ၼႂ်းထိူၼ်ႇ 18

1ထႃႇဝရႃႉၽြႃးသမ်ႉမီးဢမိင်ႉတီႈဢႃႇရုၼ်ႇလႄႈဝႃႈ၊ မႂ်းဢိၵ်ႇတင်းလုၵ်ႈၸၢႆးမႂ်းတင်းလၢႆ တင်းမဵဝ်းၸိူဝ်ႉၶိူဝ်းပူႇပေႃႈမႂ်းၸိူဝ်းၼၼ်ႉ တၵ်းလႆႈႁၢပ်ႇလႆႈပႃးဢပႅတ်ႈဢၼ်ၸၢပ်ႈသႅင်ႇၵၼ်တင်း ထႃႇၼႃႉတီႈမူတ်းၸၢင်ႇၸဝ်ႈဢေႃႈ။ မႂ်းဢိၵ်ႇတင်းလုၵ်ႈၸၢႆးမႂ်းတင်းလၢႆၼၼ်ႉ တၵ်းလႆႈႁၢပ်ႇလႆႈပႃးဢပႅတ်ႈဢၼ်ၸၢပ်ႈသႅင်ႇၵၼ်တင်းဢရႃႇယိတ်ႈပရေႃးႁဵၵ်ႈသူဢေႃႈ။- 2ပီႈၼွင်ႉမႂ်းၵူၼ်းမဵဝ်းလေႇဝီႉ မဵဝ်းၸိူဝ်ႉၶိူဝ်းပေႃႈမႂ်းၸိူဝ်းၼၼ်ႉ ႁွင်ႉဢဝ်မႃးလူၺ်ႈၵၼ်တင်းမႂ်း ႁႂ်ႈၶဝ်လႆႈၸပ်းၸွမ်းလူၺ်ႈၵၼ်တင်းမႂ်းသေလႄႈ ပွင်ႁဵတ်းဢမူႉၸဝ်ႈတီႈမႂ်းတႃႉ။ ၼႂ်းဝႃႈၼၼ်သေၵေႃႈ မႂ်းဢိၵ်ႇတင်းလုၵ်ႈၸၢႆးမႂ်းၸိူဝ်းၼၼ်ႉ တၵ်းလႆႈမီးယူႇၵႃႈတီႈၽၢႆႇၼႃႈမူဝ်းၵႃႇၶိူင်ႈၶၢမ်ႇသၢၵ်ႈသေႇၸဝ်ႈဢေႃႈ။- 3ၶဝ်ၼၼ်ႉ တၵ်းလႆႈဢွၼ်ၵၼ်ႁဵတ်းတၢင်းဢၼ်လူတူၺ်းလုမ်းလႃးမႂ်းဢိၵ်ႇတင်းတၢင်းဢၼ်လူတူၺ်းလုမ်းလႃးမူဝ်းၵႃႇၸဝ်ႈၵႃႈမီးဢေႃႈ။ ၵူၺ်းၵႃႈ လွင်ႈၼင်ႇႁိုဝ် တၵ်းၵၢင်းလွတ်ႈတင်းၽေးတၢႆၸိုင် ၶဝ်ဢိၵ်ႇတင်းသူ ဢမ်ႇလႆႈသုတ်ႉၸပ်းသုတ်ႉၸူးၵႃႈတီႈၶိူင်ႈပိူင်ထႃႇၼႃႉတီႈမူတ်းၸၢင်ႇၸဝ်ႈ ဢိၵ်ႇတင်းၶိူင်ႈပိူင်ယိတ်ႈပလၢင်ႇတင်းလၢႆ။- 4ၶဝ်ၼၼ်ႉ တၵ်းလႆႈၸပ်းၸွမ်းလူၺ်ႈၵၼ်တင်းမႂ်းလႄႈ ႁဵတ်းတၢင်းဢၼ်လူတူၺ်းလုမ်းလႃးမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈလႄႈ ၵိုတ်ႉႁၢပ်ႇဢမူႉမူဝ်းၵႃႇၸဝ်ႈၵႃႈမီးဢေႃႈ။ ၵေႃႉဢၼ်ဢမ်ႇၸၢပ်ႈဢမ်ႇသႅင်ႇၼၼ်ႉ ဢမ်ႇလႆႈသုတ်ႉၸပ်းသုတ်ႉၸူးၵႃႈတီႈသူ။- 5ၵမ်းလိုၼ်းလွင်ႈၼင်ႇႁိုဝ် တၢင်းၸႂ်မႆႈၶႆႈၸႃႉၸဝ်ႈတၵ်းဢမ်ႇဢွၵ်ႇလႄႈ ႁွတ်ႈထိုင်ၵႃႈၼိူဝ်ၵူၼ်းမဵဝ်းဢီႉသရေႇလႃႉတင်းလၢႆၸိုင်၊ သူတၵ်းလႆႈႁဵတ်းတၢင်းဢၼ် လူတူၺ်းလုမ်းလႃးထႃႇၼႃႉတီႈမူတ်းၸၢင်ႇၸဝ်ႈ ဢိၵ်ႇတင်းတၢင်းဢၼ်လူတူၺ်းလုမ်းလႃးယိတ်ႈပလၢင်ႇဢေႃႈ။- 6ၼင်ႇၼၼ်လႄႈ ၵဝ်တူဝ်ၸဝ်ႈၵဝ်ႇ ၼုၵ်ႈဢဝ်ပီႈၼွင်ႉသူၵူၼ်းမဵဝ်းလေႇဝီႉ ၵႃႈၼႂ်းၵူၼ်းမဵဝ်းဢီႉသရေႇလႃႉတင်းလၢႆလႄႈ၊ ၶဝ်ၼၼ်ႉပဵၼ်ၸိူဝ်ႉၼင်ႇၶိူင်ႈပုၵ်ႈၸေႃႇ ဢၼ်ႁဵတ်းတီႈထႃႇဝရႃႉၽြႃးၼၼ်ႉတီႈသူ ႁႂ်ႈၶဝ်လႆႈၵိုတ်ႉႁၢပ်ႇဢမူႉမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈဢေႃႈ။- 7ပိူဝ်ႈၼႆလႄႈ မႂ်းဢိၵ်ႇတင်းလုၵ်ႈၸၢႆးမႂ်းတင်းလၢႆ တၵ်းလႆႈႁဵတ်းယိတ်ႈပရေႃးႁဵၵ်ႈၵႃႈတီႈလွင်ႈတၢင်းဢၼ်ၸၢပ်ႈသႅင်ႇၵၼ်တင်း ယိတ်ႈပလၢင်ႇ တင်းဢမူႉဢၼ်လီပွင်ႁဵတ်းၵႃႈတီႈၼႂ်းၽႃႈၵင်ႈၵႃႈမီးၼၼ်ႉလႄႈ ပွင်ႁဵတ်းဢမူႉဢေႃႈ။ ၵဝ်ပၼ်ဢရႃႇယိတ်ႈပရေႃးႁဵၵ်ႈတီႈသူၸိူဝ်ႉၼင်ႇတၢင်းဢၼ် ၵိုတ်ႉႁၢပ်ႇဢမူႉဢၼ်ၵဝ်ႁဵတ်းၵျေးၸူးလႄႈပၼ်ၼၼ်ႉယဝ်ႉ။ ၵေႃႉဢၼ်ဢမ်ႇၸၢပ်ႈသႅင်ႇလႄႈ သုတ်ႉၸပ်းသုတ်ႉၸူးၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ၊ ဝႃႈၼင်ႇၼႆဢေႃႈ။

8ထႃႇဝရႃႉၽြႃးသမ်ႉမီးဢမိင်ႉတီႈဢႃႇရုၼ်ႇလႄႈဝႃႈ၊ ၵဝ်တူဝ်ၸဝ်ႈၵဝ်ႇ ဢဝ်ၶိူင်ႈပုၵ်ႈၸေႃႇဢၼ်ယုၵ်ႉယွင်ႈတီႈၵဝ် ၵႃႈၼႂ်းၶိူင်ႈပုၵ်ႈၸေႃႇဢၼ်ၵူၼ်းမဵဝ်းဢီႉသရေႇလႃႉတင်းလၢႆ ႁႂ်ႈမူတ်းၸၢင်ႇလႄႈ သၢၵ်ႈၵၢပ်ႈၵႃႈမီးၼၼ်ႉ ဢၢပ်ႈပၼ်တီႈမႂ်းဢေႃႈ။ ၵဝ်ဢဝ်ထုင်းၽိင်ႈတြႃးဢၢပ်ႈပၼ်တီႈမႂ်း ႁႂ်ႈပဵၼ်ပုၼ်ႈမႂ်းဢိၵ်ႇတင်းလုၵ်ႈၸၢႆးမႂ်းၸိူဝ်းၼၼ်ႉဢေႃႈ။- 9ၵႃႈၼႂ်းၶိူင်ႈပိူင်ဢၼ်ယင်းဢမ်ႇႁွတ်ႈထိုင်ၵႃႈၼႂ်းၽႆးလႄႈ မူတ်းၸၢင်ႇၸိူဝ်းၼၼ်ႉ၊ ၶိူင်ႈပိူင်ဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉၸမ်ႉ၊ ၵႃႈဢၼ်ၶဝ်သၢၵ်ႈၵၢပ်ႈၼၼ်ႉ ဢၼ်ဝႃႈၶိူင်ႈပုၵ်ႈၸေႃႇၽေႃးၸဵၼ်ႇၶဝ်ၵႃႈမီး၊ ယိတ်ႈဢၼ်ၽေႇဢပႅတ်ႈၶဝ်ၵႃႈမီး၊ ယိတ်ႈဢၼ်ၽေႇတူႉၸရိူၵ်ႈၶဝ်ၵႃႈမီး၊ ၵႃႈဢၼ်ၶဝ်ပုၵ်ႈၸေႃႇတီႈၵဝ်ၸိူဝ်းၼၼ်ႉ တၵ်းလႆႈမူတ်းၸၢင်ႇပုၼ်ႈမႂ်း ဢိၵ်ႇတင်းလုၵ်ႈၸၢႆးမႂ်းတင်းလၢႆဢေႃႈ။- 10တၵ်းလႆႈၵိၼ်ၵႃႈၼႂ်းထႃႇၼႃႉတီႈမူတ်းၸၢင်ႇဢေႃႈ။ ၵူၼ်းၸၢႆးမီးဢၶႂၢင်ႉဢၼ်လႆႈၵိၼ်ၵူႈၵေႃႉဢေႃႈ။ ပဵၼ်ဢၼ်မူတ်းၸၢင်ႇပုၼ်ႈမႂ်းဢေႃႈ။- 11လႆႈသမ်ႉ ၶိူင်ႈပိူင်ဢၼ်ၸၢပ်ႈသႅင်ႇၵၼ်တင်းမႂ်းၸမ်ႉ၊ ပဵၼ်ၶိူင်ႈပုၵ်ႈၸေႃႇဢၼ်ယုၵ်ႉယွင်ႈ ဢၼ်ဝႃႈ ၶိူင်ႈပုၵ်ႈၸေႃႇဢၼ်ယွင်ႈၵႂႆ ဢၼ်ၵူၼ်းမဵဝ်းဢီႉသရေႇလႃႉပုၵ်ႈၸေႃႇၼၼ်ႉဢေႃႈ။ ၵဝ်ဢဝ်တင်းထုင်းၽိင်ႈထႃႇဝရႃႉပၼ်တီႈမႂ်း ဢိၵ်ႇတင်းလုၵ်ႈၸၢႆးလုၵ်ႈယိင်းမႂ်းတင်းလၢႆဢေႃႈ။ ၵေႃႉဢၼ်မူတ်းသႂ်ၵႃႈတီႈႁိူၼ်းမႂ်းၵႃႈမီးၸိူဝ်းၼၼ်ႉ မီးဢၶႂၢင်ႉဢၼ်လႆႈၵိၼ်ဢေႃႈ။- 12ၼမ်ႉမၼ်းဢၼ်လီသေပိူၼ်ႈ၊ ၼမ်ႉၸပိတ်ႈဢၼ်လီသေပိူၼ်ႈ၊ ၶဝ်ႈၵျုင်ႇဢၼ်လီသေပိူၼ်ႈ၊ ၵႃႈဢၼ်ပဵၼ်မႃးဢွၼ်တၢင်းလႄႈ ၶဝ်ပုၵ်ႈၸေႃႇတီႈထႃႇဝရႃႉၽြႃးၼၼ်ႉၸိုင်၊ ၵဝ်ဢဝ်ပၼ်တီႈမႂ်းယဝ်ႉ။- 13မၢၵ်ႇဢၼ်မၢၵ်ႇဢွၼ်တၢင်း ၵႃႈဢၼ်ၶဝ်ဢဝ်မႃးတီႈထႃႇဝရႃႉၽြႃးၼၼ်ႉၵေႃႈ မႂ်းတၵ်းလႆႈပိူင်ႇဢေႃႈ။ ၵေႃႉဢၼ်မူတ်းသႂ်ၵႃႈတီႈႁိူၼ်းမႂ်းၵႃႈမီးၸိူဝ်းၼၼ်ႉ မီးဢၶႂၢင်ႉဢၼ်လႆႈၵိၼ်ဢေႃႈ။- 14ၵႃႈၼႂ်းၵူၼ်းမဵဝ်းဢီႉသရေႇလႃႉတင်းလၢႆ ၵႃႈဢၼ်ၵိၼ်ႇဝႃႈလႄႈ ပုၵ်ႈၸေႃႇၼၼ်ႉၵေႃႈ မႂ်းတၵ်းလႆႈပိူင်ႇဢေႃႈ။- 15လုၵ်ႈၸၢႆးတူၼ်ႈဢၼ်ၵိူတ်ႇလဵင်ႉမႃးဢွၼ်တၢင်း၊ ပဵၼ်ၵူၼ်းသေဢမ်ႇဝႃႈ၊ ပဵၼ်တရိၵ်ႈသၢၼ်ႇသေဢမ်ႇဝႃႈ၊ ၵႃႈဢၼ်မီးၼိူဝ်ႉမီးလိူတ်ႈ ဢၼ်ၶဝ်ဢဝ်မႃးတီႈထႃႇဝရႃႉၽြႃးၸိူဝ်းၼၼ်ႉၵေႃႈ မႂ်းတၵ်းလႆႈပိူင်ႇဢေႃႈ။ ၼႂ်းဝႃႈၼၼ်သေၵေႃႈ လုၵ်ႈၸၢႆးတူၼ်ႈၵူၼ်းၸိုင် မႂ်းတၵ်းလႆႈထုတ်ႇဢဝ်ဢမၢၼ်ႇၶၼ်ပဵၼ်ဢေႃႈ။ လုၵ်ႈၸၢႆးတူၼ်ႈတရိၵ်ႈသၢၼ်ႇဢၼ်ဢမ်ႇမူတ်းသႂ်ၼၼ်ႉၵေႃႈ မႂ်းတၵ်းလႆႈထုတ်ႇဢဝ်ဢေႃႈ။- 16လုၵ်ႈၸၢႆးတူၼ်ႈ ဢၼ်တၵ်းလႆႈထုတ်ႇဢဝ် ဢၼ်ဢသၢၵ်ႈလႆႈၸႃႉၸဵမ်လိူၼ်ၼိုင်ႈတင်းလၢႆၼၼ်ႉၸိုင် မႂ်းတၵ်းလႆႈဢဝ် ႁႃႈၵျၢပ်ႈထုတ်ႇဢဝ်ၵႃႈၼင်ႇဢၼ်မႂ်းပျၢတ်ႈၵႃႈမၼ်းၶၼ်မၼ်း ဢၼ်ၸွမ်းလူၺ်ႈၼမ်ႉၼၵ်းငိုၼ်းၸဝ်ႈၵျၢပ်ႈသၶေးလႃႉ ဢၼ်ပဵင်းၵၼ်တင်း ၵေးရႃႉသၢဝ်းၼိုင်ႈၼၼ်ႉဢေႃႈ။- 17လုၵ်ႈၸၢႆးတူၼ်ႈဝူဝ်း၊ လုၵ်ႈၸၢႆးတူၼ်ႈသူဝ်း၊ လုၵ်ႈၸၢႆးတူၼ်ႈပႄႉ တင်းလၢႆၸိုင် မႂ်းဢမ်ႇလႆႈထုတ်ႇဢဝ်၊ ပဵၼ်ဢၼ်မူတ်းၸၢင်ႇလႄႈ မႂ်းတၵ်းလႆႈဢဝ်လိူတ်ႈၶဝ်ၽႅတ်းသႂ်ႇၵႃႈၼိူဝ်ပလၢင်ႇဢေႃႈ။ ၵွၼ်ႈၶႆၵွၼ်ႈမၼ်းၶဝ်ၵေႃႈ မႂ်းတၵ်းလႆႈဢဝ်တင်းၽႆး ႁဵတ်းတၢင်း ပုၵ်ႈၸေႃႇ ႁႂ်ႈပဵၼ်ဢၢႆဢၼ်ႁွမ်ဢၼ်ႁူၺ်းပုၼ်ႈထႃႇဝရႃႉၽြႃးဢေႃႈ။- 18ၼိူဝ်ႉမၼ်းၸမ်ႉ၊ တၵ်းလႆႈပဵၼ်ပုၼ်ႈမႂ်း မိူၼ်ၸိူဝ်ႉၼင်ႇဢၼ် ႁူဝ်ဢူၵ်းၶိူင်ႈပုၵ်ႈၸေႃႇဢၼ်ယွင်ႈၵႂႆ တင်းၶႅပ်းၶႃၶွၼ်ၶႂႃၼၼ်ႉ ပဵၼ်ပုၼ်ႈမႂ်းၼၼ်ႉဢေႃႈ။- 19ၶိူင်ႈပုၵ်ႈၸေႃႇ ဢၼ်ယုၵ်ႉယွင်ႈၵႃႈဢၼ်မီးၵႃႈၼႂ်းၶိူင်ႈပိူင်ဢၼ်မူတ်းၸၢင်ႇ ဢၼ်ၵူၼ်းမဵဝ်းဢီႉသရေႇလႃႉတင်းလၢႆ ဢဝ်မႃးၵႃႈတီႈထႃႇဝရႃႉၽြႃးၸိူဝ်းၼၼ်ႉၸိုင် ၵဝ်ဢဝ်တင်းပိင်းၺၢပ်ႈထႃႇဝရႃႉ ဢၢပ်ႈပၼ်တီႈလုၵ်ႈၸၢႆးမႂ်း လုၵ်ႈယိင်းမႂ်းတင်းလၢႆယဝ်ႉ။ ပဵၼ်ပတီႉၺိၺ်ႇထႃႇဝရႃႉ ဢၼ်သဵၼ်ႈၽႃလူၺ်ႈၵၼ်တင်းၵိူဝ် ၵႃႈတီႈၽၢႆႇၼႃႈထႃႇဝရႃႉၽြႃးလႄႈ ၸၢပ်ႈသႅင်ႇၵၼ်တင်းမႂ်း ဢိၵ်ႇတင်းၸိူဝ်ႉၶိူဝ်းမႂ်းဢေႃႈ၊ ဝႃႈၼင်ႇၼႆဢေႃႈ။

20ထႃႇဝရႃႉၽြႃးသမ်ႉမီးဢမိင်ႉတီႈဢႃႇရုၼ်ႇလႄႈဝႃႈ၊ မႂ်းဢမ်ႇလႆႈမီးလိၼ်တီႈဢၼ် မႂ်းၶၢမ်ႇဢမူၺ်ႇၵႃႈၼႂ်းမိူင်းၶဝ်ၼၼ်ႉ။ မႂ်းဢမ်ႇလႆႈမီးပုၼ်ႈမီးတႃႇ ဢၼ်လေႃးလႄးလူၺ်ႈၵၼ်တင်းၶဝ်သေလႄႈပိူင်ႇၼၼ်ႉ။ ၵဝ်ၸမ်ႉ၊ ပဵၼ်ပုၼ်ႈပဵၼ်တႃႇ ဢၼ်မႂ်းပိူင်ႇ ဢိၵ်ႇတင်းဢမူၺ်ႇဢုၵ်ႉၸႃႇမႂ်းၵႃႈၼႂ်းၵူၼ်းမဵဝ်းဢီႉသရေႇလႃႉတင်းလၢႆဢေႃႈ။

21တီႈၵူၼ်းမဵဝ်းလေႇဝီႉတင်းလၢႆၵေႃႈ၊ ၵဝ်ဢဝ်ဢုၵ်ႉၸႃႇၵူၼ်းမဵဝ်းဢီႉသရေႇလႃႉတင်းလၢႆ သိပ်းပုၼ်ႈပုၼ်ႈၼိုင်ႈ ပၼ်ပုၼ်ႈဢၼ်ၶဝ်တၵ်းလႆႈၶၢမ်ႇဢမူၺ်ႇ ၵွပ်ႈပိူဝ်ႈတၢင်းဢၼ်ၶဝ်ပွင်ႁဵတ်းဢမူႉဢၼ်ၶဝ်ပွင်ႁဵတ်းဢၼ်ဝႃႈ တၢင်းဢၼ်ပွင်ႁဵတ်း ဢမူႉမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉဢေႃႈ။- 22ၸႃႉၸဵမ်မိူဝ်ႈလဵဝ်ၼႆႉၵႂႃႇလႄႈ လွင်ႈၼင်ႇႁိုဝ်ၵူၼ်းမဵဝ်းဢီႉသရေႇလႃႉတင်းလၢႆ တၵ်းဢမ်ႇလႆႈၶၢမ်ႇဢပႅတ်ႈတူဝ်ၸဝ်ႈၵဝ်ႇလႄႈ ထူပ်းၽေးတၢႆၸိုင်၊ ၶဝ်ဢမ်ႇလႆႈသုတ်ႉၸပ်းသုတ်ႉၸူးၵႃႈတီႈႁိမ်းၸမ် မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ။- 23ၵူၼ်းမဵဝ်းလေႇဝီႉတင်းလၢႆ တၵ်းလႆႈပွင်ႁဵတ်းဢမူႉ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈလႄႈ၊ တူဝ်ၸဝ်ႈၵဝ်ႇ တၵ်းလႆႈၶၢမ်ႇဢပႅတ်ႈတူဝ်ၸဝ်ႈၵဝ်ႇဢေႃႈ။ ၶဝ်ၼၼ်ႉဢမ်ႇလႆႈလေႃးလႄးလူၺ်ႈၵၼ်တင်းၵူၼ်းမဵဝ်းဢီႉသရေႇလႃႉတင်းလၢႆလႄႈၶၢမ်ႇဢမူၺ်ႇ၊ ဝႃႈၼင်ႇၼႆၼၼ်ႉ ပဵၼ်ပိင်းၺၢပ်ႈဢၼ်တႃႇသေႇ တီႈၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်းတၢမ်းဢေႃႈ။- 24ၵဝ်ဢဝ်ဢုၵ်ႉၸႃႇဢၼ်ၵူၼ်းမဵဝ်းဢီႉသရေႇလႃႉတင်းလၢႆ ဢဝ်ႁဵတ်းတၢင်းပုၵ်ႈၸေႃႇ ဢၼ်ယုၵ်ႉယွင်ႈတီႈ ထႃႇဝရႃႉၽြႃး သိပ်းပုၼ်ႈပုၼ်ႈၼိုင်ႈၼၼ်ႉ ပၼ်တီႈၵူၼ်းမဵဝ်းလေႇဝီႉတင်းလၢႆပုၼ်ႈဢၼ်ၶဝ်တၵ်းၶၢမ်ႇဢမူၺ်ႇဢေႃႈ။ ပိူဝ်ႈၼႆလႄႈ ၵဝ်မီးဢမိင်ႉတီႈၶဝ်လႄႈဝႃႈ၊ ဢမ်ႇလႆႈလေႃးလႄးလူၺ်ႈၵၼ်တင်းၵူၼ်းမဵဝ်းဢီႉသရေႇလႃႉတင်းလၢႆလႄႈ ၶၢမ်ႇဢမူၺ်ႇ၊ ဝႃႈၼင်ႇၼႆဢေႃႈ။

25ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 26မႂ်းသင်ႇလၢတ်ႈတီႈၵူၼ်းမဵဝ်းလေႇဝီႉတင်းလၢႆလႄႈဝႃႈ၊ မိူဝ်ႈဢၼ်သူၶၢမ်ႇဢဝ်ဢုၵ်ႉၸႃႇၵူၼ်းမဵဝ်းဢီႉသရေႇလႃႉတင်းလၢႆ သိပ်းပုၼ်ႈပုၼ်ႈၼိုင်ႈ ဢၼ်ၵဝ်ဢဝ်ၵႃႈၼႂ်းၶဝ်ပၼ်ပုၼ်ႈဢၼ်သူတၵ်းၶၢမ်ႇဢမူၺ်ႇၼၼ်ႉၸိုင်၊ သူသမ်ႉတၵ်းလႆႈဢဝ်ၼႂ်းပုၼ်ႈၼၼ်ႉ ၶိုၼ်းႁဵတ်းသိပ်းပုၼ်ႈလႄႈ ဢဝ်ပုၼ်ႈၼိုင်ႈႁဵတ်းတၢင်းပုၵ်ႈၸေႃႇ ဢၼ်ယုၵ်ႉယွင်ႈတီႈထႃႇဝရႃႉၽြႃးဢေႃႈ။- 27တၢင်းပုၵ်ႈၸေႃႇဢၼ်သူယုၵ်ႉယွင်ႈၼၼ်ႉၸိုင် တၵ်းလႆႈမၢတ်ႈပဵၼ်ၸိူဝ်ႉၼင်ႇၶဝ်ႈပိူၵ်ႇ ဢၼ်ဢဝ်ၵႃႈတီႈၼႂ်းတလၢင်းယဵပ်ႇၶဝ်ႈၼၼ်ႉ ဢိၵ်ႇတင်းၸိူဝ်ႉၼင်ႇၼမ်ႉၸပိတ်ႈ ဢၼ်ဢဝ်ၵႃႈတီႈၼႂ်းၶိူင်ႈၼူတ်ႈမၢၵ်ႇၸပိတ်ႈၼၼ်ႉတီႈသူဢေႃႈ။- 28ၼင်ႇၼၼ်လႄႈ သူတၵ်းလႆႈဢဝ်ၵႃႈၼႂ်းသိပ်းပုၼ်ႈပုၼ်ႈၼိုင်ႈ ဢၼ်သူၶၢမ်ႇဢဝ်ၵႃႈတီႈၵူၼ်းမဵဝ်းဢီႉသရေႇလႃႉတင်းလၢႆၼၼ်ႉ ႁဵတ်းတၢင်းပုၵ်ႈၸေႃႇဢၼ်ယုၵ်ႉယွင်ႈတီႈထႃႇဝရႃႉၽြႃးဢေႃႈ။ တၢင်းပုၵ်ႈၸေႃႇဢၼ်ယုၵ်ႉယွင်ႈၼၼ်ႉၵေႃႈ တၵ်းလႆႈလူႇတီႈ ယိတ်ႈပရေႃးႁဵၵ်ႈဢႃႇရုၼ်ႇဢေႃႈ။- 29ၵႃႈတီႈၼႂ်းတၢင်းလူႇ ၵႃႈဢၼ်သူလႆႈၶၢမ်ႇဢဝ်ၼၼ်ႉ၊ သူတၵ်းလႆႈၼုၵ်ႈဢဝ် ပုၼ်ႈဢၼ်လီသေပိူၼ်ႈ၊ ပုၼ်ႈဢၼ်မူတ်းၸၢင်ႇၼၼ်ႉလႄႈ ႁဵတ်းတၢင်းပုၵ်ႈၸေႃႇဢၼ်ယုၵ်ႉယွင်ႈတီႈထႃႇဝရႃႉၽြႃးဢေႃႈ။- 30ပိူဝ်ႈၼႆလႄႈ မႂ်းသင်ႇလၢတ်ႈတီႈၶဝ်လႄႈဝႃႈ၊ သူၼုၵ်ႈဢဝ်ပုၼ်ႈဢၼ်လီသေပိူၼ်ႈၼၼ်ႉ ပုၵ်ႈၸေႃႇသေယဝ်ႉ၊ ပုၼ်ႈဢၼ်ၵိုတ်းဢၼ်ၵျၢၼ်ႇၼၼ်ႉ တၵ်းလႆႈမၢတ်ႈပဵၼ်ပုၼ်ႈပဵၼ်တႃႇၵူၼ်းမဵဝ်းလေႇဝီႉတင်းလၢႆၸိူဝ်ႉၼင်ႇၵျေးၸူးတလၢင်းယဵပ်ႇၶဝ်ႈၼၼ်ႉ ဢိၵ်ႇတင်းၸိူဝ်ႉၼင်ႇၵျေးၸူးၶိူင်ႈၼူတ်ႈမၢၵ်ႇၸပိတ်ႈၼၼ်ႉဢေႃႈ။- 31ပုၼ်ႈၼၼ်ႉၸိုင်၊ သူဢိၵ်ႇတင်းၵူၼ်းႁိူၼ်းၵူၼ်းယေးသူမီးဢၶႂၢင်ႉဢၼ်လႆႈၵိၼ်ၼႂ်း ၵူႈတီႈၵူႈလႅၼ်ဢေႃႈ။ ပဵၼ်သူးဢၼ်ၵဝ်ၶျႃးပၼ်ၵွပ်ႈပိူဝ်ႈဢၼ်သူပွင်ႁဵတ်းဢမူႉၵႃႈၼႂ်းမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉဢေႃႈ။- 32ၼုၵ်ႈဢဝ်ပုၼ်ႈဢၼ်လီသေပိူၼ်ႈၼၼ်ႉပုၵ်ႈၸေႃႇသေယဝ်ႉ၊ လွင်ႈဢၼ်တၵ်းလႆႈႁွတ်ႈထိုင်ဢပႅတ်ႈ ၵွပ်ႈပိူဝ်ႈပုၼ်ႈၼၼ်ႉဢမ်ႇမီး။ လွင်ႈၼင်ႇႁိုဝ်သူတၵ်းဢမ်ႇထူပ်းၽေးတၢႆၸိုင်၊ သူဢမ်ႇလႆႈႁႂ်ႈၶိူင်ႈဢၼ်မူတ်းၸၢင်ႇ ၵူၼ်းမဵဝ်းဢီႉသရေႇလႃႉတင်းလၢႆၸိူဝ်းၼၼ်ႉၵူဝ်ႈၵိူၵ်ႇ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

Popular Bible Verses from
ၼႂ်းထိူၼ်ႇ 18

Bible:

Shan

Version: သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး - CBMS