ဢွၵ်ႇၵႂႃႇ 6

1ထႃႇဝရႃႉၽြႃးၵေႃႈ လၢတ်ႈတီႈမူဝ်းသေႇလႄႈဝႃႈ၊ လွင်ႈဢၼ်ၵဝ်တၵ်းႁဵတ်းတီႈၶုၼ်ႁေႃၶမ်းၽႃႇရေႃးၸိူဝ်ႉၼင်ႇႁိုဝ်ၼၼ်ႉၸိုင်၊ တေႃႈလဵဝ်ၼႆႉမႂ်းတၵ်းႁူႉဢေႃႈ။ မၼ်းၼၼ်ႉတၵ်းဢဝ်တင်းမိုဝ်းမၼ်း ဢၼ်ႁႅင်းယႂ်ႇၼႃႇလႄႈ ပွႆႇၵူၼ်းၵဝ်တင်းလၢႆဢေႃႈ။ မၼ်းတၵ်းဢဝ်တင်းမိုဝ်းမၼ်း ဢၼ်ႁႅင်းယႂ်ႇၼႃႇလႄႈ ႁေႃႈၶဝ်ဢွၵ်ႇသေၵႃႈၼႂ်းမိူင်းမၼ်းဢေႃႈ၊ ဝႃႈၼင်ႇၼႆဢေႃႈ။

ၽြႃးပဵၼ်ၸဝ်ႈပၼ်ၵတီႉလွင်ႈၵႄႇသႄႇၼုၵ်ႈဢဝ်

2ၵမ်းၼၼ်ႉ ၽြႃးပဵၼ်ၸဝ်ႈသမ်ႉဝႆႉပျႃႇတိၵ်ႈတီႈမူဝ်းသေႇလႄႈဝႃႈၸမ်ႉ၊ ၵဝ်ပဵၼ်ထႃႇဝရႃႉၽြႃးဢေႃႈ။- 3ၵဝ်ဢဝ်တင်းၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈ၊ ၸဝ်ႈဢၼၼ်ႇတႃႉတၼ်းၶူဝ်းၵူၺ်းလႄႈ ပေႃႇမႃးတီႈဢႃႇပြႃႇႁၢမ်ႇ၊ ဢီႉၸၢၵ်ႈ တင်းယႃႇၵုပ်ႈဢေႃႈ။ ၵူၺ်းၵႃႈ ဢဝ်တင်းၼႃႇမႃႉၸိုဝ်ႈသဵင်ထႃႇဝရႃႉၽြႃးၼႆႉလႄႈ ၶဝ်ဢမ်ႇႁူႉၸၵ်းၵဝ်ဢေႃႈ။- 4လွင်ႈၼင်ႇႁိုဝ်တၵ်းလႆႈဢဝ် မိူင်းၶႃႇၼၢၼ်ႇ၊ မိူင်းဢၼ်ၶဝ်သွၼ်ႈပိုင်ႈလႄႈပဵၼ်ၶႅၵ်ႇယူႇၼၼ်ႉ ပၼ်တီႈၶဝ်ၸိုင်၊ ၵဝ်ႁႂ်ႈပတီႉၺိၺ်ႇ ဢၼ်ၵဝ်ႁဵတ်းလူၺ်ႈၵၼ်တင်းၶဝ်ဝႆႉၼၼ်ႉ တႄႇဝႆႉယူႇယဝ်ႉ။- 5ၵဝ်လႆႈငိၼ်းသဵင်ပွင်ႉသဵင်ၶၢင်းၵူၼ်းမဵဝ်းဢီႉသရေႇလႃႉဢၼ်ၵူၼ်းဢေႇၵိပ်ႉတူႉတင်းလၢႆ ႁႂ်ႈၶၢမ်ႇႁဵတ်းၶႃႈၼၼ်ႉယဝ်ႉ။ ပတီႉၺိၺ်ႇ ၵဝ်ၵေႃႈ ၵဝ်ၶုၵ်းၸႂ်လႆႈၶႆႈၸႂ်ထူပ်းယဝ်ႉ။- 6ပိူဝ်ႈၼႆလႄႈ ၵႂၢမ်းဢၼ်မႂ်းတၵ်းလႆႈလၢတ်ႈတီႈၵူၼ်းမဵဝ်းဢီႉသရေႇလႃႉၸမ်ႉ၊ ၵဝ်ပဵၼ်ထႃႇဝရႃႉၽြႃးဢေႃႈ။ ၵဝ်တၵ်းပွႆႇသူလွတ်ႈသေၵႃႈၼႂ်းၵၢၼ်တၢင်းႁဵတ်းၵူၼ်းဢေႇၵိပ်ႉတူႉ ဢၼ်ယၢပ်ႇၼႃႇၽိုတ်ႇၼႃႇလႄႈ ၼုၵ်ႈဢဝ်သူၵႃႈၼႂ်းတၢင်းဢၼ် ၶဝ်ၼိၵ်ႈၸၢၵ်ႈငႅၼ်းသႄးၼၼ်ႉဢေႃႈ။ ၵဝ်တၵ်းဢဝ်တင်းတၢင်းဢၼ်ယိုၼ်ႈၶႅၼ်ယိုၼ်ႈမိုဝ်းဢိၵ်ႇတင်း တၢင်းဢၼ်ပၼ်တၢမ်ႇဢၼ်ယႂ်ႇၼႃႇ ထုတ်ႇဢဝ်သူဢေႃႈ။- 7ၵဝ်တၵ်းသိမ်းဢဝ်သူ ႁႂ်ႈသူလႆႈပဵၼ်မဵဝ်းၵူၼ်းၵဝ်ဢေႃႈ။ ၵဝ်တၵ်းပဵၼ်ၽြႃးပဵၼ်ၸဝ်ႈသူဢေႃႈ။ သူတၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူဢၼ်ပွႆႇသူလွတ်ႈသေၵႃႈၼႂ်းၵၢၼ်တၢင်းႁဵတ်းၵူၼ်းဢေႇၵိပ်ႉတူႉ ဢၼ်ယၢပ်ႇၼႃႇၽိုတ်ႇၼႃႇၼၼ်ႉဢေႃႈ။- 8ၵဝ်တၵ်းဢဝ်သူၵႂႃႇသူင်ႇ ၵႃႈတီႈမိူင်းဢၼ်ၵဝ်ယုၵ်ႉမိုဝ်းလႄႈဝႃႈ၊ တၵ်းပၼ်တီႈဢႃႇပြႃႇႁၢမ်ႇ၊ ဢီႉၸၢၵ်ႈတင်းယႃႇၵုပ်ႈဢေႃႈ၊ ဝႃႈၼင်ႇၼႆဝႆႉၼၼ်ႉလႄႈ ပၼ်ပုၼ်ႈဢၼ်သူ တၵ်းၶၢမ်ႇဢမူၺ်ႇဢေႃႈ၊ ၵဝ်ပဵၼ်ထႃႇဝရႃႉၽြႃးယဝ်ႉ၊ ဝႃႈၼင်ႇၼႆဢေႃႈ။- 9ပိၵ်ႉသမ်ႉမူဝ်းသေႇၶိုၼ်းလၢတ်ႈတီႈၵူၼ်းမဵဝ်းဢီႉသရေႇလႃႉၸိူဝ်ႉၼင်ႇၼၼ်သေၵေႃႈ၊ ၵွပ်ႈပိူဝ်ႈဢၼ် ၶဝ်လႆႈၶၢမ်ႇတၢင်းဢၼ်ယၢပ်ႇၸႂ်ၽိုတ်ႇၸႂ်ဢိၵ်ႇတင်း တၢင်းဢၼ်ၼိၵ်ႈၸၢၵ်ႈငႅၼ်းသႄး ဢၼ်ၵျၢမ်းၼႃႇၼၼ်ႉလႄႈ၊ ၶဝ်ယင်းဢမ်ႇထွမ်ႇဢမ်ႇဢဝ်ၵႂၢမ်းမူဝ်းသေႇလႄႈယူႇဢေႃႈ။

10ထႃႇဝရႃႉၽြႃးၵေႃႈ မီးဢမိင်ႉတီႈမူဝ်းသေႇလႄႈဝႃႈ၊- 11မႂ်းၶဝ်ႈၸူးၵႃႈတီႈၽႃႇရေႃးၶုၼ်ႁေႃၶမ်းဢေႇၵိပ်ႉတူႉၼၼ်ႉလႄႈ လဝ်ႊလၢတ်ႈလွင်ႈဢၼ်မၼ်းတၵ်းလႆႈပွႆႇ ၵူၼ်းမဵဝ်းဢီႉသရေႇလႃႉ လွတ်ႈသေၵႃႈၼႂ်းမိူင်းမၼ်းၼၼ်ႉတႃႉ၊ ဝႃႈၼင်ႇၼႆဢေႃႈ။- 12မူဝ်းသေႇၵေႃႈ လဝ်ႊလၢတ်ႈၵႃႈတီႈၽၢႆႇၼႃႈထႃႇဝရႃႉၽြႃးလႄႈဝႃႈ၊ ၵူၼ်းမဵဝ်းဢီႉသရေႇလႃႉ ဢမ်ႇထွမ်ႇဢမ်ႇဢဝ်ၵႂၢမ်းဢၼ်ၶႃႈၸဝ်ႈလၢတ်ႈၼၼ်ႉတီႈၶႃႈ။ ပိူဝ်ႈၼႆလႄႈ ၶုၼ်ႁေႃၶမ်းၽႃႇရေႃးတၵ်းထွမ်ႇဢဝ်ၵႂၢမ်းၶႃႈၸဝ်ႈ ဢၼ်ၸၢင်ႈဢဝ်တင်းသူပ်းဢၼ်ဢမ်ႇမီးတၢင်းဢၼ်ထိူဝ်ႁိမ်းလၢတ်ႈၼႆႉ ၸိူဝ်ႉၼင်ႇႁိုဝ်တီႈၶႃႈ၊ ဝႃႈၼင်ႇၼႆဢေႃႈ။- 13ၵူၺ်းၵႃႈထႃႇဝရႃႉၽြႃးသင်ႇလၢတ်ႈတီႈမူဝ်းသေႇတင်းဢႃႇရုၼ်ႇလွင်ႈဢၼ်ၶဝ်တၵ်းလႆႈ ၼုၵ်ႈဢဝ်ၵူၼ်းမဵဝ်းဢီႉသရေႇလႃႉတင်းလၢႆဢွၵ်ႇသေၵႃႈၼႂ်းမိူင်းဢေႇၵိပ်ႉတူႉၼၼ်ႉသေလႄႈ ပွႆႇၸႂ်ႉသွင်ၶႃ ၵႂႃႇၸူးၵႃႈတီႈ ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ ဢိၵ်ႇတင်းၶုၼ်ႁေႃၶမ်းၽႃႇရေႃးဢေႃႈ။

ၸိူဝ်ႉၶိူဝ်းမူဝ်းသေႇတင်းဢႃႇရုၼ်ႇ

14ၵူၼ်းဢၼ်ပဵၼ်ၵႄႇပဵၼ်ႁူဝ် ၼႂ်းပီႈၼွင်ႉၸိူဝ်ႉၶိူဝ်းဢီႉသရေႇလႃႉၸိူဝ်းၼၼ်ႉၸမ်ႉ၊ လုၵ်ႈၸၢႆးရူႉပိၼ်ႇ ဢၼ်ပဵၼ်လုၵ်ႈတူၼ်ႈဢီႉသရေႇလႃႉၼၼ်ႉၸမ်ႉ၊ ပဵၼ်ႁႃႇၼုတ်ႉ၊ ၽႃႇလူႉ၊ ႁေႇၸရုၼ်ႇတင်းၵႃႇမီႉဢေႃႈ။ ၶဝ်ၸိူဝ်းၼႆႉပဵၼ်မဵဝ်းၸိူဝ်ႉၶိူဝ်းရူႉပိၼ်ႇၶေႃၶေႃ ႁင်းၽႂ်ႁင်းမၼ်းဢေႃႈ။- 15လုၵ်ႈၸၢႆးသီႉမုၼ်ႇၸမ်ႉ၊ ပဵၼ်ယေႇမူၺ်ႇလႃႉ၊ ယႃႇမိၼ်ႇ၊ ဢေႃးႁတ်ႉ၊ ယႃႇၶိၼ်ႇ၊ ၸေႃးႁႃႇတင်းသေႃးလႃႉ ဢၼ်ပဵၼ်လုၵ်ႈၸၢႆးမႄႈယိင်းမဵဝ်းၶႃႇၼၼီႉၼၼ်ႉဢေႃႈ။ ၶဝ်ၸိူဝ်းၼႆႉပဵၼ်မဵဝ်းၸိူဝ်ႉၶိူဝ်းသီႉမုၼ်ႇၶေႃၶေႃ ႁင်းၽႂ်ႁင်းမၼ်းဢေႃႈ။- 16လုၵ်ႈၸၢႆးလေႇဝီႉ ဢၼ်ၸွမ်းလူၺ်ႈၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းၸမ်ႉ၊ ပဵၼ်ၵေႇရသုၼ်ႇ၊ ၵေႃႇႁတ်ႉတင်းမေႇရႃႇရီႉဢေႃႈ။ ၶူပ်ႇပီႊဢသၢၵ်ႈလေႇဝီႉၼၼ်ႉ လႆႈပၢၵ်ႇပၢႆသၢမ်သိပ်းပၢႆၸဵတ်းပီႊဢေႃႈ။- 17လုၵ်ႈၸၢႆးၵေႇရသုၼ်ႇ ဢၼ်ၸွမ်းလူၺ်ႈၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းၼၼ်ႉၸမ်ႉ၊ ပဵၼ်လီႉပၼီႉ တင်းသီႉမီႉဢေႃႈ။- 18လုၵ်ႈၸၢႆးၵေႃႇႁတ်ႉၸမ်ႉ၊ ပဵၼ်ဢႃႇမရမ်ႇ၊ ဢီႉၸႁႃႇ၊ ႁေႇပြုၼ်ႇ တင်းဢေႃးၸေးလႃႉဢေႃႈ။ ၶူပ်ႇပီႊဢသၢၵ်ႈ ၵေႃႇႁတ်ႉၼၼ်ႉ လႆႈပၢၵ်ႇပၢႆသၢမ်သိပ်းပၢႆသၢမ်ပီႊဢေႃႈ။- 19လုၵ်ႈၸၢႆးမေႇရႃႇရီႉၸမ်ႉ၊ ပဵၼ်မႁႃႇလီႉ တင်းမူႉသီႉဢေႃႈ။ ၶဝ်ၸိူဝ်းၼႆႉ ပဵၼ်ၸိူဝ်ႉၶိူဝ်းလေႇဝီႉ ၸွမ်းလူၺ်ႈၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းဢေႃႈ။- 20ဢႃႇမရမ်ႇၼၼ်ႉ ပဵၼ်ႁိူၼ်းပဵၼ်ယေးလူၺ်ႈၵၼ်တင်းယေႃးၶႄႇပိတ်ႉ ဢၼ်ပဵၼ်ပႃႈမၼ်းၼၼ်ႉလႄႈ မၼ်းၼၼ်ႉၵိူတ်ႇလဵင်ႉဢႃႇရုၼ်ႇ တင်းမူဝ်းသေႇမႃးဢေႃႈ။ ၶူပ်ႇပီႊဢသၢၵ်ႈဢႃႇမရမ်ႇၼၼ်ႉလႆႈပၢၵ်ႇပၢႆသၢမ်သိပ်းပၢႆၸဵတ်းပီႊဢေႃႈ။- 21လုၵ်ႈၸၢႆးဢီႉၸႁႃႇၸမ်ႉ၊ ပဵၼ်ၵေႃးရႃႉ၊ ၼေႇၽႅတ်ႉ တင်းၸီႉၶရီႉဢေႃႈ။- 22လုၵ်ႈၸၢႆးဢေႃးၸေးလႃႉၸမ်ႉ၊ ပဵၼ်မီႉသေႇလႃႉ၊ ဢေႇလၸႃႇၽၢၼ်ႇ တင်းသီႉသရီႉဢေႃႈ။- 23ဢႃႇရုၼ်ႇၼၼ်ႉပဵၼ်ႁိူၼ်းပဵၼ်ယေးလူၺ်ႈၵၼ်တင်း ဢေးလီႉသၽႃႇ လုၵ်ႈယိင်းဢမီႉၼတပ်ႉ ၼွင်ႉယိင်းၼႃႇသုၼ်ႇလႄႈ၊ မၼ်းၼၼ်ႉၵိူတ်ႇလဵင်ႉ ၼႃႇတပ်ႉ၊ ဢၽီႉႁူႉ၊ ဢေးလႃႇၸႃႇ တင်းဢီႉသမႃႇၸိူဝ်းၼၼ်ႉမႃးဢေႃႈ။- 24လုၵ်ႈၸၢႆးၵေႃးရႃႉၸမ်ႉ၊ ပဵၼ်ဢတ်ႉသီႉရႃႉ၊ ဢေးလႃႉၵႃႇၼႃႉ၊ တင်းဢပျႃႇသပ်ႉဢေႃႈ။ ၶဝ်ၸိူဝ်းၼႆႉၸမ်ႉ၊ ပဵၼ်မဵဝ်းၸိူဝ်ႉၶိူဝ်းၵေႃးရႃႉ ၶေႃၶေႃ ႁင်းၽႂ်ႁင်းမၼ်းဢေႃႈ။- 25ဢေးလႃႇၸႃႇလုၵ်ႈၸၢႆးဢႃႇရုၼ်ႇၼၼ်ႉ ပဵၼ်ႁိူၼ်းပဵၼ်ယေးလူၺ်ႈၵၼ်တင်း လုၵ်ႈယိင်းပူႉတေႇလႃႉ ၵေႃႉၼိုင်ႈလႄႈမၼ်းၼၼ်ႉၵိူတ်ႇလဵင်ႉၽီႉၼႁတ်ႉမႃးဢေႃႈ။ ၶဝ်ၸိူဝ်းၼႆႉ ပဵၼ်ၵူၼ်းဢၼ်ႁဵတ်းၵႄႇႁဵတ်းႁူဝ်ၼႂ်းၸိူဝ်ႉၶိူဝ်းလေႇဝီႉ ၸွမ်းလူၺ်ႈၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းဢေႃႈ။- 26ၶဝ်ၸိူဝ်းဢၼ်ၶၢမ်ႇဢဝ်ၵႂၢမ်းဢၼ်ထႃႇဝရႃႉၽြႃးမီးဢမိင်ႉလႄႈဝႃႈ၊ ၼုၵ်ႈဢဝ်ၵူၼ်းမဵဝ်းဢီႉသရေႇလႃႉတင်းလၢႆ ဢွၵ်ႇသေၵႃႈၼႂ်းမိူင်းဢေႇၵိပ်ႉတူႉတႃႉ၊ ဝႃႈၼင်ႇၼႆၼၼ်ႉၸမ်ႉ၊ ပဵၼ်ဢႃႇရုၼ်ႇတင်းမူဝ်းသေႇဢေႃႈ။- 27ၶဝ်ၸိူဝ်းဢၼ်လႆႈလဝ်ႊလၢတ်ႈတီႈ ၽႃႇရေႃးၶုၼ်ႁေႃၶမ်းဢေႇၵိပ်ႉတူႉ ႁႂ်ႈလႆႈၼုၵ်ႈဢဝ်ၵူၼ်းမဵဝ်းဢီႉသရေႇလႃႉတင်းလၢႆ ဢွၵ်ႇသေၵႃႈၼႂ်းမိူင်းဢေႇၵိပ်ႉတူႉၼၼ်ႉၸမ်ႉ၊ ပဵၼ်မူဝ်းသေႇတင်းဢႃႇရုၼ်ႇဢေႃႈ။

ထႃႇဝရႃႉၽြႃးပူင်ဢမိင်ႉတီႈမူဝ်းသေႇတင်းဢႃႇရုၼ်ႇ

28ၼႂ်းဝၼ်းဢၼ်ထႃႇဝရႃႉၽြႃးဝႆႉပျႃႇတိၵ်ႈတီႈမူဝ်းသေႇ ၵႃႈၼႂ်းမိူင်းဢေႇၵိပ်ႉတူႉၼၼ်ႉၵေႃႈ၊- 29ထႃႇဝရႃႉၽြႃးမီးဢမိင်ႉတီႈမူဝ်းသေႇလႄႈဝႃႈ၊ ၵဝ်ပဵၼ်ထႃႇဝရႃႉၽြႃးဢေႃႈ။ ၵႃႈၼင်ႇဢၼ်ၵဝ်သင်ႇလၢတ်ႈဝႆႉတီႈမႂ်းၼႆႉၼၼ်ႉၸိုင်၊ မႂ်းတၵ်းလႆႈၶိုၼ်းလၢတ်ႈတီႈၶုၼ်ႁေႃၶမ်းၽႃႇရေႃးဢေႃႈ၊ ဝႃႈၼင်ႇၼႆဢေႃႈ။- 30မူဝ်းသေႇၵေႃႈလဝ်ႊလၢတ်ႈၵႃႈတီႈၽၢႆႇၼႃႈထႃႇဝရႃႉၽြႃးလႄႈဝႃႈ၊ တူၺ်းတီႈၶႃႈလူး။ ၶႃႈၸဝ်ႈမီးသူပ်း ဢၼ်ဢမ်ႇမီးတၢင်းဢၼ် ထိူဝ်ႁိမ်းလႄႈ ၶုၼ်ႁေႃၶမ်းၽႃႇရေႃးတၵ်းထွမ်ႇဢဝ်ၵႂၢမ်းၶႃႈၸဝ်ႈၸိူဝ်ႉၼင်ႇႁိုဝ်တီႈၶႃႈ၊ ဝႃႈၼင်ႇၼႆဢေႃႈ။

Currently Selected:

ဢွၵ်ႇၵႂႃႇ 6: CBMS

Highlight

Compare

Copy