ႁဵတ်းဝၢတ်ႈ 27
27
ထုင်းတြႃးလွင်ႈတၢင်းဢၼ်သၢၵ်ႈလူႇတီႈထႃႇဝရႃႉၽြႃး
1ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 2မႂ်းသင်ႇလၢတ်ႈတီႈၵူၼ်းမဵဝ်း ဢီႉသရေႇလႃႉတင်းလၢႆလႄႈဝႃႈ၊ ပေႃးသေၵေႃႉသေၵူၼ်းႁဵတ်းၵတီႉသဵတ်ႈၸႃႇလႄႈ ပုၵ်ႈၸေႃႇၸိုင်၊ ၵေႃႉဢၼ်ထုၵ်ႇလီပုၵ်ႈၸေႃႇၼၼ်ႉ တၵ်းလႆႈပဵၼ်ပုၼ်ႈထႃႇဝရႃႉၽြႃး ၸွမ်းၵႃႈၼင်ႇဢၼ် မႂ်းပျၢတ်ႈၵႃႈမၼ်းၶၼ်မၼ်းၼၼ်ႉဢေႃႈ။- 3မႂ်းတၵ်းလႆႈပျၢတ်ႈၵႃႈမၼ်းၶၼ်မၼ်းၵႃႈႁိုဝ်ဝႃႈၼႆၸမ်ႉ၊ ၵူၼ်းၸၢႆးၸိုင်၊ ဢဝ်ၵႃႈဢသၢၵ်ႈသၢဝ်းၼိုင်ႈတေႃႇထိုင်ႁွတ်ႈႁူၵ်းသိပ်းပီႊၼၼ်ႉ ၸွမ်းလူၺ်ႈၼမ်ႉၼၵ်းငိုၼ်းၸဝ်ႈ ၵျၢပ်ႈသၶေးလႃႉၼၼ်ႉသေလႄႈ တၵ်းလႆႈပျၢတ်ႈၵႃႈမၼ်းၶၼ်မၼ်း ႁႃႈသိပ်းၵျၢပ်ႈဢေႃႈ။- 4ပေႃးပဵၼ်ၵူၼ်းယိင်းၸိုင် မႂ်းတၵ်းလႆႈပျၢတ်ႈၵႃႈမၼ်းၶၼ်မၼ်းသၢမ်သိပ်းၵျၢပ်ႈဢေႃႈ။- 5ဢဝ်ၵႃႈဢသၢၵ်ႈႁႃႈပီႊတေႃႇထိုင်ႁွတ်ႈသၢဝ်းၼိုင်ႈၼၼ်ႉတၵ်းလႆႈပျၢတ်ႈၵႃႈမၼ်းၶၼ်မၼ်း ၵူၼ်းၸၢႆးသၢဝ်းၵျၢပ်ႈ၊ ၵူၼ်းယိင်းသိပ်းၵျၢပ်ႈဢေႃႈ။- 6ဢဝ်ၵႃႈဢသၢၵ်ႈလိူၼ်ၼိုင်ႈ တေႃႇထိုင်ႁွတ်ႈႁႃႈၶူပ်ႇၼၼ်ႉ တၵ်းလႆႈပျၢတ်ႈၵႃႈမၼ်းၶၼ်မၼ်း ၵူၼ်းၸၢႆးငိုၼ်းႁႃႈၵျၢပ်ႈ၊ ၵူၼ်းယိင်းသၢမ်ၵျၢပ်ႈဢေႃႈ။- 7ဢဝ်ၵႃႈဢသၢၵ်ႈႁူၵ်းသိပ်းပီႊၶိုၼ်ႈၵႂႃႇၼၼ်ႉ တၵ်းလႆႈပျၢတ်ႈၵႃႈမၼ်းၶၼ်မၼ်း ၵူၼ်းၸၢႆးသိပ်းႁႃႈၵျၢပ်ႈ၊ ၵူၼ်းယိင်းသိပ်းၵျၢပ်ႈ ဢေႃႈ။- 8ပေႃးမၼ်းဢမ်ႇတၢတ်ႈၼိူင်ႇၵႃႈၼင်ႇဢၼ်မႂ်းပျၢတ်ႈၵႃႈမၼ်းၶၼ်မၼ်းဝႆႉၼၼ်ႉလႆႈၸိုင်၊ တၵ်းလႆႈမႃးၸူးၵႃႈတီႈယိတ်ႈပရေႃးႁဵၵ်ႈလႄႈ ယိတ်ႈပရေႃးႁဵၵ်ႈတၵ်းလႆႈပျၢတ်ႈၵႃႈမၼ်းၶၼ်မၼ်း ၸွမ်းၵႃႈၼင်ႇဢၼ်ၵေႃႉဢၼ် ႁဵတ်းၵတီႉသဵတ်ႈၸႃႇၼၼ်ႉ တၢတ်ႈၼိူင်ႇလႆႈၼၼ်ႉဢေႃႈ။
9ပေႃးပဵၼ်တရိၵ်ႈသၢၼ်ႇ ဢၼ်ၵူၼ်းပုၵ်ႈၸေႃႇတီႈထႃႇဝရႃႉၽြႃးၸိုင်၊ ၵႃႈဢၼ်သေၵေႃႉသေၵူၼ်း ပုၵ်ႈၸေႃႇတီႈထႃႇဝရႃႉၽြႃးၼၼ်ႉ တၵ်းလႆႈမူတ်းၸၢင်ႇဢေႃႈ။- 10ပဵၼ်တူဝ်ဢၼ်လီသေဢမ်ႇဝႃႈ၊ ပဵၼ်တူဝ်ဢၼ်ၺၢမ်ႉသေဢမ်ႇဝႃႈ၊ ဢမ်ႇလႆႈဢဝ်တူဝ်ၼိုင်ႈ။ လႅၵ်ႈလၢႆႈတူဝ်ၼိုင်ႈ ပေႃးမီးဢလူဝ်ႇၶႂ်ႈလႅၵ်ႈလၢႆႈၸိုင်၊ တူဝ်ၼၼ်ႉတင်းတူဝ်ဢၼ်လႅၵ်ႈလၢႆႈၼၼ်ႉ တၵ်းလႆႈမူတ်းၸၢင်ႇတင်းသွင်တူဝ်ဢေႃႈ။- 11ပေႃးပဵၼ်တရိၵ်ႈသၢၼ်ႇ ဢၼ်ဢမ်ႇမူတ်းသႂ်၊ ဢၼ်ဢမ်ႇထုၵ်ႇလီပုၵ်ႈၸေႃႇတီႈထႃႇဝရႃႉၽြႃးၼၼ်ႉၸိုင်၊ မၼ်းတၵ်းလႆႈဢဝ်တူဝ်ၼၼ်ႉ ၼႄပျႃးတီႈယိတ်ႈပရေႃးႁဵၵ်ႈလႄႈ၊- 12ယိတ်ႈပရေႃးႁဵၵ်ႈတၵ်းလႆႈ ပျၢတ်ႈၵႃႈမၼ်းၶၼ်မၼ်းၸွမ်းလူၺ်ႈဢၼ်လီဢၼ်ဢမ်ႇလီၼၼ်ႉဢေႃႈ။ ၵႃႈၼင်ႇဢၼ် ယိတ်ႈပရေႃးႁဵၵ်ႈပျၢတ်ႈၼၼ်ႉ၊ ၵႃႈမၼ်းၶၼ်မၼ်းတၵ်းလႆႈမီးဢေႃႈ။- 13ပေႃးၵေႃႉဢၼ်ပုၵ်ႈၸေႃႇၼၼ်ႉ မီးဢလူဝ်ႇၶႂ်ႈထုတ်ႇဢဝ်ၶိုၼ်းၸိုင်၊ မၼ်းတၵ်းလႆႈဢဝ်ၵႃႈၶၼ်ဢၼ်မႂ်းပျၢတ်ႈၼၼ်ႉ ႁႃႈပုၼ်ႈပုၼ်ႈၼိုင်ႈထၢပ်ႈထႅင်ႈလႄႈပၼ်ဢေႃႈ။
14ပေႃးသေၵေႃႉသေၵူၼ်း ႁႂ်ႈႁိူၼ်းမၼ်းမူတ်းၸၢင်ႇပုၼ်ႈထႃႇဝရႃႉၽြႃးၸိုင် ယိတ်ႈပရေႃးႁဵၵ်ႈတၵ်းလႆႈပျၢတ်ႈၵႃႈမၼ်းၶၼ်မၼ်း ၸွမ်းလူၺ်ႈဢၼ်လီဢၼ်ဢမ်ႇလီၼၼ်ႉဢေႃႈ။ ၵႃႈၼင်ႇဢၼ်ယိတ်ႈပရေႃးႁဵၵ်ႈပျၢတ်ႈၼၼ်ႉ၊ ၵႃႈမၼ်းၶၼ်မၼ်းတၵ်းလႆႈမီးဢေႃႈ။- 15ပေႃးၵေႃႉဢၼ်ႁႂ်ႈႁိူၼ်းမၼ်းမူတ်းၸၢင်ႇၼၼ်ႉ မီးဢလူဝ်ႇၶႂ်ႈထုတ်ႇဢဝ်ၶိုၼ်းၸိုင်၊ မၼ်းတၵ်းလႆႈဢဝ်ၵႃႈၶၼ်ဢၼ်မႂ်းပျၢတ်ႈၼၼ်ႉ ႁႃႈပုၼ်ႈပုၼ်ႈၼိုင်ႈ ထၢပ်ႈထႅင်ႈသေလႄႈ ပၼ်လႄႈဢဝ်ႁိူၼ်းၼၼ်ႉဢေႃႈ။
16ပေႃးသေၵေႃႉသေၵူၼ်း ႁႂ်ႈႁႆႊၼႃးဢၼ်မၼ်းပိူင်ႇၼၼ်ႉ မူတ်းၸၢင်ႇပုၼ်ႈထႃႇဝရႃႉၽြႃးၵမ်ႈၽွင်ႈၸိုင်၊ မႂ်းတၵ်းလႆႈပျၢတ်ႈၵႃႈမၼ်းၶၼ်မၼ်းၸွမ်းၵႃႈၼင်ႇဢၼ် လႆႈဝၢၼ်ႇၸိူဝ်ႉဝၢၼ်ႇၽၼ်းၼၼ်ႉဢေႃႈ။ ဢၼ်လႆႈဝၢၼ်ႇၸိူဝ်ႉဝၢၼ်ႇၽၼ်းၶဝ်ႈမူႉယေႃး ဢေႃးမေႇၼိုင်ႈၼၼ်ႉၸမ်ႉ၊ တၵ်းလႆႈပျၢတ်ႈၵႃႈမၼ်းၶၼ်မၼ်း ငိုၼ်းၵျၢပ်ႈသၶေးလႃႉ ႁႃႈသိပ်းၵျၢပ်ႈဢေႃႈ။- 17ပေႃးမၼ်းႁႂ်ႈႁႆႊၼႃးမၼ်းမူတ်းၸၢင်ႇ ၸႃႉၸဵမ် ပီႊယူႉပီႉလီႉၼၼ်ႉၸိုင်၊ ၵႃႈၼင်ႇဢၼ်မႂ်းပျၢတ်ႈၼၼ်ႉ ၵႃႈမၼ်းၶၼ်မၼ်းတၵ်းလႆႈမီးဢေႃႈ။- 18ပေႃးႁႂ်ႈႁႆႊၼႃးမၼ်းမူတ်းၸၢင်ႇလိုၼ်းသေ ပီႊယူႉပီႉလီႉၼၼ်ႉၸိုင်၊ ယိတ်ႈပရေႃးႁဵၵ်ႈတၵ်းလႆႈၼပ်ႉဢၢၼ်ႇငိုၼ်း ၸွမ်းလူၺ်ႈပီႊဢၼ်ယင်းလူဝ်ႇထႅင်ႈ ႁႂ်ႈလႆႈၶိုတ်းထိုင်ပီႊယူႉပီႉလီႉ ဢၼ်တၵ်းမႃးၵမ်းလိုၼ်းၼၼ်ႉလႄႈ ယွမ်းသေၵႃႈၼႂ်းငိုၼ်းဢၼ်မႂ်းပျၢတ်ႈဝႆႉၼၼ်ႉဢေႃႈ။- 19ပေႃးၵေႃႉဢၼ်ႁႂ်ႈႁႆႊၼႃးမၼ်းမူတ်းၸၢင်ႇၼၼ်ႉ မီးဢလူဝ်ႇၶႂ်ႈထုတ်ႇဢဝ်ၶိုၼ်းၸိုင်၊ မၼ်းတၵ်းလႆႈဢဝ်ၵႃႈၶၼ်ဢၼ်မႂ်းပျၢတ်ႈၼၼ်ႉ ႁႃႈပုၼ်ႈပုၼ်ႈၼိုင်ႈ ထၢပ်ႈထႅင်ႈသေလႄႈ ပၼ်လႄႈပိူင်ႇဢဝ်ႁႆႊၼႃးၼၼ်ႉဢေႃႈ။- 20ပေႃးဢမ်ႇၼၼ် ပေႃးမၼ်းဢမ်ႇမီးဢလူဝ်ႇၶႂ်ႈထုတ်ႇဢဝ်ႁႆႊၼႃးၼၼ်ႉ၊ ဢမ်ႇၼၼ်ၵေႃႈ ပေႃးၶၢႆပၼ်တီႈပိူၼ်ႈတၢင်ႇၵေႃႉမႅၼ်ႈၸိုင်၊ ၵမ်းလိုၼ်းမၼ်းဢမ်ႇလႆႈထုတ်ႇဢဝ်။- 21ႁႆႊၼႃးၼၼ်ႉမိူဝ်ႈဢၼ်လွတ်ႈသေဢမူႉ ၼႂ်းပီႊယူႉပီႉလီႉၼၼ်ႉယဝ်ႉၸိုင်၊ တၵ်းလႆႈမူတ်းၸၢင်ႇတီႈထႃႇဝရႃႉၽြႃး မိူၼ်ၸိူဝ်ႉၼင်ႇႁႆႊၼႃးဢၼ်ၵိၼ်ႇဝႃႈၼၼ်ႉလႄႈ ပဵၼ်ဢုၵ်ႉၸႃႇယိတ်ႈပရေႃးႁဵၵ်ႈဢေႃႈ။- 22ပေႃးသေၵေႃႉသေၵူၼ်း ဢဝ်ႁႆႊၼႃးဢၼ်မၼ်းပိူင်ႇယူႇၵဝ်ႇၵဝ်ႇဢမ်ႇၸႂ်ႈ၊ ဢၼ်မၼ်းသိုဝ်ႉဢဝ်ၼၼ်ႉ ႁႂ်ႈမူတ်းၸၢင်ႇပုၼ်ႈထႃႇဝရႃႉၽြႃးၸိုင်၊- 23ယိတ်ႈပရေႃးႁဵၵ်ႈတၵ်းလႆႈၼပ်ႉဢၢၼ်ႇၵႃႈမၼ်းၶၼ်မၼ်း ဢၼ်မႂ်းပျၢတ်ႈတေႃႇထိုင်ႁွတ်ႈ ပီႊယူႉပီႉလီႉၼၼ်ႉလႄႈ ၼႂ်းဝၼ်းၼၼ်ႉ မၼ်းတၵ်းလႆႈပၼ်ၵႃႈၶၼ်ဢၼ်မႂ်းပျၢတ်ႈဢၼ်ဝႃႈ လွင်ႈတၢင်းဢၼ်မူတ်းၸၢင်ႇတီႈထႃႇဝရႃႉၽြႃးၼၼ်ႉသေဢေႃႈ။- 24မိူဝ်ႈဢၼ်ႁွတ်ႈထိုင် ပီႊယူႉပီႉလီႉၸိုင်၊ တၵ်းလႆႈႁႂ်ႈႁႆႊၼႃးၼၼ်ႉ ၶိုၼ်းၸူးၵႃႈၼႂ်းမိုဝ်းၵေႃႉဢၼ်ၶၢႆ ဢၼ်ဝႃႈၵေႃႉဢၼ်ပိူင်ႇယူႇၵဝ်ႇၵဝ်ႇၼၼ်ႉဢေႃႈ။- 25ၼႂ်းတၢင်းဢၼ်မႂ်းပျၢတ်ႈၵႃႈပျၢတ်ႈၶၼ်ၵႃႈမီးၼၼ်ႉ မႂ်းတၵ်းလႆႈပျၢတ်ႈၸွမ်းလူၺ်ႈၼမ်ႉၼၵ်းငိုၼ်းၸဝ်ႈ ၵျၢပ်ႈသၶေးလႃႉၼၼ်ႉဢေႃႈ။ ၵျၢပ်ႈသၶေးလႃႉၼၼ်ႉၸမ်ႉ၊ ပဵၼ်သၢဝ်းၵေးရႃႉဢေႃႈ။
26တရိၵ်ႈသၢၼ်ႇ ဢၼ်ပဵၼ်လုၵ်ႈတူၼ်ႈလႄႈ ထႃႇဝရႃႉၽြႃးထိူၵ်ႈပိူင်ႇၼၼ်ႉၸိုင်၊ ၽူႈလႂ်ဢမ်ႇလႆႈႁႂ်ႈမူတ်းၸၢင်ႇ။ ပဵၼ်ဝူဝ်းသေဢမ်ႇဝႃႈ၊ ပဵၼ်သူဝ်းပႄႉသေဢမ်ႇဝႃႈ၊ ပဵၼ်ဢုၵ်ႉၸႃႇထႃႇဝရႃႉၽြႃးဢေႃႈ။- 27ပေႃးပဵၼ်တရိၵ်ႈသၢၼ်ႇ ဢၼ်ဢမ်ႇမူတ်းသႂ်ၸိုင်၊ တၵ်းလႆႈၸွမ်းၼင်ႇဢၼ်မႂ်းပျၢတ်ႈၵႃႈမၼ်းၶၼ်မၼ်းၼၼ်ႉသေလႄႈ ဢဝ်ႁႃႈပုၼ်ႈပုၼ်ႈၼိုင်ႈထၢပ်ႈထႅင်ႈလႄႈပၼ်ဢေႃႈ။ ပေႃးဢမ်ႇမီးဢလူဝ်ႇၶႂ်ႈထုတ်ႇဢဝ်ၸိုင်၊ တၵ်းလႆႈၸွမ်းၼင်ႇဢၼ် မႂ်းပျၢတ်ႈၵႃႈမၼ်းၶၼ်မၼ်းၼၼ်ႉသေလႄႈ ၶၢႆဢေႃႈ။
28ၵူၺ်းၵႃႈ ပဵၼ်ၵူၼ်းသေဢမ်ႇဝႃႈ၊ ပဵၼ်တရိၵ်ႈသၢၼ်ႇသေဢမ်ႇဝႃႈ၊ ပဵၼ်ႁႆႊၼႃးဢၼ်တူဝ်ၸဝ်ႈၵဝ်ႇပိူင်ႇယူႇၵဝ်ႇၵဝ်ႇသေဢမ်ႇဝႃႈ၊ ၵႃႈဢၼ်ဢဝ်ၵႃႈၼႂ်းဢၼ်မၼ်းထိူၵ်ႈပိူင်ႇၼၼ်ႉ ၵိၼ်ႇဝႃႈသေလႄႈ ပုၵ်ႈၸေႃႇတီႈထႃႇဝရႃႉၽြႃးၼၼ်ႉၸိုင်၊ ဢမ်ႇလႆႈၶၢႆ၊ ဢမ်ႇလႆႈထုတ်ႇဢဝ်။ ၵႃႈဢၼ်ၵိၼ်ႇဝႃႈလႄႈ ပုၵ်ႈၸေႃႇၸိူဝ်းၼၼ်ႉ၊ တၵ်းလႆႈမူတ်းၸၢင်ႇၼႃႇလူင်လၢင် တီႈထႃႇဝရႃႉၽြႃးဢေႃႈ။- 29ၵူၼ်းသေၵေႃႈ၊ ပေႃးဢဝ်ၵိၼ်ႇဝႃႈလႄႈ ပုၵ်ႈၸေႃႇၸိုင်၊ ၵမ်းလိုၼ်းဢမ်ႇလႆႈထုတ်ႇဢဝ်။ တၵ်းလႆႈဢဝ်တၢႆဢေႃႈ။
30ပဵၼ်ၸိူဝ်ႉပဵၼ်ၽၼ်းမႃး ၵႃႈတီႈလိၼ်ၶဝ်သေဢမ်ႇဝႃႈ၊ ပဵၼ်မၢၵ်ႇမႆႉမၢၵ်ႇတွၵ်ႇသေဢမ်ႇဝႃႈ၊ မၢၵ်ႇႁူင်းၵႃႈဢၼ်ပဵၼ်မႃးၵႃႈတီႈလိၼ် သိပ်းပုၼ်ႈပုၼ်ႈၼိုင်ႈၼၼ်ႉ ပဵၼ်ဢုၵ်ႉၸႃႇထႃႇဝရႃႉၽြႃးဢေႃႈ။ တၵ်းလႆႈမူတ်းၸၢင်ႇပုၼ်ႈထႃႇဝရႃႉၽြႃးဢေႃႈ။- 31ပေႃးသေၵေႃႉသေၵူၼ်း မီးဢလူဝ်ႇၶႂ်ႈထုတ်ႇဢဝ် သိပ်းပုၼ်ႈပုၼ်ႈၼိုင်ႈၼၼ်ႉၸိုင်၊ မၼ်းတၵ်းလႆႈဢဝ်ပုၼ်ႈ ပုၼ်ႈၼိုင်ႈၼၼ်ႉ ႁႃႈပုၼ်ႈပုၼ်ႈၼိုင်ႈထၢပ်ႈထႅင်ႈသေလႄႈ ပၼ်ဢေႃႈ။- 32ပဵၼ်ဝူဝ်းသေဢမ်ႇဝႃႈ၊ ပဵၼ်သူဝ်းပႄႉသေဢမ်ႇဝႃႈ၊ တူဝ်ဢၼ်ၵႂႃႇတႂ်ႈၶွၼ်ႉဝၢႆၵႃႈမီး သိပ်းပုၼ်ႈပုၼ်ႈၼိုင်ႈ တၵ်းလႆႈမူတ်းၸၢင်ႇပုၼ်ႈထႃႇဝရႃႉၽြႃးဢေႃႈ။- 33မၼ်းဢမ်ႇလႆႈၸႅတ်ႈတူၺ်း ထၢမ်တူၺ်းလွင်ႈဢၼ်လီႁိုဝ်ၺၢမ်ႉႁိုဝ်ၼၼ်ႉ။ မၼ်းဢမ်ႇလႆႈဢဝ်တူဝ်ၼိုင်ႈလႅၵ်ႈလၢႆႈတူဝ်ၼိုင်ႈ။ ပေႃးမၼ်းမီးဢလူဝ်ႇၶႂ်ႈလႅၵ်ႈလၢႆႈဢဝ်ၸိုင်၊ တူဝ်ၼၼ်ႉဢိၵ်ႇတင်း တၢင်းဢၼ်လႅၵ်ႈလၢႆႈၼၼ်ႉ တၵ်းလႆႈမူတ်းၸၢင်ႇတင်းသွင်တူဝ်ဢေႃႈ။ ဢမ်ႇလႆႈထုတ်ႇဢဝ်လႃးလႃး၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။- 34ဢၼ်ၼႆႉၸမ်ႉ၊ ပဵၼ်ပိင်းၺၢပ်ႈတင်းလၢႆ ဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇ ပုၼ်ႈၵူၼ်းမဵဝ်း ဢီႉသရေႇလႃႉၸိူဝ်းၼၼ်ႉ ၵႃႈၼိူဝ်လွႆသီႉၼႃႉဢေႃႈ။
ၵျၢမ်းဢၼ်ႁဵတ်းဝၢတ်ႈယဝ်ႉယဝ်ႉဢေႃႈ။
Currently Selected:
ႁဵတ်းဝၢတ်ႈ 27: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship