ဢွၵ်ႇၵႂႃႇ 36
36
1ၼင်ႇၼၼ်လႄႈ ပေႇၸလေႇလႃႉ တင်းဢႁေႃႇလျႃႇၽႃႉ ဢိၵ်ႇတင်းၵူၼ်းဢၼ်မီးပိင်ႇၺႃႇၵႃႈၼႂ်းၸႂ်တင်းသဵင်ႈတင်းလူင် ဢၼ်ထႃႇဝရႃႉၽြႃး ဢဝ်ၺၢၼ်ႇပိင်ႇၺႃႇသႂၢင်းသႂ်ႇ ၵႃႈၼႂ်းႁူဝ်ၸႂ်ႁႂ်ႈမေႃႁဵတ်းတၢင်းႁဵတ်းၵူႈၸိူဝ်ႉၵူႈပိူင် ပုၼ်ႈဢၼ်တၵ်းပွင်ႁဵတ်းဢမူႉၸဝ်ႈ ၼႂ်းထႃႇၼႃႉ တီႈမူတ်းၸၢင်ႇၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉၸိူဝ်းၼၼ်ႉ တၵ်းလႆႈဢွၼ်ၵၼ်ႁဵတ်းဢေႃႈ။
2ၵမ်းၼၼ်ႉမူဝ်းသေႇႁွင်ႉဢဝ်ပေႇၸလေႇလႃႉ၊ ဢႁေႃႇလျႃႇၽႃႉတင်းၵူၼ်းဢၼ်မီးပိင်ႇၺႃႇၵႃႈၼႂ်းၸႂ် ဢၼ်ထႃႇဝရႃႉၽြႃး ဢဝ်ၺၢၼ်ႇသႂၢင်းသႂ်ႇ ၵႃႈၼႂ်းႁူဝ်ၸႂ်လႄႈမီးၸႂ်ၸေႇတၼႃႇ ဢၼ်ၶႂ်ႈမႃးလႄႈႁဵတ်း တၢင်းႁဵတ်းၸိူဝ်းၼၼ်ႉတင်းသဵင်ႈတင်းလူင် ၼၼ်ႉမႃးသေယဝ်ႉ၊- 3ၶဝ်ၼၼ်ႉ ဢွၼ်ၵၼ်ၶၢမ်ႇဢဝ်တၢင်းလူႇတၢင်းတၢၼ်း ၵႃႈဢၼ်ၵူၼ်းမဵဝ်းဢီႉသရေႇလႃႉတင်းလၢႆ ဢဝ်မႃးၼၼ်ႉ ၵႃႈတီႈမိုဝ်း မူဝ်းသေႇ ႁႂ်ႈလႆႈသၢင်ႈႁဵတ်းထႃႇၼႃႉတီႈမူတ်းၸၢင်ႇ ဢိၵ်ႇတင်းၶိူင်ႈပိူင်ပုၼ်ႈဢၼ်တၵ်းၵိုတ်ႉႁၢပ်ႇ ဢမူႉၸဝ်ႈၸိူဝ်းၼၼ်ႉဢေႃႈ။ ၵူၼ်းထၢပ်ႈလႄႈ ဢဝ်တၢင်းလူႇတၢင်းတၢၼ်းဢၼ်ပႃးတင်းၸႂ်ၸေႇတၼႃႇလူႇတၢၼ်းၼၼ်ႉ မႃးထႅင်ႈယူႇၵူႈၼႂ်ဢေႃႈ။- 4မိူဝ်ႈၼၼ်ႉ ၵူၼ်းဢၼ်မီးပိင်ႇၺႃႇ ဢၼ်ၸၢင်ႈႁဵတ်းတၢင်းႁဵတ်းထႃႇၼႃႉတီႈမူတ်းၸၢင်ႇ တင်းသဵင်ႈတင်းလူင်ၸိူဝ်းၼၼ်ႉ ဢွၼ်ၵၼ်လုၵ်ႉသေၵႃႈတီႈတၢင်းႁဵတ်းၶဝ် ႁင်းၽႂ်ႁင်းမၼ်း၊- 5မႃးတီႈမူဝ်းသေႇလႄႈ မွၵ်ႇလၢတ်ႈလႄႈဝႃႈ၊ ၵူၼ်းတင်းလၢႆဢွၼ်ၵၼ်ဢဝ်မႃးထၼ်ႈပေႃး လူၼ်ႉလိူဝ်သေတၢင်းဢၼ် ၵုမ်ႇႁဵတ်းတၢင်းႁဵတ်း ဢၼ်ထႃႇဝရႃႉၽြႃးသင်ႇလၢတ်ႈဝႆႉ ႁႂ်ႈႁဵတ်းၼၼ်ႉ ၵႂႃႇၼႃႇလူင်လၢင်ၶႃႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊- 6မူဝ်းသေႇၸီႇယၢင်ႇလႄႈ ၶဝ်ႁႂ်ႈသေႃႇႁႂ်ႈလၢတ်ႈတင်းတပ်ႉလႄႈဝႃႈ၊ ၵူၼ်းယိင်းၵူၼ်းၸၢႆးၵေႃႉလႂ်သေဢမ်ႇဝႃႈ၊ ယႃႇပေထၢပ်ႈထႅင်ႈလႄႈ ႁဵတ်းတၢင်းႁဵတ်း ႁႂ်ႈပဵၼ်တၢင်းလူႇတၢင်းတၢၼ်း ပုၼ်ႈထႃႇၼႃႉ တီႈမူတ်းၸၢင်ႇၸဝ်ႈ၊ ဝႃႈၼင်ႇၼႆလႄႈ ႁႄႉၶႅၼ်လွင်ႈတၢင်းဢၼ်ၵူၼ်းတင်းလၢႆဢဝ်တၢင်းလူႇတၢင်းတၢၼ်းမႃးၼၼ်ႉဢေႃႈ။- 7ဢုၵ်ႉၸႃႇဢၼ်လႆႈမႃးယဝ်ႉၼၼ်ႉ ၵုမ်ႇႁဵတ်းတင်းႁဵတ်းၼၼ်ႉယဝ်ႉဢမ်ႇၵႃး၊ လူၼ်ႉလိူဝ်လႄႈမီးဝႆႉဢေႃႈ။
တၢင်းဢၼ်ႁဵတ်းသုမ်ႉထဵင်ၸဝ်ႈ
(တူၺ်း၊ ဢွၵ်ႇ 26:1-37)
8ၼႂ်းၶဝ်ၸိူဝ်းဢၼ် ႁဵတ်းတၢင်းႁဵတ်းၼၼ်ႉ၊ ၵႃႈပဵၼ်ၵေႃႉဢၼ်မီးပိင်ႇၺႃႇၵႃႈၼႂ်းၸႂ်ၼၼ်ႉ ဢွၼ်ၵၼ်ဢဝ်ၽႃႈၵင်ႈသိပ်းၼိုင်ႈ ႁဵတ်းသုမ်ႉထဵင်ၸဝ်ႈဢေႃႈ။ မၼ်းဢဝ်ပိၵ်ႈၶျေႃးဢၼ်ပႃးၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင်တမ်ႇၵၢမ်းၵၼ် ႁၢင်ႈၶိူင်ႈႁဵတ်းပုင်ႇႁၢင်ႈ ၶေႇရူႉၽဵမ်ႇသႂ်ႇလႄႈ ႁဵတ်းၽႃႈၵင်ႈၸိူဝ်းၼၼ်ႉဢေႃႈ။- 9ၽႃႈၵင်ႈၼၼ်ႉ ၼႃႈယၢဝ်းမၼ်းမီးသၢဝ်းပႅတ်ႇသွၵ်ႇ၊ ၼႃႈပွတ်းမၼ်းသီႇသွၵ်ႇလႄႈ၊ ၽႃႈၵင်ႈတင်းသဵင်ႈတင်းလူင်ၸိူဝ်းၼၼ်ႉ ၼႃႈယၢဝ်းၼႃႈပွတ်းမိူၼ်မိူၼ်ၵၼ်ဢေႃႈ။- 10ၽႃႈၵင်ႈႁႃႈၽိုၼ် ယဵပ်ႉၸပ်းႁႂ်ႈပဵၼ်ၽိုၼ်လဵဝ်ၵၼ်လႄႈ ၽႃႈၵင်ႈဢၼ်ၵိုတ်းႁႃႈၽိုၼ်ၼၼ်ႉၵေႃႈ၊ ယဵပ်ႉၸပ်းႁႂ်ႈပဵၼ်ၽိုၼ်လဵဝ်ၵၼ်ဢေႃႈ။- 11မၼ်းဢဝ်ၶူဝ်းဢၼ်သွမ်ႇႁဵတ်းႁူမၼ်းသႂ်ႇၵႃႈတီႈၸႃႉၸဵမ် တီႈသုတ်းၽႃႈၵင်ႈဢၼ်သိုပ်ႇၵၢမ်းၵၼ်ၽိုၼ်ၼိုင်ႈၼၼ်ႉလႄႈ ၸွမ်းၵႃႈတီႈႁိမ်းၽၢႆႇၼိူဝ်ဢေႃႈ။ ၵႃႈတီႈၸႃႉၸဵမ်တီႈသုတ်းၽႃႈၵင်ႈၽိုၼ်တူႉတီႉယႃႉ ဢၼ်သိုပ်ႇၵၢမ်းၵၼ်ၽိုၼ်ၼိုင်ႈၼၼ်ႉလႄႈ ၸွမ်းၵႃႈတီႈႁိမ်းၽၢႆႇၼိူဝ်မၼ်းၵႂႃႇၼၼ်ႉၵေႃႈ ႁဵတ်းမိူၼ်ၸိူဝ်ႉၼင်ႇၼၼ်ႉဢေႃႈ။- 12မၼ်းႁဵတ်းႁူႁႃႈသိပ်းၵႃႈတီႈၽႃႈၵင်ႈၽိုၼ်ၼိုင်ႈ ဢိၵ်ႇတင်းႁူႁႃႈသိပ်းၵႃႈတီႈႁိမ်းၽၢႆႇၼိူဝ်ၽႃႈၵင်ႈၽိုၼ်တူႉတီႉယႃႉ သိုပ်ႇၵၢမ်းၵၼ်ၼၼ်ႉဢေႃႈ။ ႁူတင်းလၢႆၸိူဝ်းၼၼ်ႉတေႃးမႅၼ်ႈၵၼ်ဢေႃႈ။- 13ၶေႃၶမ်းႁႃႈသိပ်းဢၼ်ၵေႃႈ မၼ်းႁဵတ်းလႄႈ ဢဝ်ၶေႃၶမ်းၸိူဝ်းၼၼ်ႉ ႁႂ်ႈၽႃႈၵင်ႈတေႃးၸပ်းၵၼ်သေယဝ်ႉ၊ ပဵၼ်သုမ်ႉထဵင်ၸဝ်ႈဢၼ်လဵဝ်ၵူၺ်းဢေႃႈ။
14ၽႃႈၵင်ႈပုၼ်ႈဢၼ် တၵ်းပဵၼ်မူဝ်းၵႃႇ ၵႃႈၼိူဝ်သုမ်ႉထဵင်ၸဝ်ႈတၢင်ႇၽိုၼ်ၵေႃႈ မၼ်းႁဵတ်းဢေႃႈ။ မၼ်းႁဵတ်းသိပ်းဢဵတ်းၽိုၼ်ဢေႃႈ။- 15ၽႃႈၵင်ႈယေႈၽိုၼ် ၼႃႈယၢဝ်းမၼ်းမီးသၢမ်သိပ်းသွၵ်ႇ၊ ၼႃႈပွတ်းမၼ်းသီႇသွၵ်ႇလႄႈ၊ ၽႃႈၵင်ႈသိပ်းဢဵတ်းၽိုၼ်ၸိူဝ်းၼၼ်ႉ၊ ၼႃႈယၢဝ်းၼႃႈပွတ်းမိူၼ်မိူၼ်ၵၼ်ဢေႃႈ။- 16မၼ်းယဵပ်ႉၽႃႈၵင်ႈႁႃႈၽိုၼ်ၸပ်းၵၼ် ႁႂ်ႈပဵၼ်ၽိုၼ်လဵဝ်ၵၼ်၊ ၽႃႈၵင်ႈႁူၵ်းၽိုၼ်ၸပ်းၵၼ်ႁႂ်ႈပဵၼ်ၽိုၼ်လဵဝ်ၵၼ်ဢေႃႈ။- 17မၼ်းႁဵတ်းႁူႁႃႈသိပ်းသႂ်ႇၵႃႈတီႈသုတ်း ၽႃႈၵင်ႈၽိုၼ်ၼိုင်ႈၼၼ်ႉလႄႈ ၸွမ်းၵႃႈတီႈႁိမ်းၽၢႆႇၼိူဝ်မၼ်းၵႂႃႇ ဢိၵ်ႇတင်းႁူႁႃႈသိပ်း ၸႃႉၸဵမ်တီႈသုတ်းၽႃႈၵင်ႈ ၽိုၼ်တူႉတီႉယႃႉၽိုၼ်ၼိုင်ႈၼၼ်ႉလႄႈ ၸွမ်းၵႃႈတီႈႁိမ်းၽၢႆႇၼိူဝ်မၼ်းၵႂႃႇၼၼ်ႉဢေႃႈ။- 18ၶေႃတွင်းလိူင်ႁႃႈသိပ်းဢၼ်ၵေႃႈ မၼ်းႁဵတ်းလႄႈ ႁႂ်ႈမူဝ်းၵႃႇၽၢၵ်ႇၼိုင်ႈလႄႈၽၢၵ်ႇၼိုင်ႈ တေႃးၸပ်းၵၼ်ပဵၼ်ဢၼ်လဵဝ်ၵူၺ်းဢေႃႈ။- 19မၼ်းဢဝ်ၼင်သူဝ်းဢၼ်ယွမ်ႉလႅင် ႁဵတ်းပုၼ်ႈဢၼ်တၵ်းႁူမ်ႇသုမ်ႇမူဝ်းၵႃႇ ဢိၵ်ႇတင်းၼင်တႁႃႇသႃႉ ႁဵတ်းပုၼ်ႈဢၼ် တၵ်းႁူမ်ႇသုမ်ႇၵႃႈၼိူဝ်မၼ်းၼၼ်ႉသေဢေႃႈ။
20ပႅၼ်ႈဢၵႃႇသႃႉ ဢၼ်ၵင်ႈသုမ်ႉထဵင်ၸဝ်ႈဝႆႉၵေႃႈ မၼ်းႁဵတ်းဢေႃႈ။- 21ပႅၼ်ႈၼၼ်ႉ ယေႈၽႅၼ်ႇၼႃႈယၢဝ်းမၼ်းမီးသိပ်းသွၵ်ႇ၊ ၼႃႈပွတ်းမၼ်းသွၵ်ႇၶိုပ်ႈဢေႃႈ။- 22လွင်ႈၼင်ႇႁိုဝ်တၵ်းလႆႈၶပ်ႉၸႅၼ်ႇၵပ်းတၢမ်းၵၼ်ၸိုင်၊ ၵႃႈတီႈပႅၼ်ႈၽႅၼ်ႇၼိုင်ႈ မီးတိၼ်သွင်ဢၼ်ဢေႃႈ။ မၼ်းႁဵတ်းပႅၼ်ႈသုမ်ႉထဵင်ၸဝ်ႈ တင်းသဵင်ႈတင်းလူင် မိူၼ်ၸိူဝ်ႉၼင်ႇၼၼ်ဢေႃႈ။- 23မၼ်းႁဵတ်းပႅၼ်ႈဢၼ်ၵင်ႈသုမ်ႉထဵင်ၸဝ်ႈ ပုၼ်ႈၼႃႈတင်းၸၢၼ်းသၢဝ်းၼိုင်ႈလႄႈ၊- 24တီႈပႅၼ်ႈသၢဝ်းၼိုင်ႈၼၼ်ႉ၊ မၼ်းႁဵတ်းတီႈသုပ်းတိၼ်ငိုၼ်းသီႇသိပ်း၊ ၵႃႈတႂ်ႈပႅၼ်ႈယေႈၽႅၼ်ႇ၊ တီႈသုပ်းတိၼ်မၼ်းသွင်ဢၼ်ဢေႃႈ။- 25မိူၼ်ၼင်ႇၼၼ် မၼ်းႁဵတ်းပႅၼ်ႈဢၼ်ၵင်ႈသုမ်ႉထဵင်ၸဝ်ႈ ပုၼ်ႈၼႃႈတၢင်းႁွင်ႇသၢဝ်းၼိုင်ႈ၊- 26ဢိၵ်ႇတင်းတီႈသုပ်းတိၼ်ငိုၼ်းသီႇသိပ်း၊ ၵႃႈတႂ်ႈပႅၼ်ႈယေႈၽႅၼ်ႇ၊ တီႈသူပ်းတိၼ်မၼ်း သွင်ဢၼ်ဢေႃႈ။- 27ပႅၼ်ႈဢၼ်ၵင်ႈသုမ်ႉထဵင်ၸဝ်ႈ ပုၼ်ႈၼႃႈတၢင်းတူၵ်းၸိုင်၊ မၼ်းႁဵတ်းႁူၵ်းၽႅၼ်ႇဢေႃႈ။- 28ပႅၼ်ႈဢၼ်ၵင်ႈပုၼ်ႈၸဵင်ႇၽၢႆႇတၢင်းလင်သုမ်ႉထဵင်ၸဝ်ႈၼၼ်ႉၵေႃႈ မၼ်းႁဵတ်းသွင်ၽႅၼ်ႇဢေႃႈ။- 29လႆႈတူပ်ႉၸဵင်ႇၵၢမ်းၵၼ်ၸႃႉၸဵမ်ၵႃႈတီႈၽၢႆႇတႂ်ႈလႄႈ ပဵၼ်ဢၼ်လဵဝ်ၵၼ် ၶိုၼ်ႈၵႂႃႇၸွမ်းၸိူဝ်ႉၼင်ႇၼၼ် တေႃႇထိုင်ႁွတ်ႈပၢႆၸိၵ်းမၼ်း ၵွပ်ႈပိူဝ်ႈလွင်ႈၶူၺ်ႇမၼ်းဢေႃႈ။ ၼင်ႇၼၼ်လႄႈ မၼ်းႁဵတ်းသွင်ဢၼ် ၵႃႈတီႈၸဵင်ႇသွင်ၸဵင်ႇဢေႃႈ။- 30မီးပႅတ်ႇၽႅၼ်ႇ၊ တီႈသုပ်းတိၼ်ငိုၼ်းသိပ်းႁူၵ်းဢၼ် ယေႈၽႅၼ်ႇသွင်ဢၼ်ဢေႃႈ။
31မၼ်းဢဝ်မႆႉဢၵႃႇသႃႉႁဵတ်းသႄႈ ႁႃႈလႅမ်ႈပုၼ်ႈပႅၼ်ႈသုမ်ႉထဵင်ၸဝ်ႈၸိူဝ်းၼၼ်ႉၼႃႈၼိုင်ႈ၊- 32ႁႃႈလႅမ်ႈပုၼ်ႈပႅၼ်ႈသုမ်ႉထဵင်ၸဝ်ႈၸိူဝ်းၼၼ်ႉၼႃႈၼိုင်ႈ၊ ႁႃႈလႅမ်ႈပုၼ်ႈပႅၼ်ႈသုမ်ႉထဵင်ၸဝ်ႈ ဢၼ်မီးၽၢႆႇတၢင်းလင်မၼ်း ၼႃႈဝၼ်းတူၵ်းၸိူဝ်းၼၼ်ႉဢေႃႈ။- 33မၼ်းႁဵတ်းႁႂ်ႈမႆႉသႄႈၶိုင်ႈၵၢင်ၼၼ်ႉ သွတ်ႇဝႆႉၵႃႈတီႈသိုဝ်ႈၶိုင်ႈၵၢင်ပႅၼ်ႈၸိူဝ်းၼၼ်ႉ ဢဝ်ၸႃႉၸဵမ်ၸဵင်ႇၼိုင်ႈတေႃႇထိုင်ႁွတ်ႈၸဵင်ႇၼိုင်ႈဢေႃႈ။- 34မၼ်းဢဝ်ၶမ်းဢုမ်ႇႁေႃႇပႅၼ်ႈၸိူဝ်းၼၼ်ႉဢေႃႈ။ ၶူၺ်ႇၶမ်းပုၼ်ႈတီႈဢၼ်သႄႇၸိူဝ်းၼၼ်ႉ တၵ်းသွတ်ႇၼၼ်ႉၵေႃႈ မၼ်းႁဵတ်းလႄႈ ဢဝ်ၶမ်းဢုမ်ႇႁေႃႇသေဢေႃႈ။
35ၼႄးၼိုင်ႈၸမ်ႉ၊ မၼ်းဢဝ်ၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင် ဢိၵ်ႇတင်းပိၵ်ႈၶျေႃးႁဵတ်းၽႃႈၵင်ႈလႄႈ ႁၢင်ႈၶိူင်ႈသႂ်ႇ ပုင်ႇႁၢင်ႈၶေႇရူႉၽဵမ်ႇသေဢေႃႈ။- 36မၼ်းဢဝ်မႆႉဢၵႃႇသႃႉ ႁဵတ်းသဝ်သီႇလႅမ်ႈပုၼ်ႈမၼ်းလႄႈ တဵၵ်းၶမ်းသေဢေႃႈ။ သဝ်ၸိူဝ်းၼၼ်ႉ မီးတႅမ်ၶမ်းလႄႈ တီႈသုပ်းတိၼ်ငိုၼ်းသီႇဢၼ်ၵေႃႈ မၼ်းလေႃႇႁဵတ်းဢေႃႈ။
37မၼ်းဢဝ်ၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင် ဢိၵ်ႇတင်းပိၵ်ႈၶျေႃးဢၼ်တမ်ႇၵၢမ်းႁၢင်ႈၶိူင်ႈတေႃးႁဵတ်းၼၼ်ႉ ႁဵတ်းၽႃႈၵင်ႈပုၼ်ႈဢၼ်တၵ်းၵင်ႈ ၵႃႈတီႈၽၵ်းတူသုမ်ႉထဵင်ၸဝ်ႈၼၼ်ႉလႄႈ၊- 38ႁဵတ်းသဝ်ႁႃႈလႅမ်ႈ ဢိၵ်ႇတင်းတႅမ်မၼ်းတင်းလၢႆပုၼ်ႈၽႃႈၵင်ႈၼၼ်ႉဢေႃႈ။ မၼ်းဢဝ်ၶမ်းဢုမ်ႇႁေႃႇဝၢၼ်ႇဢၼ်ၶၢမ်ႇႁူဝ်သဝ် ဢိၵ်ႇတင်းႁၢဝ်းတင်းလၢႆဢေႃႈ။ တီႈသုပ်းတိၼ်တွင်းလိူင်ႁႃႈဢၼ်ၵေႃႈမီးဢေႃႈ။
Currently Selected:
ဢွၵ်ႇၵႂႃႇ 36: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
