ဢွၵ်ႇၵႂႃႇ 1

ၵူၼ်းမဵဝ်းဢီႉသရေႇလႃႉလႆႈၶၢမ်ႇတၢင်းဢၼ်ၼိၵ်ႈၸၢၵ်ႈၼႂ်းမိူင်းဢေႇၵိပ်ႉတူႉ

1ၸိုဝ်ႈသဵင်လုၵ်ႈလၢင်းဢီႉသရေႇလႃႉဢၼ်ႁွတ်ႈထိုင်ၵႃႈတီႈမိူင်းဢေႇၵိပ်ႉတူႉလႄႈ ပႃးဢဝ်တင်းႁိူၼ်းတင်းယေးႁင်းၽႂ်ႁင်းမၼ်းၸွမ်းလူၺ်ႈၵၼ် တင်းယႃႇၵုပ်ႈၸိူဝ်းၼၼ်ႉၸမ်ႉ၊- 2ပဵၼ်ရူႉပိၼ်ႇ၊ သီႉမုၼ်ႇ၊ လေႇဝီႉ၊ ယူႉတႃႉ၊- 3ဢီႉသၶႃႇ၊ ၸေႇပူႉလုၼ်ႇ၊ ပိၼ်ႇယႃႇမိၼ်ႇ၊- 4တၢၼ်ႇ၊ ၼပ်ႉထလီႉ၊ ၵၢတ်ႉတင်းဢႃႇသႃႇဢေႃႈ။- 5ၸိူဝ်ႉၶိူဝ်းလုၵ်ႈလၢင်းဢၼ်သိုပ်ႇဢွၵ်ႇၵႃႈၼႂ်းယႃႇၵုပ်ႈၼၼ်ႉၸမ်ႉ၊ ပဵၼ်ၸဵတ်းသိပ်းၵေႃႉဢေႃႈ။ ၵူၺ်းၵႃႈ ယူဝ်းသႅပ်ႈ မီးယူႇထႃႈ ၵႃႈၼႂ်းမိူင်းဢေႇၵိပ်ႉတူႉဢွၼ်တၢင်းဢေႃႈ။

6ၸႃႉၸဵမ်ယူဝ်းသႅပ်ႈလႄႈ ပီႈဢၢႆႈမၼ်းတင်းလၢႆ ဢိၵ်ႇတင်းၵူၼ်း ၵႃႈတီႈၶိင်ႇၵႃႇလႃႉၼၼ်ႉ တင်းသဵင်ႈတင်းလူင်ၸိူဝ်းၼၼ်ႉ တၢႆၵႂႃႇဝၢႆးၵႂႃႇသေဢေႃႈ။- 7ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ ၵိူတ်ႇလဵင်ႉလုၵ်ႈလဵင်ႉလၢင်းလႄႈ ယႂ်ႇၽႄႈၼမ်ၵိုၼ်းမႃးသေယဝ်ႉ၊ ႁႅင်းယႂ်ႇၼႃႇလႄႈ ၸွတ်ႇတူဝ်ႈၵႂႃႇတင်းမိူင်းၵူႈတီႈၵူႈလႅၼ်ဢေႃႈ။

8ဝၢႆးသေၼၼ်ႉ ၶုၼ်ႁေႃၶမ်းပႃးမႂ်ႇဢၼ်ဢမ်ႇႁူႉၸၵ်း ယူဝ်းသႅပ်ႈၼၼ်ႉ ပေႃႇမႃးၵႃႈတီႈမိူင်းဢေႇၵိပ်ႉတူႉဢေႃႈ။- 9ပႃးၼၼ်ႉၵေႃႈ လၢတ်ႈတီႈၶႃႈဝၢၼ်ႈၵူၼ်းမိူင်းမၼ်းလႄႈဝႃႈ၊ တူၺ်းလူး၊ ၵူၼ်းမဵဝ်းဢီႉသရေႇလႃႉၸိူဝ်းၼႆႉ ၼမ်ၼႃႇသေႁဝ်းဢေႃႈ။ ႁႅင်းယႂ်ႇၼႃႇသေႁဝ်းဢေႃႈ။- 10မႃးဢိူၺ်း၊ ႁဵတ်းလၵ်းလၵ်းလႅမ်လႅမ်တေႃႇၶဝ်တႃႉႁဝ်း။ ပေႃးဢမ်ႇၼၼ် ၶဝ်တၵ်းယႂ်ႇၽႄႈၼမ်ၵိုၼ်းမႃးဢေႃႈ။ ၵမ်းလိုၼ်းပေႃးပဵၼ်သိုၵ်းပဵၼ်သိူဝ်ၸိုင်၊ ၶဝ်တၵ်းၶဝ်ႈယူႇၽၢႆႇရၢၼ်ႇသူႇႁဝ်းၼၼ်ႉသေလႄႈ တိုၵ်းတေႃးႁဝ်းသေယဝ်ႉ၊ ဢွၵ်ႇသေၵႃႈၼႂ်းမိူင်းၸဝ်ႈၼႆႉ ၵႂႃႇသေဢေႃႈ၊ ဝႃႈၼင်ႇၼႆဢေႃႈ။- 11ပိူဝ်ႈၼႆလႄႈ ၶဝ်ၼၼ်ႉၶၢၼ်းၶုၼ် ဢၼ်ဢုပ်ႉၵႃႈၼိူဝ်ၶဝ်ဝႆႉ ႁႂ်ႈလႆႈဢဝ်တင်းၵၢၼ်တၢင်းႁဵတ်း ဢၼ်ယၢပ်ႇၼႃႇၽိုတ်ႇၼႃႇၼၼ်ႉ ၼိၵ်ႈၸၢၵ်ႈငႅၼ်းသႄးၶဝ်ၼႃႇလူင်လၢင်ဢေႃႈ။ ၶဝ်ၵေႃႈ လႆႈတႄႇႁဵတ်းဝဵင်း တီႈဢၼ်တၵ်းသိမ်းၽၼ်ႇတႃႇၸဝ်ႈဝႆႉပုၼ်ႈ ၶုၼ်ႁေႃၶမ်းၽႃႇရေႃးဢၼ်ဝႃႈ ဝဵင်းပီႉတုမ်ႇတင်းဝဵင်းရႃႇမသိတ်ႈဢေႃႈ။- 12ၵူၺ်းၵႃႈ ၸွမ်းၵႃႈၼင်ႇဢၼ် ၶဝ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးယူႇၼၼ်ႉ၊ ၶဝ်ယဵင်ႈၶႅၼ်းယႂ်ႇၽႄႈၼမ်ၵိုၼ်းမႃး ၸွတ်ႇတူဝ်ႈၵႂႃႇဢေႃႈ။ ၵူၼ်းဢေႇၵိပ်ႉတူႉတင်းလၢႆ ဢွၼ်ၵၼ်မႆႈၸႂ်ၵွပ်ႈပိူဝ်ႈၵူၼ်းမဵဝ်းဢီႉသရေႇလႃႉၸိူဝ်းၼၼ်ႉလႄႈ၊- 13ႁႂ်ႈၶဝ်ၶၢမ်ႇႁဵတ်းၶႃႈယၢပ်ႇၼႃႇၽိုတ်ႇၼႃႇလူင်လၢင်ဢေႃႈ။- 14ၶဝ်ၼၼ်ႉႁႂ်ႈၶဝ်ၶီၸႂ်ၶူမ်ၸႂ်လူၺ်ႈတၢင်းဢၼ် ၸႂ်ႉႁဵတ်းဢၼ်ယၢပ်ႇၼႃႇယဵၼ်းၼႃႇ ၼႂ်းလွင်ႈတၢင်းဢၼ် ႁဵတ်းလိၼ်ၼဵဝ် တင်းမၢၵ်ႇဢုတ်ႇ၊ ၼႂ်းလွင်ႈတၢင်းဢၼ်ႁဵတ်းႁႆႊႁဵတ်းၼႃး ၵူႈၸိူဝ်ႉၵူႈပိူင်ဢၼ်ဝႃႈ တၢင်းဢၼ်ၸႂ်ႉႁဵတ်းၵူႈၸိူဝ်ႉၵူႈပိူင် ဢၼ်ၸႂ်ႉႁဵတ်းၵၢၼ်တၢင်းႁဵတ်း ဢၼ်ယၢပ်ႇၼႃႇၽိုတ်ႇၼႃႇလူင်လၢင်ၸိူဝ်းၼၼ်ႉဢေႃႈ။

15ၶုၼ်ႁေႃၶမ်းမိူင်းဢေႇၵိပ်ႉတူႉ လၢတ်ႈတီႈမႄႈၵဵပ်းႁေႇပြႄးဢၼ်လႆႈၸိုဝ်ႈ သီႉၽရႃႉ၊ တင်းပူႉဢႃႇၸိူဝ်းၼၼ်ႉလႄႈဝႃႈ၊- 16မိူဝ်ႈဢၼ်သူ ႁဵတ်းမႄႈၵဵပ်းတီႈမႄႈယိင်း ႁေႇပြႄးတင်းလၢႆလႄႈ ႁၼ်ၶဝ်မီးယူႇၵႃႈတီႈဢၼ်ၵိူတ်ႇလဵင်ႉလုၵ်ႈၼၼ်ႉ၊ ပေႃးပဵၼ်ၵူၼ်းၸၢႆးဢွၼ်ႇၸိုင်၊ သူတၵ်းလႆႈဢဝ်တၢႆပႅတ်ႈသေဢေႃႈ။ ပေႃးပဵၼ်ၵူၼ်းယိင်းဢွၼ်ႇၸိုင်၊ မၼ်းတၵ်းလႆႈဢသၢၵ်ႈလိပ်းယူႇဢေႃႈ၊ ဝႃႈၼင်ႇၼႆဢေႃႈ။- 17မႄႈၵဵပ်းၸိူဝ်းၼၼ်ႉၵူဝ်ႁႄၽြႃးပဵၼ်ၸဝ်ႈလႄႈ ဢမ်ႇႁဵတ်းၸွမ်းၵႃႈၼင်ႇဢၼ်ၶုၼ်ႁေႃၶမ်းဢေႇၵိပ်ႉတူႉ မီးဢမိင်ႉၼၼ်ႉ။ ၶဝ်ပၼ်ႁႂ်ႈၵူၼ်းၸၢႆးဢွၼ်ႇတင်းလၢႆ ဢသၢၵ်ႈလႆႈၵတ်းယဵၼ်ၶျၢမ်းသႃႇယူႇဢေႃႈ။- 18ၶုၼ်ႁေႃၶမ်းမိူင်းဢေႇၵိပ်ႉတူႉၵေႃႈ ႁွင်ႉဢဝ်မႄႈၵဵပ်းၸိူဝ်းၼၼ်ႉလႄႈ ၸႅတ်ႈထၢမ်လႄႈဝႃႈ၊ ႁဵတ်းသင်လႄႈသူႁဵတ်းၸိူဝ်ႉၼင်ႇၼႆၼင်ႇႁိုဝ်။ ႁဵတ်းသင်လႄႈ သူပၼ်ၵူၼ်းၸၢႆးဢွၼ်ႇတင်းလၢႆ ဢသၢၵ်ႈလႆႈၵတ်းယဵၼ်ၶျၢမ်းသႃႇယူႇၼင်ႇႁိုဝ်။ ဝႃႈၼင်ႇၼႆသေယဝ်ႉ၊- 19မႄႈၵဵပ်းၸိူဝ်းၼၼ်ႉၵေႃႈၶိုၼ်းလဝ်ႊလၢတ်ႈတီႈၶုၼ်ႁေႃၶမ်းၽႃႇရေႃးလႄႈဝႃႈ၊ မႄႈယိင်းႁေႇပြႄးတင်းလၢႆ ဢမ်ႇမိူၼ်ၸိူဝ်ႉၼင်ႇ မႄႈယိင်းဢေႇၵိပ်ႉတူႉတင်းလၢႆတီႈၶႃႈ၊ ၵွပ်ႈပိူဝ်ႈဢၼ်ၶဝ်ၵႅၼ်ႇၶႅင်ၼႃႇလႄႈ၊ ၶဝ်ၸၢင်ႈၵိူတ်ႇလဵင်ႉလုၵ်ႈၸူဝ်ႈဢၼ်မႄႈၵဵပ်းဢမ်ႇပႆႇၶဝ်ႈႁွတ်ႈၶဝ်ႈထိုင်ၼၼ်ႉသေ တီႈၶႃႈဢေႃႈ၊ ဝႃႈၼင်ႇၼႆဢေႃႈ။- 20ပိူဝ်ႈၼႆလႄႈ ၽြႃးပဵၼ်ၸဝ်ႈ ႁဵတ်းၵျေးၸူးတီႈမႄႈၵဵပ်းၸိူဝ်းၼၼ်ႉဢေႃႈ။ ၵူၼ်းမဵဝ်းၼၼ်ႉၵေႃႈ ယႂ်ႇၽႄႈၼမ်ၵိုၼ်းမႃးလႄႈႁႅင်းယႂ်ႇၼႃႇလူင်လၢင်ဢေႃႈ။- 21ပိူဝ်ႈဢၼ်မႄႈၵဵပ်းၸိူဝ်းၼၼ်ႉ ၵူဝ်ႁႄၽြႃးပဵၼ်ၸဝ်ႈလႄႈ၊ မၼ်းၸဝ်ႈပွင်ႁဵတ်း လုမ်းလႃးၵူၼ်းႁိူၼ်းၵူၼ်းယေးၶဝ်ဢေႃႈ။- 22ၶုၼ်ႁေႃၶမ်းၽႃႇရေႃး သင်ႇလၢတ်ႈတီႈၶႃႈဝၢၼ်ႈၵူၼ်းမိူင်းမၼ်းၸဝ်ႈ တင်းသဵင်ႈတင်းလူင်ဝႆႉလႄႈဝႃႈ၊ တၵ်းလႆႈဢဝ်လုၵ်ႈၸၢႆးဢွၼ်ႇၶဝ်ၵႃႈဢၼ်ၵိူတ်ႇလဵင်ႉမႃးတင်းသဵင်ႈတင်းလူင်ၼၼ်ႉ ၶျႃးတူၵ်းပႅတ်ႈၵႃႈၼႂ်းၼမ်ႉႁွင်ႈဢေႃႈ။ ၵႃႈဢၼ်ပဵၼ်လုၵ်ႈယိင်းဢွၼ်ႇၸမ်ႉ၊ တၵ်းလႆႈႁႂ်ႈဢသၢၵ်ႈ ၵတ်းယဵၼ်ၶျၢမ်းသႃႇယူႇဢေႃႈ၊ ဝႃႈၼင်ႇၼႆဢေႃႈ။

Currently Selected:

ဢွၵ်ႇၵႂႃႇ 1: CBMS

Highlight

Compare

Copy