ဢွၵ်ႇၵႂႃႇ 29
29
ပၼ်ၽိၵ်ႈသိၵ်ႈတီႈယိတ်ႈပရေႃးႁဵၵ်ႈတင်းလၢႆ
(တူၺ်း၊ ႁဵတ်း 8:1-36)
1လွင်ႈတၢင်းဢၼ်မႂ်းတၵ်းလႆႈႁဵတ်းၸိူဝ်ႉၼင်ႇႁိုဝ်တီႈၶဝ်ၼၼ်ႉ ႁႂ်ႈၶဝ်မူတ်းၸၢင်ႇ ႁႂ်ႈၶဝ်လႆႈပွင်ႁဵတ်းဢမူႉ ယိတ်ႈပရေႃးႁဵၵ်ႈ ၵႃႈတီႈၽၢႆႇၼႃႈၵဝ်ၸမ်ႉ၊ တၵ်းလႆႈဢဝ်ဝူဝ်းပေႃႈဢွၼ်ႇ တင်းသူဝ်းပေႃႈသွင်တူဝ်ဢၼ်ဢမ်ႇပႃးဢပႅတ်ႈ၊- 2ဢိၵ်ႇတင်းၶဝ်ႈမုၼ်းၵျုင်ႇ ဢၼ်ဢမ်ႇပႃးၸိူဝ်ႉပႅင်ႈ၊ ၶဝ်ႈမုၼ်းၵျုင်ႇဢၼ်ၶႅပ်းဢၼ်ဢမ်ႇပႃးၸိူဝ်ႉပႅင်ႈလႄႈ ဢဝ်ၼမ်ႉမၼ်းသႂ်ႇလေႃး၊ ၶဝ်ႈမုၼ်းၵျုင်ႇဢၼ်ၶွပ်ႈ ဢၼ်ဢမ်ႇပႃးၸိူဝ်ႉပႅင်ႈလႄႈ တႃးၼမ်ႉမၼ်းၸိူဝ်းၼၼ်ႉလႄႈ၊- 3ဢဝ်သႂ်ႇၵႃႈၼႂ်းၶွင်ႈႁူၺ်ႇၼိုင်ႈသေယဝ်ႉ၊ ပႃးဢဝ်ၶွင်ႈၼၼ်ႉမႃး ဢိၵ်ႇလူၺ်ႈၵၼ်တင်းဝူဝ်းပေႃႈဢွၼ်ႇ တင်းသူဝ်းပေႃႈ သွင်တူဝ်ၼၼ်ႉဢေႃႈ။- 4မႂ်းတၵ်းလႆႈႁွင်ႉဢဝ်ဢႃႇရုၼ်ႇဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉ မႃးၵႃႈတီႈၽၵ်းတူမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၼၼ်ႉလႄႈ ဢဝ်ၶဝ်ဢၢပ်ႇၼမ်ႉသေဢေႃႈ။- 5မႂ်းတၵ်းလႆႈဢဝ်ၶူဝ်းၼုင်ႈတင်းမႆလႄႈ ဢဝ်သိူဝ်ႈပုတ်း၊ သိူဝ်ႈယၢဝ်းဢၼ်ၸၢပ်ႈသႅင်ႇၵၼ်တင်းသိူဝ်ႈသုပ်း၊ သိူဝ်ႈသုပ်းတင်းၶိူင်ႈဝႆၼႃႈဢူၵ်းၼုင်ႈမႆပၼ်ဢႃႇရုၼ်ႇလႄႈ၊ ဢဝ်သၢႆႁတ်ႉဢႅဝ်ဢၼ်ႁၢင်ႈၶိူင်ႈ ဢၼ်ၸၢပ်ႈသႅင်ႇၵၼ်တင်းသိူဝ်ႈသုပ်းၼၼ်ႉ ႁတ်ႉပၼ်ဢေႃႈ။- 6မႂ်းတၵ်းလႆႈဢဝ်ၶဵၼ်းႁူဝ်ၶဵၼ်းသႂ်ႇၵႃႈတီႈႁူဝ်မၼ်းလႄႈ၊ သမ်ႉဢဝ်ၶိူင်ႈပျႃးၶမ်း ဢၼ်မူတ်းၸၢင်ႇၼၼ်ႉသႂ်ႇဝႆႉ ၵႃႈတီႈၶဵၼ်းႁူဝ်ၼၼ်ႉဢေႃႈ။- 7ၵမ်းၼၼ်ႉ မႂ်းတၵ်းလႆႈဢဝ်ၼမ်ႉမၼ်း ပုၼ်ႈဢၼ်တၵ်းတႃးၼၼ်ႉ ထွၵ်ႇသႂ်ႇၵႃႈၼိူဝ်ႁူဝ်မၼ်းလႄႈ တႃးမၼ်းဢေႃႈ။- 8လုၵ်ႈၸၢႆးမၼ်းၸိူဝ်းၼၼ်ႉၵေႃႈ မႂ်းတၵ်းလႆႈႁွင်ႉမႃးလႄႈ ဢဝ်သိူဝ်ႈၼုင်ႈပၼ်ဢေႃႈ။- 9မႂ်းတၵ်းလႆႈဢဝ်သၢႆႁတ်ႉဢႅဝ်ႁတ်ႉပၼ်ဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉလႄႈ ဢဝ်မွၵ်ႇႁူဝ်တိုဝ်းပၼ်သေယဝ်ႉ၊ ၶဝ်ၼၼ်ႉ တၵ်းလႆႈၸၢပ်ႈသႅင်ႇၵၼ်တင်းဢရႃႇယိတ်ႈပရေႃးႁဵၵ်ႈ ၸွမ်းၵႃႈၼင်ႇထုင်းၽိင်ႈထႃႇဝရႃႉၸဝ်ႈဢေႃႈ။ ၼင်ႇၼၼ်လႄႈ မႂ်းတၵ်းလႆႈဢဝ်ဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉ ၶၢၼ်းဝႆႉၼႂ်းဢရႃႇယိတ်ႈပရေႃးႁဵၵ်ႈဢေႃႈ။
10လိုၼ်းၼၼ်ႉ မႂ်းတၵ်းလႆႈဢဝ်ဝူဝ်းပေႃႈတူဝ်ၼိုင်ႈၼၼ်ႉ မႃးၵႃႈတီႈၽၢႆႇၼႃႈမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈလႄႈ ဢႃႇရုၼ်ႇ ဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉ တၵ်းလႆႈဢွၼ်ၵၼ် ဢဝ်မိုဝ်းတူဝ်ၸဝ်ႈၵဝ်ႇ တၢင်ႇသႂ်ႇၵႃႈၼိူဝ်ႁူဝ်ဝူဝ်းပေႃႈၼၼ်ႉဢေႃႈ။- 11ဝူဝ်းပေႃႈၼၼ်ႉၸိုင် မႂ်းတၵ်းလႆႈဢဝ်တၢႆၵႃႈတီႈၽၢႆႇၼႃႈထႃႇဝရႃႉၽြႃး ၵႃႈတီႈႁိမ်းၽၵ်းတူမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈဢေႃႈ။- 12မႂ်းတၵ်းလႆႈဢဝ်တင်းၼိဝ်ႉမိုဝ်းမႂ်း ဢဝ်လိူတ်ႈဝူဝ်းပေႃႈၼၼ်ႉၵမ်ႈၽွင်ႈ၊ သႂ်ႇၵႃႈၼိူဝ်ၶဝ်လႅမ်ယိတ်ႈပလၢင်ႇၸိူဝ်းၼၼ်ႉသေယဝ်ႉ၊ ဢဝ်လိူတ်ႈဢၼ်ၵိုတ်းဢၼ်ၵျၢၼ်ႇၼၼ်ႉ ထွၵ်ႇပႅတ်ႈၵႃႈတီႈႁိမ်းတိၼ်ယိတ်ႈပလၢင်ႇဢေႃႈ။- 13မႂ်းတၵ်းလႆႈဢဝ်ၵွၼ်ႈၶႆၵွၼ်ႈမၼ်း ဢၼ်ႁူမ်ႇသႆႈမၼ်း ၵႃႈမီးတင်းသဵင်ႈတင်းလူင်၊ ၽၢင်ႉၽၢပ်ႇဢၼ်မီးၵႃႈၼိူဝ်တပ်းမၼ်း၊ မၢၵ်ႇလၼ်းသွင်လုၵ်ႈ တင်းၵွၼ်ႈၶႆၵွၼ်ႈမၼ်းဢၼ်ႁူမ်ႇမၢၵ်ႇလၼ်းၼၼ်ႉ တုတ်ႇၽႆးၵႃႈၼိူဝ်ယိတ်ႈပလၢင်ႇဢေႃႈ။- 14ၼိူဝ်ႉဝူဝ်း၊ ၼင်မၼ်းတင်းၶီႈၼုမ်ႇမၼ်းၸမ်ႉ၊ မႂ်းတၵ်းလႆႈဢဝ်တုတ်ႇၽႆး ၵႃႈတီႈၽၢႆႇတၢင်းၼွၵ်ႈတပ်ႉဢေႃႈ။ ပဵၼ်ယိတ်ႈပုၼ်ႈဢၼ် တၵ်းၽေႇဢပႅတ်ႈဢေႃႈ။
15မႂ်းသမ်ႉတၵ်းလႆႈဢဝ်သူဝ်းပေႃႈၼၼ်ႉတူဝ်ၼိုင်ႈလႄႈ၊ ဢႃႇရုၼ်ႇဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉ တၵ်းလႆႈဢွၼ်ၵၼ်ဢဝ်မိုဝ်းတူဝ်ၸဝ်ႈၵဝ်ႇ တၢင်ႇၵႃႈၼိူဝ်ႁူဝ်သူဝ်းပေႃႈၼၼ်ႉဢေႃႈ။- 16မႂ်းဢဝ်သူဝ်းပေႃႈၼၼ်ႉတၢႆသေယဝ်ႉ၊ တၵ်းလႆႈဢဝ်လိူတ်ႈမၼ်း ၽႅတ်းၸွမ်းႁိမ်းၵႃႈၼိူဝ်ယိတ်ႈပလၢင်ႇၼၼ်ႉဢေႃႈ။- 17မႂ်းတၵ်းလႆႈတႅပ်းသူဝ်းပေႃႈၼၼ်ႉ ႁဵတ်းပဵၼ်ပွတ်းပဵၼ်ပိတ်းသေလႄႈ ဢဝ်ၶူင်းၼႂ်းမၼ်း ဢိၵ်ႇတင်းတိၼ်မၼ်း သုၵ်ႈၼမ်ႉသေယဝ်ႉ၊ တၵ်းလႆႈဢဝ်ၸူႉၵၼ်ၵွင်ၵၼ်ဝႆႉၵႃႈၼိူဝ် ၵွၼ်ႈၼိူဝ်ႉမၼ်းဢိၵ်ႇတင်းႁူဝ်မၼ်းၼၼ်ႉလႄႈ၊- 18ဢဝ်သူဝ်းပေႃႈၼၼ်ႉ တုတ်ႇၽႆးၵႃႈၼိူဝ်ယိတ်ႈပလၢင်ႇတင်းတူဝ်ဢေႃႈ။ ပဵၼ်ယိတ်ႈဢၼ်တုတ်ႇၽႆး တီႈထႃႇဝရႃႉၽြႃးဢေႃႈ။ ပဵၼ်ဢၢႆဢၼ်ႁွမ်ဢၼ်ႁူၺ်း၊ တင်းပုၵ်ႈၸေႃႇဢၼ်ဢဝ်တင်းၽႆး သၢၵ်ႈၵၢပ်ႈတီႈထႃႇဝရႃႉၽြႃးဢေႃႈ။
19မႂ်းတၵ်းလႆႈဢဝ်သူဝ်းပေႃႈတူဝ်တူႉတီႉယႃႉၼၼ်ႉလႄႈ ဢႃႇရုၼ်ႇဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉ တၵ်းလႆႈဢွၼ်ၵၼ်ဢဝ်မိုဝ်းတူဝ်ၸဝ်ႈၵဝ်ႇတၢင်ႇၵႃႈၼိူဝ်ႁူဝ်သူဝ်းပေႃႈၼၼ်ႉဢေႃႈ။- 20မႂ်းတၵ်းလႆႈဢဝ်သူဝ်းပေႃႈၼၼ်ႉတၢႆလႄႈ ဢဝ်လိူတ်ႈမၼ်းလႄႈ သႂ်ႇၵႃႈတီႈမႂ်ႁူၽၢႆႇၶႂႃဢႃႇရုၼ်ႇ၊ ၵႃႈတီႈမႂ်ႁူၽၢႆႇၶႂႃလုၵ်ႈၸၢႆးမၼ်းၸိူဝ်းၼၼ်ႉ၊ ၵႃႈတီႈမႄႈမိုဝ်းၽၢႆႇၶႂႃၶဝ်၊ ၵႃႈတီႈမႄႈတိၼ်ၽၢႆႇၶႂႃၶဝ်ၼၼ်ႉသေယဝ်ႉ၊ ဢဝ်လိူတ်ႈၽႅတ်းၸွမ်းႁိမ်းၵႃႈၼိူဝ်ယိတ်ႈပလၢင်ႇဢေႃႈ။- 21မႂ်းတၵ်းလႆႈဢဝ်လိူတ်ႈဢၼ်မီးၵႃႈၼိူဝ်ယိတ်ႈပလၢင်ႇ တင်းၼမ်ႉမၼ်း ပုၼ်ႈဢၼ်တၵ်းတႃးၼၼ်ႉ ၽႅတ်းသႂ်ႇၵႃႈၼိူဝ်ဢႃႇရုၼ်ႇ တင်းၶူဝ်းၼုင်ႈမၼ်း ဢိၵ်ႇတင်းၵႃႈၼိူဝ်လုၵ်ႈၸၢႆးမၼ်းတင်းၶူဝ်းၼုင်ႈၶဝ်ၼၼ်ႉလႄႈ မၼ်းၼၼ်ႉတင်းၶူဝ်းၼုင်ႈမၼ်း ဢိၵ်ႇတင်းလုၵ်ႈၸၢႆးမၼ်း တင်းၶူဝ်းၼုင်ႈၶဝ်ၸိူဝ်းၼၼ်ႉ တၵ်းလႆႈမူတ်းၸၢင်ႇဢေႃႈ။- 22ပိူဝ်ႈဢၼ်သူဝ်းပေႃႈၼၼ်ႉပဵၼ်သူဝ်းပုၼ်ႈဢၼ်တၵ်းၶၢၼ်းဝႆႉၼႂ်းဢရႃႇလႄႈ၊ မႂ်းတၵ်းလႆႈဢဝ်ၵွၼ်ႈၶႆၵွၼ်ႈမၼ်းသူဝ်းပေႃႈၼၼ်ႉ ဢိၵ်ႇတင်းႁၢင်မၼ်း၊ ၵွၼ်ႈၶႆၵွၼ်ႈမၼ်းဢၼ်ႁူမ်ႇသႆႈမၼ်း၊ ၽၢင်ႉၽၢပ်ႇဢၼ်မီးၵႃႈၼိူဝ်တပ်းမၼ်း၊ မၢၵ်ႇလၼ်းသွင်လုၵ်ႈ တင်းၵွၼ်ႈၶႆၵွၼ်ႈမၼ်းဢၼ်ႁူမ်ႇမၢၵ်ႇလၼ်းၼၼ်ႉ၊ ႁူဝ်မႃႇမၼ်းၽၢႆႇၶႂႃ၊- 23ၶဝ်ႈမုၼ်းႁူၺ်ႇၼိုင်ႈ၊ ၶဝ်ႈမုၼ်းဢၼ်ၶႅပ်းဢၼ်ဢဝ်ၼမ်ႉမၼ်းသႂ်ႇလေႃးၶႅပ်းၼိုင်ႈ၊ ၶဝ်ႈမုၼ်းဢၼ်ၶွပ်ႈၶႅပ်းၼိုင်ႈ ဢၼ်ဢဝ်ဢွၵ်ႇၵႃႈၼႂ်းၶွင်ႈ ဢၼ်မီးၶဝ်ႈမုၼ်း ဢၼ်ဢမ်ႇပႃးၸိူဝ်ႉပႅင်ႈ ဢၼ်ဝႆႉၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉလႄႈ၊- 24ဢဝ်တင်းသဵင်ႈတင်းလူင် သႂ်ႇပၼ်ၵႃႈတီႈၼႂ်းမိုဝ်းဢႃႇရုၼ်ႇတင်းမိုဝ်းလုၵ်ႈၸၢႆးမၼ်းၸိူဝ်းၼၼ်ႉသေယဝ်ႉ၊ ဢဝ်ယွင်ႈၵႂႆ ၵႃႈတီႈၽၢႆႇၼႃႈထႃႇဝရႃႉၽြႃးလႄႈ ႁဵတ်းတင်းပုၵ်ႈၸေႃႇဢၼ်ယွင်ႈၵႂႆဢေႃႈ။- 25မႂ်းတၵ်းလႆႈႁပ်ႉၶၢမ်ႇဢဝ်ၸိူဝ်းၼၼ်ႉ ၵႃႈၼႂ်းမိုဝ်းၶဝ်ၼၼ်ႉလႄႈ ဢဝ်တုတ်ႇၽႆးၵႃႈၼိူဝ်ယိတ်ႈပလၢင်ႇ ၵႃႈၼိူဝ်ယိတ်ႈဢၼ်တုတ်ႇၽႆး ပုၼ်ႈဢၼ်တၵ်းပဵၼ်ဢၢႆဢၼ်ႁွမ်ဢၼ်ႁူၺ်း ၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉဢေႃႈ။ ပဵၼ်တၢင်းပုၵ်ႈၸေႃႇ ဢၼ်ဢဝ်တင်းၽႆးသၢၵ်ႈၵၢပ်ႈတီႈထႃႇဝရႃႉၽြႃးဢေႃႈ။- 26မႂ်းတၵ်းလႆႈဢဝ်ႁူဝ်ဢူၵ်းသူဝ်းပေႃႈ ဢၼ်ပဵၼ်လွင်ႈတၢင်းဢၼ်ၶၢၼ်းဢႃႇရုၼ်ႇ ဝႆႉၼႂ်းဢရႃႇၼၼ်ႉ ယွင်ႈၵႂႆၵႃႈတီႈၽၢႆႇၼႃႈထႃႇဝရႃႉၽြႃးလႄႈ ႁဵတ်းတင်းပုၵ်ႈၸေႃႇဢၼ်ယွင်ႈၵႂႆသေယဝ်ႉ၊ ႁူဝ်ဢူၵ်းၼၼ်ႉတၵ်းလႆႈပဵၼ်ပုၼ်ႈမႂ်းဢေႃႈ။- 27ၵႃႈၼႂ်းသူဝ်းပေႃႈဢၼ်ၶၢၼ်းဝႆႉၼႂ်းဢရႃႇဢၼ်ဝႃႈ လွင်ႈတၢင်းဢၼ်ၸၢပ်ႈသႅင်ႇၵၼ်တင်းဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉ၊ မႂ်းတၵ်းလႆႈဢဝ်ႁူဝ်ဢူၵ်းဢၼ်ယွင်ႈၵႂႆလႄႈ ႁဵတ်းတၢင်းပုၵ်ႈၸေႃႇဢၼ်ယွင်ႈၵႂႆၼၼ်ႉဢိၵ်ႇတင်းႁူဝ်မႃႇ ဢၼ်ယုၵ်ႉယွင်ႈလႄႈ ႁဵတ်းတၢင်းပုၵ်ႈၸေႃႇဢၼ်ယုၵ်ႉယွင်ႈၼၼ်ႉ မူတ်းၸၢင်ႇသေယဝ်ႉ၊- 28ပိူဝ်ႈဢၼ်ပဵၼ်တၢင်းပုၵ်ႈၸေႃႇဢၼ်ယုၵ်ႉယွင်ႈလႄႈ၊ ႁူဝ်ဢူၵ်းတင်းႁူဝ်မႃႇၼၼ်ႉတၵ်းလႆႈပဵၼ်ပုၼ်ႈဢႃႇရုၼ်ႇ ဢိၵ်ႇတင်းပုၼ်ႈလုၵ်ႈၸၢႆးမၼ်းတင်းလၢႆ ဢၼ်ၸွမ်းၼင်ႇထုင်းၽိင်ႈထႃႇဝရႃႉဢၼ်ၵူၼ်းမဵဝ်းဢီႉသရေႇလႃႉၶဝ် ထိူၵ်ႈႁဵတ်းၼၼ်ႉဢေႃႈ။ တၵ်းလႆႈပဵၼ်တၢင်းပုၵ်ႈၸေႃႇဢၼ်ယုၵ်ႉယွင်ႈဢၼ်ၵူၼ်းမဵဝ်းဢီႉသရေႇလႃႉၶဝ် ဢဝ်ၵႃႈၼႂ်းယိတ်ႈမိၵ်ႉသႃႇႁႃယႃႉၶဝ်တင်းလၢႆၼၼ်ႉႁဵတ်း ဢၼ်ဝႃႈတၢင်းဢၼ်ၶဝ်ယုၵ်ႉယွင်ႈၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။
29ၶူဝ်းၼုင်ႈတၢင်းမႆဢႃႇရုၼ်ႇ ဢၼ်မူတ်းၸၢင်ႇၼၼ်ႉၸိုင်၊ ဝၢႆးလင်မၼ်းၼၼ်ႉ တၵ်းလႆႈမီးတီႈလုၵ်ႈၸၢႆးမၼ်းတင်းလၢႆလႄႈ၊ ပဵၼ်ပုၼ်ႈဢၼ်ၶဝ်တၵ်းၼုင်ႈ ၼႂ်းမိူဝ်ႈဢၼ်ၶဝ်ၶၢမ်ႇမင်ႇၵလႃႇ တၢင်းဢၼ်ဢဝ်ၼမ်ႉမၼ်းတႃး ဢိၵ်ႇတင်းဢၼ်ၶၢမ်ႇတၢင်းဢၼ်ၶၢၼ်းဝႆႉၼႂ်းဢရႃႇၼၼ်ႉဢေႃႈ။- 30လုၵ်ႈၸၢႆးမၼ်းၵေႃႉဢၼ်ႁဵတ်းယိတ်ႈပရေႃးႁဵၵ်ႈတၢင်တူဝ်မၼ်းၼၼ်ႉ တၵ်းလႆႈၼုင်ႈမႆ ၼႂ်းမိူဝ်ႈဢၼ်မၼ်းၶဝ်ႈၵႃႈၼႂ်းမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈႁႂ်ႈလႆႈပွင်ႁဵတ်းဢမူႉၸဝ်ႈ ၵႃႈတီႈထႃႇၼႃႉတီႈမူတ်းၸၢင်ႇၼၼ်ႉၸဵတ်းဝၼ်းတဵမ်တဵမ်ဢေႃႈ။- 31မႂ်းတၵ်းလႆႈဢဝ်သူဝ်းပေႃႈဢၼ်ၶၢၼ်းဝႆႉ ၼႂ်းဢရႃႇၼၼ်ႉတူမ်ႈ ၵႃႈတီႈထႃႇၼႃႉတီႈမူတ်းၸၢင်ႇလႄႈ၊- 32ဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉ တၵ်းလႆႈဢွၼ်ၵၼ်ၵိၼ်ၼိူဝ်ႉသူဝ်းပေႃႈၼၼ်ႉဢိၵ်ႇတင်း ၶဝ်ႈမုၼ်းဢၼ်မီးၵႃႈၼႂ်းၶွင်ႈၼၼ်ႉၵႃႈတီႈႁိမ်းၽၵ်းတူမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၼၼ်ႉဢေႃႈ။- 33ၶဝ်တၵ်းလႆႈၵိၼ်ၶိူင်ႈပိူင်ဢၼ် ၸၢပ်ႈသႅင်ႇၵၼ်တၢင်းဢၼ်ႁဵတ်းမင်ႇၵလႃႇ တၢင်းဢၼ်ၽေႇဢပႅတ်ႈၸိူဝ်းၼၼ်ႉ ႁႂ်ႈလႆႈၶၢၼ်းၶဝ်ၼၼ်ႉဝႆႉၼႂ်းဢရႃႇလႄႈ ႁႂ်ႈၶဝ်မူတ်းၸၢင်ႇဢေႃႈ။ ၶိူင်ႈပိူင်ၸိူဝ်းၼၼ်ႉၸိုင် ပိူဝ်ႈဢၼ်မူတ်းၸၢင်ႇလႄႈ ၵေႃႉဢၼ်ဢမ်ႇၸၢပ်ႈသႅင်ႇၼၼ်ႉ ဢမ်ႇလႆႈၵိၼ်၊- 34ပေႃးၼိူဝ်ႉဢၼ်ၸၢပ်ႈသႅင်ႇၵၼ်တင်း လွင်ႈတၢင်းဢၼ်ၶၢၼ်းဝႆႉၼႂ်းဢရႃႇၼၼ်ႉ၊ ဢမ်ႇၼၼ်ၵေႃႈ ၶဝ်ႈမုၼ်းၼၼ်ႉ ၵိုတ်းၵျၢၼ်ႇဝႆႉ တေႃႇထိုင်ႁွတ်ႈၶိင်ႇၵၢင်ၼႂ်သေဢိတ်းၸိုင်၊ မႂ်းတၵ်းလႆႈဢဝ်ဢၼ်ၵိုတ်းဢၼ်ၵျၢၼ်ႇဝႆႉၼၼ်ႉ တုတ်ႇၽႆးပႅတ်ႈသေဢေႃႈ။ ပိူဝ်ႈဢၼ်မူတ်းၸၢင်ႇလႄႈ ၽူႈလႂ်ဢမ်ႇလႆႈၵိၼ်။- 35ၼင်ႇၼၼ်လႄႈ မႂ်းတၵ်းလႆႈႁဵတ်းတီႈဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉ ၸွမ်းၵႃႈၼင်ႇဢၼ် ၵဝ်ပိင်းၺၢပ်ႈဝႆႉၼၼ်ႉလႄႈ၊ ႁဵတ်းမင်ႇၵလႃႇတၢင်းဢၼ်ၶၢၼ်းဝႆႉၼႂ်းဢရႃႇ ယိတ်ႈပရေႃးႁဵၵ်ႈၼၼ်ႉ ၸဵတ်းဝၼ်းတဵမ်တဵမ်ဢေႃႈ။- 36မႂ်းတၵ်းလႆႈပုၵ်ႈၸေႃႇဝူဝ်းပေႃႈ ပုၼ်ႈဢၼ်တၵ်းၽေႇဢပႅတ်ႈၼၼ်ႉတူဝ်ၼိုင်ႈၵူႈဝၼ်းလႄႈ ႁဵတ်းယိတ်ႈလွင်ႈတၢင်းဢၼ် ၽေႇဢပႅတ်ႈဢေႃႈ။ ၼင်ႇၼၼ်လႄႈ မႂ်းတၵ်းလႆႈႁႂ်ႈယိတ်ႈပလၢင်ႇမူတ်းသႂ်မိူဝ်ႈဢၼ်ႁဵတ်း တၢင်းဢၼ်ၽေႇဢပႅတ်ႈပုၼ်ႈမၼ်းၼၼ်ႉဢေႃႈ။ လိုၼ်းၼၼ်ႉ မႂ်းတၵ်းလႆႈဢဝ်ၼမ်ႉမၼ်းတႃး ႁႂ်ႈမၼ်းမူတ်းၸၢင်ႇဢေႃႈ။- 37ႁဵတ်းတၢင်းဢၼ်ၽေႇဢပႅတ်ႈယိတ်ႈပလၢင်ႇ ၸဵတ်းဝၼ်းတဵမ်တဵမ်လႄႈ ႁႂ်ႈမူတ်းၸၢင်ႇသေယဝ်ႉ၊ တၵ်းလႆႈပဵၼ်ယိတ်ႈပလၢင်ႇ ဢၼ်မူတ်းၸၢင်ႇၼႃႇလူင်လၢင်လႄႈ၊ ၶိူင်ႈပိူင်ၵႃႈဢၼ်တၵ်းတိူဝ်ႉထုၵ်ႇယိတ်ႈပလၢင်ႇၼၼ်ႉၵေႃႈ တၵ်းလႆႈပဵၼ်ဢၼ်မူတ်းၸၢင်ႇဢေႃႈ။
လွင်ႈတၢင်းဢၼ်သၢၵ်ႈလူႇၵူႈဝၼ်း
(တူၺ်း၊ ထိူၼ်ႇ 28:1-8)
38ၶိူင်ႈပိူင် ဢၼ်တၵ်းလႆႈပုၵ်ႈၸေႃႇၵႃႈၼိူဝ်ယိတ်ႈပလၢင်ႇၸမ်ႉ၊ တၵ်းလႆႈဢဝ်သူဝ်းဢွၼ်ႇဢၼ်ဢမ်ႇပႆႇၶွပ်ႈၶူပ်ႇသွင်တူဝ် ပုၵ်ႈၸေႃႇၵူႈဝၼ်းဢမ်ႇထၢတ်ႇလႄႈ၊- 39ပုၵ်ႈၸေႃႇႁူဝ်ၼႂ်တူဝ်ၼိုင်ႈႁူဝ်ၶမ်ႈတူဝ်ၼိုင်ႈဢေႃႈ။- 40မိူဝ်ႈဢၼ်ပုၵ်ႈၸေႃႇသူဝ်းဢွၼ်ႇတူဝ်ၼိုင်ႈၼၼ်ႉၸိုင်၊ မႂ်းတၵ်းလႆႈဢဝ်ၽွင်ၶဝ်ႈမုၼ်းၼႂ်းဢေးၽႃႇၼိုင်ႈ သိပ်းပုၼ်ႈဢဝ်ပုၼ်ႈၼိုင်ႈ ဢၼ်ဢဝ်ၼမ်ႉမၼ်း ဢၼ်ဢဝ်မၢၵ်ႇသၢၼ်ႇလုၼ်ႇတမ်ၼၼ်ႉၼႂ်းႁီႉၼႃႉ ၼိုင်ႈ သီႇပုၼ်ႈဢဝ်ပုၼ်ႈၼိုင်ႈ သႂ်ႇလေႃးၼၼ်ႉ ဢိၵ်ႇတင်းၼမ်ႉၸပိတ်ႈ ၼႂ်းႁီႉၼႃႉၼိုင်ႈ သီႇပုၼ်ႈဢဝ်ပုၼ်ႈၼိုင်ႈ ပုၼ်ႈတၢင်းပုၵ်ႈၸေႃႇဢၼ်သွၼ်းလေႃႇၸိူဝ်းၼၼ်ႉ ပုၵ်ႈၸေႃႇလူၺ်ႈဢေႃႈ။- 41သူဝ်းဢွၼ်ႇတူဝ်တူႉတီႉယႃႉၼၼ်ႉၸိုင် မႂ်းတၵ်းလႆႈပုၵ်ႈၸေႃႇ ၶိင်ႇႁူဝ်ၶမ်ႈလႄႈ ႁဵတ်းၸွမ်းတၢင်းပုၵ်ႈၸေႃႇၽေႃးၸဵၼ်ႇဢိၵ်ႇတင်း တၢင်းပုၵ်ႈၸေႃႇ ဢၼ်သွၼ်းလေႃႇၶိင်ႇႁူဝ်ၼႂ်ၼၼ်ႉ ႁႂ်ႈပဵၼ်ဢၢႆဢၼ်ႁွမ်ဢၼ်ႁူၺ်း၊ တင်းပုၵ်ႈၸေႃႇဢၼ်ဢဝ်တင်းၽႆး သၢၵ်ႈၵၢပ်ႈတီႈထႃႇဝရႃႉၽြႃးဢေႃႈ။- 42ၼင်ႇၼၼ်လႄႈ ယိတ်ႈဢၼ်တုတ်ႇၽႆး ဢၼ်ၸူဝ်ႈလုၵ်ႈပၼ်လၢၼ်သူတႃႇသေႇဢမ်ႇထၢတ်ႇၼၼ်ႉ တၵ်းလႆႈပုၵ်ႈၸေႃႇၵႃႈတီႈႁိမ်းၽၵ်းတူမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၵႃႈတီႈၽၢႆႇၼႃႈထႃႇဝရႃႉၽြႃး တီႈဢၼ်ၵဝ်တၵ်းထူပ်းၵၼ်တင်းမႂ်းလႄႈ လၢတ်ႈတေႃႇမႂ်းၼၼ်ႉဢေႃႈ။- 43ၵႃႈတီႈၼၼ်ႈ ၵဝ်တၵ်းထူပ်းၵၼ်တင်းၵူၼ်းမဵဝ်းဢီႉသရေႇလႃႉတင်းလၢႆလႄႈ ႁႂ်ႈမူဝ်းၵႃႇၸဝ်ႈမူတ်းၸၢင်ႇ ၵွပ်ႈပိူဝ်ႈမုၼ်ၽုင်းၵဝ်ဢေႃႈ။- 44ၵဝ်တၵ်းႁႂ်ႈမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈ ဢိၵ်ႇတင်းယိတ်ႈပလၢင်ႇ မူတ်းၸၢင်ႇဢေႃႈ။ ဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉၵေႃႈ ၵဝ်တၵ်းႁႂ်ႈမူတ်းၸၢင်ႇ ႁႂ်ႈၶဝ်လႆႈႁဵတ်းဢမူႉယိတ်ႈပရေႃးႁဵၵ်ႈ ၵႃႈတီႈၽၢႆႇၼႃႈၵဝ်ဢေႃႈ။
45ၵဝ်တၵ်းယူႇၵႃႈၼႂ်းၵူၼ်းမဵဝ်းဢီႉသရေႇလႃႉတင်းလၢႆလႄႈပဵၼ်ၽြႃးၶဝ်ဢေႃႈ။- 46လွင်ႈၼင်ႇႁိုဝ်ၵဝ်တၵ်းယူႇၼႂ်းၶဝ်ယူႇၸိုင်၊ ၶဝ်တၵ်းႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈၶဝ် ဢၼ်လႆႈၼုၵ်ႈဢဝ်ၶဝ်ဢွၵ်ႇသေ ၵႃႈၼႂ်းမိူင်းဢေႇၵိပ်ႉတူႉမႃးၼၼ်ႉဢေႃႈ။ ၵဝ်ၼႆႉပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈၶဝ်ဢေႃႈ။
Currently Selected:
ဢွၵ်ႇၵႂႃႇ 29: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
