ႁဵတ်းဝၢတ်ႈ 8
8
တၢင်းဢၼ်ပၼ်ၽိၵ်ႈသိၵ်ႈတီႈဢႃႇရုၼ်ႇတင်းလုၵ်ႈၸၢႆးမၼ်း
(တူၺ်း၊ ဢွၵ်ႇ 29:1-37)
1ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 2မႂ်းဢဝ်ဢႃႇရုၼ်ႇ တင်းလုၵ်ႈၸၢႆးမၼ်းတင်းလၢႆ ဢိၵ်ႇတင်းၶူဝ်းၼုင်ႈ၊ ၼမ်ႉမၼ်းဢၼ်တၵ်းတႃးၼၼ်ႉ၊ ဝူဝ်းပေႃႈပုၼ်ႈယိတ်ႈဢၼ်ၽေႇဢပႅတ်ႈ၊ ဝူဝ်းပေႃႈသွင်တူဝ်၊ ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈပဵတ်ႈၼိုင်ႈသေလႄႈ၊- 3ႁႂ်ႈပရဵၵ်ႈသၢတ်ႈတင်းသဵင်ႈတင်းလူင် ၸူႉၵၼ်တုမ်ၵၼ်ၵႃႈတီႈၽၵ်းတူမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၼၼ်ႉတႃႉ၊ ဝႃႈၼင်ႇၼႆသေယဝ်ႉ၊
4 မူဝ်းသေႇႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉဝႆႉၼၼ်ႉလႄႈ၊ ပရဵၵ်ႈသၢတ်ႈတင်းလၢႆၸူႉၵၼ်တုမ်ၵၼ်ၵႃႈတီႈ ၽၵ်းတူမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၼၼ်ႉဢေႃႈ။- 5မူဝ်းသေႇၵေႃႈ မွၵ်ႇလၢတ်ႈတီႈပရဵၵ်ႈသၢတ်ႈတင်းလၢႆလႄႈဝႃႈ၊ ထႃႇဝရႃႉၽြႃးသင်ႇလၢတ်ႈဝႆႉ ႁႂ်ႈသူႁဵတ်းၸိူဝ်ႉၼင်ႇၼႆယဝ်ႉ၊ ဝႃႈၼင်ႇၼႆသေယဝ်ႉ၊- 6မူဝ်းသေႇဢဝ်ဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉမႃးလႄႈ ဢဝ်ၼမ်ႉဢၢပ်ႇပၼ်ယဝ်ႉ- 7ၸင်ႇဢဝ်သိူဝ်ႈပုတ်းၼုင်ႈပၼ်လႄႈ ဢဝ်သၢႆဢႅဝ်ႁတ်ႉပၼ်ဢေႃႈ။ သိူဝ်ႈယၢဝ်းၵေႃႈ မၼ်းဢဝ်ၼုင်ႈမႆပၼ်လႄႈ ဢဝ်သိူဝ်ႈသုပ်းၼုင်ႈပၼ်သေယဝ်ႉ၊ ဢဝ်သၢႆဢႅဝ်ဢၼ်ႁၢင်ႈၶိူင်ႈႁဵတ်းၼၼ်ႉႁတ်ႉပၼ်ဢေႃႈ။- 8ၶိူင်ႈဝႆၼႃႈဢူၵ်းၵေႃႈ မၼ်းဢဝ်ဝႆပၼ်လႄႈ ဢဝ်ဢူႉရိမ်းတင်းထူႉမိမ်း သႂ်ႇဝႆႉၵႃႈၼႂ်းၶိူင်ႈဝႆၼႃႈဢူၵ်းၼၼ်ႉဢေႃႈ။- 9မၼ်းဢဝ်ၶဵၼ်းႁူဝ်ၶဵၼ်းၵႃႈတီႈႁူဝ်မၼ်းလႄႈ ဢဝ်ၶႅပ်းပျႃးၶမ်း ဢၼ်မူတ်းၸၢင်ႇၼၼ်ႉ သႂ်ႇၸပ်းဝႆႉၵႃႈတီႈၼႃႈၶဵၼ်းႁူဝ်ၼၼ်ႉ ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉဢေႃႈ။- 10မူဝ်းသေႇဢဝ်ၼမ်ႉမၼ်းပုၼ်ႈဢၼ်တၵ်းတႃးၼၼ်ႉ တႃးသုမ်ႉထဵင်ၸဝ်ႈ ဢိၵ်ႇတင်းၶိူင်ႈပိူင်ၵႃႈဢၼ်မီးၼႂ်းမၼ်းၼၼ်ႉလႄႈ ႁႂ်ႈမူတ်းၸၢင်ႇဢေႃႈ။- 11မၼ်းဢဝ်ၼမ်ႉမၼ်းၼၼ်ႉ ၽႅတ်းသႂ်ႇၵႃႈၼိူဝ်ယိတ်ႈပလၢင်ႇၸဵတ်းၵမ်းလႄႈ တႃးယိတ်ႈပလၢင်ႇ ဢိၵ်ႇတင်းၶိူင်ႈပိူင်မၼ်းၵႃႈမီး တင်းၵွၵ်းလူင်တင်းတိၼ်မၼ်းႁႂ်ႈလႆႈမူတ်းၸၢင်ႇဢေႃႈ။- 12မၼ်းဢဝ်ၼမ်ႉမၼ်းပုၼ်ႈဢၼ်တၵ်းတႃးၼၼ်ႉ ထွၵ်ႇသႂ်ႇၵႃႈၼိူဝ်ႁူဝ်ဢႃႇရုၼ်ႇလႄႈ၊ တႃးပၼ်ႁႂ်ႈမၼ်းလႆႈမူတ်းၸၢင်ႇဢေႃႈ။- 13လုၵ်ႈၸၢႆးဢႃႇရုၼ်ႇၸိူဝ်းၼၼ်ႉၵေႃႈ မူဝ်းသေႇဢဝ်မႃးလႄႈ ဢဝ်သိူဝ်ႈပုတ်းၼုင်ႈပၼ်သေယဝ်ႉ၊ ဢဝ်သၢႆဢႅဝ်ႁတ်ႉပၼ်လႄႈ ဢဝ်မွၵ်ႇႁူဝ်တိုဝ်းပၼ် ၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉဢေႃႈ။
14မၼ်းဢဝ်ဝူဝ်းပေႃႈ ပုၼ်ႈယိတ်ႈဢၼ်ၽေႇဢပႅတ်ႈမႃးလႄႈ၊ ဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉ ဢဝ်မိုဝ်းၶဝ်တၢင်ႇသႂ်ႇၵႃႈၼိူဝ်ႁူဝ်ဝူဝ်း ပုၼ်ႈယိတ်ႈဢၼ်ၽေႇဢပႅတ်ႈၼၼ်ႉဢေႃႈ။- 15ဢဝ်ဝူဝ်းၼၼ်ႉတၢႆလႄႈ မူဝ်းသေႇဢဝ်တင်းၼိဝ်ႉၸီႉ ဢဝ်လိူတ်ႈသႂ်ႇၵႃႈတီႈၶဝ်လႅမ်လဵပ်ႈႁွပ်ႈ ယိတ်ႈပလၢင်ႇလႄႈ ႁႂ်ႈယိတ်ႈပလၢင်ႇမူတ်းသႂ်သေယဝ်ႉ၊ ဢဝ်လိူတ်ႈၼၼ်ႉ ထွၵ်ႇသႂ်ႇၵႃႈတီႈႁိမ်းတိၼ်ယိတ်ႈပလၢင်ႇလႄႈ ႁႂ်ႈမၼ်းလႆႈမူတ်းၸၢင်ႇပုၼ်ႈၼင်ႇႁိုဝ်တၵ်းလႆႈ ႁဵတ်းတၢင်းဢၼ်ၽေႇဢပႅတ်ႈၵႃႈၼိူဝ်ယိတ်ႈပလၢင်ႇၼၼ်ႉဢေႃႈ။- 16မူဝ်းသေႇဢဝ်ၵွၼ်ႈၶႆၵွၼ်ႈမၼ်းဢၼ်ႁူမ်ႇသႆႈမၼ်းၵႃႈမီး၊ ၽၢင်ႉၽၢပ်ႇဢၼ်မီးၵႃႈၼိူဝ်တပ်းမၼ်း၊ မၢၵ်ႇလၼ်းမၼ်းသွင်လုၵ်ႈ ဢိၵ်ႇတင်းၵွၼ်ႈၶႆၵွၼ်ႈမၼ်းမၢၵ်ႇလၼ်းၼၼ်ႉၸိူဝ်းၼၼ်ႉ တုတ်ႇၽႆးၵႃႈၼိူဝ်ယိတ်ႈပလၢင်ႇဢေႃႈ။- 17တူဝ်ဝူဝ်းဢိၵ်ႇတင်းၼင်မၼ်း၊ ၼိူဝ်ႉမၼ်း၊ ၶီႈၼုမ်ႇမၼ်းၸိူဝ်းၼၼ်ႉၸိုင်၊ မၼ်းလႆႈဢဝ်တုတ်ႇၽႆး ၵႃႈၼွၵ်ႈတပ်ႉ ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉဢေႃႈ။
18မၼ်းဢဝ်သူဝ်းပေႃႈဢၼ်ႁဵတ်းယိတ်ႈဢၼ်တုတ်ႇၽႆးၼၼ်ႉမႃးလႄႈ၊ ဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉ ဢဝ်မိုဝ်းၶဝ်တၢင်ႇသႂ်ႇၵႃႈၼိူဝ်ႁူဝ်သူဝ်းပေႃႈၼၼ်ႉဢေႃႈ။- 19ဢဝ်တၢႆသေယဝ်ႉ၊ မူဝ်းသေႇဢဝ်လိူတ်ႈၽႅတ်းသႂ်ႇလဵပ်ႈႁွပ်ႈၵႃႈၼိူဝ်ယိတ်ႈပလၢင်ႇဢေႃႈ။- 20တႅပ်းသူဝ်းပေႃႈၼၼ်ႉႁဵတ်းပွတ်းႁဵတ်းပိတ်းသေယဝ်ႉ၊ မူဝ်းသေႇ ဢဝ်ၵွၵ်းႁူဝ်မၼ်းဢိၵ်ႇတင်းၵွၼ်ႈၼိူဝ်ႉမၼ်းတင်းလၢႆ တင်းၵွၼ်ႈၶႆၵွၼ်ႈမၼ်းမၼ်းၸိူဝ်းၼၼ်ႉတုတ်ႇၽႆးဢေႃႈ။- 21ဢဝ်ၼမ်ႉသုၵ်ႈသီၶူင်းၼႂ်းမၼ်း ဢိၵ်ႇတင်းတိၼ်မၼ်းသေယဝ်ႉ၊မူဝ်းသေႇ ဢဝ်သူဝ်းပေႃႈၼၼ်ႉတင်းတူဝ်တင်းၶိင်း တုတ်ႇၽႆးၵႃႈၼိူဝ်ယိတ်ႈပလၢင်ႇဢေႃႈ။ ပဵၼ်ယိတ်ႈဢၼ်တုတ်ႇၽႆးပုၼ်ႈဢၢႆဢၼ်ႁွမ်ဢၼ်ႁူၺ်းဢေႃႈ။ ပဵၼ်တၢင်းပုၵ်ႈၸေႃႇဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃး ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉဢေႃႈ။
22မၼ်းဢဝ်သူဝ်းပေႃႈတင်းတူဝ်ဢၼ်ဝႃႈ သူဝ်းပေႃႈတၢင်းဢၼ်ၶၢၼ်းဝႆႉၼႂ်းဢရႃႇၼၼ်ႉမႃးလႄႈ ဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉ ဢဝ်မိုဝ်းၶဝ်တၢင်ႇသႂ်ႇၵႃႈၼိူဝ်ႁူဝ်သူဝ်းပေႃႈၼၼ်ႉဢေႃႈ။- 23ဢဝ်တၢႆသေယဝ်ႉ မူဝ်းသေႇဢဝ်လိူတ်ႈၵမ်ႈၽွင်ႈလႄႈ သႂ်ႇၵႃႈတီႈမႂ်ႁူၶွၼ်ၶႂႃဢႃႇရုၼ်ႇ၊ မႄႈမိုဝ်းၶွၼ်ၶႂႃမၼ်း၊ တင်းမႄႈတိၼ်ၶွၼ်ၶႂႃမၼ်းဢေႃႈ။- 24လုၵ်ႈၸၢႆးဢႃႇရုၼ်ႇၸိူဝ်းၼၼ်ႉၵေႃႈ၊ မူဝ်းသေႇဢဝ်မႃးလႄႈ ဢဝ်တင်းလိူတ်ႈသႂ်ႇၵႃႈတီႈမႂ်ႁူၶဝ်၊ မႄႈမိုဝ်းၶွၼ်ၶႂႃၶဝ်၊ တင်းမႄႈတိၼ်ၶွၼ်ၶႂႃၶဝ်သေယဝ်ႉ၊ ၽႅတ်းသႂ်ႇလဵပ်ႈႁွပ်ႈၵႃႈၼိူဝ်ယိတ်ႈပလၢင်ႇဢေႃႈ။- 25မၼ်းဢဝ်ၵွၼ်ႈၶႆၵွၼ်ႈမၼ်းမၼ်း၊ ႁၢင်မၼ်း၊ ၵွၼ်ႈၶႆၵွၼ်ႈမၼ်းဢၼ်ႁူမ်ႇသႆႈမၼ်း၊ ၽၢင်ႉၽၢပ်ႇဢၼ်မီးၵႃႈၼိူဝ်တပ်းမၼ်း၊ မၢၵ်ႇလၼ်းမၼ်းသွင်လုၵ်ႈ တင်းၵွၼ်ႈၶႆၵွၼ်ႈမၼ်းဢၼ်ႁူမ်ႇမၢၵ်ႇလၼ်းမၼ်း၊ ၶႅပ်းၶႃၶွၼ်ၶႂႃမၼ်းလႄႈ၊- 26သမ်ႉဢဝ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၵႃႈၼႂ်းပဵတ်ႈၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈ ဢၼ်ဝႆႉၵႃႈတီႈၽၢႆႇၼႃႈထႃႇဝရႃႉၽြႃး ၼၼ်ႉလုၵ်ႈၼိုင်ႈ၊ ၶဝ်ႈမုၼ်းၶႅပ်းဢၼ်ဢဝ်တင်းၼမ်ႉမၼ်းႁဵတ်းၼၼ်ႉၶႅပ်းၼိုင်ႈ၊ တင်းၶဝ်ႈမုၼ်းၶွပ်ႈၶႅပ်းၼိုင်ႈ တၢင်ႇသႂ်ႇၵႃႈၼိူဝ် ၵွၼ်ႈၶႆၵွၼ်ႈမၼ်းမၼ်း တင်းၶႅပ်းၶႃၶွၼ်ၶႂႃမၼ်းၼၼ်ႉလႄႈ၊- 27ဢဝ်ၵႃႈမီးတင်းသဵင်ႈတင်းလူင်ၸိူဝ်းၼၼ်ႉ တၢင်ႇသႂ်ႇပၼ်ၵႃႈၼိူဝ်မိုဝ်းဢႃႇရုၼ်ႇ တင်းမိုဝ်းလုၵ်ႈၸၢႆးမၼ်းၸိူဝ်းၼၼ်ႉသေယဝ်ႉ၊ ယွင်ႈၵႂႆပုၼ်ႈတၢင်းပုၵ်ႈၸေႃႇ ဢၼ်ယွင်ႈၵႂႆၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။- 28မူဝ်းသေႇႁပ်ႉၶၢမ်ႇဢဝ်ၶိူင်ႈပိူင်ၸိူဝ်းၼၼ်ႉသေၵႃႈတီႈမိုဝ်းၶဝ်ၼၼ်ႉလႄႈ ဢဝ်တုတ်ႇၽႆးၵႃႈၼိူဝ်ယိတ်ႈပလၢင်ႇ ၵႃႈၼိူဝ်ယိတ်ႈဢၼ်တုတ်ႇၽႆးၼၼ်ႉဢေႃႈ။ ပဵၼ်ယိတ်ႈတၢင်းဢၼ်ၶၢၼ်းဝႆႉၼႂ်းဢရႃႇ ပုၼ်ႈဢၢႆဢၼ်ႁွမ်ဢၼ်ႁူၺ်းဢေႃႈ။ ပဵၼ်တၢင်းပုၵ်ႈၸေႃႇ ဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃးဢေႃႈ။- 29လိုၼ်းၼၼ်ႉ မူဝ်းသေႇဢဝ်ဢူၵ်းမၼ်းယွင်ႈၵႂႆ ပုၼ်ႈတၢင်းပုၵ်ႈၸေႃႇ ဢၼ်ယွင်ႈၵႂႆ ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။ ၼႂ်းသူဝ်းပေႃႈတၢင်းဢၼ်ၶၢၼ်းဝႆႉၼႂ်းဢရႃႇၼၼ်ႉ၊ ဢၼ်ၼႆႉပဵၼ်ပုၼ်ႈမူဝ်းသေႇ ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉဢေႃႈ။- 30မူဝ်းသေႇသမ်ႉဢဝ်ၼမ်ႉမၼ်းပုၼ်ႈဢၼ်တၵ်းတႃး ဢိၵ်ႇတင်းလိူတ်ႈဢၼ်မီးၵႃႈၼိူဝ်ယိတ်ႈပလၢင်ႇၼၼ်ႉ ၽႅတ်းသႂ်ႇၵႃႈၼိူဝ် ဢႃႇရုၼ်ႇတင်းၶူဝ်းၼုင်ႈမၼ်း ဢိၵ်ႇတင်းၵႃႈၼိူဝ်လုၵ်ႈၸၢႆးမၼ်းၸိူဝ်းၼၼ်ႉ တင်းၶူဝ်းၼုင်ႈၶဝ်ၼၼ်ႉလႄႈ ႁႂ်ႈဢႃႇရုၼ်ႇ တင်းၶူဝ်းၼုင်ႈမၼ်း ဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉ တင်းၶူဝ်းၼုင်ႈၶဝ်ၼၼ်ႉ မူတ်းၸၢင်ႇဢေႃႈ။
31 မူဝ်းသေႇလၢတ်ႈတီႈဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉလႄႈဝႃႈ၊ ဢဝ်ၼိူဝ်ႉၼၼ်ႉ တူမ်ႈၵႃႈတီႈႁိမ်းၽၵ်းတူမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၼၼ်ႉတႃႉ။ ၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉလႄႈဝႃႈ၊ ဢႃႇရုၼ်ႇ တင်းလုၵ်ႈၸၢႆးမၼ်းတင်းလၢႆ တၵ်းလႆႈၵိၼ်ၼိူဝ်ႉၼၼ်ႉဢေႃႈ၊ ဝႃႈၼင်ႇၼႆၼၼ်ႉသေလႄႈ ဢဝ်ၼိူဝ်ႉၼၼ်ႉ တင်းၶဝ်ႈမုၼ်းဢၼ်မီးၵႃႈၼႂ်းပဵတ်ႈၶဝ်ႈမုၼ်း တၢင်းဢၼ်ၶၢၼ်းဝႆႉၼႂ်းဢရႃႇၼၼ်ႉ ၵိၼ်ၵႃႈတီႈၼၼ်ႈတႃႉ။- 32သူတၵ်းလႆႈဢဝ်ၼိူဝ်ႉတင်းၶဝ်ႈမုၼ်းဢၼ်ၵိုတ်းဢၼ်ၵျၢၼ်ႇၼၼ်ႉ တုတ်ႇၽႆးပႅတ်ႈဢေႃႈ။- 33ၸူဝ်ႈဢၼ် ဝၼ်းဢၼ်ဢဝ်သူၶၢၼ်းဝႆႉၼႂ်းဢရႃႇၼၼ်ႉ ဢမ်ႇပႆႇၸေးၼၼ်ႉၸိုင်၊ ၸဵတ်းဝၼ်းတဵမ်တဵမ်သူဢမ်ႇလႆႈဢွၵ်ႇၵႃႈၼွၵ်ႈၽၵ်းတူမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉ။ လွင်ႈမၼ်းၸမ်ႉ ၸဵတ်းဝၼ်းတဵမ်တဵမ် တၵ်းလႆႈဢဝ်သူႁဵတ်းမင်ႇၵလႃႇ တၢင်းဢၼ်ၶၢၼ်းဝႆႉၼၼ်ႉဢေႃႈ။- 34ၸွမ်းၵႃႈၼင်ႇဢၼ်ႁဵတ်းဝၼ်းမိူဝ်ႈၼႆႉၼၼ်ႉ ထႃႇဝရႃႉၽြႃးသင်ႇလၢတ်ႈဝႆႉ ႁႂ်ႈႁဵတ်းပုၼ်ႈလွင်ႈၼင်ႇႁိုဝ် တၵ်းႁဵတ်းတၢင်းဢၼ်ၽေႇဢပႅတ်ႈပုၼ်ႈသူယဝ်ႉ။- 35ပိူဝ်ႈၼႆလႄႈ သူတၵ်းလႆႈယူႇလႆႈသဝ်း ၵႃႈတီႈႁိမ်းၽၵ်းတူမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၼၼ်ႉ ၸဵတ်းဝၼ်းတင်းဝၼ်းတင်းၶိုၼ်းဢမ်ႇထၢတ်ႇလႄႈ ပႂ်ႉဢမူႉထႃႇဝရႃႉၽြႃးယူႇ ႁႂ်ႈလႆႈၵၢင်းလွတ်ႈတင်းၽေးတၢႆဢေႃႈ။ ၵဝ်လႆႈၶၢမ်ႇတၢင်းဢၼ် မၼ်းၸဝ်ႈသင်ႇလၢတ်ႈဝႆႉၸိူဝ်ႉၼင်ႇၼၼ်ယဝ်ႉ၊ ဝႃႈၼင်ႇၼႆဢေႃႈ။- 36ဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉ ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃးဢဝ်မူဝ်းသေႇသင်ႇလၢတ်ႈဝႆႉၼၼ်ႉဢေႃႈ။
Currently Selected:
ႁဵတ်းဝၢတ်ႈ 8: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship