ၼႂ်းထိူၼ်ႇ 21

1ၶုၼ်လူင်ဢႃႇရတ်ႉ မဵဝ်းၶႃႇၼၼီႉ ဢၼ်ယူႇၵႃႈတီႈပွတ်းတၢင်းၸၢၼ်းၼၼ်ႉ ငိၼ်းသတၢင်းသဵင်ၶၢဝ်ႇလွင်ႈဢၼ် မဵဝ်းဢီႉသရေႇလႃႉ ၸွမ်းသဵၼ်ႈတၢင်းဢသရိမ်ႇ မႃးၼၼ်ႉသေယဝ်ႉ၊ ဢဝ်သိုၵ်းၵႂႃႇတိုၵ်း မဵဝ်းဢီႉသရေႇလႃႉလႄႈ တီႉလႆႈသိမ်းဢဝ်ၵူၼ်းၵမ်ႈၽွင်ႈဢေႃႈ။- 2မဵဝ်းဢီႉသရေႇလႃႉၵေႃႈ ႁဵတ်းၵတီႉသဵတ်ႈၸႃႇတီႈထႃႇဝရႃႉၽြႃးလႄႈဝႃႈ၊ ပေႃးၸဝ်ႈႁဝ်းဢဝ်ၵူၼ်းမဵဝ်းၼႆႉ ဢၢပ်ႈပၼ်ၵႃႈၼႂ်းမိုဝ်းၶႃႈၸဝ်ႈႁဝ်းၸိူဝ်းၼႆႉၸိုင်၊ ၶႃႈၸဝ်ႈႁဝ်းၸိူဝ်းၼႆႉ တၵ်းယႃႉဝဵင်းၶဝ်တင်းလၢႆပႅတ်ႈ မူတ်းမူတ်းသဵင်ႈသဵင်ႈတီႈၶႃႈဢေႃႈ၊ ဝႃႈၼင်ႇၼႆဢေႃႈ။- 3ထႃႇဝရႃႉၽြႃးၵေႃႈ ထွမ်ႇဢဝ်ၵႂၢမ်းမဵဝ်းဢီႉသရေႇလႃႉလႄႈ ဢဝ်ၵူၼ်းမဵဝ်းၶႃႇၼၼီႉၸိူဝ်းၼၼ်ႉဢၢပ်ႈပၼ်ဢေႃႈ။ ၶဝ်ဢွၼ်ၵၼ်ယႃႉၶဝ် ဢိၵ်ႇတင်းဝဵင်းၶဝ်ၸိူဝ်းၼၼ်ႉပႅတ်ႈလႄႈ၊ ၵႃႈတီႈၼၼ်ႈလႆႈၶၢမ်ႇတၢင်းဢၼ် ႁွင်ႉႁဵၵ်ႈၸိုဝ်ႈႁေႃႇမႃႇဢေႃႈ။

4ၼႂ်းမိူဝ်ႈဢၼ်ၶဝ်လုၵ်ႉသေၵႃႈတီႈလွႆႁေႃးရႃႉလႄႈ ယင်းတိုၵ်ႉၵႂႃႇတၢင်းပႆတၢင်းၸွမ်းသဵၼ်ႈတၢင်းပၢင်ႇလၢႆႇ ဢေႇတုမ်ႇ ႁႂ်ႈလႆႈလဵပ်ႈမိူင်းဢေႇၵိပ်ႉတူႉၵႂႃႇယူႇၼၼ်ႉၸိုင်၊ ႁူဝ်ၸႂ်ၵူၼ်းတင်းလၢႆ ဢူၼ်ႈၵႂႃႇၵွပ်ႈပိူဝ်ႈဢၼ် သဵၼ်ႈတၢင်းၼၼ်ႉယၢပ်ႇၼၼ်ႉလႄႈ၊- 5ဢွၼ်ၵၼ်လၢတ်ႈၶတ်းၵၼ်တင်းၽြႃးပဵၼ်ၸဝ်ႈတင်းမူဝ်းသေႇလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူဢဝ်ႁဝ်းဢွၵ်ႇသေၵႃႈၼႂ်းမိူင်းဢေႇၵိပ်ႉတူႉမႃး ႁႂ်ႈႁဝ်းလႆႈတၢႆၵႃႈတီႈထိူၼ်ႇၼႆႉၼင်ႇႁိုဝ်။ ဢမ်ႇမီးၶဝ်ႈမုၼ်းဢမ်ႇမီးၼမ်ႉ။ တၢင်းၵိၼ်ဢၼ်ၸိုတ်ႇဢၼ်ၸၢင်ၼႆႉၵေႃႈ ႁဝ်းလီႁင်ႈလူင်လၢင်ဢေႃႈ၊ ဝႃႈၼင်ႇၼႆဢေႃႈ။- 6မိူဝ်ႈၼၼ်ႉ ထႃႇဝရႃႉၽြႃးပွႆႇၸႂ်ႉငူးၽႆးမႃးၵႃႈတီႈၼႂ်းၵူၼ်းတင်းလၢႆသေလႄႈ တွတ်ႇၵူၼ်းတင်းလၢႆလႄႈ ၵူၼ်းမဵဝ်းဢီႉသရေႇလႃႉ တၢႆၼမ်ၼႃႇဢေႃႈ။

7ပိူဝ်ႈၼႆလႄႈ ၵူၼ်းတင်းလၢႆၼၼ်ႉ ဢွၼ်ၵၼ်မႃးၵႃႈတီႈမူဝ်းသေႇလႄႈလဝ်ႊဝႃႈ၊ ၵွပ်ႈပိူဝ်ႈဢၼ်ႁဝ်းၶႃႈလၢတ်ႈၶတ်းၵၼ်တင်း ထႃႇဝရႃႉၽြႃး တင်းၸဝ်ႈႁဝ်းလႄႈ ၽိတ်းပိူင်ႈမႅၼ်ႈၶႃႈယဝ်ႉ။ ၶႅၼ်းတေႃႈသူးတွင်းထႃႇဝရႃႉၽြႃး ႁႂ်ႈမၼ်းၸဝ်ႈပႄႇပႅတ်ႈငူးၸိူဝ်းၼႆႉသေၵႃႈၼႂ်းႁဝ်းၶႃႈၼႆႉသေၵမ်းၶႃႈ၊ ဝႃႈၼင်ႇၼႆသေယဝ်ႉ၊ မူဝ်းသေႇ သူးတွင်းပုၼ်ႈၵူၼ်းတင်းလၢႆဢေႃႈ။- 8ထႃႇဝရႃႉၽြႃးမီးဢမိင်ႉတီႈမူဝ်းသေႇလႄႈဝႃႈ၊ ႁဵတ်းႁၢင်ႈငူးၽႆးသေလႄႈ ယုၵ်ႉဝႆႉၵႃႈတီႈၼိူဝ်သဝ်တႃႉ။ ၵႃႈပဵၼ်ၵေႃႉဢၼ်လႆႈၶၢမ်ႇတၢင်းဢၼ်တွတ်ႇၼၼ်ႉ၊ ပေႃးလူတူၺ်းၸိုင်၊ တၵ်းလႆႈဢသၢၵ်ႈၵတ်းယဵၼ်ၶျၢမ်းသႃႇဢေႃႈ၊ ဝႃႈၼင်ႇၼႆသေယဝ်ႉ၊- 9မူဝ်းသေႇ ဢဝ်တွင်းလိူင်ႁဵတ်းငူးလႄႈ ဢဝ်ယုၵ်ႉဝႆႉၵႃႈတီႈၼိူဝ်သဝ်သေယဝ်ႉ၊ ၵေႃႉဢၼ်ငူးတွတ်ႇၼၼ်ႉ၊ မိူဝ်ႈဢၼ်မၼ်းလူတူၺ်းငူးတွင်းလိူင်ၼၼ်ႉၸိုင်၊ လႆႈဢသၢၵ်ႈၵတ်းယဵၼ်ၶျၢမ်းသႃႇဢေႃႈ။

10ၵူၼ်းမဵဝ်းဢီႉသရေႇလႃႉတင်းလၢႆၼၼ်ႉသမ်ႉ ဢွၼ်ၵၼ်ၵႂႃႇတၢင်းပႆတၢင်းလႄႈ ၶျႃးပၢင်ၵႃႈတီႈဢေႃးပုတ်ႉဢေႃႈ။- 11ၶဝ်သမ်ႉလုၵ်ႉသေၵႃႈတီႈဢေႃးပုတ်ႉၵႂႃႇတၢင်းပႆတၢင်းလႄႈ ၶျႃးပၢင်ၵႃႈတီႈဢီႉယႃႉဢပႃႇရိမ်ႇ ၵႃႈၼႂ်းထိူၼ်ႇဢၼ်မီးၽၢႆႇတၢင်းၼႃႈ မေႃႇၽႃႉ၊ ၽၢႆႇတၢင်းဢၼ်ၵၢင်ဝၼ်းဢွၵ်ႇၼၼ်ႉဢေႃႈ။- 12ၶဝ်လုၵ်ႉသေၵႃႈတီႈၼၼ်ႈၵႂႃႇတၢင်းပႆတၢင်းလႄႈ ၶျႃးပၢင်ၵႃႈတီႈႁိမ်းႁွင်ႈၸႃႇရိတ်ႉဢေႃႈ။- 13ၶဝ်သမ်ႉလုၵ်ႉသေ ၵႃႈတီႈၼၼ်ႈၵႂႃႇတၢင်းပႆတၢင်းလႄႈ ၶျႃးပၢင်ၵႃႈတီႈၽၢႆႇပုၼ်ႉၼမ်ႉႁွင်ႈဢႃႇၼုၼ်ႇ ဢၼ်မီးၵႃႈၼႂ်းထိူၼ်ႇ ဢၼ်ၸပ်းလႅၼ်လိၼ်မိူင်းၵူၼ်းဢႃႇမေႃးရီႉဢေႃႈ။ ၼမ်ႉႁွင်ႈဢႃႇၼုၼ်ႇၼၼ်ႉၸမ်ႉ၊ ပဵၼ်ဢၼ်ၶႅၼ်ႈဢၼ်ၶၼ်ႈဝူင်ႈၵၢင်မိူင်းမေႃႇၽႃႉ တင်းမိူင်းၵူၼ်းဢႃႇမေႃးရီႉဢေႃႈ။- 14မႅၼ်ႈၸွမ်းၼင်ႇၼၼ်လႄႈ ဢၼ်မႃးၼႂ်းလိၵ်ႈတိုၵ်းသိုၵ်းထႃႇဝရႃႉၽြႃးၸမ်ႉ၊ ၼႂ်းၽူၼ်လူင်လူမ်းလူင်၊ ၵႃႈတီႈဝႃႇႁိပ်ႇႁူၺ်ႈႁွင်ႈဢႃႇၼုၼ်ႇတင်းလၢႆ၊- 15ပၢၼ်းတၢပ်ႈႁူၺ်ႈႁွင်ႈ ဢၼ်လူင်းၸူးၵႃႈတီႈ တီႈဢၼ်ဢႃႇရႃႉယူႇလႄႈ လဵပ်ႈၵႃႈတီႈႁိမ်းလႅၼ်လိၼ်မိူင်းမေႃႇၽႃႉ ဢမ်ႇႁူႉလၢႆသဵၼ်ႈလၢႆသၢႆ၊ မႃးၼင်ႇၼႆဢေႃႈ။- 16ၶဝ်သမ်ႉလုၵ်ႉသေၵႃႈတီႈၼၼ်ႈ ၵႂႃႇတၢင်းပႆတၢင်းၸူးၵႃႈတီႈၼမ်ႉမေႃႇပႄႇရႃႉဢေႃႈ။ ၼမ်ႉမေႃႇၼၼ်ႉၸမ်ႉ၊ ပဵၼ်ၼမ်ႉမေႃႇ ဢၼ်ထႃႇဝရႃႉၽြႃး ဢဝ်လွင်ႈမၼ်းမီးဢမိင်ႉတီႈမူဝ်းသေႇလႄႈဝႃႈ၊ ႁႂ်ႈၵူၼ်းတင်းလၢႆၸူႉၵၼ်တုမ်ၵၼ်တႃႉ။ ၵဝ်တၵ်းပၼ်ၼမ်ႉတီႈၶဝ်ဢေႃႈ၊ ဝႃႈၼင်ႇၼႆၼၼ်ႉဢေႃႈ။- 17မိူဝ်ႈၼၼ်ႉ မဵဝ်းဢီႉသရေႇလႃႉဢွၼ်ၵၼ်ႁဵတ်းၵႂၢမ်းလႄႈဝႃႈ၊ ၼမ်ႉမေႃႇဢိူၺ်း၊ ဢွၵ်ႇတႃႉ။ သူဢွၼ်ၵၼ်ႁဵတ်းၵႂၢမ်းတီႈမၼ်းတႃႉ။- 18ၼမ်ႉမေႃႇဢၼ်မူးမၢတ်ႈၽွင်းမိူင်းတင်းလၢႆဢွၼ်ၵၼ်ၶုတ်း၊ ဢၼ်ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းတင်းလၢႆ ဢွၼ်ၵၼ်ဢဝ် တင်းၵၼ်းႁွၵ်ႇၶုၼ်တြႃး ဢိၵ်ႇတင်းၶွၼ်ႉတဝ်ႉၶဝ်ၶုတ်းၸွင်ၼၼ်ႉ၊ ဝႃႈၼင်ႇၼႆဢေႃႈ။ လုၵ်ႉသေၵႃႈတီႈထိူၼ်ႇၼၼ်ႉ ၸူးၵႃႈတီႈမတ်ႉတၼႃႇလႄႈသင်ႇ၊- 19ၶဝ်ဢွၼ်ၵၼ်လုၵ်ႉသေၵႃႈတီႈမတ်ႉတၼႃႇၼၼ်ႉ ၵႂႃႇတၢင်းပႆတၢင်းၸူးၵႃႈတီႈၼႁႃႇလျေးလႃႉ၊ သမ်ႉလုၵ်ႉသေၵႃႈတီႈၼႁႃႇလျေးလႃႉၼၼ်ႉ ၸူးၵႃႈတီႈပႃႇမုတ်ႉ၊- 20သမ်ႉလုၵ်ႉသေၵႃႈတီႈပႃႇမုတ်ႉၼၼ်ႉ ၸူးၵႃႈတီႈ ႁူၺ်ႈႁွင်ႈဢၼ်မီးၵႃႈၼႂ်းပၢင်ႇမိူင်းမေႃႇၽႃႉ ၵႃႈၼိူဝ်ပၢႆလွႆပီႉသၵႃႇ ဢၼ်ဝၢႆႇၼႃႈတေႃႇထိူၼ်ႇယေႇသီႉမုၼ်ႇယူႇၼၼ်ႉဢေႃႈ။

21မိူဝ်ႈၼၼ်ႉမဵဝ်းဢီႉသရေႇလႃႉ ပွႆႇၸႂ်ႉသၢၼ်ႇတမၢၼ်ႇတင်းလၢႆ ၵႂႃႇၸူးၵႃႈတီႈသီႉႁုၼ်ႇၶုၼ်ႁေႃၶမ်း ဢႃႇမေႃးရီႉ သေယဝ်ႉ၊ ယွၼ်းဢၶႂၢင်ႉလႄႈဝႃႈ၊- 22ႁႂ်ႈၵဝ်ၶႃႈလႆႈပႆလတ်းၵႃႈၼႂ်းၵၢင်မိူင်းၸဝ်ႈႁဝ်းလႄႈၵႂႃႇသေၵမ်း။ ႁဝ်းၶႃႈဢမ်ႇဝႄႉဢမ်ႇၶဝ်ႈၵႃႈၼႂ်းႁႆႊၼႃး သူၼ်ဢူးယဵၼ်ႇၸပိတ်ႈ တင်းလၢႆၶႃႈ။ ႁဝ်းၶႃႈဢမ်ႇၵိၼ်ၼမ်ႉတီႈၼမ်ႉမေႃႇၶႃႈ။ ႁဝ်းၶႃႈတၵ်းပႆၸွမ်း ၵႃႈတီႈသဵၼ်ႈတၢင်းၶုၼ်ၵူၺ်း တေႃႇထိုင်ႁွတ်ႈႁႂ်ႈထၼ်ႈပေႃး ပူၼ်ႉလႅၼ်လိၼ်မိူင်းၸဝ်ႈႁဝ်းၼၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။- 23ၶုၼ်သီႉႁုၼ်ႇၼၼ်ႉဢမ်ႇပၼ်ဢၶႂၢင်ႉ ဢၼ်လႆႈပႆလတ်းၵႃႈၼႂ်းၵၢင်မိူင်းမၼ်းၵႂႃႇၼၼ်ႉတီႈမဵဝ်းဢီႉသရေႇလႃႉ။ ၶုၼ်သီႉႁုၼ်ႇၼၼ်ႉ သမ်ႉႁႂ်ႈၵူၼ်းမၼ်းတင်းသဵင်ႈတင်းလူင် ၸူႉၵၼ်တုမ်ၵၼ်သေလႄႈ ဢွၵ်ႇၵႂႃႇၵႃႈတီႈထိူၼ်ႇ ၸူးတီႈဢၼ်ၶဝ်မီးၼၼ်ႉ ႁႂ်ႈလႆႈႁၢမ်ႈတၢပ်ႈႁႄႉၶႅၼ် မဵဝ်းဢီႉသရေႇလႃႉလႄႈ ႁွတ်ႈထိုင်ၵႃႈတီႈ ဝဵင်းယႃႇႁတ်ႉသေယဝ်ႉ၊ တိုၵ်းတေႃးမဵဝ်းဢီႉသရေႇလႃႉဢေႃႈ။- 24မဵဝ်းဢီႉသရေႇလႃႉတိုၵ်းတေႃးယႃႉပႅတ်ႈၶုၼ်ၼၼ်ႉ လူၺ်ႈၶူမ်းလၢပ်ႇၶူမ်းလႅဝ်းလႄႈ သိမ်းဢဝ်လိၼ်ဢၼ်ၶုၼ်ၼၼ်ႉပိူင်ႇဢဝ်ၵႃႈတီႈ ၸႃႉၸဵမ်ၼမ်ႉႁွင်ႈဢႃႇၼုၼ်ႇတေႃႇထိုင်ႁွတ်ႈၼမ်ႉႁွင်ႈယပ်ႉပုတ်ႉ ဢၼ်ဝႃႈတီႈယူႇၵူၼ်းမဵဝ်းဢမ်ႇမုၼ်ႇၼၼ်ႉဢေႃႈ။- 25ၼင်ႇၼၼ်လႄႈ မဵဝ်းဢီႉသရေႇလႃႉသိမ်းဢဝ်ဝဵင်းၵႃႈမီးၼၼ်ႉဢေႃႈ။ မဵဝ်းဢီႉသရေႇလႃႉဢွၼ်ၵၼ်ယူႇၵႃႈၼႂ်းဝဵင်း ဢၼ်ၵူၼ်းမဵဝ်းဢႃႇမေႃးရီႉယူႇၵႃႈမီးဢၼ်ဝႃႈ ဝဵင်းႁေႇသၽုၼ်ႇဢိၵ်ႇတင်းၵႃႈပဵၼ် ဝၢၼ်ႈလဵၵ်ႉဝဵင်းၼွႆႉမၼ်း တင်းသဵင်ႈတင်းလူင်ၼၼ်ႉဢေႃႈ။- 26ဝဵင်းႁေႇသၽုၼ်ႇၸမ်ႉ၊ ပဵၼ်ဝဵင်းသီႉႁုၼ်ႇၶုၼ်ႁေႃၶမ်းဢႃႇမေႃးရီႉ ဢၼ်တိုၵ်းသိုၵ်းၵၼ်တင်းၶုၼ်ႁေႃၶမ်း ဢၼ်ဢုပ်ႉပိူင်ႇမိူင်းမေႃႇၽႃႉ မိူဝ်ႈဢွၼ်တၢင်းၼၼ်ႉလႄႈ ႁိမ်ဢဝ်မိူင်းမၼ်းတင်းသဵင်ႈတင်းလူင်တေႃႇထိုင်ႁွတ်ႈ ၼမ်ႉႁွင်ႈဢႃႇၼုၼ်ႇၼၼ်ႉဢေႃႈ။- 27သြႃႇလၢင်ႇၵႃႇ#21:27 သြႃႇလၢင်ႇၵႃႇ ၶႂ်ႈဝႃႈ မေႃၸၢပ်ႈၵႂၢမ်းၵပ်းထုၵ်ႇ ဢဝ်လွင်ႈၼၼ်ႉသေလႄႈ ၸၢပ်ႈလႄႈဝႃႈ၊ ဢွၼ်ၵၼ်ၵႂႃႇၵႃႈတီႈဝဵင်းႁေႇသၽုၼ်ႇတႃႉ။ ႁႂ်ႈသမ်ႉၶိုၼ်းမႄးၵုမ်းမႄးႁဵတ်း ဝဵင်းၶုၼ်သီႉႁုၼ်ႇလႄႈ ႁႂ်ႈမၼ်းသမ်ႉၶိုၼ်းတႄႇပဵၼ်တႃႉ။- 28ပဵဝ်ၽႆးဢွၵ်ႇသေၵႃႈၼႂ်းဝဵင်းႁေႇသၽုၼ်ႇ၊ ၽႆးလုၵ်ႉဢွၵ်ႇသေၵႃႈၼႂ်းဝဵင်းၶုၼ်သီႉႁုၼ်ႇၼၼ်ႉလႄႈ မႆႈဝဵင်းဢႃႇရႃႉ မိူင်းမေႃႇၽႃႉ ဢိၵ်ႇတင်းၶုၼ်ၸိူဝ်းဢၼ်ဢုပ်ႉပိူင်ႇၵႃႈတီႈ ဢၼ်ပဵၼ်ဢၼ်သုင်ၵႃႈတီႈႁိမ်း ၼမ်ႉႁွင်ႈဢႃႇၼုၼ်ႇၸိူဝ်းၼၼ်ႉယဝ်ႉ။- 29မိူင်းမေႃႇၽႃႉဢိူၺ်း၊ မႂ်းမီးဢႃႉမင်ႇၵလႃႇဢေႃႈ။ တပႄးတပၢၼ်းၶႄးမူႉသႃႉၶဝ်ဢိူၺ်း၊ ဢၵျူဝ်းသူလူႉၵႂႃႇယဝ်ႉ။ ၽြႃးၼၼ်ႉ ပၼ်ဢၶႂၢင်ႉဢၼ်လုၵ်ႈၸၢႆးမၼ်းတင်းလၢႆလႆႈပၢႆႈလႆႈၼီ၊ ဢၼ်လုၵ်ႈယိင်းမၼ်းတင်းလၢႆ လႆႈၶၢမ်ႇတၢင်းဢၼ်တီႉလႆႈၼၼ်ႉတီႈသီႉႁုၼ်ႇၶုၼ်ႁေႃၶမ်း ဢႃႇမေႃးရီႉယဝ်ႉလူင်ပႄႇ။- 30ႁဝ်းသမ်ႉတိုၵ်းတေႃးၶဝ်လႄႈ မိူင်းႁေႇသၽုၼ်ႇ လူႉလႅဝ်တေႃႇထိုင်ႁွတ်ႈဝဵင်းတီႉၽုၼ်ႇယဝ်ႉ။ ႁဝ်းပႄႇၽဵဝ်ႈပႅတ်ႈ ၶဝ်တေႃႇထိုင်ႁွတ်ႈ ဝဵင်းၼေႃႇၽႃႉ ဢၼ်ၸပ်းႁိမ်းဝဵင်းမေႇတေႇၽႃႉၼၼ်ႉယဝ်ႉယဝ်ႉ၊ ဝႃႈၼင်ႇၼႆဢေႃႈ။

31ၼင်ႇၼၼ်လႄႈ ၵူၼ်းမဵဝ်းဢီႉသရေႇလႃႉတင်းလၢႆ လႆႈယူႇၵႃႈၼႂ်းမိူင်းဢႃႇမေႃးရီႉဢေႃႈ။- 32မူဝ်းသေႇၵေႃႈ ပွႆႇၸႂ်ႉၵူၼ်း ႁႂ်ႈလႆႈလွမ်တူၺ်း ဝဵင်းယႃႇၸႃႇသေလႄႈ ၶဝ်ႈသိမ်းဢဝ်ဝၢၼ်ႈလဵၵ်ႉဝဵင်းၼွႆႉမၼ်းၼၼ်ႉလႄႈ ႁေႃႈၵူၼ်းမဵဝ်းဢႃႇမေႃးရီႉ ဢၼ်ယူႇၵႃႈတီႈၼၼ်ႈၸိူဝ်းၼၼ်ႉဢွၵ်ႇပႅတ်ႈဢေႃႈ။

33ၶဝ်ဢွၼ်ၵၼ်ငႅၵ်းလႄႈ ၸွမ်းသဵၼ်ႈတၢင်းဢၼ်ၵႂႃႇၸူးၵႃႈတီႈမိူင်းပႃႇသၢၼ်ႇဢေႃႈ။ ဢေႃႇၶႃႉၶုၼ်ႁေႃၶမ်းပႃႇသၢၼ်ႇၼၼ်ႉ ပႃးဢဝ်ၵူၼ်းမၼ်းတင်းသဵင်ႈတင်းလူင် ၶီႇဢွၵ်ႇၸူးႁႂ်ႈလႆႈတိုၵ်းတေႃးၶဝ် ၵႃႈၼႂ်းတီႈဢေႇတြီႉဢေႃႈ။- 34ထႃႇဝရႃႉၽြႃးမီးဢမိင်ႉတီႈမူဝ်းသေႇလႄႈဝႃႈ၊ ယႃႇပေၵူဝ်မၼ်း။ ၵဝ်ဢဝ်မၼ်းတင်းၵူၼ်းမၼ်းတင်းသဵင်ႈတင်းလူင် ဢိၵ်ႇတင်းလိၼ်မၼ်းဢၢပ်ႈပၼ်ၵႃႈၼႂ်းမိုဝ်းမႂ်းယဝ်ႉ။ မႂ်းတၵ်းလႆႈႁဵတ်းတီႈမၼ်းမိူၼ်ၸိူဝ်ႉၼင်ႇဢၼ် မႂ်းႁဵတ်းတီႈသီႉႁုၼ်ႇၶုၼ်ႁေႃၶမ်း ဢႃႇမေႃးရီႉ ဢၼ်ယူႇၵႃႈတီႈဝဵင်းႁေႇသၽုၼ်ႇၼၼ်ႉဢေႃႈ၊ ဝႃႈၼင်ႇၼႆဢေႃႈ။- 35ၼင်ႇၼၼ်လႄႈ ၶဝ်ဢဝ်ၶုၼ်ၼၼ်ႉ တင်းလုၵ်ႈၸၢႆးမၼ်းတင်းလၢႆ ဢိၵ်ႇတင်းၵူၼ်းမၼ်းတင်းသဵင်ႈတင်းလူင် တၢႆတေႃႇထိုင်ႁွတ်ႈထၼ်ႈပေႃး ဢမ်ႇၵိုတ်းဢမ်ႇၵျၢၼ်ႇဝႆႉသေၵေႃႉသေၵူၼ်းလႄႈ သိမ်းဢဝ်မိူင်းမၼ်းဢေႃႈ။

Popular Bible Verses from
ၼႂ်းထိူၼ်ႇ 21

Bible:

Shan

Version: သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး - CBMS