ဢွၵ်ႇၵႂႃႇ 27

ယိတ်ႈပလၢင်ႇ

(တူၺ်း၊ ဢွၵ်ႇ 38:1-7)

1ၼႄးၼိုင်ႈၸမ်ႉ၊ မႂ်းတၵ်းလႆႈဢဝ်မႆႉဢၵႃႇသႃႉႁဵတ်းယိတ်ႈပလၢင်ႇ ဢၼ်ၼႃႈယၢဝ်းမၼ်းမီးႁႃႈသွၵ်ႇ၊ ၼႃႈပွတ်းမၼ်းႁႃႈသွၵ်ႇလႄႈ ပဵၼ်သီႇၸဵင်ႇၶိုင်ႈဝႆႉၼၼ်ႉဢေႃႈ။ ဢၼ်သုင်မၼ်းၵေႃႈတၵ်းလႆႈမီးသၢမ်သွၵ်ႇဢေႃႈ။- 2မႂ်းတၵ်းလႆႈႁဵတ်းၶဝ်လႅမ်သီႇလႅမ်ႈ သႂ်ႇၵႃႈၼိူဝ်သီႇၸဵင်ႇမၼ်းဢေႃႈ။ ၶဝ်လႅမ်ၸိူဝ်းၼၼ်ႉ တၵ်းလႆႈပဵၼ်ၼိူဝ်ႉလဵဝ်ၵၼ်တင်းမၼ်းလႄႈ မႂ်းတၵ်းလႆႈဢဝ်တွင်းလိူင်ဢုမ်ႇႁေႃႇသေဢေႃႈ။- 3မႂ်းတၵ်းလႆႈဢဝ်တွင်းလိူင် ႁဵတ်းမေႃႈပုၼ်ႈဢၼ်တၵ်းတုင်းတဝ်ႈမၼ်း၊ ၸေႃႉၽႅပ်ႉမၼ်း၊ ၵွၵ်းဝၢၼ်ႇမၼ်း၊ ၶေႃဢၼ်ၵွင်ႉၼိူဝ်ႉမၼ်း၊ လၢင်ႇပၢၼ်း#27:3 လၢင်ႇပၢၼ်း ၶႂ်ႈဝႃႈ ပၢၼ်ႉမၼ်း၊ ၶိူင်ႈပိူင်ၵႃႈဢၼ်ၸၢပ်ႈသႅင်ႇၵၼ်တင်းယိတ်ႈပလၢင်ႇ တင်းသဵင်ႈတင်းလူင်ၼၼ်ႉဢေႃႈ။- 4မႂ်းတၵ်းလႆႈႁဵတ်းတႃၶႃႇတွင်းလိူင်ပုၼ်ႈမၼ်းဢေႃႈ။ တၵ်းလႆႈႁဵတ်းၶူၺ်ႇတွင်းလိူင်သီႇဢၼ်သႂ်ႇ ၵႃႈၼိူဝ်တႃၶႃႇၼၼ်ႉ ၵႃႈတီႈသီႇၸဵင်ႇမၼ်းသေယဝ်ႉ၊- 5မႂ်းတၵ်းလႆႈဢဝ်မၼ်းဝႆႉၵႃႈတႂ်ႈၶႃႇပၢၼ်းဢၼ်လဵပ်ႈႁွပ်ႈယိတ်ႈပလၢင်ႇ ဢၼ်ၵႃႈတႂ်ႈၼၼ်ႉလႄႈ ႁႂ်ႈတႃၶႃႇၼၼ်ႉလႆႈၶိုတ်းထိုင် ၵႃႈတီႈၶိုင်ႈၵၢင် ယိတ်ႈပလၢင်ႇဢေႃႈ။- 6မႂ်းတၵ်းလႆႈဢဝ်မႆႉဢၵႃႇသႃႉ ႁဵတ်းၵၢၼ်းႁၢပ်ႇယိတ်ႈပလၢင်ႇလႄႈဢဝ်တွင်းလိူင်ဢုမ်ႇႁေႃႇသေယဝ်ႉ၊- 7တၵ်းလႆႈဢဝ်ၵၢၼ်းႁၢပ်ႇၸိူဝ်းၼၼ်ႉသွတ်ႇသႂ်ႇဝႆႉၵႃႈၼႂ်းၶူၺ်ႇလႄႈ ၵၢၼ်းႁၢပ်ႇၸိူဝ်းၼၼ်ႉ တၵ်းလႆႈမီးယူႇၵႃႈတီႈသွင်ၽၢၵ်ႇယိတ်ႈပလၢင်ႇလႄႈ ပဵၼ်ပုၼ်ႈဢၼ်တၵ်းႁၢပ်ႇမၼ်းဢေႃႈ။- 8မႂ်းတၵ်းလႆႈဢဝ်ပႅၼ်ႈႁဵတ်းမၼ်းႁႂ်ႈၵႃႈၼႂ်းမၼ်းပွင်ႇပဵၼ်ပဵဝ်ဝႆႉဢေႃႈ။ ၶဝ်တၵ်းလႆႈႁဵတ်းၸွမ်းၵႃႈၼင်ႇဢၼ်ၵဝ်ၼႄပျႃးတီႈမႂ်း ၵႃႈၼိူဝ်လွႆၼၼ်ႉမိူၼ်မိူၼ်ဢေႃႈ။

ႁူဝ်ႉဝၢင်းသုမ်ႉထဵင်ၸဝ်ႈ

(တူၺ်း၊ ဢွၵ်ႇ 38:9-20)

9ဢၼ်တၵ်းၵင်ႈႁဵတ်းႁူဝ်ႉဝၢင်းသုမ်ႉထဵင်ၸဝ်ႈၸမ်ႉ၊ တၵ်းလႆႈဢဝ်ပိၵ်ႈၶျေႃးဢၼ်ၼႃႈယၢဝ်းမၼ်း မီးပၢၵ်ႇသွၵ်ႇၼၼ်ႉ ႁဵတ်းၽႃႈၵင်ႈ ပုၼ်ႈၼႃႈတၢင်းၸၢၼ်းဢေႃႈ။- 10ပုၼ်ႈၽႃႈၵင်ႈၼၼ်ႉ မႂ်းတၵ်းလႆႈႁဵတ်းသဝ်သၢဝ်းၼိုင်ႈ၊ တင်းတီႈသုပ်းတိၼ်တွင်းလိူင်သၢဝ်းၼိုင်ႈဢေႃႈ။ တႅမ်တီႈသဝ်ဢိၵ်ႇတင်းႁၢဝ်းၸိူဝ်းၼၼ်ႉ တၵ်းလႆႈပဵၼ်ငိုၼ်းဢေႃႈ။- 11မိူၼ်ၼင်ႇၼၼ် ပုၼ်ႈၼႃႈတၢင်းႁွင်ႇၵေႃႈ၊ တၵ်းလႆႈမီးၽႃႈၵင်ႈဢၼ်ၼႃႈယၢဝ်းမၼ်း မီးပၢၵ်ႇသွၵ်ႇဢိၵ်ႇတင်း သဝ်သၢဝ်းၼိုင်ႈ၊ တီႈသုပ်းတိၼ်တွင်းလိူင်သၢဝ်းၼိုင်ႈ၊ တႅမ်ငိုၼ်းတီႈသဝ်ဢိၵ်ႇတင်းႁၢဝ်းငိုၼ်းၸိူဝ်းၼၼ်ႉဢေႃႈ။

12ပုၼ်ႈၼႃႈပွတ်းဝၢင်းၽၢႆႇတၢင်းဝၼ်းတူၵ်းၼၼ်ႉ တၵ်းလႆႈမီးၽႃႈၵင်ႈဢၼ်ၼႃႈယၢဝ်းမၼ်းမီးႁႃႈသိပ်းသွၵ်ႇ ဢိၵ်ႇတင်းသဝ်သိပ်းၼိုင်ႈ၊ တင်းတီႈသုပ်းတိၼ်သိပ်းၼိုင်ႈဢေႃႈ။- 13ၵႃႈတီႈၼႃႈဝၢင်းၽၢႆႇတၢင်းဝၼ်းဢွၵ်ႇၵေႃႈ၊ ၼႃႈပွတ်းမၼ်း တၵ်းလႆႈမီးႁႃႈသိပ်းသွၵ်ႇဢေႃႈ။- 14ပုၼ်ႈဢၼ်တၵ်းၵင်ႈႁိမ်းၽၵ်းတူၽၢႆႇၼိုင်ႈၼၼ်ႉ တၵ်းလႆႈမီးၽႃႈၵင်ႈဢၼ်ၼႃႈယၢဝ်းမၼ်း မီးသိပ်းႁႃႈသွၵ်ႇ ဢိၵ်ႇတင်းသဝ်သၢမ်လႅမ်ႈ တင်းတီႈသုပ်းတိၼ်သၢမ်ဢၼ်ဢေႃႈ။- 15ပုၼ်ႈႁိမ်းၽၵ်းတူၽၢႆႇၼိုင်ႈၵေႃႈ၊ တၵ်းလႆႈမီးၽႃႈၵင်ႈဢၼ်ၼႃႈယၢဝ်းမၼ်းမီး သိပ်းႁႃႈသွၵ်ႇ ဢိၵ်ႇတင်းသဝ်သၢမ်လႅမ်ႈ တင်းတီႈသုပ်းတိၼ် သၢမ်ဢၼ်ဢေႃႈ။

16ပုၼ်ႈဢၼ်တၵ်းၵင်ႈၽၵ်းတူႁူဝ်ႉဝၢင်းၼၼ်ႉ တၵ်းလႆႈမီးၽႃႈၵင်ႈဢၼ်ဢဝ်တင်းၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင် တင်းပိၵ်ႈၶျေႃး တမ်ႇၵၢမ်းၵၼ်ႁၢင်ႈၶိူင်ႈတေႃးႁဵတ်း၊ ဢၼ်ၼႃႈယၢဝ်းမၼ်းမီးသၢဝ်းသွၵ်ႇၼၼ်ႉ ဢိၵ်ႇတင်းသဝ်သီႇလႅမ်ႈ၊ တင်းတီႈသုပ်းတိၼ် သီႇဢၼ်ဢေႃႈ။- 17သဝ်ဝၢင်းဢၼ်မီးၵႃႈတီႈႁိမ်းၸိူဝ်းၼၼ်ႉ ၵႃႈမီးတင်းသဵင်ႈတင်းလူင် တၵ်းလႆႈပျေႉၸုမ်ႇတင်းႁၢဝ်းငိုၼ်း၊ တႅမ်တီႈသဝ်ငိုၼ်း တင်းတီႈသုပ်းတိၼ်တွင်းလိူင်ဢေႃႈ။

18ၼႃႈယၢဝ်းဝၢင်းၼၼ်ႉတၵ်းလႆႈမီးပၢၵ်ႇသွၵ်ႇ၊ ၼႃႈပွတ်းမၼ်းႁႃႈသိပ်းသွၵ်ႇၵူႈတီႈ၊ ဢၼ်သုင်မၼ်းႁႃႈသွၵ်ႇလႄႈ၊ တၵ်းလႆႈမီးတင်းပိၵ်ႈၶျေႃး တင်းတီႈသုပ်းတိၼ်တွင်းလိူင်ဢေႃႈ။- 19ၶိူင်ႈယိပ်းၶိူင်ႈၵႅမ်းသုမ်ႉထဵင်ၸဝ်ႈ ပုၼ်ႈဢၼ်တၵ်းလႆႈၵိုတ်ႉႁၢပ်ႇဢမူႉၸဝ်ႈၵႃႈမီးတင်းသဵင်ႈတင်းလူင်၊ လၵ်းသုမ်ႉထဵင်ၸဝ်ႈ ဢိၵ်ႇတင်းလၵ်းဢၼ်ၸၢပ်ႈသႅင်ႇၵၼ်တင်းႁူဝ်ႉဝၢင်းၸိူဝ်းၼၼ်ႉ တၵ်းလႆႈပဵၼ်တွင်းလိူင်ဢေႃႈ။

ၼမ်ႉမၼ်းပုၼ်ႈတီႈတႆႈၽႆး

(တူၺ်း၊ ႁဵတ်း 24:1-4)

20မႂ်းတၵ်းလႆႈသင်ႇလၢတ်ႈဝႆႉ တီႈၵူၼ်းမဵဝ်းဢီႉသရေႇလႃႉတင်းလၢႆ ႁႂ်ႈၶဝ်ဢဝ်ၼမ်ႉမၼ်းသၢၼ်ႇလုၼ်ႇၸႅတ်ႈၸႅတ်ႈ ဢၼ်တမ်ဢဝ်ပုၼ်ႈဢၼ်တၵ်းတႆႈၽႆးၼၼ်ႉ မႃးတီႈမႂ်းပုၼ်ႈဢၼ်တၵ်းႁႂ်ႈၶူင်ႇတီႈတႆႈၽႆး တႆႈၽႆးယူႇသေႇသေႇဢေႃႈ။- 21ၵႃႈၼႂ်းမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၵႃႈတီႈၽၢႆႇၼွၵ်ႈၽႃႈၵင်ႈ ဢၼ်ၵင်ႈဝႆႉၵႃႈတီႈၽၢႆႇၼႃႈ တီႈဢၼ်ဝႆႉၶိူင်ႈဢၼ်ၶၢမ်ႇသၢၵ်ႈသေႇၼၼ်ႉ ဢႃႇရုၼ်ႇတင်းလုၵ်ႈၸၢႆးမၼ်းတင်းလၢႆ တၵ်းလႆႈမႄးႁဵတ်းမႄးႁႅၼ်းလွင်ႈတၢင်းၼၼ်ႉ ၸႃႉၸဵမ်ၶိင်ႇႁူဝ်ၶမ်ႈတေႃႇထိုင်ႁွတ်ႈၶိင်ႇၵၢင်ၼႂ် ၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉဢေႃႈ။ တၵ်းလႆႈပဵၼ်ထုင်းၽိင်ႈၸဝ်ႈ ဢၼ်ၸိူဝ်ႉၶိူဝ်းၵူၼ်းမဵဝ်းဢီႉသရေႇလႃႉ ၸူဝ်ႈလုၵ်ႈပၢၼ်လၢၼ် တၵ်းလႆႈပႂ်ႉတႃႇသေႇဢမ်ႇထၢတ်ႇဢေႃႈ။

Currently Selected:

ဢွၵ်ႇၵႂႃႇ 27: CBMS

Highlight

Compare

Copy