ႁဵတ်းဝၢတ်ႈ 15
15
ဢၼ်ဢမ်ႇမူတ်းသႂ်ပဵၼ်ၵွပ်ႈပိူဝ်ႈႁူဝ်ႈၸိုမ်း
1ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇ တင်းဢႃႇရုၼ်ႇလႄႈဝႃႈၸမ်ႉ၊- 2သူသင်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆလႄႈဝႃႈ၊ ပေႃးၵူၼ်းၸၢႆးပဵၼ်တၢင်းဢၼ်ႁူဝ်ႈၸိုမ်းဢွၵ်ႇယူႇၵႃႈတီႈၼိူဝ်ႉမၼ်းၸိုင်၊ ၵွပ်ႈပိူဝ်ႈဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇယူႇၼၼ်ႉၼၼ်ႉလႄႈ၊ မၼ်းဢမ်ႇမူတ်းသႂ်။- 3တၢင်းဢၼ်မၼ်းဢမ်ႇမူတ်းသႂ်ၼႂ်းတၢင်းဢၼ်ႁူဝ်ႈၸိုမ်းဢွၵ်ႇယူႇၼၼ်ႉၸမ်ႉ၊ ပဵၼ်တၢင်းဢၼ်ယွတ်ႇႁူဝ်ႈဢွၵ်ႇယူႇၵႃႈတီႈၼိူဝ်ႉတႃႇသေႇ သေဢမ်ႇဝႃႈ၊ တၢင်းဢၼ်ႁူဝ်ႈၸိုမ်းဢွၵ်ႇယူႇၼၼ်ႉ ပဵၼ်ဢၼ်ၵိုတ်းသဝ်းယူႇတီႈၼိူဝ်ႉမၼ်းၼၼ်ႉသေဢမ်ႇဝႃႈ၊ ၵေႃႉၼၼ်ႉ ဢမ်ႇမူတ်းသႂ်။- 4တီႈၼွၼ်းၵႃႈဢၼ် ၵေႃႉဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇၼၼ်ႉၼွၼ်းၼၼ်ႉ ဢမ်ႇမူတ်းသႂ်။ တီႈၼင်ႈၵႃႈဢၼ်မၼ်းၼင်ႈၼၼ်ႉၵေႃႈ ဢမ်ႇမူတ်းသႂ်။- 5ၵေႃႉဢၼ်တိူဝ်ႉထုၵ်ႇတီႈၼွၼ်းၵေႃႉၼၼ်ႉၼၼ်ႉ တၵ်းလႆႈသၵ်ႉလွႆးၶူဝ်းၼုင်ႈမၼ်းလႄႈဢၢပ်ႇၼမ်ႉသေဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။- 6ၵေႃႉဢၼ်ၼင်ႈၵႃႈၼိူဝ်တီႈဢၼ် ၵေႃႉဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇၼၼ်ႉ လႆႈၼင်ႈယဝ်ႉၼၼ်ႉ၊ တၵ်းလႆႈသၵ်ႉလွႆးၶူဝ်းၼုင်ႈမၼ်းလႄႈဢၢပ်ႇၼမ်ႉသေဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။- 7ၵေႃႉဢၼ်တိူဝ်ႉထုၵ်ႇၼိူဝ်ႉၼင် ၵေႃႉဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇၼၼ်ႉၼၼ်ႉ တၵ်းလႆႈသၵ်ႉလွႆးၶူဝ်းၼုင်ႈမၼ်းလႄႈ ဢၢပ်ႇၼမ်ႉသေဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။- 8ပေႃးၵေႃႉဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇၼၼ်ႉ ထူမ်ႇၼမ်ႉလၢႆးတိူဝ်ႉမႅၼ်ႈတီႈၵေႃႉဢၼ်မူတ်းသႂ်ၼၼ်ႉၸိုင်၊ မၼ်းၼၼ်ႉတၵ်းလႆႈသၵ်ႉလွႆးၶူဝ်းၼုင်ႈမၼ်းလႄႈဢၢပ်ႇၼမ်ႉသေဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။- 9ၵွပ်းၶီႇၵွပ်းၼင်ႈဢၼ်ၵေႃႉဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇၼၼ်ႉ ၶီႇယဝ်ႉၼင်ႈယဝ်ႉၼၼ်ႉၵေႃႈ ဢမ်ႇမူတ်းသႂ်။- 10ၵေႃႉဢၼ်တိူဝ်ႉထုၵ်ႇၶိူင်ႈပိူင်ဢၼ်လႆႈမီးတႂ်ႈမၼ်းယဝ်ႉ သေၸိူဝ်ႉသေပိူင်ၼၼ်ႉ ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈ။ ၵေႃႉဢၼ်ဢဝ်ၶိူင်ႈပိူင်ၸိူဝ်းၼၼ်ႉၵႂႃႇၼၼ်ႉ တၵ်းလႆႈသၵ်ႉလွႆးၶူဝ်းၼုင်ႈမၼ်းလႄႈဢၢပ်ႇၼမ်ႉသေဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။- 11ပေႃးၵေႃႉဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇၼၼ်ႉ ယင်းဢမ်ႇသုၵ်ႈမိုဝ်းလႄႈဢဝ်မိုဝ်းမၼ်းတိူဝ်ႉထုၵ်ႇပိူၼ်ႈတၢင်ႇၵေႃႉၸိုင်၊ ၵေႃႉၼၼ်ႉတၵ်းလႆႈသၵ်ႉလွႆးၶူဝ်းၼုင်ႈမၼ်းလႄႈဢၢပ်ႇၼမ်ႉသေဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။- 12ၵႃႈပဵၼ်ၶိူင်ႈပိူင်လိၼ်ဢၼ် ၵေႃႉဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇၼၼ်ႉ၊ တိူဝ်ႉထုၵ်ႇၼၼ်ႉၸိုင်၊ တၵ်းလႆႈဢဝ်တႅၵ်ႇပႅတ်ႈသေဢေႃႈ။ ၵႃႈပဵၼ်ၶိူင်ႈပိူင်မႆႉၸိုင် တၵ်းလႆႈဢဝ်တင်းၼမ်ႉသုၵ်ႈလၢင်ႉသေဢေႃႈ။- 13ၵေႃႉဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇၼၼ်ႉ၊ မိူဝ်ႈဢၼ်တၢင်းဢၼ်ႁူဝ်ႈၸိုမ်းဢွၵ်ႇၼၼ်ႉႁၢႆယဝ်ႉၼၼ်ႉၸိုင်၊ ၼပ်ႉဢၢၼ်ႇထႅင်ႈၸဵတ်းဝၼ်း ပုၼ်ႈတၢင်းဢၼ်မၼ်းတၵ်းလႆႈၶၢမ်ႇတၢင်းဢၼ်ႁႂ်ႈမူတ်းသႂ်ၼၼ်ႉပူၼ်ႉသေယဝ်ႉ၊ တၵ်းလႆႈသၵ်ႉလွႆးၶူဝ်းၼုင်ႈမၼ်းလႄႈဢၢပ်ႇၼမ်ႉဢၼ်လႆၵႂႃႇယူႇၼၼ်ႉသေလႄႈ လႆႈမူတ်းသႂ်ဢေႃႈ။- 14ဝၼ်းဢႃႉထမႃႉၼၼ်ႉ မၼ်းတၵ်းလႆႈဢဝ်ၼူၵ်ႉတူႈသွင်တူဝ်၊ ဢမ်ႇၼၼ်ၵေႃႈ ၵႃၵႄဢွၼ်ႇသွင်တူဝ်မႃးၵႃႈတီႈထႃႇဝရႃႉၽြႃး ၵႃႈႁိမ်းၽၵ်းတူမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉလႄႈ ပၼ်တီႈယိတ်ႈပရေႃးႁဵၵ်ႈဢေႃႈ။- 15ယိတ်ႈပရေႃးႁဵၵ်ႈၼၼ်ႉတၵ်းလႆႈဢဝ်ၸိူဝ်းၼၼ်ႉပုၵ်ႈၸေႃႇပုၼ်ႈယိတ်ႈဢၼ်ၽေႇဢပႅတ်ႈတူဝ်ၼိုင်ႈ၊ ပုၼ်ႈယိတ်ႈဢၼ်တုတ်ႇၽႆးတူဝ်ၼိုင်ႈလႄႈ ႁဵတ်းတၢင်းဢၼ်ၽေႇဢပႅတ်ႈၵႃႈတီႈၽၢႆႇၼႃႈထႃႇဝရႃႉၽြႃးပုၼ်ႈၵေႃႉၼၼ်ႉ ၵွပ်ႈပိူဝ်ႈတၢင်းဢၼ်မၼ်းပဵၼ်တၢင်းဢၼ်ႁူဝ်ႈၸိုမ်းဢွၵ်ႇၼၼ်ႉဢေႃႈ။
16ပေႃးၼမ်ႉသုၵ်ႉၵူၼ်းၸၢႆးဢွၵ်ႇၸိုင်၊ မၼ်းတၵ်းလႆႈဢၢပ်ႇၼမ်ႉတင်းတူဝ်တင်းၶိင်းဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။- 17ၶူဝ်းၼုင်ႈဢိၵ်ႇတင်းၼင်တူဝ် ၵႃႈဢၼ်ၼမ်ႉသုၵ်ႉတိူဝ်ႉထုၵ်ႇၼၼ်ႉၸိုင်၊ တၵ်းလႆႈဢဝ်ၼမ်ႉသၵ်ႉလွႆးသေဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။- 18ပေႃးၵူၼ်းၸၢႆးၼွၼ်းလူၺ်ႈၵၼ်တင်းၵူၼ်းယိင်းလႄႈ ၼမ်ႉသုၵ်ႉဢွၵ်ႇၸိုင်၊ တင်းသွင်ၵေႃႉတၵ်းလႆႈဢၢပ်ႇၼမ်ႉသေဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။
19ပေႃးမႄႈယိင်းပဵၼ်တၢင်းဢၼ်ႁူဝ်ႈၸိုမ်းဢွၵ်ႇလႄႈ တၢင်းဢၼ်ႁူဝ်ႈၸိုမ်းဢွၵ်ႇတီႈၼိူဝ်ႉမၼ်းၼၼ်ႉ ပဵၼ်လိူတ်ႈၸိုင်၊ မၼ်းတၵ်းလႆႈယူႇၼႂ်းတၢင်းဢၼ်ဢူႉတူႉဢမ်ႇမူတ်းသႂ်ၼၼ်ႉၸဵတ်းဝၼ်းဢေႃႈ။ ၵေႃႉဢၼ်တိူဝ်ႉထုၵ်ႇမၼ်းၼၼ်ႉၼၼ်ႉ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။- 20ၶိူင်ႈပိူင်ၵႃႈဢၼ်မၼ်းၼွၼ်းသႂ်ႇၼႂ်းတၢင်းဢၼ်ဢူႉတူႉဢမ်ႇမူတ်းသႂ်ၼၼ်ႉၸိူဝ်းၼၼ်ႉၵေႃႈ ပဵၼ်ဢၼ်ဢမ်ႇမူတ်းသႂ်ဢေႃႈ။ ၶိူင်ႈပိူင်ၵႃႈဢၼ်မၼ်းၼင်ႈသႂ်ႇၸိူဝ်းၼၼ်ႉၵေႃႈ ပဵၼ်ဢၼ်ဢမ်ႇမူတ်းသႂ်ဢေႃႈ။- 21ၵေႃႉဢၼ်တိူဝ်ႉထုၵ်ႇတီႈၼွၼ်းမၼ်းၼၼ်ႉၼၼ်ႉ တၵ်းလႆႈသၵ်ႉလွႆးၶူဝ်းၼုင်ႈမၼ်းလႄႈ ဢၢပ်ႇၼမ်ႉသေဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။- 22ၵေႃႉဢၼ်တိူဝ်ႉထုၵ်ႇၶိူင်ႈပိူင်ဢၼ်မၼ်းၼင်ႈသႂ်ႇၼၼ်ႉၼၼ်ႉ တၵ်းလႆႈသၵ်ႉလွႆးၶူဝ်းၼုင်ႈမၼ်းလႄႈ ဢၢပ်ႇၼမ်ႉသေဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။- 23ပေႃးတူၵ်းသႂ်ႇၵႃႈတီႈတီႈၼွၼ်းတီႈၼင်ႈမၼ်းဝႆႉၸိုင်၊ ၵေႃႉဢၼ်တိူဝ်ႉထုၵ်ႇၼၼ်ႉပဵၼ်ဢၼ်ဢမ်ႇမူတ်းသႂ် တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။- 24ပေႃးၵူၼ်းၸၢႆးႁဵတ်းတၢင်းဢၼ်သိူၵ်ႈသမ်ႇၵၼ်တင်းမၼ်းလႄႈ တၢင်းဢၼ်ဢူႉတူႉဢၼ်ဢမ်ႇမူတ်းသႂ်မၼ်းၼၼ်ႉတိူဝ်ႉမၼ်းၸိုင်၊ မၼ်းဢမ်ႇမူတ်းသႂ်ၸဵတ်းဝၼ်း။ တီႈၼွၼ်းၵႃႈဢၼ်မၼ်းၼွၼ်းၼၼ်ႉၵေႃႈ ပဵၼ်ဢၼ်ဢမ်ႇမူတ်းသႂ်ဢေႃႈ။
25ပေႃးမႄႈယိင်းပဵၼ်တၢင်းဢၼ်လိူတ်ႈႁူဝ်ႈၸိုမ်းဢွၵ်ႇဝၼ်းၼမ်ၼႃႇ ၼႂ်းၶိင်ႇမိူဝ်ႈဢၼ်ဢမ်ႇပဵၼ်တၢင်းဢၼ်ဢူႉတူႉဢမ်ႇမူတ်းသႂ်ၼၼ်ႉ၊ ဢမ်ႇၼၼ်ၵေႃႈ ပေႃးမၼ်းပဵၼ်တၢင်းဢၼ်ႁူဝ်ႈၸိုမ်းဢွၵ်ႇၼၼ်ႉ ပူၼ်ႉလိူဝ်သေၶိင်ႇမိူဝ်ႈတၢင်းဢၼ်ဢူႉတူႉဢမ်ႇမူတ်းသႂ်ၼၼ်ႉၸိုင်၊ ၶိင်ႇမိုဝ်ႉဝၼ်းတၢင်းဢၼ်ႁူဝ်ႈၸိုမ်းဢွၵ်ႇ ဢၼ်မၼ်းဢမ်ႇမူတ်းသႂ်ၼၼ်ႉတင်းသဵင်ႈတင်းလူင်ၼၼ်ႉ မၼ်းတၵ်းလႆႈပဵၼ်မိူၼ်ၸိူဝ်ႉၼင်ႇၼႂ်းၶိင်ႇမိုဝ်ႉဝၼ်းတၢင်းဢၼ်ဢူႉတူႉဢမ်ႇမူတ်းသႂ်ၼၼ်ႉၸိူဝ်းၼၼ်ႉဢေႃႈ။ မၼ်းပဵၼ်ဢၼ်ဢမ်ႇမူတ်းသႂ်ဢေႃႈ။- 26တီႈၼွၼ်းၵႃႈဢၼ်မၼ်းၼွၼ်း၊ ၼႂ်းၶိင်ႇမိုဝ်ႉဝၼ်းတၢင်းဢၼ်လိူတ်ႈမၼ်းယင်းႁူဝ်ႈၸိုမ်းဢွၵ်ႇယူႇၼၼ်ႉၸိူဝ်းၼၼ်ႉ တၵ်းလႆႈပဵၼ်မိူၼ်ၸိူဝ်ႉၼင်ႇတီႈၼွၼ်း တၢင်းဢၼ်ပဵၼ်ဢူႉတူႉဢမ်ႇမူတ်းသႂ်ၼၼ်ႉလႄႈ၊ တီႈၼင်ႈၵႃႈဢၼ်မၼ်းၼင်ႈၼၼ်ႉၵေႃႈ တၵ်းလႆႈပဵၼ်ဢၼ်ဢမ်ႇမူတ်းသႂ် မိူၼ်ၸိူဝ်ႉၼင်ႇၼႂ်းတၢင်းဢၼ်မၼ်း ဢမ်ႇမူတ်းသႂ်လူၺ်ႈဢူႉတူႉဢမ်ႇမူတ်းသႂ်ၼၼ်ႉဢေႃႈ။- 27ၵေႃႉဢၼ်တိူဝ်ႉထုၵ်ႇၶိူင်ႈပိူင်ၸိူဝ်းၼၼ်ႉၼၼ်ႉ တၵ်းလႆႈပဵၼ်ဢၼ်ဢမ်ႇမူတ်းသႂ်ဢေႃႈ။ မၼ်းတၵ်းလႆႈသၵ်ႉလွႆးၶူဝ်းၼုင်ႈမၼ်းလႄႈ ဢၢပ်ႇၼမ်ႉသေဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။- 28မႄႈယိင်းၼၼ်ႉ၊ ပေႃးတၢင်းဢၼ်ႁူဝ်ႈၸိုမ်းဢွၵ်ႇၼၼ်ႉႁၢႆယဝ်ႉၸိုင် မၼ်းတၵ်းလႆႈၼပ်ႉဢၢၼ်ႇထႅင်ႈၸဵတ်းဝၼ်းလႄႈ ပူၼ်ႉသေယဝ်ႉ၊ တၵ်းမူတ်းသႂ်ဢေႃႈ။- 29ဝၼ်းဢႃႉထမႃႉၼၼ်ႉ မၼ်းတၵ်းလႆႈဢဝ်ၼူၵ်ႉတူႈသွင်တူဝ်၊ ဢမ်ႇၼၼ်ၵေႃႈ ၵႃၵႄဢွၼ်ႇသွင်တူဝ်မႃးၸူးၵႃႈတီႈယိတ်ႈပရေႃးႁဵၵ်ႈ ၵႃႈႁိမ်းၽၵ်းတူမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈဢေႃႈ။- 30ယိတ်ႈပရေႃးႁဵၵ်ႈၼၼ်ႉတၵ်းလႆႈဢဝ်ၸိူဝ်းၼၼ်ႉပုၵ်ႈၸေႃႇပုၼ်ႈယိတ်ႈဢၼ်ၽေႇဢပႅတ်ႈတူဝ်ၼိုင်ႈ၊ ပုၼ်ႈယိတ်ႈဢၼ်တုတ်ႇၽႆးတူဝ်ၼိုင်ႈလႄႈ ႁဵတ်းတၢင်းဢၼ်ၽေႇဢပႅတ်ႈၵႃႈတီႈၽၢႆႇၼႃႈထႃႇဝရႃႉၽြႃး ပုၼ်ႈမႄႈယိင်းၼၼ်ႉ ၵွပ်ႈပိူဝ်ႈတၢင်းဢၼ် မၼ်းပဵၼ်တၢင်းဢၼ်ႁူဝ်ႈၸိုမ်းဢွၵ်ႇဢၼ်ဢမ်ႇမူတ်းသႂ်ၼၼ်ႉဢေႃႈ။
31ၼင်ႇၼၼ်လႄႈ သူတၵ်းလႆႈ ႁႂ်ႈၵူၼ်းမဵဝ်းဢီႉသရေႇလႃႉတင်းလၢႆ ၵၢင်းလွတ်ႈတင်း တၢင်းဢၼ်ဢမ်ႇမူတ်းသႂ် ပုၼ်ႈလွင်ႈၼင်ႇႁိုဝ် ၶဝ်တၵ်းဢမ်ႇလႆႈတၢႆၵႃႈၼႂ်းတၢင်းဢၼ်ၶဝ်ဢမ်ႇမူတ်းသႂ် ယူႇၼႂ်းမိူဝ်ႈဢၼ် ၶဝ်ႁႂ်ႈသုမ်ႉထဵင်ၵဝ် ဢၼ်မီးယူႇၵႃႈၼႂ်းၶဝ်ၼၼ်ႉ ၵူဝ်ႈၵိူၵ်ႇၼၼ်ႉဢေႃႈ။- 32ဢၼ်ၼႆႉၸမ်ႉ၊ ပဵၼ်တြႃးၵေႃႉဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇ၊ ၵေႃႉဢၼ်ၼမ်ႉသုၵ်ႉမၼ်းဢွၵ်ႇလႄႈ မၼ်းႁွတ်ႈထိုင် တၢင်းဢၼ်ၵူဝ်ႈၵိူၵ်ႇၵွပ်ႈပိူဝ်ႈလွင်ႈၼၼ်ႉ၊- 33မႄႈယိင်းဢၼ်ပဵၼ်ဢူႉတူႉတၢင်းဢၼ်ဢမ်ႇမူတ်းသႂ်ၼၼ်ႉ၊ ၵူၼ်းၸၢႆး ၵူၼ်းယိင်းဢၼ်မီးတၢင်းဢၼ်ႁူဝ်ႈၸိုမ်းဢွၵ်ႇလူၺ်ႈၵၼ် ဢိၵ်ႇတင်းၵူၼ်းၸၢႆးဢၼ်ႁဵတ်းတၢင်းဢၼ်ၼွၼ်းလူၺ်ႈၵၼ်တင်းၵူၼ်းယိင်း ဢၼ်ဢမ်ႇမူတ်းသႂ်ၼၼ်ႉၸိူဝ်းၼၼ်ႉဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။
Currently Selected:
ႁဵတ်းဝၢတ်ႈ 15: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship