ဢွၵ်ႇၵႂႃႇ 30
30
ယိတ်ႈပလၢင်ႇပုၼ်ႈတၵ်းတုတ်ႇၼၢမ်ႇသႃႇ
(တူၺ်း၊ ဢွၵ်ႇ 37:25-28)
1ၼႄးၼိုင်ႈၸမ်ႉ၊ မႂ်းတၵ်းလႆႈႁဵတ်းယိတ်ႈပလၢင်ႇ ပုၼ်ႈဢၼ်တၵ်းတုတ်ႇၽႆးၼၢမ်ႇသႃႇဢေႃႈ။ တၵ်းလႆႈဢဝ်မႆႉဢၵႃႇသႃႉႁဵတ်းဢေႃႈ။- 2ယိတ်ႈပလၢင်ႇၼၼ်ႉ ၼႃႈယၢဝ်းမၼ်းသွၵ်ႇၼိုင်ႈ၊ ၼႃႈပွတ်းမၼ်းသွၵ်ႇၼိုင်ႈ တၵ်းလႆႈပဵၼ်သီႇၸဵင်ႇၶိုင်ႈလႄႈ၊ ဢၼ်သုင်မၼ်းတၵ်းလႆႈမီးသွင်သွၵ်ႇဢေႃႈ။ ၶဝ်လႅမ်မၼ်းၵေႃႈ တၵ်းလႆႈပဵၼ်ၼိူဝ်ႉလဵဝ်ၵၼ်တင်းမၼ်းဢေႃႈ။- 3မႂ်းတၵ်းလႆႈဢဝ်ၶမ်းလွတ်ႈငၢၼ်ႇဢုမ်ႇႁေႃႇၼႃႈၼိူဝ်မၼ်း တင်းၼႃႈႁိမ်းမၼ်းတင်းၶဝ်လႅမ်မၼ်းၸိူဝ်းၼၼ်ႉလႄႈ ႁဵတ်းၶိူင်ႈၶႅပ်းၶမ်း ဢၼ်တၵ်းသႂ်ႇလဵပ်ႈႁွပ်ႈ ၵႃႈႁိမ်းၼိူဝ်မၼ်းသေဢေႃႈ။- 4ၵႃႈတႂ်ႈၶိူင်ႈၶႅပ်းၶမ်း ၵႃႈတီႈၸဵင်ႇယိတ်ႈပလၢင်ႇသွင်ၼႃႈၼၼ်ႉ မႂ်းတၵ်းလႆႈႁဵတ်း ၶူၺ်ႇၶမ်းသႂ်ႇယေႈၼႃႈသွင်ၶူၺ်ႇဢေႃႈ။ တၵ်းလႆႈပဵၼ်တီႈသွတ်ႇၵၢၼ်း ပုၼ်ႈဢၼ်တၵ်းႁၢပ်ႇယိတ်ႈပလၢင်ႇဢေႃႈ။- 5ၵၢၼ်းၸိူဝ်းၼၼ်ႉၵေႃႈ မႂ်းတၵ်းလႆႈဢဝ်မႆႉဢၵႃႇသႃႉ ႁဵတ်းလႄႈ ဢဝ်ၶမ်းလွတ်ႈငၢၼ်ႇဢုမ်ႇႁေႃႇသေဢေႃႈ။- 6မႂ်းတၵ်းလႆႈဢဝ်ယိတ်ႈပလၢင်ႇၼၼ်ႉဝႆႉၵႃႈတီႈၽၢႆႇၼႃႈၽႃႈၵင်ႈဢၼ်ၵင်ႈတိူၵ်ႈတႃႇ ဢၼ်ဝႆႉၶိူင်ႈဢၼ်ၶၢမ်ႇသၢၵ်ႈသေႇၼၼ်ႉ ၵႃႈတီႈၽၢႆႇၼႃႈပလၢင်ႇတီႈၽေႇဢပႅတ်ႈ ဢၼ်မီးၵႃႈၼိူဝ်ၶိူင်ႈဢၼ်ၶၢမ်ႇသၢၵ်ႈသေႇၼၼ်ႉ တီႈဢၼ်ၵဝ်တၵ်းထူပ်းၵၼ်တင်းမႂ်းၼၼ်ႉဢေႃႈ။- 7ဢႃႇရုၼ်ႇၼၼ်ႉ တၵ်းလႆႈတုတ်ႇၽႆးၼၢမ်ႇသႃႇ ဢၼ်ႁွမ်ဢၼ်ႁူၺ်းၵႃႈၼိူဝ်မၼ်းၼၼ်ႉဢေႃႈ။ မၼ်းတၵ်းလႆႈတုတ်ႇၽႆးမိူဝ်ႈဢၼ် မၼ်းမႄးႁႅၼ်းဝၢၼ်ႇတႆႈၽႆးၸိူဝ်းၼၼ်ႉ ၵူႈၼႂ်ဢေႃႈ။- 8ၶိင်ႇႁူဝ်ၶမ်ႈၵေႃႈ မိူဝ်ႈဢၼ်ဢႃႇရုၼ်ႇတႆႈဝၢၼ်ႇတႆႈၽႆးၸိူဝ်းၼၼ်ႉၸိုင်၊ မၼ်းတၵ်းလႆႈတုတ်ႇၽႆးၼၢမ်ႇသႃႇ ဢၼ်ဝႃႈတၢင်းဢၼ် ၸူဝ်ႈလုၵ်ႈပၢၼ်လၢၼ်သူ သိုပ်ႇသိုပ်ႇတၢမ်းတၢမ်း တၵ်းလႆႈတုတ်ႇၽႆးၼၢမ်ႇသႃႇ ၵႃႈတီႈၽၢႆႇၼႃႈထႃႇဝရႃႉၽြႃးယူႇသေႇသေႇၼၼ်ႉဢေႃႈ။- 9သူဢမ်ႇလႆႈဢဝ်ၼၢမ်ႇသႃႇတၢင်ႇၸိူဝ်ႉတၢင်ႇမဵဝ်း ဢၼ်ဢမ်ႇၸၢပ်ႈဢမ်ႇသႅင်ႇၼၼ်ႉ ဢိၵ်ႇတင်း ယိတ်ႈဢၼ်တုတ်ႇၽႆး တင်းတၢင်းပုၵ်ႈၸေႃႇၽေႃးၸဵၼ်ႇပုၵ်ႈၸေႃႇၵႃႈၼိူဝ်မၼ်း။ တၢင်းပုၵ်ႈၸေႃႇ ဢၼ်သွၼ်းလေႃႇၵေႃႈ ဢမ်ႇလႆႈသွၼ်းလေႃႇၵႃႈၼိူဝ်မၼ်း။- 10ဢႃႇရုၼ်ႇၼၼ်ႉ ယေႈပီႊယေႈပွၵ်ႈ တၵ်းလႆႈႁဵတ်းမင်ႇၵလႃႇတၢင်းဢၼ်ၽေႇဢပႅတ်ႈ ၵႃႈၼိူဝ်ၶဝ်လႅမ်မၼ်းဢေႃႈ။ ၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်းတၢမ်း ယေႈပီႊယေႈပွၵ်ႈ တၵ်းလႆႈဢဝ်လိူတ်ႈတူဝ်ယိတ်ႈပုၼ်ႈဢၼ် တၵ်းၽေႇဢပႅတ်ႈၼၼ်ႉႁဵတ်းမင်ႇၵလႃႇ တၢင်းဢၼ်ၽေႇဢပႅတ်ႈဢေႃႈ။ ပဵၼ်ယိတ်ႈပလၢင်ႇဢၼ်မူတ်းၸၢင်ႇၼႃႇလူင်လၢင် တီႈထႃႇဝရႃႉၽြႃးဢေႃႈ၊ ဝႃႈၼင်ႇၼႆဢေႃႈ။
တၢင်းဢၼ်သႂ်ႇၶွၼ်ႇသုမ်ႉထဵင်ၸဝ်ႈ
11ၵမ်းၼၼ်ႉ ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇထႅင်ႈလႄႈဝႃႈၸမ်ႉ၊- 12မိူဝ်ႈဢၼ်မႂ်းၼပ်ႉဢၢၼ်ႇလႄႈ ဢဝ်ၸရၢင်းၵူၼ်းမဵဝ်းဢီႉသရေႇလႃႉတင်းလၢႆ ၸွမ်းလူၺ်ႈၶဝ်ၸိူဝ်းဢၼ် ၶၢမ်ႇတၢင်းဢၼ်ၼပ်ႉဢၢၼ်ႇၼၼ်ႉၸိုင်၊ ၵူၼ်းၵႃႈမီးတင်းသဵင်ႈတင်းလူင် ႁင်းၽႂ်ႁင်းမၼ်းတၵ်းလႆႈသၢၵ်ႈၵၢပ်ႈၵႃႈၶၼ်ပုၼ်ႈဢၼ်တၵ်းထုတ်ႇဢဝ် ဢသၢၵ်ႈတူဝ်ၸဝ်ႈၵဝ်ႇ ၼႂ်းၶိင်ႇမိူဝ်ႈဢၼ်ၼပ်ႉဢၢၼ်ႇယူႇၼၼ်ႉ တီႈထႃႇဝရႃႉၽြႃးႁႂ်ႈၶဝ်လႆႈၵၢင်းလွတ်ႈတင်းၽေးၼႂ်းၶိင်ႇမိူဝ်ႈဢၼ် ၼပ်ႉဢၢၼ်ႇယူႇၼၼ်ႉဢေႃႈ။- 13ၶဝ်ၸိူဝ်းဢၼ်ၶၢမ်ႇတၢင်းဢၼ် ၼပ်ႉဢၢၼ်ႇလႄႈ ၶဝ်ႈပႃးၼႂ်းၸရၢင်းတင်းသဵင်ႈတင်းလူင်ၼၼ်ႉ ယေႈၵေႃႉတၵ်းလႆႈပၼ်ၶိုင်ႈၵျၢပ်ႈၼိုင်ႈ ၸွမ်းလူၺ်ႈၼမ်ႉၼၵ်းငိုၼ်းၸဝ်ႈ ၵျၢပ်ႈသၶေးလႃႉၼၼ်ႉ ၶိုင်ႈၵျၢပ်ႈၼိုင်ႈၼၼ်ႉ၊ ပဵၼ်ပုၼ်ႈဢၼ်တၵ်းလႆႈသၢၵ်ႈၵၢပ်ႈတီႈထႃႇဝရႃႉၽြႃးဢေႃႈ။ ၵျၢပ်ႈၼိုင်ႈၸမ်ႉ ပဵၼ်ၵေႇရႃႉသၢဝ်းၼိုင်ႈဢေႃႈ- 14ၶဝ်ၸိူဝ်းဢၼ်ၶၢမ်ႇတၢင်းဢၼ် ၼပ်ႉဢၢၼ်ႇလႄႈ ၶဝ်ႈပႃးၼႂ်းၸရၢင်းၵူႈၵေႃႉဢၼ်ၸႃႉၸဵမ်ဢသၢၵ်ႈလႆႈသၢဝ်းၼိုင်ႈလႄႈ ဢသၢၵ်ႈလိူဝ်သၢဝ်းၵႂႃႇတင်းသဵင်ႈတင်းလူင်ၼၼ်ႉ တၵ်းလႆႈဢွၼ်ၵၼ်ႁဵတ်းတၢင်းပုၵ်ႈၸေႃႇၸိူဝ်ႉၼင်ႇၼၼ် တီႈထႃႇဝရႃႉၽြႃးဢေႃႈ။- 15မိူဝ်ႈဢၼ်ႁဵတ်းတၢင်းပုၵ်ႈၸေႃႇတီႈထႃႇဝရႃႉၽြႃး ႁႂ်ႈလႆႈထုတ်ႇဢဝ်ဢသၢၵ်ႈတူဝ်ၸဝ်ႈၵဝ်ႇၼၼ်ႉၸိုင်၊ ၶဝ်ၸိူဝ်းဢၼ် ၸၢင်ႈမၢၵ်ႈၸၢင်ႈမီးၼၼ်ႉ ယင်းဢမ်ႇလိူဝ်၊ ၶဝ်ၸိူဝ်းဢၼ်ၽၢၼ်ၼၼ်ႉၵေႃႈ ယင်းဢမ်ႇယွမ်းလႄႈ၊ ၵူၼ်းၵူႈၵေႃႉ တၵ်းလႆႈပၼ် ၶိုင်ႈၵျၢပ်ႈၼိုင်ႈဢေႃႈ။- 16မႂ်းတၵ်းလႆႈဢဝ်ငိုၼ်းတၢင်းဢၼ်ထုတ်ႇဢဝ်ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉလႄႈ ဝႆႉပုၼ်ႈၸရိပ်ႈမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈ ပုၼ်ႈလွင်ႈၼင်ႇႁိုဝ် တၵ်းလႆႈပဵၼ်သၢၵ်ႈသေႇၵူၼ်းမဵဝ်းဢီႉသရေႇလႃႉတင်းလၢႆ ၵႃႈတီႈၽၢႆႇၼႃႈထႃႇဝရႃႉၽြႃး ႁႂ်ႈလႆႈထုတ်ႇဢဝ် ဢသၢၵ်ႈသူၼၼ်ႉဢေႃႈ၊ ဝႃႈၼင်ႇၼႆဢေႃႈ။
ၵွၵ်းတွင်းလိူင်
17ၵမ်းၼၼ်ႉ ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇထႅင်ႈလႄႈဝႃႈၸမ်ႉ။- 18မႂ်းတၵ်းလႆႈႁဵတ်းၵွၵ်းတွင်းလိူင်လူင် တင်းတိၼ်မၼ်းပုၼ်ႈဢၼ်တၵ်းသုၵ်ႈတိၼ် သုၵ်ႈမိုဝ်းလႄႈ ဢဝ်ဝႆႉၵႃႈတီႈၵႄႈဝူင်ႈၵၢင် မူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈ တင်းယိတ်ႈပလၢင်ႇၼၼ်ႉလႄႈ ဢဝ်ၼမ်ႉသႂ်ႇဝႆႉဢေႃႈ။- 19ဢႃႇရုၼ်ႇဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉ တၵ်းလႆႈသုၵ်ႈတိၼ်သုၵ်ႈမိုဝ်းၶဝ်ၵႃႈၼႂ်းမၼ်းၼၼ်ႉဢေႃႈ။- 20မိူဝ်ႈဢၼ်ၶဝ်ၼၼ်ႉ ၶဝ်ႈၵႃႈၼႂ်းမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၼၼ်ႉ ဢိၵ်ႇတင်းမိူဝ်ႈဢၼ်ၶဝ်သုတ်ႉၸပ်းသုတ်ႉၸူးတီႈယိတ်ႈပလၢင်ႇ ႁႂ်ႈလႆႈပွင်ႁဵတ်းဢမူႉၸဝ်ႈလႄႈ ပုၵ်ႈၸေႃႇယိတ်ႈဢၼ်တုတ်ႇၽႆးတီႈထႃႇဝရႃႉၽြႃးၼၼ်ႉၸိုင်၊ ၶဝ်တၵ်းလႆႈ သုၵ်ႈတိၼ်သုၵ်ႈမိုဝ်း ႁႂ်ႈၶဝ်လႆႈၵၢင်းလွတ်ႈတင်းၽေးတၢင်းတၢႆဢေႃႈ။- 21ၼင်ႇၼၼ်လႄႈ ၶဝ်တၵ်းလႆႈသုၵ်ႈတိၼ်သုၵ်ႈမိုဝ်းၶဝ် ႁႂ်ႈၶဝ်လႆႈၵၢင်းလွတ်ႈတင်းၽေးတၢင်းတၢႆဢေႃႈ။ တၵ်းလႆႈပဵၼ်ထုင်းၽိင်ႈတြႃးၸဝ်ႈ ဢၼ်သေႇသေႇတီႈၶဝ် ဢိၵ်ႇတင်းၸူဝ်ႈလုၵ်ႈပၢၼ်လၢၼ်ၶဝ် သိုပ်ႇသိုပ်ႇတၢမ်းတၢမ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။
ၼမ်ႉမၼ်းပုၼ်ႈတႃႇသွၼ်းလေႃႇ
22ၵမ်းၼၼ်ႉ ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇထႅင်ႈလႄႈဝႃႈၸမ်ႉ၊- 23ၸွမ်းလူၺ်ႈၼမ်ႉၼၵ်းလုၵ်ႈၶၼ်ၸဝ်ႈ ၵျၢပ်ႈၼိုင်ႈၼၼ်ႉလႄႈ မႂ်းတၵ်းလႆႈဢဝ်ၼၢမ်ႇသႃႇ ဢၼ်မျၢတ်ႈၼႃႇလူင်လၢင်၊ ဢၼ်ဝႃႈ ယၢင်မူႉရၼ်ႇ ဢၼ်ပဵၼ်ၼမ်ႉယူႇႁႃႈပၢၵ်ႇၵျၢပ်ႈ၊ ၵႅင်းႁွမ်ၶိုင်ႈၼိုင်ႈ ဢၼ်ၼၼ်ႉသွင်ပၢၵ်ႇပၢႆႁႃႈသိပ်းၵျၢပ်ႈ တင်းသၢမ်ပူးဢၼ်ႁွမ်သွင်ပၢၵ်ႇပၢႆႁႃႈသိပ်းၵျၢပ်ႈ၊- 24မႆႉႁွမ်ႁိူတ်ႈႁႃႈပၢၵ်ႇၵျၢပ်ႈ ဢိၵ်ႇတင်းၼမ်ႉမၼ်းသၢၼ်ႇလုၼ်ႇ ႁီႉၼႃႉၼိုင်ႈၸိူဝ်းၼၼ်ႉလႄႈ၊- 25ၽေႃႇႁဵတ်းၼမ်ႉမၼ်းဢၼ်မူတ်းၸၢင်ႇ ပုၼ်ႈဢၼ်တၵ်းတႃးၼၼ်ႉဢၼ်ဝႃႈ ၼမ်ႉမၼ်းဢၼ်ႁွမ်ဢၼ်ႁူၺ်း ဢၼ်ၽေႃႇႁဵတ်းၸွမ်းၼင်ႇပိင်ႇၺႃႇမေႃယႃ ဢၼ်ၸၢင်ႈၽေႃႇႁဵတ်း ဢၼ်ႁွမ်ဢၼ်ႁူၺ်းၼၼ်ႉဢေႃႈ။ တၵ်းလႆႈပဵၼ်ၼမ်ႉမၼ်း ဢၼ်မူတ်းၸၢင်ႇ ပုၼ်ႈဢၼ်တၵ်းတႃးၼၼ်ႉဢေႃႈ။- 26မႂ်းတၵ်းလႆႈဢဝ်တင်းၼမ်ႉမၼ်းၼၢမ်ႇသႃႇၼၼ်ႉ တႃးမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ ဢိၵ်ႇတင်းတိူၵ်ႈတႃႇတီႈဢၼ်ဝႆႉၶိူင်ႈဢၼ်ၶၢမ်ႇသၢၵ်ႈသေႇ၊- 27ၶူင်ႇတီႈၵိၼ်ဢိၵ်ႇတင်း ၶိူင်ႈမၼ်းၵႃႈမီးတင်းသဵင်ႈတင်းလူင်၊ ၶူင်ႇတီႈတႆႈၽႆး ဢိၵ်ႇတင်းၶိူင်ႈမၼ်းၵႃႈမီးတင်းသဵင်ႈတင်းလူင်၊ ပလၢင်ႇဢၼ်တုတ်ႇၽႆးၼၢမ်ႇသႃႇ၊- 28ယိတ်ႈပလၢင်ႇတီႈဢၼ်တုတ်ႇၽႆးတူဝ်ယိတ်ႈ ဢိၵ်ႇတင်းၶိူင်ႈမၼ်းၵႃႈမီးတင်းသဵင်ႈတင်းလူင် ၵွၵ်းလူင်ဢိၵ်ႇတင်းတိၼ်မၼ်းလႄႈ၊- 29ႁႂ်ႈမူတ်းၸၢင်ႇၸိူဝ်ႉၼင်ႇၼၼ် ပုၼ်ႈလွင်ႈၼင်ႇႁိုဝ်ၸိူဝ်းၼၼ်ႉ တၵ်းပဵၼ်ဢၼ်မူတ်းၸၢင်ႇၼႃႇလူင်လၢင်ဢေႃႈ။ ၶိူင်ႈပိူင်ၵႃႈဢၼ်တၵ်းတိူဝ်ႉထုၵ်ႇၶိူင်ႈၸိူဝ်းၼၼ်ႉၵေႃႈ တၵ်းလႆႈပဵၼ်ဢၼ်မူတ်းၸၢင်ႇဢေႃႈ။- 30မႂ်းတၵ်းလႆႈဢဝ်တႃး ဢႃႇရုၼ်ႇဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉလႄႈ ႁႂ်ႈၶဝ်မူတ်းၸၢင်ႇပုၼ်ႈလွင်ႈၼင်ႇႁိုဝ် ၶဝ်တၵ်းမီးဢရႃႇယိတ်ႈပရေႃးႁဵၵ်ႈလႄႈ ပွင်ႁဵတ်းဢမူႉၸဝ်ႈၵႃႈတီႈၽၢႆႇၼႃႈၵဝ်ဢေႃႈ။- 31ဢၼ်မႂ်းတၵ်းလႆႈမွၵ်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆလႄႈဝႃႈၸမ်ႉ၊ ၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်းတၢမ်းၼၼ်ႉ၊ ၼမ်ႉမၼ်းၼႆႉတၵ်းလႆႈပဵၼ်ၼမ်ႉမၼ်းဢၼ်မူတ်းၸၢင်ႇ ပုၼ်ႈဢၼ်တၵ်းတႃးၼၼ်ႉတီႈၵဝ်ဢေႃႈ။- 32ဢမ်ႇလႆႈဢဝ်ထွၵ်ႇဢဝ်သႂ်ႇၵႃႈၼိူဝ်ၵႃႈၼင်ၵူၼ်း။ ဢမ်ႇလႆႈၽေႃႇလႆႈႁဵတ်းၼမ်ႉမၼ်းတၢင်ႇဢၼ် မိူၼ်ၸိူဝ်ႉၼင်ႇဢၼ်ၽေႃႇႁဵတ်း ၼမ်ႉမၼ်းၼၼ်ႉ။ ပိူဝ်ႈဢၼ်မူတ်းၸၢင်ႇလႄႈ သူတၵ်းလႆႈမၢတ်ႈပဵၼ်ဢၼ်မူတ်းၸၢင်ႇဢေႃႈ။- 33ၵေႃႉဢၼ်ၽေႃႇႁဵတ်း ႁႂ်ႈမိူၼ်ၸိူဝ်ႉၼင်ႇၼမ်ႉမၼ်းၼၼ်ႉ ၵေႃႉဢၼ်ဢဝ်တႃးတီႈၵူၼ်းဢၼ်ဢမ်ႇၸၢပ်ႈဢမ်ႇသႅင်ႇၼၼ်ႉၸမ်ႉ၊ တၵ်းလႆႈၶၢမ်ႇတၢင်းဢၼ် ပႄႇပႅတ်ႈသေၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ၊ ဝႃႈၼင်ႇၼႆဢေႃႈ။
ၼၢမ်ႇသႃႇဢၼ်ႁွမ်ဢၼ်ႁူၺ်း
34ၵမ်းၼၼ်ႉ ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇထႅင်ႈလႄႈဝႃႈၸမ်ႉ၊ မႂ်းတၵ်းလႆႈဢဝ်မဵဝ်းၼၢမ်ႇသႃႇဢၼ်ႁွမ်ဢၼ်ႁူၺ်း ဢၼ်ဝႃႈယၢင်ၼတပ်ႉ၊ ပိူၵ်ႇႁွႆဢၼ်ႁွမ်၊ ယၢင်ၵႃႇလပၢၼ်ႇ တင်းယၢင်လေႃႇပၢၼ်ႇ ဢၼ်ၸႅတ်ႈၸႅတ်ႈၸိူဝ်းၼၼ်ႉလႄႈ ၸင်ႈႁိဝ်ႈၼမ်ႉၼၵ်းမၼ်း ပဵင်းပဵင်းၵၼ်ၵူႈမဵဝ်းဢေႃႈ။- 35မႂ်းတၵ်းလႆႈဢဝ်ၽေႃႇႁဵတ်းၼၢမ်ႇသႃႇ ဢၼ်ဝႃႈယႃဢၼ်ႁွမ်ဢၼ်ႁူၺ်း ၽေႃႇႁဵတ်းၸွမ်းၼင်ႇပိင်ႇၺႃႇမေႃယႃ ဢၼ်ၸၢင်ႈၽေႃႇႁဵတ်းဢၼ်ႁွမ်ဢၼ်ႁူၺ်းၼၼ်ႉ ဢၼ်ဢဝ်ၵိူဝ်သႂ်ႇလႄႈ ၸိုၼ်ႈလီသႂ်လီလႄႈ မူတ်းၸၢင်ႇၼၼ်ႉဢေႃႈ။- 36မႂ်းတၵ်းလႆႈဢဝ်ၵမ်ႈၽွင်ႈ တမ်ဢွၼ်ႇဢွၼ်ႇလႄႈ ဝႆႉၵႃႈတီႈၽၢႆႇၼႃႈၶိူင်ႈဢၼ်ၶၢမ်ႇသၢၵ်ႈသေႇ ၵႃႈၼႂ်းမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈ တီႈဢၼ်ၵဝ်တၵ်းထူပ်းၵၼ်တင်းမႂ်းၼၼ်ႉဢေႃႈ။ တၵ်းလႆႈပဵၼ်ဢၼ်မူတ်းၸၢင်ႇၼႃႇလူင်လၢင်တီႈသူဢေႃႈ။- 37ၼၢမ်ႇသႃႇဢၼ်မႂ်းၽေႃႇႁဵတ်းၸိူဝ်ႉၼင်ႇၼၼ်ၼၼ်ႉၸိုင်၊ သူဢမ်ႇလႆႈၽေႃႇလႆႈႁဵတ်းၸွမ်းၼင်ႇ ၼႄးဢၼ်ၽေႃႇႁဵတ်းမၼ်းၼၼ်ႉပုၼ်ႈသူ။ တၵ်းလႆႈပဵၼ်ဢၼ်မူတ်းၸၢင်ႇ ပုၼ်ႈထႃႇဝရႃႉၽြႃးတီႈသူဢေႃႈ။- 38ၽူႈလႂ်သေဢမ်ႇဝႃႈ၊ ၵေႃႉဢၼ်ၽေႃႇႁဵတ်းႁႂ်ႈမိူၼ်ၸိူဝ်ႉၼင်ႇၼၢမ်ႇသႃႇၼၼ်ႉ ပုၼ်ႈဢၼ်မၼ်းတၵ်းသုတ်ႇတၵ်းၼူမ်ၼၼ်ႉ တၵ်းလႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ၊ ဝႃႈၼင်ႇၼႆဢေႃႈ။
Currently Selected:
ဢွၵ်ႇၵႂႃႇ 30: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
