ဢွၵ်ႇၵႂႃႇ 33

ထႃႇဝရႃႉၽြႃးႁႂ်ႈၵူၼ်းမဵဝ်းဢီႉသရေႇလႃႉဢွၵ်ႇသေလွႆသီႉၼႃႉ

1ၵမ်းၼၼ်ႉ ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈ၊ ၸႃႉၸဵမ်မႂ်းလႄႈၶဝ်ၸိူဝ်းဢၼ်မႂ်းၼုၵ်ႈဢဝ်ဢွၵ်ႇသေ ၵႃႈၼႂ်းမိူင်းဢေႇၵိပ်ႉတူႉမႃးၶဝ်ဢိူၺ်း၊ ဢွၵ်ႇသေၵႃႈတီႈၼႆႈလႄႈ ၵႂႃႇၵႃႈတီႈမိူင်းဢၼ်ၵဝ်တိူင်ႇတီႈဢႃႇပြႃႇႁၢမ်ႇ၊ ဢီႉၸၢၵ်ႈ၊ တင်းယႃႇၵုပ်ႈၼၼ်ႉလႄႈဝႃႈ၊ ၵဝ်တၵ်းပၼ်တီႈမႂ်းဢိၵ်ႇတင်းၸိူဝ်ႉၶိူဝ်းမႂ်းဢေႃႈ၊ ဝႃႈၼင်ႇၼႆၼၼ်ႉတႃႉ။- 2ၵဝ်တၵ်းပွႆႇၸႂ်ႉတမၢၼ်ႇၵၢင်ႁၢဝ် ဢွၼ်ႁူဝ်မႂ်းၵႂႃႇလႄႈ၊ ၵဝ်တၵ်းႁေႃႈၵူၼ်းၶႃႇၼၼီႉ၊ ၵူၼ်းဢႃႇမေႃးရီႉ၊ ၵူၼ်းႁိတ်ႉတီႉ၊ ၵူၼ်းၽေႇရၸီႉ၊ ၵူၼ်းႁီႉဝီႉ တင်းၵူၼ်းယေႇပူႉသီႉၸိူဝ်းၼၼ်ႉဢွၵ်ႇလႄႈ၊- 3ဢဝ်မႂ်းသူင်ႇၵႃႈတီႈမိူင်းဢၼ်ၼမ်ႉၼူမ်းတင်းၼမ်ႉၽိုင်ႈၸၢင်ႈလႆယူႇၼၼ်ႉဢေႃႈ။ ၵဝ်တၵ်းဢမ်ႇၵႂႃႇၸွမ်းၵႃႈၼႂ်းၶိုင်ႈၵၢင်သူ။ ပိူဝ်ႈဢၼ် မႂ်းပဵၼ်မဵဝ်းၵူၼ်းဢၼ် လမ်းၶေႃးၵႅၼ်ႇၶႅင်လႄႈ ၵူဝ်ၵဝ်တၵ်းလႆႈယႃႉၽဵဝ်ႈမႂ်းပႅတ်ႈၼႂ်းမိူဝ်ႈဢၼ်ယင်းတိုၵ်ႉၸွမ်း ၼႂ်းသဵၼ်ႈတၢင်းၵႂႃႇယူႇၼၼ်ႉဢေႃႈ၊ ဝႃႈၼင်ႇၼႆဢေႃႈ။- 4မိူဝ်ႈဢၼ်ၵူၼ်းတင်းလၢႆငိၼ်းသတၢင်းဢၼ်ဢမ်ႇလီဢမ်ႇငၢမ်းၼၼ်ႉၸိုင်၊ ၶဝ်ဢွၼ်ၵၼ်ႁႆႈႁွင်ႉပွင်ႉၶၢင်းသေလႄႈ ယင်းဢမ်ႇႁၢင်ႈၶိူင်ႈႁၢင်ႈၽၢင်သေၵေႃႉသေၵူၼ်းလႄႈယူႇဢေႃႈ။- 5လွင်ႈမၼ်းၸမ်ႉ ထႃႇဝရႃႉၽြႃးမီးဢမိင်ႉတီႈမူဝ်းသေႇလႄႈဝႃႈ၊ ဢၼ်မႂ်းတၵ်းလႆႈမွၵ်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆလႄႈဝႃႈၸမ်ႉ၊ သူၼႆႉပဵၼ်မဵဝ်းၵူၼ်းဢၼ် လမ်းၶေႃးၵႅၼ်ႇၶႅင်ဢေႃႈ။ ပေႃးၵဝ်ၵႂႃႇၸွမ်းၵႃႈၼႂ်းၶိုင်ႈၵၢင်မႂ်း ၵမ်းဢွၼ်ႇၼိုင်ႈၸိုင်၊ ၵဝ်တၵ်းယႃႉၽဵဝ်ႈမႂ်းပႅတ်ႈဢေႃႈ။ ပိူဝ်ႈၼႆလႄႈ လွင်ႈၼင်ႇႁိုဝ်ၵဝ်တၵ်းႁူႉလွင်ႈဢၼ်ၵဝ်တၵ်းလႆႈႁဵတ်းတီႈမႂ်းၸိူဝ်ႉၼင်ႇႁိုဝ်ၼၼ်ႉၸိုင် တေႃႈလဵဝ်ၼႆႉ ထွတ်ႇၶိူင်ႈတိုဝ်းမႂ်းတႃႉ၊ ဝႃႈၼင်ႇၼႆဢေႃႈ။- 6ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉၵေႃႈ ဢွၼ်ၵၼ်ထွတ်ႇၶိူင်ႈတိုဝ်းၶဝ် ၸႃႉၸဵမ်ၵႃႈတီႈလွႆႁေႃးရပ်ႉၼၼ်ႉဢေႃႈ။

7 မူဝ်းသေႇဢဝ်မူဝ်းၵႃႇၸဝ်ႈပူၵ်းၵႃႈတီႈၼွၵ်ႈတပ်ႉတီႈဢၼ်ၵႆၵႆၼၼ်ႉသေလႄႈ၊ ႁွင်ႉႁဵၵ်ႈၸိုဝ်ႈမၼ်း မူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈဢေႃႈ။ ၶဝ်ၸိူဝ်းဢၼ်ႁႃထႃႇဝရႃႉၽြႃးၼၼ်ႉတင်းသဵင်ႈတင်းလူင် ဢွၼ်ၵၼ်ဢွၵ်ႇၵႂႃႇၸူးၵႃႈတီႈမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈ ဢၼ်မီးၵႃႈတီႈၼွၵ်ႈတပ်ႉၼၼ်ႉဢေႃႈ။

8မိူဝ်ႈဢၼ်မူဝ်းသေႇဢွၵ်ႇၵႂႃႇၸူးၵႃႈတီႈမူဝ်းၵႃႇၸဝ်ႈၼၼ်ႉၸိုင်။ ၵူၼ်းတင်းသဵင်ႈတင်းလူင် ဢွၼ်ၵၼ်လုၵ်ႉလႄႈၸုၵ်းယူႇၵႃႈတီႈၽၵ်းတူမူဝ်းၵႃႇၶဝ် ႁင်းၽႂ်ႁင်းမၼ်းလႄႈ၊ တူၺ်းၸွမ်းလင်မူဝ်းသေႇ တေႃႇထိုင်ႁွတ်ႈမၼ်းၶဝ်ႈၵႃႈၼႂ်းမူဝ်းၵႃႇၸဝ်ႈၼၼ်ႉဢေႃႈ။- 9မူဝ်းသေႇၶဝ်ႈၵႃႈၼႂ်း မူဝ်းၵႃႇၸဝ်ႈသေယဝ်ႉ၊ သဝ်မွၵ်ႇၵုမ်ႈလူင်းမႃးၸုၵ်းယူႇ ၵႃႈတီႈၽၵ်းတူ မူဝ်းၵႃႇၸဝ်ႈၼၼ်ႉလႄႈ ထႃႇဝရႃႉၽြႃးလၢတ်ႈတေႃႇမူဝ်းသေႇဢေႃႈ။- 10မိူဝ်ႈဢၼ်ၵူၼ်းတင်းသဵင်ႈတင်းလူင် ႁၼ်သဝ်မွၵ်ႇၵုမ်ႈၸုၵ်းယူႇ ၵႃႈတီႈၽၵ်းတူမူဝ်းၵႃႇၸဝ်ႈၼၼ်ႉၸိုင်၊ ၶဝ်ဢွၼ်ၵၼ်လုၵ်ႉတင်းသဵင်ႈတင်းလူင်လႄႈ ၵူဝ်းၵႂၢႆႇယူႇ ၵႃႈတီႈၽၵ်းတူမူဝ်းၵႃႇၶဝ်ၼၼ်ႉႁင်းၽႂ်ႁင်းမၼ်းဢေႃႈ။- 11ထႃႇဝရႃႉၽြႃးတေႃႇၼႃႈၵၼ်တင်းမူဝ်းသေႇသေလႄႈလၢတ်ႈတေႃႇမၼ်း မိူၼ်ၸိူဝ်ႉၼင်ႇဢၼ်ၵူၼ်းလၢတ်ႈတေႃႇၵၼ်တင်းၵေႃႉသေႈမၼ်းၼၼ်ႉဢေႃႈ။ မိူဝ်ႈဢၼ်မၼ်းသမ်ႉၶိုၼ်းၶဝ်ႈမႃးၵႃႈၼႂ်းတပ်ႉၼၼ်ႉၸိုင်၊ ၵူၼ်းႁူမ်ႈၵူၼ်းပွင်းမၼ်းယေႃးသူႉ လုၵ်ႈၸၢႆးၼုၼ်ႇ ဢၼ်ပဵၼ်ၵူၼ်း ဢၼ်ယင်းၼုမ်ႇယင်းၵမ်ၼၼ်ႉ ယင်းဢမ်ႇဢွၵ်ႇသေၵႃႈၼႂ်းမူဝ်းၵႃႇၸဝ်ႈလႄႈယူႇဢေႃႈ။

ထႃႇဝရႃႉၽြႃးဝႆႉၵတီႉတေယူႇလူၺ်ႈၵူၼ်းမၼ်းၸဝ်ႈ

12 မူဝ်းသေႇၵေႃႈလဝ်ႊလၢတ်ႈတီႈထႃႇဝရႃႉၽြႃးလႄႈဝႃႈ၊ တူၺ်းသေၵမ်းတီႈၶႃႈ၊ ၸဝ်ႈႁဝ်းမီးဢမိင်ႉတီႈၶႃႈၸဝ်ႈလႄႈဝႃႈ၊ ဢဝ်ၵူၼ်းၸိူဝ်းၼႆႉၵႂႃႇသူင်ႇတႃႉ၊ ဝႃႈၼင်ႇၼႆၼၼ်ႉလႄႈ ၸဝ်ႈႁဝ်းဢမ်ႇႁႂ်ႈၶႃႈၸဝ်ႈလႆႈႁူႉလွင်ႈဢၼ်ၸဝ်ႈႁဝ်း တၵ်းပွႆႇၸႂ်ႉၽူႈလႂ်ၵႂႃႇလူၺ်ႈၵၼ်တင်းၶႃႈၸဝ်ႈၼၼ်ႉတီႈၶႃႈ၊ ၼႂ်းဝႃႈၼၼ်သေၵေႃႈ ၸဝ်ႈႁဝ်းလၢတ်ႈလႄႈဝႃႈ၊ ဢဝ်တင်းၼႃႇမႃႉၸိုဝ်ႈသဵင်မႂ်းသေလႄႈ ၵဝ်ႁူႉၸၵ်းမႂ်းဢေႃႈ။ မႂ်းလႆႈထူပ်းၵျေးၸူးသိုဝ်ႈၼႃႈတႂ်ႈတႃၵဝ်ယဝ်ႉ၊ ဝႃႈၼင်ႇၼႆယဝ်ႉတီႈၶႃႈဢေႃႈ။- 13ပိူဝ်ႈၼႆလႄႈ ပေႃးၶႃႈၸဝ်ႈလႆႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းယဝ်ႉၸိုင်၊ ၶႅၼ်းတေႃႈၼႄပျႃးသဵၼ်ႈတၢင်းၸဝ်ႈႁဝ်းၼၼ်ႉတီႈၶႃႈၸဝ်ႈ ႁႂ်ႈၶႃႈၸဝ်ႈလႆႈႁူႉၸၵ်းၸဝ်ႈႁဝ်း ပုၼ်ႈလွင်ႈၼင်ႇႁိုဝ်ၶႃႈၸဝ်ႈသမ်ႉတၵ်းလႆႈထူပ်း ၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်း ထႅင်ႈသေၵမ်းတီႈၶႃႈ၊ ၶႆႈၸႂ်ဝူၼ်ႉၸႂ်လူၺ်ႈလွင်ႈဢၼ်ၵူၼ်းမဵဝ်းၼႆႉ ပဵၼ်ၵူၼ်းၸဝ်ႈႁဝ်းၼၼ်ႉသေၵမ်းတီႈၶႃႈ၊ ၶႃႈၸဝ်ႈတွင်းပၢၼ်ႇတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 14မၼ်းၸဝ်ႈၵေႃႈလၢတ်ႈလႄႈဝႃႈ၊ တူဝ်ၵဝ်တၵ်းၵႂႃႇလႄႈ ပၼ်တၢင်းၼိမ်ၵတ်းယဵၼ်ၶျၢမ်းသႃႇဢေႃႈ၊ ဝႃႈၼင်ႇၼႆဢေႃႈ။- 15မူဝ်းသေႇၵေႃႈ သမ်ႉလဝ်ႊလၢတ်ႈလႄႈဝႃႈ၊ ပေႃးတူဝ်ၸဝ်ႈႁဝ်းဢမ်ႇၵႂႃႇၸိုင်၊ ယႃႇပေဢဝ်ၶႃႈၸဝ်ႈႁဝ်းၶဝ်ၼႆႉ ဢွၵ်ႇသေၵႃႈတီႈၼႆႈၵႂႃႇသူင်ႇသေၵမ်းတီႈၶႃႈ။- 16လွင်ႈဢၼ်ၶႃႈၸဝ်ႈ ဢိၵ်ႇတင်းၵူၼ်းၸဝ်ႈႁဝ်းၸိူဝ်းၼႆႉ လႆႈထူပ်းၵျေးၸူး သိုဝ်ႈၼႃႈတႂ်ႈတႃၸဝ်ႈႁဝ်းၼၼ်ႉတၵ်းထၢင်ႇသႃး ၸိူဝ်ႉၼင်ႇႁိုဝ်တီႈၶႃႈ၊ တၵ်းထၢင်ႇသႃးၵွပ်ႈပိူဝ်ႈဢၼ် ၸဝ်ႈႁဝ်းၵႂႃႇလူၺ်ႈၵၼ်တင်းၶႃႈၸဝ်ႈႁဝ်းၸိူဝ်းၼႆႉၼၼ်ႉၵူၺ်း ဢမ်ႇၸႂ်ႈတီႈၶႃႈႁိုဝ်။ ၼင်ႇၼၼ်လႄႈ ၶႃႈၸဝ်ႈဢိၵ်ႇတင်းၵူၼ်းၸဝ်ႈႁဝ်းၸိူဝ်းၼႆႉ တၵ်းလႆႈပႅၵ်ႇပိူင်ႈၵၼ်တင်းၵူၼ်းဢၼ်မီးၵႃႈၼိူဝ်လိၼ်မိူင်းၼႆႉ ၵႃႈမီးတင်းသဵင်ႈတင်းလူင်ၼၼ်ႉတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊- 17ထႃႇဝရႃႉၽြႃးလၢတ်ႈတီႈမူဝ်းသေႇလႄႈဝႃႈ၊ ၵဝ်တၵ်းႁဵတ်းၸွမ်းၵႃႈၼင်ႇဢၼ် မႂ်းလဝ်ႊလၢတ်ႈၼၼ်ႉဢေႃႈ။ လွင်ႈမၼ်းၸမ်ႉ မႂ်းလႆႈထူပ်းၵျေးၸူး သိုဝ်ႈၼႃႈတႂ်ႈတႃၵဝ်ယဝ်ႉ။ ဢဝ်တင်းၼႃႇမႃႉၸိုဝ်ႈသဵင်မႂ်းသေလႄႈ ၵဝ်ႁူႉၸၵ်းမႂ်းယဝ်ႉ၊ ဝႃႈၼင်ႇၼႆဢေႃႈ။- 18ၵမ်းၼၼ်ႉ မၼ်းသမ်ႉလဝ်ႊလၢတ်ႈထႅင်ႈလႄႈဝႃႈ၊ ၶႅၼ်းတေႃႈၼႄပျႃးမုၼ်ၽုင်းၸဝ်ႈႁဝ်းတီႈၶႃႈၸဝ်ႈသေၵမ်းတီႈၶႃႈ၊ ၶႃႈၸဝ်ႈတွင်းပၢၼ်ႇတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 19မၼ်းၸဝ်ႈၵေႃႈလၢတ်ႈလႄႈဝႃႈ၊ ၵဝ်တၵ်းႁႂ်ႈတၢင်းဢၼ်လီဢၼ်ငၢမ်းၵဝ် ၵႃႈမီးတင်းသဵင်ႈတင်းလူင် ၵၢႆၵႂႃႇၵႃႈတီႈၽၢႆႇၼႃႈမႂ်းဢေႃႈ။ ၼႃႇမႃႉၸိုဝ်ႈသဵင်ထႃႇဝရႃႉၽြႃးၵေႃႈ ၵဝ်တၵ်းႁွင်ႉမွၵ်ႇႁွင်ႉလၢတ်ႈ ၵႃႈတီႈၽၢႆႇၼႃႈမႂ်းဢေႃႈ။ ၵဝ်ၶႂ်ႈႁဵတ်းၵျေးၸူးတီႈၽူႈလႂ်ၵေႃႈ ၵဝ်တၵ်းႁဵတ်းဢေႃႈ။ ၵဝ်ၶႂ်ႈဢဵတ်းလူၽူႈလႂ်ၵေႃႈ ၵဝ်တၵ်းဢဵတ်းလူဢေႃႈ၊ ဝႃႈၼင်ႇၼႆသေယဝ်ႉ၊- 20သမ်ႉလၢတ်ႈထႅင်ႈလႄႈဝႃႈ၊ မႂ်းဢမ်ႇႁၼ်ၼႃႈၵဝ်လႆႈ။ လွင်ႈမၼ်းၸမ်ႉ ၵေႃႉဢၼ်ႁၼ်ၼႃႈၵဝ်လႄႈ ဢသၢၵ်ႈလိပ်းၼၼ်ႉ ဢမ်ႇမီးသေၵေႃႉသေၵူၼ်း၊ ဝႃႈၼင်ႇၼႆဢေႃႈ။- 21ထႃႇဝရႃႉၽြႃးသမ်ႉလၢတ်ႈထႅင်ႈလႄႈဝႃႈ၊ ၵႃႈတီႈႁိမ်းၵဝ်ၼႆႉ မီးတီႈတီႈၼိုင်ႈလႄႈ မႂ်းတၵ်းလႆႈၸုၵ်းယူႇၵႃႈၼိူဝ်မၢၵ်ႇႁိၼ်ၼၼ်ႉဢေႃႈ။- 22မိူဝ်ႈဢၼ်မုၼ်ၽုင်းၵဝ်ၵၢႆၵႂႃႇၼၼ်ႉၸိုင်၊ ၵဝ်တၵ်းဢဝ်မႂ်းသႂ်ႇဝႆႉ ၵႃႈၼႂ်းၵႄႈမၢၵ်ႇႁိၼ်လႄႈ ဢဝ်မိုဝ်းၵဝ်ႁူမ်ႇမႂ်းဝႆႉ ၼႂ်းမိူဝ်ႈဢၼ် ၵဝ်ယင်းတိုၵ်ႉပႆၵႂႃႇယူႇၼၼ်ႉဢေႃႈ။- 23မိူဝ်ႈဢၼ်ၵဝ်ယိုတ်းဢဝ်မိုဝ်းၵဝ်ၶိုၼ်းၼၼ်ႉၸိုင်၊ မႂ်းတၵ်းလႆႈႁၼ်လင်ၵဝ်ၵူၺ်းဢေႃႈ။ ၼႃႈၵဝ်ၸိုင် မႂ်းတၵ်းဢမ်ႇလႆႈႁၼ်၊ ဝႃႈၼင်ႇၼႆဢေႃႈ။

Currently Selected:

ဢွၵ်ႇၵႂႃႇ 33: CBMS

Highlight

Compare

Copy