ဢွၵ်ႇၵႂႃႇ 5
5
မူဝ်းသေႇတင်းဢႃႇရုၼ်ႇၶဝ်ႈၸူးၶုၼ်ႁေႃၶမ်း
1လိုၼ်းၼၼ်ႉမူဝ်းသေႇတင်းဢႃႇရုၼ်ႇဢွၼ်ၵၼ်ၶဝ်ႈလႄႈလဝ်ႊလၢတ်ႈတီႈ ၶုၼ်ႁေႃၶမ်းၽႃႇရေႃးလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈၵူၼ်းမဵဝ်းဢီႉသရေႇလႃႉၼၼ်ႉဝႃႈၸမ်ႉ၊ ပွႆႇၵူၼ်းၵဝ်တင်းလၢႆၵႂႃႇ ႁႂ်ႈၶဝ်လႆႈၶၢမ်ႇပွႆးပုၼ်ႈၵဝ်ၵႃႈတီႈၼႂ်းထိူၼ်ႇပုၼ်ႉတႃႉ၊ ဝႃႈၼင်ႇၼႆတီႈၶႃႈယဝ်ႉ၊ ဝႃႈၼင်ႇၼႆဢေႃႈ။- 2ၶုၼ်ႁေႃၶမ်းၽႃႇရေႃးၵေႃႈလၢတ်ႈလႄႈဝႃႈ၊ လွင်ႈၼင်ႇႁိုဝ် ၵဝ်တၵ်းလႆႈထွမ်ႇဢဝ်ၵႂၢမ်းထႃႇဝရႃႉၽြႃးလႄႈ ပွႆႇၵူၼ်းမဵဝ်းဢီႉသရေႇလႃႉတင်းလၢႆၵႂႃႇၸိုင်၊ ၽြႃးၼၼ်ႉၸမ်ႉ၊ ပဵၼ်ၽူႈလႂ်။ ၵဝ်ဢမ်ႇႁူႉၽြႃးၼၼ်ႉ။ ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉၵေႃႈ၊ ၵဝ်တၵ်းဢမ်ႇပွႆႇၵႂႃႇၵူၺ်ႉ၊ ဝႃႈၼင်ႇၼႆဢေႃႈ။- 3သွင်ၶႃၵေႃႈလဝ်ႊလၢတ်ႈလႄႈဝႃႈ၊ ၽြႃးပဵၼ်ၸဝ်ႈၵူၼ်းမဵဝ်းႁေႇပြႄးၼၼ်ႉ ႁူပ်ႉထူပ်းၵၼ်တင်းၶႃႈၸဝ်ႈႁဝ်းၸိူဝ်းၼႆႉတီႈၶႃႈယဝ်ႉ။ ၶႅၼ်းတေႃႈပၼ်ဢၶႂၢင်ႉ ႁႂ်ႈၶႃႈၸဝ်ႈႁဝ်းၶဝ်လႆႈၵႂႃႇၵႃႈတီႈထိူၼ်ႇပုၼ်ႉ ၶၢဝ်းတၢင်းသေသၢမ်ဝၼ်းၼိုင်ႈလႄႈ ပုၵ်ႈၸေႃႇယိတ်ႈတီႈ ထႃႇဝရႃႉၽြႃး ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်ၼၼ်ႉသေၵမ်းတီႈၶႃႈ၊ ပေႃးဢမ်ႇၼၼ် ၵူဝ်မၼ်းၸဝ်ႈတၵ်းဢဝ်တင်းၽေးဢၼ်ပဵၼ်ၵႃႇလႃႉႁႃႈလႅင်မိူင်း၊ ၽေးလၢပ်ႇၽေးလႅဝ်း၊ ပၼ်တၢမ်ႇတီႈၶႃႈၸဝ်ႈႁဝ်းၶဝ်တီႈၶႃႈဢေႃႈ၊ ဝႃႈၼင်ႇၼႆဢေႃႈ။- 4ၶုၼ်ႁေႃၶမ်းဢေႇၵိပ်ႉတူႉၵေႃႈ လၢတ်ႈတီႈၶဝ်လႄႈဝႃႈ၊ မူဝ်းသေႇတင်းဢႃႇရုၼ်ႇဢိူၺ်း၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူႁဵတ်းႁႂ်ႈ တၢင်းႁဵတ်းၵူၼ်းၸိူဝ်းၼႆႉထၢတ်ႇၵႂႃႇၼင်ႇႁိုဝ်။ ဢွၼ်ၵၼ်ၵႂႃႇလႄႈ သၢင်ႈႁဵတ်းၵၢၼ်တၢင်းႁဵတ်းသူ ဢၼ်ယၢပ်ႇၼႃႇၽိုတ်ႇၼႃႇၼၼ်ႉယူႇတႃႉ၊ ဝႃႈၼင်ႇၼႆဢေႃႈ။- 5ၵမ်းၼၼ်ႉ ၶုၼ်ႁေႃၶမ်းၽႃႇရေႃး သမ်ႉလၢတ်ႈထႅင်ႈလႄႈဝႃႈ၊ တူၺ်းလူး၊ ၵႃႈၼႂ်းမိူင်းၸဝ်ႈၼႆႉ၊ မီးၵူၼ်းမဵဝ်းၼၼ်ႉၼမ်ၼႃႇဢေႃႈ။ သူႁဵတ်းႁႂ်ႈၶဝ်ဢမ်ႇၵိုတ်ႉႁၢပ်ႇၵၢၼ်တၢင်းႁဵတ်းၶဝ် ဢၼ်ယၢပ်ႇၼႃႇၽိုတ်ႇၼႃႇၼၼ်ႉလူင်ပႄႇ၊ ဝႃႈၼင်ႇၼႆလႄႈ။- 6ၼႂ်းဝၼ်းၼၼ်ႉ မီးဢမိင်ႉတီႈၵူၼ်းဢၼ်ဢုပ်ႉဢၼ်ထိင်း ဢိၵ်ႇတင်းၵူၼ်းဢၼ်သေႃႇဢၼ်ၵျၢပ်ႈတင်းလၢႆလႄႈဝႃႈ၊- 7ယႃႇပေမႅင်ႇပေပၼ်ၽိူင်းပုၼ်ႈဢၼ်ၶဝ် တၵ်းႁဵတ်းဢုတ်ႇ ၵႃႈၼင်ႇဢၼ်ပၼ်တီႈၶဝ်မိူဝ်ႈဢွၼ်တၢင်းၼၼ်ႉ။ ႁႂ်ႈၶဝ်ၵႂႃႇႁႃဢဝ်ၽိူင်းပုၼ်ႈၶဝ်ၵူၺ်းတႃႉ။- 8တၢင်းဢၼ်ၼပ်ႉဢၢၼ်ႇၶႅပ်းဢုတ်ႇၸမ်ႉ၊ တၵ်းလႆႈၸႂ်ႉၶဝ်ႁဵတ်းမိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉဢေႃႈ။ ယႃႇပေႁႂ်ႈယွမ်းသေဢိတ်း။ ၶဝ်ၶၢၼ်ႉၶဝ်ဢိူၼ်ၼႃႇလူင်လၢင်ဢေႃႈ။ ၵွပ်ႈႁွႆးၼႆႉလႄႈ ၶဝ်ၸင်ႇႁွင်ႉသႅၼ်ႇလႄႈဝႃႈ၊ ဢွၼ်ၵၼ်ၵႂႃႇလႄႈပုၵ်ႈၸေႃႇယိတ်ႈ တီႈၽြႃးပဵၼ်ၸဝ်ႈတႃႉႁဝ်း၊ ဝႃႈၼင်ႇၼႆယူႇဢေႃႈ။- 9ပိူဝ်ႈၼႆလႄႈ ၵျၢပ်ႈထၢပ်ႈႁႂ်ႈၶဝ်ႁဵတ်းတႃႉ။ ႁႂ်ႈၶဝ်ႁဵတ်းယၢပ်ႇယၢပ်ႇၽိုတ်ႇၽိုတ်ႇတႃႉ။ ယႃႇပေႁႂ်ႈထွမ်ႇဢဝ်ၵႂၢမ်းဢၼ်ပႅတ်ႉဢၼ်လႅၼ်ၼႆႉ၊ ဝႃႈၼင်ႇၼႆဢေႃႈ။
10ၵူၼ်းဢၼ်ဢုပ်ႉဢၼ်ထိင်း ဢိၵ်ႇတင်းၵူၼ်းဢၼ်သေႃႇဢၼ်ၵျၢပ်ႈၸိူဝ်းၼၼ်ႉ ဢွၼ်ၵၼ်ဢွၵ်ႇၵႂႃႇလႄႈလၢတ်ႈတီႈၵူၼ်းတင်းလၢႆလႄႈဝႃႈ၊ ၶုၼ်ႁေႃၶမ်းၽႃႇရေႃးလၢတ်ႈလႄႈဝႃႈ၊ ၵဝ်ဢမ်ႇပၼ်ၽိူင်းတီႈသူယဝ်ႉ။- 11ဢွၼ်ၵၼ်ၵႂႃႇႁႃဢဝ်ၽိူင်း ၵႃႈတီႈဢၼ်သူတၵ်းထူပ်းလႆႈၼၼ်ႉတႃႉ။ ၼႂ်းဝႃႈၼၼ်သေၵေႃႈ တၢင်းႁဵတ်းဢၼ် တၵ်းလႆႈ ႁဵတ်းၼႆႉၸိုင်၊ ဢမ်ႇလႆႈယွမ်းသေဢိတ်း၊ ဝႃႈၼင်ႇၼႆမႃးယဝ်ႉ၊ ဝႃႈၼင်ႇၼႆဢေႃႈ။- 12ပိူဝ်ႈၼႆလႄႈ ၵူၼ်းၸိူဝ်းၼၼ်ႉၽၢတ်ႇၽႄၵၼ်ၵႂႃႇၵႃႈၼႂ်းမိူင်းဢေႇၵိပ်ႉတူႉၼၼ်ႉၵူႈတီႈၵူႈလႅၼ်ႁႂ်ႈလႆႈႁႃဢဝ်မုၼ်ႈပုၼ်ႈၽိူင်းဢေႃႈ။- 13ၵူၼ်းဢၼ်ဢုပ်ႉဢၼ်ထိင်းတင်းလၢႆၵေႃႈ တိုၵ်းယူင်းၶဝ်လႄႈဝႃႈ၊ ဢွၼ်ၵၼ်ႁဵတ်းႁႂ်ႈယဝ်ႉႁႂ်ႈတူဝ်ႈၸွမ်းၵႃႈၼင်ႇဢၼ်သူလႆႈႁဵတ်းၵူႈဝၼ်း ၼႂ်းၶိင်ႇၵႃႇလႃႉဢၼ်လႆႈၽိူင်းယဝ်ႉၼၼ်ႉတႃႉ၊ ဝႃႈၼင်ႇၼႆဢေႃႈ။- 14မိူဝ်ႈၼၼ်ႉ ပိူၼ်ႈပေႃႉယႅၼ်ႉၵူၼ်းမဵဝ်းဢီႉသရေႇလႃႉ ဢၼ်ပဵၼ်ၵူၼ်းဢၼ်သေႃႇဢၼ်ၵျၢပ်ႈ ဢၼ်ၵူၼ်းဢၼ်ဢုပ်ႉဢၼ်ထိင်းၶုၼ်ႁေႃၶမ်းၽႃႇရေႃးၶၢၼ်းဝႆႉၸိူဝ်းၼၼ်ႉလႄႈ ၸႅတ်ႈထၢမ်ဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူဢမ်ႇႁႂ်ႈၵၢၼ်တၢင်းႁဵတ်းယဝ်ႉတူဝ်ႈ ဝၼ်းမိူဝ်ႈဝႃးတင်းဝၼ်းမိူဝ်ႈၼႆႉ ၸွမ်းၵႃႈၼင်ႇဢၼ်ႁဵတ်းမိူဝ်ႈဢွၼ်တၢင်းၼၼ်ႉၼင်ႇႁိုဝ်။ ဝႃႈၼင်ႇၼႆဢေႃႈ။- 15မိူဝ်ႈၼၼ်ႉၵူၼ်းမဵဝ်းဢီႉသရေႇလႃႉ ဢၼ်ပဵၼ်ၵူၼ်းဢၼ်သေႃႇဢၼ်ၵျၢပ်ႈၸိူဝ်းၼၼ်ႉ ဢွၼ်ၵၼ်ၵႂႃႇလႄႈႁွင်ႉသႅၼ်ႇတီႈၶုၼ်ႁေႃၶမ်းၽႃႇရေႃးလႄႈဝႃႈ၊ ႁဵတ်းသင်လႄႈၸဝ်ႈႁဝ်းၸီႇယၢင်ႇတီႈၶႃႈၸဝ်ႈႁဝ်းၸိူဝ်းၼႆႉ ၸိူဝ်ႉၼင်ႇၼႆၼင်ႇႁိုဝ်တီႈၶႃႈ၊- 16ၽိူင်းၸိုင်ဢမ်ႇပၼ်တီႈၶႃႈၸဝ်ႈႁဝ်းၸိူဝ်းၼႆႉတီႈၶႃႈ၊ ၵူၼ်းဢၼ်ဢုပ်ႉဢၼ်ထိင်းတင်းလၢႆလၢတ်ႈတီႈၶႃႈၸဝ်ႈႁဝ်းၸိူဝ်းၼႆႉလႄႈဝႃႈ၊ ဢွၼ်ၵၼ်ႁဵတ်းဢုတ်ႇတႃႉ၊ ဝႃႈၼင်ႇၼႆယူႇလႄႈ ၶႃႈၸဝ်ႈႁဝ်းၸိူဝ်းၼႆႉ လႆႈၶၢမ်ႇတၢင်းဢၼ်ပေႃႉဢၼ်ယႅၼ်ႉတီႈၶႃႈဢေႃႈ။ ဢပႅတ်ႈၸိုင် မီးယူႇၵႃႈတီႈၵူၼ်းၸဝ်ႈႁဝ်းၸိူဝ်းၼၼ်ႉၵူၺ်းတီႈၶႃႈဢေႃႈ၊ ဝႃႈၼင်ႇၼႆဢေႃႈ။- 17မၼ်းၸဝ်ႈၵေႃႈလၢတ်ႈလႄႈဝႃႈ၊ သူၶၢၼ်ႉသူဢိူၼ်ဢေႃႈ။ ၶၢၼ်ႉဢိူၼ်ၼႃႇဢေႃႈ။ ၵွပ်ႈႁွႆးၼႆႉလႄႈ သူၸင်ႇဝႃႈ၊ ဢွၼ်ၵၼ်ၵႂႃႇလႄႈ ပုၵ်ႈၸေႃႇယိတ်ႈတီႈထႃႇဝရႃႉၽြႃးတႃႉႁဝ်း၊ ဝႃႈၼင်ႇၼႆဢေႃႈ။- 18ၵွပ်ႈပိူဝ်ႈလွင်ႈၼႆႉလႄႈ၊ တေႃႈလဵဝ်ၼႆႉဢွၼ်ၵၼ်ၵႂႃႇလႄႈႁဵတ်းတႃႉ။ ဢမ်ႇလႆႈပၼ်ၽိူင်းတီႈသူယဝ်ႉ။ ၵူၺ်းၵႃႈ ပုၼ်ႈတႃႇမၢၵ်ႇဢုတ်ႇၸိုင်၊ သူတၵ်းလႆႈပၼ် မိူၼ်ၸိူဝ်ႉၼင်ႇၵူႈပွၵ်ႈၼၼ်ႉဢေႃႈ၊ ဝႃႈၼင်ႇၼႆဢေႃႈ။
19ပိူဝ်ႈဢၼ်ဢမိင်ႉၸဝ်ႈမီးလႄႈဝႃႈ၊ ပုၼ်ႈတႃႇမၢၵ်ႇဢုတ်ႇဢၼ်တၵ်းလႆႈႁဵတ်းၵူႈဝၼ်းၼၼ်ႉဢမ်ႇလႆႈယွမ်းသေဢိတ်း၊ ဝႃႈၼင်ႇၼႆၼၼ်ႉလႄႈ၊ ၵူၼ်းမဵဝ်းဢီႉသရေႇလႃႉ ဢၼ်ပဵၼ်ၵူၼ်းဢၼ်သေႃႇဢၼ်ၵျၢပ်ႈၸိူဝ်းၼၼ်ႉ ႁူႉႁၼ်လွင်ႈဢၼ်ဢမူႉဢၼ်ၼၵ်းၼႃႇ ႁွတ်ႈမႃးၵႃႈၼိူဝ်ၶဝ်ယဝ်ႉၼၼ်ႉဢေႃႈ။- 20ၼႂ်းမိူဝ်ႈဢၼ်ၶဝ်ဢွၵ်ႇသေၵႃႈတီႈၶုၼ်ႁေႃၶမ်းၽႃႇရေႃးၵႂႃႇယူႇၼၼ်ႉၸိုင်၊ ၶဝ်ထူပ်းႁၼ်မူဝ်းသေႇတင်းဢႃႇရုၼ်ႇ ဢၼ်ၸုၵ်းထႃႈယူႇၵႃႈတီႈသဵၼ်ႈတၢင်းၼၼ်ႉလႄႈ လၢတ်ႈတီႈသွင်ၶႃလႄႈဝႃႈ၊- 21ႁႂ်ႈထႃႇဝရႃႉၽြႃးတူၺ်းသွင်ၶိူဝ်လႄႈ ၸီႇယၢင်ႇသေၵမ်းလူၺ်ႈ။ လွင်ႈမၼ်းၸမ်ႉ သူႁဵတ်းႁႂ်ႈၶုၼ်ႁေႃၶမ်းၽႃႇရေႃး ဢိၵ်ႇတင်းၶႃႈမၼ်းၵူၼ်းမၼ်းတင်းလၢႆ လီႁင်ႈႁဝ်းဢိၵ်ႇတင်းႁႂ်ႈလႆႈဢဝ်လၢပ်ႇဢဝ်လႅဝ်းသႂ်ႇဝႆႉၼႂ်းမိုဝ်းၶဝ် ႁႂ်ႈၶဝ်လႆႈဢဝ်ႁဝ်းတၢႆယဝ်ႉလူင်ပႄႇ၊ ဝႃႈၼင်ႇၼႆဢေႃႈ။
22 မူဝ်းသေႇၵေႃႈၶိုၼ်းၵႂႃႇၵႃႈတီႈထႃႇဝရႃႉၽြႃးလႄႈ လဝ်ႊလၢတ်ႈဝႃႈ၊ ဢူဝ်းၸဝ်ႈႁဝ်း၊ ႁဵတ်းႁိုဝ်လႄႈ ၸဝ်ႈႁဝ်းၼိၵ်ႈၸၢၵ်ႈငႅၼ်းသႄးၵူၼ်းမဵဝ်းၼႆႉၼင်ႇႁိုဝ်တီႈၶႃႈ၊ ႁဵတ်းႁိုဝ်လႄႈ ၸဝ်ႈႁဝ်းပွႆႇၸႂ်ႉၶႃႈၸဝ်ႈၼင်ႇႁိုဝ်တီႈၶႃႈ၊- 23ၸႃႉၸဵမ်ဝၼ်းဢၼ်ၶႃႈၸဝ်ႈ ၶဝ်ႈၸူးၵႃႈတီႈၶုၼ်ႁေႃၶမ်းၽႃႇရေႃး ႁႂ်ႈလႆႈဢိင်ၼႃႇမႃႉၸိုဝ်ႈသဵင်ၸဝ်ႈႁဝ်းသေလႄႈ လဝ်ႊလၢတ်ႈၼၼ်ႉလႄႈ မၼ်းၼိၵ်ႈၸၢၵ်ႈငႅၼ်းသႄးၵူၼ်းမဵဝ်းၼႆႉတီႈၶႃႈယဝ်ႉ။ ၸဝ်ႈႁဝ်းၸိုင်၊ ဢမ်ႇၵႄႇၶျွတ်ႈဢဝ်ၵူၼ်းၸဝ်ႈႁဝ်းတင်းလၢႆလႃးလႃးတီႈၶႃႈ၊ ဝႃႈၼင်ႇၼႆဢေႃႈ။
Currently Selected:
ဢွၵ်ႇၵႂႃႇ 5: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
