ၼႂ်းထိူၼ်ႇ 12
12
လွင်ႈမီႉရီႉဢၢမ်ႇလႆႈၶၢမ်ႇၽေးတၢမ်ႇ
1ပိူဝ်ႈဢၼ်မူဝ်းသေႇ ပဵၼ်ႁိူၼ်းႁူမ်ႈၵၼ်တင်းမႄႈယိင်းၵူၼ်းမဵဝ်းၵူႉသႃႉလႄႈ မီႉရီႉဢၢမ်ႇ ဢိၵ်ႇတင်းဢႃႇရုၼ်ႇတၢင်ႇဢပႅတ်ႈတီႈမူဝ်းသေႇၵွပ်ႈပိူဝ်ႈမႄႈယိင်းၵူၼ်းမဵဝ်းၵူႉသႃႉ ဢၼ်မၼ်းပဵၼ်ႁိူၼ်းႁူမ်ႈၵၼ်ၼၼ်ႉသေလႄႈဝႃႈ၊- 2ထႃႇဝရႃႉၽြႃး ဢဝ်မူဝ်းသေႇ ၵူၺ်းပၼ်ပျႃႇတိၵ်ႈၸဝ်ႈဢမၢၼ်ႇၶၼ်ပဵၼ်ႁိုဝ်။ မၼ်းၸဝ်ႈဢဝ်ႁဝ်းပၼ်ပျႃႇတိၵ်ႈၸဝ်ႈယူႇ ဢမ်ႇၸႂ်ႈႁိုဝ်။ ဝႃႈၼင်ႇၼႆဢေႃႈ။ ထႃႇဝရႃႉၽြႃးငိၼ်းၵႂၢမ်းၼၼ်ႉဢေႃႈ။- 3မူဝ်းသေႇၼၼ်ႉ မီးသၽေႃးဢၼ်ယဵင်ႈၶႅၼ်းၼိမ်သိမ်ႇဢူၼ်ႈဢွၼ်ႇၼႃႇသေ ၵူၼ်းဢၼ်မီးၵႃႈၼိူဝ်ၼႃႈလိၼ်မိူင်းၼႆႉ တင်းသဵင်ႈတင်းလူင်ဢေႃႈ။- 4ထႃႇဝရႃႉၽြႃးၵေႃႈ မီးဢမိင်ႉတီႈမူဝ်းသေႇ တင်းဢႃႇရုၼ်ႇ တင်းမီႉရီႉဢၢမ်ႇ ၵမ်းလဵဝ်လႄႈဝႃႈ၊ သူသၢမ်ၵေႃႉဢွၵ်ႇၸူးၵႃႈတီႈ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈတႃႉ၊ ဝႃႈၼင်ႇၼႆလႄႈ၊ ၶဝ်သၢမ်ၵေႃႉဢွၵ်ႇၸူးဢေႃႈ။- 5ထႃႇဝရႃႉၽြႃး ယူႇၵႃႈၼႂ်းသဝ်မွၵ်ႇၵုမ်ႈလူင်းမႃးလႄႈ ၸုၵ်းယူႇၵႃႈတီႈႁူးၽၵ်းတူမူဝ်းၵႃႇၸဝ်ႈသေယဝ်ႉ၊ ႁွင်ႉတီႈဢႃႇရုၼ်ႇ တင်းမီႉရီႉဢၢမ်ႇလႄႈ သွင်ၶႃၼၼ်ႉ ဢွၼ်ၵၼ်သုတ်ႉၸူးဢေႃႈ။- 6မၼ်းၸဝ်ႈမီးဢမိင်ႉလႄႈဝႃႈ၊ ထွမ်ႇငိၼ်းၵႂၢမ်းၵဝ်တႃႉ။ ပေႃးပရေႃးၽႅတ်ႈမီးၵႃႈၼႂ်းသူၸိုင်၊ ၵဝ်ထႃႇဝရႃႉၽြႃး တၵ်းဢဝ်ရူႇပႃႇရူင်ႇၼႄပျႃးတူဝ်ၸဝ်ႈၵဝ်ႇတီႈမၼ်းၼၼ်ႉဢေႃႈ။ ဢမ်ႇၼၼ်ၵေႃႈ ၵဝ်တၵ်းဢဝ် တၢင်းဢၼ် ၼွၼ်းၽၼ်ႁၼ် ပၼ်ပျႃႇတိၵ်ႈတီႈမၼ်းၼၼ်ႉဢေႃႈ။- 7ၶႃႈၵဝ်မူဝ်းသေႇ ဢၼ်ပႂ်ႉသဵတ်ႈၸႃႇၵႃႈၼႂ်းႁိူၼ်းၵဝ်တင်းႁိူၼ်းၼၼ်ႉၸမ်ႉ၊ ဢမ်ႇပဵၼ်ၸိူဝ်ႉၼင်ႇၼၼ်။- 8ၵဝ်ဢဝ်သူပ်းတေႃႇသူပ်း၊ ပၼ်ပျႃႇတိၵ်ႈတီႈမၼ်းလႄႈ ပၼ်ထၢင်ႇထၢင်ႇသႃးသႃးဢေႃႈ။ ဢမ်ႇဢဝ်တင်းၵႂၢမ်းဢၼ်လိုၵ်ႉဢၼ်လမ်ႇပၼ်။ ပုင်ႇႁၢင်ႈထႃႇဝရႃႉၽြႃးၵေႃႈ မၼ်းတၵ်းလႆႈႁၼ်ဢေႃႈ။ ၵွပ်ႈႁွႆးၼႆႉလႄႈ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူဢမ်ႇၵူဝ်လူၺ်ႈလွင်ႈဢၼ် တၢင်ႇဢပႅတ်ႈတီႈၶႃႈၵဝ်မူဝ်းသေႇၼၼ်ႉၼင်ႇႁိုဝ်။ ဝႃႈၼင်ႇၼႆသေလႄႈ၊- 9တၢင်းၸႂ်မႆႈၶႆႈၸႃႉထႃႇဝရႃႉၽြႃး ဢွၵ်ႇတီႈသွင်ၶႃၼၼ်ႉလႄႈ မၼ်းၸဝ်ႈၵႂႃႇသေယဝ်ႉ၊- 10မွၵ်ႇၵုမ်ႈၼၼ်ႉၽၢတ်ႇသေၵႃႈတီႈၼိူဝ်မူဝ်းၵႃႇၸဝ်ႈၵႂႃႇဢေႃႈ။ မီႉရီႉဢၢမ်ႇၵေႃႈပဵၼ်တုတ်ႈလႄႈ ၽိူၵ်ႇဝႆႉမိူၼ်ၸိူဝ်ႉၼင်ႇမူၺ်ႁႃႇၼၼ်ႉဢေႃႈ။ ဢႃႇရုၼ်ႇတူၺ်းမီႉရီႉဢၢမ်ႇလႄႈ ႁၼ်လွင်ႈဢၼ်မၼ်းပဵၼ်တုတ်ႈၼၼ်ႉသေယဝ်ႉ၊- 11တွင်းပၢၼ်ႇတီႈမူဝ်းသေႇလႄႈဝႃႈ၊ ၸဝ်ႈၵဝ်ၶႃႈၶႃႈဢိူၺ်း၊ ယႃႇပေဢဝ်ဢပႅတ်ႈဢၼ်ႁဝ်းၶႃႈ ႁဵတ်းဢမူႉဢၼ်မိူၵ်ႈ ဢိၵ်ႇတင်းဢၼ်ၽိတ်းပိူင်ႈမႅၼ်ႈၼႆႉ တၢင်ႇၵႃႈၼိူဝ်ႁဝ်းၶႃႈသေၵမ်းၶႃႈ။ ၵဝ်ၶႃႈတွင်းပၢၼ်ႇၶႃႈဢေႃႈ။- 12ယႃႇပေႁႂ်ႈမၼ်းၼႆႉ ပဵၼ်ၸိူဝ်ႉၼင်ႇတူဝ်တၢႆ ဢၼ်ၼိူဝ်ႉမၼ်းလၢၼ်ႈၵႂႃႇၽၢၵ်ႇၼိုင်ႈယဝ်ႉ ၸဵမ်မိူဝ်ႈဢၼ်မၼ်း ၸႃႉဢွၵ်ႇမႃးၵႃႈၼႂ်း တွင်ႉမႄႈမၼ်းၼၼ်ႉသေၵမ်းတီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 13မူဝ်းသေႇ ႁွင်ႉသႅၼ်ႇတီႈထႃႇဝရႃႉၽြႃးလႄႈဝႃႈ၊ ဢူဝ်းၽြႃးပဵၼ်ၸဝ်ႈ၊ ၶႅၼ်းတေႃႈႁႂ်ႈတၢင်းၶႆႈတၢင်းပဵၼ်မၼ်းၼႆႉႁၢႆသေၵမ်းတီႈၶႃႈ၊ ၶႃႈၸဝ်ႈတွင်းပၢၼ်ႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။
14ထႃႇဝရႃႉၽြႃးမီးဢမိင်ႉတီႈမူဝ်းသေႇလႄႈဝႃႈ၊ သင်ပေႃႈမၼ်းၵွမ်ႉၵႃႈထူမ်ႇၼမ်ႉလၢႆးသႂ်ႇၵႃႈတီႈၼႃႈမၼ်းၵူၺ်းၸိုင်၊ မၼ်းတၵ်းလႆႈၶၢမ်ႇတၢင်း ဢူၵ်းတၢင်းဢၢႆၸဵတ်းဝၼ်းတဵမ်တဵမ်ဢမ်ႇၸႂ်ႈႁိုဝ်။ တေႃႈလဵဝ်ၼႆႉ ႁေႃႈမၼ်းဢွၵ်ႇလႄႈ ႁႂ်ႈမၼ်းယူႇၵႃႈတီႈၼွၵ်ႈတပ်ႉ ၸဵတ်းဝၼ်းတဵမ်တဵမ်တႃႉ။ လိုၼ်းၼၼ်ႉၸင်ႇ ႁႂ်ႈမၼ်းၶိုၼ်းၶဝ်ႈၵႃႈၼႂ်းတပ်ႉတႃႉ၊ ဝႃႈၼင်ႇၼႆလႄႈ၊- 15မီႉရီႉဢၢမ်ႇလႆႈၶၢမ်ႇတၢင်းဢၼ်ႁေႃႈဢွၵ်ႇလႄႈ လႆႈယူႇၵႃႈၼွၵ်ႈတပ်ႉၸဵတ်းဝၼ်းတဵမ်တဵမ်ဢေႃႈ။ ၵူၼ်းတင်းလၢႆၼၼ်ႉ ယင်းဢမ်ႇၵႂႃႇတၢင်းပႆတၢင်းလႄႈ ယူႇတေႃႇထိုင်ႁွတ်ႈလႆႈဢဝ် မီႉရီႉဢၢမ်ႇ ၶိုၼ်းမႃးၵႃႈၼႂ်းတပ်ႉၼၼ်ႉဢေႃႈ။- 16လိုၼ်းၼၼ်ႉ ၵူၼ်းတင်းလၢႆၼၼ်ႉ ဢွၼ်ၵၼ်လုၵ်ႉသေၵႃႈတီႈႁႃႇၸရုတ်ႉၼၼ်ႉ ၵႂႃႇတၢင်းပႆတၢင်းလႄႈ ၵင်ႈမုင်းမူဝ်းၵႃႇၶဝ် ၵႃႈၼႂ်းထိူၼ်ႇပႃႇရၼ်ႇဢေႃႈ။
Currently Selected:
ၼႂ်းထိူၼ်ႇ 12: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship