇပေလၢတ်ႈပေဝႃႈ။ သဵင်ဢၼ်ဢွၵ်ႇၵႃႈၼႂ်းသူပ်းမႂ်းၸိူဝ်ႉၼင်ႇၼၼ်ၼၼ်ႉၸိုင်၊ ယႃႇပေႁႂ်ႈပိူၼ်ႈတၢင်ႇၵေႃႉလႆႈငိၼ်း။

ပွႆးလူင်သၢမ်မဵဝ်း

(တူၺ်း၊ ဢွၵ်ႇ 34:18-26။ ႁေႃး 16:1-17)

14ၼႂ်းယေႈပီႊ တၵ်းလႆႈၶၢမ်ႇပွႆးပုၼ်ႈၵဝ် သၢမ်ပွၵ်ႈဢေႃႈ။- 15တၵ်းလႆႈၶၢမ်ႇပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈလႄႈ ၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈ ၸဵတ်းဝၼ်းတဵမ်တဵမ် ၼႂ်းၶိင်ႇဝၼ်း ဢၼ်မၵ်းၶၢၼ်းဝႆႉ လိူၼ်ဢပီႉပႃႉၼၼ်ႉ ၸွမ်းၵႃႈၼင်ႇဢၼ် ၵဝ်သင်ႇလၢတ်ႈဝႆႉယဝ်ႉၼၼ်ႉဢေႃႈ။ လွင်ႈမၼ်းၸမ်ႉ ၼႂ်းလိူၼ်ၼၼ်ႉ မႂ်းလႆႈဢွၵ်ႇသေ ၵႃႈၼႂ်းမိူင်းဢေႇၵိပ်ႉတူႉမႃးဢေႃႈ။ ၼႂ်းမိူဝ်ႈဢၼ်ၶၢမ်ႇပွႆးၼၼ်ႉ၊ ၽူႈလႂ်ဢမ်ႇလႆႈမႃး ၵႃႈတီႈၽၢႆႇၼႃႈထႃႇဝရႃႉၽြႃး တိၼ်လၢႆမိုဝ်းပဝ်ႇ။- 16မႂ်းတၵ်းလႆႈၶၢမ်ႇပွႆး ဢၼ်သိမ်းမၢၵ်ႇသိမ်းႁူင်း ဢၼ်ပဵၼ်မၢၵ်ႇပဵၼ်ႁူင်း ဢွၼ်တၢင်းပိူၼ်ႈ ၵႃႈၼႂ်းႁႆႊၼႂ်းၼႃး ဢၼ်မႂ်းၽုၵ်ႇသွမ်ႈၼၼ်ႉ ဢိၵ်ႇတင်းပွႆးဢၼ်သိမ်းဢဝ်မၢၵ်ႇဢဝ်ႁူင်းဝႆႉ မိူဝ်ႈဢၼ်ပီႊပုတ်ႈပီႊလၢႆႈ မိူဝ်ႈဢၼ်မႂ်းသိမ်းဢဝ်မၢၵ်ႇဢဝ်ႁူင်း ဢွၵ်ႇသေၵႃႈၼႂ်းႁႆႊၼႂ်းၼႃးမႂ်း ဝႆႉယဝ်ႉၼၼ်ႉဢေႃႈ။- 17ၼႂ်းသူၵႃႈပဵၼ်ၽူႈၸၢႆးတင်းသဵင်ႈတင်းလူင် တၵ်းလႆႈၼႄပျႃးၼႃႈတူဝ်ၸဝ်ႈၵဝ်ႇ ၵႃႈတီႈၽၢႆႇၼႃႈၸဝ်ႈထႃႇဝရႃႉၽြႃးပဵၼ်ၸဝ်ႈ ယေႈပီႊသၢမ်ပွၵ်ႈဢေႃႈ။- 18မႂ်းဢမ်ႇလႆႈဢဝ်လိူတ်ႈတူဝ်ယိတ်ႈၵဝ်ပုၵ်ႈၸေႃႇလူၺ်ႈၵၼ်တင်းၶဝ်ႈမုၼ်း ဢၼ်ပႃးၸိူဝ်ႉပႅင်ႈ။ ၵွၼ်ႈၶႆၵွၼ်ႈမၼ်းတူဝ်ယိတ်ႈၵဝ်ၵေႃႈ ဢမ်ႇလႆႈဝႆႉၵိုတ်းဝႆႉၵျၢၼ်ႇတင်းၶိုၼ်း တေႃႇထိုင်ႁွတ်ႈၶိင်ႇၵၢင်ၼႂ်။- 19မႂ်းတၵ်းလႆႈဢဝ်ဢၼ်ဢွၼ်တၢင်းသုတ်းပိူၼ်ႈ ၵႃႈၼႂ်းမၢၵ်ႇၼႂ်းႁူင်း ဢၼ်မၢၵ်ႇဢွၼ်တၢင်းပိူၼ်ႈ ၵႃႈတီႈလိၼ်မႂ်းၼၼ်ႉမႃးသႂၢင်းၵႃႈၼႂ်းႁိူၼ်း ထႃႇဝရႃႉၽြႃး ၽြႃးပဵၼ်ၸဝ်ႈမႂ်းဢေႃႈ။ မႂ်းဢမ်ႇလႆႈဢဝ်ပႄႉဢွၼ်ႇတူမ်ႈႁုင်ၼႂ်းၼမ်ႉၼူမ်းမႄႈမၼ်း။

ၵႂၢမ်းၵတီႉလႄႈၶေႃႈသင်ႇၽြႃးပဵၼ်ၸဝ်ႈ

20တူၺ်းလူး၊ ၵဝ်တၵ်းပွႆႇၸႂ်ႉတမၢၼ်ႇၵၢင်ႁၢဝ်ဢွၼ်ႁူဝ်မႂ်းၵႂႃႇ ႁႂ်ႈလႆႈပႂ်ႉလူပႂ်ႉတူၺ်းမႂ်းၵႃႈတႃႈၵႃႈတၢင်းလႄႈ ဢဝ်မႂ်းသူင်ႇၵႃႈတီႈ ဢၼ်ၵဝ်မႄးႁႅၼ်းဝႆႉၼၼ်ႉဢေႃႈ။- 21ႁဵတ်းသတီႉတီႈမၼ်းၼၼ်ႉလႄႈ ထွမ်ႇဢဝ်ၵႂၢမ်းမၼ်းတႃႉ။ ယႃႇပေၵၢတ်ႈပေႁႄႉဢလူဝ်ႇမၼ်း။ မၼ်းတၵ်းဢမ်ႇပွႆႇဢမ်ႇလွတ်ႈဢပႅတ်ႈ ဢၼ်သူၽိတ်းပိူင်ႈၼၼ်ႉၵူၺ်ႉ။ ၼႃႇမႃႉၸိုဝ်ႈသဵင်ၵဝ်မီးယူႇၵႃႈၼႂ်းမၼ်းၼၼ်ႉဢေႃႈ။- 22ပေႃးမႂ်းထွမ်ႇဢဝ်ၵႂၢမ်းမၼ်းဢမၢၼ်ႇၶၼ်ပဵၼ်လႄႈ ႁဵတ်းၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉၼၼ်ႉၸိုင်၊ ၵဝ်တၵ်းႁဵတ်းရၢၼ်ႇသူႇ တီႈရၢၼ်ႇသူႇမႂ်းတင်းလၢႆၼၼ်ႉလႄႈ တီႈၶဝ်ၸိူဝ်းဢၼ်ႁႄႉဢၼ်ၶႅၼ်မႂ်းၼၼ်ႉၵေႃႈ ၵဝ်တၵ်းႁဵတ်းၵေႃႉဢၼ်ႁႄႉဢၼ်ၶႅၼ်ဢေႃႈ။- 23တမၢၼ်ႇၵဝ်တၵ်းဢွၼ်ႁူဝ်မႂ်းၵႂႃႇလႄႈ ဢဝ်မႂ်းသႂၢင်းၶဝ်ႈၵႃႈတီႈၼႂ်းၵူၼ်းဢႃႇမေႃးရီႉ၊ ၵူၼ်းႁိတ်ႉတီႉ၊ ၵူၼ်းၽေႇရၸီႉ၊ ၵူၼ်းၶႃႇၼၼီႉ၊ ၵူၼ်းႁီႉဝီႉ၊ ၵူၼ်းယေႇပူႉသီႉၸိူဝ်းၼၼ်ႉလႄႈ၊ ၵဝ်ၵေႃႈတၵ်းပႄႇၽဵဝ်ႈၶဝ်ၼၼ်ႉပႅတ်ႈဢေႃႈ။- 24တီႈၽြႃးၶဝ်ၸိူဝ်းၼၼ်ႉၵေႃႈ၊ မႂ်းဢမ်ႇလႆႈၵူမ်ႈႁူဝ်ၵွမ်းႁူဝ်။ ဢမ်ႇလႆႈႁဵတ်းဝူတ်ႈႁဵတ်းဝၢတ်ႈ။ ဢမ်ႇလႆႈၵမ်လႆႈၵျၢင်ႉၸွမ်းၼင်ႇၽႃႇသႃႇၶဝ်ၼၼ်ႉ။ မႂ်းတၵ်းလႆႈဢဝ်ၶဝ်ၶႂမ်ႈပိၼ်ႈပႅတ်ႈတင်းသဵင်ႈတင်းမူတ်းလႄႈ ႁၵ်းႁဵၵ်းသဝ်တီႈၵူဝ်းၵႂၢႆႇၶဝ်ၼၼ်ႉပႅတ်ႈ မူတ်းမူတ်းသဵင်ႈသဵင်ႈဢေႃႈ။- 25သူတၵ်းလႆႈႁဵတ်းဝူတ်ႈႁဵတ်းဝၢတ်ႈတီႈထႃႇဝရႃႉၽြႃး ၽြႃးပဵၼ်ၸဝ်ႈသူၵူၺ်းဢေႃႈ။ မၼ်းၸဝ်ႈတၵ်းပၼ်တၢင်းလီတီႈၶဝ်ႈမုၼ်းမႂ်း ဢိၵ်ႇတင်းတီႈၼမ်ႉမႂ်းဢေႃႈ။ ၵဝ်တၵ်းဢဝ်တၢင်းၶႆႈတၢင်းပဵၼ် ဢွၵ်ႇသေၵႃႈၼႂ်းမႂ်းလႄႈ ပႄႇပႅတ်ႈသေဢေႃႈ။

26ၵႃႈၼႂ်းမိူင်းမႂ်း တၵ်းၵၢင်းလွတ်ႈတၢင်းသတ်ႉတဝႃႇဢၼ် ပတိၵ်ႉသၼ်ႇထေႇလူႉယွတ်ႇ ဢိၵ်ႇတင်းသတ်ႉတဝႃႇဢၼ်မၼ် ဢမ်ႇမီးလုၵ်ႈၼၼ်ႉဢေႃႈ။ ၵဝ်တၵ်းႁႂ်ႈၸူဝ်ႈပၢၼ်ဢသၢၵ်ႈမႂ်း ၸေးၸုမ်ႇထူၼ်ႈတဵမ်ဢေႃႈ။- 27ၵဝ်တၵ်းပွႆႇၸႂ်ႉသၽေႃးဢၼ်ၸၢင်ႈၵူဝ်ၸၢင်ႈႁႄၵဝ်ၼႆႉၼၼ်ႉ ဢွၼ်ႁူဝ်မႂ်းၵႂႃႇလႄႈ ယႃႉယူၵ်ႉၵူၼ်းၵူႈမဵဝ်းတင်းသဵင်ႈတင်းလူင် ၵႃႈတီႈဢၼ်မႂ်းတၵ်းႁွတ်ႈထိုင်ၼၼ်ႉဢေႃႈ။ ၵဝ်တၵ်းႁႂ်ႈရၢၼ်ႇသူႇမႂ်းတင်းသဵင်ႈတင်းလူင် ဝၢႆႇလင်ပၼ်တီႈမႂ်းဢေႃႈ။- 28ၵဝ်တၵ်းပွႆႇၸႂ်ႉ တေႃႇလႂ်တႅၼ်လႂ် ၵႂႃႇဢွၼ်တၢင်းမႂ်းလႄႈ၊ ၶဝ်တၵ်းႁေႃႈၵူၼ်းႁီႉဝီႉ၊ ၵူၼ်းၶႃႇၼၼီႉတင်းၵူၼ်းႁိတ်ႉတီႉၸိူဝ်းၼၼ်ႉဢွၵ်ႇသေ ၵႃႈတီႈၽၢႆႇၼႃႈမႂ်းဢေႃႈ။- 29ၼႂ်းပီႊၼိုင်ႈၵူၺ်း ၵဝ်တၵ်းဢမ်ႇႁေႃႈၵူၼ်းၸိူဝ်းၼၼ်ႉဢွၵ်ႇ။ ပေႃးဢမ်ႇၼၼ် မိူင်းတၵ်းပဵၼ် ဢၼ်သဵတ်ႇဢၼ်ယဵၼ်လႄႈ တူဝ်ထိူၼ်ႇႁၢႆႉ တၵ်းယႂ်ႇၽႄႈၼမ်ၵိုၼ်းမႃးတီႈမႂ်းဢေႃႈ။- 30ၵဝ်တၵ်းႁေႃႈၶဝ်ဢွၵ်ႇသေၵႃႈတီႈၽၢႆႇၼႃႈမႂ်းလွႆးလွႆးတေႃႇထိုင်ႁွတ်ႈထၼ်ႈပေႃး မႂ်းယႂ်ႇၽႄႈၼမ်ၵိုၼ်းမႃးလႄႈ လႆႈၸၢမ်ႇၸႃးမိူင်း တင်းမိူင်းဢေႃႈ။- 31ၵဝ်တၵ်းမၢတ်ႈမၢႆလႅၼ်လိၼ်တီႈဢၼ်မႂ်း တၵ်းယူႇၼၼ်ႉဝႆႉ ဢဝ်ၵႃႈတီႈၸႃႉၸဵမ်ပၢင်ႇလၢႆႇဢေႇတုမ်ႇ တေႃႇထိုင်ႁွတ်ႈပၢင်ႇလၢႆႇၽီႉလိတ်ႉတီႉ ဢိၵ်ႇတင်းဢဝ်ၵႃႈတီႈၸႃႉၸဵမ်ထိူၼ်ႇတေႃႇထိုင်ႁွတ်ႈ ၵႃႈတီႈၼမ်ႉႁွင်ႈဢေႃႈ။ ၵဝ်တၵ်းဢဝ်ၵူၼ်းၵႃႈတီႈၼၼ်ႈ ဢၢပ်ႈပၼ်ၵႃႈၼႂ်းမိုဝ်းမႂ်းလႄႈ မႂ်းတၵ်းလႆႈႁေႃႈၶဝ်ဢွၵ်ႇသေၵႃႈတီႈၽၢႆႇၼႃႈမႂ်းဢေႃႈ။- 32မႂ်းဢမ်ႇလႆႈႁဵတ်းမိၵ်ႉသႃႇႁႃယႃႉတၢင်းဢၼ်ထုၵ်ႇၵၼ်တင်းၶဝ် ဢိၵ်ႇတင်းၽြႃးၶဝ်တင်းလၢႆၼၼ်ႉ။- 33ပိူဝ်ႈဢၼ်ၵူဝ်ၶဝ်တၵ်းႁဵတ်းႁႂ်ႈမႂ်းလႆႈၽိတ်းပိူင်ႈၵဝ်လႄႈ၊ ၶဝ်ၼၼ်ႉဢမ်ႇလႆႈယူႇၵႃႈၼႂ်းမိူင်းမႂ်း။ ပေႃးမႂ်းႁဵတ်းဝူတ်ႈႁဵတ်းဝၢတ်ႈတီႈ ၽြႃးၶဝ်ၸိူဝ်းၼၼ်ႉၸိုင်၊ တၵ်းပဵၼ်တူင်ႇႁႅဝ်ႉတူင်ႇၶိုမ်းတီႈမႂ်းဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဢေႃႈ။

Currently Selected:

ဢွၵ်ႇၵႂႃႇ 23: CBMS

Highlight

Compare

Copy