ၼႂ်းထိူၼ်ႇ 19
19
တဝ်ႈဝူဝ်းမႄႈလႅင်
1ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇ တင်းဢႃႇရုၼ်ႇလႄႈဝႃႈ၊- 2ထုင်းၽိင်ႈတြႃးဢၼ်ထႃႇဝရႃႉၽြႃးၸီႇယၢင်ႇႁဵတ်းဝႆႉၸမ်ႉ၊ သင်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆ ႁႂ်ႈၶဝ်ဢဝ်ဝူဝ်းမႄႈၼုမ်ႇ ဢၼ်ႁၢင်ႈၽၢင်လႅင်၊ ဢၼ်ဢမ်ႇမီးတၢင်းဢၼ်လၢႆးဢၼ်လဵၼ်း၊ ဢၼ်ဢမ်ႇပႃးဢပႅတ်ႈလႄႈ ဢမ်ႇဢဝ်ၵၢၼ်းတၢင်ႇသေပွၵ်ႈၼၼ်ႉ မႃးၵႃႈတီႈမႂ်းတႃႉ။- 3သွင်ၶိူဝ်တၵ်းလႆႈဢဝ်မၼ်းဢၢပ်ႈပၼ်တီႈယိတ်ႈပရေႃးႁဵၵ်ႈဢေးလႃႇၸႃႇလႄႈ မၼ်းၼၼ်ႉ တၵ်းလႆႈဢဝ်မၼ်းၵႂႃႇၵႃႈၼွၵ်ႈတပ်ႉလႄႈ၊ ၵေႃႉၼိုင်ႈတၵ်းလႆႈဢဝ်မၼ်းတၢႆၵႃႈတီႈၽၢႆႇၼႃႈမၼ်းၼၼ်ႉဢေႃႈ။- 4ယိတ်ႈပရေႃးႁဵၵ်ႈဢေးလႃႇၸႃႇၼၼ်ႉ တၵ်းလႆႈဢဝ်တင်းမိုဝ်းဢဝ်လိူတ်ႈလႄႈ ဢဝ်လိူတ်ႈၼၼ်ႉၽႅတ်းၸူးၽၢႆႇတၢင်းၼႃႈမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၸဵတ်းၵမ်းဢေႃႈ။- 5ၵေႃႉၼိုင်ႈတၵ်းလႆႈဢဝ်ဝူဝ်းမႄႈၼၼ်ႉ တုတ်ႇၽႆးၵႃႈတီႈၽၢႆႇၼႃႈမၼ်းၼၼ်ႉဢေႃႈ။ တၵ်းလႆႈဢဝ်ၼင်မၼ်း၊ ၼိူဝ်ႉမၼ်း၊ လိူတ်ႈမၼ်း၊ တင်းၶီႈၼုမ်ႇမၼ်း တုတ်ႇၽႆးဢေႃႈ။- 6ယိတ်ႈပရေႃးႁဵၵ်ႈၵေႃႈ တၵ်းလႆႈဢဝ်ၼိူဝ်ႉမႆႉဢႃႇရိတ်ႉ၊ ယွတ်ႈတူၼ်ႈမႆႉႁုတ်ႉသူပ်ႇတင်းၶူဝ်းဢၼ်လႅင်ၵမ်ႇသေလႄႈ ပႅတ်ႈတူၵ်းသႂ်ႇၵႃႈၼႂ်းတီႈဢၼ် ဝူဝ်းမႄႈၼၼ်ႉမႆႈၽႆးယူႇၼၼ်ႉဢေႃႈ။- 7လိုၼ်းၼၼ်ႉ ယိတ်ႈပရေႃးႁဵၵ်ႈတၵ်းလႆႈသၵ်ႉလွႆးၶူဝ်းၼုင်ႈမၼ်းသေလႄႈ ဢၢပ်ႇၼမ်ႉတူဝ်မၼ်းသေယဝ်ႉ၊ လႆႈၶဝ်ႈၵႃႈတီႈၼႂ်းတပ်ႉလႄႈ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။- 8ၵေႃႉဢၼ်ဢဝ်တုတ်ႇၽႆးၼၼ်ႉၵေႃႈ တၵ်းလႆႈသၵ်ႉလွႆးၶူဝ်းၼုင်ႈမၼ်းသေလႄႈ ဢၢပ်ႇၼမ်ႉတူဝ်မၼ်းသေယဝ်ႉ၊ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။- 9ၵေႃႉဢၼ်မူတ်းသႂ်ၼၼ်ႉသေၵေႃႉၵေႃႉ တၵ်းလႆႈၸူႉသိမ်းဢဝ်တဝ်ႈဝူဝ်းမႄႈၼၼ်ႉလႄႈ ဢဝ်ဝႆႉၵႃႈတီႈဢၼ်မတ်ႉသႂ်ႇၵႃႈၼွၵ်ႈတပ်ႉဢေႃႈ။ တၵ်းလႆႈသိမ်းဢဝ်တဝ်ႈၼၼ်ႉဝႆႉ ပုၼ်ႈဢၼ်တၵ်းၽေႃႇၼမ်ႉဢၼ်ႁႂ်ႈမူတ်းသႂ်ပုၼ်ႈပရဵၵ်ႈသၢတ်ႈၵူၼ်းမဵဝ်းဢီႉသရေႇလႃႉတင်းလၢႆဢေႃႈ။ ပဵၼ်ပုၼ်ႈဢၼ်တၵ်းႁႂ်ႈၵၢင်းလွတ်ႈတင်းဢပႅတ်ႈဢေႃႈ။- 10ၵေႃႉဢၼ်ၸူႉသိမ်းဢဝ်တဝ်ႈဝူဝ်းမႄႈၼၼ်ႉဝႆႉၼၼ်ႉၵေႃႈ တၵ်းလႆႈသၵ်ႉလွႆးၶူဝ်းၼုင်ႈမၼ်းလႄႈ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။ ဢၼ်ၼႆႉၸမ်ႉ၊ ပဵၼ်ပိင်းၺၢပ်ႈဢၼ်တႃႇသေႇတီႈၵူၼ်းမဵဝ်းဢီႉသရေႇလႃႉတင်းလၢႆ ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၵႃႈတီႈသူၸိူဝ်းၼၼ်ႉဢေႃႈ။
လွင်ႈတၢင်းဢၼ်ၵပ်းၵၢႆႇလူၺ်ႈတူဝ်တၢႆ
11ၵေႃႉဢၼ်တိူဝ်ႉထုၵ်ႇတူဝ်တၢႆၵူၼ်းၼၼ်ႉ တၵ်းပဵၼ်ဢၼ်ဢမ်ႇမူတ်းသႂ်ၸဵတ်းဝၼ်းဢေႃႈ။- 12ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ မၼ်းတၵ်းလႆႈဢဝ်ၼမ်ႉၼၼ်ႉ ႁႂ်ႈတူဝ်မၼ်းမူတ်းသႂ်လႄႈ၊ ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉ မၼ်းတၵ်းမူတ်းသႂ်ဢေႃႈ။ ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ ပေႃးမၼ်းဢမ်ႇႁႂ်ႈတူဝ်မၼ်းမူတ်းသႂ်ၸိုင် မၼ်းဢမ်ႇလႆႈမူတ်းသႂ် ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉ။- 13ၵေႃႉဢၼ်တိူဝ်ႉထုၵ်ႇတူဝ်တၢႆၵူၼ်း ဢၼ်တၢႆယဝ်ႉၼၼ်ႉလႄႈ၊ ဢမ်ႇႁႂ်ႈတူဝ်ၸဝ်ႈၵဝ်ႇမူတ်းသႂ်ၼၼ်ႉ၊ ႁႂ်ႈသုမ်ႉထဵင်ထႃႇဝရႃႉၽြႃး ၵူဝ်ႈၵိူၵ်ႇဢေႃႈ။ ၵေႃႉၼၼ်ႉၸိုင်၊ တၵ်းလႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်း မဵဝ်းဢီႉသရေႇလႃႉဢေႃႈ။ ၵွပ်ႈပိူဝ်ႈဢၼ်မၼ်းဢမ်ႇၶၢမ်ႇတၢင်းဢၼ် ဢဝ်ၼမ်ႉဢၼ်ႁႂ်ႈမူတ်းသႂ်ၼၼ်ႉၽႅတ်းသႂ်ႇလႄႈ မၼ်းပဵၼ်ဢၼ်ဢမ်ႇမူတ်းသႂ်။ တၢင်းဢၼ်မၼ်းဢမ်ႇမူတ်းသႂ်ၼၼ်ႉ ယင်းမီးယူႇတီႈမၼ်းဢေႃႈ။- 14တြႃးဢၼ်တၵ်းလႆႈပႂ်ႉၼႂ်းမိူဝ်ႈဢၼ် ၵူၼ်းတၢႆၵႃႈၼႂ်းမူဝ်းၵႃႇၼၼ်ႉၸမ်ႉ၊ ၵေႃႉဢၼ်ၶဝ်ႈၵႃႈၼႂ်းမူဝ်းၵႃႇ ဢိၵ်ႇတင်းၵေႃႉဢၼ်မီးယူႇၵႃႈၼႂ်းမူဝ်းၵႃႇတင်းသဵင်ႈတင်းလူင်ၼၼ်ႉ တၵ်းပဵၼ်ဢၼ်ဢမ်ႇမူတ်းသႂ်ၸဵတ်းဝၼ်းတဵမ်တဵမ်ဢေႃႈ။- 15မေႃႈၵႃႈဢၼ်ၽုၺ်ႇဝႆႉမီးယူႇ၊ ဢၼ်ဢမ်ႇမီးဢၼ်ႁူမ်ႇဢၼ်ငမ်း ဢၼ်ဢဝ်ၸိူၵ်ႈဢဝ်သၢႆမတ်ႉဝႆႉၼၼ်ႉၵေႃႈ တၵ်းပဵၼ်ဢၼ်ဢမ်ႇမူတ်းသႂ်ဢေႃႈ။- 16ၶဝ်ၸိူဝ်းဢၼ်တိူဝ်ႉထုၵ်ႇၵေႃႉဢၼ်ၶၢမ်ႇတၢင်းဢၼ်ဢဝ်တၢႆလူၺ်ႈလၢပ်ႇလူၺ်ႈလႅဝ်း၊ တူဝ်တၢႆၵူၼ်း၊ လုပ်ႇၵူၼ်းတၢႆ၊ ပႃႇႁဵဝ်ႈၵူၼ်းၵႃႈၼွၵ်ႈၵႃႈပၢင်ႇၸိူဝ်းၼၼ်ႉၼၼ်ႉ တၵ်းပဵၼ်ဢၼ်ဢမ်ႇမူတ်းသႂ်ၸဵတ်းဝၼ်းတဵမ်တဵမ်ဢေႃႈ။- 17ပုၼ်ႈၵေႃႉဢၼ်ဢမ်ႇမူတ်းသႂ်ၼၼ်ႉ၊ ၶဝ်တၵ်းလႆႈဢဝ်တဝ်ႈဝူဝ်းမႄႈဢၼ်တုတ်ႇၽႆးပုၼ်ႈဢၼ်တၵ်းႁႂ်ႈလွတ်ႈဢပႅတ်ႈၼၼ်ႉၵမ်ႈၽွင်ႈလႄႈ ဢဝ်ၼမ်ႉဢၼ်လႆယူႇၼၼ်ႉသႂ်ႇလေႃးၵၼ်ဝႆႉ ၵႃႈၼႂ်းမေႃႈသေယဝ်ႉ၊- 18ၵေႃႉဢၼ်မူတ်းသႂ်ၼၼ်ႉ တၵ်းလႆႈဢဝ်ယွတ်ႈတူၼ်ႈမႆႉႁုတ်ႉသူပ်ႇၸုမ်ႇသႂ်ႇၵႃႈၼႂ်းၼမ်ႉၼၼ်ႉလႄႈ ဢဝ်ၼမ်ႉၼၼ်ႉၽႅတ်းသႂ်ႇၵႃႈၼိူဝ်မူဝ်းၵႃႇ ဢိၵ်ႇတင်းၶိူင်ႈပိူင်ၵႃႈမီး တင်းၶဝ်ၸိူဝ်းဢၼ် မီးၵႃႈၼႂ်းမူဝ်းၵႃႇ တင်းၵေႃႉဢၼ်တိူဝ်ႉထုၵ်ႇလုပ်ႇၵူၼ်းတၢႆ၊ ဢမ်ႇၼၼ် ဢၼ်ၶၢမ်ႇတၢင်းဢၼ်ဢဝ်တၢႆ၊ ဢမ်ႇၼၼ် ပႃႇႁဵဝ်ႈၼၼ်ႉၸိူဝ်းၼၼ်ႉဢေႃႈ။- 19ၵေႃႉဢၼ်မူတ်းသႂ်ၼၼ်ႉ တၵ်းလႆႈဢဝ်ၽႅတ်းသႂ်ႇၵႃႈတီႈၵေႃႉဢၼ်ဢမ်ႇမူတ်းသႂ်ၼၼ်ႉ ၼႂ်းဝၼ်းဢၼ်ထူၼ်ႈထိုင်သၢမ်ဝၼ်း ဢိၵ်ႇတင်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉဢေႃႈ။ ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉ မၼ်းတၵ်းလႆႈႁႂ်ႈမၼ်းၼၼ်ႉမူတ်းသႂ်လႄႈ မၼ်းၼၼ်ႉတၵ်းလႆႈသၵ်ႉလွႆးၶူဝ်းၼုင်ႈတူဝ်ၸဝ်ႈၵဝ်ႇလႄႈ ဢၢပ်ႇၼမ်ႉတူဝ်ၸဝ်ႈၵဝ်ႇသေယဝ်ႉ၊ တၵ်းလႆႈမူတ်းသႂ် ၼႂ်းၶိင်ႇႁူဝ်ၶမ်ႈဢေႃႈ။- 20ၵေႃႉဢၼ်ဢမ်ႇမူတ်းသႂ်ၼၼ်ႉ၊ ပေႃးဢမ်ႇႁဵတ်းလွင်ႈၼင်ႇႁိုဝ်တၵ်းႁႂ်ႈတူဝ်ၸဝ်ႈၵဝ်ႇမူတ်းသႂ်ၸိုင်၊ တၵ်းလႆႈၶၢမ်ႇတၢင်းဢၼ် ပႄႇပႅတ်ႈသေၵႃႈၼႂ်းပရဵၵ်ႈသၢတ်ႈ ၵွပ်ႈပိူဝ်ႈဢၼ် မၼ်းႁႂ်ႈထႃႇၼႃႉတီႈမူတ်းၸၢင်ႇထႃႇဝရႃႉၽြႃး ၵူဝ်ႈၵိူၵ်ႇၼၼ်ႉဢေႃႈ။ ၵွပ်ႈပိူဝ်ႈဢၼ်ဢမ်ႇၶၢမ်ႇတၢင်းဢၼ်ၽႅတ်းၼမ်ႉ ဢၼ်ႁႂ်ႈမူတ်းသႂ်ၼၼ်ႉလႄႈ ယင်းဢမ်ႇမူတ်းသႂ်လႄႈယူႇဢေႃႈ။- 21ပိင်းၺၢပ်ႈဢၼ်တႃႇသေႇတီႈၶဝ်ၼၼ်ႉၸမ်ႉ၊ ၵေႃႉဢၼ်ဢဝ်ၼမ်ႉ ဢၼ်ႁႂ်ႈမူတ်းသႂ်ၽႅတ်းသႂ်ႇၼၼ်ႉ တၵ်းလႆႈသၵ်ႉလွႆးၶူဝ်းၼုင်ႈမၼ်းဢေႃႈ။ ၵေႃႉဢၼ်တိူဝ်ႉထုၵ်ႇၼမ်ႉ ဢၼ်ႁႂ်ႈမူတ်းသႂ်ၼၼ်ႉၵေႃႈ တၵ်းပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။- 22ၵႃႈဢၼ်ၵေႃႉဢၼ်ဢမ်ႇမူတ်းသႂ်ၼၼ်ႉ တိူဝ်ႉထုၵ်ႇၼၼ်ႉၵေႃႈ တၵ်းပဵၼ်ဢၼ်ဢမ်ႇမူတ်းသႂ်ဢေႃႈ။ ၵေႃႉဢၼ်တိူဝ်ႉထုၵ်ႇဢၼ်ၼၼ်ႉၼၼ်ႉၵေႃႈ တၵ်းပဵၼ်ဢၼ်ဢမ်ႇမူတ်းသႂ် တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ၊ ဝႃႈၼင်ႇၼႆဢေႃႈ။
Currently Selected:
ၼႂ်းထိူၼ်ႇ 19: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship