ဢွၵ်ႇၵႂႃႇ 35
35
ထုင်းတြႃးဢၼ်တၵ်းလႆႈပႂ်ႉဝၼ်းၵမ်သိၼ်
1 မူဝ်းသေႇႁႂ်ႈပရဵၵ်ႈသၢတ်ႈ ၵူၼ်းမဵဝ်းဢီႉသရေႇလႃႉ တင်းသဵင်ႈတင်းလူင် ၸူႉၵၼ်တုမ်ၵၼ်သေလႄႈ မွၵ်ႇလၢတ်ႈတီႈၶဝ်လႄႈဝႃႈ၊ ၵႂၢမ်းဢၼ်ထႃႇဝရႃႉၽြႃးမီးဢမိင်ႉဝႆႉတီႈသူ ႁႂ်ႈသူလႆႈၵမ်လႆႈၵျၢင်ႉၸမ်ႉ၊- 2ႁူၵ်းဝၼ်းတဵမ်တဵမ်တၵ်းလႆႈဢွၼ်ၵၼ်ႁဵတ်းတၢင်းႁဵတ်းဢေႃႈ။ ဝၼ်းသတ်ႉတမႃႉၸမ်ႉ၊ တၵ်းလႆႈပဵၼ်ဝၼ်းဢၼ်မူတ်းၸၢင်ႇတီႈသူ၊ ဝၼ်းၵမ်သိၼ် ဢၼ်တၵ်းလႆႈယူႇၼိမ်ၼိမ် ပုၼ်ႈထႃႇဝရႃႉၽြႃးဢေႃႈ။ ၵေႃႉဢၼ်ႁဵတ်းတၢင်းႁဵတ်း ၼႂ်းဝၼ်းၼၼ်ႉၸမ်ႉ၊ တၵ်းလႆႈၶၢမ်ႇတၢင်းတၢႆဢေႃႈ။- 3ၼႂ်းဝၼ်းဢၼ်ၵမ်သိၼ်သူဢမ်ႇလႆႈသႂ်ႇၽႆး ၵႃႈၼႂ်းတီႈဢၼ်သူယူႇၵူႈတီႈၵူႈလႅၼ်ၼၼ်ႉ၊ ဝႃႈၼင်ႇၼႆဢေႃႈ။
လွင်ႈတၢင်းဢၼ်သၢၵ်ႈလူႇပုၼ်ႈသုမ်ႉထဵင်ၸဝ်ႈ
(တူၺ်း၊ ဢွၵ်ႇ 25:1-29)
4ၵမ်းၼၼ်ႉ မူဝ်းသေႇသမ်ႉမွၵ်ႇလၢတ်ႈတီႈ ပရဵၵ်ႈသၢတ်ႈၵူၼ်းမဵဝ်းဢီႉသရေႇလႃႉတင်းသဵင်ႈတင်းလူင်လႄႈဝႃႈ၊ ဢၼ်ထႃႇဝရႃႉၽြႃး မီးဢမိင်ႉၸဝ်ႈဝႆႉၸမ်ႉ၊- 5ၼႂ်းသူၼႆႉ ဢွၼ်ၵၼ်မႄးႁႅၼ်းတၢင်းလူႇတၢင်းတၢၼ်းပုၼ်ႈထႃႇဝရႃႉၽြႃးဝႆႉတႃႉ။ ႁႂ်ႈၶဝ်ၵႃႈဢၼ်မီး ၸႂ်ၸေႇတၼႃႇတင်းသဵင်ႈတင်းလူင်ၼၼ်ႉ ဢွၼ်ၵၼ်ဢဝ်တၢင်းလူႇတၢင်းတၢၼ်းပုၼ်ႈထႃႇဝရႃႉၽြႃး ဢၼ်ဝႃႈၶမ်း၊ ငိုၼ်း၊ တွင်းလိူင်၊- 6ၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင်၊ ပိၵ်ႈၶျေႃး၊ ၶူၼ်ပႄႉ၊- 7ၼင်သူဝ်းဢၼ်ယွမ်ႉလႅင်၊ ၼင်တႁႃႇသႃႉ၊ မႆႉဢၵႃႇသႃႉ၊- 8ၼမ်ႉမၼ်းပုၼ်ႈဢၼ်တၵ်းတႆႈ၊ ၼၢမ်ႇသႃႇပုၼ်ႈဢၼ်တၵ်းၽေႃႇႁဵတ်းၼမ်ႉမၼ်းဢၼ်တႃး၊ ၼၢမ်ႇသႃႇပုၼ်ႈဢၼ်တၵ်းၽေႃႇႁဵတ်း ဢၼ်ႁွမ်ဢၼ်ႁူၺ်းပုၼ်ႈဢၼ်တၵ်းတုတ်ႇၽႆး၊- 9သႅင်ၸၢႆးၶႃးယွတ်ႇ ဢိၵ်ႇတင်းသႅင်မျၢတ်ႈပုၼ်ႈဢၼ်တၵ်းၶပ်ႉၸီႇ ၵႃႈတီႈသိူဝ်ႈသုပ်းတင်းၶိူင်ႈဝႆၼႃႈဢူၵ်းၼၼ်ႉမႃးတႃႉ။
ၶိူင်ႈပိူင်ပုၼ်ႈသုမ်ႉထဵင်ၸဝ်ႈ
(တူၺ်း၊ ဢွၵ်ႇ 39:34-43)
10ၼႂ်းသူၼႆႉ ႁႂ်ႈၶဝ်ၵႃႈဢၼ်ၸႂ်လၵ်းၸႂ်လႅမ်တင်းသဵင်ႈတင်းလူင်မႃးလႄႈ ဢွၼ်ၵၼ်ႁဵတ်းၵႃႈဢၼ်ထႃႇဝရႃႉၽြႃး သင်ႇလၢတ်ႈဝႆႉဢၼ်ဝႃႈ၊- 11သုမ်ႉထဵင်ၸဝ်ႈတင်းမူဝ်းၵႃႇမၼ်း၊ ဢၼ်ႁူမ်ႇမၼ်း၊ ၶေႃမၼ်းလႂ်၊ ပႅၼ်ႈမၼ်းလႂ်၊ သႄႈမၼ်းလႂ်၊ သဝ်မၼ်းလႂ်၊ တီႈသုပ်းတိၼ်မၼ်းလႂ်ၸိူဝ်းၼၼ်ႉ၊- 12ဢိၵ်ႇတင်းတိူၵ်ႈတႃႇၸဝ်ႈ တင်းၵၢၼ်းႁၢပ်ႇမၼ်းလႂ်၊ ပလၢင်ႇတီႈၽေႇဢပႅတ်ႈၸဝ်ႈ၊ ၽႃႈၵင်ႈဢၼ်တၵ်းလႆႈၵင်ႈၼၼ်ႉ၊- 13ဢိၵ်ႇတင်းၶူင်ႇတီႈၵိၼ်တင်းၵၢၼ်းႁၢပ်ႇမၼ်းလႂ်၊ ၶိူင်ႈမၼ်း ၵႃႈမီးတင်းသဵင်ႈတင်းလူင် တင်းၶဝ်ႈမုၼ်းၽၢႆႇၼႃႈၸဝ်ႈ၊- 14ဢိၵ်ႇတင်းၶူင်ႇတီႈတႆႈၽႆး ပုၼ်ႈဢၼ်တၵ်းတႆႈၽႆးတင်းၶိူင်ႈမၼ်းလႂ်၊ ဝၢၼ်ႇတႆႈၽႆးမၼ်းလႂ်၊ ၼမ်ႉမၼ်းပုၼ်ႈဢၼ်တၵ်းတႆႈမၼ်း၊- 15ဢိၵ်ႇတင်းယိတ်ႈပလၢင်ႇတီႈဢၼ်တၵ်းတုတ်ႇၽႆးၼၢမ်ႇသႃႇ တင်းၵၢၼ်းႁၢပ်ႇမၼ်းလႂ်၊ ၼမ်ႉမၼ်းပုၼ်ႈဢၼ်တၵ်းတႃး၊ ၼၢမ်ႇသႃႇဢၼ်ႁွမ်ဢၼ်ႁူၺ်း၊ ၽႃႈၵင်ႈပုၼ်ႈဢၼ်တၵ်းၵင်ႈ ၵႃႈတီႈၽၵ်းတူသုမ်ႉထဵင်ၸဝ်ႈ၊- 16ဢိၵ်ႇတင်းယိတ်ႈပလၢင်ႇတီႈဢၼ်တုတ်ႇၽႆး တူဝ်ယိတ်ႈတင်းတႃၶႃႇ တွင်းလိူင်မၼ်း၊ ၵၢၼ်းႁၢပ်ႇမၼ်းလႂ်၊ ၶိူင်ႈမၼ်းၵႃႈမီးတင်းသဵင်ႈတင်းလူင်၊ ၵွၵ်းလူင်တင်းတိၼ်မၼ်း၊- 17ဢိၵ်ႇတင်းၽႃႈၵင်ႈဝၢင်းသုမ်ႉထဵင်ၸဝ်ႈလႂ်၊ သဝ်မၼ်းလႂ်၊ တီႈသုပ်းတိၼ်မၼ်းလႂ်၊ ၽႃႈၵင်ႈပုၼ်ႈဢၼ်တၵ်းၵင်ႈၽၵ်းတူဝၢင်း၊- 18ဢိၵ်ႇတင်းလၵ်းသုမ်ႉထဵင်ၸဝ်ႈလႂ်၊ လၵ်းဢၼ်ၸၢပ်ႈသႅင်ႇၵၼ်တင်းဝၢင်းမၼ်းလႂ်၊ ၸိူၵ်ႈမၼ်းလႂ်၊- 19ဢိၵ်ႇတင်းၶူဝ်းၼုင်ႈၶူဝ်းမႆ ပုၼ်ႈဢၼ်တၵ်းၵိုတ်ႉႁၢပ်ႇဢမူႉၸဝ်ႈ ၵႃႈတီႈထႃႇၼႃႉတီႈမူတ်းၸၢင်ႇ၊ ၶူဝ်းၼုင်ႈၶူဝ်းမႆဢၼ်မူတ်းၸၢင်ႇ ပုၼ်ႈဢၼ်ယိတ်ႈပရေႃးႁဵၵ်ႈဢႃႇရုၼ်ႇ တင်းလုၵ်ႈၸၢႆးမၼ်းတင်းလၢႆ တၵ်းၼုင်ႈတၵ်းမႆ ၼႂ်းမိူဝ်ႈဢၼ် ၶဝ်ပွင်ႁဵတ်းဢမူႉ ယိတ်ႈပရေႃးႁဵၵ်ႈၼၼ်ႉဢေႃႈ၊ ဝႃႈၼင်ႇၼႆဢေႃႈ။
20ပရဵၵ်ႈသၢတ်ႈၵူၼ်းမဵဝ်းဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်ဢွၵ်ႇသေၵႃႈတီႈမူဝ်းသေႇလႄႈ၊- 21ၵေႃႉဢၼ်ႁူဝ်ၸႂ်မၼ်း တိုၵ်းယူင်းမၼ်း၊ ၵေႃႉဢၼ်မီးၸႂ်ၸေႇတၼႃႇ ၵႃႈမီးတင်းသဵင်ႈတင်းလူင် ဢွၼ်ၵၼ်ပႃးဢဝ်တၢင်းလူႇတၢင်းတၢၼ်းပုၼ်ႈထႃႇဝရႃႉၽြႃး၊ ပုၼ်ႈဢၼ်တၵ်းႁဵတ်းမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈ၊ ပုၼ်ႈဢၼ်တၵ်းၵိုတ်ႉႁၢပ်ႇဢမူႉၸဝ်ႈ၊ ပုၼ်ႈၶူဝ်းၼုင်ႈၶူဝ်းမႆဢၼ်မူတ်းၸၢင်ႇလႄႈမႃးဢေႃႈ။- 22ၵူၼ်းၸၢႆးၵူၼ်းယိင်းၶဝ်ၸိူဝ်းဢၼ် မီးၸႂ်ၸေႇတၼႃႇၼၼ်ႉ ဢွၼ်ၵၼ်ပႃးဢဝ်ဝႅၼ်၊ သွႆႈၶမ်းႁွႆႈၶူႈလင်၊ မွင်းၵူၺ်း၊ ၶိူဝ်းမၢၵ်ႇပူးတီး၊ ၶိူင်ႈၶမ်းၵႃႈမီးတင်းသဵင်ႈတင်းလူင်မႃးလႄႈ၊ ၶဝ်ၸိူဝ်းဢၼ်လူႇဢၼ်တၢၼ်းၼၼ်ႉ ႁင်းၽႂ်ႁင်းမၼ်း လူႇတၢၼ်းၶမ်းတီႈထႃႇဝရႃႉၽြႃးဢေႃႈ။- 23ၶဝ်ၸိူဝ်းဢၼ်မီးၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင်၊ ပိၵ်ႈၶျေႃး၊ ၶူၼ်သူဝ်း၊ ၼင်သူဝ်းပေႃႈဢၼ်ယွမ်ႉလႅင်၊ ၼင်တႁႃႇသႃႉၼၼ်ႉၵေႃႈ ပႃးဢဝ်မႃးၵူႈၵေႃႉၵူႈၵူၼ်းဢေႃႈ။- 24ၶဝ်ၸိူဝ်းဢၼ်လူႇငိုၼ်း၊ တွင်းလိူင်ၼၼ်ႉၵေႃႈ၊ ၵူႈၵေႃႉၵူႈၵူၼ်းဢွၼ်ၵၼ်လူႇတၢၼ်းတီႈထႃႇဝရႃႉၽြႃးဢေႃႈ။ ၶဝ်ၸိူဝ်းဢၼ်မီးမႆႉဢၵႃႇသႃႉပုၼ်ႈဢၼ် တၵ်းႁဵတ်းတၢင်းႁဵတ်းဢၼ်ၸၢပ်ႈသႅင်ႇၵၼ်တင်းဢမူႉၸဝ်ႈၼၼ်ႉၵေႃႈ ဢွၼ်ၵၼ်ပႃးဢဝ်မႃး ၵူႈၵေႃႉၵူႈၵူၼ်းဢေႃႈ။- 25မႄႈယိင်းဢၼ်မေႃတေႃးႁုၵ်ႇတင်းသဵင်ႈတင်းလူင်ၵေႃႈ၊ ဢွၼ်ၵၼ်ဢဝ်မိုဝ်းတူဝ်ၸဝ်ႈၵဝ်ႇတေႃးလႄႈ ပႃးဢဝ်ၵႃႈဢၼ် ၶဝ်တေႃးတင်းသဵင်ႈတင်းလူင်ဢၼ်ဝႃႈ၊ ၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင်၊ ပိၵ်ႈၶျေႃးၼၼ်ႉမႃးဢေႃႈ။- 26မႄႈယိင်းဢၼ်ၺၢၼ်ႇႁူဝ်ၸႂ်ၶဝ် တိုၵ်းယူင်းၶဝ်တင်းသဵင်ႈတင်းလူင်ၼၼ်ႉ ဢွၼ်ၵၼ်တေႃးၶူၼ်ပႄႉဢေႃႈ။- 27ၵူၼ်းယႂ်ႇၵူၼ်းလူင်ၵေႃႈ ဢွၼ်ၵၼ်ပႃးဢဝ်သႅင်ၸၢႆးၶႃးယွတ်ႇ တင်းသႅင်ပုၼ်ႈတၵ်းၶပ်ႉၸီႇၵႃႈတီႈသိူဝ်ႈသုပ်း တင်းၶိူင်ႈဝႆၼႃႈဢူၵ်း၊- 28ဢိၵ်ႇတင်းၼမ်ႉမၼ်းပုၼ်ႈဢၼ်တၵ်းတႆႈ၊ ၼၢမ်ႇသႃႇပုၼ်ႈဢၼ်တၵ်းၽေႃႇႁဵတ်းၼမ်ႉမၼ်းဢၼ်တႃး၊ ၼၢမ်ႇသႃႇပုၼ်ႈဢၼ်တၵ်းၽေႃႇႁဵတ်းဢၼ်ႁွမ်ဢၼ်ႁူၺ်း ပုၼ်ႈဢၼ်တၵ်းတုတ်ႇၽႆးၼၼ်ႉမႃးဢေႃႈ။- 29ၼင်ႇၼၼ်လႄႈ ၵူၼ်းယိင်းၵူၼ်းၸၢႆးၼႂ်းၵူၼ်းမဵဝ်းဢီႉသရေႇလႃႉတင်းလၢႆၼၼ်ႉ ၶဝ်ၸိူဝ်းဢၼ် ၸႂ်ၸေႇတၼႃႇတိုၵ်းယူင်းၶဝ်ႁႂ်ႈလႆႈပႃးဢဝ်ပုၼ်ႈ တၢင်းႁဵတ်းတၢင်းသၢင်ႈၵူႈၸိူဝ်ႉၵူႈပိူင် ၵႃႈဢၼ်ထႃႇဝရႃႉၽြႃး သင်ႇလၢတ်ႈဢၢပ်ႈဝႆႉၼႂ်းမိုဝ်း မူဝ်းသေႇၼၼ်ႉမႃးၼၼ်ႉ ၵႃႈမီးတင်းသဵင်ႈတင်းလူင်ၼၼ်ႉ မီးတင်းၸႂ်ၸေႇတၼႃႇလူႇတၢၼ်းတီႈထႃႇဝရႃႉၽြႃးဢေႃႈ။
ၵူၼ်းဢၼ်မေႃႁဵတ်းသုမ်ႉထဵင်ၸဝ်ႈ
(တူၺ်း၊ ဢွၵ်ႇ 31:1-11)
30ၵမ်းၼၼ်ႉ မူဝ်းသေႇသမ်ႉလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆလႄႈဝႃႈ၊ ထွမ်ႇလူး၊ ထႃႇဝရႃႉၽြႃး ႁွင်ႉဢဝ်ၸိုဝ်ႈဢဝ်သဵင်ပေႇၸလေႇလႃႉ လုၵ်ႈၸၢႆးဢူႉရီႉ ဢၼ်ပဵၼ်လုၵ်ႈၸၢႆးႁူႉရႃႉ၊ ၵႃႈၼႂ်းၸိူဝ်ႉၶိူဝ်းယူႉတႃႉၼၼ်ႉဝႆႉဢေႃႈ။- 31မၼ်းၸဝ်ႈႁႂ်ႈမၼ်းပျေႉၸုမ်ႇတင်းဝီႉၺိၺ်ႇၽြႃးပဵၼ်ၸဝ်ႈ ၼႂ်းၺၢၼ်ႇ၊ ၼႂ်းပိင်ႇၺႃႇ၊ ၼႂ်းဢတၢတ်ႈဢၼ်ၸၢင်ႈဢၼ်မေႃ၊ ၼႂ်းတၢင်းႁဵတ်းဢၼ်ၸၢင်ႈႁဵတ်း ၵူႈၸိူဝ်ႉၵူႈပိူင်၊- 32ႁႂ်ႈမၼ်းလႆႈမီးတၢင်းဢၼ်ၸၢင်ႈၵျၢမ်ႇၸၢင်ႈပွင် လွင်ႈတၢင်းဢၼ်လၢၵ်ႇလၢၵ်ႇလၢႆးလၢႆးၵူႈၸိူဝ်ႉၵူႈမဵဝ်း၊ ဢတၢတ်ႈဢၼ်ႁဵတ်းလူၺ်ႈၶမ်း၊ ႁဵတ်းလူၺ်ႈငိုၼ်း၊ ႁဵတ်းလူၺ်ႈတွင်းလိူင်၊- 33ဢတၢတ်ႈဢၼ်သူၺ်းသႅင်လႄႈၸီႇ၊ ဢတၢတ်ႈဢၼ်မေႃတွင်ႈမေႃၶၵ်းၵႃႈတီႈမႆႉ၊ ဢတၢတ်ႈဢၼ်ၸၢင်ႈႁဵတ်း လွင်ႈတၢင်းဢၼ်လၢၵ်ႇလၢၵ်ႇလၢႆးလၢႆးၵူႈၸိူဝ်ႉၵူႈပိူင်ၼၼ်ႉယဝ်ႉ။- 34မၼ်းၸဝ်ႈပၼ်ၺၢၼ်ႇတီႈမၼ်းၼၼ်ႉ ႁႂ်ႈမၼ်းဢိၵ်ႇလူၺ်ႈၵၼ်တင်းဢႁေႃႇလျႃႇၽႃႉ လုၵ်ႈၸၢႆးဢႁီႉသမၵ်ႉ ၼႂ်းၸိူဝ်ႉၶိူဝ်းတၢၼ်ႇၼၼ်ႉ လႆႈႁဵတ်းသြႃႇသွၼ်ပၼ်တီႈပိူၼ်ႈယဝ်ႉ။- 35မၼ်းၸဝ်ႈႁႂ်ႈၶဝ်ၼၼ်ႉ ပျေႉၸုမ်ႇတင်းၺၢၼ်ႇပိင်ႇၺႃႇ ႁႂ်ႈမေႃႁဵတ်းတၢင်းႁဵတ်း ၵူၼ်းဢၼ်မေႃတွင်ႈမေႃၶၵ်း၊ တၢင်းႁဵတ်းလၢၵ်ႈသမႃးဢၼ်လၢၵ်ႇလၢၵ်ႇလၢႆးလၢႆး၊ တၢင်းႁဵတ်းၵေႃႉဢၼ်မေႃဢဝ်တင်းၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင်၊ ပိၵ်ႈၶျေႃးႁၢင်ႈၶိူင်ႈႁဵတ်း၊ တၢင်းႁဵတ်းၵေႃႉဢၼ်မေႃတေႃးႁုၵ်ႇ၊ တၢင်းႁဵတ်းၵေႃႉဢၼ်ၸၢင်ႈမေႃၵူႈၸိူဝ်ႉၵူႈပိူင်၊ တၢင်းႁဵတ်းၵေႃႉဢၼ် ၸၢင်ႈၵျၢမ်ႇၸၢင်ႈပွင် လွင်ႈတၢင်းဢၼ်လၢၵ်ႇလၢၵ်ႇလၢႆးလၢႆးၸိူဝ်းၼၼ်ႉ ၵူႈၸိူဝ်ႉၵူႈမဵဝ်းဢေႃႈ။
Currently Selected:
ဢွၵ်ႇၵႂႃႇ 35: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
