ဢွၵ်ႇၵႂႃႇ 24

မၵ်းမၼ်ႈပတီႉၺိၺ်ႇၸဝ်ႈလူၺ်ႈလိူတ်ႈ

1ၵမ်းၼၼ်ႉ မၼ်းၸဝ်ႈသမ်ႉမီးဢမိင်ႉတီႈမူဝ်းသေႇလႄႈဝႃႈ၊ မႂ်းဢိၵ်ႇတင်းဢႃႇရုၼ်ႇ တင်းၼႃႇတပ်ႉ တင်းဢၽီႉႁူႉ တင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်းဢီႉသရေႇလႃႉ ၸဵတ်းသိပ်းၵေႃႉ ဢွၼ်ၵၼ်ၶိုၼ်ႈၸူး ၵႃႈတီႈထႃႇဝရႃႉၽြႃးလႄႈ ယူႇတီႈဢၼ်ၵႆၵႆသေလႄႈ ၵူဝ်းၵႂၢႆႇတႃႉ။- 2မူဝ်းသေႇၵေႃႉလဵဝ်ၵူၺ်း တၵ်းလႆႈသုတ်ႉၸပ်းသုတ်ႉၸူးၵႃႈတီႈထႃႇဝရႃႉၽြႃးဢေႃႈ။ ၶဝ်ၼၼ်ႉဢမ်ႇလႆႈသုတ်ႉၸပ်းသုတ်ႉၸူး။ ၵူၼ်းတင်းလၢႆၵေႃႈ ဢမ်ႇလႆႈၶိုၼ်ႈလူၺ်ႈၵၼ်တင်းမၼ်း၊ ဝႃႈၼင်ႇၼႆဢေႃႈ။

3 မူဝ်းသေႇၵေႃႈ မႃးလႄႈမွၵ်ႇလၢတ်ႈၵႂၢမ်းထႃႇဝရႃႉၽြႃးတင်းသဵင်ႈတင်းလူင် ဢိၵ်ႇတင်းလွင်ႈတၢင်းဢၼ်မၼ်းၸဝ်ႈၸီႇယၢင်ႇ တင်းသဵင်ႈတင်းလူင်ၼၼ်ႉ တီႈၵူၼ်းတင်းလၢႆလႄႈ ၵူၼ်းတင်းသဵင်ႈတင်းလူင်ၼၼ်ႉ ၽွမ်ႉသဵင်လဵဝ်ၵၼ်ၶိုၼ်းလၢတ်ႈလႄႈဝႃႈ၊ ႁဝ်းၶႃႈတၵ်းႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉၼၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။- 4မူဝ်းသေႇတႅမ်ႈၵႂၢမ်းထႃႇဝရႃႉၽြႃးတင်းသဵင်ႈတင်းလူင်ဝႆႉသေယဝ်ႉ၊ လုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ တႄႇႁဵတ်းယိတ်ႈပလၢင်ႇ ဢိၵ်ႇတင်းသဝ်မၢၵ်ႇႁိၼ်သိပ်းသွင်လုၵ်ႈ ၸွမ်းၵႃႈၼင်ႇဢၼ်ၵူၼ်းမဵဝ်းဢီႉသရေႇလႃႉ ပဵၼ်သိပ်းသွင်မဵဝ်းၼၼ်ႉ ၵႃႈတီႈႁိမ်းတိၼ်လွႆၼၼ်ႉဢေႃႈ။- 5မၼ်းပွႆႇၸႂ်ႉၽူႈမၢဝ်ႇတင်းလၢႆၵႃႈၼႂ်းၵူၼ်းမဵဝ်းဢီႉသရေႇလႃႉၸိူဝ်းၼၼ်ႉၵႂႃႇလႄႈ ၶဝ်ၼၼ်ႉၵေႃႈ ဢွၼ်ၵၼ်ဢဝ်ဝူဝ်းပုၵ်ႈၸေႃႇယိတ်ႈ ဢၼ်တုတ်ႇၽႆး ဢိၵ်ႇတင်းယိတ်ႈမိၵ်ႉသႃႇႁႃယႃႉ ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။- 6မူဝ်းသေႇၵေႃႈ ဢဝ်လိူတ်ႈၼၼ်ႉၶိုင်ႈၼိုင်ႈ သႂ်ႇၵႃႈၼႂ်းဝၢၼ်ႇလူင်လႄႈ ဢဝ်ၶိုင်ႈၼိုင်ႈၽႅတ်းသႂ်ႇၵႃႈၼိူဝ်ယိတ်ႈပလၢင်ႇဢေႃႈ။- 7လိၵ်ႈပတီႉၺိၺ်ႇၵေႃႈ မၼ်းဢဝ်ၽတ်းၵႃႈတီႈၽၢႆႇၼႃႈပရဵၵ်ႈသၢတ်ႈ ၵူၼ်းတင်းလၢႆသေယဝ်ႉ၊ ၶဝ်ၼၼ်ႉဢွၼ်ၵၼ်လၢတ်ႈလႄႈဝႃႈ၊ ႁဝ်းၶႃႈတၵ်းႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃးမီးဢမိင်ႉၼၼ်ႉလႄႈ တၵ်းထွမ်ႇဢဝ်ၶႃႈဢေႃႈ၊ ဝႃႈၼင်ႇၼႆဢေႃႈ။- 8မူဝ်းသေႇၵေႃႈ ဢဝ်လိူတ်ႈၽႅတ်းသႂ်ႇ ၵႃႈၼိူဝ်ၵူၼ်းတင်းလၢႆလႄႈလၢတ်ႈဝႃႈ၊ လိူတ်ႈၼႆႉၸမ်ႉ၊ ပဵၼ်လိူတ်ႈပတီႉၺိၺ်ႇဢၼ်ထႃႇဝရႃႉၽြႃး ႁဵတ်းလူၺ်ႈၵၼ်တင်းမႂ်း လူၺ်ႈလွင်ႈၵႂၢမ်းၸိူဝ်းၼႆႉ တင်းသဵင်ႈတင်းလူင်ၼၼ်ႉဢေႃႈ၊ ဝႃႈၼင်ႇၼႆဢေႃႈ။

9မိူဝ်ႈၼၼ်ႉ မူဝ်းသေႇ၊ ဢႃႇရုၼ်ႇ၊ ၼႃႇတပ်ႉ၊ ဢၽီႉႁူႉ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ ဢွၼ်ၵၼ်ၶိုၼ်ႈၸူးလႄႈ၊- 10လႆႈႁၼ်ၽြႃးပဵၼ်ၸဝ်ႈ ၵူၼ်းမဵဝ်းဢီႉသရေႇလႃႉဢေႃႈ။ ၵႃႈတီႈတႂ်ႈတိၼ်မၼ်းၸဝ်ႈၼၼ်ႉ ပဵၼ်ၸိူဝ်ႉၼင်ႇၶိူင်ႈပိူင်ဢၼ်ဢဝ်တင်းသႅင်ၼီႇလႃႇ ဢၼ်ႁိူဝ်ႈႁိူင်းႁဵတ်းၼၼ်ႉ ဢိၵ်ႇတင်းၸိူဝ်ႉၼင်ႇၼႃႈၽႃႉၵၢင်ႁၢဝ်ဢၼ်သႂ်လႅင်းၼၼ်ႉဝႆႉဢေႃႈ။- 11မၼ်းၸဝ်ႈဢမ်ႇဢဝ်မိုဝ်းႁဵတ်းတီႈမူးမၢတ်ႈၽွင်ႈမိူင်းၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ။ ပိၵ်ႉသမ်ႉၶဝ်လႆႈႁၼ်ၽြႃးပဵၼ်ၸဝ်ႈသေၵေႃႈ၊ ၶဝ်ယင်းၵိၼ်ယူႇၶူပ်းယူႇဢေႃႈ။

12ထႃႇဝရႃႉၽြႃးမီးဢမိင်ႉတီႈမူဝ်းသေႇလႄႈဝႃႈ၊ ၶိုၼ်ႈၸူးတီႈၵဝ်ၵႃႈၼိူဝ်လွႆၼႆႉတႃႉ။ ၵဝ်တၵ်းဢဝ်ၶႅပ်းမၢၵ်ႇႁိၼ် ဢိၵ်ႇတင်းတြႃးၸဝ်ႈတင်းပိင်းၺၢပ်ႈၸဝ်ႈ ဢၼ်ၵဝ်တႅမ်ႈဝႆႉယဝ်ႉၼၼ်ႉ ဢၢပ်ႈပၼ်တီႈမႂ်း ပုၼ်ႈဢၼ်မႂ်းတၵ်းလႆႈသင်ႇသွၼ်ပၼ်ပိူၼ်ႈဢေႃႈ၊ ဝႃႈၼင်ႇၼႆသေယဝ်ႉ၊- 13မူဝ်းသေႇဢိၵ်ႇတင်းယေႃးသူႉဢၼ်ပဵၼ်ၵူၼ်းႁူမ်ႈၵူၼ်းပွင်းမၼ်းၼၼ်ႉ ဢွၼ်ၵၼ်လုၵ်ႉလႄႈ၊ မူဝ်းသေႇၶိုၼ်ႈၵႂႃႇၵႃႈၼိူဝ်လွႆၽြႃးပဵၼ်ၸဝ်ႈဢေႃႈ။- 14မၼ်းသင်ႇလၢတ်ႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉလႄႈဝႃႈ၊ သူဢွၼ်ၵၼ်ပႂ်ႉထႃႈယူႇၵႃႈတီႈၼႆႈ ႁႂ်ႈတေႃႇထိုင်ႁွတ်ႈႁဝ်းၶိုၼ်းမႃးၼၼ်ႉတႃႉ။ တူၺ်းလူး၊ ဢႃႇရုၼ်ႇ တင်းႁူႉရႃႉမီးယူႇလူၺ်ႈၵၼ်တင်းသူလႄႈ၊ ၽူႈလႂ်သေဢမ်ႇဝႃႈ ပေႃးမီးဢမူႉၵိၵ်ႉၸႃႉၸိုင်၊ ႁႂ်ႈမၼ်းၵႂႃႇၸူးၵႃႈတီႈၶဝ်ၼၼ်ႉတႃႉ၊ ဝႃႈၼင်ႇၼႆဢေႃႈ။

15 မူဝ်းသေႇၶိုၼ်ႈၵႂႃႇၵႃႈၼိူဝ်လွႆၸဝ်ႈလႄႈ၊မွၵ်ႇၵုမ်ႈႁူမ်ႇသုမ်ႇလွႆၸဝ်ႈၼၼ်ႉဝႆႉဢေႃႈ။- 16မုၼ်ၽုင်းထႃႇဝရႃႉၽြႃးတိူဝ်ႉထုၵ်ႇၵႃႈၼိူဝ်လွႆသီႉၼႃႉလႄႈ မွၵ်ႇၵုမ်ႈႁူမ်ႇသုမ်ႇဝႆႉႁူၵ်းဝၼ်းတဵမ်တဵမ်ဢေႃႈ။ ၼႂ်းဝၼ်းသတ်ႉတမႃႉၸိုင် မၼ်းၸဝ်ႈယူႇၵႃႈၼႂ်းမွၵ်ႇၵုမ်ႈၼၼ်ႉ ႁွင်ႉတီႈမူဝ်းသေႇဢေႃႈ။- 17ဢရွင်ႇမုၼ်ၽုင်းထႃႇဝရႃႉၽြႃးၼၼ်ႉပဵၼ်မိူၼ်ၸိူဝ်ႉၼင်ႇ ၽႆးဢၼ်မႆႈယူႇၵႃႈၼိူဝ်ပၢႆၸိၵ်းလွႆၼၼ်ႉ သိုဝ်ႈၼႃႈတႂ်ႈတႃ ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉဢေႃႈ။- 18မူဝ်းသေႇၶဝ်ႈၵႃႈၼႂ်းမွၵ်ႇၵုမ်ႈလႄႈ ၶိုၼ်ႈၵႂႃႇၵႃႈၼိူဝ်လွႆၸဝ်ႈၼၼ်ႉသေယဝ်ႉ၊ ယူႇၵႃႈၼိူဝ်လွႆၸဝ်ႈၼၼ်ႉ သီႇသိပ်းဝၼ်းသီႇသိပ်းၶိုၼ်းတဵမ်တဵမ်ဢေႃႈ။

Currently Selected:

ဢွၵ်ႇၵႂႃႇ 24: CBMS

Highlight

Compare

Copy