ၼႂ်းထိူၼ်ႇ 9
9
လွင်ႈပွႆးပႃႉသၶႃႇပွၵ်ႈတီႈသွင်
1ထႃႇဝရႃႉၽြႃးမီးဢမိင်ႉတီႈမူဝ်းသေႇ ၵႃႈၼႂ်းထိူၼ်ႇသီႉၼႃႉ ပီႊတူႉတီႉယႃႉ၊ လိူၼ်ပထမႃႉ၊ လိုၼ်းသေဢၼ်ၶဝ်ဢွၵ်ႇသေ ၵႃႈၼႂ်းမိူင်းဢေႇၵိပ်ႉတူႉမႃးၼၼ်ႉလႄႈဝႃႈ၊- 2ၵူၼ်းမဵဝ်းဢီႉသရေႇလႃႉတင်းလၢႆ တၵ်းလႆႈၶၢမ်ႇပွႆးပႃႉသၶႃႇ ၼႂ်းၶိင်ႇၶႃႇၵႃႇလႃႉဢၼ်မၵ်းၶၢၼ်းဝႆႉၼၼ်ႉဢေႃႈ။- 3လိူၼ်ၼႆႉ လႆႈသိပ်းသီႇဝၼ်း ၶိင်ႇႁူဝ်ၶမ်ႈဢၼ်ဝႃႈ ၶိင်ႇၶႃႇၵႃႇလႃႉဢၼ်မၵ်းၶၢၼ်းဝႆႉၼၼ်ႉ၊ သူတၵ်းလႆႈဢွၼ်ၵၼ်ပႂ်ႉဢေႃႈ။ မႅၼ်ႈၸွမ်းၼင်ႇထုင်းၽိင်ႈတြႃးၵႃႈမီး ဢိၵ်ႇတင်းလွင်ႈတၢင်းဢၼ်ၸီႇယၢင်ႇဝႆႉလွင်ႈမၼ်းၵႃႈမီးၸိူဝ်းၼၼ်ႉသေလႄႈ သူတၵ်းလႆႈဢွၼ်ၵၼ်ပႂ်ႉဢေႃႈ၊ ဝႃႈၼင်ႇၼႆဢေႃႈ။- 4မူဝ်းသေႇ သင်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆ ႁႂ်ႈၶဝ်လႆႈၶၢမ်ႇပွႆးပႃႉသၶႃႇဢေႃႈ။- 5ၼင်ႇၼၼ်လႄႈ လိူၼ်ပထမႃႉသိပ်းသီႇဝၼ်းၶိင်ႇႁူဝ်ၶမ်ႈၼၼ်ႉ ၶဝ်ၶၢမ်ႇပွႆးပႃႉသၶႃႇၼၼ်ႉ ၵႃႈၼႂ်းထိူၼ်ႇသီႉၼႃႉဢေႃႈ။ ၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉ၊ ၵူၼ်းမဵဝ်းဢီႉသရေႇလႃႉတင်းလၢႆဢွၼ်ၵၼ်ႁဵတ်းၸိူဝ်ႉၼင်ႇၼၼ်ဢေႃႈ။
6မိူဝ်ႈၼၼ်ႉ မီးၵူၼ်းဢၼ်ႁွတ်ႈတၢင်းဢၼ်ၵူဝ်ႈၵိူၵ်ႇၵွပ်ႈပိူဝ်ႈတူဝ်တၢႆထၼ်ႈပေႃးဢမ်ႇၶၢမ်ႇပွႆးပႃႉသၶႃႇ ၼႂ်းဝၼ်းၼၼ်ႉလႆႈၼၼ်ႉ ၵမ်ႈၽွင်ႈလႄႈ ၶဝ်ဢွၼ်ၵၼ် သုတ်ႉၸပ်းသုတ်ႉၸူးၵႃႈတီႈမူဝ်းသေႇတင်းဢႃႇရုၼ်ႇၼႂ်းဝၼ်းၼၼ်ႉဢေႃႈ။- 7ၶဝ်ၼၼ်ႉဢွၼ်ၵၼ်လဝ်ႊထၢမ်လႄႈဝႃႈ၊ ႁဝ်းၶႃႈမီးတၢင်းဢၼ်ၵူဝ်ႈၵိူၵ်ႇၵွပ်ႈပိူဝ်ႈတူဝ်တၢႆၵူၼ်းၶႃႈဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ႁႄႉၶႅၼ်ႁဝ်းၶႃႈႁႂ်ႈႁဝ်းၶႃႈဢမ်ႇလႆႈႁဵတ်းတၢင်းပုၵ်ႈၸေႃႇတီႈထႃႇဝရႃႉၽြႃး လူၺ်ႈၵၼ်တင်းၵူၼ်းမဵဝ်းဢီႉသရေႇလႃႉတင်းလၢႆ ၵႃႈၼႂ်းၶိင်ႇၶႃႇၵႃႇလႃႉ ဢၼ်မၵ်းၶၢၼ်းဝႆႉၼၼ်ႉၼင်ႇႁိုဝ်ၶႃႈ၊ ဝႃႈၼင်ႇၼႆဢေႃႈ။- 8မူဝ်းသေႇၵေႃႈ ၶိုၼ်းလၢတ်ႈတီႈၶဝ်လႄႈဝႃႈ၊ သဝ်းလူးၵွၼ်ႇ။ ၵဝ်တၵ်းထွမ်ႇငိၼ်းၵႂၢမ်းဢၼ်ထႃႇဝရႃႉၽြႃး မီးဢမိင်ႉလူၺ်ႈလွင်ႈသူၼၼ်ႉလူးၵွၼ်ႇဢေႃႈ၊ ဝႃႈၼင်ႇၼႆဢေႃႈ။
9မိူဝ်ႈၼၼ်ႉ ထႃႇဝရႃႉၽြႃးမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 10သင်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆလႄႈဝႃႈ၊ ၼႂ်းသူၼႆႉ ဢိၵ်ႇတင်းၼႂ်းၸူဝ်ႈလုၵ်ႈပၢၼ်လၢၼ်သူၼၼ်ႉသေၵေႃႉသေၵူၼ်း၊ ပိၵ်ႉသမ်ႉမီးတၢင်းဢၼ်ၵူဝ်ႈၵိူၵ်ႇၵွပ်ႈပိူဝ်ႈတူဝ်တၢႆယူႇ၊ ဢမ်ႇၼၼ် ၵႂႃႇတၢင်းပႆတၢင်းမီးယူႇၵႃႈတီႈဢၼ်ၵႆယူႇသေၵေႃႈ၊ တၵ်းလႆႈၶၢမ်ႇပွႆးပႃႉသၶႃႇ ပုၼ်ႈထႃႇဝရႃႉၽြႃးယူႇဢေႃႈ။- 11ၶိင်ႇႁူဝ်ၶမ်ႈ လိူၼ်တူႉတီႉယႃႉ သိပ်းသီႇဝၼ်းၼၼ်ႉ ၶဝ်တၵ်းလႆႈဢွၼ်ၵၼ်ၶၢမ်ႇပွႆးၼၼ်ႉလႄႈ ၵိၼ်ၼိူဝ်ႉသူဝ်းဢွၼ်ႇဢိၵ်ႇလူၺ်ႈၵၼ်တင်းၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈ တင်းၽၵ်းယိူဝ်ႈၽၵ်းၶဵဝ်ဢၼ်ၶူမ်ၼၼ်ႉဢေႃႈ။- 12ၼိူဝ်ႉၼၼ်ႉၸိုင်၊ ၶဝ်ဢမ်ႇလႆႈႁႂ်ႈၵိုတ်းႁႂ်ႈၵျၢၼ်ႇဝႆႉတေႃႇထိုင်ႁွတ်ႈၶိင်ႇၵၢင်ၼႂ်။ လုပ်ႇမၼ်းၵေႃႈၶဝ်ဢမ်ႇလႆႈႁၵ်း။ ၸွမ်းလူၺ်ႈထုင်းၽိင်ႈတြႃးၵႃႈဢၼ်ၸၢပ်ႈသႅင်ႇၵၼ်တင်းပွႆးပႃႉသၶႃႇၼၼ်ႉသေလႄႈ၊ ၶဝ်တၵ်းလႆႈၶၢမ်ႇပွႆးၼၼ်ႉဢေႃႈ။- 13ပေႃးၵေႃႉဢၼ်ဢမ်ႇမီးတၢင်းဢၼ်ၵူဝ်ႈၵိူၵ်ႇ၊ ဢၼ်ဢမ်ႇၵႂႃႇတၢင်းပႆတၢင်းယူႇၼၼ်ႉ ယင်းဢမ်ႇၶၢမ်ႇပွႆးပႃႉသၶႃႇလႄႈယူႇၸိုင်၊ ၵေႃႉၼၼ်ႉ တၵ်းလႆႈၶၢမ်ႇတၢင်းဢၼ် ပႄႇပႅတ်ႈသေၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ။ ၵွပ်ႈပိူဝ်ႈဢၼ် ၵေႃႉၼၼ်ႉဢမ်ႇဢဝ်တၢင်းပုၵ်ႈၸေႃႇပုၼ်ႈထႃႇဝရႃႉၽြႃးမႃးၼႂ်းၶိင်ႇၶႃႇၵႃႇလႃႉဢၼ်မၵ်းၶၢၼ်းဝႆႉၼၼ်ႉလႄႈ၊ ၵေႃႉၼၼ်ႉ တၵ်းလႆႈၶၢမ်ႇဢပႅတ်ႈတူဝ်ၸဝ်ႈၵဝ်ႇဢေႃႈ။- 14ပေႃးၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၵႃႈတီႈသူၼၼ်ႉ မီးဢလူဝ်ႇၶႂ်ႈၶၢမ်ႇပွႆးပႃႉသၶႃႇ ပုၼ်ႈထႃႇဝရႃႉၽြႃးၸိုင်၊ ၸွမ်းၼင်ႇထုင်းၽိင်ႈတြႃးပွႆးပႃႉသၶႃႇ ဢိၵ်ႇတင်းလွင်ႈတၢင်းဢၼ်ၸီႇယၢင်ႇဝႆႉလွင်ႈမၼ်းၵႃႈမီးၸိူဝ်းၼၼ်ႉသေလႄႈ တၵ်းလႆႈၶၢမ်ႇဢေႃႈ။ ပုၼ်ႈၶဝ်ၸိူဝ်းဢၼ်ပဵၼ်ၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်သွၼ်ႈပိုင်ႈယူႇၵႃႈတီႈသူ ဢိၵ်ႇတင်းၶဝ်ၸိူဝ်းဢၼ် ၵိူတ်ႇလဵင်ႉပဵၼ်မႃးၵႃႈတီႈမိူင်းသူၼၼ်ႉၸိုင်၊ တၵ်းလႆႈမီးထုင်းၽိင်ႈတြႃးပႃးလဵဝ်ၵူၺ်းဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။
မွၵ်ႇၵုမ်ႈဢၼ်ပဵၼ်ၼင်ႇႁၢင်ႈၽႆး
(တူၺ်း၊ ဢွၵ်ႇ 40:34-38)
15ၼႂ်းဝၼ်းဢၼ်ပူၵ်းတင်ႈသုမ်ႉထဵင်ၸဝ်ႈၼၼ်ႉ၊ မွၵ်ႇၵုမ်ႈႁူမ်ႇသုမ်ႇ သုမ်ႉထဵင်ၸဝ်ႈဢၼ်ဝႃႈမူဝ်းၵႃႇၸဝ်ႈၶိူင်ႈၶၢမ်ႇသၢၵ်ႈသေႇၼၼ်ႉယူႇဢေႃႈ။ ၸႃႉၸဵမ်ၶိင်ႇႁူဝ်ၶမ်ႈလႄႈတေႃႇထိုင်ႁွတ်ႈၶိင်ႇၵၢင်ၼႂ်ၼၼ်ႉ ပဵၼ်မိူၼ်ၸိူဝ်ႉၼင်ႇႁၢင်ႈၽႆးယူႇဢေႃႈ။- 16ပဵၼ်ၸိူဝ်ႉၼင်ႇၼၼ်ယူႇတႃႇသေႇလႄႈ၊ ၶိင်ႇၵၢင်ဝၼ်းမွၵ်ႇၵုမ်ႈႁူမ်ႇသုမ်ႇယူႇ၊ ၶိင်ႇၵၢင်ၶိုၼ်းပဵၼ်မိူၼ်ၸိူဝ်ႉၼင်ႇႁၢင်ႈၽႆးၼၼ်ႉယူႇဢေႃႈ။- 17မိူဝ်ႈဢၼ်မွၵ်ႇၵုမ်ႈၼၼ်ႉ ယုၵ်ႉၽၢတ်ႇသေမူဝ်းၵႃႇၸဝ်ႈၼၼ်ႉၸိုင်၊ ၵူၼ်းမဵဝ်းဢီႉသရေႇလႃႉတင်းလၢႆဢွၼ်ၵၼ် ၵႂႃႇတၢင်းပႆတၢင်းဢေႃႈ။ ၵႃႈပဵၼ်တီႈဢၼ်မွၵ်ႇၵုမ်ႈတႄႇယူႇၼၼ်ႉၵေႃႈ ၵူၼ်းမဵဝ်းဢီႉသရေႇလႃႉတင်းလၢႆသမ်ႉၶျႃးလႄႈ ၵင်ႈမူဝ်းၵႃႇၶဝ်ယူႇဢေႃႈ။- 18ၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉၼၼ်ႉ၊ ၵူၼ်းမဵဝ်းဢီႉသရေႇလႃႉတင်းလၢႆဢွၼ်ၵၼ် ၵႂႃႇတၢင်းပႆတၢင်းဢေႃႈ။ ၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉၼၼ်ႉၵေႃႈ ၶဝ်ၶျႃးလႄႈၵင်ႈမူဝ်းၵႃႇၶဝ်ယူႇဢေႃႈ။ ၶိင်ႇၵႃႇလႃႉၸူဝ်ႈဢၼ်မွၵ်ႇၵုမ်ႈယင်းတႄႇယူႇၵႃႈၼိူဝ်သုမ်ႉထဵင်ၸဝ်ႈၼၼ်ႉ၊ ၶဝ်ယူႇၵႃႈၼႂ်းမူဝ်းၵႃႇၶဝ်ယူႇဢေႃႈ။- 19မိူဝ်ႈဢၼ် မွၵ်ႇၵုမ်ႈၼၼ်ႉ ယင်းတႄႇယူႇၵႃႈၼိူဝ်သုမ်ႉထဵင်ၸဝ်ႈၼၼ်ႉ ၶိင်ႇဝၼ်းႁိုင်ၼႃႇၼၼ်ႉၸိုင်၊ ၵူၼ်းမဵဝ်းဢီႉသရေႇလႃႉတင်းလၢႆ ယင်းဢမ်ႇၵႂႃႇတၢင်းပႆတၢင်းလႄႈ ပႂ်ႉဢမူႉထႃႇဝရႃႉၽြႃးယူႇဢေႃႈ။- 20မိူဝ်ႈဢၼ်မွၵ်ႇၵုမ်ႈၼၼ်ႉ ယင်းတႄႇယူႇၵႃႈၼိူဝ်သုမ်ႉထဵင်ၸဝ်ႈၼၼ်ႉ ၶိင်ႇဝၼ်းၵေႇၼႃႇၼၼ်ႉၸိုင်၊ ၵႃႈၼင်ႇဢၼ်ဢမိင်ႉထႃႇဝရႃႉၽြႃးမီးၼၼ်ႉ ၶဝ်ယူႇၵႃႈၼႂ်းမူဝ်းၵႃႇၶဝ်ဢေႃႈ။ ၵႃႈၼင်ႇဢၼ်ဢမိင်ႉထႃႇဝရႃႉၽြႃးမီးၼၼ်ႉၵေႃႈ ၶဝ်ၵႂႃႇတၢင်းပႆတၢင်းဢေႃႈ။- 21မၢင်ၽဝ်ႇမွၵ်ႇၵုမ်ႈၼၼ်ႉတႄႇယူႇၸႃႉၸဵမ်ၶိင်ႇႁူဝ်ၶမ်ႈလႄႈတေႃႇထိုင်ႁွတ်ႈၶိင်ႇၵၢင်ၼႂ်ဢေႃႈ။ မိူဝ်ႈဢၼ်မွၵ်ႇၵုမ်ႈၼၼ်ႉယုၵ်ႉၶိုၼ်ႈၶိင်ႇၵၢင်ၼႂ်ၼၼ်ႉၸိုင်၊ ၶဝ်ၵႂႃႇတၢင်းပႆတၢင်းဢေႃႈ။ ပဵၼ်ၵၢင်ဝၼ်းသေဢမ်ႇဝႃႈ၊ ပဵၼ်ၵၢင်ၶိုၼ်းသေဢမ်ႇဝႃႈ၊ မိူဝ်ႈဢၼ်မွၵ်ႇၵုမ်ႈၼၼ်ႉယုၵ်ႉၶိုၼ်ႈၼၼ်ႉၸိုင်၊ ၶဝ်ၵႂႃႇတၢင်းပႆတၢင်းဢေႃႈ။- 22ပဵၼ်သွင်ဝၼ်းသေဢမ်ႇဝႃႈ၊ ပဵၼ်လိူၼ်ၼိုင်ႈသေဢမ်ႇဝႃႈ၊ ပဵၼ်ပီႊၼိုင်ႈသေဢမ်ႇဝႃႈ၊ ၶိင်ႇၵႃႇလႃႉၸူဝ်ႈဢၼ်မွၵ်ႇၵုမ်ႈယင်းၵိုတ်းယူႇၵႃႈၼိူဝ်သုမ်ႉထဵင်ၸဝ်ႈလႄႈတႄႇယူႇၼၼ်ႉ၊ ၵူၼ်းမဵဝ်းဢီႉသရေႇလႃႉတင်းလၢႆ ယင်းဢမ်ႇၵႂႃႇတၢင်းပႆတၢင်းလႄႈယူႇဢေႃႈ။ မိူဝ်ႈဢၼ်မွၵ်ႇၵုမ်ႈၼၼ်ႉ သမ်ႉၶိုၼ်းယုၵ်ႉၶိုၼ်ႈၼၼ်ႉၸိုင်၊ ၶဝ်ၵႂႃႇတၢင်းပႆတၢင်းဢေႃႈ။- 23ၵႃႈၼင်ႇဢၼ် ဢမိင်ႉထႃႇဝရႃႉၽြႃးမီးၼၼ်ႉ ၶဝ်ယူႇၼႂ်းမူဝ်းၵႃႇၶဝ်ဢေႃႈ။ ၵႃႈၼင်ႇဢၼ် ဢမိင်ႉထႃႇဝရႃႉၽြႃးမီးၼၼ်ႉၵေႃႈ ၶဝ်ၵႂႃႇတၢင်းပႆတၢင်းဢေႃႈ။ ၶဝ်ပႂ်ႉဢမူႉထႃႇဝရႃႉၽြႃး ယူႇၸွမ်းၵႃႈၼင်ႇဢၼ်ထႃႇဝရႃႉၽြႃး ဢဝ်မူဝ်းသေႇမီးဢမိင်ႉၼၼ်ႉဢေႃႈ။
Currently Selected:
ၼႂ်းထိူၼ်ႇ 9: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship