ဢွၵ်ႇၵႂႃႇ 2

လွင်ႈမူဝ်းသေႇၵိူတ်ႇလဵင်ႉမႃး

1မိူဝ်ႈၶိင်ႇၵႃႇလႃႉယၢမ်းၼၼ်ႉ၊ ၵူၼ်းမဵဝ်းလေႇဝီႉၵေႃႉၼိုင်ႈၵႂႃႇလႄႈ ပဵၼ်ႁိူၼ်းႁူမ်ႈၵၼ်တင်း လုၵ်ႈယိင်းမဵဝ်းလေႇဝီႉဢေႃႈ။- 2မႄႈယိင်းၼၼ်ႉပႃးပတိၵ်ႉသၼ်ႇထေႇသေယဝ်ႉ၊ ၵိူတ်ႇလဵင်ႉလုၵ်ႈၸၢႆးမႃးဢေႃႈ။ မိူဝ်ႈဢၼ်မၼ်းႁၼ်လုၵ်ႈၸၢႆးၼၼ်ႉႁၢင်ႈလီၽၢင်လီၼၼ်ႉၸိုင်၊ မၼ်းဢဝ်သိူင်ႇမႅပ်ႉဝႆႉသၢမ်လိူၼ်တဵမ်တဵမ်ဢေႃႈ။- 3ၵမ်းလိုၼ်းမိူဝ်ႈဢၼ်မၼ်းဢမ်ႇဢဝ်သိူင်ႇမႅပ်ႉဝႆႉလႆႈၼၼ်ႉၸိုင်၊ မၼ်းဢဝ်ဢူႇဢၼ် ဢဝ်တင်းတူၼ်ႈၶႅမ်ၵႃႇမႃႇ သၢၼ်ႁဵတ်းၼၼ်ႉ ဢၼ်ၼိုင်ႈလႄႈ ဢဝ်တင်းၵႆးတဝ်းတင်း ႁၵ်ႉတႃးသေယဝ်ႉ၊ ဢဝ်လုၵ်ႈဢွၼ်ႇၼၼ်ႉ သႂ်ႇၵႃႈၼႂ်းမၼ်းသေလႄႈ ဢဝ်ဝႆႉၵႃႈၼႂ်းတူၼ်ႈၶႅမ် ၵႃႈတီႈႁိမ်းၽင်ႇၼမ်ႉႁွင်ႈဢေႃႈ။- 4ပီႈၼၢင်းၵေႃႉဢွၼ်ႇၼၼ်ႉၵေႃႈ ၸုၵ်းယူႇတီႈဢၼ်ၵႆႁႂ်ႈလႆႈႁူႉလွင်ႈဢၼ် တၵ်းပဵၼ်မႃးၸိူဝ်ႉၼင်ႇႁိုဝ်တီႈမၼ်းၼၼ်ႉဢေႃႈ။- 5လုၵ်ႈယိင်းၶုၼ်ႁေႃၶမ်းၽႃႇရေႃး လူင်းမႃးႁႂ်ႈလႆႈဢၢပ်ႇၼမ်ႉလႄႈ၊ ၼႂ်းမိူဝ်ႈဢၼ် ၸိူင်ႉမၼ်းၼၢင်းမၼ်းတင်းလၢႆ လႄႇလဵပ်ႈၸွမ်း ၵႃႈတီႈႁိမ်း ၽင်ႇၼမ်ႉႁွင်ႈယူႇၼၼ်ႉၸိုင်၊ မၼ်းထူပ်းႁၼ်ဢူႇၵႃႈတီႈတူၼ်ႈၶႅမ်ၼၼ်ႉလႄႈ ပွႆႇၸႂ်ႉၸိူင်ႉမၼ်းၵေႃႉၼိုင်ႈၵႂႃႇ ႁႂ်ႈလႆႈဢဝ်မႃးဢေႃႈ။- 6မိူဝ်ႈဢၼ်မၼ်းၽုၺ်ႇဢူႇၼၼ်ႉၸိုင်၊ မၼ်းႁၼ်လုၵ်ႈလႅင်ဢွၼ်ႇၼၼ်ႉလႄႈ လုၵ်ႈလႅင်ဢွၼ်ႇၼၼ်ႉႁႆႈယူႇဢေႃႈ။ မၼ်းၵေႃႈမီးၸႂ်ဢၼ်ဢဵတ်းလူမၼ်းၼၼ်ႉလႄႈ လၢတ်ႈလႄႈဝႃႈ၊ မၼ်းၼႆႉတၵ်းပဵၼ်လုၵ်ႈဢွၼ်ႇၸိူဝ်ႉၶိူဝ်းႁေႇပြႄးဢေႃႈ၊ ဝႃႈၼင်ႇၼႆသေယဝ်ႉ၊- 7ပီႈၼၢင်းၵေႃႉဢွၼ်ႇၼၼ်ႉၵေႃႈ လဝ်ႊထၢမ်တီႈလုၵ်ႈယိင်းၶုၼ်ႁေႃၶမ်းၽႃႇရေႃးၼၼ်ႉလႄႈဝႃႈ၊ ၶႃႈၸဝ်ႈတၵ်းလႆႈၵႂႃႇလႄႈႁွင်ႉဢဝ် ၵေႃႉဢၼ်တၵ်းလူတၵ်းထိင်းၵႃႈၼႂ်းမႄႈယိင်းႁေႇပြႄးတင်းလၢႆ ႁႂ်ႈလႆႈလူလႆႈထိင်းလုၵ်ႈဢွၼ်ႇၼႆႉ ပုၼ်ႈၸဝ်ႈၼၢင်းႁဝ်းတီႈၶႃႈႁိုဝ်။ ဝႃႈၼင်ႇၼႆလႄႈ၊- 8လုၵ်ႈယိင်းၶုၼ်ႁေႃၶမ်းၽႃႇရေႃး လၢတ်ႈလႄႈဝႃႈ၊ ၵႂႃႇတႃႉ၊ ဝႃႈၼင်ႇၼႆသေယဝ်ႉ၊ မႄႈယိင်းဢွၼ်ႇၼၼ်ႉ ၵႂႃႇလႄႈႁွင်ႉဢဝ်မႄႈလုၵ်ႈဢွၼ်ႇၼၼ်ႉမႃးဢေႃႈ။

9လုၵ်ႈယိင်းၶုၼ်ႁေႃၶမ်းၽႃႇရေႃးၼၼ်ႉ သင်ႇလၢတ်ႈဝႆႉတီႈမၼ်းလႄႈဝႃႈ၊ ဢဝ်လုၵ်ႈဢွၼ်ႇၼႆႉၵႂႃႇလႄႈ လူထိင်းဝႆႉပုၼ်ႈၵဝ်တႃႉ။ ၵဝ်တၵ်းပၼ်ၵႃႈမၼ်းၶၼ်မၼ်းလႆ၊ ဝႃႈၼင်ႇၼႆလႄႈမႄႈယိင်းၼၼ်ႉ ဢဝ်လုၵ်ႈဢွၼ်ႇၼၼ်ႉၵႂႃႇလႄႈ လူထိင်းဝႆႉဢေႃႈ။- 10မိူဝ်ႈဢၼ်လုၵ်ႈဢွၼ်ႇၼၼ်ႉယႂ်ႇမႃးၼၼ်ႉၸိုင်၊ မၼ်းဢဝ်ၵႂႃႇသူင်ႇၵႃႈတီႈလုၵ်ႈယိင်းၶုၼ်ႁေႃၶမ်းၽႃႇရေႃးလႄႈ၊ မၼ်းၼၼ်ႉၵေႃႈဢဝ်မၼ်းၶၢၼ်းဝႆႉၼႂ်းဢရႃႇလုၵ်ႈၸၢႆးလႄႈ ႁွင်ႉႁဵၵ်ႈၸိုဝ်ႈမၼ်း မူဝ်းသေႇလႄႈဝႃႈ၊ ပိူဝ်ႈဢၼ်ၵဝ်ၼုၵ်ႈဢဝ်မၼ်းဢွၵ်ႇသေၵႃႈၼႂ်းၼမ်ႉလႄႈ ႁွင်ႉႁဵၵ်ႈၸိူဝ်ႉၼင်ႇၼႆဢေႃႈ၊ ဝႃႈၼင်ႇၼႆဢေႃႈ။

မူဝ်းသေႇဢွၵ်ႇပၢႆႈၵႂႃႇၸူးမိူင်းမီႉတျၼ်ႇ

11မိူဝ်ႈၼၼ်ႉမူဝ်းသေႇယႂ်ႇမႃးသေယဝ်ႉ၊ ဢွၵ်ႇၵႂႃႇၸူးၵႃႈတီႈပီႈၼွင်ႉၵူၼ်းမဵဝ်းမၼ်းလႄႈ လူတူၺ်းၵၢၼ်တၢင်းႁဵတ်းၶဝ်ဢၼ်ယၢပ်ႇၼႃႇၽိုတ်ႇၼႃႇၼၼ်ႉဢေႃႈ။ ၵမ်းၼၼ်ႉ မၼ်းႁၼ်ၵူၼ်းဢေႇၵိပ်ႉတူႉ ၵေႃႉၼိုင်ႈပေႃႉယႅၼ်ႉ ပီႈၼွင်ႉၵူၼ်းမဵဝ်းမၼ်း ၵူၼ်းႁေႇပြႄးၵေႃႉၼိုင်ႈယူႇသေယဝ်ႉ၊- 12ဝၢႆႇတူၺ်းၽၢႆႇၼိုင်ႈယဝ်ႉၽၢႆႇၼိုင်ႈလႄႈမိူဝ်ႈဢၼ်ႁူႉႁၼ်လွင်ႈဢၼ်ၽူႈလႂ်ဢမ်ႇမီးၼၼ်ႉၸိုင်၊ မၼ်းဢဝ်ၵူၼ်းဢေႇၵိပ်ႉတူႉၼၼ်ႉတၢႆလႄႈ ဢဝ်ၽင်ဝႆႉ ၵႃႈၼႂ်းသၢႆးသေဢေႃႈ။- 13ဝၼ်းမိူဝ်ႈၽုၵ်ႈမၼ်းသမ်ႉ ဢွၵ်ႇၵႂႃႇလႄႈလႆႈႁၼ်ၵူၼ်းႁေႇပြႄးၼင်ႇၵၼ်သွင်ၵေႃႉ ပေႃႉယႅၼ်ႉၵၼ်ယူႇလႄႈ ထၢမ်တီႈၵေႃႉဢၼ် ၼိၵ်ႈၸၢၵ်ႈငႅၼ်းသႄးၼၼ်ႉလႄႈဝႃႈ၊ ႁဵတ်းသင်လႄႈမႂ်းပေႃႉယႅၼ်ႉၵေႃႉသေႈမႂ်းၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 14ၵေႃႉၼၼ်ႉၵေႃႈၶိုၼ်းလၢတ်ႈလႄႈဝႃႈ၊ ၽူႈလႂ်ၶၢၼ်းမႂ်းဝႆႉ ႁႂ်ႈမႂ်းလႆႈပဵၼ်ၵႄႇပဵၼ်ႁူဝ်ၵေႃႉဢၼ်ၸီႇယၢင်ႇတြႃးၵႃႈၼိူဝ်ႁဝ်းၼႆႉ။ မႂ်းတၵ်းဢဝ်ၵဝ်တၢႆ မိူၼ်ၸိူဝ်ႉၼင်ႇဢၼ်ဢဝ်ၵူၼ်းဢေႇၵိပ်ႉတူႉ တၢႆၼၼ်ႉႁိုဝ်။ ဝႃႈၼင်ႇၼႆဢေႃႈ။ မိူဝ်ႈၼၼ်ႉမူဝ်းသေႇၵူဝ်ႁႄလႄႈဝႃႈ၊ ပိူၼ်ႈႁူႉလွင်ႈဢၼ် ၵဝ်ႁဵတ်းၼၼ်ႉယဝ်ႉဢေႃႈ၊ ဝႃႈၼင်ႇၼႆဢေႃႈ။- 15မိူဝ်ႈဢၼ်ၶုၼ်ႁေႃၶမ်းၽႃႇရေႃးငိၼ်းသတၢင်းသဵင်ၶၢဝ်ႇၼၼ်ႉၸိုင်၊ မၼ်းၵျၢမ်ႇႁႃႁႂ်ႈလႆႈဢဝ်မူဝ်းသေႇတၢႆဢေႃႈ။ မူဝ်းသေႇဢွၵ်ႇပၢႆႈသေၵႃႈတီႈ ၽၢႆႇၼႃႈၶုၼ်ႁေႃၶမ်းၽႃႇရေႃးၼၼ်ႉၵႂႃႇလႄႈ ႁွတ်ႈထိုင်ၵႃႈတီႈမိူင်းမီႉတျၼ်ႇသေယဝ်ႉ၊ ၼင်ႈယူႇၵႃႈတီႈႁိမ်းၼမ်ႉမေႃႇဢေႃႈ။- 16မိူဝ်ႈၼၼ်ႉတီႈယိတ်ႈပရေႃးႁဵၵ်ႈမိူင်းမီႉတျၼ်ႇၼၼ်ႉမီးလုၵ်ႈယိင်းၸဵတ်းၵေႃႉဢေႃႈ။ ၶဝ်ၼၼ်ႉဢွၼ်ၵၼ်မႃးလႄႈ တဵၵ်းၼမ်ႉသေယဝ်ႉ၊ ထွၵ်ႇသႂ်ႇၵႃႈၼႂ်းႁၢင်းၵိၼ်ၼမ်ႉႁႂ်ႈလႆႈတိုၵ်းၼမ်ႉပၼ်တီႈၽုင်သူဝ်းၽုင်ပႄႉပေႃႈၶဝ်ဢေႃႈ။- 17ၵူၼ်းလဵင်ႉသူဝ်းတင်းလၢႆ ဢွၼ်ၵၼ်မႃးလႄႈႁေႃႈသူဝ်းၶဝ်ပႄႉၶဝ်ၸိူဝ်းၼၼ်ႉပႅတ်ႈဢေႃႈ။ မိူဝ်ႈၼၼ်ႉ မူဝ်းသေႇလုၵ်ႉလႄႈ ၸွႆႈထႅမ်မႄႈယိင်းၸိူဝ်းၼၼ်ႉသေယဝ်ႉ၊ တိုၵ်းၼမ်ႉပၼ်တီႈ ၽုင်သူဝ်းၽုင်ပႄႉၶဝ်ဢေႃႈ။- 18မိူဝ်ႈဢၼ်ၶဝ်ၸိူဝ်းၼၼ်ႉႁွတ်ႈထိုင်ၵႃႈတီႈရူႉဢေးလႃႉၼၼ်ႉၸိုင်၊ မၼ်းထၢမ်တီႈၶဝ်လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ဝၼ်းမိူဝ်ႈၼႆႉ သူၸဵဝ်းႁွတ်ႈမႃးၼင်ႇႁိုဝ်။ ဝႃႈၼင်ႇၼႆဢေႃႈ။- 19ၶဝ်ၼၼ်ႉၵေႃႈၶိုၼ်းလၢတ်ႈလႄႈဝႃႈ၊ ၵူၼ်းဢေႇၵိပ်ႉတူႉၵေႃႉၼိုင်ႈ ၵႄႇၶျွတ်ႈဢဝ်ႁဝ်းၶႃႈသေၵႃႈၼႂ်းမိုဝ်းၵူၼ်းလဵင်ႉသူဝ်းတင်းလၢႆလႄႈ တဵၵ်းၼမ်ႉၵႃႈဢၼ်ႁဝ်းၶႃႈလူဝ်ႇၼၼ်ႉ တိုၵ်းပၼ်တီႈၽုင်သူဝ်းၽုင်ပႄႉႁဝ်းၶႃႈၶႃႈဢေႃႈ၊ ဝႃႈၼင်ႇၼႆဢေႃႈ။- 20မၼ်းၵေႃႈထၢမ်တီႈလုၵ်ႈယိင်းမၼ်းၸိူဝ်းၼၼ်ႉလႄႈဝႃႈ၊ ၵေႃႉၼၼ်ႉၸိုင်မီးယူႇၵႃႈတီႈလႂ်။ ႁဵတ်းသင်လႄႈသူပႅတ်ႈမၼ်းဝႆႉၼင်ႇႁိုဝ်။ ဢွၼ်ၵၼ်ႁွင်ႉဢဝ်မၼ်းမႃးႁႂ်ႈလႆႈၵိၼ်တၢင်းၵိၼ်တၢင်းၶူပ်းတႃႉ၊ ဝႃႈၼင်ႇၼႆဢေႃႈ။- 21မူဝ်းသေႇငိၼ်းပျေႃႇငိၼ်းမူၼ်ႈ ၶႂ်ႈယူႇလူၺ်ႈၵေႃႉၼၼ်ႉလႄႈ ၵေႃႉၼၼ်ႉၵေႃႈဢဝ်လုၵ်ႈယိင်းမၼ်းၸီႉပေႃးရႃႉပၼ်တီႈ မူဝ်းသေႇဢေႃႈ။- 22မၼ်းၼၼ်ႉၵိူတ်ႇလဵင်ႉလုၵ်ႈၸၢႆးမႃးလႄႈ မူဝ်းသေႇၵေႃႈႁွင်ႉႁဵၵ်ႈၸိုဝ်ႈမၼ်း ၵေႇရသုၼ်ႇဢေႃႈ။ လွင်ႈမၼ်းၸမ်ႉ မၼ်းဝႃႈ၊ ၵဝ်လႆႈပဵၼ်ၶႅၵ်ႇ ဢႃႇၵၼ်ႇတူႉတၢင်ႇတီႈတၢင်ႇမိူင်းယဝ်ႉ၊ ဝႃႈၼင်ႇၼႆဢေႃႈ။

23ၶိင်ႇၵႃႇလႃႉမိုဝ်ႉဝၼ်း ႁိုင်တၢၼ်ႇတၢၼ်ႇယဝ်ႉၸင်ႇ၊ ၶုၼ်ႁေႃၶမ်းၼွၼ်းၽႄးသေဢေႃႈ။ ၵူၼ်းမဵဝ်းဢီႉသရေႇလႃႉတင်းလၢႆၵေႃႈ ဢွၼ်ၵၼ်ပွင်ႉၶၢင်းယူႇၵွပ်ႈပိူဝ်ႈဢၼ်ၶဝ်လႆႈၶၢမ်ႇႁဵတ်းၶႃႈၼၼ်ႉဢေႃႈ။ ၶဝ်ဢွၼ်ၵၼ်ႁွင်ႉသႅၼ်ႇႁွင်ႉႁႆႈလႄႈ သဵင်ဢၼ်ၶဝ်ႁွင်ႉသႅၼ်ႇႁွင်ႉႁႆႈၵွပ်ႈပိူဝ်ႈတၢင်းဢၼ်ၶဝ်လႆႈၶၢမ်ႇႁဵတ်းၶႃႈၼၼ်ႉ ၶိုၼ်ႈၵႂႃႇႁွတ်ႈထိုင်ၵႃႈတီႈၽြႃးပဵၼ်ၸဝ်ႈဢေႃႈ။- 24ၽြႃးပဵၼ်ၸဝ်ႈငိၼ်းသဵင်ဢၼ် ၶဝ်ပွင်ႉၶၢင်းယူႇၼၼ်ႉလႄႈ ၶုၵ်းၸႂ်လႆႈၶႆႈၸႂ်ထူပ်း ပတီႉၺိၺ်ႇဢၼ်လႆႈႁဵတ်းမႃး လူၺ်ႈၵၼ်တင်းဢႃႇပြႃႇႁၢမ်ႇ၊ ဢီႉၸၢၵ်ႈ၊ ယႃႇၵုပ်ႈၸိူဝ်းၼၼ်ႉယဝ်ႉၼၼ်ႉဢေႃႈ။ 25ၽြႃးပဵၼ်ၸဝ်ႈၵေႃႈ လူတူၺ်းၵူၼ်းမဵဝ်းဢီႉသရေႇလႃႉၸိူဝ်းၼၼ်ႉလႄႈ ႁူႉလွင်ႈၶဝ်ဢေႃႈ။

Currently Selected:

ဢွၵ်ႇၵႂႃႇ 2: CBMS

Highlight

Compare

Copy