ၼႂ်းထိူၼ်ႇ 14

1မိူဝ်ႈၼၼ်ႉ ပရဵၵ်ႈသၢတ်ႈတင်းသဵင်ႈတင်းလူင် ဢွၼ်ၵၼ်ႁွင်ႉသႅၼ်ႇလႄႈဢူၼ်ဢဵၼ်မေႃးမႄးယူႇသေလႄႈ ႁွင်ႉႁႆႈယူႇတင်းၶိုၼ်းဢေႃႈ။- 2ပရဵၵ်ႈသၢတ်ႈၵူၼ်းမဵဝ်းဢီႉသရေႇလႃႉ တင်းသဵင်ႈတင်းလူင် တၢင်ႇဢပႅတ်ႈပွင်ႉၶၢင်းပွင်ႉမိူၼ်ႇတီႈမူဝ်းသေႇတင်းဢႃႇရုၼ်ႇလႄႈဝႃႈ၊ ႁဝ်းၼႆႉ၊ ၸိုင်ဢမ်ႇတၢႆသေၵႃႈတီႈမိူင်းဢေႇၵိပ်ႉတူႉၼၼ်ႉ။ ၸိုင်ဢမ်ႇတၢႆသေၵႃႈတီႈၼႂ်းထိူၼ်ႇၼႆႉ။- 3ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ထႃႇဝရႃႉၽြႃးဢဝ်ႁဝ်းမႃးၵႃႈတီႈမိူင်းၼႆႉ ႁႂ်ႈႁဝ်းလႆႈတၢႆလူၺ်ႈလၢပ်ႇလူၺ်ႈလႅဝ်းၼင်ႇႁိုဝ်။ လုၵ်ႈႁဝ်းမေးႁဝ်းၸိူဝ်းၼႆႉ တၵ်းလႆႈပဵၼ်တီႈဢၼ်ပိူၼ်ႈတီႉဢဝ်သိမ်းဢဝ်ဢေႃႈ။ ႁဝ်းလီၶိုၼ်းမိူဝ်းၵႂႃႇၵႃႈတီႈမိူင်းဢေႇၵိပ်ႉတူႉယဝ်ႉ ဢမ်ႇၸႂ်ႈႁိုဝ်။ ဝႃႈၼင်ႇၼႆသေယဝ်ႉ၊- 4လႆႈသမ်ႉၵေႃႉၼိုင်ႈလၢတ်ႈတီႈၵေႃႉၼိုင်ႈလႄႈဝႃႈ၊ ဢွၼ်ၵၼ်ယုၵ်ႉယွင်ႈၵူၼ်းသေၵေႃႉၵေႃႉလႄႈၶိုၼ်းမိူဝ်းၵႂႃႇၵႃႈတီႈမိူင်းဢေႇၵိပ်ႉတူႉပုၼ်ႉတႃႉႁဝ်း၊ ဝႃႈၼင်ႇၼႆဢေႃႈ။- 5မူဝ်းသေႇ တင်းဢႃႇရုၼ်ႇ ၶုပ်ႉမူပ်ႇယူႇၵႃႈတီႈၽၢႆႇၼႃႈပရဵၵ်ႈသၢတ်ႈၵူၼ်းမဵဝ်းဢီႉသရေႇလႃႉ တင်းသဵင်ႈတင်းလူင်ၼၼ်ႉဢေႃႈ။

6 ယေႃးသူႉလုၵ်ႈၸၢႆးၼုၼ်ႇ တင်းၵႃႇလႅပ်ႉ လုၵ်ႈၸၢႆးယေႇၽုၼ်ႇၼႃႉ ဢၼ်ပႃးၼႂ်းၶဝ်ၸိူဝ်းဢၼ်ၵႂႃႇလွမ်ၵႂႃႇတူၺ်း မိူင်းၶႃႇၼၢၼ်ႇၼၼ်ႉ ၸၵ်ႉသိၵ်ႇၶူဝ်းၼုင်ႈသွင်ၶႃလႄႈ၊- 7လၢတ်ႈတီႈပရဵၵ်ႈသၢတ်ႈၵူၼ်းမဵဝ်းဢီႉသရေႇလႃႉ တင်းသဵင်ႈတင်းလူင်လႄႈဝႃႈ၊ မိူင်းဢၼ်ႁဝ်းၵႂႃႇလႄႈ လႄႇလဵပ်ႈလွမ်တူၺ်းၼၼ်ႉ ပဵၼ်မိူင်းဢၼ်လီၼႃႇလူင်လၢင်ဢေႃႈ။- 8ပေႃးထႃႇဝရႃႉၽြႃးမူၼ်ႈပျေႃႇၼႂ်းႁဝ်းၸိုင်၊ မၼ်းၸဝ်ႈတၵ်းဢဝ်ႁဝ်းသူင်ႇႁွတ်ႈၵႃႈတီႈမိူင်းဢၼ် ၼမ်ႉၼူမ်းတင်းၼမ်ႉၽိုင်ႈၸၢင်ႈလႆယူႇၼၼ်ႉလႄႈ ပၼ်ႁဝ်းပိူင်ႇဢေႃႈ။- 9ၵူၺ်းၵႃႈ ယႃႇပေဢွၼ်ၵၼ်ပုင်ႇၵၢၼ်ႇထႃႇဝရႃႉၽြႃးသေၵမ်း။ ယႃႇပေၵူဝ်ပေႁႄၵူၼ်းဝၢၼ်ႈၵူၼ်းမိူင်းၼၼ်ႉသေၵမ်း။ ၶဝ်ၼၼ်ႉ ပဵၼ်ပုၼ်ႈဢၼ်ႁဝ်းတၵ်းၵိၼ်ဢေႃႈ။ တၢင်းဢၼ်ႁႄႉဢၼ်ၵင်ႈၶဝ်ၼၼ်ႉ ၶၢႆႉသေၵႃႈတီႈၼိူဝ်ၶဝ်ၵႂႃႇယဝ်ႉ။ ထႃႇဝရႃႉၽြႃး မီးယူႇၽၢႆႇႁဝ်းဢေႃႈ။ ယႃႇပေၵူဝ်ပေႁႄၶဝ်ၼၼ်ႉ မိူဝ်ႈဢၼ်ဝႃႈၼင်ႇၼႆၸိုင်၊- 10ပရဵၵ်ႈသၢတ်ႈတင်းသဵင်ႈတင်းလူင်ၼၼ်ႉ ဢွၼ်ၵၼ်ၸီႇယၢင်ႇႁႂ်ႈဢဝ်မၢၵ်ႇႁိၼ်ထိမ်ႈသွင်ၶႃၼၼ်ႉဢေႃႈ။ မိူဝ်ႈၼၼ်ႉ မုၼ်ၽုင်းထႃႇဝရႃႉၽြႃး ထၢင်ႇသႃးမႃးၵႃႈၼႂ်းမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ ၽၢႆႇၼႃႈၵူၼ်းမဵဝ်းဢီႉသရေႇလႃႉ တင်းသဵင်ႈတင်းလူင်ဢေႃႈ။

11ထႃႇဝရႃႉၽြႃးလၢတ်ႈတီႈ မူဝ်းသေႇလႄႈဝႃႈ၊ ၵူၼ်းမဵဝ်းၼႆႉတၵ်းႁဵတ်းဢမ်ႇရူဝ်ႇသေႇၵူဝ်ယမ်ၵဝ်ယူႇၶိင်ႇၵႃႇလႃႉႁိုင်ၵႃႈႁိုဝ်။ ပိၵ်ႉသမ်ႉ ၶဝ်လႆႈႁၼ်ၼီႉမိၵ်ႈလၢၵ်ႈၶၼႃႇၵႃႈဢၼ်ၵဝ်လႆႈၼႄပျႃးတီႈၶဝ်မႃးယဝ်ႉၸိူဝ်းၼၼ်ႉသေၵေႃႈ ၶဝ်ယင်းဢမ်ႇယုမ်ႇၵဝ်လႄႈ တၵ်းယူႇၶိင်ႇၵႃႇလႃႉႁိုင်ၵႃႈႁိုဝ်။- 12ၵဝ်တၵ်းဢဝ်တၢင်းဢၼ်ပဵၼ် ၵႃႇလႃႉႁႃႈလႅင်မိူင်းပၼ်တၢမ်ႇတီႈၶဝ်လႄႈ ၼုၵ်ႈထွၼ်ဢွၵ်ႇသေၵႃႈၼႂ်းဢရႃႇတၢင်းဢၼ်ၶၢမ်ႇဢမူၺ်ႇဢေႃႈ။ တၵ်းႁႂ်ႈမႂ်းပဵၼ်ၵူၼ်းမဵဝ်းဢၼ် ယဵင်ႈၶႅၼ်းၼမ်ၵိုၼ်း၊ မဵဝ်းဢၼ်တၼ်းၶူဝ်းယဵင်ႈၶႅၼ်းယႂ်ႇသေၶဝ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။- 13မူဝ်းသေႇ ၵေႃႈလဝ်ႊလၢတ်ႈတီႈထႃႇဝရႃႉၽြႃးလႄႈဝႃႈ၊ ၵူၼ်းဢေႇၵိပ်ႉတူႉတင်းလၢႆ လႆႈငိၼ်းလွင်ႈဢၼ်ၸဝ်ႈႁဝ်းဢဝ် တၼ်းၶူဝ်းၸဝ်ႈႁဝ်း ၼုၵ်ႈဢဝ်ၵူၼ်းမဵဝ်းၼႆႉဢွၵ်ႇသေ ၵႃႈၼႂ်းမိူင်းဢေႇၵိပ်ႉတူႉမႃးယဝ်ႉၼၼ်ႉလႄႈ၊- 14လႆႈမွၵ်ႇလၢတ်ႈတီႈၶဝ်ၸိူဝ်းဢၼ် ယူႇၵႃႈတီႈမိူင်းၼႆႉၼၼ်ႉယဝ်ႉတီႈၶႃႈယဝ်ႉ။ ၶဝ်လႆႈငိၼ်းလွင်ႈဢၼ် ၸဝ်ႈႁဝ်းထႃႇဝရႃႉၽြႃး မီးယူႇလူၺ်ႈၵၼ်တင်းၵူၼ်းမဵဝ်းၼႆႉ လွင်ႈဢၼ်ၸဝ်ႈႁဝ်းထႃႇဝရႃႉၽြႃး ထၢင်ႇသႃးပေႃႇမႃးၼႃႈတေႃႇၼႃႈၵၼ်တင်းၶဝ်၊ လွင်ႈဢၼ်မွၵ်ႇၵုမ်ႈၸဝ်ႈႁဝ်းတႄႇယူႇၵႃႈၼိူဝ်ၶဝ်၊ လွင်ႈဢၼ်ၸဝ်ႈႁဝ်းယူႇၵႃႈၼႂ်းသဝ်မွၵ်ႇၵုမ်ႈၶိင်ႇၵၢင်ဝၼ်း ၵႃႈၼႂ်းသဝ်ၽႆးၶိင်ႇၵၢင်ၶိုၼ်းသေလႄႈ ဢွၼ်ႁူဝ်ၶဝ်ၵႂႃႇၼၼ်ႉတီႈၶႃႈယဝ်ႉ။- 15မိူဝ်ႈလဵဝ်ၼႆႉ ပေႃးၸဝ်ႈႁဝ်းမၢတ်ႈၵူၼ်းမဵဝ်းၼႆႉ ပဵၼ်ၸိူဝ်ႉၼင်ႇၵူၼ်းၵေႃႉလဵဝ်သေလႄႈ ဢဝ်တၢႆပႅတ်ႈသေၸိုင်၊ ၵူၼ်းၵူႈၸိူဝ်ႉၵူႈမဵဝ်း ဢၼ်ယၢမ်ႈလႆႈငိၼ်းသတၢင်းသဵင်ၶၢဝ်ႇၸဝ်ႈႁဝ်းၸိူဝ်းၼၼ်ႉ တၵ်းဢွၼ်ၵၼ်လၢတ်ႈလႄႈဝႃႈ၊- 16ထႃႇဝရႃႉၽြႃးၼၼ်ႉ၊ ၵွပ်ႈပိူဝ်ႈဢၼ်ဢမ်ႇတၢတ်ႈၼိူင်ႇႁႂ်ႈလႆႈ ဢဝ်ၶဝ်သူင်ႇႁွတ်ႈၵႃႈတီႈမိူင်း ဢၼ်မၼ်းၸဝ်ႈတိူင်ႇဝႃႈတၵ်းပၼ်ၼၼ်ႉလႄႈ၊ မၼ်းၸဝ်ႈဢဝ်ၶဝ်တၢႆပႅတ်ႈသေ ၵႃႈတီႈၼႂ်းထိူၼ်ႇယဝ်ႉ၊ ဝႃႈၼင်ႇၼႆတီႈၶႃႈဢေႃႈ။- 17ႁႂ်ႈတၼ်းၶူဝ်းၸဝ်ႈၽြႃးႁဝ်းၶႃႈယႂ်ႇမႅၼ်ႈၸွမ်းၵႃႈၼင်ႇဢၼ်ၸဝ်ႈႁဝ်းလၢတ်ႈလႄႈဝႃႈ၊- 18ထႃႇဝရႃႉၽြႃး ပဵၼ်ၽြႃးပဵၼ်ၸဝ်ႈ ဢၼ်ပျေႉၸုမ်ႇတင်း သၽေႃးဢၼ်ၸႂ်ယႂ်ႇၸႂ်ယၢဝ်း၊ ဢၼ်လိူင်ႇတဵမ်ဝႆႉတင်း တၢင်းဢၼ်ဢဵတ်းလူ ဢၼ်ပွႆႇလွတ်ႈတၢင်းဢၼ် ၵမ်ၵျၢင်ႉဢႃႉထမ်ႇမႃႉ ဢိၵ်ႇတင်းတၢင်းဢၼ်ပူၼ်ႉလိူဝ်တြႃးၸဝ်ႈသေလႄႈ၊ ဢမ်ႇပွႆႇဢမ်ႇလွတ်ႈလၢႆလၢႆလွၵ်ႇလွၵ်ႇ၊ ဢၼ်ၸီႇယၢင်ႇတႅၼ်းပၼ်ဢပႅတ်ႈပေႃႈ တီႈလုၵ်ႈလၢင်းတင်းလၢႆ တေႃႇထိုင်ႁွတ်ႈၸူဝ်ႈလုၵ်ႈပၢၼ်လၢၼ်သိုပ်ႇတႃႉတီႉယႃႉ၊ သိုပ်ႇၸတုၵ်ႉထႃႉၼၼ်ႉဢေႃႈ၊ ဝႃႈၼင်ႇၼႆၼၼ်ႉသေၵမ်းလူၺ်ႈတီႈၶႃႈ၊- 19ၶႅၼ်းတေႃႈပွႆႇလွတ်ႈဢပႅတ်ႈၵူၼ်းမဵဝ်းၼႆႉ ၸွမ်းၵႃႈၼင်ႇဢၼ်ၵရူႉၼႃႇၸဝ်ႈႁဝ်းယႂ်ႇၼမ်ၼႃႇလူင်လၢင်ၼၼ်ႉ၊ ဢိၵ်ႇတင်းၸွမ်းၵႃႈၼင်ႇဢၼ်ၸဝ်ႈႁဝ်းပွႆႇလွတ်ႈဢပႅတ်ႈၵူၼ်းမဵဝ်းၼႆႉ ၸႃႉၸဵမ်ဝၼ်းဢၼ်ဢွၵ်ႇသေၵႃႈၼႂ်းမိူင်းဢေႇၵိပ်ႉတူႉမႃးၼၼ်ႉ တေႃႇထိုင်ႁွတ်ႈမိူဝ်ႈလဵဝ်ၼႆႉၼၼ်ႉသေၵမ်းတီႈၶႃႈ၊ ၵဝ်ၶႃႈတွင်းပၢၼ်ႇတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊- 20ထႃႇဝရႃႉၽြႃးလၢတ်ႈလႄႈဝႃႈ၊ ၵဝ်ပွႆႇလွတ်ႈၸွမ်းၵႃႈၼင်ႇဢၼ် မႂ်းတွင်းပၢၼ်ႇၼၼ်ႉဢေႃႈ။- 21ၵႃႈၼင်ႇဢၼ် ၵဝ်ဢသၢၵ်ႈလိပ်းယူႇလႄႈ မုၼ်ၽုင်းထႃႇဝရႃႉၽြႃးတၵ်းၸွတ်ႇတူဝ်ႈၵႃႈၼိူဝ်လိၼ်မိူင်းတင်းသဵင်ႈတင်းမူတ်းၼၼ်ႉ၊- 22ၵူၼ်းၵႃႈဢၼ် လႆႈႁၼ်မုၼ်ၽုင်းၵဝ် ဢိၵ်ႇတင်းၼီႉမိၵ်ႈလၢၵ်ႈၶၼႃႇ ဢၼ်ၵဝ်ၼႄပျႃးၵႃႈၼႂ်းမိူင်းဢေႇၵိပ်ႉတူႉ ဢိၵ်ႇတင်းထိူၼ်ႇၼႆႉ ၸိူဝ်းၼၼ်ႉယူႇလႄႈ၊ ဢမ်ႇထွမ်ႇဢဝ်ၵႂၢမ်းၵဝ်၊ ၸၢမ်းတူၺ်းၵဝ်တေႃႇထိုင်ႁွတ်ႈသိပ်းပွၵ်ႈၼၼ်ႉ၊- 23ဢမ်ႇလႆႈႁၼ်မိူင်းဢၼ်ၵဝ်တိူင်ႇဝႃႈ တီႈပူႇမွၼ်ႇၶဝ်ၼၼ်ႉဢမၢၼ်ႇၶၼ်ပဵၼ်ဢေႃႈ။ ၵေႃႉဢၼ်ႁဵတ်းဢမ်ႇရူဝ်ႇသေႇၵူဝ်ယမ်ၵဝ်ၼၼ်ႉ ဢမ်ႇလႆႈႁၼ်သေၵေႃႉသေၵူၼ်း။- 24ၶႃႈၵဝ်ၵႃႇလႅပ်ႉၸမ်ႉ၊ ၵွပ်ႈပိူဝ်ႈဢၼ်မီးသၽေႃးဢၼ်လၢၵ်ႇပိူင်ႈလႄႈ ၸွမ်းလင်ၵဝ်လုမ်းလုမ်းၼၼ်ႉလႄႈ ၵဝ်တၵ်းဢဝ်မၼ်းသူင်ႇႁွတ်ႈ ၵႃႈၼႂ်းမိူင်းဢၼ်မၼ်းၵႂႃႇယဝ်ႉၼၼ်ႉလႄႈ ၸိူဝ်ႉၶိူဝ်းမၼ်းတၵ်းလႆႈပိူင်ႇဢေႃႈ။- 25ၵွပ်ႈပိူဝ်ႈဢၼ် ၵူၼ်းမဵဝ်းဢႃႇမလႅၵ်ႉ ဢိၵ်ႇတင်းၵူၼ်းမဵဝ်းၶႃႇၼၢၼ်ႇတင်းလၢႆ ယူႇၵႃႈၼႂ်းပၢင်ႇၼႂ်းႁူၺ်ႈလႄႈ၊ ဝၼ်းမိူဝ်ႈၽုၵ်ႈ သူဝၢႆႇၶိုၼ်းၵႂႃႇလႄႈ ၸွမ်းသဵၼ်ႈတၢင်းပၢင်ႇလၢႆႇ ဢေႇတုမ်ႇၵႂႃႇၸူးၵႃႈတီႈထိူၼ်ႇသေတႃႉ၊ ဝႃႈၼင်ႇၼႆဢေႃႈ။

26ထႃႇဝရႃႉၽြႃးသမ်ႉလၢတ်ႈတီႈမူဝ်းသေႇ တင်းဢႃႇရုၼ်ႇလႄႈဝႃႈ၊- 27ၵဝ်တၵ်းလႆႈယိူၼ်ႉၶၢမ်ႇပရဵၵ်ႈသၢတ်ႈဢၼ်ႁုၵ်းဢၼ်ႁၢႆႉ ဢၼ်တၢင်ႇဢပႅတ်ႈပွင်ႉၶၢင်းပွင်ႉမိူၼ်ႇတီႈၵဝ်ၸိူဝ်းၼႆႉယူႇၶိင်ႇၵႃႇလႃႉႁိုင်ၵႃႈႁိုဝ်။ ၵဝ်လႆႈငိၼ်းၵႂၢမ်းဢၼ် ၵူၼ်းမဵဝ်းဢီႉသရေႇလႃႉတင်းလၢႆ တၢင်ႇဢပႅတ်ႈပွင်ႉၶၢင်းပွင်ႉမိူၼ်ႇဢၼ်ၶဝ်တၢင်ႇဢပႅတ်ႈပွင်ႉၶၢင်းပွင်ႉမိူၼ်ႇတီႈၵဝ်ၼၼ်ႉယဝ်ႉ။- 28မႂ်းသင်ႇလၢတ်ႈတီႈၶဝ်လႄႈဝႃႈ၊ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ၵႃႈၼင်ႇဢၼ် ၵဝ်ဢသၢၵ်ႈလိပ်းယူႇၼၼ်ႉ၊ ၵဝ်တၵ်းႁဵတ်းတီႈသူၸွမ်းၵႃႈၼင်ႇၵႂၢမ်းဢၼ်သူလၢတ်ႈထိုင်ႁူၵဝ်ၼၼ်ႉဢေႃႈ။- 29တူဝ်တၢႆသူတၵ်းတူၵ်းတီႈၵိုတ်းဝႆႉ ၵႃႈၼႂ်းထိူၼ်ႇၼႆႉဢေႃႈ။ သူၵႃႈဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇၸွမ်းလူၺ်ႈ တၢင်းဢၼ်ၼပ်ႉဢၢၼ်ႇတင်းသဵင်ႈတင်းလူင်ၼၼ်ႉလႄႈ၊ ဢသၢၵ်ႈလႆႈသၢဝ်းၼိုင်ႈလႄႈ ဢသၢၵ်ႈလိူဝ်သၢဝ်းၵႂႃႇ၊ ဢၼ်လႆႈတၢင်ႇဢပႅတ်ႈပွင်ႉၶၢင်းပွင်ႉမိူၼ်ႇတီႈၵဝ်ယဝ်ႉၸိူဝ်းၼၼ်ႉ၊- 30တၵ်းဢမ်ႇလႆႈႁွတ်ႈထိုင်ၵႃႈတီႈမိူင်းဢၼ်ၵဝ်တိူင်ႇလႄႈဝႃႈ တၵ်းၶျႃးတီႈယူႇသူပၼ် ၵႃႈၼႂ်းမိူင်းၼၼ်ႉဢေႃႈ၊ ဝႃႈၼင်ႇၼႆၼၼ်ႉ လိူဝ်သေၵႃႇလႅပ်ႉလုၵ်ႈၸၢႆးယေႇၽုၼ်ႇၼႃႉ ဢိၵ်ႇတင်းယေႃးသူႉ လုၵ်ႈၸၢႆးၼုၼ်ႇၼၼ်ႉဢေႃႈ။- 31ၵဝ်တၵ်းဢဝ်လုၵ်ႈဢွၼ်ႇလၢင်းဢွၼ်ႇသူ ဢၼ်သူဝႃႈတၵ်းပဵၼ်တီႈဢၼ်ပိူၼ်ႈတီႉဢဝ်သိမ်းဢဝ်၊ ဝႃႈၼင်ႇၼႆၼၼ်ႉၸိူဝ်းၼၼ်ႉ သူင်ႇႁွတ်ႈလႄႈ၊ ၶဝ်ၼၼ်ႉတၵ်းလႆႈႁူႉမိူင်းဢၼ်သူပႄႇပႅတ်ႈၼၼ်ႉဢေႃႈ။- 32သူၸမ်ႉ၊ တူဝ်တၢႆသူတၵ်းတူၵ်းတီႈၵိုတ်းဝႆႉ ၵႃႈၼႂ်းထိူၼ်ႇၼႆႉဢေႃႈ။- 33လုၵ်ႈလၢၼ်သူ တၵ်းလႆႈလႄႇၵႂႃႇလႄႇမႃးယူႇၵႃႈၼႂ်းထိူၼ်ႇၼႆႉ သီႇသိပ်းပီႊတဵမ်တဵမ်လႄႈ ႁၢပ်ႇဢပႅတ်ႈတၢင်းဢၼ်သူၽိတ်းပိူင်ႈၸိူဝ်းၼၼ်ႉၵႂႃႇ တေႃႇထိုင်ႁွတ်ႈတူဝ်တၢႆသူတင်းလၢႆ လူႉလႅဝ်ႁၢႆလၢႆၵႂႃႇၵႃႈၼႂ်းထိူၼ်ႇၼႆႉဢေႃႈ။- 34ၸွမ်းၼင်ႇမိုဝ်ႉဝၼ်းတင်းလၢႆ ဢၼ်သူၵႂႃႇလွမ်တူၺ်းမိူင်းၼၼ်ႉ ဢၼ်ဝႃႈသီႇသိပ်းဝၼ်းၼၼ်ႉသေလႄႈ၊ ယေႈဝၼ်းဝႆႉယေႈပီႊလႄႈ သူတၵ်းလႆႈႁၢပ်ႇဢပႅတ်ႈသူၵႂႃႇ သီႇသိပ်းပီႊတဵမ်တဵမ်ယူႇသေလႄႈ ႁူႉတၢင်းဢၼ်ၵဝ်ၸုၼ်ႉပႅတ်ႈၼၼ်ႉဢေႃႈ။- 35ၵဝ်ထႃႇဝရႃႉၽြႃး မီးဢမိင်ႉဝႆႉယဝ်ႉ။ ၵဝ်တၵ်းႁဵတ်းတီႈပရဵၵ်ႈသၢတ်ႈဢၼ်ႁုၵ်းဢၼ်ႁၢႆႉ ဢၼ်ၸူႉၵၼ်တုမ်ၵၼ်ယူႇၽၢႆႇၼိုင်ႈတင်းၵဝ် တင်းသဵင်ႈတင်းလူင်ၼႆႉ ၸိူဝ်ႉၼင်ႇၼၼ်ဢမၢၼ်ႇၶၼ်ပဵၼ်လႄႈ၊ ၶဝ်တၵ်းလႆႈလူႉလႅဝ်ႁၢႆလၢႆၵႂႃႇ ၵႃႈၼႂ်းထိူၼ်ႇၼႆႉလႄႈ တၢႆၵႃႈတီႈၼႆႈဢေႃႈ၊ ဝႃႈၼင်ႇၼႆဢေႃႈ။

36ၶဝ်ၸိူဝ်းဢၼ် မူဝ်းသေႇပွႆႇၸႂ်ႉၵႂႃႇလွမ်တူၺ်းမိူင်းၼၼ်ႉလႄႈ ၶိုၼ်းမႃးသေယဝ်ႉ၊ ႁႂ်ႈပရဵၵ်ႈသၢတ်ႈတင်းသဵင်ႈတင်းလူင် တၢင်ႇဢပႅတ်ႈပွင်ႉၶၢင်းပွင်ႉမိူၼ်ႇတီႈမၼ်း ၵွပ်ႈပိူဝ်ႈဢၼ်သႄႉသွမ်းမိူင်းၼၼ်ႉ၊- 37ဢၼ်ဝႃႈၶဝ်ၸိူဝ်းဢၼ်မွၵ်ႇလၢတ်ႈသတၢင်းသဵင်ၶၢဝ်ႇ ဢၼ်ဢမ်ႇလီလူၺ်ႈလွင်ႈမိူင်းၼၼ်ႉၸိူဝ်းၼၼ်ႉ တၢႆလူၺ်ႈၽေးၵႃႇလႃႉ ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။- 38ၼႂ်းၵူၼ်းဢၼ်ၵႂႃႇလႄႈလွမ်တူၺ်းမိူင်းၼၼ်ႉၸိူဝ်းၼၼ်ႉ၊ ယေႃးသူႉ လုၵ်ႈၸၢႆးၼုၼ်ႇဢိၵ်ႇတင်းၵႃႇလႅပ်ႉ လုၵ်ႈၸၢႆး ယေႇၽုၼ်ႇၼႃႉၵူၺ်း လႆႈၵတ်းယဵၼ်ၶျၢမ်းသႃႇဢေႃႈ။

39 မူဝ်းသေႇဢဝ်ၵႂၢမ်းၸဝ်ႈၼႆႉသင်ႇလၢတ်ႈဝႆႉတီႈၵူၼ်းမဵဝ်းဢီႉသရေႇလႃႉ တင်းသဵင်ႈတင်းလူင်လႄႈ ၵူၼ်းၸိူဝ်းၼၼ်ႉ ဢွၼ်ၵၼ်ၶၢင်းၶီၶၢင်းၽၢၼ်ၼႃႇလူင်လၢင်လႄႈ ယူႇဢေႃႈ။

40ၶဝ်ဢွၼ်ၵၼ်လုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ ၶိုၼ်ႈၵႃႈၼိူဝ်ပၢႆလွႆသေယဝ်ႉ၊ လၢတ်ႈလႄႈဝႃႈ၊ ယေႃ၊ ၵမ်းၼႆႉ ႁဝ်းၶႃႈတၵ်းၶိုၼ်ႈၸူးၵႃႈတီႈ မိူင်းဢၼ်ထႃႇဝရႃႉၽြႃးဝႆႉၵတီႉၼၼ်ႉၶႃႈဢေႃႈ။ လွင်ႈမၼ်းၸမ်ႉ ႁဝ်းၽိတ်းပိူင်ႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊- 41မူဝ်းသေႇၵေႃႈ လၢတ်ႈလႄႈဝႃႈ၊ ႁဵတ်းႁိုဝ်လႄႈသူပူၼ်ႉလိူဝ်ဢမိင်ႉထႃႇဝရႃႉၽြႃးၼင်ႇႁိုဝ်။ တၢင်းၵျၢမ်ႇတၢင်းပွင်သူဢမ်ႇပဵၼ်လႆႈ။- 42ယႃႇပေၶိုၼ်ႈသေၵမ်း၊ ထႃႇဝရႃႉၽြႃးဢမ်ႇမီးၵႃႈၼႂ်းသူ။ ပေႃးသူၵႂႃႇၸိုင် သူတၵ်းလႆႈတူၵ်းသုမ်းၵႃႈတီႈ ၽၢႆႇၼႃႈရၢၼ်ႇသူႇသူဢေႃႈ။- 43လွင်ႈမၼ်းၸမ်ႉ ၵူၼ်းမဵဝ်းဢႃႇမလႅၵ်ႉ ဢိၵ်ႇတင်း ၵူၼ်းမဵဝ်းၶႃႇၼၢၼ်ႇတင်းလၢႆ ႁွတ်ႈထိုင်မီးဝႆႉထႃႈသူယူႇၵႃႈတီႈၼၼ်ႈလႄႈ၊ သူတၵ်းတူၵ်းသုမ်းလူၺ်ႈလၢပ်ႇလူၺ်ႈလႅဝ်းဢေႃႈ။ ပိူဝ်ႈဢၼ်သူဝႄႈပိူင်ႈသေၵႃႈတီႈထႃႇဝရႃႉၽြႃးလႄႈ၊ ထႃႇဝရႃႉၽြႃး၊ ဢမ်ႇယူႇလူၺ်ႈၵၼ်တင်းသူယဝ်ႉ၊ ပိၵ်ႉသမ်ႉဝႃႈၼင်ႇၼႆသေၵေႃႈ၊- 44ၶဝ်ၼၼ်ႉ မီးၸႂ်ဢၼ်ၵႅၼ်ႇၶႅင်လႄႈ သမ်ႉဢွၼ်ၵၼ်ၶိုၼ်ႈၵႃႈတီႈၼိူဝ်ပၢႆလွႆဢေႃႈ။ ၵူၺ်းၵႃႈ တိူၵ်ႈပတီႉၺိၺ်ႇထႃႇဝရႃႉၽြႃး ဢိၵ်ႇတင်းမူဝ်းသေႇ ယင်းဢမ်ႇဢွၵ်ႇဢမ်ႇၵႂႃႇ ၵႃႈတီႈၼွၵ်ႈတပ်ႉလႄႈယူႇဢေႃႈ။- 45မိူဝ်ႈၼၼ်ႉ ၵူၼ်းမဵဝ်းဢႃႇမလႅၵ်ႉ ဢိၵ်ႇတင်း ၵူၼ်းမဵဝ်းၶႃႇၼၼီႉ ဢၼ်မီးဝႆႉထႃႈၵႃႈၼိူဝ်လွႆၼၼ်ႉၸိူဝ်းၼၼ်ႉ ဢွၼ်ၵၼ်လူင်းမႃးလႄႈတိုၵ်းတေႃးပႄႉၼႅင်ႇၵူၼ်းမဵဝ်းဢီႉသရေႇလႃႉတင်းလၢႆသေယဝ်ႉ၊ လိုပ်ႈၸွမ်းယႃႉပႅတ်ႈတေႃႇထိုင်ႁွတ်ႈ ဝဵင်းႁေႃႇမႃႇဢေႃႈ။

Popular Bible Verses from
ၼႂ်းထိူၼ်ႇ 14

Bible:

Shan

Version: သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး - CBMS