ႁဵတ်းဝၢတ်ႈ 24
24
တၢင်းဢၼ်မႄးႁဵတ်းမႄးႁႅၼ်းၶူင်ႇတီႈတႆႈၽႆး
(တူၺ်း၊ ဢွၵ်ႇ 27:20-21)
1ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 2မႂ်းသင်ႇလၢတ်ႈဝႆႉတီႈၵူၼ်းမဵဝ်းဢီႉသရေႇလႃႉတင်းလၢႆ ႁႂ်ႈၶဝ်ဢဝ်ၼမ်ႉမၼ်းသၢၼ်ႇလုၼ်ႇၸႅတ်ႈၸႅတ်ႈ ဢၼ်ဢဝ်မၢၵ်ႇသၢၼ်ႇလုၼ်ႇ တမ်ႁဵတ်း ပုၼ်ႈဢၼ်တၵ်းတႆႈၽႆးတႃႇသေႇဢမ်ႇထၢတ်ႇ ၵႃႈတီႈၶူင်ႇတီႈတႆႈၽႆးၼၼ်ႉ မႃးတီႈမႂ်းတႃႉ။- 3ၵႃႈၼွၵ်ႈၽႃႈၵင်ႈၶိူင်ႈၶၢမ်ႇသၢၵ်ႈသေႇ ၵႃႈၼႂ်းမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉ ဢႃႇရုၼ်ႇတၵ်းလႆႈၸီႇယၢင်ႇပွင်ႁဵတ်းဢမူႉၼၼ်ႉ ၸႃႉၸဵမ်ႁူဝ်ၶမ်ႈတေႃႇထိုင်ႁွတ်ႈၵၢင်ၼႂ် ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။ ပဵၼ်ပိင်းၺၢပ်ႈဢၼ်တႃႇသေႇ တီႈၸူဝ်ႈလုၵ်ႈပၢၼ်လၢၼ်သူ သိုပ်ႇသိုပ်ႇတၢမ်းတၢမ်းၼၼ်ႉဢေႃႈ။- 4မၼ်းတၵ်းလႆႈမႄးႁႅၼ်းဝၢၼ်ႇၽႆး ၵႃႈတီႈၶူင်ႇတီႈတႆႈၽႆး ဢၼ်မူတ်းၸၢင်ႇၼၼ်ႉၸိူဝ်းၼၼ်ႉ ဝႆႉၵႃႈတီႈၽၢႆႇၼႃႈထႃႇဝရႃႉၽြႃးတႃႇသေႇဢမ်ႇထၢတ်ႇဢေႃႈ။
ၶဝ်ႈမုၼ်းဢၼ်သၢၵ်ႈလူႇၽြႃးပဵၼ်ၸဝ်ႈ
5မႂ်းတၵ်းလႆႈဢဝ်ၽွင်ၶဝ်ႈမုၼ်းလႄႈ ႁဵတ်းၶဝ်ႈမုၼ်းသိပ်းသွင်လုၵ်ႈဢေႃႈ။ ၶဝ်ႈမုၼ်းယေႈလုၵ်ႈတၵ်းလႆႈမီး ဢေးၽႃႇ သိပ်းပုၼ်ႈ ဢဝ်သွင်ပုၼ်ႈဢေႃႈ။- 6မႂ်းတၵ်းလႆႈၵွင်ႁဵတ်းသွင်ၵွင် ယေႈၵွင်ႁူၵ်းလုၵ်ႈၼင်ႇၵၼ် ဝႆႉၵႃႈၼိူဝ်ၶူင်ႇတီႈၵိၼ် ဢၼ်မူတ်းသႂ်ၼၼ်ႉ ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။- 7မႂ်းတၵ်းလႆႈဢဝ်လေႃႇပၢၼ်ႇ ဢၼ်မူတ်းသႂ် တၢင်ႇသႂ်ႇဝႆႉၵႃႈၼိူဝ်မၼ်းၵူႈၵွင် လွင်ႈၼင်ႇႁိုဝ်တၵ်းပဵၼ်ၶဝ်ႈမုၼ်း ပုၼ်ႈဢၼ်မၼ်းၸဝ်ႈတၵ်းၶုၵ်းၸႂ်လႆႈၶႆႈၸႂ်ထူပ်းဢၼ်ဝႃႈ တၢင်းပုၵ်ႈၸေႃႇဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃးဢေႃႈ။- 8မၼ်းတၵ်းလႆႈမႄးႁႅၼ်းဝႆႉၵႃႈတီႈၽၢႆႇၼႃႈထႃႇဝရႃႉၽြႃး ဝၼ်းၵမ်သိၼ်ၵူႈဝၼ်းဢမ်ႇထၢတ်ႇဢေႃႈ။ ပဵၼ်ၶဝ်ႈမုၼ်းဢၼ်ၸွမ်းၼင်ႇပတီႉၺိၺ်ႇထႃႇဝရႃႉၽြႃးသေလႄႈ ၶၢမ်ႇဢဝ်ၵႃႈၼႂ်းမိုဝ်းၵူၼ်းမဵဝ်းဢီႉသရေႇလႃႉတင်းလၢႆၼၼ်ႉဢေႃႈ။- 9ၶဝ်ႈမုၼ်းၼၼ်ႉတၵ်းလႆႈပဵၼ်ပုၼ်ႈဢႃႇရုၼ်ႇ ဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉလႄႈ ၶဝ်တၵ်းလႆႈၵိၼ်ၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈဢေႃႈ။ ၵႃႈၼႂ်းတၢင်းပုၵ်ႈၸေႃႇဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃးၸိူဝ်းၼၼ်ႉ ၶဝ်ႈမုၼ်းၼၼ်ႉပဵၼ်ဢၼ်မူတ်းၸၢင်ႇၼႃႇလူင်လၢင်ပုၼ်ႈမၼ်း ၸွမ်းၵႃႈၼင်ႇပိင်းၺၢပ်ႈဢၼ်တႃႇသေႇၼၼ်ႉဢေႃႈ၊ ဝႃႈၼင်ႇၼႆဢေႃႈ။
တၢင်းဢၼ်ၸီႇယၢင်ႇပၼ်တၢမ်ႇၸွမ်းတြႃး
10လုၵ်ႈၸၢႆးမႄႈယိင်းဢီႉသရေႇလႃႉ ဢၼ်ပေႃႈမၼ်းပဵၼ်ၵူၼ်းဢေႇၵိပ်ႉတူႉၼၼ်ႉၵေႃႉၼိုင်ႈ ၸွမ်းမႃးလူၺ်ႈၵၼ်တင်းၵူၼ်းမဵဝ်းဢီႉသရေႇလႃႉၸိူဝ်းၼၼ်ႉလႄႈ လုၵ်ႈၸၢႆးမႄႈယိင်းဢီႉသရေႇလႃႉၼၼ်ႉ ၽိတ်းၵၼ်တင်းၵူၼ်း ဢီႉသရေႇလႃႉ ၵေႃႉၼိုင်ႈၵႃႈၼႂ်းတပ်ႉဢေႃႈ။- 11လုၵ်ႈၸၢႆးမႄႈယိင်းဢီႉသရေႇလႃႉၼၼ်ႉ သႄႉသွမ်းၼႃႇမႃႉၸိုဝ်ႈသဵင်ၸဝ်ႈလႄႈ ၵိၼ်ႇလႃႇဢေႃႈ။ ၶဝ်ဢဝ်မၼ်းၼၼ်ႉ မႃးၵႃႈတီႈမူဝ်းသေႇဢေႃႈ။ ၸိုဝ်ႈသဵင်မႄႈမၼ်းၼၼ်ႉၸမ်ႉ၊ ပဵၼ်သေႇလေႃးမိတ်ႉလႄႈ ပဵၼ်လုၵ်ႈယိင်းတီႉပရီႉ ၸိူဝ်ႉၶိူဝ်းတၢၼ်ႇဢေႃႈ။- 12ၶဝ်ဢဝ်မၼ်းၶျုၵ်ႈဝႆႉ ႁႂ်ႈလႆႈႁူႉဢလူဝ်ႇထႃႇဝရႃႉၽြႃးလႅင်းလႅင်းဢေႃႈ။- 13ထႃႇဝရႃႉၽြႃးမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 14ဢဝ်ၵေႃႉဢၼ်ၵိၼ်ႇလႃႇၼၼ်ႉ ဢွၵ်ႇၵႂႃႇၵႃႈၼွၵ်ႈတပ်ႉလႄႈ ႁႂ်ႈၶဝ်ၸိူဝ်းဢၼ်ငိၼ်းၵႂၢမ်းမၼ်းၼၼ်ႉတင်းသဵင်ႈတင်းလူင် ဢွၼ်ၵၼ်ဢဝ်မိုဝ်းတၢင်ႇသႂ်ႇၵႃႈၼိူဝ်ႁူဝ်မၼ်းသေယဝ်ႉ၊ ႁႂ်ႈပရဵၵ်ႈသၢတ်ႈတင်းသဵင်ႈတင်းလူင် ဢွၼ်ၵၼ်ဢဝ်မၢၵ်ႇႁိၼ်ထိမ်ႈတႃႉ။- 15မႂ်းသင်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆလႄႈဝႃႈ၊ ၵေႃႉဢၼ်ၵိၼ်ႇလႃႇၽြႃးပဵၼ်ၸဝ်ႈမၼ်းၼၼ်ႉၸမ်ႉ၊ တၵ်းလႆႈၶၢမ်ႇဢပႅတ်ႈတူဝ်ၸဝ်ႈၵဝ်ႇဢေႃႈ။- 16ၵေႃႉဢၼ်သႄႉသွမ်းၼႃႇမႃႉၸိုဝ်ႈသဵင်ထႃႇဝရႃႉၽြႃးၼၼ်ႉၸမ်ႉ၊ တၵ်းလႆႈၶၢမ်ႇတၢင်းဢၼ်ဢဝ်တၢႆ ဢမၢၼ်ႇၶၼ်ပဵၼ်ဢေႃႈ။ ပရဵၵ်ႈသၢတ်ႈတင်းသဵင်ႈတင်းလူင်တၵ်းလႆႈဢွၼ်ၵၼ်ဢဝ်မၢၵ်ႇႁိၼ်ထိမ်ႈမၼ်းၼၼ်ႉ ဢမၢၼ်ႇၶၼ်ပဵၼ်ဢေႃႈ။ ၵူၼ်းမဵဝ်းၸိူဝ်ႉၶိူဝ်းလဵဝ်ၵၼ်သေဢမ်ႇဝႃႈ၊ ၵူၼ်းတၢင်ႇၸိူဝ်ႉတၢင်ႇၶိူဝ်းသေဢမ်ႇဝႃႈ၊ ပေႃးသႄႉသွမ်းၼႃႇမႃႉၸိုဝ်ႈသဵင်ၸဝ်ႈၸိုင် တၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။
17ၵေႃႉဢၼ်ဢဝ်ဢသၢၵ်ႈၵူၼ်းတၢႆၼၼ်ႉၵေႃႈ တၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။- 18ၵေႃႉဢၼ်ဢဝ်ဢသၢၵ်ႈတရိၵ်ႈသၢၼ်ႇပိူၼ်ႈတၢႆၼၼ်ႉၵေႃႈ တၵ်းလႆႈၶိုၼ်းတႅၼ်းပၼ်တူဝ်ၼိုင်ႈပုၼ်ႈတူဝ်ၼိုင်ႈဢေႃႈ။- 19ပေႃးၵူၼ်းႁဵတ်းႁႂ်ႈၵူၼ်းႁိူၼ်းၸမ်ၵၼ်ၸဵပ်းၸိုင်၊ တူဝ်ၸဝ်ႈၵဝ်ႇတၵ်းလႆႈၶၢမ်ႇၸွမ်းၵႃႈၼင်ႇဢၼ်ႁဵတ်းတီႈၵေႃႉၼၼ်ႉဢေႃႈ။- 20တၢင်းဢၼ်လုပ်ႇႁၵ်းပုၼ်ႈတၢင်းဢၼ်လုပ်ႇႁၵ်း၊ မၢၵ်ႇတႃပုၼ်ႈမၢၵ်ႇတႃ၊ ၶဵဝ်ႈပုၼ်ႈၶဵဝ်ႈ၊ မၼ်းတၵ်းလႆႈၶၢမ်ႇတၢင်းဢၼ် ၸဵပ်းၸွမ်းၵႃႈၼင်ႇဢၼ် မၼ်းႁဵတ်းႁႂ်ႈၵေႃႉၼၼ်ႉၸဵပ်းၼၼ်ႉဢေႃႈ။- 21ၵေႃႉဢၼ်ဢဝ် ဢသၢၵ်ႈတရိၵ်ႈသၢၼ်ႇပိူၼ်ႈတၢႆၼၼ်ႉ၊ တၵ်းလႆႈၶိုၼ်းတႅၼ်းပၼ်တူဝ်ၼိုင်ႈပုၼ်ႈတူဝ်ၼိုင်ႈဢေႃႈ။ ၵေႃႉဢၼ်ဢဝ်ဢသၢၵ်ႈၵူၼ်းတၢႆၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။- 22ၵူၼ်းမဵဝ်းၸိူဝ်ႉၶိူဝ်းလဵဝ်ၵၼ်သေဢမ်ႇဝႃႈ၊ ၵူၼ်းတၢင်ႇၸိူဝ်ႉတၢင်ႇၶိူဝ်းသေဢမ်ႇဝႃႈ၊ တၵ်းလႆႈၶၢမ်ႇတၢင်းဢၼ်ၸီႇယၢင်ႇၸွမ်းၼင်ႇတြႃးပႃးလဵဝ်ၵူၺ်းဢေႃႈ။ ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။- 23မူဝ်းသေႇသင်ႇလၢတ်ႈဝႆႉတီႈၵူၼ်းမဵဝ်းဢီႉသရေႇလႃႉတင်းလၢႆ ႁႂ်ႈၶဝ်ဢဝ်ၵေႃႉဢၼ်ၵိၼ်ႇလႃႇၼၼ်ႉ ဢွၵ်ႇၵႂႃႇၵႃႈၼွၵ်ႈတပ်ႉသေလႄႈ ဢဝ်မၢၵ်ႇႁိၼ်ထိမ်ႈလႄႈ၊ ၵူၼ်းဢီႉသရေႇလႃႉၸိူဝ်းၼၼ်ႉ ဢွၼ်ၵၼ်ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉတီႈ မူဝ်းသေႇၼၼ်ႉဢေႃႈ။
Currently Selected:
ႁဵတ်းဝၢတ်ႈ 24: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship