ႁဵတ်းဝၢတ်ႈ 23

1ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 2မႂ်းသင်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆလႄႈဝႃႈ၊ ပွႆးထႃႇဝရႃႉၽြႃးဢၼ်သူတၵ်းလႆႈၸီႇယၢင်ႇၶိင်ႇမၼ်းၶႃႇမၼ်းဝႆႉ ႁႂ်ႈပဵၼ်တၢင်းဢၼ်ၸူႉတုမ်ထမ်ႇမႃႉၵၼ်ၸိူဝ်းၼၼ်ႉ ပဵၼ်ပွႆးၵဝ်ဢမၢၼ်ႇၶၼ်ပဵၼ်ဢေႃႈ။- 3တၵ်းလႆႈႁဵတ်းတၢင်းႁဵတ်းႁူၵ်းဝၼ်းဢေႃႈ။ ဝၼ်းသတ်ႉတမႃႉၼၼ်ႉပဵၼ်ဝၼ်းၵမ်သိၼ်၊ ဢၼ်တၵ်းလႆႈယူႇၼိမ်ၼိမ်လီလီ၊ ဝၼ်းတၢင်းဢၼ်ၸူႉတုမ်ထမ်ႇမႃႉၵၼ်ဢေႃႈ။ သူဢမ်ႇလႆႈႁဵတ်းတၢင်းႁဵတ်း။ ပဵၼ်ဝၼ်းၵမ်သိၼ်ထႃႇဝရႃႉၽြႃး ၵႃႈၼႂ်းတီႈၵႃႈဢၼ်သူယူႇသူသဝ်းၵူႈတီႈၵူႈလႅၼ်ၼၼ်ႉဢေႃႈ။

4ၶိင်ႇမၼ်းၶႃႇမၼ်းၵိုင်ႇတၢၼ်ႇသေယဝ်ႉ၊ ပွႆးထႃႇဝရႃႉၽြႃး ဢၼ်ဝႃႈတၢင်းဢၼ်ၸူႉတုမ်ထမ်ႇမႃႉၵၼ် ဢၼ်သူတၵ်းလႆႈၸီႇယၢင်ႇၼႂ်းမိူဝ်ႈဢၼ်ၶိင်ႇမၼ်းၶႃႇမၼ်းထုၵ်ႇၼၼ်ႉၸိူဝ်းၼၼ်ႉၸမ်ႉ၊

5ၼႂ်းလိူၼ်ပထမႃႉသိပ်းသီႇဝၼ်း ၵႃႈတီႈၶိင်ႇႁူဝ်ၶမ်ႈၼၼ်ႉ ပဵၼ်ပွႆးပႃႉသၶႃႇထႃႇဝရႃႉၽြႃးဢေႃႈ။- 6လိုၼ်းၼၼ်ႉၼင်ႇၵဝ်ႇ၊ ၵႃႈတီႈသိပ်းႁႃႈဝၼ်းၼၼ်ႉ တၵ်းလႆႈပဵၼ်ပွႆးဢၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈပုၼ်ႈထႃႇဝရႃႉၽြႃးဢေႃႈ။ ၸဵတ်းဝၼ်းတဵမ်တဵမ်၊ သူတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈဢေႃႈ။- 7ၵႃႈတီႈဝၼ်းပထမႃႉၼၼ်ႉ၊ တၵ်းလႆႈႁဵတ်းတၢင်းဢၼ်ၸူႉတုမ်ထမ်ႇမႃႉၵၼ်ဢေႃႈ။ သူဢမ်ႇလႆႈႁဵတ်းတၢင်းႁဵတ်းလေႃးၵီႇ။- 8သူတၵ်းလႆႈဢဝ်တင်းၽႆးႁဵတ်းတၢင်းပုၵ်ႈၸေႃႇတီႈထႃႇဝရႃႉၽြႃးၸဵတ်းဝၼ်းဢေႃႈ။ ၵႃႈတီႈဝၼ်းသတ်ႉတမႃႉၼၼ်ႉၵေႃႈ တၵ်းလႆႈမီးတၢင်းဢၼ်ၸူႉတုမ်ထမ်ႇမႃႉၵၼ်ဢေႃႈ။ သူဢမ်ႇလႆႈႁဵတ်းတၢင်းႁဵတ်းလေႃးၵီႇ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

9ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 10မႂ်းသင်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆၼၼ်ႉလႄႈဝႃႈ၊ မိူဝ်ႈဢၼ်သူႁွတ်ႈထိုင်ၵႃႈတီႈမိူင်းဢၼ်ၵဝ်တၵ်းပၼ်ၼၼ်ႉလႄႈ ပၢတ်ႇၶဝ်ႈၼၼ်ႉၸိုင်၊ သူတၵ်းလႆႈဢဝ်လိုၼ်ႈၶဝ်ႈဢၼ်ပဵၼ်မၢၵ်ႇပဵၼ်ႁူင်းဢွၼ်တၢင်းၼၼ်ႉမတ်ႉၼိုင်ႈ မႃးတီႈယိတ်ႈပရေႃးႁဵၵ်ႈဢေႃႈ။- 11မၼ်းတၵ်းလႆႈဢဝ်လိုၼ်ႈၶဝ်ႈၼၼ်ႉယွင်ႈၵႂႆၵႃႈတီႈၽၢႆႇၼႃႈထႃႇဝရႃႉၽြႃး ႁႂ်ႈထုၵ်ႇၸႂ်မႅၼ်ႈၸႂ်မၼ်းၸဝ်ႈဢေႃႈ။ ပူၼ်ႉဝၼ်းၵမ်သိၼ်သေယဝ်ႉ၊ ၼႂ်းဝၼ်းမိူဝ်ႈၽုၵ်ႈၼၼ်ႉ ယိတ်ႈပရေႃးႁဵၵ်ႈတၵ်းလႆႈဢဝ်လိုၼ်ႈၶဝ်ႈၼၼ်ႉယွင်ႈၵႂႆဢေႃႈ။- 12ၵႃႈတီႈဝၼ်းဢၼ်သူဢဝ်လိုၼ်ႈၶဝ်ႈၼၼ်ႉယွင်ႈၵႂႆၼၼ်ႉ၊ သူတၵ်းလႆႈဢဝ်သူဝ်းပေႃႈဢွၼ်ႇဢၼ်ဢမ်ႇပႆႇၶွပ်ႈၶူပ်ႇ၊ ဢၼ်ဢမ်ႇပႃးဢပႅတ်ႈၼၼ်ႉ ပုၵ်ႈၸေႃႇပုၼ်ႈယိတ်ႈဢၼ်တုတ်ႇၽႆး တီႈထႃႇဝရႃႉၽြႃးဢေႃႈ။- 13တၢင်းပုၵ်ႈၸေႃႇၽေႃးၸဵၼ်ႇဢၼ်ၸၢပ်ႈသႅင်ႇၵၼ်တင်းယိတ်ႈၼၼ်ႉ တၵ်းလႆႈပဵၼ်ၽွင်ၶဝ်ႈမုၼ်းဢၼ်ဢဝ်ၼမ်ႉမၼ်းသႂ်ႇလေႃးၼၼ်ႉ ဢေးၽႃႇသိပ်းပုၼ်ႈဢဝ်သွင်ပုၼ်ႈဢၼ်ဝႃႈ တင်းပုၵ်ႈၸေႃႇဢၼ်ဢဝ်တင်းၽႆး ႁဵတ်းတီႈထႃႇဝရႃႉၽြႃးပုၼ်ႈဢၼ်ႁွမ်ဢၼ်ႁူၺ်းဢေႃႈ။ တၢင်းပုၵ်ႈၸေႃႇဢၼ်သွၼ်းလေႃႇၸမ်ႉ၊ တၵ်းလႆႈပဵၼ် ၼမ်ႉၸပိတ်ႈ ႁီႉၼႃႉ သီႇပုၼ်ႈဢဝ်ပုၼ်ႈၼိုင်ႈဢေႃႈ။- 14ၸူဝ်ႈဢၼ်ဢမ်ႇပႆႇထိုင်ႁွတ်ႈဝၼ်းၼႆႉလႄႈ သူဢမ်ႇပႆႇဢဝ်တၢင်းပုၵ်ႈၸေႃႇၽြႃးပဵၼ်ၸဝ်ႈသူမႃးယဝ်ႉၼၼ်ႉၸိုင်၊ သူဢမ်ႇလႆႈၵိၼ်ၶဝ်ႈမုၼ်း၊ ၶဝ်ႈၶူဝ်ႈ၊ မၢၵ်ႇလိပ်းႁူင်းလိပ်း။ ပဵၼ်ပိင်းၺၢပ်ႈဢၼ်တႃႇသေႇတီႈၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်းတၢမ်း ၼႂ်းတီႈၵႃႈဢၼ်သူယူႇသူသဝ်းၵူႈတီႈၵူႈလႅၼ်ၼၼ်ႉဢေႃႈ။

15ပူၼ်ႉဝၼ်းၵမ်သိၼ်ၼၼ်ႉသေယဝ်ႉ၊ ၸႃႉၸဵမ်ဝၼ်းမိူဝ်ႈၽုၵ်ႈ ဢၼ်ပဵၼ်ဝၼ်းဢၼ်ဢဝ်လိုၼ်ႈၶဝ်ႈ တၢင်းပုၵ်ႈၸေႃႇဢၼ်ယွင်ႈၵႂႆၼၼ်ႉမႃးၼၼ်ႉလႄႈ တၵ်းလႆႈၼပ်ႉဢၢၼ်ႇသတၢင်းႁႂ်ႈၸေးၸဵတ်းသတၢင်းဢေႃႈ။- 16ပူၼ်ႉဝၼ်းၵမ်သိၼ်သတ်ႉတမႃႉၼၼ်ႉသေယဝ်ႉ၊ ပႃးတင်းဝၼ်းမိူဝ်ႈၽုၵ်ႈၼၼ်ႉလႄႈ ၼပ်ႉဢၢၼ်ႇႁႃႈသိပ်းဝၼ်းတဵမ်တဵမ်ယဝ်ႉ၊ သူၸၢင်ႈတၵ်းလႆႈသၢၵ်ႈၵၢပ်ႈတၢင်းပုၵ်ႈၸေႃႇၽေႃးၸဵၼ်ႇဢၼ်မႂ်ႇတီႈထႃႇဝရႃႉၽြႃးဢေႃႈ။- 17သူတၵ်းလႆႈဢဝ်ၶဝ်ႈမုၼ်းယွင်ႈၵႂႆသွင်ႁူၺ်ႇဢၼ်ဢဝ်တင်းၽွင်ၶဝ်ႈမုၼ်း ဢေးၽႃႇသိပ်းပုၼ်ႈဢဝ်သွင်ပုၼ်ႈ ဢၼ်ပႃးတင်းၸိူဝ်ႉပႅင်ႈသေလႄႈႁဵတ်းၼၼ်ႉဢၼ်ဝႃႈမၢၵ်ႇဢၼ်မၢၵ်ႇဢွၼ်တၢင်းပုၼ်ႈထႃႇဝရႃႉၽြႃးၼၼ်ႉ ဢွၵ်ႇသေၵႃႈၼႂ်းတီႈဢၼ်သူယူႇသူသဝ်းမႃးလႄႈ၊- 18တၵ်းလႆႈဢဝ်သူဝ်းဢွၼ်ႇဢၼ်ဢမ်ႇပႆႇၶွပ်ႈၶူပ်ႇ ဢၼ်ဢမ်ႇပႃးဢပႅတ်ႈၸဵတ်းတူဝ်၊ ဝူဝ်းပေႃႈဢွၼ်ႇတူဝ်ၼိုင်ႈ၊ ပႄႉပေႃႈသွင်တူဝ် သၢၵ်ႈၵၢပ်ႈလူၺ်ႈၵၼ်တင်းၶဝ်ႈမုၼ်းၼၼ်ႉဢေႃႈ။ ပဵၼ်တၢင်းပုၵ်ႈၸေႃႇယိတ်ႈဢၼ်တုတ်ႇၽႆး တီႈထႃႇဝရႃႉၽြႃး ဢၼ်ဝႃႈ တၢင်းပုၵ်ႈၸေႃႇ ဢၼ်ဢဝ်တင်းၽႆးႁဵတ်းပုၼ်ႈဢၼ်ႁွမ်ဢၼ်ႁူၺ်းတီႈထႃႇဝရႃႉၽြႃးၼၼ်ႉလႄႈ ပႃးလူၺ်ႈၵၼ်တင်းတၢင်းပုၵ်ႈၸေႃႇၽေႃးၸဵၼ်ႇမၼ်း ဢိၵ်ႇတင်းတၢင်းပုၵ်ႈၸေႃႇဢၼ်သွၼ်းလေႃႇမၼ်း ႁင်းၽႂ်ႁင်းမၼ်းဢေႃႈ။- 19သူတၵ်းလႆႈဢဝ်ပႄႉပေႃႈဢွၼ်ႇပုၼ်ႈယိတ်ႈဢၼ်ၽေႇဢပႅတ်ႈတူဝ်ၼိုင်ႈ၊ ဢိၵ်ႇတင်းသူဝ်းပေႃႈဢွၼ်ႇဢၼ်ဢမ်ႇပႆႇၶွပ်ႈၶူပ်ႇပုၼ်ႈယိတ်ႈမိၵ်ႉသႃႇႁႃယႃႉ သွင်တူဝ်ပုၵ်ႈၸေႃႇလႄႈ၊- 20ယိတ်ႈပရေႃးႁဵၵ်ႈတၵ်းလႆႈဢဝ်ယွင်ႈၵႂႆ လူၺ်ႈၵၼ်တင်းၶဝ်ႈမုၼ်း မၢၵ်ႇဢၼ်မၢၵ်ႇဢွၼ်တၢင်းၼၼ်ႉလႄႈ ပႃးသူဝ်းပေႃႈဢွၼ်ႇသွင်တူဝ်ၼၼ်ႉသေလႄႈ ႁဵတ်းတၢင်းပုၵ်ႈၸေႃႇဢၼ်ယွင်ႈၵႂႆၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။ ၸိူဝ်းၼၼ်ႉတၵ်းလႆႈပဵၼ်ဢၼ်မူတ်းၸၢင်ႇၵႃႈတီႈၽၢႆႇၼႃႈထႃႇဝရႃႉၽြႃး ပုၼ်ႈယိတ်ႈပရေႃးႁဵၵ်ႈၼၼ်ႉဢေႃႈ။- 21ၼႂ်းဝၼ်းၼၼ်ႉၵေႃႈ သူတၵ်းလႆႈၸီႇယၢင်ႇႁႂ်ႈမီးတၢင်းဢၼ်ၸူႉတုမ်ထမ်ႇမႃႉၵၼ်ဢေႃႈ။ သူဢမ်ႇလႆႈႁဵတ်းတၢင်းႁဵတ်းလေႃးၵီႇ။ ပဵၼ်ပိင်းၺၢပ်ႈဢၼ်တႃႇသေႇတီႈၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်းတၢမ်း ၵႃႈၼႂ်းတီႈၵႃႈဢၼ်သူယူႇသူသဝ်းၵူႈတီႈၵူႈလႅၼ်ၼၼ်ႉဢေႃႈ။

22မိူဝ်ႈဢၼ်သူပၢတ်ႇၶဝ်ႈဢၼ်ပဵၼ်ၵႃႈတီႈလိၼ်သူၼၼ်ႉၸိုင်၊ ဢမ်ႇလႆႈပၢတ်ႇၵႃႈတီႈၸွၵ်ႉၼႃးၸဵင်ႇၼႃးမူတ်းမူတ်းသဵင်ႈသဵင်ႈ။ သူဢမ်ႇလႆႈၶိုၼ်းလႄႈ ၵဵပ်းသိမ်းဢဝ် ဢၼ်တူၵ်းဢၼ်ႁူင်ႈၵႃႈတီႈဢၼ်သိမ်းဢဝ်ယဝ်ႉၼၼ်ႉ။ တၵ်းလႆႈႁႂ်ႈၵိုတ်းႁႂ်ႈၵျၢၼ်ႇဝႆႉပုၼ်ႈၵူၼ်းယၢၵ်ႈၵူၼ်းၽၢၼ် ဢိၵ်ႇတင်းၶႅၵ်ႇဢႃႇၵၼ်ႇတူႉဢေႃႈ။ ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

23ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 24မႂ်းသင်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆလႄႈဝႃႈ၊ လိူၼ်သတ်ႉတမႃႉ၊ ဝၼ်းပထမႃႉၼၼ်ႉ၊ တၵ်းလႆႈပဵၼ်ဝၼ်းဢၼ် တၵ်းလႆႈယူႇၼိမ်ၼိမ်လီလီ၊ ဝၼ်းဢၼ်တၵ်းလႆႈႁဵတ်းတၢင်းဢၼ်ပဝ်ႇၼႄးၶရႃႇ ပုၼ်ႈဢၼ်မၼ်းၸဝ်ႈ တၵ်းၶုၵ်းၸႂ်လႆႈၶႆႈၸႂ်ထူပ်း၊ ဝၼ်းဢၼ်ႁဵတ်းတၢင်းဢၼ်ၸူႉတုမ်ထမ်ႇမႃႉၵၼ်ဢေႃႈ။- 25သူဢမ်ႇလႆႈႁဵတ်းတၢင်းႁဵတ်းလေႃးၵီႇ။ သူတၵ်းလႆႈသၢၵ်ႈၵၢပ်ႈတၢင်းပုၵ်ႈၸေႃႇဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃးဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

26ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ။- 27လိူၼ်သတ်ႉတမႃႉ၊ ဝၼ်းတႃႉသမႃႉၼၼ်ႉၵေႃႈ ပဵၼ်ဝၼ်းဢၼ်ၽေႇဢပႅတ်ႈ၊ ဝၼ်းဢၼ်ႁဵတ်းတၢင်းဢၼ်ၸူႉတုမ်ထမ်ႇမႃႉၵၼ်ဢေႃႈ။ သူတၵ်းလႆႈၵမ်ၵျၢင်ႉၵႅၼ်ႇၵႅၼ်ႇၶႅင်ၶႅင်ဢေႃႈ။ သူတၵ်းလႆႈသၢၵ်ႈၵၢပ်ႈတၢင်းပုၵ်ႈၸေႃႇ ဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃးဢေႃႈ။- 28ၼႂ်းဝၼ်းၼၼ်ႉ သူဢမ်ႇလႆႈႁဵတ်းတၢင်းႁဵတ်းလႃးလႃး။ လွင်ႈမၼ်းၸမ်ႉ ပဵၼ်ဝၼ်းဢၼ်ၽေႇဢပႅတ်ႈ ဢၼ်တၵ်းလႆႈႁဵတ်းတၢင်းဢၼ်ၽေႇဢပႅတ်ႈပုၼ်ႈသူၵႃႈတီႈၽၢႆႇၼႃႈထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ။- 29ၵေႃႉဢၼ်ဢမ်ႇၵမ်ၵျၢင်ႉၵႅၼ်ႇၵႅၼ်ႇၶႅင်ၶႅင်ၼႂ်းဝၼ်းၼၼ်ႉၼၼ်ႉၸမ်ႉ၊ တၵ်းလႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ။- 30ၵေႃႉဢၼ်ႁဵတ်းတၢင်းႁဵတ်းသေၸိူဝ်ႉသေပိူင်ၼႂ်းဝၼ်းၼၼ်ႉၼၼ်ႉၸိုင်၊ ၵဝ်တၵ်းပႄႇပႅတ်ႈသေၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ။- 31သူဢမ်ႇလႆႈႁဵတ်းတၢင်းႁဵတ်းလႃးလႃး။ ပဵၼ်ပိင်းၺၢပ်ႈၸဝ်ႈဢၼ်တႃႇသေႇတီႈၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်းတၢမ်း ၵႃႈၼႂ်းတီႈၵႃႈဢၼ်သူယူႇသူသဝ်းၵူႈတီႈၵူႈလႅၼ်ၼၼ်ႉဢေႃႈ။- 32ဝၼ်းၼၼ်ႉပဵၼ်ဝၼ်းၵမ်သိၼ်ဢၼ်တၵ်းလႆႈယူႇၼိမ်ၼိမ်လီလီ၊ ဝၼ်းဢၼ်တၵ်းလႆႈၵမ်ၵျၢင်ႉၵႅၼ်ႇၵႅၼ်ႇၶႅင်ၶႅင်ဢေႃႈ။ ႁူဝ်ၶမ်ႈဝၼ်းၼဝမႃႉၼၼ်ႉ၊ ၸႃႉၸဵမ်ႁူဝ်ၶမ်ႈဝၼ်းၼၼ်ႉတေႃႇထိုင်ႁွတ်ႈႁူဝ်ၶမ်ႈဝၼ်းမိူဝ်ႈၽုၵ်ႈၼၼ်ႉလႄႈ သူတၵ်းလႆႈပႂ်ႉဝၼ်းၵမ်သိၼ်ဢေႃႈ၊ ဝႃႈၼင်ႇၼႆဢေႃႈ။

33ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 34မႂ်းသင်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆလႄႈဝႃႈ၊ ၸႃႉၸဵမ်လိူၼ်သတ်ႉတမႃႉသိပ်းႁႃႈဝၼ်းၼၼ်ႉလႄႈ ၸဵတ်းဝၼ်းတဵမ်တဵမ်တၵ်းလႆႈပဵၼ်ပွႆးႁဵတ်းသုမ်ႉထဵင်ပုၼ်ႈထႃႇဝရႃႉၽြႃးဢေႃႈ။- 35ၵႃႈတီႈဝၼ်းပထမႃႉၼၼ်ႉ၊ တၵ်းလႆႈႁဵတ်းတၢင်းဢၼ်ၸူႉတုမ်ထမ်ႇမႃႉၵၼ်ဢေႃႈ။ သူဢမ်ႇလႆႈႁဵတ်းတၢင်းႁဵတ်းလေႃးၵီႇ။- 36ၸဵတ်းဝၼ်းတဵမ်တဵမ်သူတၵ်းလႆႈသၢၵ်ႈၵၢပ်ႈတၢင်းပုၵ်ႈၸေႃႇ ဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃးၼၼ်ႉဢေႃႈ။ ၵႃႈတီႈဝၼ်းဢႃႉထမႃႉၼၼ်ႉၵေႃႈ တၵ်းလႆႈႁဵတ်းတၢင်းဢၼ်ၸူႉတုမ်ထမ်ႇမႃႉၵၼ်လႄႈ သၢၵ်ႈၵၢပ်ႈတၢင်းပုၵ်ႈၸေႃႇ ဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃးၼၼ်ႉဢေႃႈ။ ပဵၼ်တၢင်းဢၼ်ၸူႉၵၼ်တုမ်ၵၼ် ဢၼ်ပဵၼ်တီႈသုတ်းတီႈၵွႆပွႆးလႄႈ သူဢမ်ႇလႆႈႁဵတ်းတၢင်းႁဵတ်းလေႃးၵီႇ။

37ဢၼ်ၼႆႉၸမ်ႉ၊ ပဵၼ်ပွႆးထႃႇဝရႃႉၽြႃး ဢၼ်သူတၵ်းလႆႈၸီႇယၢင်ႇ ႁႂ်ႈပဵၼ်တၢင်းဢၼ်ၸူႉတုမ်ထမ်ႇမႃႉၵၼ် လွင်ႈၼင်ႇႁိုဝ်တၵ်းလႆႈႁဵတ်းတၢင်းပုၵ်ႈၸေႃႇ ဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃး၊ ယိတ်ႈဢၼ်တုတ်ႇၽႆး၊ တၢင်းပုၵ်ႈၸေႃႇၽေႃးၸဵၼ်ႇ၊ တၢင်းဢၼ်ပုၵ်ႈၸေႃႇယိတ်ႈ၊ တၢင်းပုၵ်ႈၸေႃႇဢၼ်သွၼ်းလေႃႇၼႂ်းမိုဝ်ႉဝၼ်း ႁင်းၽႂ်ႁင်းမၼ်းၼၼ်ႉၸိူဝ်းၼၼ်ႉ၊- 38ဢၼ်ၼွၵ်ႈသေဝၼ်းၵမ်သိၼ်ထႃႇဝရႃႉၽြႃးလႂ်၊ တႃႇၼႃႉတၢင်းဢၼ်သူလူႇလႂ်၊ တၢင်းဢၼ်သူပုၵ်ႈၸေႃႇဢၼ်ၸၢပ်ႈသႅင်ႇၵၼ်တင်းၵတီႉသဵတ်ႈၸႃႇလႂ်၊ တၢင်းပုၵ်ႈၸေႃႇဢၼ်သူယူႇဢလူဝ်ႇလူဝ်ႇလႄႈႁဵတ်းလႂ် ဢၼ်လႆႈသၢၵ်ႈၵၢပ်ႈတီႈထႃႇဝရႃႉၽြႃးၸိူဝ်းၼၼ်ႉဢေႃႈ။- 39ၼွၵ်ႈသေၼၼ်ႉ လိူၼ်သတ်ႉတမႃႉသိပ်းႁႃႈဝၼ်းၼၼ်ႉ မိူဝ်ႈဢၼ်သူသိမ်းဢဝ်မၢၵ်ႇလိၼ်ႁူင်းလိၼ်ယဝ်ႉၼၼ်ႉ၊ သူတၵ်းလႆႈၶၢမ်ႇပွႆးတီႈထႃႇဝရႃႉၽြႃး ၸဵတ်းဝၼ်းတဵမ်တဵမ်ဢေႃႈ။ ဝၼ်းပထမႃႉတၵ်းလႆႈပႂ်ႉၵမ်သိၼ် ဢၼ်တၵ်းလႆႈယူႇၼိမ်ၼိမ်လီလီဢေႃႈ။ ဝၼ်းဢႃႉထမႃႉၼၼ်ႉၵေႃႈ တၵ်းလႆႈပႂ်ႉၵမ်သိၼ် ဢၼ်တၵ်းလႆႈယူႇၼိမ်ၼိမ်လီလီဢေႃႈ။- 40ၵႃႈတီႈဝၼ်းပထမႃႉၼၼ်ႉ၊ သူတၵ်းလႆႈဢဝ်မၢၵ်ႇမႆႉမၢၵ်ႇတွၵ်ႇဢၼ်လီဢၼ်ငၢမ်းလႂ်၊ မႂ်ထၢၼ်လႂ်၊ ၵိင်ႇၵႃႈဢၼ်ၽိူဝ်ၼႃၽိူဝ်ပူင်းလႂ်၊ တင်းတူၼ်ႈမူဝ်းမၶႃႉ ဢၼ်မီးၵႃႈႁိမ်းၼမ်ႉႁွင်ႈၼမ်ႉၵႄးလႂ် ၸိူဝ်းၼၼ်ႉသေလႄႈ ဢွၼ်ၵၼ်ႁဵတ်းတၢင်းဢၼ်သႂၢင်ႇသိူဝ်းၵႃႈတီႈၽၢႆႇၼႃႈထႃႇဝရႃႉၽြႃး ၽြႃးပဵၼ်ၸဝ်ႈသူ ၸဵတ်းဝၼ်းတဵမ်တဵမ်ဢေႃႈ။- 41ပွႆးၸဝ်ႈၼၼ်ႉၸိုင်၊ သူတၵ်းလႆႈၶၢမ်ႇပုၼ်ႈထႃႇဝရႃႉၽြႃး ၼႂ်းယေႈပီႊၸဵတ်းဝၼ်းတဵမ်တဵမ်ဢေႃႈ။ ပဵၼ်ပိင်းၺၢပ်ႈၸဝ်ႈဢၼ်တႃႇသေႇ တီႈၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်းတၢမ်းၼၼ်ႉဢေႃႈ။ ပွႆးၸဝ်ႈၼၼ်ႉၸိုင် သူတၵ်းလႆႈၶၢမ်ႇၵႃႈတီႈ လိူၼ်သတ်ႉတမႃႉဢေႃႈ။- 42လွင်ႈၼင်ႇႁိုဝ်မဵဝ်းၸိူဝ်ႉၶိူဝ်းသူသိုပ်ႇသိုပ်ႇတၢမ်းတၢမ်းၸိူဝ်းၼၼ်ႉ 43တၵ်းလႆႈႁူႉလႆႈမၢတ်ႈလွင်ႈဢၼ်ၵဝ် ႁႂ်ႈၵူၼ်းမဵဝ်းဢီႉသရေႇလႃႉတင်းလၢႆ ယူႇၵႃႈၼႂ်းသုမ်ႉၼႂ်းထဵင် ၼႂ်းမိူဝ်ႈဢၼ် ၵဝ်ၼုၵ်ႈဢဝ်ၶဝ်ဢွၵ်ႇသေ ၵႃႈၼႂ်းမိူင်းဢေႇၵိပ်ႉတူႉမႃးၼၼ်ႉၸိုင် သူတၵ်းလႆႈယူႇၵႃႈၼႂ်းသုမ်ႉၼႂ်းထဵင်ဢေႃႈ။ ၵူၼ်းမဵဝ်းၸိူဝ်ႉၶိူဝ်း ဢီႉသရေႇလႃႉ တင်းသဵင်ႈတင်းလူင် တၵ်းလႆႈဢွၼ်ၵၼ်ယူႇၵႃႈၼႂ်းသုမ်ႉၼႂ်းထဵင် ၸဵတ်းဝၼ်းတဵမ်တဵမ်ဢေႃႈ။ ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။- 44မူဝ်းသေႇၵေႃႈ ၶိုၼ်းလၢတ်ႈလွင်ႈပွႆးထႃႇဝရႃႉၽြႃးၸိူဝ်းၼၼ်ႉ တီႈၵူၼ်းမဵဝ်းဢီႉသရေႇလႃႉတင်းလၢႆဢေႃႈ။

Popular Bible Verses from
ႁဵတ်းဝၢတ်ႈ 23

Bible:

Shan

Version: သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး - CBMS