ၼႂ်းထိူၼ်ႇ 10
10
ၼႄးၶရႃႇငိုၼ်း
1ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 2မႂ်းတၵ်းလႆႈႁဵတ်းၶရႃႇငိုၼ်းသွင်လုၵ်ႈ ဢၼ်တွင်ႈႁဵတ်းဢဝ်ၼၼ်ႉဢေႃႈ။ လွင်ႈၼင်ႇႁိုဝ်တၵ်းႁႂ်ႈ ပရဵၵ်ႈသၢတ်ႈၸူႉၵၼ်တုမ်ၵၼ် ဢိၵ်ႇတင်းလွင်ႈၼင်ႇႁိုဝ်တၵ်းႁႂ်ႈတပ်ႉၶီႇၵႂႃႇၸိုင် တၵ်းလႆႈဢဝ်ပဝ်ႇဢေႃႈ။- 3မိူဝ်ႈဢၼ်ပဝ်ႇၶရႃႇၸိူဝ်းၼၼ်ႉၸိုင်၊ ပရဵၵ်ႈသၢတ်ႈတင်းသဵင်ႈတင်းလူင် တၵ်းလႆႈၸူႉၵၼ်တုမ်ၵၼ်ၵႃႈတီႈမႂ်း ၵႃႈတီႈၽၢႆႇၼႃႈၽၵ်းတူမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈဢေႃႈ။- 4ပေႃးပဝ်ႇၶရႃႇလုၵ်ႈလဵဝ်ၵူၺ်းၸိုင်၊ ၵူၼ်းဢၼ်ဢုပ်ႉၼိူဝ်ၵူၼ်းယေႈႁဵင် ၵႃႈတီႈၵူၼ်းမဵဝ်းဢီႉသရေႇလႃႉတင်းလၢႆၸိူဝ်းၼၼ်ႉ တၵ်းလႆႈၸူႉၵၼ်တုမ်ၵၼ်ၵႃႈတီႈမႂ်းဢေႃႈ။- 5မိူဝ်ႈဢၼ်ပဝ်ႇႁဵတ်းသဵင်ဢၼ်တိုၵ်းယူင်းၼၼ်ႉၸိုင်၊ တပ်ႉဢၼ်မီးတၢင်းဝၼ်းဢွၵ်ႇၸိူဝ်းၼၼ်ႉတၵ်းလႆႈၶီႇၵႂႃႇဢေႃႈ။- 6မိူဝ်ႈဢၼ်ပဝ်ႇႁဵတ်းသဵင်ဢၼ်တိုၵ်းယူင်းၵမ်းတူႉတီႉယႃႉၸိုင်၊ တပ်ႉဢၼ်မီးတၢင်းၸၢၼ်းၸိူဝ်းၼၼ်ႉတၵ်းလႆႈၶီႇၵႂႃႇဢေႃႈ။ ၼင်ႇႁိုဝ်ၶဝ်တၵ်းၶီႇၵႂႃႇၸႅၼ်ႇတၢမ်းၵၼ်ၸိုင်၊ တၵ်းလႆႈပဝ်ႇႁဵတ်းသဵင်ဢၼ်တိုၵ်းယူင်းဢေႃႈ။- 7မိူဝ်ႈဢၼ်ပရဵၵ်ႈသၢတ်ႈမီးတီႈဢၼ် တၵ်းၸူႉၵၼ်တုမ်ၵၼ်ၼၼ်ႉၸိုင် သူတၵ်းလႆႈပဝ်ႇၶရႃႇလႄႈဢမ်ႇႁဵတ်းသဵင်ဢၼ်တိုၵ်းယူင်းၼၼ်ႉဢေႃႈ။- 8ယိတ်ႈပရေႃးႁဵၵ်ႈဢၼ်ပဵၼ်လုၵ်ႈၸၢႆးဢႃႇရုၼ်ႇၸိူဝ်းၼၼ်ႉ တၵ်းလႆႈပဝ်ႇၶရႃႇၼၼ်ႉဢေႃႈ။ ပဵၼ်ပိင်းၺၢပ်ႈ ဢၼ်တႃႇသေႇ တီႈၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်းတၢမ်းဢေႃႈ။- 9မိူဝ်ႈဢၼ်သူယူႇၵႃႈတီႈမိူင်းသူယူႇလႄႈ ၶီႇသိုၵ်းၸူးၵႃႈတီႈရၢၼ်ႇသူႇဢၼ်မႃးတိုၵ်းၼၼ်ႉၸိုင်၊ သူတၵ်းလႆႈပဝ်ႇၶရႃႇၸိူဝ်းၼၼ်ႉဢေႃႈ။ မိူဝ်ႈၼၼ်ႉ ထႃႇဝရႃႉၽြႃး ၽြႃးပဵၼ်ၸဝ်ႈသူတၵ်းၶုၵ်းၸႂ်လႆႈၶႆႈၸႂ်ထူပ်းသူလႄႈ ၵႄႇၶျွတ်ႈဢဝ်သူ ၵႃႈၼႂ်းမိုဝ်းရၢၼ်ႇသူႇဢေႃႈ။- 10ဝၼ်းဢၼ်သူႁဵတ်းတၢင်းဢၼ်သႂၢင်ႇသိူဝ်း၊ ဝၼ်းပွႆးသၽၢင်ႇ ဝၼ်းလိူၼ်မႂ်ႇၸိူဝ်းၼၼ်ႉ၊ သူတၵ်းလႆႈပဝ်ႇၶရႃႇၵႃႈၼိူဝ်ယိတ်ႈဢၼ်တုတ်ႇၽႆး ဢိၵ်ႇတင်းတၢင်းပုၵ်ႈၸေႃႇယိတ်ႈမိၵ်ႉသႃႇႁႃယႃႉတင်းလၢႆပုၼ်ႈဢၼ်ၽြႃးပဵၼ်ၸဝ်ႈသူ တၵ်းၶုၵ်းၸႂ်လႆႈၶႆႈၸႂ်ထူပ်းဢေႃႈ။ ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ၊ ဝႃႈၼင်ႇၼႆဢေႃႈ။
ၵူၼ်းမဵဝ်းဢီႉသရေႇလႃႉတင်းလၢႆၶၢႆႉပၢင်တပ်ႉ
11ပီႊတူႉတီႉယႃႉ၊ လိူၼ်တူႉတီႉယႃႉ ဝၼ်းဢၼ်ထူၼ်ႈထိုင်သၢဝ်းဝၼ်းၼၼ်ႉ မွၵ်ႇၵုမ်ႈယုၵ်ႉၽၢတ်ႇသေၵႃႈၼိူဝ်သုမ်ႉထဵင်ၸဝ်ႈ ၶိူင်ႈၶၢမ်ႇသၢၵ်ႈသေႇလႄႈ၊- 12ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ ဢွၼ်ၵၼ်လုၵ်ႉသေၵႃႈတီႈထိူၼ်ႇသီႉၼႃႉလႄႈ ၵႂႃႇတၢင်းပႆတၢင်းဢေႃႈ။ လိုၼ်းၼၼ်ႉ မွၵ်ႇၵုမ်ႈၼၼ်ႉတႄႇယူႇၵႃႈတီႈထိူၼ်ႇပႃႇရၼ်ႇဢေႃႈ။- 13ၼင်ႇၼၼ်လႄႈ ၶဝ်ဢွၼ်ၵၼ် ႁဵတ်းတၢင်းဢၼ်ၵႂႃႇတၢင်းပႆတၢင်းၵမ်းပထမႃႉ ၸွမ်းၵႃႈၼင်ႇဢၼ်ထႃႇဝရႃႉၽြႃး ဢဝ်တင်းမူဝ်းသေႇမီးဢမိင်ႉၼၼ်ႉဢေႃႈ။
14တပ်ႉယူႉတႃႉပႃးဢဝ်လၢမ်ႇသေလႄႈ ၶီႇၵႂႃႇဢွၼ်တၢင်း ၸွမ်းလူၺ်ႈမုၵ်ႉၶဝ်ၸိူဝ်းၶဝ်ၼၼ်ႉဢေႃႈ။ မုၵ်ႉၸိူဝ်းယူႉတႃႉၸိုင်၊ ၼႃႇသုၼ်ႇဢၼ်ပဵၼ်လုၵ်ႈၸၢႆးဢမီႉၼတပ်ႉၼၼ်ႉ လႆႈဢုပ်ႉဢေႃႈ။- 15မုၵ်ႉၸိူဝ်းဢီႉသၶႃႇၸိုင်၊ ၼႃႇသၼေႇလႃႉဢၼ်ပဵၼ်လုၵ်ႈၸၢႆးၸူႉဢႃႇၼၼ်ႉလႆႈဢုပ်ႉဢေႃႈ။- 16မုၵ်ႉၸိူဝ်းၸေႇပူႉလုၼ်ႇၸိုင်၊ ဢေးလျႃႇၽႃႉဢၼ်ပဵၼ်လုၵ်ႈၸၢႆးႁေႇလုၼ်ႇၼၼ်ႉလႆႈဢုပ်ႉဢေႃႈ။- 17ပူတ်းၶျႃးသုမ်ႉထဵင်ၸဝ်ႈလူင်းလႄႈ၊ ၵူၼ်းမဵဝ်းၵေႇရသုၼ်ႇဢိၵ်ႇတင်းၵူၼ်းမဵဝ်းမေႇရႃႇရီႉၸိူဝ်းၼၼ်ႉ ႁၢပ်ႇသုမ်ႉထဵင်ၸဝ်ႈသေလႄႈ ၶီႇၵႂႃႇဢေႃႈ။
18တပ်ႉရူႉပိၼ်ႇ ပႃးဢဝ်လၢမ်ႇသေလႄႈ ၶီႇၵႂႃႇၸွမ်းလူၺ်ႈမုၵ်ႉၶဝ်ၸိူဝ်းၶဝ်ၼၼ်ႉဢေႃႈ။ မုၵ်ႉၸိူဝ်းရူႉပိၼ်ႇၸိုင်၊ ဢေးလီႉၸူႉရႃႉ ဢၼ်ပဵၼ်လုၵ်ႈၸၢႆးသေႇတူႉရႃႉၼၼ်ႉလႆႈဢုပ်ႉဢေႃႈ။- 19မုၵ်ႉၸိူဝ်းသီႉမုၼ်ႇၸိုင်၊ သေႇလူႉမျေးလႃႉ ဢၼ်ပဵၼ်လုၵ်ႈၸၢႆးၸူႉရီႉသတ်ႉတေႇၼၼ်ႉလႆႈဢုပ်ႉဢေႃႈ။- 20မုၵ်ႉၸိူဝ်းၵၢတ်ႉၸိုင် ဢေးလျႃႇသပ်ႉဢၼ်ပဵၼ်လုၵ်ႈၸၢႆးတုၺ်းလႃႉၼၼ်ႉလႆႈဢုပ်ႉဢေႃႈ။- 21ၵူၼ်းမဵဝ်းၵေႃႇႁတ်ႉၸိူဝ်းၼၼ်ႉ ႁၢပ်ႇၶိူင်ႈပိူင်ထႃႇၼႃႉတီႈမူတ်းၸၢင်ႇၸဝ်ႈသေလႄႈၶီႇၵႂႃႇဢေႃႈ။ ၸူဝ်ႈဢၼ်ၶဝ်ဢမ်ႇပႆႇႁွတ်ႈပႆႇၽႅဝ်ၼၼ်ႉၸိုင်၊ ၶဝ်ၸိူဝ်းဢၼ်ၵႂႃႇဢွၼ်တၢင်းၸိူဝ်းၼၼ်ႉ လႆႈပူၵ်းတင်ႈသုမ်ႉထဵင်ၸဝ်ႈဝႆႉထႃႈဢေႃႈ။
22တပ်ႉဢေႇၽရိမ်ႇပႃးဢဝ်လၢမ်ႇသေလႄႈၶီႇၵႂႃႇၸွမ်းလူၺ်ႈမုၵ်ႉၶဝ်ၸိူဝ်းၶဝ်ၼၼ်ႉဢေႃႈ။ မုၵ်ႉၸိူဝ်းဢေႇၽရိမ်ႇၸိုင်၊ ဢေးလီႉသမႃႇ ဢၼ်ပဵၼ်လုၵ်ႈၸၢႆးဢမီႉႁုတ်ႉၼၼ်ႉ လႆႈဢုပ်ႉဢေႃႈ။- 23မုၵ်ႉၸိူဝ်းမၼႃႇသေႇၸိုင်၊ ၵႃႇမလျေးလႃႉ ဢၼ်ပဵၼ်လုၵ်ႈၸၢႆး ပေႇတႃႉၸူႉရႃႉၼၼ်ႉလႆႈဢုပ်ႉဢေႃႈ။- 24မုၵ်ႉၸိူဝ်းပိၼ်ႇယႃႇမိၼ်ႇၸိုင်၊ ဢၽီႉတၼ်ႇ ဢၼ်ပဵၼ်လုၵ်ႈၸၢႆးၵီႉတေႃးၼီႉၼၼ်ႉလႆႈဢုပ်ႉဢေႃႈ။
25တပ်ႉတၢၼ်ႇ ဢၼ်ၶဝ်ပဵၼ်လိုၼ်းလင်သုတ်းတပ်ႉ တင်းသဵင်ႈတင်းလူင်ၼၼ်ႉၼၼ်ႉ ပႃးဢဝ်လၢမ်ႇသေလႄႈ ၶီႇၵႂႃႇၸွမ်းလူၺ်ႈမုၵ်ႉၶဝ်ၸိူဝ်းၶဝ်ဢေႃႈ။ မုၵ်ႉၸိူဝ်းတၢၼ်ႇၸိုင်၊ ဢႁေႇၸႃႇ ဢၼ်ပဵၼ်လုၵ်ႈၸၢႆး ဢမီႉသတ်ႉတေႇၼၼ်ႉလႆႈဢုပ်ႉဢေႃႈ။- 26မုၵ်ႉၸိူဝ်းဢႃႇသႃႇၸိုင်၊ ပႃႇၵျေႇလႃႉဢၼ်ပဵၼ်လုၵ်ႈၸၢႆး ဢွၵ်ႉရၼ်ႇ လႆႈဢုပ်ႉဢေႃႈ။- 27မုၵ်ႉၸိူဝ်းၼပ်ႉထလီႉၸိုင်၊ ဢႁီႉရႃႉဢၼ်ပဵၼ်လုၵ်ႈၸၢႆးဢေႇၼၼ်ႇၼၼ်ႉလႆႈဢုပ်ႉဢေႃႈ။- 28ၼင်ႇၼၼ်လႄႈ ပဵၼ်တၢင်းဢၼ်ၵူၼ်းမဵဝ်းဢီႉသရေႇလႃႉတင်းလၢႆ ၵႂႃႇတၢင်းပႆတၢင်းၸွမ်းလူၺ်ႈမုၵ်ႉၶဝ်ၸိူဝ်းၶဝ်ၼၼ်ႉဢေႃႈ၊ ၶဝ်ၼၼ်ႉဢွၼ်ၵၼ်ၶီႇၵႂႃႇဢေႃႈ။
29 မူဝ်းသေႇလၢတ်ႈတီႈႁေႃးပပ်ႉ ဢၼ်ပဵၼ်လုၵ်ႈၸၢႆးရုၺ်ႇလႃႉ၊ မဵဝ်းၵူၼ်းမီႉတျၼ်ႇ ဢၼ်ပဵၼ်ပူႇၼၢႆး မူဝ်းသေႇၼၼ်ႉလႄႈဝႃႈ၊ ႁဝ်းၼႆႉၵႂႃႇတၢင်းပႆတၢင်းၸူးၵႃႈတီႈဢၼ် ထႃႇဝရႃႉၽြႃးဝႆႉၵတီႉလႄႈဝႃႈ ၵဝ်တၵ်းဢဝ်ပၼ်တီႈသူဢေႃႈ၊ ဝႃႈၼင်ႇၼႆၼၼ်ႉဢေႃႈ။ ၸွမ်းလူၺ်ႈၵၼ်တင်းႁဝ်းလႄႈမႃးသေၵမ်း၊ ႁဝ်းတၵ်းႁဵတ်းၵျေးၸူးတီႈမႂ်းဢေႃႈ။ ထႃႇဝရႃႉၽြႃးမီးဢမိင်ႉလွင်ႈဢၼ် တၵ်းႁဵတ်းၵျေးၸူးတီႈၵူၼ်းမဵဝ်းဢီႉသရေႇလႃႉတင်းလၢႆဝႆႉယဝ်ႉ၊ ဝႃႈၼင်ႇၼႆသေယဝ်ႉ၊- 30မၼ်းၼၼ်ႉ ၶိုၼ်းလၢတ်ႈလႄႈဝႃႈ၊ ၵဝ်ဢမ်ႇၸွမ်းဢမ်ႇၵႂႃႇ၊ ၵဝ်တၵ်းၶိုၼ်းမိူဝ်းၵႂႃႇၵႃႈတီႈမိူင်းတီႈယူႇၵဝ်ႇၵဝ်၊ ၵႃႈတီႈပီႈၼွင်ႉၸိူဝ်ႉၶိူဝ်းၵဝ်ပုၼ်ႉဢေႃႈ၊ ဝႃႈၼင်ႇၼႆဢေႃႈ။- 31မူဝ်းသေႇၵေႃႈ ၶိုၼ်းလၢတ်ႈလႄႈဝႃႈ၊ ယႃႇပေၸုၼ်ႉပေပႅတ်ႈႁဝ်းၵႂႃႇသေၵမ်း။ ပိူဝ်ႈဢၼ်မႂ်းႁူႉလွင်ႈဢၼ်ႁဝ်းတၵ်းလႆႈၶျႃးပၢင်ၵႃႈတီႈၼႂ်းထိူၼ်ႇၼႂ်းၶိူဝ်းလႂ်လႄႈ မႂ်းတၵ်းလႆႈပဵၼ် မၢၵ်ႇတႃႁဝ်းဢေႃႈ။- 32ပေႃးၸွမ်းလူၺ်ႈၵၼ်တင်းႁဝ်းၸိုင်၊ ၵႃႈၼင်ႇဢၼ်ထႃႇဝရႃႉၽြႃးႁဵတ်းၵျေးၸူးတီႈႁဝ်းၼၼ်ႉ၊ ႁဝ်းတၵ်းႁဵတ်းၵျေးၸူးတီႈမႂ်းဢေႃႈ၊ ဝႃႈၼင်ႇၼႆဢေႃႈ။
လွင်ႈတၢင်းဢၼ်ၵူၼ်းတင်းလၢႆဢွၵ်ႇၵႂႃႇ
33ၵူၼ်းမဵဝ်းဢီႉသရေႇလႃႉၸိူဝ်းၼၼ်ႉ ဢွၵ်ႇသေၵႃႈတီႈလွႆထႃႇဝရႃႉၽြႃးလႄႈ ၵႂႃႇၶၢဝ်းတၢင်းသၢမ်ဝၼ်းဢေႃႈ။ တိူၵ်ႈတႃႇပတီႉၺိၺ်ႇထႃႇဝရႃႉၽြႃးၼၼ်ႉဢွၼ်ႁူဝ်ၶဝ်ၵႂႃႇ ၶၢဝ်းတၢင်းသၢမ်ဝၼ်း ႁႂ်ႈလႆႈႁႃတီႈပုၼ်ႈဢၼ်ၶဝ်တၵ်းၶျႃးပၢင်ဢေႃႈ။- 34မွၵ်ႇၵုမ်ႈထႃႇဝရႃႉၽြႃးၼၼ်ႉ မီးယူႇၵႃႈတီႈၼိူဝ်ၶဝ်ၶိင်ႇၵၢင်ဝၼ်း မိူဝ်ႈဢၼ်ၶဝ်ယင်းတိုၵ်ႉၶီႇတပ်ႉၵႂႃႇၼၼ်ႉဢေႃႈ။- 35မိူဝ်ႈဢၼ်တိူၵ်ႈတႃႇၸဝ်ႈၵႂႃႇၼၼ်ႉၸိုင်၊ မူဝ်းသေႇလဝ်ႊလၢတ်ႈလႄႈဝႃႈ၊ ဢူဝ်း ထႃႇဝရႃႉၽြႃးတီႈၶႃႈ၊ လုၵ်ႉသေၵမ်းတီႈၶႃႈ။ ႁႂ်ႈရၢၼ်ႇသူႇၸဝ်ႈႁဝ်းတင်းလၢႆ ပိဝ်သဵၼ်ၵႂႃႇသေၵမ်းလူၺ်ႈတီႈၶႃႈ။ ႁႂ်ႈၶဝ်ၸိူဝ်းဢၼ်ၸင်းၸဝ်ႈႁဝ်းၼၼ်ႉ ဢွၵ်ႇပၢႆသေၵႃႈတီႈၽၢႆႇၼႃႈၸဝ်ႈႁဝ်းသေၵမ်းလူၺ်ႈတီႈၶႃႈ၊ ဝႃႈၼင်ႇၼႆဢေႃႈ။- 36မိူဝ်ႈဢၼ်တိူၵ်ႈတႃႇၸဝ်ႈၵိုတ်းသဝ်းၼၼ်ႉၸိုင်၊ မၼ်းလဝ်ႊလၢတ်ႈလႄႈဝႃႈ၊ ဢူဝ်း ထႃႇဝရႃႉၽြႃး ၶိုၼ်းမႃးၵႃႈတီႈဢၼ်ၵူၼ်းမဵဝ်းဢီႉသရေႇလႃႉ ပဵၼ်မိုၼ်ႇပဵၼ်သႅၼ်မီးၼႆႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။
Currently Selected:
ၼႂ်းထိူၼ်ႇ 10: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship