ဢွၵ်ႇၵႂႃႇ 4
4
ၽြႃးပဵၼ်ၸဝ်ႈပၼ်တၼ်းၶူဝ်းဢၼ်လီဢၢမ်းတီႈမူဝ်းသေႇ
1 မူဝ်းသေႇၵေႃႈ ၶိုၼ်းလဝ်ႊလၢတ်ႈလႄႈဝႃႈ၊ ၶဝ်ၼၼ်ႉတၵ်းဢမ်ႇယုမ်ႇၶႃႈၸဝ်ႈ။ ၵႂၢမ်းၶႃႈၸဝ်ႈၵေႃႈၶဝ်တၵ်းဢမ်ႇထွမ်ႇဢမ်ႇဢဝ်။ ၶဝ်တၵ်းဝႃႈ၊ ထႃႇဝရႃႉၽြႃးဢမ်ႇပေႃႇမႃးတီႈမႂ်းၵူၺ်ႉ၊ ဝႃႈၼင်ႇၼႆလူးၵွၼ်ႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။- 2ထႃႇဝရႃႉၽြႃးၵေႃႈထၢမ်တီႈမၼ်းလႄႈဝႃႈ၊ ဢၼ်မီးၵႃႈၼႂ်းမိုဝ်းမႂ်းၼႆႉပဵၼ်ၵႃႈသင်၊ ဝႃႈၼင်ႇၼႆသေယဝ်ႉ၊ မၼ်းၵေႃႈလဝ်ႊလၢတ်ႈလႄႈဝႃႈ၊ ပဵၼ်ၶွၼ်ႉတဝ်ႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။- 3မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈ၊ ဢဝ်ထိမ်ႈတူၵ်းသႂ်ႇၵႃႈၼိူဝ်လိၼ်တႃႉ၊ ဝႃႈၼင်ႇၼႆလႄႈ မၼ်းဢဝ်ထိမ်ႈတူၵ်းသႂ်ႇၵႃႈၼိူဝ်လိၼ် သေယဝ်ႉ၊ ၶွၼ်ႉတဝ်ႉၼၼ်ႉပဵၼ်ငူးၵႂႃႇလႄႈ၊ မူဝ်းသေႇလႆႈလႅၼ်ႈပၢႆႈၵႃႈတီႈၽၢႆႇၼႃႈမၼ်းၼၼ်ႉဢေႃႈ။- 4ထႃႇဝရႃႉၽြႃးၵေႃႈလၢတ်ႈလႄႈဝႃႈ၊ ယိုၼ်းမိုဝ်းမႂ်းလႄႈတီႉၵမ်ဢဝ်ႁၢင်မၼ်းတႃႉ၊ ဝႃႈၼင်ႇၼႆလႄႈ မၼ်းယိုၼ်းမိုဝ်းမၼ်းတီႉၵမ်ဢဝ်လႆႈလႄႈၶိုၼ်းပဵၼ်ၶွၼ်ႉတဝ်ႉၵႂႃႇ ၵႃႈတီႈမိုဝ်းမၼ်းသေဢေႃႈ။- 5ပေႃးႁဵတ်းၼင်ႇၼႆၸိုင်၊ ၶဝ်ၼၼ်ႉတၵ်းယုမ်ႇလွင်ႈဢၼ်ထႃႇဝရႃႉၽြႃး ၽြႃးပဵၼ်ၸဝ်ႈပူႇမွၼ်ႇၶဝ်၊ ၽြႃးဢႃႇပြႃႇႁၢမ်ႇ၊ ၽြႃးဢီႉၸၢၵ်ႈ၊ ၽြႃးယႃႇၵုပ်ႈၼၼ်ႉ ပေႃႇမႃးၵႃႈတီႈမႂ်းယဝ်ႉၼၼ်ႉဢေႃႈ၊ ဝႃႈၼင်ႇၼႆဢေႃႈ။
6ၵမ်းၼၼ်ႉ ထႃႇဝရႃႉၽြႃးလၢတ်ႈလႄႈဝႃႈ၊ ဢဝ်မိုဝ်းမႂ်းၸူၵ်းၶဝ်ႈၵႃႈတီႈႁူဝ်ဢူၵ်းမႂ်းတႃႉ၊ ဝႃႈၼင်ႇၼႆလႄႈ မၼ်းဢဝ်မိုဝ်းမၼ်း ၸူၵ်းၶဝ်ႈၵႃႈတီႈႁူဝ်ဢူၵ်းမၼ်းလႄႈ မိူဝ်ႈဢၼ်မၼ်းဢဝ်ဢွၵ်ႇၼၼ်ႉၸိုင်၊ မိုဝ်းမၼ်းၼၼ်ႉ ပဵၼ်တုတ်ႈၵႂႃႇ မိူၼ်ၸိူဝ်ႉၼင်ႇမူၺ်ႁႃႇဢေႃႈ။- 7ၵမ်းၼၼ်ႉ မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈ ဢဝ်မိုဝ်းမႂ်းၶိုၼ်းၸူၵ်းၶဝ်ႈၵႃႈတီႈႁူဝ်ဢူၵ်းမႂ်းတႃႉ၊ ဝႃႈၼင်ႇၼႆလႄႈ မၼ်းသမ်ႉဢဝ်မိုဝ်းမၼ်းၶိုၼ်းၸူၵ်းၶဝ်ႈၵႃႈတီႈႁူဝ်ဢူၵ်းမၼ်းလႄႈ၊ မိူဝ်ႈဢၼ်မၼ်းဢဝ်ဢွၵ်ႇၼၼ်ႉၸိုင်၊ ၶိုၼ်းပဵၼ်ၸိူဝ်ႉၼင်ႇၼိူဝ်ႉပၵတီႉပၵ်းၵဝ်ႇပိူင်ၵဝ်ႇၼၼ်ႉသေဢေႃႈ။- 8ပေႃးၶဝ်ၼၼ်ႉဢမ်ႇယုမ်ႇမႂ်း ဢမ်ႇထွမ်ႇဢဝ်ၼီႉမိၵ်ႈသၢၵ်ႈသေႇ ပထမႃႉၼၼ်ႉၸိုင်၊ ၶဝ်တၵ်းယုမ်ႇၼီႉမိၵ်ႈသၢၵ်ႈသေႇ ဢၼ်ပဵၼ်ၵမ်းလိုၼ်းၼႆႉဢေႃႈ။- 9ဢမ်ႇၼၼ်ၵေႃႈ ပေႃးၶဝ်ဢမ်ႇယုမ်ႇၼီႉမိၵ်ႈသွင်ပႃးၼႆႉ၊ ဢမ်ႇထွမ်ႇဢဝ်ၵႂၢမ်းမႂ်းၸိုင်၊ မႂ်းဢဝ်ၼမ်ႉၵႃႈၼႂ်းၼမ်ႉႁွင်ႈလႄႈ ထွၵ်ႇသႂ်ႇၵႃႈၼိူဝ်ၽင်ႇတႃႉ။ ၼမ်ႉဢၼ်မႂ်းဢဝ် ၵႃႈၼႂ်းၼမ်ႉႁွင်ႈၼၼ်ႉ တၵ်းပဵၼ်လိူတ်ႈၵႂႃႇ ၵႃႈၼိူဝ်ၽင်ႇဢေႃႈ၊ ဝႃႈၼင်ႇၼႆဢေႃႈ။
10 မူဝ်းသေႇၵေႃႈ လဝ်ႊလၢတ်ႈတီႈထႃႇဝရႃႉၽြႃးလႄႈဝႃႈ၊ ဢူဝ်းၸဝ်ႈႁဝ်း၊ ၶႃႈၸဝ်ႈဢမ်ႇမီးၼမ်ႉသူပ်းၼမ်ႉၵႂၢမ်းတီႈၶႃႈ၊ မိူဝ်ႈဢွၼ်ၼႆႉၵေႃႈဢမ်ႇမီးတီႈၶႃႈ၊ ၸႃႉၸဵမ်မိူဝ်ႈဢၼ်ၸဝ်ႈႁဝ်းမီးဢမိင်ႉတီႈၶႃႈၸဝ်ႈတေႃႈလဵဝ်ၼႆႉၵေႃႈ၊ ဢမ်ႇမီးတီႈၶႃႈ၊ ပဵၼ်ၵေႃႉဢၼ်သူပ်းၼၵ်း၊ၵေႃႉဢၼ်ၸၢင်ႈလၢတ်ႈၵႂၢမ်းထိူင်းထိူင်း လွႆးလွႆးတီႈၶႃႈဢေႃႈ၊ ဝႃႈၼင်ႇၼႆဢေႃႈ။
11ထႃႇဝရႃႉၽြႃးၵေႃႈလၢတ်ႈတီႈမၼ်းလႄႈဝႃႈ၊ ၽူႈလႂ်ႁဵတ်းပဵၼ်သူပ်းၵူၼ်း၊ ၽူႈလႂ်ႁဵတ်းပဵၼ်ၵေႃႉဢၼ်ဢႃႉ၊ ၵေႃႉဢၼ်ႁူၼူၵ်ႇ၊ ၵေႃႉဢၼ်တႃႁၼ်၊ ၵေႃႉဢၼ်တႃဢမ်ႇႁၼ်ၸိူဝ်းၼၼ်ႉ။ ၵဝ်ထႃႇဝရႃႉၽြႃးၼႆႉ ႁဵတ်းပဵၼ်ဢမ်ႇၸႂ်ႈႁိုဝ်။- 12ပိူဝ်ႈၼႆလႄႈတေႃႈလဵဝ်ၼႆႉၵႂႃႇတႃႉ။ ၵဝ်တၵ်းမီးယူႇၵႃႈတီႈသူပ်းမႂ်းလႄႈ သွၼ်ပၼ်လွင်ႈဢၼ်မႂ်းတၵ်းလႆႈလၢတ်ႈၸိူဝ်ႉၼင်ႇႁိုဝ်ၼၼ်ႉတီႈမႂ်းဢေႃႈ၊ ဝႃႈၼင်ႇၼႆဢေႃႈ။- 13မၼ်းၵေႃႈၶိုၼ်းလဝ်ႊလၢတ်ႈလႄႈဝႃႈ၊ ဢူဝ်းၸဝ်ႈႁဝ်း။ ပၼ်ၵႃႈၼႂ်းမိုဝ်းၵေႃႉဢၼ်ၸဝ်ႈႁဝ်း ၶႂ်ႈပၼ်ၵႂႃႇၼၼ်ႉၵႂႃႇသေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ၊- 14ထႃႇဝရႃႉၽြႃးၸႂ်မႆႈၶႆႈၸႃႉတီႈမူဝ်းသေႇလႄႈလၢတ်ႈဝႃႈ၊ ဢႃႇရုၼ်ႇၵူၼ်းမဵဝ်းလေႇဝီႉ ပီႈဢၢႆႈမႂ်းၼၼ်ႉမီးယူႇဢမ်ႇၸႂ်ႈႁိုဝ်။ ၵဝ်ႁူႉလွင်ႈဢၼ်မၼ်းၸၢင်ႈမေႃလၢတ်ႈလီလီငၢမ်းငၢမ်းၼၼ်ႉယူႇဢေႃႈ။ မၼ်းၼၼ်ႉတေႃႈလဵဝ်ၼႆႉမႃးႁႂ်ႈလႆႈႁပ်ႉႁူဝ်တၢင်းမႂ်းယူႇဢေႃႈ။ မိူဝ်ႈဢၼ်မၼ်း ထူပ်းႁၼ်မႂ်းၸိုင်၊ မၼ်းတၵ်းၸူမ်းသိူဝ်းဢေႃႈ။- 15မႂ်းတၵ်းလႆႈလၢတ်ႈၵႂၢမ်းတေႃႇမၼ်းလႄႈ သႂ်ႇၵႂၢမ်းဝႆႉၵႃႈၼႂ်းသူပ်းမၼ်းဢေႃႈ။ ၵဝ်တၵ်းမီးယူႇၵႃႈတီႈသူပ်းမႂ်း ဢိၵ်ႇတင်းၵႃႈတီႈသူပ်းမၼ်းလႄႈ သင်ႇသွၼ်ပၼ်လွင်ႈဢၼ်သူတၵ်းလႆႈႁဵတ်းၸိူဝ်ႉၼင်ႇႁိုဝ်ၼၼ်ႉတီႈသူဢေႃႈ။- 16မၼ်းၵေႃႈတၵ်းႁဵတ်းၵူၼ်းပျၢၼ်ႇၵႂၢမ်းမႂ်း ၵႃႈတီႈၵူၼ်းတင်းလၢႆလႄႈ ပဵၼ်ၵေႃႉဢၼ်တၢင်သူပ်းတၢင်လိၼ်ႉမႂ်းဢေႃႈ။ မႂ်းၵေႃႈတၵ်းပဵၼ်ၵေႃႉဢၼ်တၢင်တူဝ်ၽြႃးပဵၼ်ၸဝ်ႈတီႈမၼ်းဢေႃႈ။- 17မႂ်းတၵ်းလႆႈယိပ်းၵမ်ၶွၼ်ႉတဝ်ႉဢၼ်မႂ်းတၵ်းဢဝ်ၼႄပျႃးၼီႉမိၵ်ႈသၢၵ်ႈသေႇၼၼ်ႉၼႆႉဝႆႉ ၵႃႈၼႂ်းမိုဝ်းမႂ်းဢေႃႈ၊ ဝႃႈၼင်ႇၼႆဢေႃႈ။
မူဝ်းသေႇၶိုၼ်းမိူဝ်းမိူင်းဢေႇၵိပ်ႉတူႉ
18 မူဝ်းသေႇၵေႃႈ ၶိုၼ်းမိူဝ်းၵႂႃႇ ၵႃႈတီႈပူႇၼၢႆးမၼ်းယေႇသရေႃးလႄႈလၢတ်ႈတီႈမၼ်းလႄႈဝႃႈ၊ ၶႅၼ်းတေႃႈပၼ်ဢၶႂၢင်ႉႁႂ်ႈၵဝ်ၶႃႈလႆႈၵႂႃႇသူႇၵႂႃႇၸႂ်းၵႃႈတီႈပီႈၼွင်ႉၸိူဝ်ႉၶိူဝ်းၵဝ်ၶႃႈ ဢၼ်မီးယူႇ ၵႃႈၼႂ်းမိူင်းဢေႇၵိပ်ႉတူႉပုၼ်ႉလႄႈ လူတူၺ်းလွင်ႈဢၼ်ၶဝ် ဢသၢၵ်ႈယင်းလိပ်းယူႇႁိုဝ်ၼၼ်ႉသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊ ယေႇသရေႃးၵေႃႈ ၶိုၼ်းလၢတ်ႈတီႈမူဝ်းသေႇလႄႈဝႃႈ၊ ၵႂႃႇၼိမ်ၼိမ်တႃႉ၊ ဝႃႈၼင်ႇၼႆဢေႃႈ။- 19ထႃႇဝရႃႉၽြႃးၵေႃႈလၢတ်ႈတီႈမူဝ်းသေႇၵႃႈၼႂ်းမိူင်းမီႉတျၼ်ႇၼၼ်ႉလႄႈဝႃႈ၊ ၶိုၼ်းမိူဝ်းၵႂႃႇၵႃႈတီႈမိူင်းဢေႇၵိပ်ႉတူႉပုၼ်ႉတႃႉ၊ ၶဝ်ၸိူဝ်းဢၼ်ႁႃဢသၢၵ်ႈမႂ်းတင်းသဵင်ႈတင်းလူင်ၼၼ်ႉတၢႆယဝ်ႉ၊ ဝႃႈၼင်ႇၼႆဢေႃႈ။- 20မိူဝ်ႈၼၼ်ႉ မူဝ်းသေႇဢဝ်မေးမၼ်းတင်းလုၵ်ႈၸၢႆးမၼ်းတင်းလၢႆ တၢင်ႇသႂ်ႇၵႃႈၼိူဝ်လီႈလႄႈ ဢဝ်တင်းမိုဝ်းယိပ်းၵမ်ၶွၼ်ႉတဝ်ႉၽြႃးပဵၼ်ၸဝ်ႈၼၼ်ႉသေယဝ်ႉ၊ မိူဝ်းၵႂႃႇၵႃႈတီႈမိူင်းဢေႇၵိပ်ႉတူႉဢေႃႈ။- 21ထႃႇဝရႃႉၽြႃးၵေႃႈသင်ႇလၢတ်ႈဝႆႉတီႈမူဝ်းသေႇလႄႈဝႃႈ၊ မိူဝ်ႈဢၼ်မႂ်းၶိုၼ်းမိူဝ်းၵႂႃႇႁွတ်ႈထိုင်ၵႃႈတီႈမိူင်းဢေႇၵိပ်ႉတူႉပုၼ်ႉၼၼ်ႉၸိုင်၊ ၼႄပျႃးလွင်ႈတၢင်းဢၼ်လီဢၢမ်းၵႃႈဢၼ်ၵဝ်ဢၢပ်ႈဝႆႉ ၵႃႈၼႂ်းမိုဝ်းမႂ်းတင်းသဵင်ႈတင်းလူင်ၸိူဝ်းၼၼ်ႉ ၵႃႈတီႈၽၢႆႇၼႃႈၶုၼ်ႁေႃၶမ်း ၽႃႇရေႃးတႃႉ။ ပိၵ်ႉသမ်ႉႁဵတ်းၸိူဝ်ႉၼင်ႇၼၼ်သေၵေႃႈ၊ ၵဝ်တၵ်းႁႂ်ႈႁူဝ်ၸႂ်မၼ်းၵႅၼ်ႇၶႅင်လႄႈ မၼ်းၵေႃႈယင်းဢမ်ႇပွႆႇၵူၼ်းတင်းလၢႆၼၼ်ႉလႄႈ တၵ်းယူႇဢေႃႈ။- 22တီႈၶုၼ်ႁေႃၶမ်းၽႃႇရေႃးၵေႃႈ မႂ်းတၵ်းလႆႈမွၵ်ႇလၢတ်ႈလႄႈဝႃႈ၊ ထႃႇဝရႃႉၽြႃးဝႃႈ၊ ဢီႉသရေႇလႃႉ ပဵၼ်လုၵ်ႈၸၢႆးၵဝ်ဢေႃႈ။ ပဵၼ်လုၵ်ႈၸၢႆးတူၼ်ႈၵဝ်ဢေႃႈ။- 23ၵဝ်မီးဢၶႂၢင်ႉ ႁႂ်ႈပွႆႇလုၵ်ႈၸၢႆးၵဝ် ႁႂ်ႈလႆႈႁဵတ်းဝၢတ်ႈတီႈၵဝ်ဢေႃႈ။ ပေႃးမႂ်းထဵင်ပႅတ်ႈလႄႈဝႃႈ၊ ဢမ်ႇပွႆႇၵူၺ်ႉ၊ ဝႃႈၼင်ႇၼႆၸိုင်၊ ၵဝ်တၵ်းဢဝ်လုၵ်ႈၸၢႆးမႂ်း၊ လုၵ်ႈၸၢႆးတူၼ်ႈမႂ်းၼၼ်ႉ တၢႆပႅတ်ႈဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။
24ၼႂ်းမိူဝ်ႈဢၼ်မၼ်းယင်းတိုၵ်ႉၵႂႃႇယူႇၼၼ်ႉၸိုင်၊ ထႃႇဝရႃႉၽြႃးထူပ်းမူဝ်းသေႇၵႃႈတီႈပၢင်လိုဝ်ႈလႄႈ ၵျၢမ်ႇႁႃဢဝ်မၼ်းတၢႆဢေႃႈ။- 25မိူဝ်ႈၼၼ်ႉၸီႉပေႃးရႃႉ ဢဝ်မိတ်ႈမၢၵ်ႇႁိၼ်လႄႈထိူဝ်တႅပ်းပၢႆၼင်လုၵ်ႈၸၢႆးမၼ်းပႅတ်ႈသေယဝ်ႉ၊ ဢဝ်ၶျႃးဝႆႉၵႃႈတီႈႁိမ်းတိၼ် ၽူဝ်မၼ်းသေလႄႈဝႃႈ၊ တီႈၵဝ်ၶႃႈၼႆႉၸိုင်၊ ၸဝ်ႈပဵၼ်ၽူဝ်ဢၼ်ၸၢပ်ႈသႅင်ႇၵၼ်တင်းလိူတ်ႈဢေႃႈ၊ ဝႃႈၼင်ႇၼႆဢေႃႈ။- 26မိူဝ်ႈၼၼ်ႉမၼ်းၸဝ်ႈ ပွႆႇမၼ်းလွတ်ႈသေဢေႃႈ။ မေးမၼ်းၵေႃႈလၢတ်ႈလႄႈဝႃႈ၊ ၵွပ်ႈပိူဝ်ႈမင်ႇၵလႃႇတၢင်းဢၼ်ထိူဝ်ႁိမ်းၼၼ်ႉလႄႈ တီႈၵဝ်ၶႃႈၼႆႉၸိုင်၊ ၸဝ်ႈပဵၼ်ၽူဝ်ဢၼ် ၸၢပ်ႈသႅင်ႇၵၼ်တင်းလိူတ်ႈဢေႃႈ၊ ဝႃႈၼင်ႇၼႆဢေႃႈ။
27ထႃႇဝရႃႉၽြႃးၵေႃႈ လၢတ်ႈတီႈဢႃႇရုၼ်ႇလႄႈဝႃႈ၊ ၵႂႃႇၵႃႈတီႈထိူၼ်ႇပုၼ်ႉ ႁႂ်ႈလႆႈႁပ်ႉႁူဝ်တၢင်းမူဝ်းသေႇတႃႉ၊ ဝႃႈၼင်ႇၼႆလႄႈ၊ မိူဝ်ႈဢၼ်မၼ်းၵႂႃႇၼၼ်ႉၸိုင်၊ မၼ်းထူပ်းႁၼ်မူဝ်းသေႇ ၵႃႈၼိူဝ်လွႆၽြႃးပဵၼ်ၸဝ်ႈလႄႈ ႁဵတ်းတၢင်းဢၼ်ၸုပ်ႇၼူမ်ဢေႃႈ။- 28မူဝ်းသေႇၵေႃႈမွၵ်ႇလၢတ်ႈၵႂၢမ်းထႃႇဝရႃႉၽြႃးဢၼ်ပွႆႇၸႂ်ႉမၼ်းမႃးၼၼ်ႉ တင်းသဵင်ႈတင်းလူင်ဢိၵ်ႇတင်း ၼီႉမိၵ်ႈသၢၵ်ႈသေႇ ၵႃႈဢၼ်မၼ်းၸဝ်ႈသင်ႇလၢတ်ႈဝႆႉၸိူဝ်းၼၼ်ႉတီႈဢႃႇရုၼ်ႇဢေႃႈ။
29 မူဝ်းသေႇတင်းဢႃႇရုၼ်ႇၼၼ်ႉ ဢွၼ်ၵၼ်ၵႂႃႇလႄႈ ႁႂ်ႈၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ ၸူႉၵၼ်တုမ်ၵၼ်သေယဝ်ႉ၊- 30ဢႃႇရုၼ်ႇၶိုၼ်းမွၵ်ႇလၢတ်ႈၵႂၢမ်း ဢၼ်ထႃႇဝရႃႉၽြႃးမီးဢမိင်ႉတီႈမူဝ်းသေႇတင်းသဵင်ႈတင်းလူင်ၼၼ်ႉလႄႈ ၼႄပျႃးၼီႉမိၵ်ႈသၢၵ်ႈသေႇတင်းလၢႆ ၵႃႈတီႈသိုဝ်ႈၼႃႈတႂ်ႈတႃၵူၼ်းၸိူဝ်းၼၼ်ႉဢေႃႈ။- 31ၵူၼ်းၸိူဝ်းၼၼ်ႉၵေႃႈယုမ်ႇဢေႃႈ။ မိူဝ်ႈဢၼ်ၶဝ်လႆႈငိၼ်းလွင်ႈဢၼ်ထႃႇဝရႃႉၽြႃးမႃးလူမႃးတူၺ်း ၵူၼ်းမဵဝ်းဢီႉသရေႇလႃႉတင်းလၢႆ ဢိၵ်ႇတင်းလွင်ႈဢၼ်မၼ်းၸဝ်ႈ လႆႈႁူႉလႆႈႁၼ်တၢင်းဢၼ်ၶဝ်လႆႈၶၢမ်ႇတုၵ်ႉၶႃႉတၢင်းၽၢၼ်ၼၼ်ႉၸိုင်၊ ၶဝ်ဢွၼ်ၵၼ်ၵူမ်ႈၵွမ်းႁူဝ်လႄႈ ၵူဝ်းၵႂၢႆႇဢေႃႈ။
Currently Selected:
ဢွၵ်ႇၵႂႃႇ 4: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
