ၼႂ်းထိူၼ်ႇ 20

1ၼႂ်းလိူၼ်ပထမႃႉၼၼ်ႉ၊ ၵူၼ်းမဵဝ်းဢီႉသရေႇလႃႉတင်းလၢႆ ဢၼ်ဝႃႈ ပရဵၵ်ႈသၢတ်ႈတင်းသဵင်ႈတင်းလူင်ၼၼ်ႉ ႁွတ်ႈထိုင်ၵႃႈတီႈထိူၼ်ႇၸီႉၼႃႉလႄႈ ဢွၼ်ၵၼ်ယူႇၵႃႈတီႈ ၵႃႇတေႇသႃႉဢေႃႈ။ မီႉရီႉဢၢမ်ႇတၢႆၵႃႈတီႈၼၼ်ႈလႄႈ သၢင်းၵျူဝ်ႇသေဢေႃႈ။- 2ၵွပ်ႈပိူဝ်ႈဢၼ်ဢမ်ႇမီးၼမ်ႉပုၼ်ႈဢၼ်ပရဵၵ်ႈသၢတ်ႈတၵ်းၵိၼ်ၼၼ်ႉလႄႈ၊ ၶဝ်ၸူႉၵၼ်တုမ်ၵၼ်ယူႇၽၢႆႇၼိုင်ႈ တင်းမူဝ်းသေႇတင်း ဢႃႇရုၼ်ႇဢေႃႈ။- 3ၵူၼ်းတင်းလၢႆၼၼ်ႉဢွၼ်ၵၼ်တၢင်ႇဢပႅတ်ႈတီႈမူဝ်းသေႇလႄႈဝႃႈ၊ ၸိုင်ႁဝ်းဢမ်ႇတၢႆသေယၢမ်းမိူဝ်ႈဢၼ်ပီႈၼွင်ႉႁဝ်းတင်းလၢႆ တၢႆၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉ။- 4ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သွင်ၶိူဝ်ဢဝ်ပရဵၵ်ႈသၢတ်ႈထႃႇဝရႃႉၽြႃး မႃးၵႃႈတီႈထိူၼ်ႇၼႆႉႁႂ်ႈႁဝ်းဢိၵ်ႇတင်းတရိၵ်ႈသၢၼ်ႇႁဝ်းလႆႈတၢႆၵႃႈတီႈၼႆႈၼင်ႇႁိုဝ်။- 5ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ႁႂ်ႈႁဝ်းဢွၵ်ႇသေၵႃႈၼႂ်းမိူင်းဢေႇၵိပ်ႉတူႉ ႁႂ်ႈလႆႈဢဝ်ႁဝ်းမႃးၵႃႈတီႈဢၼ်ႁၢႆႉဢၼ်ႁုၵ်းၼႆႉၼင်ႇႁိုဝ်။ ၵႃႈတီႈၼႆႈ ပဵၼ်တီႈဢၼ်တၵ်းဝၢၼ်ႇၸိူဝ်ႉဝၢၼ်ႇၽၼ်း၊ တီႈဢၼ်တၵ်းၽုၵ်ႇတူၼ်ႈမၢၵ်ႇလိူဝ်ႇသၢင်းၽေႃး၊ တူၼ်ႈၶိူဝ်းမၢၵ်ႇၸပိတ်ႈ၊ တူၼ်ႈမၢၵ်ႇၸင်ႈဢမ်ႇၸႂ်ႈ။ ဢမ်ႇမီးၼမ်ႉပုၼ်ႈဢၼ်တၵ်းၵိၼ်လႃးလႃး၊ ဝႃႈၼင်ႇၼႆဢေႃႈ။- 6မူဝ်းသေႇ တင်းဢႃႇရုၼ်ႇၼၼ်ႉ ဢွၵ်ႇသေၵႃႈတီႈၽၢႆႇၼႃႈ ပရဵၵ်ႈသၢတ်ႈတင်းလၢႆၼၼ်ႉလႄႈ ၵႂႃႇၵႃႈတီႈႁူးၽၵ်းတူမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈသေယဝ်ႉ၊ ၶုပ်ႉမူပ်ႇယူႇလႄႈ၊ မုၼ်ၽုင်းထႃႇဝရႃႉၽြႃး ထၢင်ႇသႃးမႃးတီႈၶဝ်ဢေႃႈ။

7ထႃႇဝရႃႉၽြႃးမီးဢမိင်ႉတီႈမူဝ်းသေႇလႄႈဝႃႈ၊- 8ယိပ်းဢဝ်ၵၼ်းႁွၵ်ႇၸဝ်ႈလႄႈ ပႃးဢဝ်တင်းပီႈၸၢႆးမႂ်းဢႃႇရုၼ်ႇသေလႄႈ၊ ႁႂ်ႈပရဵၵ်ႈသၢတ်ႈတင်းလၢႆၸူႉၵၼ်တုမ်ၵၼ်တႃႉ။ သင်ႇလၢတ်ႈတီႈမၢၵ်ႇႁိၼ်ၼၼ်ႉ သိုဝ်ႈၼႃႈတႂ်ႈတႃၶဝ် ႁႂ်ႈမၼ်းပၼ်ၼမ်ႉမၼ်းတႃႉ။ ၼင်ႇၼၼ်လႄႈ မႂ်းတၵ်းလႆႈႁႂ်ႈၼမ်ႉဢွၵ်ႇသေၵႃႈၼႂ်း မၢၵ်ႇႁိၼ်ၼၼ်ႉလႄႈ ပၼ်ၼမ်ႉပုၼ်ႈဢၼ်တၵ်းၵိၼ် တီႈပရဵၵ်ႈသၢတ်ႈတင်းလၢႆ ဢိၵ်ႇတင်းတရိၵ်ႈသၢၼ်ႇၶဝ်ဢေႃႈ၊ ဝႃႈၼင်ႇၼႆသေယဝ်ႉ၊- 9မူဝ်းသေႇ ဢဝ်ၵၼ်းႁွၵ်ႇၸဝ်ႈ ၵႃႈတီႈၽၢႆႇၼႃႈထႃႇဝရႃႉၽြႃး ၸွမ်းၵႃႈၼင်ႇဢၼ် မၼ်းၸဝ်ႈမီးဢမိင်ႉ ၼၼ်ႉလႄႈ၊- 10ပႃးဢဝ်တင်းဢႃႇရုၼ်ႇသေလႄႈ ႁႂ်ႈပရဵၵ်ႈသၢတ်ႈတင်းလၢႆၸူႉၵၼ်တုမ်ၵၼ် ၵႃႈတီႈၽၢႆႇၼႃႈမၢၵ်ႇႁိၼ်ၼၼ်ႉသေလႄႈလၢတ်ႈဝႃႈ၊ ၵူၼ်းဢၼ်ပုင်ႇၵၢၼ်ႇၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းတႃႉ။ ႁဝ်းတၵ်းလႆႈႁႂ်ႈၼမ်ႉဢွၵ်ႇသေၵႃႈၼႂ်းမၢၵ်ႇႁိၼ်ၼႆႉမႃးပုၼ်ႈသူႁိုဝ်။ ဝႃႈၼင်ႇၼႆသေယဝ်ႉ၊- 11မူဝ်းသေႇ ယဵတ်ႇမိုဝ်းမၼ်းဢဝ်ၵၼ်းႁွၵ်ႇၸဝ်ႈ ပေႃႉယႅၼ်ႉမၢၵ်ႇႁိၼ်ၼၼ်ႉသွင်ၵမ်းသေလႄႈ၊ ၼမ်ႉဢွၵ်ႇမႃး ၼမ်ၼႃႇလႄႈ၊ ပရဵၵ်ႈသၢတ်ႈတင်းလၢႆ ဢိၵ်ႇတင်းတရိၵ်ႈသၢၼ်ႇၶဝ်လႆႈၵိၼ်ဢေႃႈ။

12ထႃႇဝရႃႉၽြႃးမီးဢမိင်ႉတီႈမူဝ်းသေႇ တင်းဢႃႇရုၼ်ႇလႄႈဝႃႈ၊ ၵွပ်ႈပိူဝ်ႈဢၼ်သူယင်းဢမ်ႇယုမ်ႇမၢတ်ႈၵဝ်လႄႈ ႁဵတ်းႁႂ်ႈတၢင်းဢၼ်ၵဝ်မူတ်းၸၢင်ႇၼၼ်ႉ ထၢင်ႇသႃးသိုဝ်ႈၼႃႈတႂ်ႈတႃၵူၼ်းမဵဝ်းဢီႉသရေႇလႃႉတင်းလၢႆၼၼ်ႉလႄႈ၊ သူဢမ်ႇလႆႈဢၶႂၢင်ႉဢၼ်လႆႈဢဝ်ပရဵၵ်ႈသၢတ်ႈၼႆႉ ၵႂႃႇသူင်ႇၵႃႈတီႈမိူင်းဢၼ် ၵဝ်ပၼ်တီႈၶဝ်ၼၼ်ႉ ဝႃႈၼင်ႇၼႆဢေႃႈ။- 13ၼမ်ႉၼၼ်ႉ ပဵၼ်ၼမ်ႉမေႇရီႇၽႃႉဢေႃႈ။ လွင်ႈမၼ်းၸမ်ႉ ၵူၼ်းမဵဝ်းဢီႉသရေႇလႃႉတင်းလၢႆ ႁဵတ်းၶတ်းၵၼ်တင်းထႃႇဝရႃႉၽြႃးလႄႈ မၼ်းၸဝ်ႈႁႂ်ႈတၢင်းဢၼ် မၼ်းၸဝ်ႈမူတ်းၸၢင်ႇၼၼ်ႉ ထၢင်ႇသႃးၵႃႈၼႂ်းၶဝ်ၼၼ်ႉဢေႃႈ။

14မိူဝ်ႈၼၼ်ႉ မူဝ်းသေႇပွႆႇၸႂ်ႉသၢၼ်ႇတမၢၼ်ႇတင်းလၢႆသေၵႃႈတီႈ ၵႃႇတေႇသႃႉၼၼ်ႉ ၵႂႃႇၸူးၵႃႈတီႈၶုၼ်ႁေႃၶမ်းဢေႇတုမ်ႇလႄႈ ႁႂ်ႈၶဝ်လၢတ်ႈလႄႈဝႃႈ၊ ၼွင်ႉၸၢႆးၸဝ်ႈႁဝ်းဢီႉသရေႇလႃႉလၢတ်ႈလႄႈဝႃႈၸမ်ႉ၊ ၸဝ်ႈႁဝ်းႁူႉတုၵ်ႉၶႃႉတၢင်းၽၢၼ် ဢၼ်ႁဝ်းၶႃႈလႆႈထူပ်းၵူႈၸိူဝ်ႉၵူႈပိူင်ဢၼ်ဝႃႈ၊- 15လွင်ႈဢၼ်ပူႇမွၼ်ႇႁဝ်းၶႃႈ လူင်းၵႂႃႇၵႃႈတီႈမိူင်းဢေႇၵိပ်ႉတူႉလႄႈ ႁဝ်းၶႃႈယူႇၵႃႈၼႂ်းမိူင်းဢေႇၵိပ်ႉတူႉ ၶိင်ႇၵႃႇလႃႉႁိုင်ၼႃႇလႄႈ ၵူၼ်းဢေႇၵိပ်ႉတူႉတင်းလၢႆ ၼိၵ်ႈၸၢၵ်ႈငႅၼ်းသႄးႁဝ်းၶႃႈတင်းပူႇမွၼ်ႇႁဝ်းၶႃႈ၊- 16ဢိၵ်ႇတင်းလွင်ႈဢၼ် မိူဝ်ႈဢၼ်ႁဝ်းၶႃႈႁွင်ႉသႅၼ်ႇတီႈထႃႇဝရႃႉၽြႃးၼၼ်ႉ၊ မၼ်းၸဝ်ႈပွႆႇၸႂ်ႉတမၢၼ်ႇၵၢင်ႁၢဝ်သေလႄႈ ၼုၵ်ႈဢဝ်ႁဝ်းၶႃႈ ဢွၵ်ႇသေၵႃႈၼႂ်းမိူင်းဢေႇၵိပ်ႉတူႉၼၼ်ႉယူႇၶႃႈဢေႃႈ။ မိူဝ်ႈလဵဝ်ၼႆႉ ႁဝ်းၶႃႈမီးယူႇၵႃႈတီႈၵႃႇတေႇသႃႉ ဢၼ်ပဵၼ်ဝဵင်း ၵႃႈတီႈႁိမ်းတီႈသုတ်းလႅၼ်လိၼ်မိူင်းၸဝ်ႈႁဝ်းၼၼ်ႉၶႃႈဢေႃႈ။- 17ႁႂ်ႈႁဝ်းၶႃႈလႆႈပႆလတ်းၵႃႈၼႂ်းၵၢင်မိူင်းၸဝ်ႈႁဝ်းၵႂႃႇသေၵမ်း။ ႁဝ်းၶႃႈဢမ်ႇယဵပ်ႇဢမ်ႇၶၢမ်ႈႁႆႊၼႃး၊ သူၼ်ဢူးယဵၼ်ႇၸပိတ်ႈတင်းလၢႆၶႃႈ၊ ႁဝ်းၶႃႈဢမ်ႇၵိၼ်ၼမ်ႉၵႃႈတီႈၼမ်ႉမေႃႇၶႃႈ။ ႁဝ်းၶႃႈတၵ်းပႆၸွမ်းၵႃႈတီႈသဵၼ်ႈတၢင်းၶုၼ်ၵူၺ်းလႄႈ ဢမ်ႇဝၢႆႇၵႂႃႇၵႃႈတီႈၽၢႆႇၶႂႃၽၢႆႇသၢႆႉတေႃႇထိုင်ႁွတ်ႈႁႂ်ႈထၼ်ႈပေႃးပူၼ်ႉလႅၼ်လိၼ်မိူင်းၸဝ်ႈႁဝ်းၼၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။- 18ဢေႇတုမ်ႇၵေႃႈ ၶိုၼ်းလၢတ်ႈလႄႈဝႃႈ၊ မႂ်းဢမ်ႇလႆႈပႆလတ်းၵႃႈတီႈၼႂ်းၵၢင်မိူင်းၵဝ်ၵႂႃႇ။ ပေႃးပႆလတ်းၵႂႃႇၸိုင်၊ ၵဝ်တၵ်းဢဝ် လၢၵ်ႈၼၢၵ်ႈလၢပ်ႇလႅဝ်းႁၢမ်ႈတၢပ်ႈႁႄႉၶႅၼ်ဢေႃႈ၊ ဝႃႈၼင်ႇၼႆဢေႃႈ။- 19ၵူၼ်းမဵဝ်းဢီႉသရေႇလႃႉတင်းလၢႆၵေႃႈလၢတ်ႈလႄႈဝႃႈ၊ ႁဝ်းၶႃႈတၵ်းပႆၸွမ်းတၢင်းၶုၼ်ၵူၺ်းၶႃႈဢေႃႈ။ ပေႃးၵဝ်ၶႃႈ ဢိၵ်ႇတင်းတရိၵ်ႈသၢၼ်ႇၵဝ်ၶႃႈတင်းလၢႆ ၵိၼ်ၼမ်ႉၸဝ်ႈႁဝ်းၸိုင်၊ ၵဝ်ၶႃႈတၵ်းပၼ်ၵႃႈမၼ်းၶၼ်မၼ်းၶႃႈဢေႃႈ။ ယင်းဢမ်ႇႁဵတ်းဢမူႉတၢင်ႇၸိူဝ်ႉတၢင်ႇပိူင်လႄႈ ၵဝ်ၶႃႈတၵ်းဢဝ်တိၼ်ပႆၵႂႃႇၵူၺ်းၶႃႈဢေႃႈ၊ ပိၵ်ႉသမ်ႉဝႃႈၼင်ႇၼႆသေၵေႃႈ၊- 20ဢေႇတုမ်ႇ လၢတ်ႈလႄႈဝႃႈ၊ မႂ်းဢမ်ႇလႆႈပႆလတ်းသေလႄႈၵႂႃႇ၊ ဝႃႈၼင်ႇၼႆသေယဝ်ႉ၊ ပႃးဢဝ်တင်း ၵူၼ်းၼမ်ၼႃႇ ဢိၵ်ႇတင်းၶႅၼ်မိုဝ်းဢၼ်ႁႅင်းၼႃႇ ဢွၵ်ႇမႃးႁႂ်ႈလႆႈႁၢမ်ႈတၢပ်ႈႁႄႉၶႅၼ်ဢေႃႈ။- 21ၼင်ႇၼၼ်လႄႈ ဢေႇတုမ်ႇဢမ်ႇပၼ်ဢၶႂၢင်ႉဢၼ်လႆႈပႆလတ်းၵႃႈတီႈၼႂ်းၵၢင်မိူင်းမၼ်းၵႂႃႇၼၼ်ႉ တီႈဢီႉသရေႇလႃႉ။ ပိူဝ်ႈၼႆလႄႈ ဢီႉသရေႇလႃႉၼၼ်ႉ ဝႄႈပိူင်ႈမၼ်းသေဢေႃႈ။

22ၶဝ်ဢွၼ်ၵၼ်လုၵ်ႉသေၵႃႈတီႈ ၵႃႇတေႇသႃႉ ၵႂႃႇတၢင်းပႆတၢင်းလႄႈ၊ ၵူၼ်းမဵဝ်းဢီႉသရေႇလႃႉဢၼ်ဝႃႈ ပရဵၵ်ႈသၢတ်ႈတင်းသဵင်ႈတင်းလူင်ႁွတ်ႈထိုင်ၵႃႈတီႈလွႆႁေႃးရႃႉဢေႃႈ။- 23ထႃႇဝရႃႉၽြႃး မီးဢမိင်ႉတီႈမူဝ်းသေႇ တင်းဢႃႇရုၼ်ႇ ၵႃႈၼိူဝ်လွႆႁေႃးရႃႉ ၵႃႈတီႈႁိမ်းလႅၼ်လိၼ် ဢေႇတုမ်ႇၼၼ်ႉၸမ်ႉ၊- 24ဢႃႇရုၼ်ႇ တၵ်းလႆႈႁွတ်ႈထိုင်ၵႃႈတီႈဢၼ်ၵူၼ်းမဵဝ်းမၼ်းတင်းလၢႆၸူႉတုမ်ၼၼ်ႉဢေႃႈ။ လွင်ႈမၼ်းၸမ်ႉ မၼ်းဢမ်ႇလႆႈၶဝ်ႈၵႃႈၼႂ်းမိူင်းဢၼ် ၵဝ်ပၼ်တီႈၵူၼ်းမဵဝ်းဢီႉသရေႇလႃႉတင်းလၢႆၼၼ်ႉ ၵွပ်ႈပိူဝ်ႈဢၼ်သွင်ၶိူဝ် ၶတ်းၵႂၢမ်းၵဝ်ၵႃႈတီႈႁိမ်းၼမ်ႉဢွၵ်ႇႁူးမေႇရီႇၽႃႉၼၼ်ႉဢေႃႈ။- 25ပိူဝ်ႈၼႆလႄႈ ႁွင်ႉဢဝ်ဢႃႇရုၼ်ႇ တင်းလုၵ်ႈၸၢႆးမၼ်း ဢေးလႃႇၸႃႇလႄႈ ဢဝ်သွင်ၶႃ ၵႂႃႇၵႃႈတီႈၼိူဝ်လွႆႁေႃးရႃႉသေယဝ်ႉ၊- 26ထွတ်ႇၶူဝ်းၼုင်ႈဢႃႇရုၼ်ႇလႄႈ ဢဝ်ၼုင်ႈပၼ်လုၵ်ႈၸၢႆးမၼ်းဢေးလႃႇၸႃႇတႃႉ။ ဢႃႇရုၼ်ႇတၵ်းလႆႈတၢႆၵႃႈတီႈၼၼ်ႈလႄႈ ႁွတ်ႈထိုင်ၵႃႈတီႈဢၼ်ၵူၼ်းမဵဝ်းမၼ်းၸူႉတုမ်ၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊- 27မူဝ်းသေႇ ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃးမီးဢမိင်ႉၼၼ်ႉလႄႈ ၶဝ်ၼၼ်ႉၶိုၼ်ႈၵႂႃႇၵႃႈၼိူဝ်လွႆႁေႃးရႃႉ ၵႃႈတီႈၽၢႆႇၼႃႈပရဵၵ်ႈသၢတ်ႈတင်းသဵင်ႈတင်းလူင်ဢေႃႈ။- 28မူဝ်းသေႇထွတ်ႇၶူဝ်းၼုင်ႈဢႃႇရုၼ်ႇလႄႈ ဢဝ်ၼုင်ႈပၼ်လုၵ်ႈၸၢႆးမၼ်းဢေးလႃႇၸႃႇ သေယဝ်ႉ၊ ဢႃႇရုၼ်ႇတၢႆၵႃႈတီႈၼၼ်ႈၵႃႈၼိူဝ်ၸိၵ်းလွႆၼၼ်ႉသေဢေႃႈ။ မူဝ်းသေႇ တင်းဢေးလႃႇၸႃႇၼၼ်ႉ လူင်းသေၵႃႈၼိူဝ်လွႆၼၼ်ႉမႃးသေဢေႃႈ။- 29မိူဝ်ႈဢၼ်ပရဵၵ်ႈသၢတ်ႈတင်းသဵင်ႈတင်းလူင် ႁူႉႁၼ်လွင်ႈဢၼ်ဢႃႇရုၼ်ႇ တၢႆၼၼ်ႉၸိုင်၊ ၵူၼ်းမဵဝ်းဢီႉသရေႇလႃႉ ၵႃႈမီးၸိူဝ်းၼၼ်ႉ ဢွၼ်ၵၼ်ႁဵတ်းတၢင်းဢၼ်ႁႆႈႁွင်ႉပွင်ႉၶၢင်း ၵွပ်ႈပိူဝ်ႈဢႃႇရုၼ်ႇၼၼ်ႉ သီႇသိပ်းဝၼ်းတဵမ်တဵမ်ဢေႃႈ။

Popular Bible Verses from
ၼႂ်းထိူၼ်ႇ 20

Bible:

Shan

Version: သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး - CBMS