ႁဵတ်းဝၢတ်ႈ 16
16
ဝၼ်းဢၼ်ၽေႇဢပႅတ်ႈ
1လိုၼ်းသေလုၵ်ႈၸၢႆးဢႃႇရုၼ်ႇ သွင်ၵေႃႉလႆႈတၢႆၼႂ်းမိူဝ်ႈဢၼ်ၶဝ်ပုၵ်ႈၸေႃႇၵႃႈတီႈၽၢႆႇၼႃႈထႃႇဝရႃႉၽြႃးလႄႈ တၢႆသေယဝ်ႉၼၼ်ႉ၊ ထႃႇဝရႃႉၽြႃး မီးဢမိင်ႉတီႈမူဝ်းသေႇဢေႃႈ။- 2ဢၼ်ထႃႇဝရႃႉၽြႃးမီးဢမိင်ႉတီႈမူဝ်းသေႇလႄႈဝႃႈၼၼ်ႉၸမ်ႉ၊ လွင်ႈၼင်ႇႁိုဝ်ပီႈၸၢႆးမႂ်းဢႃႇရုၼ်ႇ တၵ်းဢမ်ႇၶဝ်ႈၵႃႈၼႂ်းထႃႇၼႃႉ တီႈမူတ်းၸၢင်ႇၵႃႈတီႈၼႂ်းၽႃႈၵင်ႈ၊ ၵႃႈတီႈၽၢႆႇၼႃႈပလၢင်ႇတီႈၽေႇဢပႅတ်ႈဢၼ်တၢင်ႇသႂ်ႇၵႃႈၼိူဝ်တိူၵ်ႈတႃႇၼၼ်ႉၵူႈၶိင်ႇၵူႈမိူဝ်ႈလႄႈ ၵၢင်းလွတ်ႈတင်းၽေးတၢင်းတၢႆၸိုင်၊ သင်ႇလၢတ်ႈဝႆႉတီႈမၼ်းတႃႉ။ လွင်ႈမၼ်းၸမ်ႉ ၵဝ်တၵ်းထၢင်ႇသႃးမႃးၵႃႈၼႂ်းမွၵ်ႇၵုမ်ႈ ၵႃႈတီႈၼိူဝ်ပလၢင်ႇ တီႈၽေႇဢပႅတ်ႈၼၼ်ႉဢေႃႈ။- 3ဢႃႇရုၼ်ႇတၵ်းလႆႈၶဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ တၵ်းလႆႈပႃးဢဝ်ဝူဝ်းပေႃႈဢၼ်ဢသၢၵ်ႈၼုမ်ႇၼၼ်ႉ ပုၼ်ႈယိတ်ႈဢၼ်ၽေႇဢပႅတ်ႈတူဝ်ၼိုင်ႈ ဢိၵ်ႇတင်းသူဝ်းပေႃႈပုၼ်ႈယိတ်ႈဢၼ်တုတ်ႇၽႆးတူဝ်ၼိုင်ႈဢေႃႈ။- 4မၼ်းတၵ်းလႆႈၼုင်ႈသိူဝ်ႈပိၵ်ႈၶျေႃးဢၼ်မူတ်းၸၢင်ႇ ဢိၵ်ႇတင်းၵူၼ်ပိၵ်ႈၶျေႃးလႄႈ ႁတ်ႉသၢႆဢႅဝ်ပိၵ်ႈၶျေႃးသေဢေႃႈ။ ၶဵၼ်းႁူဝ်ပိၵ်ႈၶျေႃးၵေႃႈ တၵ်းလႆႈၶဵၼ်းဢေႃႈ။ ၵွပ်ႈပိူဝ်ႈဢၼ်ၶူဝ်းၼုင်ႈတၢင်းမႆၼၼ်ႉမူတ်းၸၢင်ႇလႄႈ၊ မၼ်းတၵ်းလႆႈဢၢပ်ႇၼမ်ႉသေလႄႈ ၼုင်ႈမႆဢေႃႈ။- 5မၼ်းတၵ်းလႆႈၶၢမ်ႇဢဝ်ပႄႉပေႃႈဢွၼ်ႇသွင်တူဝ် ပုၼ်ႈယိတ်ႈဢၼ်ၽေႇဢပႅတ်ႈ ဢိၵ်ႇတင်းသူဝ်းပေႃႈတူဝ်ၼိုင်ႈ ပုၼ်ႈယိတ်ႈဢၼ်တုတ်ႇၽႆးၵႃႈၼႂ်းမိုဝ်းပရဵၵ်ႈသၢတ်ႈ ၵူၼ်းမဵဝ်းဢီႉသရေႇလႃႉတင်းလၢႆဢေႃႈ။- 6ဢႃႇရုၼ်ႇတၵ်းလႆႈပုၵ်ႈၸေႃႇဝူဝ်းယိတ်ႈဢၼ်ၽေႇဢပႅတ်ႈ ဢၼ်ၸၢပ်ႈသႅင်ႇၵၼ်တင်းမၼ်းၼၼ်ႉလႄႈ ႁဵတ်းတၢင်းဢၼ်ၽေႇဢပႅတ်ႈပုၼ်ႈမၼ်း ဢိၵ်ႇတင်းပုၼ်ႈၵူၼ်းႁိူၼ်းၵူၼ်းယေးမၼ်းဢေႃႈ။- 7ပႄႉသွင်တူဝ်ၼၼ်ႉၵေႃႈ မၼ်းတၵ်းလႆႈဢဝ်လႄႈ သၢၵ်ႈၵၢပ်ႈၵႃႈတီႈၽၢႆႇၼႃႈထႃႇဝရႃႉၽြႃး ၵႃႈႁိမ်းၽၵ်းတူမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၼၼ်ႉဢေႃႈ။- 8ဢႃႇရုၼ်ႇတၵ်းလႆႈတူၵ်းလိၵ်ႈၸႃႇၵွၵ်ႈတီႈပႄႉသွင်တူဝ်ၼၼ်ႉ၊ လိၵ်ႈၸႃႇၵွၵ်ႈပုၼ်ႈထႃႇဝရႃႉၽြႃးဢၼ်ၼိုင်ႈ၊ လိၵ်ႈၸႃႇၵွၵ်ႈပုၼ်ႈတၢင်းဢၼ်ဢဝ်ၵႂႃႇပႅတ်ႈၼၼ်ႉဢၼ်ၼိုင်ႈဢေႃႈ။- 9ဢႃႇရုၼ်ႇတၵ်းလႆႈဢဝ်ပႄႉဢၼ်လိၵ်ႈၸႃႇၵွၵ်ႈပုၼ်ႈထႃႇဝရႃႉၽြႃးတူၵ်းၼၼ်ႉမႃးလႄႈ ပုၵ်ႈၸေႃႇပုၼ်ႈယိတ်ႈဢၼ်ၽေႇဢပႅတ်ႈဢေႃႈ။- 10ၵူၺ်းၵႃႈ ပႄႉဢၼ်လိၵ်ႈၸႃႇၵွၵ်ႈတူၵ်းပုၼ်ႈတၢင်းဢၼ်ဢဝ်ၵႂႃႇပႅတ်ႈၼၼ်ႉၸိုင် တၵ်းလႆႈႁႂ်ႈဢသၢၵ်ႈလိပ်းယူႇသေလႄႈ ဢဝ်သၢၵ်ႈၵၢပ်ႈၵႃႈတီႈၽၢႆႇၼႃႈထႃႇဝရႃႉၽြႃး ႁႂ်ႈလႆႈႁဵတ်းတၢင်းဢၼ်ၽေႇဢပႅတ်ႈၵႃႈၼိူဝ်မၼ်း ဢိၵ်ႇတင်းႁႂ်ႈလႆႈပွႆႇၸႂ်ႉမၼ်းၵႂႃႇၵႃႈတီႈၼႂ်းထိူၼ်ႇပုၼ်ႉ တၢင်းဢၼ်ဢဝ်ၵႂႃႇပႅတ်ႈၼၼ်ႉဢေႃႈ။
11 ဢႃႇရုၼ်ႇတၵ်းလႆႈဢဝ်ဝူဝ်းယိတ်ႈဢၼ်ၽေႇဢပႅတ်ႈ ဢၼ်ၸၢပ်ႈသႅင်ႇၵၼ်တင်းမၼ်းၼၼ်ႉမႃးသေလႄႈ ႁဵတ်းတၢင်းဢၼ်ၽေႇဢပႅတ်ႈပုၼ်ႈမၼ်း ဢိၵ်ႇတင်းၵူၼ်းႁိူၼ်းၵူၼ်းယေးမၼ်းလႄႈ ဢဝ်ဝူဝ်းယိတ်ႈဢၼ်ၽေႇဢပႅတ်ႈဢၼ်ၸၢပ်ႈသႅင်ႇၵၼ်တင်းမၼ်းၼၼ်ႉတၢႆဢေႃႈ။- 12မၼ်းတၵ်းလႆႈယိပ်းဢဝ်လၢင်ႇပၢၼ်း ဢၼ်တဵမ်ဝႆႉတင်းထၢၼ်ႇၽႆးဢၼ်ဢဝ်ၵႃႈၼိူဝ်ယိတ်ႈပလၢင်ႇၵႃႈတီႈၽၢႆႇၼႃႈထႃႇဝရႃႉၽြႃး သႂ်ႇဝႆႉၼၼ်ႉလႄႈ ဢဝ်မုၼ်ႈၼၢမ်ႇသႃႇႁွမ်ဢၼ်ဢွၼ်ႇလီၽွင်လီၼၼ်ႉ ႁႂ်ႈတဵမ်မိုဝ်းမၼ်းသေလႄႈဢဝ်ၵႂႃႇၵႃႈတီႈၼႂ်းၽႃႈၵင်ႈဢေႃႈ။- 13မၼ်းၼၼ်ႉ လွင်ႈၼင်ႇႁိုဝ်ဢၢႆၵႂၼ်းၼၢမ်ႇသႃႇၼၼ်ႉ တၵ်းလႆႈဢုမ်ႇႁူမ်ႇပလၢင်ႇတီႈၽေႇဢပႅတ်ႈဢၼ်မီးယူႇၵႃႈၼိူဝ်ၶိူင်ႈဢၼ်ၶၢမ်ႇသၢၵ်ႈသေႇၼၼ်ႉ ႁႂ်ႈမၼ်းလႆႈၵၢင်းလွတ်ႈတင်းၽေးတၢႆၸိုင်၊ တၵ်းလႆႈဢဝ်ၼၢမ်ႇသႃႇၼၼ်ႉ တၢင်ႇသႂ်ႇၵႃႈၼိူဝ်ၽႆး ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။- 14မၼ်းတၵ်းလႆႈဢဝ်လိူတ်ႈဝူဝ်းၼၼ်ႉၵမ်ႈၽွင်ႈလႄႈ ဢဝ်တင်းၼိဝ်ႉၸီႉမၼ်း ဢဝ်ၽႅတ်းသႂ်ႇၵႃႈၼိူဝ်ပလၢင်ႇတီႈၽေႇဢပႅတ်ႈၼၼ်ႉ ၵႃႈတီႈၼႃႈဝၼ်းဢွၵ်ႇမၼ်းဢေႃႈ။ ၵႃႈတီႈၽၢႆႇၼႃႈပလၢင်ႇ တီႈၽေႇဢပႅတ်ႈၼၼ်ႉၵေႃႈ မၼ်းတၵ်းလႆႈဢဝ်တင်းၼိဝ်ႉၸီႉ ဢဝ်လိူတ်ႈၽႅတ်းသႂ်ႇၸဵတ်းပွၵ်ႈဢေႃႈ။- 15လိုၼ်းၼၼ်ႉ မၼ်းတၵ်းလႆႈဢဝ်ပႄႉယိတ်ႈဢၼ်ၽေႇဢပႅတ်ႈဢၼ်ၸၢပ်ႈသႅင်ႇၵၼ်တင်းၵူၼ်းတင်းလၢႆၼၼ်ႉတၢႆလႄႈ ဢဝ်လိူတ်ႈၼၼ်ႉမႃးၵႃႈတီႈၼႂ်းၽႃႈၵင်ႈသေယဝ်ႉ၊ ဢဝ်လိူတ်ႈၼၼ်ႉႁဵတ်းမိူၼ်ၸိူဝ်ႉၼင်ႇဢၼ် ဢဝ်လိူတ်ႈဝူဝ်းၼၼ်ႉႁဵတ်းၼၼ်ႉလႄႈ ၽႅတ်းသႂ်ႇၵႃႈၼိူဝ်ယိတ်ႈပလၢင်ႇတီႈၽေႇဢပႅတ်ႈဢိၵ်ႇတင်းၵႃႈတီႈၽၢႆႇၼႃႈယိတ်ႈပလၢင်ႇတီႈၽေႇဢပႅတ်ႈၼၼ်ႉဢေႃႈ။- 16ၵွပ်ႈပိူဝ်ႈတၢင်းဢၼ်ဢမ်ႇမူတ်းသႂ်ၵူၼ်းမဵဝ်းဢီႉသရေႇလႃႉတင်းလၢႆၼၼ်ႉၸိူဝ်းၼၼ်ႉ ဢိၵ်ႇတင်းၵွပ်ႈပိူဝ်ႈတၢင်းဢၼ်ၶဝ်ၽိတ်းပိူင်ႈပူၼ်ႉလိူဝ်ၸိူဝ်းၼၼ်ႉ ဢၼ်ဝႃႈဢပႅတ်ႈၶဝ်ၵူႈၸိူဝ်ႉၵူႈပိူင်ၼၼ်ႉလႄႈ တၵ်းလႆႈႁဵတ်းတၢင်းဢၼ်ၽေႇဢပႅတ်ႈပုၼ်ႈထႃႇၼႃႉ တီႈမူတ်းၸၢင်ႇၸဝ်ႈဢေႃႈ။ ပုၼ်ႈမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ ဢၼ်လႆႈယူႇလူၺ်ႈၵၼ်တင်းၶဝ်ၵႃႈၼႂ်းၵၢင်တၢင်းဢၼ်ဢမ်ႇမူတ်းသႂ်ၶဝ်ၼၼ်ႉၵေႃႈ တၵ်းလႆႈႁဵတ်းမိူၼ်ၸိူဝ်ႉၼင်ႇၼၼ်ဢေႃႈ။- 17မိူဝ်ႈဢၼ်မၼ်းၶဝ်ႈႁႂ်ႈလႆႈႁဵတ်းတၢင်းဢၼ်ၽေႇဢပႅတ်ႈၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈၼၼ်ႉ၊ ၸူဝ်ႈဢၼ်မၼ်း ဢမ်ႇပႆႇႁဵတ်းတၢင်းဢၼ်ၽေႇဢပႅတ်ႈပုၼ်ႈမၼ်း တင်းပုၼ်ႈၵူၼ်းႁိူၼ်းၵူၼ်းယေးမၼ်း ဢိၵ်ႇတင်းပုၼ်ႈပရဵၵ်ႈသၢတ်ႈဢီႉသရေႇလႃႉ တင်းသဵင်ႈတင်းလူင်ယဝ်ႉလႄႈ ဢွၵ်ႇမႃးၼၼ်ႉၸိုင်၊ ၽူႈလႂ်ဢမ်ႇလႆႈယူႇၵႃႈၼႂ်းမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉသေၵေႃႉသေၵူၼ်း။- 18လိုၼ်းၼၼ်ႉ မၼ်းတၵ်းလႆႈဢွၵ်ႇၸူးယိတ်ႈပလၢင်ႇဢၼ်မီးၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉ ႁႂ်ႈလႆႈႁဵတ်းယိတ်ႈတၢင်းဢၼ်ၽေႇဢပႅတ်ႈပုၼ်ႈယိတ်ႈပလၢင်ႇၼၼ်ႉလႄႈ ဢဝ်လိူတ်ႈဝူဝ်း၊ လိူတ်ႈပႄႉၵမ်ႈၽွင်ႈ သႂ်ႇၵႃႈတီႈၶဝ်လႅမ်ယိတ်ႈပလၢင်ႇ ဢၼ်မီးလဵပ်ႈႁွပ်ႈၸွမ်းႁိမ်းမၼ်းၼၼ်ႉဢေႃႈ။- 19ၵႃႈၼိူဝ်ယိတ်ႈပလၢင်ႇၼၼ်ႉၵေႃႈ မၼ်းတၵ်းလႆႈဢဝ်တင်းၼိဝ်ႉၸီႉမၼ်းဢဝ်လိူတ်ႈၼၼ်ႉၵမ်ႈၽွင်ႈၽႅတ်းသႂ်ႇၸဵတ်းပွၵ်ႈလႄႈ ႁႂ်ႈမူတ်းသႂ်လႄႈ ႁႂ်ႈမူတ်းၸၢင်ႇသေၵႃႈၼႂ်းတၢင်းဢၼ်ဢမ်ႇမူတ်းသႂ်ၵူၼ်းမဵဝ်းဢီႉသရေႇလႃႉတင်းလၢႆၼၼ်ႉၸိူဝ်းၼၼ်ႉဢေႃႈ။
လွင်ႈပႄႉဢၼ်ၶၢမ်ႇဢပႅတ်ႈ
20မၼ်းႁဵတ်းတၢင်းဢၼ်ၽေႇဢပႅတ်ႈပုၼ်ႈထႃႇၼႃႉတီႈမူတ်းၸၢင်ႇၸဝ်ႈ၊ ပုၼ်ႈမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ ပုၼ်ႈယိတ်ႈပလၢင်ႇၸိူဝ်းၼၼ်ႉ ယဝ်ႉတူဝ်ႈၸိူဝ်ႉၼင်ႇၼၼ်သေယဝ်ႉ၊ မၼ်းတၵ်းလႆႈဢဝ်ပႄႉဢၼ်ဢသၢၵ်ႈလိပ်းယူႇၼၼ်ႉမႃးဢေႃႈ။- 21ဢႃႇရုၼ်ႇတၵ်းလႆႈဢဝ်မိုဝ်းမၼ်းသွင်ၶွၼ်တၢင်ႇသႂ်ႇၵႃႈၼိူဝ်ႁူဝ်ပႄႉဢၼ်ဢသၢၵ်ႈလိပ်းယူႇၼၼ်ႉလႄႈ ၽုၺ်ႇဢွၵ်ႇၼႄပျႃးတူႉၸရိူၵ်ႈၵူၼ်းမဵဝ်းဢီႉသရေႇလႃႉတင်းလၢႆ ဢိၵ်ႇတင်းတၢင်းဢၼ်ၶဝ်ၽိတ်းပိူင်ႈပူၼ်ႉလိူဝ်ၸိူဝ်းၼၼ်ႉ ဢၼ်ဝႃႈဢပႅတ်ႈၶဝ်ၵူႈၸိူဝ်ႉၵူႈပိူင်ၵႃႈမီးၼၼ်ႉလႄႈ ဢဝ်တၢင်ႇသႂ်ႇၵႃႈၼိူဝ်ႁူဝ်ပႄႉၼၼ်ႉသေယဝ်ႉ၊ ဢဝ်တင်းၵေႃႉဢၼ်ထုၵ်ႇဢၢပ်ႈၼၼ်ႉ ဢဝ်ပွႆႇပႅတ်ႈၵႃႈတီႈထိူၼ်ႇဢေႃႈ။- 22ပႄႉၼၼ်ႉတၵ်းလႆႈဢဝ်တူႉၸရိူၵ်ႈဢပႅတ်ႈၶဝ်ၵႃႈမီးၼၼ်ႉ ၵႂႃႇၸူးၵႃႈတီႈဢၼ်ၵူၼ်းဢမ်ႇယူႇၼၼ်ႉဢေႃႈ။ ၵေႃႉၼၼ်ႉ တၵ်းလႆႈဢဝ်ပႄႉၼၼ်ႉ ပွႆႇပႅတ်ႈၵႃႈတီႈထိူၼ်ႇဢေႃႈ။- 23ၵမ်းၼၼ်ႉ ဢႃႇရုၼ်ႇတၵ်းလႆႈၶဝ်ႈၵႃႈၼႂ်းမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈလႄႈ ထွတ်ႇၶူဝ်းပိၵ်ႈၶျေႃးဢၼ်မၼ်းၼုင်ႈမိူဝ်ႈဢၼ်မၼ်းၶဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈၼၼ်ႉလႄႈ ဝႆႉၵႃႈတီႈၼၼ်ႈဢေႃႈ။- 24မၼ်းတၵ်းလႆႈဢၢပ်ႇၼမ်ႉၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈလႄႈ ၼုင်ႈၶူဝ်းၼုင်ႈမၼ်းသေယဝ်ႉ၊ သမ်ႉဢွၵ်ႇမႃးလႄႈ ပုၵ်ႈၸေႃႇယိတ်ႈဢၼ်တုတ်ႇၽႆး ဢၼ်ၸၢပ်ႈသႅင်ႇၵၼ်တင်းမၼ်း ဢိၵ်ႇတင်းယိတ်ႈဢၼ်တုတ်ႇၽႆး ဢၼ်ၸၢပ်ႈသႅင်ႇၵၼ်တင်းၵူၼ်းတင်းလၢႆလႄႈ ႁဵတ်းတၢင်းဢၼ်ၽေႇဢပႅတ်ႈပုၼ်ႈမၼ်း ဢိၵ်ႇတင်းပုၼ်ႈၵူၼ်းတင်းလၢႆဢေႃႈ။- 25ၵွၼ်ႈၶႆၵွၼ်ႈမၼ်းတူဝ်ယိတ်ႈဢၼ်ၽေႇဢပႅတ်ႈၼၼ်ႉၸိုင်၊ မၼ်းတၵ်းလႆႈဢဝ်တုတ်ႇၽႆးၵႃႈၼိူဝ်ယိတ်ႈပလၢင်ႇဢေႃႈ။- 26ၵေႃႉဢၼ်ဢဝ်ပႄႉဢၼ်ပဵၼ်တၢင်းဢၼ်ဢဝ်ၵႂႃႇပႅတ်ႈၼၼ်ႉ ပွႆႇပႅတ်ႈၼၼ်ႉၵေႃႈ တၵ်းလႆႈသၵ်ႉလွႆးၶူဝ်းၼုင်ႈမၼ်းလႄႈ ဢၢပ်ႇၼမ်ႉသေဢေႃႈ။ လိုၼ်းၼၼ်ႉ မၼ်းၸင်ႇတၵ်းလႆႈၶဝ်ႈၵႃႈၼႂ်းတပ်ႉဢေႃႈ။- 27ဝူဝ်းယိတ်ႈဢၼ်ၽေႇဢပႅတ်ႈ ဢိၵ်ႇတင်းပႄႉယိတ်ႈဢၼ်ၽေႇဢပႅတ်ႈ ဢၼ်ဢဝ်လိူတ်ႈၶဝ်သႂၢင်းၶဝ်ႈ ႁႂ်ႈလႆႈႁဵတ်းတၢင်းဢၼ်ၽေႇဢပႅတ်ႈ ၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈယဝ်ႉၼၼ်ႉၸိူဝ်းၼၼ်ႉၸိုင်၊ တၵ်းလႆႈဢဝ်ဢွၵ်ႇၵႃႈၼွၵ်ႈတပ်ႉလႄႈ ဢဝ်ၼင်မၼ်းၼိူဝ်ႉမၼ်း၊ ၶီႈၼုမ်ႇမၼ်းတုတ်ႇၽႆးသေဢေႃႈ။- 28ၵေႃႉဢၼ်ဢဝ်တုတ်ႇၽႆးၼၼ်ႉၵေႃႈ တၵ်းလႆႈသၵ်ႉလွႆးၶူဝ်းၼုင်ႈမၼ်းလႄႈဢၢပ်ႇၼမ်ႉသေဢေႃႈ။ လိုၼ်းၼၼ်ႉ မၼ်းၸင်ႇတၵ်းလႆႈၶဝ်ႈၵႃႈၼႂ်းတပ်ႉဢေႃႈ။
တၢင်းဢၼ်ပႂ်ႉၵမ်ၸွမ်းဝၼ်းဢၼ်ၽေႇဢပႅတ်ႈ
29ဢၼ်ပဵၼ်ပိင်းၺၢပ်ႈၸဝ်ႈတီႈသူတႃႇသေႇဢမ်ႇထၢတ်ႇၸမ်ႉ၊ ၼႂ်းဝၼ်းဢၼ်ပဵၼ်လိူၼ်သတ်ႉတမႃႉသိပ်းဝၼ်းၼၼ်ႉ ၵူၼ်းမဵဝ်းသူသေဢမ်ႇဝႃႈ၊ ၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်သွၼ်ႈပိုင်ႈယူႇၵႃႈၼႂ်းသူသေဢမ်ႇဝႃႈ၊ တၵ်းလႆႈဢွၼ်ၵၼ် ၵမ်ၵျၢင်ႉၵႅၼ်ႇၵႅၼ်ႇၶႅင်ၶႅင်ယူႇလႄႈ ဢမ်ႇလႆႈႁဵတ်းတၢင်းႁဵတ်းလႃးလႃး။- 30လွင်ႈမၼ်းၸမ်ႉ ၼႂ်းဝၼ်းၼၼ်ႉ ယိတ်ႈပရေႃးႁဵၵ်ႈတၵ်းလႆႈႁဵတ်းတၢင်းဢၼ်ၽေႇဢပႅတ်ႈႁႂ်ႈသူလႆႈမူတ်းသႂ်ဢေႃႈ။ သူတၵ်းလႆႈၵၢင်းလွတ်ႈတင်းဢပႅတ်ႈၵႃႈမီး ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။- 31ဝၼ်းၼၼ်ႉတၵ်းလႆႈပဵၼ်ဝၼ်းၵမ်သိၼ်တီႈဢၼ်သူတၵ်းလႆႈယူႇၼိမ်ၼိမ်လီလီလႄႈ ၵမ်ၵျၢင်ႉၵႅၼ်ႇၵႅၼ်ႇၶႅင်ၶႅင်ၼၼ်ႉဢေႃႈ။ ပဵၼ်ပိင်းၺၢပ်ႈဢၼ်တႃႇသေႇဢေႃႈ။- 32ၵေႃႉဢၼ်ၶၢမ်ႇဢဝ်ၽိၵ်ႈသိၵ်ႈ ဢိၵ်ႇတင်းဢရႃႇယိတ်ႈပရေႃးႁဵၵ်ႈႁႂ်ႈလႆႈပွင်ႁဵတ်းဢမူႉယိတ်ႈပရေႃးႁဵၵ်ႈၼႂ်းဢရႃႇပေႃႈမၼ်းၼၼ်ႉ တၵ်းလႆႈႁဵတ်းတၢင်းဢၼ်ၽေႇဢပႅတ်ႈၼၼ်ႉဢေႃႈ။ မၼ်းၼၼ်ႉတၵ်းလႆႈၼုင်ႈၶူဝ်းၼုင်ႈပိၵ်ႈၶျေႃး ဢၼ်ဝႃႈၶူဝ်းၼုင်ႈဢၼ်မူတ်းၸၢင်ႇၼၼ်ႉလႄႈ၊- 33ႁဵတ်းတၢင်းဢၼ်ၽေႇဢပႅတ်ႈပုၼ်ႈထႃႇၼႃႉတီႈမူတ်းၸၢင်ႇၸဝ်ႈ၊ ႁဵတ်းတၢင်းဢၼ်ၽေႇဢပႅတ်ႈပုၼ်ႈ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ ဢိၵ်ႇတင်းပုၼ်ႈယိတ်ႈပလၢင်ႇ၊ ႁဵတ်းတၢင်းဢၼ်ၽေႇဢပႅတ်ႈပုၼ်ႈယိတ်ႈပရေႃးႁဵၵ်ႈတင်းလၢႆ ဢိၵ်ႇတင်းပုၼ်ႈပရဵၵ်ႈသၢတ်ႈတင်းသဵင်ႈတင်းလူင်ၸိူဝ်းၼၼ်ႉဢေႃႈ။- 34ဢၼ်ၼႆႉၸမ်ႉ၊ ပဵၼ်ပိင်းၺၢပ်ႈၸဝ်ႈတီႈသူယူႇတႃႇသေႇဢမ်ႇထၢတ်ႇ ႁႂ်ႈလႆႈႁဵတ်းတၢင်းဢၼ်ၽေႇဢပႅတ်ႈ ၵူၼ်းမဵဝ်းဢီႉသရေႇလႃႉတင်းလၢႆ ၵွပ်ႈပိူဝ်ႈဢပႅတ်ႈၶဝ်ၵႃႈမီးၼၼ်ႉ ယေႈပီႊယေႈပွၵ်ႈဢေႃႈ၊ ဝႃႈၼင်ႇၼႆဢေႃႈ။ မၼ်းၵေႃႈႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉ တီႈမူဝ်းသေႇၼၼ်ႉဢေႃႈ။
Currently Selected:
ႁဵတ်းဝၢတ်ႈ 16: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship