ဢွၵ်ႇၵႂႃႇ 34
34
ၶႅပ်းမၢၵ်ႇႁိၼ်ထႅင်ႈသွင်ၽႅၼ်ႇ
(တူၺ်း၊ ႁေႃး 10:1-5)
1ၵမ်းၼၼ်ႉ ထႃႇဝရႃႉၽြႃးမီးဢမိင်ႉတီႈမူဝ်းသေႇလႄႈဝႃႈ၊ ထၢၵ်ႇႁဵတ်းၶႅပ်းမၢၵ်ႇႁိၼ်သွင်ၽႅၼ်ႇ ႁႂ်ႈမိူၼ်ၸိူဝ်ႉၼင်ႇၶႅပ်းမၢၵ်ႇႁိၼ်ဢၼ်ဢွၼ်တၢင်းသွင်ၽႅၼ်ႇၼၼ်ႉတႃႉ။ ၵဝ်တၵ်းတႅမ်ႈၵႂၢမ်းဢၼ်ပႃးၵႃႈတီႈၶႅပ်းမၢၵ်ႇႁိၼ်ဢၼ်ဢွၼ်တၢင်း ဢၼ်မႂ်းဢဝ်တႅၵ်ႇပႅတ်ႈၸိူဝ်းၼၼ်ႉ သႂ်ႇဝႆႉၵႃႈၼိူဝ်မၢၵ်ႇႁိၼ်ၽႅပ်ႉဢၼ်ၵမ်းလိုၼ်းဢေႃႈ။- 2မႂ်းမႄးႁႅၼ်းဝႆႉပုၼ်ႈမိူဝ်ႈၽုၵ်ႈၶိင်ႇၵၢင်ၼႂ်ၼၼ်ႉလႄႈ ၶိင်ႇၵၢင်ၼႂ်ၼၼ်ႉၶိုၼ်ႈၵႃႈၼိူဝ်လွႆသီႉၼႃႉလႄႈ ၼႄပျႃးတူဝ်ၸဝ်ႈၵဝ်ႇၵႃႈတီႈၽၢႆႇၼႃႈၵဝ် ၵႃႈတီႈပၢႆၸိၵ်းလွႆၼၼ်ႉတႃႉ။- 3ၽူႈလႂ်ဢမ်ႇလႆႈၶိုၼ်ႈလူၺ်ႈၵၼ်တင်းမႂ်း။ ယႃႇပေႁႂ်ႈလႆႈႁၼ် တူဝ်ၵူၼ်းၵႃႈၼိူဝ်လွႆၼႆႉသေတီႈသေလႅၼ်။ ယႃႇပေႁႂ်ႈၽုင်သူဝ်း ၽုင်ဝူဝ်းလႄႇၵိၼ်ၵႃႈတီႈတိၼ်လွႆ၊ ဝႃႈၼင်ႇၼႆဢေႃႈ။
4ထၢၵ်ႇႁဵတ်းၶႅပ်းမၢၵ်ႇႁိၼ်ၽႅပ်ႉသွင်ၽႅၼ်ႇဢၼ်မိူၼ်ၸိူဝ်ႉၼင်ႇ ၶႅပ်းမၢၵ်ႇႁိၼ်ဢၼ်ဢွၼ်တၢင်းၼၼ်ႉသေယဝ်ႉ၊ မူဝ်းသေႇလုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ ဢဝ်မိုဝ်းယိပ်းၵမ်ဢဝ်ၶႅပ်းမၢၵ်ႇႁိၼ်သွင်ၽႅၼ်ႇၼၼ်ႉယူႇသေလႄႈၶိုၼ်ႈၵႃႈၼိူဝ်လွႆသီႉၼႃႉ ၸွမ်းၵႃႈၼင်ႇဢၼ်ထႃႇဝရႃႉၽြႃး မီးဢမိင်ႉဝႆႉၼၼ်ႉဢေႃႈ။
5ထႃႇဝရႃႉၽြႃးယူႇၵႃႈၼႂ်းမွၵ်ႇၵုမ်ႈသေလႄႈ လူင်းမႃးၸုၵ်းယူႇၵႃႈတီႈႁိမ်းမၼ်းၵႃႈတီႈၼၼ်ႈယူႇ ႁွင်ႉမွၵ်ႇႁွင်ႉလၢတ်ႈၼႃႇမႃႉၸိုဝ်ႈသဵင်ထႃႇဝရႃႉၽြႃးယူႇဢေႃႈ။- 6ထႃႇဝရႃႉၽြႃးၵၢႆၵႂႃႇၵႃႈတီႈၽၢႆႇၼႃႈမၼ်းလႄႈ ႁွင်ႉမွၵ်ႇႁွင်ႉလၢတ်ႈလႄႈဝႃႈ၊ ထႃႇဝရႃႉၽြႃး၊ ထႃႇဝရႃႉၽြႃး ၽြႃးပဵၼ်ၸဝ်ႈဢၼ်ပျေႉၸုမ်ႇတင်းမႅတ်ႈတႃႇၵရူႉၼႃႇ ဢိၵ်ႇတင်းတၢင်းဢၼ်ႁဵတ်းၵျေးၸူး၊ ဢၼ်ၸႂ်ယႂ်ႇၸႂ်ယၢဝ်း၊ ဢၼ်လိူင်ႇတဵမ်ဝႆႉတင်း တၢင်းဢၼ်ႁဵတ်းၵျေးၸူး ဢိၵ်ႇတင်းတၢင်းဢၼ်ပႂ်ႉသဵတ်ႈၸႃႇ၊- 7ဢၼ်ပႂ်ႉၵျေးၸူးတြႃးတၢင်းဢၼ် ဢဵတ်းလူတီႈၵူၼ်းပဵၼ်မိုၼ်ႇပဵၼ်သႅၼ်၊ ဢၼ်ပွႆႇလွတ်ႈတၢင်းဢၼ်ၵမ်ၵျၢင်ႉဢႃႉထမ်ႇမႃႉ၊ တၢင်းဢၼ်ပူၼ်ႉလိူဝ်တြႃးၸဝ်ႈ ဢိၵ်ႇတင်းဢပႅတ်ႈလႄႈ ဢမ်ႇပွႆႇဢမ်ႇလွတ်ႈလၢႆလၢႆလွၵ်ႇလွၵ်ႇ၊ ဢၼ်ၸီႇယၢင်ႇတႅၼ်းပၼ်ဢပႅတ်ႈပေႃႈ တီႈလုၵ်ႈလၢင်းတင်းလၢႆ တေႃႇထိုင်ႁွတ်ႈၸူဝ်ႈလုၵ်ႈပၢၼ်လၢၼ်သိုပ်ႇတႃႉတီႉယႃႉ သိုပ်ႇၸတုၵ်ႉထႃႉၼၼ်ႉဢေႃႈ၊ ဝႃႈၼင်ႇၼႆဢေႃႈ။- 8မူဝ်းသေႇၵေႃႈ ႁိပ်ႈၼႅတ်ႈ ၶုပ်ႉမူပ်ႇၵႃႈၼိူဝ်လိၼ်လႄႈ ၵူဝ်းၵႂၢႆႇယူႇသေလႄႈ လဝ်ႊလၢတ်ႈလႄႈဝႃႈ၊- 9ဢူဝ်းၸဝ်ႈၽြႃးတီႈၶႃႈ၊ ပေႃးၶႃႈၸဝ်ႈလႆႈထူပ်းၵျေးၸူးသိုဝ်ႈၼႃႈတႂ်ႈတႃ ၸဝ်ႈႁဝ်းတေႃႈလဵဝ်ၼႆႉၸိုင်၊ ၸဝ်ႈၽြႃးၶႅၼ်းတေႃႈၵႂႃႇၸွမ်းၵႃႈၼႂ်းၶိုင်ႈၵၢင် ၶႃႈၸဝ်ႈႁဝ်းၶဝ်သေၵမ်းတီႈၶႃႈ၊ ၶႃႈၸဝ်ႈတွင်းပၢၼ်ႇတီႈၶႃႈဢေႃႈ။ ပိၵ်ႉသမ်ႉၵူၼ်းမဵဝ်းၼႆႉ ပဵၼ်မဵဝ်းဢၼ်လမ်းၶေႃးၵႅၼ်ႇၶႅင်သေၵေႃႈ၊ ပွႆႇတူႉၸရိူၵ်ႈဢပႅတ်ႈၶႃႈၸဝ်ႈႁဝ်းၶဝ် လွတ်ႈလႄႈသိမ်းဢဝ်ၶႃႈၸဝ်ႈႁဝ်းၶဝ် ႁႂ်ႈပဵၼ်ဢမူၺ်ႇဢုၵ်ႉၸႃႇၸဝ်ႈႁဝ်းသေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ၊
ပတီႉၺိၺ်ႇၸဝ်ႈဢၼ်ပၼ်ထႅင်ႈပွၵ်ႈၼိုင်ႈ
(တူၺ်း၊ ဢွၵ်ႇ 23:14-19။ ႁေႃး 7:1-5။ ႁေႃး 16:1-17)
10မၼ်းၸဝ်ႈၵေႃႈလၢတ်ႈလႄႈဝႃႈ၊ တူၺ်းလူး၊ ၵဝ်ႁဵတ်းပတီႉၺိၺ်ႇဢေႃႈ။ ၵဝ်တၵ်းႁဵတ်းလွင်ႈတၢင်းဢၼ်လီဢၢမ်းတင်းလၢႆ ဢၼ်ဢမ်ႇတွၼ်ႉႁဵတ်းၵႃႈၼႂ်းမဵဝ်းၵူၼ်းၵႃႈၼိူဝ်လိၼ်မိူင်းၼႆႉသေပွၵ်ႈၼၼ်ႉ ၵႃႈတီႈၽၢႆႇၼႃႈၵူၼ်းမဵဝ်းမႂ်းတင်းသဵင်ႈတင်းလူင်ဢေႃႈ။ ၵူၼ်းတင်းသဵင်ႈတင်းလူင် ဢၼ်မီးယူႇလူၺ်ႈၵၼ်တင်းမႂ်းၸိူဝ်းၼၼ်ႉတၵ်းလႆႈႁၼ် လွင်ႈတၢင်းဢၼ်ထႃႇဝရႃႉၽြႃးတၵ်းႁဵတ်းၼၼ်ႉဢေႃႈ။ လွင်ႈမၼ်းၸမ်ႉ လွင်ႈတၢင်းဢၼ်ၵဝ်တၵ်းႁဵတ်းပုၼ်ႈသူၼၼ်ႉ ပဵၼ်လွင်ႈတၢင်းဢၼ်လီၵူဝ်လီႁႄဢေႃႈ။- 11မၢတ်ႈတွင်းၵႂၢမ်းဢၼ်ၵဝ်သင်ႇလၢတ်ႈဝႆႉ ဝၼ်းမိူဝ်ႈၼႆႉၼၼ်ႉတႃႉ။ ၵဝ်တၵ်းႁေႃႈၵူၼ်းဢႃႇမေႃးရီႉ၊ ၵူၼ်းၶႃႇၼၼီႉ၊ ၵူၼ်းႁိတ်ႉတီႉ၊ ၵူၼ်းၽေႇရၸီႉ၊ ၵူၼ်းႁီႉဝီႉ၊ ၵူၼ်းယေႇပူႉသီႉၸိူဝ်းၼၼ်ႉဢွၵ်ႇသေၵႃႈတီႈၽၢႆႇၼႃႈမႂ်းဢေႃႈ။- 12လွင်ႈၼင်ႇႁိုဝ် သူတၵ်းဢမ်ႇႁဵတ်းမိၵ်ႉသႃႇႁႃယႃႉတၢင်းဢၼ်ထုၵ်ႇၵၼ်တင်းၵူၼ်းဝၢၼ်ႈၵူၼ်းမိူင်း တီႈဢၼ်မႂ်းၵႂႃႇၼၼ်ႉလႄႈ ႁႂ်ႈပဵၼ်လွင်ႈဢၼ်တၵ်းၶီႈလိုတ်းမႅၼ်ႈလႄႈလူမ်ႉၵႃႈတီႈမႂ်းၸိုင် တူဝ်မႂ်းႁဵတ်းသတီႉတီႈတူဝ်မႂ်းတႃႉ။- 13သူတၵ်းလႆႈယႃႉၽဵဝ်ႈယိတ်ႈပလၢင်ႇၶဝ်ၸိူဝ်းၼၼ်ႉပႅတ်ႈဢေႃႈ။ ရုၵ်ႈထူႉသၢင်းထူႉၶဝ်ၸိူဝ်းၼၼ်ႉၵေႃႈ သူတၵ်းလႆႈဢဝ်ႁၵ်းႁဵၵ်းတႅၵ်ႇလႅဝ်ပႅတ်ႈဢေႃႈ။ တူၼ်ႈဢႃႇသရႃႉၶဝ်ၸိူဝ်းၼၼ်ႉၵေႃႈ တၵ်းလႆႈၽၼ်းလူမ်ႉပႅတ်ႈဢေႃႈ။- 14မႂ်းဢမ်ႇလႆႈၵူဝ်းၵႂၢႆႇၽြႃးတၢင်ႇသူႇတၢင်ႇပႃး။ ထႃႇဝရႃႉၽြႃးဢၼ်လႆႈၸိုဝ်ႈလႆႈသဵင်ဝႃႈ၊ ယုမ်ႇငၢႆႈလွင်ႈဢၼ် မီးဢပႅတ်ႈ၊ ဝႃႈၼင်ႇၼႆၼၼ်ႉ ပဵၼ်ၽြႃးပဵၼ်ၸဝ်ႈဢၼ်ယုမ်ႇငၢႆႈလွင်ႈဢၼ်မီးဢပႅတ်ႈဢေႃႈ။- 15ၵူဝ်မႂ်းတၵ်းႁဵတ်းမိၵ်ႉသႃႇႁႃယႃႉတၢင်းဢၼ်ထုၵ်ႇၵၼ်တင်းၵူၼ်းဝၢၼ်ႈၵူၼ်းမိူင်းၼၼ်ႉလႄႈ၊ မိူဝ်ႈဢၼ်ၶဝ်ႁဵတ်းတၢင်းဢၼ်ၽိတ်းပိူင်ႈလူၺ်ႈၵၼ်တင်းၽြႃးၶဝ်လႄႈ ပုၵ်ႈၸေႃႇယိတ်ႈတီႈၽြႃးၶဝ်ၸိူဝ်းၼၼ်ႉၸိုင်၊ တၵ်းႁွင်ႉဢဝ်မႂ်းလႄႈ မႂ်းၵေႃႈတၵ်းၵိၼ်တူဝ်ယိတ်ႈၼၼ်ႉ၊- 16ဢိၵ်ႇတင်းၵူဝ်မႂ်းတၵ်းဢဝ်လုၵ်ႈယိင်းၶဝ် ပၼ်တီႈလုၵ်ႈၸၢႆးမႂ်းလႄႈ လုၵ်ႈယိင်းၸိူဝ်းၼၼ်ႉတၵ်းႁဵတ်းတၢင်းဢၼ်ၽိတ်းပိူင်ႈလူၺ်ႈၵၼ်တင်းၽြႃးၶဝ်လႄႈ ႁႂ်ႈလုၵ်ႈၸၢႆးမႂ်းတင်းလၢႆ လႆႈၽိတ်းပိူင်ႈလူၺ်ႈၵၼ်တင်းၽြႃးၸိူဝ်းၼၼ်ႉဢေႃႈ။- 17ဢမ်ႇလႆႈသွၼ်းလေႃႇႁဵတ်းၽြႃးပုၼ်ႈမႂ်း။
18မႂ်းတၵ်းလႆႈၶၢမ်ႇပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈဢေႃႈ။ ၸဵတ်းဝၼ်းတဵမ်တဵမ် မႂ်းတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၸွမ်းၵႃႈၼင်ႇဢၼ် ၵဝ်ပိင်းၺၢပ်ႈဝႆႉယဝ်ႉၼၼ်ႉ ၵႃႈတီႈၶိင်ႇဢၼ် ၵဝ်ၶၢၼ်းဝႆႉၼၼ်ႉၼႂ်းလိူၼ်ဢပီႉပႃႉၼၼ်ႉဢေႃႈ။ လွင်ႈမၼ်းၸမ်ႉ ၼႂ်းလိူၼ်ဢပီႉပႃႉၼၼ်ႉ မႂ်းဢွၵ်ႇသေၵႃႈၼႂ်းမိူင်းဢေႇၵိပ်ႉတူႉမႃးဢေႃႈ။- 19လုၵ်ႈၸၢႆးတူၼ်ႈတင်းသဵင်ႈတင်းလူင် ပဵၼ်ဢုၵ်ႉၸႃႇၵဝ်ဢေႃႈ။ ၼႂ်းတရိၵ်ႈသၢၼ်ႇမႂ်းတင်းလၢႆၵေႃႈ၊ ဝူဝ်းသေဢမ်ႇဝႃႈ၊ သူဝ်းသေဢမ်ႇဝႃႈ၊ ၵႃႈဢၼ်ပဵၼ်လုၵ်ႈၸၢႆးတူၼ်ႈ တင်းသဵင်ႈတင်းလူင်ၼၼ်ႉ ပဵၼ်ဢုၵ်ႉၸႃႇၵဝ်ဢေႃႈ။- 20ၼႂ်းဝႃႈၼၼ်သေၵေႃႈ လုၵ်ႈၸၢႆးတူၼ်ႈလီႈၸိုင်၊ မႂ်းတၵ်းလႆႈဢဝ်တင်းသူဝ်းဢွၼ်ႇထုတ်ႇဢဝ်ဢေႃႈ။ ပေႃးမႂ်းဢမ်ႇၶႂ်ႈ ထုတ်ႇဢဝ်ၸိုင် တၵ်းလႆႈႁၵ်းၶေႃးလီႈဢွၼ်ႇၼၼ်ႉပႅတ်ႈဢေႃႈ။ ၵႃႈဢၼ်ပဵၼ်လုၵ်ႈၸၢႆးတူၼ်ႈမႂ်းတင်းသဵင်ႈတင်းလူင်ၸမ်ႉ၊ မႂ်းတၵ်းလႆႈထုတ်ႇဢဝ်ဢေႃႈ။ ၽူႈလႂ်ဢမ်ႇလႆႈမႃးၸူးၵႃႈတီႈၵဝ်တိၼ်လၢႆမိုဝ်းပဝ်ႇ။
21ႁူၵ်းဝၼ်းတဵမ်တဵမ် မႂ်းတၵ်းလႆႈႁဵတ်းတၢင်းႁဵတ်းဢေႃႈ။ ဝၼ်းသတ်ႉတမႃႉၼၼ်ႉၸမ်ႉ၊ မႂ်းတၵ်းလႆႈယူႇၼိမ်ၼိမ်ဢေႃႈ။ ပဵၼ်ၶိင်ႇၵႃႇလႃႉ ဢၼ်ႁဵတ်းႁႆႊႁဵတ်းၼႃးသေဢမ်ႇဝႃႈ၊ ပဵၼ်ၶိင်ႇၵႃႇလႃႉ ဢၼ်သိမ်းဢဝ်မၢၵ်ႇဢဝ်ႁူင်းသေဢမ်ႇဝႃႈ၊ မႂ်းတၵ်းလႆႈယူႇၼိမ်ၼိမ်ဢေႃႈ။
22မႂ်းတၵ်းလႆႈၶၢမ်ႇပွႆးၸဵတ်းသတၢင်းဢၼ်ဝႃႈ ၶိင်ႇၵႃႇလႃႉ ဢၼ်သိမ်းဢဝ်ၶဝ်ႈၵျုင်ႇဢၼ်ပဵၼ်မၢၵ်ႇပဵၼ်ႁူင်းဢွၼ်တၢင်းၼၼ်ႉၼၼ်ႉ ဢိၵ်ႇတင်းပွႆးဢၼ်သိမ်းဢဝ်မၢၵ်ႇဢဝ်ႁူင်းဝႆႉမိူဝ်ႈဢၼ်ပီႊပုတ်ႈပီႊလၢႆႈၼၼ်ႉဢေႃႈ။
23ၼႂ်းမႂ်းၵႃႈပဵၼ်ၽူႈၸၢႆးတင်းသဵင်ႈတင်းလူင် တၵ်းလႆႈဢွၼ်ၵၼ်ၼႄပျႃး ၼႃႈတူဝ်ၸဝ်ႈၵဝ်ႇၵႃႈတီႈၽၢႆႇၼႃႈၸဝ်ႈၽြႃးပဵၼ်ၸဝ်ႈဢၼ်ဝႃႈ ၽြႃးပဵၼ်ၸဝ်ႈၵူၼ်းမဵဝ်းဢီႉသရေႇလႃႉတင်းလၢႆၼၼ်ႉ ယေႈပီႊသၢမ်ပွၵ်ႈဢေႃႈ။
24ၵဝ်တၵ်းႁေႃႈၵူၼ်း တၢင်ႇၸိူဝ်ႉတၢင်ႇၶိူဝ်းတင်းလၢႆ ဢွၵ်ႇသေၵႃႈတီႈၽၢႆႇၼႃႈမႂ်းလႄႈ ႁႂ်ႈတီႈဢၼ်မႂ်းယူႇၼၼ်ႉ ယႂ်ႇလီၵႂၢင်ႈလီဢေႃႈ။ မိူဝ်ႈဢၼ်မႂ်းၵႂႃႇၼႄပျႃးၼႃႈမႂ်းၵႃႈတီႈၽၢႆႇၼႃႈထႃႇဝရႃႉၽြႃး ၽြႃးပဵၼ်ၸဝ်ႈမႂ်း ယေႈပီႊသၢမ်ပွၵ်ႈၼၼ်ႉၸိုင်၊ ၽူႈလႂ်ဢမ်ႇလႆႈၸႂ်ၸပ်းၸႂ်ၸွႆးၵႂၢၵ်ႈလိၼ်မႂ်း။
25မႂ်းဢမ်ႇလႆႈဢဝ်လိူတ်ႈတူဝ်ယိတ်ႈၵဝ် လေႃးၵၼ်တင်းၸိူဝ်ႉပႅင်ႈလႄႈ ပုၵ်ႈၸေႃႇတူဝ်ယိတ်ႈ။ ပွႆးပႃႉသၶႃႇၵေႃႈ ဢမ်ႇလႆႈဝႆႉၵိုတ်း တေႃႇထိုင်ႁွတ်ႈ ၶိင်ႇၵၢင်ၼႂ်။
26မႂ်းတၵ်းလႆႈဢဝ်ဢၼ်ဢွၼ်တၢင်းသုတ်းပိူၼ်ႈ ၵႃႈၼႂ်းမၢၵ်ႇၼႂ်းႁူင်း ဢၼ်မၢၵ်ႇဢွၼ်တၢင်းၵႃႈတီႈလိၼ်မႂ်းၼၼ်ႉ မႃးသႂၢင်းၵႃႈၼႂ်းႁိူၼ်းထႃႇဝရႃႉၽြႃး ၽြႃးပဵၼ်ၸဝ်ႈမႂ်းဢေႃႈ။ မႂ်းဢမ်ႇလႆႈဢဝ်ပႄႉဢွၼ်ႇတူမ်ႈႁုင်ၼႂ်းၼမ်ႉၼူမ်းမႄႈမၼ်း၊ ဝႃႈၼင်ႇၼႆဢေႃႈ။- 27ထႃႇဝရႃႉၽြႃးသမ်ႉလၢတ်ႈတီႈမူဝ်းသေႇထႅင်ႈလႄႈဝႃႈ၊ တႅမ်ႈၵႂၢမ်းၸိူဝ်းၼႆႉဝႆႉတႃႉ။ ၵဝ်ႁဵတ်းပတီႉၺိၺ်ႇလူၺ်ႈၵၼ်တင်းမႂ်းဢိၵ်ႇတင်းၵူၼ်းမဵဝ်းဢီႉသရေႇလႃႉတင်းလၢႆၸွမ်းၵႃႈၼင်ႇဢၼ် ၵႂၢမ်းၸိူဝ်းၼႆႉမႃးၼၼ်ႉဢေႃႈ၊ ဝႃႈၼင်ႇၼႆဢေႃႈ။- 28မၼ်းၼၼ်ႉယင်းဢမ်ႇၵိၼ်တၢင်းၵိၼ်တၢင်းၶူပ်း၊ ယင်းဢမ်ႇၵိၼ်ၼမ်ႉလႄႈ ယူႇၵႃႈတီႈၼၼ်ႈလူၺ်ႈၵၼ်တင်း ထႃႇဝရႃႉၽြႃး သီႇသိပ်းဝၼ်းတဵမ်တဵမ်ဢေႃႈ။ မၼ်းၸဝ်ႈတႅမ်ႈၵႂၢမ်းပတီႉၺိၺ်ႇဢၼ်ဝႃႈ၊ ပိင်းၺၢပ်ႈသိပ်းပိူင်ၼၼ်ႉ ဝႆႉၵႃႈၼိူဝ်ၶႅပ်းမၢၵ်ႇႁိၼ်ၸိူဝ်းၼၼ်ႉဢေႃႈ။
မူဝ်းသေႇၶိုၼ်းလူင်းလွႆသီႉၼႃႉမႃး
29မိူဝ်ႈဢၼ်မူဝ်းသေႇ ယိပ်းၵမ်ဢဝ်ၶႅပ်းမၢၵ်ႇႁိၼ် ၶိူင်ႈဢၼ်ၶၢမ်ႇသၢၵ်ႈသေႇသွင်ၽႅၼ်ႇၼၼ်ႉလႄႈ လုၵ်ႉသေၵႃႈၼိူဝ် လွႆသီႉၼႃႉ လူင်းမႃးၼၼ်ႉၸိုင်၊ မူဝ်းသေႇဢမ်ႇႁူႉလွင်ႈဢၼ်ၽိဝ်ၼိူဝ်ႉၽိဝ်ၼင်ၼႃႈမၼ်း ႁိူဝ်ႈႁိူင်းပိူင်းသႂ်ၵွပ်ႈပိူဝ်ႈဢၼ် မၼ်းၸဝ်ႈလၢတ်ႈတေႃႇမၼ်းၼၼ်ႉ။
30မိူဝ်ႈဢၼ်ဢႃႇရုၼ်ႇဢိၵ်ႇတင်းၵူၼ်းမဵဝ်းဢီႉသရေႇလႃႉတင်းလၢႆ ႁၼ်မူဝ်းသေႇၼၼ်ႉၸိုင်၊ ၵွပ်ႈပိူဝ်ႈဢၼ်ၽိဝ်ၼိူဝ်ႉၽိဝ်ၼင်ၼႃႈမၼ်း ႁိူဝ်ႈႁိူင်းပိူင်းသႂ်ဝႆႉၼၼ်ႉလႄႈ၊ ၶဝ်ဢမ်ႇႁတ်းသုတ်ႉၸပ်းသုတ်ႉၸူးတီႈမၼ်း။- 31မူဝ်းသေႇႁွင်ႉဢဝ်ၶဝ်လႄႈ၊ ဢႃႇရုၼ်ႇတင်းၵူၼ်းယႂ်ႇၵူၼ်းလူင်ပရဵၵ်ႈသၢတ်ႈတင်းလၢႆၼၼ်ႉ သုတ်ႉၸပ်းသုတ်ႉၸူးတီႈမၼ်းသေယဝ်ႉ၊ မူဝ်းသေႇလၢတ်ႈတေႃႇၶဝ်ၼၼ်ႉဢေႃႈ။- 32လိုၼ်းၼၼ်ႉ ၵူၼ်းမဵဝ်းဢီႉသရေႇလႃႉတင်းသဵင်ႈတင်းလူင် သုတ်ႉၸပ်းသုတ်ႉၸူးလႄႈ မၼ်းမွၵ်ႇလၢတ်ႈၵႃႈဢၼ်ထႃႇဝရႃႉၽြႃးမီးဢမိင်ႉဝႆႉ ၵႃႈၼိူဝ်လွႆသီႉၼႃႉၼၼ်ႉတီႈၶဝ်ဢေႃႈ။- 33မူဝ်းသေႇၼၼ်ႉ ၸူဝ်ႈဢၼ်မၼ်းယင်းတိုၵ်ႉႁေႃးလၢတ်ႈတီႈၶဝ်ယူႇလႄႈ ဢမ်ႇပႆႇယဝ်ႉပႆႇတူဝ်ႈၼၼ်ႉၸိုင်၊ ဢဝ်ၶိူင်ႈဢၼ်ႁူမ်ႇၼႃႈ ႁူမ်ႇၼႃႈမၼ်းဝႆႉဢေႃႈ။- 34မိူဝ်ႈဢၼ်မူဝ်းသေႇ ၶဝ်ႈၸူးၵႃႈတီႈၽၢႆႇၼႃႈထႃႇဝရႃႉၽြႃး ႁႂ်ႈလႆႈလဝ်ႊလၢတ်ႈတီႈမၼ်းၸဝ်ႈၼၼ်ႉၸိုင်၊ မၼ်းထွတ်ႇၶိူင်ႈ ဢၼ်ႁူမ်ႇၼႃႈၼၼ်ႉဝႆႉတေႃႇထိုင်ႁွတ်ႈ မိူဝ်ႈဢၼ်မၼ်းဢွၵ်ႇမႃးၼၼ်ႉဢေႃႈ။ မၼ်းသမ်ႉဢွၵ်ႇမႃးလႄႈ မွၵ်ႇလၢတ်ႈလွင်ႈတၢင်းဢၼ် မၼ်းလႆႈၶၢမ်ႇဢမိင်ႉၸဝ်ႈၼၼ်ႉ တီႈၵူၼ်းမဵဝ်းဢီႉသရေႇလႃႉတင်းလၢႆဢေႃႈ။- 35မိူဝ်ႈဢၼ်ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ ႁၼ်ၼႃႈမူဝ်းသေႇလွင်ႈဢၼ်ၽိဝ်ၼိူဝ်ႉၽိဝ်ၼင်ၼႃႈမူဝ်းသေႇ ႁိူဝ်ႈႁိူင်းပိူင်းသႂ်ဝႆႉၼၼ်ႉၸိုင်၊ မူဝ်းသေႇသမ်ႉဢဝ်ၶိူင်ႈဢၼ်ႁူမ်ႇၼႃႈ ႁူမ်ႇၼႃႈမၼ်းဝႆႉတေႃႇထိုင်ႁွတ်ႈ မိူဝ်ႈဢၼ်မၼ်း သမ်ႉၶိုၼ်းၶဝ်ႈၵႃႈၼႂ်းမူဝ်းၵႃႇၸဝ်ႈ ႁႂ်ႈလႆႈလၢတ်ႈတေႃႇမၼ်းၸဝ်ႈၼၼ်ႉဢေႃႈ။
Currently Selected:
ဢွၵ်ႇၵႂႃႇ 34: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
