ဢွၵ်ႇၵႂႃႇ 28
28
သိူဝ်ႈသုပ်းပုၼ်ႈယိတ်ႈပရေႃးႁဵၵ်ႈ
(တူၺ်း၊ ဢွၵ်ႇ 39:1-7)
1လွင်ႈၼင်ႇႁိုဝ်ပီႈၸၢႆးမႂ်းဢႃႇရုၼ်ႇၼၼ်ႉ တၵ်းလႆႈပွင်ႁဵတ်းဢမူႉယိတ်ႈပရေႃးႁဵၵ်ႈ ၵႃႈတီႈၽၢႆႇၼႃႈၵဝ်ၸိုင် ဢဝ်မၼ်းတင်းလုၵ်ႈၸၢႆးမၼ်းဢၼ်ဝႃႈ၊ ၼႃႇတပ်ႉ၊ ဢၽီႉႁူႉ၊ ဢေးလႃႇၸႃႇတင်းဢီႉသမႃႇၸိူဝ်းၼၼ်ႉ ဢွၵ်ႇသေၵႃႈၼႂ်းၵူၼ်းမဵဝ်းဢီႉသရေႇလႃႉတင်းလၢႆလႄႈ ႁႂ်ႈသုတ်ႉၸပ်းသုတ်ႉၸူးတီႈမႂ်းတႃႉ။- 2မႂ်းတၵ်းလႆႈႁဵတ်း ၶူဝ်းၼုင်ႈဢၼ်မူတ်းၸၢင်ႇ ပၼ်တီႈပီႈၸၢႆးမႂ်းဢႃႇရုၼ်ႇၼၼ်ႉ ပုၼ်ႈဢၼ်တၵ်းပဵၼ်မုၼ်ပဵၼ်သရေႇဢေႃႈ။- 3မႂ်းတၵ်းလႆႈသင်ႇလၢတ်ႈဝႆႉ တီႈၵူၼ်းဢၼ်မီးပိင်ႇၺႃႇ ၵႃႈၼႂ်းၸႂ်ဢၼ်ၵဝ်ႁႂ်ႈတဵမ်ဝႆႉတင်းၺၢၼ်ႇၼၼ်ႉ တင်းသဵင်ႈတင်းလူင် ႁႂ်ႈၶဝ်လႆႈဢွၼ်ၵၼ်ႁဵတ်းၶူဝ်းၼုင်ႈပၼ်တီႈဢႃႇရုၼ်ႇ ႁႂ်ႈမၼ်းလႆႈမူတ်းၸၢင်ႇလႄႈ မီးဢၶႂၢင်ႉဢၼ်လႆႈပွင်ႁဵတ်း ဢမူႉယိတ်ႈပရေႃးႁဵၵ်ႈ ၵႃႈတီႈၽၢႆႇၼႃႈၵဝ်ၼၼ်ႉဢေႃႈ။- 4ၶူဝ်းၼုင်ႈဢၼ်တၵ်းလႆႈႁဵတ်းၸမ်ႉ၊ ပဵၼ်ၶိူင်ႈဝႆၼႃႈဢူၵ်း၊ သိူဝ်ႈသုပ်း၊ သိူဝ်ႈယၢဝ်း၊ သိူဝ်ႈပုတ်းဢၼ်ႁၢင်ႈၶိူင်ႈ၊ ၶဵၼ်းႁူဝ် တင်းသၢႆႁတ်ႉဢႅဝ်ဢေႃႈ။ ၶဝ်တၵ်းလႆႈႁဵတ်းၶူဝ်းဢၼ်မူတ်းၸၢင်ႇ ပၼ်ပီႈၸၢႆးမႂ်းဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉ ႁႂ်ႈမၼ်းလႆႈပွင်ႁဵတ်းဢမူႉယိတ်ႈပရေႃးႁဵၵ်ႈၵႃႈတီႈၽၢႆႇၼႃႈၵဝ်ၼႆႉဢေႃႈ။- 5ၶဝ်တၵ်းလႆႈဢဝ်ၶမ်း၊ ၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင်ဢိၵ်ႇတင်း ပိၵ်ႈၶျေႃးဢေႃႈ။
6ၶဝ်တၵ်းလႆႈဢဝ်ၶမ်း၊ ၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင် ဢိၵ်ႇတင်းပိၵ်ႈၶျေႃး တေႃးႁၢင်ႈၶိူင်ႈႁဵတ်းသိူဝ်ႈသုပ်းဢေႃႈ။- 7ၼင်ႇႁိုဝ်မၼ်းတၵ်းႁွႆႈၸပ်းၵၼ်ၸိုင်၊ တၵ်းလႆႈမီးသၢႆတွႆးသွင်သဵၼ်ႈၵႃႈတီႈႁိမ်းသုတ်းမၼ်းသွင်ၽၢႆႇဢေႃႈ။- 8သၢႆႁတ်ႉဢႅဝ်ဢၼ်ႁၢင်ႈၶိူင်ႈ ဢၼ်ၸၢပ်ႈသႅင်ႇၵၼ်တင်း တၢင်းဢၼ်ၼုင်ႈသိူဝ်ႈသုပ်းဢၼ်မီးၵႃႈတီႈမၼ်းၵေႃႈ တၵ်းလႆႈပဵၼ်မိူၼ်ၸိူဝ်ႉၼင်ႇသိူဝ်ႈသုပ်းၼၼ်ႉလႄႈ ပဵၼ်ၼိူဝ်ႉလဵဝ်ၵၼ်တင်းမၼ်းဢေႃႈ။ တၵ်းလႆႈဢဝ်ၶမ်းဢိၵ်ႇတင်းၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင်၊ ပိၵ်ႈၶျေႃးႁဵတ်းဢေႃႈ။- 9မႂ်းတၵ်းလႆႈဢဝ်သႅင်ၸၢႆးၶႃးယွတ်ႇသွင်လုၵ်ႈလႄႈ ဢဝ်ဢႅၵ်ႉၶရႃႇတူဝ်လိၵ်ႈၼႃႇမႃႉၸိုဝ်ႈသဵင် မဵဝ်းၵူၼ်းဢီႉသရေႇလႃႉတင်းလၢႆ တၢင်ႇသႂ်ႇဝႆႉၵႃႈၼိူဝ်ၼၼ်ႉဢေႃႈ။- 10ၸွမ်းလူၺ်ႈဢသၢၵ်ႈၵေႃႉယႂ်ႇတေႃႇထိုင်ႁွတ်ႈၵေႃႉလဵၵ်ႉသေလႄႈ ဢဝ်ၼႃႇမႃႉၸိုဝ်ႈသဵင်တၢင်ႇသႂ်ႇဝႆႉၵႃႈတီႈယေႈလုၵ်ႈႁူၵ်းဢၼ်ဢေႃႈ။- 11မိူၼ်ၸိူဝ်ႉၼင်ႇဢၼ် ဢဝ်ဢႅၵ်ႉၶရႃႇတူဝ်လိၵ်ႈတၢင်ႇသႂ်ႇဝႆႉ ၵႃႈၼိူဝ်တၼ်းသိၵ်ႈၼၼ်ႉ တၵ်းလႆႈဢဝ်တင်းတၢင်းႁဵတ်းဢၼ်မေႃႁဵတ်းတီႈသႅင်ၼၼ်ႉ ဢဝ်ဢႅၵ်ႉၶရႃႇတူဝ်လိၵ်ႈၼႃႇမႃႉၸိုဝ်ႈသဵင်မဵဝ်းၵူၼ်းဢီႉသရေႇလႃႉတင်းလၢႆတၢင်ႇသႂ်ႇၵႃႈၼိူဝ်သႅင် သွင်လုၵ်ႈၼၼ်ႉလႄႈ သႂ်ႇဝႆႉၵႃႈၼႂ်းႁိူၼ်းၶမ်းမၼ်းဢေႃႈ။- 12မႂ်းတၵ်းလႆႈဢဝ်သႅင်သွင်လုၵ်ႈၼၼ်ႉ သႂ်ႇဝႆႉၵႃႈၼိူဝ်သၢႆတွႆးသိူဝ်ႈသုပ်းႁႂ်ႈပဵၼ်သႅင်ပုၼ်ႈဢၼ်မၼ်းၸဝ်ႈ တၵ်းၶုၵ်းၸႂ်လႆႈၶႆႈၸႂ်ထူပ်း ၵူၼ်းမဵဝ်းဢီႉသရေႇလႃႉတင်းလၢႆဢေႃႈ။ ဢႃႇရုၼ်ႇတၵ်းလႆႈပႃးဢဝ်တင်းၼႃႇမႃႉၸိုဝ်ႈသဵင်ၶဝ်ၼၼ်ႉ ဝႆႉၵႃႈၼိူဝ်ႁူဝ်မႃႇမၼ်း ၵႃႈတီႈၽၢႆႇၼႃႈထႃႇဝရႃႉၽြႃး ပုၼ်ႈဢၼ်မၼ်းၸဝ်ႈတၵ်းၶုၵ်းၸႂ်လႆႈၶႆႈၸႂ်ထူပ်းၶဝ်ဢေႃႈ။- 13မႂ်းတၵ်းလႆႈဢဝ်ၶမ်း ႁဵတ်းလူင်ႇမွၵ်ႇၶမ်းဢေႃႈ။- 14သၢႆသွင်သဵၼ်ႈဢၼ်လိမ်ႇၵဵဝ်ႈၵေႃႈ မႂ်းတၵ်းလႆႈဢဝ်ၶမ်းလွတ်ႈငၢၼ်ႇ ၽၼ်ႈႁဵတ်းလႄႈ ႁဵတ်းသေယဝ်ႉ၊ တၵ်းလႆႈဢဝ်ႁွႆႈသႂ်ႇၵႃႈတီႈလူင်ႇမွၵ်ႇၶမ်းၼၼ်ႉဢေႃႈ။
ၶိူင်ႈၶူဝ်းထၢပ်ႈၼႃႈဢူၵ်း
(တူၺ်း၊ ဢွၵ်ႇ 39:8-21)
15မႂ်းတၵ်းလႆႈတမ်ႇၵၢမ်းၵၼ် တေႃးႁၢင်ႈၶိူင်ႈႁဵတ်းၶိူင်ႈဝႆၼႃႈဢူၵ်းပျႃႇတိၵ်ႈ မိူၼ်ၸိူဝ်ႉၼင်ႇဢၼ်ႁဵတ်းသိူဝ်ႈသုပ်းၼၼ်ႉဢေႃႈ။ တၵ်းလႆႈဢဝ်ၶမ်း၊ ၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင် ဢိၵ်ႇတင်းပိၵ်ႈၶျေႃးႁဵတ်းဢေႃႈ။- 16တၵ်းလႆႈတူပ်ႉႁဵတ်းသွင်ထၢပ်ႈလႄႈၼႃႈယၢဝ်းမၼ်းၶိုပ်ႈၼိုင်ႈ၊ ၼႃႈပွတ်းမၼ်းၶိုပ်ႈၼိုင်ႈ၊ တၵ်းလႆႈပဵၼ်သီႇၸဵင်ႇၶိုင်ႈဝႆႉဢေႃႈ။- 17ၵႃႈတီႈၶိူင်ႈဝႆၼႃႈဢူၵ်းၼၼ်ႉ မႂ်းတၵ်းလႆႈႁဵတ်းႁိူၼ်းသႅင်လႄႈ ဢဝ်သႅင်ဢၼ်မျၢတ်ႈၼၼ်ႉ ၸီႇသီႇထႅဝ်ဢေႃႈ။ ထႅဝ်ပထမႃႉၸမ်ႉ၊ ပဵၼ်သႅင်လႅင်၊ ဢုၵ်ႉသၽူႉရႃႇ တင်းမျႃႉဢေႃႈ။- 18ထႅဝ်တူႉတီႉယႃႉၸမ်ႉ၊ ပဵၼ်ပတမျႃး၊ ၼီႇလႃႇတင်းၸိင်ႇဢေႃႈ။- 19ထႅဝ်တႃႉတီႉယႃႉၸမ်ႉ၊ ပဵၼ်ဝႃႇၵိၼ်ႇသူႉ၊ မႁူႇရႃႇ တင်းၵေႃႈမုၵ်ႉဢေႃႈ။- 20ထႅဝ်ၸတုၵ်ႉထႃႉၸမ်ႉ၊ ပဵၼ်သႅင်မျႅၵ်ႉရွႆး၊ ၸၢႆးၶႃးယွတ်ႇ တင်းၼၵႃးသွႆႈဢေႃႈ။ သႅင်ႁင်းၽႂ်ႁင်းမၼ်းတၵ်းလႆႈဢဝ် ၸီႇသႂ်ႇၼႂ်းႁိူၼ်းၶမ်းမၼ်းဢေႃႈ။- 21သႅင်ၸိူဝ်းၼၼ်ႉ ၸွမ်းၵႃႈၼင်ႇၼႃႇမႃႉၸိုဝ်ႈသဵင်ၵူၼ်းမဵဝ်းဢီႉသရေႇလႃႉၼၼ်ႉသေလႄႈ တၵ်းလႆႈမီးသိပ်းသွင်လုၵ်ႈ ၸွမ်းၵႃႈၼင်ႇ ၼႃႇမႃႉၸိုဝ်ႈသဵင်ၶဝ်မီးၼၼ်ႉဢေႃႈ။ တၵ်းလႆႈပဵၼ်မိူၼ်ၸိူဝ်ႉၼင်ႇဢၼ် ဢဝ်ဢႅၵ်ႉၶရႃႇတူဝ်လိၵ်ႈတၢင်ႇသႂ်ႇဝႆႉၵႃႈၼိူဝ်တၼ်းသိၵ်ႈၼၼ်ႉလႄႈ ပဵၼ်ပုၼ်ႈမဵဝ်းသိပ်းသွင်ပႃး ႁင်းၽႂ်ႁင်းမၼ်း ၵႃႈၼင်ႇၼႃႇမႃႉၸိုဝ်ႈသဵင်ၶဝ်မီးၼၼ်ႉဢေႃႈ။
22ၵႃႈတီႈၽၢႆႇၼိူဝ်ၶိူင်ႈဝႆၼႃႈဢူၵ်းၼၼ်ႉ မႂ်းတၵ်းလႆႈဢဝ်ၶမ်းလွတ်ႈငၢၼ်ႇႁဵတ်းသၢႆလိမ်ႇၵဵဝ်ႈ ဢၼ်လႆႈၽၼ်ႈႁဵတ်းၼၼ်ႉသႂ်ႇဢေႃႈ။- 23ၵႃႈတီႈၶိူင်ႈဝႆၼႃႈဢူၵ်းၼၼ်ႉ မႂ်းတၵ်းလႆႈႁဵတ်းၶူၺ်ႇၶမ်းသွင်ဢၼ်လႄႈ ဢဝ်ၶူၺ်ႇသွင်ဢၼ်ၼၼ်ႉ သႂ်ႇဝႆႉၵႃႈတီႈၸဵင်ႇၶိူင်ႈဝႆၼႃႈဢူၵ်းၼၼ်ႉသွင်ၸဵင်ႇဢေႃႈ။- 24မႂ်းတၵ်းလႆႈဢဝ်သၢႆၶမ်းဢၼ်ၽၼ်ႈဝႆႉသွင်သဵၼ်ႈၼၼ်ႉ သွတ်ႇသႂ်ႇၵႃႈၼႂ်းၶူၺ်ႇသွင်ဢၼ်၊ ဢၼ်မီးၵႃႈတီႈၸဵင်ႇၶိူင်ႈဝႆၼႃႈဢူၵ်းၼၼ်ႉဢေႃႈ။- 25ပၢႆသၢႆဢၼ်ၽၼ်ႈဝႆႉသွင်သဵၼ်ႈၼၼ်ႉ ၽၢႆႇၼိုင်ႈၸိုင် မႂ်းတၵ်းလႆႈမတ်ႉၸပ်းၵႃႈတီႈ လူင်ႇမွၵ်ႇၶမ်းသွင်ဢၼ်ၼၼ်ႉဝႆႉလႄႈ ဢဝ်သႂ်ႇဝႆႉ ၵႃႈၼိူဝ်သၢႆတွႆးသိူဝ်ႈသုပ်း ၵႃႈတီႈၽၢႆႇၼႃႈမၼ်းဢေႃႈ။
26မႂ်းသမ်ႉတၵ်းလႆႈႁဵတ်းၶူၺ်ႇၶမ်းသွင်ဢၼ်လႄႈ ဢဝ်သႂ်ႇဝႆႉၵႃႈတီႈၸဵင်ႇၶိူင်ႈဝႆၼႃႈဢူၵ်းၼၼ်ႉသွင်ၸဵင်ႇ၊ ၵႃႈတီႈႁိမ်းမၼ်း ဢၼ်မီးၽၢႆႇတၢင်းၼႂ်းလႄႈ တေႃးၸပ်းၵၼ်တင်းၼႃႈသိူဝ်ႈသုပ်းၼၼ်ႉဢေႃႈ။- 27ၶူၺ်ႇၶမ်းတၢင်ႇဢၼ်ၵေႃႈ မႂ်းတၵ်းလႆႈႁဵတ်းထႅင်ႈသွင်ဢၼ်လႄႈ ဢဝ်သႂ်ႇဝႆႉၵႃႈတီႈသၢႆတွႆးသိူဝ်ႈသုပ်းၵႃႈႁိမ်းတႂ်ႈမၼ်း ၵႃႈတီႈၽၢႆႇၼႃႈမၼ်းၼၼ်ႉ ၵႃႈၼိူဝ်တီႈဢၼ်သိူဝ်ႈသုပ်းတင်းသၢႆႁတ်ႉဢႅဝ်ဢၼ်ႁၢင်ႈၶိူင်ႈၼၼ်ႉ သိုပ်ႇၵၢမ်းၵၼ်ၼၼ်ႉဢေႃႈ။- 28ၶဝ်တၵ်းလႆႈဢဝ်မႆဢၼ်သွမ်ႇမတ်ႉတွႆးၶူၺ်ႇၶမ်းၶိူင်ႈဝႆၼႃႈဢူၵ်းသွင်ဢၼ် ဢိၵ်ႇတင်းၶူၺ်ႇၶမ်းသိူဝ်ႈသုပ်းသွင်ဢၼ်ၼၼ်ႉ ၸပ်းၵၼ်ဝႆႉဢေႃႈ။ ၼင်ႇၼၼ်လႄႈ ၶိူင်ႈဝႆၼႃႈဢူၵ်းၼၼ်ႉ တၵ်းႁွႆႈဝႆႉၵႃႈတီႈၽၢႆႇၼိူဝ်သၢႆႁတ်ႉဢႅဝ် ဢၼ်ႁၢင်ႈၶိူင်ႈၵႃႈတီႈသိူဝ်ႈသုပ်းၼၼ်ႉလႄႈ ယင်းဢမ်ႇၽၢတ်ႇဢမ်ႇယၢၼ်ၵၼ်တင်းသိူဝ်ႈသုပ်းလႄႈ မီးယူႇသေႇသေႇဢေႃႈ။- 29ဢႃႇရုၼ်ႇၵေႃႈ မိူဝ်ႈဢၼ်ၶဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈၼၼ်ႉၸိုင်၊ တၵ်းလႆႈပႃးဢဝ်ၼႃႇမႃႉၸိုဝ်ႈသဵင်ၵူၼ်းမဵဝ်း ဢီႉသရေႇလႃႉ ဢၼ်ပႃးၵႃႈတီႈၶိူင်ႈဝႆၼႃႈဢူၵ်းပျႃႇတိၵ်ႈၼၼ်ႉဝႆႉၵႃႈၼိူဝ်ႁူဝ်ၸႂ်မၼ်း ပုၼ်ႈဢၼ်ထႃႇဝရႃႉၽြႃး တၵ်းၶုၵ်းၸႂ်လႆႈၶႆႈၸႂ်ထူပ်းၶဝ်ၼၼ်ႉ ယူႇသေႇသေႇၼၼ်ႉဢေႃႈ။
30မႂ်းတၵ်းလႆႈဢဝ်ဢူႉရိမ်းတင်းထူႉမိမ်းသႂ်ႇဝႆႉၵႃႈတီႈၶိူင်ႈဝႆၼႃႈဢူၵ်းၼၼ်ႉဢေႃႈ။ ဢႃႇရုၼ်ႇၼၼ်ႉ မိူဝ်ႈဢၼ်ၶဝ်ႈၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉၸိုင်၊ တၵ်းလႆႈပႃးဢဝ်ၸိူဝ်းၼၼ်ႉ ဝႆႉၵႃႈၼိူဝ်ႁူဝ်ၸႂ်မၼ်းဢေႃႈ။ ၼင်ႇၼၼ်လႄႈ ဢႃႇရုၼ်ႇၼၼ်ႉ တၵ်းလႆႈပႃးဢဝ်တၢင်းဢၼ်မၼ်းၸဝ်ႈၸီႇယၢင်ႇၼႂ်းဢမူႉၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ ဝႆႉၵႃႈၼိူဝ်ႁူဝ်ၸႂ်မၼ်း ၵႃႈတီႈၽၢႆႇၼႃႈထႃႇဝရႃႉၽြႃးသေႇသေႇဢေႃႈ။
သိူဝ်ႈၶူဝ်းတၢင်ႇၽိုၼ်ပုၼ်ႈယိတ်ႈပရေႃးႁဵၵ်ႈ
(တူၺ်း၊ ဢွၵ်ႇ 39:22-31)
31မႂ်းတၵ်းလႆႈဢဝ်ၶူဝ်းဢၼ်သွမ်ႇၵူၺ်းၵူၺ်း ႁဵတ်းသိူဝ်ႈယၢဝ်းဢၼ်ၸၢပ်ႈသႅင်ႇၵၼ်တင်း သိူဝ်ႈသုပ်းၼၼ်ႉဢေႃႈ။- 32ၵႃႈတီႈသိူဝ်ႈယၢဝ်းၼၼ်ႉ တၵ်းလႆႈမီးႁူးၶေႃးသိူဝ်ႈၵႃႈၼႂ်းၶိုင်ႈၵၢင် ၽၢႆႇတၢင်းၼိူဝ်မၼ်းလႄႈ တၵ်းလႆႈဢဝ်တင်းၶူဝ်းဢၼ်တေႃးၼၼ်ႉ ၵူပ်ႉသႂ်ႇၵႃႈတီႈႁိမ်းႁူးၶေႃးသိူဝ်ႈၼၼ်ႉ မိူၼ်ၸိူဝ်ႉၼင်ႇဢၼ်ပဵၼ် ၵႃႈတီႈႁူးၶေႃးသိူဝ်ႈဢၼ်ဢဝ်လဵၵ်းႁဵတ်းၼၼ်ႉ ႁႂ်ႈဢမ်ႇလႆႈသိၵ်ႇလႆႈၶၢတ်ႇဢေႃႈ။
33ၵႃႈတီႈဢၼ်လဵပ်ႈႁွပ်ႈၸွမ်းႁိမ်း ၽၢႆႇတႂ်ႈသိူဝ်ႈယၢဝ်းၼၼ်ႉ မႂ်းတၵ်းလႆႈဢဝ်ၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင် ႁဵတ်းမၢၵ်ႇၸင်ႈသႂ်ႇ ဢိၵ်ႇတင်းႁိင်ႇၶမ်းသႂ်ႇၵႃႈတီႈဝူင်ႈၵၢင်ႁူၺ်ႇၼိုင်ႈလႄႈႁူၺ်ႇၼိုင်ႈဢေႃႈ။- 34မၢၵ်ႇၸင်ႈလုၵ်ႈၼိုင်ႈ၊ ႁိင်ႇၶမ်းလုၵ်ႈၼိုင်ႈ၊ မၢၵ်ႇၸင်ႈလုၵ်ႈၼိုင်ႈ၊ ႁိင်ႇၶမ်းလုၵ်ႈၼိုင်ႈ၊ တၵ်းလႆႈဢဝ်ၶၼ်ႈၵၼ်ၶႅၼ်ႈၵၼ်ၸွမ်းႁိမ်းမၼ်းဢေႃႈ။- 35ဢႃႇရုၼ်ႇတၵ်းလႆႈၼုင်ႈသိူဝ်ႈယၢဝ်းၼၼ်ႉ မိူဝ်ႈဢၼ်မၼ်းပွင်ႁဵတ်းဢမူႉၸဝ်ႈၼၼ်ႉလႄႈ ႁႂ်ႈငိၼ်းသဵင်မၼ်းမိူဝ်ႈဢၼ်မၼ်း ၶဝ်ႈဢွၵ်ႇၵႃႈၼႂ်းထႃႇၼႃႉတီႈမူတ်းၸၢင်ႇ ၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉ ႁႂ်ႈမၼ်းလႆႈၵၢင်းလွတ်ႈတင်းၽေးတၢင်းတၢႆဢေႃႈ။
36ၶိူင်ႈပျႃးၶမ်းလွတ်ႈငၢၼ်ႇၵေႃႈ မႂ်းတၵ်းလႆႈႁဵတ်းလႄႈ ဢဝ်ဢႅၵ်ႉၶရႃႇတူဝ်လိၵ်ႈဢၼ်ဝႃႈ တၢင်းဢၼ်မူတ်းၸၢင်ႇတီႈထႃႇဝရႃႉၽြႃးဢေႃႈ၊ ဝႃႈၼင်ႇၼႆၼၼ်ႉ တၢင်ႇသႂ်ႇဝႆႉၵႃႈၼိူဝ်မၼ်း မိူၼ်ၸိူဝ်ႉၼင်ႇဢၼ် ဢဝ်ဢႅၵ်ႉၶရႃႇတူဝ်လိၵ်ႈတၢင်ႇသႂ်ႇဝႆႉၵႃႈၼိူဝ်တၼ်းသိၵ်ႈၼၼ်ႉလႄႈ၊- 37ဢဝ်ၵူပ်ႉၸပ်းသၢႆ ဢၼ်သွမ်ႇသႂ်ႇဝႆႉၵႃႈတီႈၶဵၼ်းႁူဝ်ဢေႃႈ။ တၵ်းလႆႈမီးၵႃႈတီႈၽၢႆႇၼႃႈၶဵၼ်းႁူဝ်ၼၼ်ႉဢေႃႈ။- 38ဢႃႇရုၼ်ႇတၵ်းလႆႈဢဝ်ၶိူင်ႈပျႃးၶမ်းၼၼ်ႉ တိုဝ်းသႂ်ႇၵႃႈတီႈၼႃႈၽၢၵ်ႇမၼ်းလႄႈ ပႃးဢဝ်ဢပႅတ်ႈဢၼ်ၸၢပ်ႈသႅင်ႇၵၼ်တင်း တႃႇၼႃႉတၢင်းလူႇဢၼ်မူတ်းၸၢင်ႇ ဢၼ်ၵူၼ်းမဵဝ်းဢီႉသရေႇလႃႉတင်းလၢႆတၵ်းႁႂ်ႈမူတ်းၸၢင်ႇ ၼႂ်းၶိူင်ႈပိူင်ဢၼ်မူတ်းၸၢင်ႇ ဢၼ်ၶဝ်တၵ်းပၼ်ၼၼ်ႉယူႇဢေႃႈ။ မၼ်းတၵ်းလႆႈတိုဝ်းသႂ်ႇဝႆႉၵႃႈတီႈၼႃႈၽၢၵ်ႇမၼ်းယူႇသေႇသေႇ ႁႂ်ႈၶဝ်လႆႈထူပ်းတၢင်းဢၼ်ထုၵ်ႇၸႂ်ၵျိူၵ်ႈၸႂ် ထႃႇဝရႃႉၽြႃးဢေႃႈ။
39သိူဝ်ႈပုတ်းပိၵ်ႈၶျေႃးၵေႃႈ မႂ်းတၵ်းလႆႈတေႃးႁဵတ်းဢေႃႈ။ ၶဵၼ်းႁူဝ်ၵေႃႈ မႂ်းတၵ်းလႆႈဢဝ်ပိၵ်ႈၶျေႃးႁဵတ်းဢေႃႈ။ သၢႆႁတ်ႉဢႅဝ်ၵေႃႈ မႂ်းတၵ်းလႆႈဢဝ်တင်း တၢင်းႁဵတ်းဢၼ်ႁၢင်ႈၶိူင်ႈမၼ်းၼၼ်ႉ ႁဵတ်းဢေႃႈ။
40မႂ်းတၵ်းလႆႈႁဵတ်းသိူဝ်ႈယၢဝ်း၊ သၢႆႁတ်ႉဢႅဝ်တင်းမွၵ်ႇႁူဝ်ပၼ်တီႈလုၵ်ႈၸၢႆးဢႃႇရုၼ်ႇၸိူဝ်းၼၼ်ႉ ပုၼ်ႈဢၼ်တၵ်းပဵၼ်မုၼ်ပဵၼ်သရေႇဢေႃႈ။- 41ၼင်ႇၼၼ်လႄႈ မႂ်းတၵ်းလႆႈဢဝ်ၼုင်ႈပၼ်တီႈပီႈၸၢႆးမႂ်းဢႃႇရုၼ်ႇ ဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉသေယဝ်ႉ၊ ဢဝ်တင်းၼမ်ႉမၼ်းတႃးၶဝ်သေလႄႈ ၶၢၼ်းၶဝ်ဝႆႉၼႂ်းဢရႃႇလႄႈ ႁႂ်ႈမူတ်းၸၢင်ႇႁႂ်ႈၶဝ်လႆႈပွင်ႁဵတ်းဢမူႉယိတ်ႈပရေႃးႁဵၵ်ႈ ၵႃႈတီႈၽၢႆႇၼႃႈၵဝ်ဢေႃႈ။- 42မႂ်းတၵ်းလႆႈယဵပ်ႉၵူၼ်ပိၵ်ႈၶျေႃးပၼ်တီႈၶဝ် ႁႂ်ႈလႆႈႁူမ်ႇသုမ်ႇလွင်ႈတၢင်းဢၼ် လီဢူၵ်းလီဢၢႆတီႈၶဝ်ဢေႃႈ။ ၵူၼ်ၸိူဝ်းၼၼ်ႉ တၵ်းလႆႈယၢဝ်းၸႃႉၸဵမ်ၵႃႈတီႈဢႅဝ်တေႃႇထိုင်ႁွတ်ႈၵႃႈတီႈၶႃဢေႃႈ။- 43ဢႃႇရုၼ်ႇဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉ မိူဝ်ႈဢၼ်ၶဝ်ၶဝ်ႈၵႃႈၼႂ်းမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈ ဢိၵ်ႇတင်း မိူဝ်ႈဢၼ်ၶဝ်သုတ်ႉၸပ်းသုတ်ႉၸူးၵႃႈတီႈႁိမ်း ယိတ်ႈပလၢင်ႇႁႂ်ႈလႆႈပွင်ႁဵတ်းဢမူႉၸဝ်ႈ ၵႃႈၼႂ်းထႃႇၼႃႉတီႈမူတ်းၸၢင်ႇၼၼ်ႉၸိုင်၊ တၵ်းလႆႈၼုင်ႈၸိူဝ်ႉၼင်ႇၼၼ် ႁႂ်ႈၶဝ်ဢမ်ႇလႆႈႁွတ်ႈထိုင်ဢပႅတ်ႈလႄႈတၢႆဢေႃႈ။ ပဵၼ်ထုင်းၽိင်ႈၸဝ်ႈဢၼ်ၸႃႉၸဵမ်မၼ်း ဢိၵ်ႇတင်းၸိူဝ်ႉၶိူဝ်းမၼ်း သိုပ်ႇသိုပ်ႇတၢမ်းတၢမ်းတၵ်းလႆႈပႂ်ႉလႆႈၸွမ်းယူႇသေႇသေႇဢေႃႈ။
Currently Selected:
ဢွၵ်ႇၵႂႃႇ 28: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
