ဢွၵ်ႇၵႂႃႇ 25

တၢင်းလူႇပုၼ်ႈထႃႇၼႃႉဢၼ်မူတ်းၸၢင်ႇ

(တူၺ်း၊ ဢွၵ်ႇ 35:4-9)

1ထႃႇဝရႃႉၽြႃးမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 2သင်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆ ႁႂ်ႈၶဝ်ဢဝ်တၢင်းလူႇတၢင်းတၢၼ်းမႃးတီႈၵဝ်တႃႉ။ သူတၵ်းလႆႈၶၢမ်ႇဢဝ်တၢင်းလူႇတၢင်းတၢၼ်းၵဝ်ၼၼ်ႉ တီႈၶဝ်ၸိူဝ်းဢၼ်ပႃးတင်းၸႂ်ၸေႇတၼႃႇလူႇတၢၼ်းတီႈၵဝ် ၵႃႈမီးတင်းသဵင်ႈတင်းလူင်ၼၼ်ႉဢေႃႈ။- 3တၢင်းလူႇတၢင်းတၢၼ်း ဢၼ်သူတၵ်းလႆႈၶၢမ်ႇဢဝ်ၼၼ်ႉၸမ်ႉ၊ ပဵၼ်ၶမ်း၊ ငိုၼ်း၊ တွင်းလိူင်၊- 4ၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင်၊ ပိၵ်ႈၶျေႃး၊ ၶူၼ်ပႄႉ၊- 5ၼင်သူဝ်းဢၼ်ယွမ်ႉလႅင်၊ ၼင်တႁႃႇသႃႉ၊ မႆႉဢၵႃႇသႃႉ၊- 6ၼမ်ႉမၼ်းပုၼ်ႈဢၼ်တၵ်းတႆႈ၊ ၼၢမ်ႇသႃႇပုၼ်ႈဢၼ်တၵ်းၽေႃႇၼမ်ႉမၼ်းဢၼ်တႃး၊ ၼၢမ်ႇသႃႇပုၼ်ႈဢၼ်တၵ်းၽေႃႇဢၼ်ႁွမ်ဢၼ်ႁူၺ်းပုၼ်ႈဢၼ်တၵ်းတုတ်ႇၽႆး၊- 7သႅင်ၸၢႆးၶႃးယွတ်ႇ ဢိၵ်ႇတင်းသႅင်လီပုၼ်ႈဢၼ်တၵ်းၶပ်ႉၸီႇၵႃႈတီႈၶိူင်ႈဝႆၼႃႈဢူၵ်းတင်းသိူဝ်ႈသုပ်းယိတ်ႈပရေႃးႁဵၵ်ႈၸိူဝ်းၼၼ်ႉဢေႃႈ။- 8ႁႂ်ႈၶဝ်ႁဵတ်းထႃႇၼႃႉတီႈမူတ်းၸၢင်ႇ ပုၼ်ႈတီႈဢၼ်ၵဝ်တၵ်းၵိင်းဝၢပ်ႈယူႇၼႂ်းၶဝ်ၼၼ်ႉတႃႉ။- 9သူတၵ်းလႆႈႁဵတ်းၸွမ်းၵႃႈၼင်ႇဢၼ် ၵဝ်တၵ်းၼႄပျႃးတီႈမႂ်းဢၼ်ဝႃႈ ပုင်ႇႁၢင်ႈသုမ်ႉထဵင်ၸဝ်ႈ ဢိၵ်ႇတင်းပုင်ႇႁၢင်ႈၶိူင်ႈပိူင်ၵႃႈၼႂ်း သုမ်ႉထဵင်ၸဝ်ႈၸိူဝ်းၼၼ်ႉမိူၼ်မိူၼ်ဢေႃႈ။

လွင်ႈတိူၵ်ႈပတီႉၺိၺ်ႇၸဝ်ႈ

(တူၺ်း၊ ဢွၵ်ႇ 37:1-9)

10ၶဝ်တၵ်းလႆႈဢဝ်မႆႉဢၵႃႇသႃႉ ႁဵတ်းတိူၵ်ႈတႃႇ ဢၼ်ၼႃႈယၢဝ်းမၼ်း မီးသွင်သွၵ်ႇၶိုပ်ႈ၊ ၼႃႈပွတ်းမၼ်းသွၵ်ႇၶိုပ်ႈ၊ ၼႃႈသုင်မၼ်း သွၵ်ႇၶိုပ်ႈဢေႃႈ။- 11မႂ်းတၵ်းလႆႈဢဝ်ၶမ်းလွတ်ႈငၢၼ်ႇဢုမ်ႇႁေႃႇသေဢေႃႈ။ တၵ်းလႆႈဢုမ်ႇႁေႃႇၽၢႆႇတၢင်းၼွၵ်ႈမၼ်း ၽၢႆႇတၢင်းၼႂ်းမၼ်းၼၼ်ႉသေလႄႈ ႁဵတ်းၶိူင်ႈၶႅပ်းၶမ်းဢၼ်တၵ်းလႆႈလဵပ်ႈႁွပ်ႈၵႃႈတီႈၼိူဝ်ႁိမ်းမၼ်းသေဢေႃႈ။- 12မႂ်းတၵ်းလႆႈလေႃႇႁဵတ်းၶူၺ်ႇၶမ်းသီႇၶူၺ်ႇပုၼ်ႈမၼ်းလႄႈ သႂ်ႇဝႆႉၵႃႈတီႈသီႇၸဵင်ႇမၼ်းၼၼ်ႉဢေႃႈ။ ၶူၺ်ႇသွင်ၶူၺ်ႇတၵ်းလႆႈမီးတီႈ ၼႃႈမၼ်းၼႃႈၼိုင်ႈလႄႈ ၶူၺ်ႇသွင်ၶူၺ်ႇတၵ်းလႆႈမီးတီႈ ၼႃႈမၼ်းၼႃႈၼိုင်ႈဢေႃႈ။- 13မႂ်းတၵ်းလႆႈဢဝ်မႆႉဢၵႃႇသႃႉႁဵတ်းၵၢၼ်းႁၢပ်ႇလႄႈ ဢဝ်ၶမ်းဢုမ်ႇႁေႃႇသေယဝ်ႉ၊- 14ဢဝ်ၵၢၼ်းႁၢပ်ႇၸိူဝ်းၼၼ်ႉ သွတ်ႇသႂ်ႇၵႃႈၼႂ်းၶူၺ်ႇၶမ်းဢၼ်မီးၵႃႈတီႈၼႃႈတိူၵ်ႈတႃႇၸိူဝ်းၼၼ်ႉဝႆႉပုၼ်ႈဢၼ် တၵ်းလႆႈႁၢပ်ႇတိူၵ်ႈတႃႇၼၼ်ႉဢေႃႈ။- 15ၵၢၼ်းႁၢပ်ႇၸိူဝ်းၼၼ်ႉ တၵ်းလႆႈမီးယူႇၵႃႈၼႂ်းၶူၺ်ႇၶမ်းတိူၵ်ႈတႃႇၼၼ်ႉသေႇသေႇဢေႃႈ။ ဢမ်ႇလႆႈဢဝ်ၽၢတ်ႇသေၵႃႈတီႈမၼ်း။- 16မႂ်းတၵ်းလႆႈဢဝ်ၶိူင်ႈဢၼ်ၶၢမ်ႇသၢၵ်ႈသေႇ ဢၼ်ၵဝ်တၵ်းပၼ်ၼၼ်ႉ ဝႆႉၵႃႈၼႂ်းတိူၵ်ႈတႃႇၼၼ်ႉဢေႃႈ။- 17မႂ်းတၵ်းလႆႈဢဝ်ၶမ်းလွတ်ႈငၢၼ်ႇ ႁဵတ်းပလၢင်ႇတီႈၽေႇဢပႅတ်ႈ ဢၼ်ၼႃႈယၢဝ်းမၼ်း မီးသွင်သွၵ်ႇၶိုပ်ႈ၊ ၼႃႈပွတ်းမၼ်းမီးသွၵ်ႇၶိုပ်ႈၼၼ်ႉဢေႃႈ။- 18မႂ်းတၵ်းလႆႈဢဝ်ၶမ်းႁဵတ်းၶေႇရူႉၽဵမ်ႇသွင်ပႃးဢေႃႈ။ တၵ်းလႆႈတွင်ႈႁဵတ်းလႄႈ ဝႆႉၵႃႈၼိူဝ်ပလၢင်ႇတီႈၽေႇဢပႅတ်ႈ ၵႃႈတီႈၼႃႈပွတ်းမၼ်းၼၼ်ႉ ယေႈၽၢႆႇယေႈပႃႈဢေႃႈ။- 19ႁဵတ်းၶေႇရူႉၽဵမ်ႇပႃးၼိုင်ႈ ၵႃႈတီႈၼႃႈပွတ်းမၼ်းၽၢႆႇၼိုင်ႈ ဢိၵ်ႇတင်း ၶေႇရူႉၽဵမ်ႇပႃးၼိုင်ႈ ၵႃႈတီႈၼႃႈပွတ်းမၼ်းၽၢႆႇၼိုင်ႈတႃႉ။ သူတၵ်းလႆႈႁဵတ်း ၵႃႈၼႂ်းတူဝ်ပလၢင်ႇတီႈၽေႇဢပႅတ်ႈၼၼ်ႉ ဢွၵ်ႇပဵၼ်ၶေႇရူႉၽဵမ်ႇသွင်ပႃး ယေႈၽၢႆႇယေႈပႃႈဢေႃႈ။- 20ၶေႇရူႉၽဵမ်ႇသွင်ပႃးၼၼ်ႉ တၵ်းလႆႈၵီႈပိၵ်ႇၶဝ်ၶိုၼ်ႈၼိူဝ်လႄႈ ဢဝ်ပိၵ်ႇၶဝ်မုင်းႁူမ်ႇပလၢင်ႇတီႈၽေႇဢပႅတ်ႈၼၼ်ႉယူႇ၊ ဝၢႆႇၼႃႈတေႃႇၵၼ်ယူႇသေလႄႈ တူၺ်းပလၢင်ႇတီႈၽေႇဢပႅတ်ႈၼၼ်ႉယူႇဢေႃႈ။- 21မႂ်းတၵ်းလႆႈဢဝ်ပလၢင်ႇတီႈၽေႇဢပႅတ်ႈၼၼ်ႉတၢင်ႇဝႆႉၵႃႈၼိူဝ်တိူၵ်ႈတႃႇဢေႃႈ။ ၶိူင်ႈဢၼ်ၶၢမ်ႇသၢၵ်ႈသေႇဢၼ်ၵဝ်တၵ်းပၼ်ၼၼ်ႉၵေႃႈ၊ မႂ်းတၵ်းလႆႈဢဝ်ဝႆႉၵႃႈၼႂ်းတိူၵ်ႈတႃႇၼၼ်ႉဢေႃႈ။- 22ၵဝ်တၵ်းထူပ်းၵၼ်တင်းမႂ်းၵႃႈတီႈၼၼ်ႈလႄႈ ယူႇၵႃႈၼိူဝ်ပလၢင်ႇတီႈၽေႇဢပႅတ်ႈ ၵႃႈတီႈၵႄႈဝူင်ႈၵၢင်ၶေႇရူႉၽဵမ်ႇသွင်ပႃးဢၼ်မီး ၵႃႈၼိူဝ်တိူၵ်ႈတႃႇတီႈဢၼ်ဝႆႉ ၶိူင်ႈဢၼ်ၶၢမ်ႇသၢၵ်ႈသေႇၼၼ်ႉသေလႄႈ လၢတ်ႈတေႃႇမႂ်းလွင်ႈၵႃႈဢၼ်ၵဝ်တၵ်းသင်ႇလၢတ်ႈဝႆႉတီႈမႂ်း ပုၼ်ႈၵူၼ်းမဵဝ်းဢီႉသရေႇလႃႉတင်းလၢႆၼၼ်ႉဢေႃႈ။

ၽိူၼ်ဢၼ်သၢၵ်ႈလူႇၶဝ်ႈမုၼ်းတီႈၽြႃးပဵၼ်ၸဝ်ႈ

(တူၺ်း၊ ဢွၵ်ႇ 37:10-16)

23မႂ်းတၵ်းလႆႈဢဝ်မႆႉဢၵႃႇသႃႉႁဵတ်းၶူင်ႇတီႈၵိၼ် ဢၼ်ၼႃႈယၢဝ်းမၼ်းမီးသွင်သွၵ်ႇ၊ ၼႃႈပွတ်းမၼ်းသွၵ်ႇၼိုင်ႈ၊ ဢၼ်သုင်မၼ်း သွၵ်ႇၶိုပ်ႈဢေႃႈ။

24မႂ်းတၵ်းလႆႈဢဝ်ၶမ်းလွတ်ႈငၢၼ်ႇဢုမ်ႇႁေႃႇမၼ်းလႄႈ ႁဵတ်းၶိူင်ႈၶႅပ်းၶမ်းဢၼ်တၵ်းလႆႈလဵပ်ႈႁွပ်ႈၵႃႈတီႈၼိူဝ်ႁိမ်းမၼ်းသေဢေႃႈ။- 25မႂ်းတၵ်းလႆႈႁဵတ်းၶႃႇပၢၼ်း ဢၼ်ၼႃႈပွတ်းမၼ်းမီးၽႃႇမိုဝ်းၼိုင်ႈဢိၵ်ႇတင်းၶိူင်ႈၶႅပ်းၶမ်း ဢၼ်တၵ်းလႆႈလဵပ်ႈႁွပ်ႈၵႃႈတီႈၼိူဝ်ႁိမ်းမၼ်းၼၼ်ႉဢေႃႈ။- 26ၶူၺ်ႇၶမ်းသီႇၶူၺ်ႇၵေႃႈ မႂ်းတၵ်းလႆႈႁဵတ်းပုၼ်ႈမၼ်းလႄႈ ဢဝ်ၶူၺ်ႇၸိူဝ်းၼၼ်ႉသႂ်ႇဝႆႉၵႃႈတီႈသီႇၸဵင်ႇမၼ်းဢၼ်မီးၵႃႈၼိူဝ်တိၼ်မၼ်းသီႇၶွၼ်ၼၼ်ႉဢေႃႈ။- 27ၶူၺ်ႇၶမ်းၸိူဝ်းၼၼ်ႉ တၵ်းလႆႈမီးၵႃႈတီႈႁိမ်းၶႃႇပၢၼ်းလႄႈ ပဵၼ်တီႈယူႇၵၢၼ်းႁၢပ်ႇပုၼ်ႈဢၼ်တၵ်းႁၢပ်ႇၶူင်ႇတီႈၵိၼ်ၼၼ်ႉဢေႃႈ။- 28ပုၼ်ႈဢၼ်တၵ်းလႆႈဢဝ်ႁၢပ်ႇၶူင်ႇတီႈၵိၼ်ၼၼ်ႉၸိုင်၊ မႂ်းတၵ်းလႆႈဢဝ်မႆႉဢၵႃႇသႃႉႁဵတ်းၵၢၼ်းႁၢပ်ႇလႄႈ ဢဝ်ၶမ်းလွတ်ႈငၢၼ်ႇဢုမ်ႇႁေႃႇသေဢေႃႈ။- 29မႂ်းတၵ်းလႆႈႁဵတ်းမေႃႈဢႅင်ႇလႂ်၊ ၸေႃႉလႂ်၊ ၵွၵ်းလႂ်၊ ၵွၵ်းဢႅင်ႇပုၼ်ႈဢၼ်တၵ်းထွၵ်ႇတၵ်းႁိုဝ်ႈလႂ် ဢၼ်ၸၢပ်ႈသႅင်ႇၵၼ်တင်းမၼ်းလႄႈ ဢဝ်ၶမ်းလွတ်ႈငၢၼ်ႇႁဵတ်းဢေႃႈ။- 30မႂ်းတၵ်းလႆႈဢဝ်ၶဝ်ႈမုၼ်းၽၢႆႇၼႃႈၸဝ်ႈ တၢင်ႇဝႆႉၵႃႈၼိူဝ်ၶူင်ႇတီႈၵိၼ်ၵႃႈတီႈၽၢႆႇၼႃႈၵဝ်သေႇသေႇဢေႃႈ။

ၶူင်ႇတီႈတႆႈၽႆး

(တူၺ်း၊ ဢွၵ်ႇ 37:17-24)

31ၶူင်ႇတီႈတႆႈၽႆးၵေႃႈမႂ်းတၵ်းလႆႈဢဝ် ၶမ်းလွတ်ႈငၢၼ်ႇႁဵတ်းဢေႃႈ။ တၵ်းလႆႈတွင်ႈႁဵတ်းၶူင်ႇတီႈတႆႈၽႆးၼၼ်ႉၸႃႉၸဵမ်တိၼ်မၼ်းတင်းသဝ်မၼ်းဢေႃႈ။ ၵွၵ်းမၼ်း၊ ပုမ်ႇမၼ်းတင်းမွၵ်ႇမူဝ်မၼ်းၸိူဝ်းၼၼ်ႉ တၵ်းလႆႈဢွၵ်ႇၵႃႈၼႂ်းတူဝ်မၼ်းလႄႈ ပဵၼ်ၼိူဝ်ႉလဵဝ်ၵၼ်တင်းမၼ်းဢေႃႈ။- 32ၵိင်ႇႁူၵ်းၵိင်ႇ တၵ်းလႆႈတႅၵ်ႇဢွၵ်ႇၵႃႈတီႈသွင်ၽၢၵ်ႇၶၢင်ႈမၼ်း ၽၢႆႇၼိုင်ႈၵိင်ႇၶူင်ႇတီႈတႆႈၽႆးသၢမ်ၵိင်ႇ ၽၢႆႇၼိုင်ႈၵိင်ႇၶူင်ႇတီႈတႆႈၽႆးသၢမ်ၵိင်ႇဢေႃႈ။- 33ၽၢႆႇၼိုင်ႈၵႃႈတီႈၵိင်ႇမၼ်းၵိင်ႇၼိုင်ႈတၵ်းလႆႈမီးၵွၵ်းသၢမ်လုၵ်ႈ ဢၼ်မိူၼ်ၸိူဝ်ႉၼင်ႇမၢၵ်ႇပႃႇတမ်ႇၼၼ်ႉ ဢိၵ်ႇတင်းပုမ်ႇမၼ်းတင်းမွၵ်ႇမူဝ်မၼ်းလႄႈ ၽၢႆႇၼိုင်ႈၵႃႈတီႈၵိင်ႇမၼ်းၵိင်ႇၼိုင်ႈ တၵ်းလႆႈမီးၵွၵ်းသၢမ်လုၵ်ႈဢၼ်မိူၼ်ၸိူဝ်ႉၼင်ႇ မၢၵ်ႇပႃႇတမ်ႇၼၼ်ႉ ဢိၵ်ႇတင်းပုမ်ႇမၼ်းတင်းမွၵ်ႇမူဝ်မၼ်းဢေႃႈ။ ၼင်ႇၼၼ်လႄႈ တၵ်းလႆႈပဵၼ်တီႈၵိင်ႇႁူၵ်းၵိင်ႇ ဢၼ်တႅၵ်ႇဢွၵ်ႇၵႃႈတီႈၶူင်ႇတီႈတႆႈၽႆးၼၼ်ႉဢေႃႈ။- 34ၵႃႈတီႈတူဝ်သဝ်ၶူင်ႇတီႈတႆႈၽႆးၼၼ်ႉၵေႃႈ၊ တၵ်းလႆႈမီးၵွၵ်းသီႇလုၵ်ႈ ဢၼ်မိူၼ်ၸိူဝ်ႉၼင်ႇမၢၵ်ႇပႃႇတမ်ႇၼၼ်ႉ ဢိၵ်ႇတင်းပုမ်ႇမၼ်း တင်းမွၵ်ႇမူဝ်မၼ်းၸိူဝ်းၼၼ်ႉဢေႃႈ။- 35ပုၼ်ႈၵိင်ႇႁူၵ်းၵိင်ႇ ဢၼ်တႅၵ်ႇဢွၵ်ႇၵႃႈတီႈသဝ်ၶူင်ႇတီႈတႆႈၽႆးၼၼ်ႉ၊ တၵ်းလႆႈမီးပုမ်ႇၵႃႈတႂ်ႈငၢမ်ႈသွင်ၵိင်ႇ ဢၼ်ဢွၵ်ႇၵႃႈၼႂ်းတူဝ်မၼ်းလႄႈ ပဵၼ်ၼိူဝ်ႉလဵဝ်ၵၼ်တင်းမၼ်းၼၼ်ႉပုမ်ႇၼိုင်ႈ၊ ၵႃႈတႂ်ႈငၢမ်ႈသွင်ၵိင်ႇဢၼ်ဢွၵ်ႇၵႃႈၼႂ်းတူဝ်မၼ်းလႄႈ ပဵၼ်ၼိူဝ်ႉလဵဝ်ၵၼ်တင်းမၼ်းၼၼ်ႉပုမ်ႇၼိုင်ႈ၊ ၵႃႈတႂ်ႈငၢမ်ႈသွင်ၵိင်ႇဢၼ်ဢွၵ်ႇၵႃႈၼႂ်းတူဝ်မၼ်းလႄႈ ပဵၼ်ၼိူဝ်ႉလဵဝ်ၵၼ်တင်းမၼ်းၼၼ်ႉပုမ်ႇၼိုင်ႈဢေႃႈ။- 36ပုမ်ႇမၼ်းဢိၵ်ႇတင်းၵိင်ႇမၼ်းတင်းလၢႆ တၵ်းလႆႈပဵၼ်ၼိူဝ်ႉလဵဝ်ၵၼ်တင်းမၼ်းလႄႈ ၶူင်ႇတီႈတႆႈၽႆးၼၼ်ႉတင်းသဵင်ႈတင်းမူတ်း တၵ်းလႆႈဢဝ်ၶမ်းလွတ်ႈငၢၼ်ႇတွင်ႈႁဵတ်းဢေႃႈ။- 37ဝၢၼ်ႇတႆႈၽႆးၸဵတ်းမႂ်ၵေႃႈ၊ မႂ်းတၵ်းလႆႈႁဵတ်းဢေႃႈ။ တၵ်းလႆႈတႆႈဝၢၼ်ႇတႆႈၽႆးၸိူဝ်းၼၼ်ႉ ႁႂ်ႈဢၼ်လႅင်းထွင်ႇၵႂႃႇသိုဝ်ႈၽၢႆႇၼႃႈမၼ်းဢေႃႈ။- 38ၵိမ်းၺၢပ်ႈၽႆး ဢိၵ်ႇတင်းၵွၵ်းပုၼ်ႈဢၼ်တၵ်းၶၢမ်ႇဢဝ် ဢၼ်ၺၢပ်ႈၽႆးပႅတ်ႈၼၼ်ႉၵေႃႈ၊ တၵ်းလႆႈပဵၼ်ၶမ်းလွတ်ႈငၢၼ်ႇဢေႃႈ။- 39မႂ်းတၵ်းလႆႈဢဝ်ၶမ်းလွတ်ႈငၢၼ်ႇတလၢၼ်ႇတၢၼ်ႇၼိုင်ႈ ႁဵတ်းၶူင်ႇတီႈတႆႈၽႆးဢိၵ်ႇတင်းၶိူင်ႈမၼ်းၵႃႈမီးတင်းသဵင်ႈတင်းလူင်ဢေႃႈ။- 40လွင်ႈၼင်ႇႁိုဝ်တၵ်းလႆႈႁဵတ်းၸွမ်းၼင်ႇ ပုင်ႇႁၢင်ႈဢၼ်ၵဝ်ၼႄပျႃးတီႈမႂ်းၵႃႈၼိူဝ်လွႆမႃးယဝ်ႉၼၼ်ႉၸိုင်၊ ႁဵတ်းသတီႉတႃႉ။

Currently Selected:

ဢွၵ်ႇၵႂႃႇ 25: CBMS

Highlight

Compare

Copy