ႁဵတ်းဝၢတ်ႈ 9
9
ဢႃႇရုၼ်ႇသၢၵ်ႈၵၢပ်ႈတၢင်းလူႇ
1ဝၼ်းဢၼ်ထူၼ်ႈထိုင်ပႅတ်ႇဝၼ်းၼၼ်ႉ၊မူဝ်းသေႇႁွင်ႉဢဝ်ဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်းဢီႉသရေႇလႃႉတင်းလၢႆၼၼ်ႉသေလႄႈ၊- 2လၢတ်ႈတီႈဢႃႇရုၼ်ႇလႄႈဝႃႈ၊ မႂ်းဢဝ်ဝူဝ်းပေႃႈဢွၼ်ႇဢၼ်ဢမ်ႇပႃးဢပႅတ်ႈၼၼ်ႉတူဝ်ၼိုင်ႈ ပုၼ်ႈယိတ်ႈဢၼ်ၽေႇဢပႅတ်ႈ တင်းသူဝ်းပေႃႈဢၼ်ဢမ်ႇပႃးဢပႅတ်ႈၼၼ်ႉတူဝ်ၼိုင်ႈ ပုၼ်ႈယိတ်ႈဢၼ်တုတ်ႇၽႆးသေလႄႈ ပုၵ်ႈၸေႃႇၵႃႈတီႈၽၢႆႇၼႃႈထႃႇဝရႃႉၽြႃးတႃႉ။- 3တီႈၵူၼ်းမဵဝ်းဢီႉသရေႇလႃႉတင်းလၢႆၼၼ်ႉၵေႃႈ မႂ်းလၢတ်ႈလႄႈဝႃႈ၊ သူဢဝ်ပႄႉပေႃႈဢွၼ်ႇတူဝ်ၼိုင်ႈ ပုၼ်ႈယိတ်ႈဢၼ်ၽေႇဢပႅတ်ႈ၊ ဝူဝ်းဢွၼ်ႇတူဝ်ၼိုင်ႈတင်းသူဝ်းဢွၼ်ႇတူဝ်ၼိုင်ႈ၊ ဢၼ်ဢမ်ႇပႃးဢပႅတ်ႈ၊ ဢၼ်ဢမ်ႇပႆႇၶွပ်ႈၶူပ်ႇ ပုၼ်ႈယိတ်ႈဢၼ်တုတ်ႇၽႆးၼၼ်ႉ၊- 4ဝူဝ်းပေႃႈတူဝ်ၼိုင်ႈ တင်းသူဝ်းပေႃႈတူဝ်ၼိုင်ႈ ပုၼ်ႈယိတ်ႈမိၵ်ႉသႃႇႁႃယႃႉ ႁႂ်ႈလႆႈပုၵ်ႈၸေႃႇ ၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉ ဢိၵ်ႇတင်းတၢင်းပုၵ်ႈၸေႃႇၽေႃးၸဵၼ်ႇ ဢၼ်ဢဝ်ၼမ်ႉမၼ်းသႂ်ႇလေႃးၼၼ်ႉတႃႉ။ ဝၼ်းမိူဝ်ႈၼႆႉ ထႃႇဝရႃႉၽြႃးတၵ်းထၢင်ႇသႃးမႃးတီႈသူဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။
5ၶဝ်ဢွၼ်ၵၼ်ဢဝ် ဢၼ်မူဝ်းသေႇသင်ႇလၢတ်ႈဝႆႉၸိူဝ်းၼၼ်ႉမႃးၵႃႈတီႈၽၢႆႇၼႃႈ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈသေယဝ်ႉ၊ ပရဵၵ်ႈသၢတ်ႈတင်းသဵင်ႈတင်းလူင် ဢွၼ်ၵၼ်သုတ်ႉၸပ်းသုတ်ႉၸူးလႄႈ ၸုၵ်းယူႇၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။- 6မူဝ်းသေႇၵေႃႈလၢတ်ႈလႄႈဝႃႈ၊ ထႃႇဝရႃႉၽြႃးသင်ႇလၢတ်ႈဝႆႉ ႁႂ်ႈသူႁဵတ်းၸိူဝ်ႉၼင်ႇၼႆယဝ်ႉလႄႈ၊ မုၼ်ၽုင်းထႃႇဝရႃႉၽြႃး တၵ်းထၢင်ႇသႃးမႃးတီႈသူဢေႃႈ၊ ဝႃႈၼင်ႇၼႆဢေႃႈ။- 7မူဝ်းသေႇသမ်ႉလၢတ်ႈတီႈဢႃႇရုၼ်ႇလႄႈဝႃႈ၊ မႂ်းသုတ်ႉၸပ်းသုတ်ႉၸူးၵႃႈတီႈယိတ်ႈပလၢင်ႇလႄႈပုၵ်ႈၸေႃႇယိတ်ႈဢၼ်ၽေႇဢပႅတ်ႈမႂ်း တင်းယိတ်ႈဢၼ်တုတ်ႇၽႆးမႂ်းလႄႈ ႁဵတ်းတၢင်းဢၼ်ၽေႇဢပႅတ်ႈပုၼ်ႈမႂ်း ဢိၵ်ႇတင်းၵူၼ်းတင်းလၢႆၼၼ်ႉတႃႉ။ တၢင်းပုၵ်ႈၸေႃႇဢၼ်ၵူၼ်းတင်းလၢႆဢဝ်မႃးၼၼ်ႉၵေႃႈ ဢဝ်ပုၵ်ႈၸေႃႇလႄႈ ႁဵတ်းတၢင်းဢၼ်ၽေႇဢပႅတ်ႈပုၼ်ႈၶဝ် ၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉၼၼ်ႉတႃႉ၊ ဝႃႈၼင်ႇၼႆဢေႃႈ။
8ၼင်ႇၼၼ်လႄႈ ဢႃႇရုၼ်ႇသုတ်ႉၸပ်းသုတ်ႉၸူးၵႃႈတီႈယိတ်ႈပလၢင်ႇလႄႈ ဢဝ်ဝူဝ်းဢွၼ်ႇယိတ်ႈဢၼ်ၽေႇဢပႅတ်ႈ ဢၼ်ၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇၼၼ်ႉတၢႆဢေႃႈ။- 9လုၵ်ႈၸၢႆးဢႃႇရုၼ်ႇၸိူဝ်းၼၼ်ႉၵေႃႈ ဢဝ်လိူတ်ႈမႃးၵႃႈတီႈမၼ်းသေယဝ်ႉ၊ မၼ်းဢဝ်တင်းၼိဝ်ႉၸီႉမၼ်း ၸွမ်ႇၸုမ်ႇၵႃႈၼႂ်းလိူတ်ႈၼၼ်ႉလႄႈ ဢဝ်သႂ်ႇၵႃႈတီႈၶဝ်လႅမ်ယိတ်ႈပလၢင်ႇသေယဝ်ႉ၊ ဢဝ်လိူတ်ႈၼၼ်ႉထွၵ်ႇသႂ်ႇၵႃႈတီႈႁိမ်းတိၼ် ယိတ်ႈပလၢင်ႇဢေႃႈ။- 10မၼ်းဢဝ်ၵွၼ်ႈၶႆၵွၼ်ႈမၼ်းမၼ်း၊ မၢၵ်ႇလၼ်းမၼ်း၊ ၽၢင်ႉၽၢပ်ႇဢၼ်မီးၵႃႈၼိူဝ်တပ်းတူဝ်ယိတ်ႈ ဢၼ်ၽေႇဢပႅတ်ႈၸိူဝ်းၼၼ်ႉ တုတ်ႇၽႆးၵႃႈၼိူဝ်ယိတ်ႈပလၢင်ႇ ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉဢေႃႈ။- 11ၼိူဝ်ႉမၼ်းတင်းၼင်မၼ်းၸိုင် မၼ်းဢဝ်တုတ်ႇၽႆးၵႃႈၼွၵ်ႈတပ်ႉဢေႃႈ။- 12တူဝ်ယိတ်ႈဢၼ်တုတ်ႇၽႆးၼၼ်ႉၵေႃႈ မၼ်းဢဝ်တၢႆလႄႈ၊ လုၵ်ႈၸၢႆးဢႃႇရုၼ်ႇၸိူဝ်းၼၼ်ႉ ဢဝ်လိူတ်ႈဢၢပ်ႈပၼ်တီႈမၼ်းသေယဝ်ႉ၊ မၼ်းဢဝ်ၽႅတ်းသႂ်ႇလဵပ်ႈႁွပ်ႈၵႃႈၼိူဝ်ယိတ်ႈပလၢင်ႇဢေႃႈ။- 13ၶဝ်ၼၼ်ႉ ဢဝ်ၵွၼ်ႈၼိူဝ်ႉတူဝ်ယိတ်ႈဢၼ်တုတ်ႇၽႆးၼၼ်ႉ ပွတ်းၼိုင်ႈယဝ်ႉပွတ်းၼိုင်ႈ ဢိၵ်ႇတင်းၵွၵ်းႁူဝ်မၼ်း ပၼ်တီႈမၼ်းလႄႈ မၼ်းဢဝ်တုတ်ႇၽႆးၵႃႈၼိူဝ်ယိတ်ႈပလၢင်ႇဢေႃႈ။- 14မၼ်းဢဝ်ၶူင်းၼႂ်းမၼ်း ဢိၵ်ႇတင်းတိၼ်ၸိူဝ်းၼၼ်ႉ သုၵ်ႈသီသေလႄႈ တုတ်ႇၽႆးၵႃႈၼိူဝ်ယိတ်ႈဢၼ်တုတ်ႇၽႆး ၵႃႈၼိူဝ်ယိတ်ႈပလၢင်ႇဢေႃႈ။
15တၢင်းပုၵ်ႈၸေႃႇၵူၼ်းတင်းလၢႆၼၼ်ႉၵေႃႈ မၼ်းဢဝ်မႃးလႄႈ ဢဝ်ပႄႉပေႃႈ ဢၼ်ပဵၼ်ယိတ်ႈဢၼ်ၽေႇဢပႅတ်ႈၵူၼ်းတင်းလၢႆၼၼ်ႉတၢႆသေယဝ်ႉ၊ ပုၵ်ႈၸေႃႇပုၼ်ႈဢပႅတ်ႈ မိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉဢေႃႈ။- 16တူဝ်ယိတ်ႈဢၼ်တုတ်ႇၽႆးၼၼ်ႉၵေႃႈ မၼ်းဢဝ်မႃးလႄႈ ပုၵ်ႈၸေႃႇၸွမ်းၵႃႈၼင်ႇပိင်းၺၢပ်ႈတြႃးဢေႃႈ။- 17တၢင်းပုၵ်ႈၸေႃႇၽေႃးၸဵၼ်ႇၵေႃႈ မၼ်းဢဝ်မႃးသေယဝ်ႉ၊ ဢဝ်ဝၵ်ႉမိုဝ်းၼိုင်ႈလႄႈ တုတ်ႇၽႆးၵႃႈၼိူဝ်ယိတ်ႈပလၢင်ႇ ၵႃႈတီႈႁိမ်းယိတ်ႈဢၼ်တုတ်ႇၽႆး ၶိင်ႇၵၢင်ၼႂ်ၼၼ်ႉဢေႃႈ။- 18ဝူဝ်းပေႃႈတင်းသူဝ်းပေႃႈဢၼ်ဝႃႈ ယိတ်ႈမိၵ်ႉသႃႇႁႃယႃႉ ပုၼ်ႈၵူၼ်းတင်းလၢႆၼၼ်ႉၵေႃႈ မၼ်းဢဝ်တၢႆလႄႈ လုၵ်ႈၸၢႆးဢႃႇရုၼ်ႇၸိူဝ်းၼၼ်ႉ ဢဝ်လိူတ်ႈဢၢပ်ႈပၼ်တီႈမၼ်းသေယဝ်ႉ၊ မၼ်းဢဝ်ၽႅတ်းသႂ်ႇလဵပ်ႈႁွပ်ႈၵႃႈၼိူဝ်ယိတ်ႈပလၢင်ႇဢေႃႈ။- 19ၵွၼ်ႈၶႆၵွၼ်ႈမၼ်းဝူဝ်းပေႃႈ ဢိၵ်ႇတင်းသူဝ်းပေႃႈဢၼ်ဝႃႈ ႁၢင်မၼ်း၊ ၵွၼ်ႈၶႆၵွၼ်ႈမၼ်းဢၼ်ႁူမ်ႇသႆႈမၼ်း၊ မၢၵ်ႇလၼ်းမၼ်း၊ ၽၢင်ႉၽၢပ်ႇဢၼ်မီးၵႃႈၼိူဝ်တပ်းမၼ်းၼၼ်ႉၸိုင်၊ ၶဝ်ဢဝ်ဢၢပ်ႈပၼ်လႄႈ၊- 20ဢဝ်ၵွၼ်ႈၶႆၵွၼ်ႈမၼ်းတၢင်ႇသႂ်ႇၵႃႈၼိူဝ်ဢူၵ်းၸိူဝ်းၼၼ်ႉသေယဝ်ႉ၊ မၼ်းဢဝ်တုတ်ႇၽႆးၵႃႈၼိူဝ်ယိတ်ႈပလၢင်ႇဢေႃႈ။- 21ဢႃႇရုၼ်ႇဢဝ်ဢူၵ်းၸိူဝ်းၼၼ်ႉ ဢိၵ်ႇတင်းၶႅပ်းၶႃၶွၼ်ၶႂႃမၼ်း ယွင်ႈၵႂႆပုၼ်ႈတၢင်းပုၵ်ႈၸေႃႇ ဢၼ်ယွင်ႈၵႂႆ ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။- 22ဢႃႇရုၼ်ႇယုၵ်ႉမိုဝ်းမၼ်းတေႃႇၵူၼ်းတင်းလၢႆသေယဝ်ႉ၊ ပၼ်တၢင်းလီတီႈၶဝ်လႄႈ လူင်းသေၵႃႈတီႈတၢင်းဢၼ်ပုၵ်ႈၸေႃႇယိတ်ႈဢၼ်ၽေႇဢပႅတ်ႈ၊ ယိတ်ႈဢၼ်တုတ်ႇၽႆး တင်းယိတ်ႈမိၵ်ႉသႃႇႁႃယႃႉၸိူဝ်းၼၼ်ႉမႃးဢေႃႈ။- 23မူဝ်းသေႇ တင်းဢႃႇရုၼ်ႇ သမ်ႉၶဝ်ႈၵႃႈၼႂ်းမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉလႄႈ ဢွၵ်ႇမႃးသေယဝ်ႉ၊ ပၼ်တၢင်းလီတီႈၵူၼ်းတင်းလၢႆလႄႈ၊ မုၼ်ၽုင်းထႃႇဝရႃႉၽြႃး ထၢင်ႇသႃးမႃးၵႃႈတီႈၵူၼ်းတင်းလၢႆဢေႃႈ။- 24ၽႆးဢွၵ်ႇသေၵႃႈတီႈထႃႇဝရႃႉၽြႃးလႄႈ မႆႈယိတ်ႈဢၼ်တုတ်ႇၽႆး ဢိၵ်ႇတင်းၵွၼ်ႈၶႆၵွၼ်ႈမၼ်းၵႃႈၼိူဝ်ယိတ်ႈပလၢင်ႇၼၼ်ႉဢေႃႈ။ မိူဝ်ႈဢၼ်ၵူၼ်းတင်းလၢႆႁၼ်လွင်ႈတၢင်းၸိူဝ်းၼၼ်ႉၸိုင်၊ ၶဝ်ဢွၼ်ၵၼ်ႁွင်ႉသႅၼ်ႇလႄႈ ၶုပ်ႉမူပ်ႇယူႇဢေႃႈ။
Currently Selected:
ႁဵတ်းဝၢတ်ႈ 9: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship