ၼႂ်းထိူၼ်ႇ 13
13
လွင်ႈတၢင်းဢၼ်ပွႆႇၵူၼ်းသွပ်ႇၶၢဝ်ႇၵႂႃႇ
(တူၺ်း၊ ႁေႃး 1:19-33)
1ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 2မႂ်းပွႆႇၸႂ်ႉၵူၼ်းၵႂႃႇႁႂ်ႈလႆႈလွမ်လႆႈတူၺ်းမိူင်းၶႃႇၼၢၼ်ႇ ဢၼ်ၵဝ်တၵ်းပၼ်တီႈၵူၼ်းမဵဝ်းဢီႉသရေႇလႃႉတင်းလၢႆၼၼ်ႉတႃႉ။ မႂ်းတၵ်းလႆႈလိူၵ်ႈၵဵပ်းဢဝ်ၵႃႈၼႂ်းမဵဝ်းပူႇမဵဝ်းပေႃႈၶဝ်ၼၼ်ႉ ယေႈမဵဝ်းယေႈၵေႃႉ၊ ၵေႃႉဢၼ်ပဵၼ်ငဝ်ႈပဵၼ်ႁူဝ်ၼႂ်းၶဝ်ၼၼ်ႉ ႁင်းၽႂ်ႁင်းမၼ်းဢေႃႈ၊ ဝႃႈၼင်ႇၼႆလႄႈ၊- 3မူဝ်းသေႇပွႆႇၸႂ်ႉၶဝ်ၼၼ်ႉသေၵႃႈတီႈထိူၼ်ႇပႃႇရၼ်ႇၼၼ်ႉ ၵႂႃႇၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉၼၼ်ႉဢေႃႈ။ ၶဝ်ၸိူဝ်းၼၼ်ႉ ပဵၼ်ၵႄႇပဵၼ်ႁူဝ်ၵႃႈတီႈ ၵူၼ်းမဵဝ်းဢီႉသရေႇလႃႉတင်းလၢႆၵူႈၵေႃႉဢေႃႈ။- 4ၸိုဝ်ႈသဵင်ၶဝ်ၸမ်ႉ၊ ၵႃႈတီႈမဵဝ်းရူႉပိၼ်ႇ၊ သမႂႃႇဢၼ်ပဵၼ်လုၵ်ႈၸၢႆးၸၵ်ႉၵူႉရႃႉ၊- 5ၵႃႈတီႈမဵဝ်းသီႉမုၼ်ႇ၊ သႃႇၽတ်ႉ ဢၼ်ပဵၼ်လုၵ်ႈၸၢႆးႁေႃးရီႉ၊- 6ၵႃႈတီႈမဵဝ်းယူႉတႃႉ၊ ၵႃႇလႅပ်ႉ ဢၼ်ပဵၼ်လုၵ်ႈၸၢႆးယေႇၽုၼ်ႇၼႃႉ၊- 7ၵႃႈတီႈမဵဝ်းဢီႉသၶႃႇ၊ ဢီႉၵႃႇလႃႉဢၼ်ပဵၼ်လုၵ်ႈၸၢႆးယူဝ်းသႅပ်ႈ၊- 8ၵႃႈတီႈမဵဝ်းဢေႇၽရိမ်ႇ၊ ဢေႃးသေႇဢၼ်ပဵၼ်လုၵ်ႈၸၢႆးၼုၼ်ႇ၊- 9ၵႃႈတီႈမဵဝ်းပိၼ်ႇယႃႇမိၼ်ႇ၊ ပႃႇလတီႉဢၼ်ပဵၼ်လုၵ်ႈၸၢႆးရႃႇၽူႉ၊- 10ၵႃႈတီႈမဵဝ်းၸေႇပူႉလုၼ်ႇ၊ ၵႃႇတျေႇလႃႉဢၼ်ပဵၼ်လုၵ်ႈၸၢႆးသေႃႉတီႉ၊- 11ၵႃႈတီႈမဵဝ်းယူဝ်းသႅပ်ႈ ဢၼ်ဝႃႈမဵဝ်းမၼႃႇသေႇ၊ ၵတ်ႉတီႉဢၼ်ပဵၼ်လုၵ်ႈၸၢႆးသူႉသီႉ၊- 12ၵႃႈတီႈမဵဝ်းတၢၼ်ႇ၊ ဢမျေးလႃႉဢၼ်ပဵၼ်လုၵ်ႈၸၢႆးၵေႇမလီႉ၊- 13ၵႃႈတီႈမဵဝ်းဢႃႇသႃႇ၊ သေႇသူႉရႃႉ ဢၼ်ပဵၼ်လုၵ်ႈၸၢႆးမီႉၵေႇလႃႉ၊- 14ၵႃႈတီႈမဵဝ်းၼပ်ႉထလီႉ၊ ၼႃႇၽီႉဢၼ်ပဵၼ်လုၵ်ႈၸၢႆးဝႃႇၽသီႉ၊- 15ၵႃႈတီႈမဵဝ်းၵၢတ်ႉ၊ ၵုၺ်းလႃႉဢၼ်ပဵၼ်လုၵ်ႈၸၢႆးမႃႇၶီႉဢေႃႈ။- 16ဢၼ်ၼႆႉၸမ်ႉ၊ ပဵၼ်ၸိုဝ်ႈသဵင်ၶဝ်ၸိူဝ်းဢၼ်မူဝ်းသေႇ ပွႆႇၸႂ်ႉၵႂႃႇႁႂ်ႈလႆႈလွမ်လႆႈတူၺ်း မိူင်းၶႃႇၼၢၼ်ႇဢေႃႈ။ ဢေႃးသေႇ ဢၼ်ပဵၼ်လုၵ်ႈၸၢႆးၼုၼ်ႇၼၼ်ႉၸိုင်၊ မူဝ်းသေႇ ႁွင်ႉႁဵၵ်ႈၸိုဝ်ႈယေႃးသူႉဢေႃႈ။
17 မူဝ်းသေႇပွႆႇၸႂ်ႉၶဝ်ၼၼ်ႉၵႂႃႇ ႁႂ်ႈလႆႈလွမ်လႆႈတူၺ်းမိူင်းၶႃႇၼၢၼ်ႇလႄႈ သင်ႇလၢတ်ႈလႄႈဝႃႈ၊ သူဢွၼ်ၵၼ်ၵႂႃႇၸွမ်းသဵၼ်ႈတၢင်း ပွတ်းတၢင်းၸၢၼ်းသေလႄႈ ၶိုၼ်ႈၵႃႈၼိူဝ်လွႆတႃႉ။- 18လူတူၺ်းလွမ်တူၺ်းလွင်ႈဢၼ်မိူင်းၼၼ်ႉ ပဵၼ်မိူင်းၸိူဝ်ႉၼင်ႇႁိုဝ်။ ၵူၼ်းဢၼ်ယူႇမိူင်းၼၼ်ႉၸိူဝ်းၼၼ်ႉ ႁႅင်းယႂ်ႇႁိုဝ်။ ႁႅင်းလဵၵ်ႉႁိုဝ်။ ၼမ်ႁိုဝ်။ ၵေႇႁိုဝ်။- 19မိူင်းဢၼ်ၶဝ်ယူႇၼၼ်ႉ ပဵၼ်ၸိူဝ်ႉၼင်ႇႁိုဝ်။ လီႁိုဝ်။ ဢမ်ႇလီႁိုဝ်။ ဝၢၼ်ႈဝဵင်းဢၼ်ၶဝ်ယူႇၸိူဝ်းၼၼ်ႉ ပဵၼ်ၸိူဝ်ႉၼင်ႇႁိုဝ်။ ယူႇၵႃႈၼႂ်းမူဝ်းၵႃႇႁိုဝ်။ ယူႇၵႃႈၼႂ်းဝဵင်းဢၼ်မၼ်ႈၶိူင်ႇႁိုဝ်။- 20လိၼ်ၼၼ်ႉပဵၼ်ၸိူဝ်ႉၼင်ႇႁိုဝ်။ လီႁိုဝ်။ ဢမ်ႇလီႁိုဝ်။ မီးတူၼ်ႈမႆႉတူၼ်ႈတွၵ်ႇႁိုဝ်။ ဢမ်ႇမီးႁိုဝ်ၼၼ်ႉတႃႉ။ ဢွၼ်ၵၼ်မီးၸႂ်ဢၼ်ႁတ်းဢၼ်ႁၢၼ်တႃႉ။ ဢွၼ်ၵၼ်ဢဝ်မၢၵ်ႇမႆႉမၢၵ်ႇတွၵ်ႇမိူင်းၼၼ်ႉၵမ်ႈၽွင်ႈမႃးတႃႉ၊ ဝႃႈၼင်ႇၼႆဢေႃႈ။ ၶိင်ႇၵႃႇလႃႉၼၼ်ႉ ပဵၼ်ၶိင်ႇၵႃႇလႃႉဢၼ်မၢၵ်ႇၸပိတ်ႈမၢၵ်ႇၸုပ်ႈဢွၼ်တၢင်းသုတ်းပိူၼ်ႈဢေႃႈ။
21ၶဝ်ၼၼ်ႉဢွၼ်ၵၼ်ၵႂႃႇလႄႈ လွမ်တူၺ်းမိူင်းၶႃႇၼၢၼ်ႇ ဢဝ်ၵႃႈတီႈၸႃႉၸဵမ်ထိူၼ်ႇၸီႉၼႃႉ တေႃႇထိုင်ႁွတ်ႈဝဵင်းရႃႇႁေႃႇၽႃႉ ႁိမ်းသဵၼ်ႈတၢင်းဢၼ်ၵႂႃႇၸူးၵႃႈတီႈဝဵင်းႁႃႇမတ်ႉၼၼ်ႉဢေႃႈ။- 22ၶဝ်ပႆၸွမ်းသဵၼ်ႈတၢင်းပွတ်းတၢင်းၸၢၼ်းၵႂႃႇလႄႈ ႁွတ်ႈၽႅဝ်ၵႃႈတီႈဝဵင်းႁေႇပြုၼ်ႇ ဢၼ်ဢႁီႉမၼ်ႇ၊ သေးသေး တင်းတႃႇလမေး ၵူၼ်းမဵဝ်းဢႃႇၼၵႃႉၸိူဝ်းၼၼ်ႉ ယူႇၼၼ်ႉဢေႃႈ။ ဝဵင်းႁေႇပြုၼ်ႇၼၼ်ႉၸမ်ႉ၊ ပဵၼ်ဝဵင်းဢၼ်တႄႇႁဵတ်းဢွၼ်တၢင်းဝဵင်းၸေႃးၼႃႉ ဢၼ်မီးၵႃႈတီႈမိူင်းဢေႇၵိပ်ႉတူႉၼၼ်ႉၸဵတ်းပီႊဢေႃႈ။- 23ၶဝ်ႁွတ်ႈထိုင်ၵႃႈတီႈပၢင်ႇႁူၺ်ႈဢေႇသၵေႃးလႃႉ သေယဝ်ႉ၊ တႅပ်းၽၼ်းဢဝ်ၵိင်ႇတူၼ်ႈၶိူဝ်းမၢၵ်ႇၸပိတ်ႈၵိင်ႇၼိုင်ႈ ဢၼ်ပႃးပုၵ်ႉမၢၵ်ႇမၼ်းပုၵ်ႉၼိုင်ႈလႄႈ၊ ၵူၼ်းသွင်ၵေႃႉဢဝ်တင်းၵၢၼ်းႁၢမ်ဢေႃႈ။ မၢၵ်ႇၸင်ႈလႂ် တင်းမၢၵ်ႇလိူဝ်ႇသၢင်းၽေႃးလႂ်ၵေႃႈ ၶဝ်ပႃးဢဝ်မႃးဢေႃႈ။- 24ၸွမ်းလူၺ်ႈပုၵ်ႉမၢၵ်ႇၸပိတ်ႈဢၼ်ၵူၼ်းမဵဝ်းဢီႉသရေႇလႃႉတင်းလၢႆတႅပ်းဢဝ်ၼၼ်ႉလႄႈ ႁွင်ႉႁဵၵ်ႈၸိုဝ်ႈပၢင်ႇႁူၺ်ႈၼၼ်ႉ ဢေႇသၵေႃးလႃႉဢေႃႈ။- 25ပူၼ်ႉသီႇသိပ်းဝၼ်းသေယဝ်ႉ၊ ဢမူႉတၢင်းဢၼ် လွမ်တူၺ်းမိူင်းၶႃႇၼၢၼ်ႇၼၼ်ႉယဝ်ႉတူဝ်ႈယဝ်ႉလႄႈ ၶဝ်ဢွၼ်ၵၼ်ၶိုၼ်းမႃးဢေႃႈ။
26ၶဝ်ၶိုၼ်းႁွတ်ႈထိုင်ၵႃႈတီႈမူဝ်းသေႇ တင်းဢႃႇရုၼ်ႇ ဢိၵ်ႇတင်း ၵူၼ်းမဵဝ်းဢီႉသရေႇလႃႉတင်းသဵင်ႈတင်းလူင် ၵႃႈၼႂ်းထိူၼ်ႇပႃႇရၼ်ႇ တီႈၵႃႇတေႇသႃႉၼၼ်ႉသေယဝ်ႉ၊ မွၵ်ႇလၢတ်ႈသတၢင်းသဵင်ၶၢဝ်ႇတီႈပရဵၵ်ႈသၢတ်ႈတင်းသဵင်ႈတင်းလူင်လႄႈ၊ ဢဝ်မၢၵ်ႇဢၼ် မၢၵ်ႇၵႃႈတီႈမိူင်းၼၼ်ႉၸိူဝ်းၼၼ်ႉၼႄပျႃးဢေႃႈ။- 27ၶဝ်လဝ်ႊလၢတ်ႈတီႈမူဝ်းသေႇလႄႈဝႃႈ၊ ႁဝ်းၶႃႈႁွတ်ႈထိုင်ၵႃႈတီႈမိူင်းဢၼ် ၸဝ်ႈႁဝ်းပွႆႇၸႂ်ႉႁဝ်းၶႃႈၵႂႃႇၼၼ်ႉယဝ်ႉၶႃႈယဝ်ႉ။ မိူင်းၼၼ်ႉ ပဵၼ်မိူင်းဢၼ်ၼမ်ႉၼူမ်းတင်းၼမ်ႉၽိုင်ႈ ၸၢင်ႈလႆယူႇဢမၢၼ်ႇၶၼ်ပဵၼ်ၶႃႈဢေႃႈ။ မၢၵ်ႇၸိူဝ်းၼႆႉၸမ်ႉ၊ ပဵၼ်မၢၵ်ႇဢၼ်မၢၵ်ႇ ၵႃႈတီႈမိူင်းၼၼ်ႉၶႃႈဢေႃႈ။- 28ၼႂ်းဝႃႈၼၼ်သေၵေႃႈ ၵူၼ်းဝၢၼ်ႈၵူၼ်းမိူင်းၸိူဝ်းၼၼ်ႉ ႁႅင်းယႂ်ႇၼႃႇၶႃႈဢေႃႈ။ ဝဵင်းၶဝ်ၸိူဝ်းၼၼ်ႉ ပဵၼ်ဝဵင်းဢၼ်မၼ်ႈၶိူင်ႇလႄႈ ယႂ်ႇၼႃႇလူင်လၢင်ၶႃႈဢေႃႈ။ လိူဝ်သေၼၼ်ႉ ႁဝ်းၶႃႈလႆႈႁၼ်ၵူၼ်းမဵဝ်းဢႃႇၼၵႃႉ ၵႃႈတီႈၼၼ်ႈၶႃႈဢေႃႈ။- 29ၵူၼ်းမဵဝ်းဢႃႇမလႅၵ်ႉတင်းလၢႆယူႇၵႃႈတီႈပွတ်းတၢင်းၸၢၼ်း၊ ၵူၼ်းမဵဝ်းႁိတ်ႉတီႉ၊ ၵူၼ်းမဵဝ်းယေႇပူႉသီႉ၊ ၵူၼ်းမဵဝ်းဢႃႇမေႃးရီႉတင်းလၢႆယူႇၵႃႈတီႈၼိူဝ်လွႆ၊ ၵူၼ်းမဵဝ်းၶႃႇၼၼီႉတင်းလၢႆ ယူႇၵႃႈတီႈႁိမ်းပၢင်ႇလၢႆႇ ဢိၵ်ႇတင်းၵႃႈတီႈႁိမ်းၼမ်ႉႁွင်ႈယေႃးတၢၼ်ႇၶႃႈဢေႃႈ၊ ဝႃႈၼင်ႇၼႆဢေႃႈ။- 30ၵႃႇလႅပ်ႉ ၵေႃႈ ႁႂ်ႈၵူၼ်းတင်းလၢႆယူႇတဵတ်ႇတဵတ်ႇယဵၼ်ယဵၼ်ၵႃႈတီႈၽၢႆႇၼႃႈ မူဝ်းသေႇလႄႈဝႃႈ၊ ဢွၼ်ၵၼ်ၶီႇၵႂႃႇၵမ်းလဵဝ်လႄႈ သိမ်းဢဝ်မိူင်းၼၼ်ႉတႃႉႁဝ်း။ ႁဝ်းတၢတ်ႈၼိူင်ႇပႄႉၼႅင်ႇလႆႈယူႇဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဢေႃႈ။- 31ၶဝ်ၸိူဝ်းဢၼ်ၸွမ်းလူၺ်ႈၵၼ်တင်းမၼ်းၼၼ်ႉၸမ်ႉ၊ ဢွၼ်ၵၼ်လၢတ်ႈလႄႈဝႃႈ၊ ႁဝ်းဢမ်ႇတၢတ်ႈၼိူင်ႇတိုၵ်းၵူၼ်းမိူင်းၸိူဝ်းၼၼ်ႉလႆႈ။ ၶဝ်ၼၼ်ႉ ယဵင်ႈၶႅၼ်းႁႅင်းယႂ်ႇၼႃႇသေႁဝ်းၼႆႉဢေႃႈ၊ ဝႃႈၼင်ႇၼႆဢေႃႈ။- 32ၶဝ်သမ်ႉမွၵ်ႇလၢတ်ႈသတၢင်းသဵင်ၶၢဝ်ႇဢၼ်ဢမ်ႇလီဢမ်ႇငၢမ်း လူၺ်ႈလွင်ႈမိူင်းဢၼ်ၶဝ်လွမ်တူၺ်းၼၼ်ႉ တီႈၵူၼ်းမဵဝ်းဢီႉသရေႇလႃႉတင်းလၢႆလႄႈဝႃႈ၊ မိူင်းဢၼ်ႁဝ်းၵႂႃႇလႄႈ လႄႇလဵပ်ႈလွမ်တူၺ်းၼၼ်ႉ ၸၢင်ႈၵိၼ်ၵူၼ်းဢၼ်ယူႇၵႃႈၼႂ်းမၼ်းတင်းလၢႆပႅတ်ႈဢေႃႈ။ ၵူၼ်းဝၢၼ်ႈၵူၼ်းမိူင်းၵႃႈဢၼ်ႁဝ်းထူပ်းႁၼ်ၵႃႈၼႂ်းမၼ်းၼၼ်ႉ သုင်ပူၼ်ႉသုင်လိူဝ်ၼႃႇလူင်လၢင်ဢေႃႈ။- 33ၵူၼ်းမဵဝ်းၸိူဝ်ႉၶိူဝ်းဢၼ်တူဝ်ယႂ်ႇ၊ ၵူၼ်းမဵဝ်းဢႃႇၼၵႃႉဢၼ်သိုပ်ႇလူင်းမႃး ၵႃႈတီႈၵူၼ်းမဵဝ်းဢၼ်တူဝ်ယႂ်ႇၼၼ်ႉၵေႃႈ ႁဝ်းလႆႈႁၼ်ၵႃႈတီႈၼၼ်ႈမႃးယဝ်ႉ။ ႁဝ်းၼႆႉၸွမ်းၼင်ႇဢၼ် တႃတူဝ်ၸဝ်ႈၵဝ်ႇႁၼ်ၼၼ်ႉၸိုင်၊ ပဵၼ်ၸိူဝ်ႉၼင်ႇၸၵ်းတႅၼ်ဝႆႉဢေႃႈ။ ၸွမ်းၼင်ႇဢၼ် တႃၶဝ်ႁၼ်ၼၼ်ႉၵေႃႈ ပဵၼ်ၸိူဝ်ႉၼင်ႇၼၼ်ယဝ်ႉ၊ ဝႃႈၼင်ႇၼႆဢေႃႈ။
Currently Selected:
ၼႂ်းထိူၼ်ႇ 13: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship