ၼႂ်းထိူၼ်ႇ 5

1ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈ၊- 2သင်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆ ႁႂ်ႈၶဝ်ဢဝ်ၵေႃႉဢၼ်ပဵၼ်တုတ်ႈ၊ ၵေႃႉဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇ၊ ၵေႃႉဢၼ်တိူဝ်ႉထုၵ်ႇတူဝ်တၢႆမႅၼ်ႈလႄႈ ဢမ်ႇမူတ်းသႂ်ၼၼ်ႉ ၶျႃးပၼ်တီႈယူႇဝႆႉၵႃႈၼွၵ်ႈတပ်ႉတႃႉ။- 3သူတၵ်းလႆႈဢဝ်ၸဵမ်ယိင်းၸဵမ်ၸၢႆးတင်းသဵင်ႈတင်းလူင် ၶျႃးပၼ်တီႈယူႇဝႆႉၵႃႈတီႈၼွၵ်ႈဢေႃႈ။ သူတၵ်းလႆႈဢဝ်ၶဝ်ၶျႃးပၼ်တီႈယူႇဝႆႉၵႃႈၼွၵ်ႈတပ်ႉ ႁႂ်ႈၶဝ်ဢမ်ႇလႆႈႁႂ်ႈတပ်ႉၶဝ် ဢၼ်ၵဝ်ယူႇၵႃႈၼႂ်းၵၢင်မၼ်းၼၼ်ႉၵူဝ်ႈၵိူၵ်ႇဢေႃႈ၊ ဝႃႈၼင်ႇၼႆဢေႃႈ။- 4ၼင်ႇၼၼ်လႄႈ ၵူၼ်းမဵဝ်းဢီႉသရေႇလႃႉတင်းလၢႆ ဢွၼ်ၵၼ်ႁဵတ်းလႄႈ ဢဝ်ၶဝ်ၼၼ်ႉၶျႃးပၼ်တီႈယူႇဝႆႉ ၵႃႈၼွၵ်ႈတပ်ႉဢေႃႈ။ ၸွမ်းၵႃႈၼင်ႇဢၼ် ထႃႇဝရႃႉၽြႃးမီးဢမိင်ႉတီႈမူဝ်းသေႇၼၼ်ႉလႄႈ၊ ၵူၼ်းမဵဝ်းဢီႉသရေႇလႃႉတင်းလၢႆ ဢွၼ်ၵၼ်ႁဵတ်းၸိူဝ်ႉၼင်ႇၼၼ်ဢေႃႈ။

5ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 6သင်ႇလၢတ်ႈတီႈ ၵူၼ်းမဵဝ်းဢီႉသရေႇလႃႉတင်းလၢႆလႄႈဝႃႈ၊ ပေႃးၵူၼ်းၸၢႆး၊ ဢမ်ႇၼၼ် ၵူၼ်းယိင်း ႁဵတ်းတူႉၸရိူၵ်ႈ ဢၼ်ၵူၼ်းၸၢင်ႈႁဵတ်းလႄႈ ၽိတ်းပိူင်ႈထႃႇဝရႃႉၽြႃးသေယဝ်ႉ၊ ႁွတ်ႈထိုင်ဢပႅတ်ႈၸိုင်၊- 7မၼ်းတၵ်းလႆႈၽုၺ်ႇဢွၵ်ႇၼႄပျႃးဢပႅတ်ႈၼၼ်ႉလႄႈ တွင်းပၢၼ်ႇဢေႃႈ။ မၼ်းတၵ်းလႆႈဢဝ် တင်းသဵင်ႈတင်းမူတ်းၶိုၼ်းတႅၼ်းပၼ် ပုၼ်ႈဢၼ်မၼ်းၽိတ်းပိူင်ႈၼၼ်ႉလႄႈ ဢဝ်ႁႃႈပုၼ်ႈပုၼ်ႈၼိုင်ႈထၢပ်ႈထႅင်ႈလႄႈပၼ်တီႈၵေႃႉဢၼ် လႆႈၶၢမ်ႇတၢင်းဢၼ်ၽိတ်းပိူင်ႈၼၼ်ႉဢေႃႈ။- 8ပေႃးၵေႃႉဢၼ် ပဵၼ်ၵူၼ်းမဵဝ်းလဵဝ်ၵၼ်တင်းၵေႃႉၼၼ်ႉလႄႈ ထိူၵ်ႈၶၢမ်ႇဢဝ်ဢုၵ်ႉၸႃႇဢၼ်တႅၼ်းပၼ် ပုၼ်ႈဢပႅတ်ႈၼၼ်ႉဢမ်ႇမီးၸိုင်၊ တၢင်းဢၼ်တႅၼ်းပၼ်ၼၼ်ႉ တၵ်းလႆႈပုၵ်ႈၸေႃႇတီႈထႃႇဝရႃႉၽြႃး ပုၼ်ႈယိတ်ႈပရေႃးႁဵၵ်ႈဢေႃႈ။ ၼွၵ်ႈသေၼၼ်ႉ တၵ်းလႆႈပုၵ်ႈၸေႃႇသူဝ်းပေႃႈ ပုၼ်ႈယိတ်ႈဢၼ်ၽေႇဢပႅတ်ႈတူဝ်ၼိုင်ႈ ႁႂ်ႈဢဝ်ဢပႅတ်ႈပေႇဢေႃႈ။- 9တၢင်းပုၵ်ႈၸေႃႇဢၼ်ယုၵ်ႉယွင်ႈ ၵႃႈဢၼ်ပႃးၵႃႈၼႂ်းၶိူင်ႈပိူင်ဢၼ်မူတ်းၸၢင်ႇတင်းသဵင်ႈတင်းလူင် ဢၼ်ၵူၼ်းမဵဝ်း ဢီႉသရေႇလႃႉတင်းလၢႆ ဢဝ်မႃးပုၵ်ႈၸေႃႇတီႈယိတ်ႈပရေႃးႁဵၵ်ႈၼၼ်ႉ တၵ်းလႆႈပဵၼ်ဢုၵ်ႉၸႃႇမၼ်းၼၼ်ႉဢေႃႈ။- 10ၵႃႈဢၼ်ၵူၼ်းၵူႈၵေႃႉႁႂ်ႈမူတ်းၸၢင်ႇလႄႈ ဢဝ်လူႇတီႈယိတ်ႈပရေႃးႁဵၵ်ႈၼၼ်ႉ တၵ်းလႆႈပဵၼ်ဢုၵ်ႉၸႃႇ ယိတ်ႈပရေႃးႁဵၵ်ႈၼၼ်ႉဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

11ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 12သင်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆလႄႈဝႃႈ၊ ပေႃးမႄႈယိင်းဢၼ်မီးၽူဝ်ၼၼ်ႉ ၵူတ်ႉၵၼ်တင်းၵူၼ်းၸၢႆးတၢင်ႇၵေႃႉလႄႈ ၽိတ်းပိူင်ႈၽူဝ်မၼ်းလႄႈ၊- 13ၵူၼ်းၸၢႆးလႆႈၼွၼ်းလူၺ်ႈၵၼ်တင်းမၼ်းသေယဝ်ႉ၊ ၽူဝ်မၼ်းဢမ်ႇႁူႉဢမ်ႇႁၼ် သိူင်ႇမႅပ်ႉဢမူႉမၼ်းၼၼ်ႉဝႆႉယူႇ၊ သီႇလႃႉလူႉယူႇလႄႈသၢၵ်ႈသေႇဢမ်ႇမီး၊ ပိူၼ်ႈတၢင်ႇၵေႃႉဢမ်ႇထူပ်းဢမ်ႇႁၼ်မၼ်း ၼႂ်းမိူဝ်ႈဢၼ်မၼ်းယင်းတိုၵ်ႉၵူတ်ႉၵၼ်ယူႇၼၼ်ႉ၊- 14သီႇလႃႉဢမ်ႇလူႉသေဢမ်ႇဝႃႈ၊ ပေႃးၸႂ်ဢၼ်ဢမ်ႇယုမ်ႇၸပ်းၸွႆးၵေႃႉၼၼ်ႉလႄႈ၊ ၵေႃႉၼၼ်ႉဢမ်ႇယုမ်ႇမေးမၼ်းယူႇသေလႄႈ မၼ်းၼၼ်ႉသီႇလႃႉလူႉသေဢမ်ႇဝႃႈ၊ ပေႃးၸႂ်ဢၼ်ဢမ်ႇယုမ်ႇၸပ်းၸွႆးၵေႃႉၼၼ်ႉလႄႈ ၵေႃႉၼၼ်ႉဢမ်ႇယုမ်ႇမေးမၼ်းယူႇသေလႄႈ မေးမၼ်းၼၼ်ႉ သီႇလႃႉဢမ်ႇလူႉသေဢမ်ႇဝႃႈ၊- 15ၵေႃႉၼၼ်ႉတၵ်းလႆႈပႃးဢဝ်ၽွင်ၶဝ်ႈမုၼ်းမူႉယေႃးဢေးၽႃႇသိပ်းပုၼ်ႈပုၼ်ႈၼိုင်ႈ ပုၼ်ႈတၢင်းပုၵ်ႈၸေႃႇမႄႈယိင်းၼၼ်ႉသေလႄႈ ႁွင်ႉဢဝ်မၼ်းၵႂႃႇၵႃႈတီႈ ယိတ်ႈပရေႃးႁဵၵ်ႈဢေႃႈ။ ဢမ်ႇလႆႈဢဝ်ၼမ်ႉမၼ်းႁူတ်းၵႃႈၼိူဝ်ၽွင်ၶဝ်ႈမုၼ်းၼၼ်ႉ၊ ဢမ်ႇလႆႈဢဝ်လေႃႇပၢၼ်ႇတၢင်ႇသႂ်ႇ၊ ပဵၼ်ၶိူင်ႈပုၵ်ႈၸေႃႇ တၢင်းဢၼ်ဢမ်ႇယုမ်ႇမေး၊ ၶိူင်ႈပုၵ်ႈၸေႃႇတၢင်းဢၼ်ပၼ်သတီႉ ပုၼ်ႈဢၼ်မၼ်းၸဝ်ႈ တၵ်းၶုၵ်းၸႂ်လႆႈၶႆႈၸႂ်ထူပ်းဢပႅတ်ႈမၼ်းၼၼ်ႉဢေႃႈ။- 16ယိတ်ႈပရေႃးႁဵၵ်ႈတၵ်းလႆႈဢဝ်မၼ်းၼၼ်ႉလႄႈ ဝႆႉၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။- 17ယိတ်ႈပရေႃးႁဵၵ်ႈတၵ်းလႆႈဢဝ်ၼမ်ႉဢၼ်မူတ်းၸၢင်ႇထွၵ်ႇသႂ်ႇၵႃႈၼႂ်းမေႃႈလိၼ်လႄႈ ဢဝ်မုၼ်ႈလိၼ်ဢၼ်မီးၵႃႈတီႈဢၼ်သိူဝ်ႇဝႆႉၵႃႈတီႈသုမ်ႉထဵင်ၸဝ်ႈၼၼ်ႉသႂ်ႇၵႃႈၼႂ်းၼမ်ႉၼၼ်ႉဢေႃႈ။- 18ယိတ်ႈပရေႃးႁဵၵ်ႈတၵ်းလႆႈဢဝ်မႄႈယိင်းၼၼ်ႉဝႆႉၵႃႈတီႈၽၢႆႇၼႃႈထႃႇဝရႃႉၽြႃးလႄႈ ႁႂ်ႈမၼ်းၽႄႇၶူၼ်ႁူဝ်မၼ်းသေလႄႈ ဢဝ်တၢင်းပုၵ်ႈၸေႃႇဢၼ်ပၼ်သတီႉ ဢၼ်ဝႃႈတၢင်းပုၵ်ႈၸေႃႇ တၢင်းဢၼ်ဢမ်ႇယုမ်ႇမေးၼၼ်ႉ သႂ်ႇၵႃႈၼႂ်းမိုဝ်းမၼ်းဢေႃႈ။ ယိတ်ႈပရေႃးႁဵၵ်ႈၼၼ်ႉတၵ်းလႆႈယိပ်းၵမ်ဢဝ်ၼမ်ႉၶူမ် ဢၼ်ႁႂ်ႈၽေးတၢင်းဢၼ်ၵိၼ်ႇဢၼ်ဝႃႈပဵၼ်ၼၼ်ႉဢေႃႈ။- 19ၵမ်းၼၼ်ႉ ယိတ်ႈပရေႃးႁဵၵ်ႈတၵ်းလႆႈႁႂ်ႈမႄႈယိင်းၼၼ်ႉ ႁဵတ်းတၢင်းဢၼ်ၵိၼ်ႇဢၼ်ဝႃႈလႄႈလၢတ်ႈတီႈမႄႈယိင်းၼၼ်ႉလႄႈဝႃႈ၊ ပေႃးၵူၼ်းၸၢႆးဢမ်ႇလႆႈၼွၼ်းလူၺ်ႈၵၼ်တင်းမႂ်းလႄႈ မႂ်းဢမ်ႇၽိတ်းပိူင်ႈၵၼ်တင်းၵူၼ်းၸၢႆးတၢင်ႇၵေႃႉ ၼွၵ်ႈသေၽူဝ်မႂ်း ႁႂ်ႈတူဝ်မႂ်းၵူဝ်ႈၵိူၵ်ႇၸိုင်၊ ႁႂ်ႈမႂ်းၵၢင်းလွတ်ႈတင်းၼမ်ႉၶူမ်ဢၼ်ႁႂ်ႈၽေးတၢင်းဢၼ်ၵိၼ်ႇဢၼ်ဝႃႈပဵၼ်ၼႆႉသေၵမ်းလူၺ်ႈ။- 20ၵူၺ်းၵႃႈ ပေႃးမႂ်းမီးတၢင်းဢၼ်ၽိတ်းပိူင်ႈၵၼ်တင်းၵူၼ်းၸၢႆးတၢင်ႇၵေႃႉ ၼွၵ်ႈသေၽူဝ်မႂ်းၼၼ်ႉ ႁႂ်ႈတူဝ်မႂ်းၵူဝ်ႈၵိူၵ်ႇလႄႈ ၼွၵ်ႈသေၽူဝ်မႂ်းၼၼ်ႉ၊ ၵူၼ်းၸၢႆးတၢင်ႇၵေႃႉ လႆႈၼွၼ်းလူၺ်ႈၵၼ်တင်းမႂ်းၸိုင်၊ ဝႃႈၼင်ႇၼႆသေလႄႈ၊- 21ယိတ်ႈပရေႃးႁဵၵ်ႈၼၼ်ႉ ႁႂ်ႈမႄႈယိင်းၼၼ်ႉႁဵတ်းတၢင်းဢၼ်ၵိၼ်ႇဢၼ်ဝႃႈသေယဝ်ႉ၊ ယိတ်ႈပရေႃးႁဵၵ်ႈၼၼ်ႉ တၵ်းလႆႈလၢတ်ႈတီႈမႄႈယိင်းၼၼ်ႉလႄႈဝႃႈ ႁႂ်ႈထႃႇဝရႃႉၽြႃး ၸီႇယၢင်ႇႁႂ်ႈမႂ်းပဵၼ်ၵေႃႉဢၼ်ထုၵ်ႇလီၵိၼ်ႇလီဝႃႈ၊ ၵေႃႉဢၼ်လႆႈၶၢမ်ႇတၢင်းဢၼ် ပိူၼ်ႈဢဝ်ႁဵတ်းတီႈဢၼ်လီမၢတ်ႈလီတွင်းသေလႄႈၵိၼ်ႇဝႃႈ ၼႂ်းမိူဝ်ႈဢၼ်မၼ်းၸဝ်ႈ ႁႂ်ႈၶႃမႂ်းယွမ်ႁဵဝ်ႇလႄႈ ႁႂ်ႈပုမ်မႂ်းၵႂ်ႈၼၼ်ႉသေၵမ်းလူၺ်ႈ။- 22ၼမ်ႉဢၼ်ႁႂ်ႈၽေးတၢင်းဢၼ်ၵိၼ်ႇဢၼ်ဝႃႈပဵၼ်ၼႆႉ တၵ်းၶဝ်ႈၵႃႈၼႂ်းတွင်ႉမႂ်းလႄႈ ႁႂ်ႈပဵၼ်တၢင်းဢၼ်ပုမ်ၵႂ်ႈပုမ်ပႅင်၊ တၢင်းဢၼ်ၶႃယွမ်ၶႃႁဵဝ်ႇသေၵမ်းလူၺ်ႈ၊ ဝႃႈၼင်ႇၼႆသေယဝ်ႉ၊ မႄႈယိင်းၼၼ်ႉတၵ်းလႆႈၶိုၼ်းလၢတ်ႈလႄႈဝႃႈ၊ ဢႃႇမိၼ်ႇ၊ ဢႃႇမိၼ်ႇ၊ ဝႃႈၼင်ႇၼႆဢေႃႈ။- 23ယိတ်ႈပရေႃးႁဵၵ်ႈၼၼ်ႉတၵ်းလႆႈတႅမ်ႈတၢင်းဢၼ်ၵိၼ်ႇဢၼ်ဝႃႈၸိူဝ်းၼၼ်ႉ သႂ်ႇၵႃႈၼႂ်းလိၵ်ႈလႄႈသမ်ႉဢဝ်တင်းၼမ်ႉၶူမ် ၶျေႇမွတ်ႇသႂ်ႇသေယဝ်ႉ၊- 24ဢဝ်ၼမ်ႉၶူမ် ဢၼ်ႁႂ်ႈၽေးတၢင်းဢၼ်ၵိၼ်ႇဢၼ်ဝႃႈပဵၼ်ၼၼ်ႉ တိုၵ်းပၼ်တီႈမႄႈယိင်းၼၼ်ႉဢေႃႈ။ ၼမ်ႉဢၼ်ႁႂ်ႈၽေး တၢင်းဢၼ်ၵိၼ်ႇဢၼ်ဝႃႈပဵၼ်ၼၼ်ႉ တၵ်းၶဝ်ႈၵႃႈၼႂ်းမၼ်းလႄႈၶူမ်ဢေႃႈ။- 25ၵမ်းၼၼ်ႉ ယိတ်ႈပရေႃးႁဵၵ်ႈၼၼ်ႉ တၵ်းလႆႈဢဝ်ၶိူင်ႈပုၵ်ႈၸေႃႇ တၢင်းဢၼ်ဢမ်ႇယုမ်ႇမေးၼၼ်ႉ ဢွၵ်ႇသေၵႃႈၼႂ်းမိုဝ်းမႄႈယိင်းၼၼ်ႉလႄႈ ယွင်ႈၵႂႆၵႃႈတီႈၽၢႆႇၼႃႈထႃႇဝရႃႉၽြႃးသေယဝ်ႉ၊ ဢဝ်မႃးၸူးၵႃႈတီႈယိတ်ႈပလၢင်ႇဢေႃႈ။- 26ၵမ်းၼၼ်ႉ ယိတ်ႈပရေႃးႁဵၵ်ႈၼၼ်ႉ တၵ်းလႆႈဢဝ်ၵႃႈၼႂ်းၶိူင်ႈပုၵ်ႈၸေႃႇၼၼ်ႉ ၽွင်ၶဝ်ႈမုၼ်းဝၵ်ႉမိုဝ်းၼိုင်ႈ ဢၼ်ဝႃႈပုၼ်ႈတႃႇဢၼ်ႁႂ်ႈမၼ်းၸဝ်ႈ ၶုၵ်းၸႂ်လႆႈၶႆႈၸႂ်ထူပ်းၼၼ်ႉ တုတ်ႇၽႆးၵႃႈၼိူဝ်ယိတ်ႈပလၢင်ႇလႄႈ လိုၼ်းၼၼ်ႉၸင်ႇ တၵ်းလႆႈႁႂ်ႈမႄႈယိင်းၼၼ်ႉ ၵိၼ်ၼမ်ႉၼၼ်ႉဢေႃႈ။- 27မိူဝ်ႈဢၼ်မၼ်းႁႂ်ႈမႄႈယိင်းၼၼ်ႉ ၵိၼ်ၼမ်ႉၼၼ်ႉယဝ်ႉၼၼ်ႉ၊ ပေႃးမၼ်းၼၼ်ႉမီးတၢင်းဢၼ်ၵူဝ်ႈၵိူၵ်ႇလႄႈ လႆႈၽိတ်းပိူင်ႈၽူဝ်မၼ်းၸိုင်၊ ၼမ်ႉဢၼ်ႁႂ်ႈၽေးတၢင်းဢၼ်ၵိၼ်ႇဢၼ်ဝႃႈပဵၼ်ၼၼ်ႉ တၵ်းၶဝ်ႈၵႂႃႇၵႃႈၼႂ်းမၼ်းလႄႈ ပဵၼ်ဢၼ်ၶူမ်သေယဝ်ႉ၊ ပုမ်မၼ်းတၵ်းၵႂ်ႈတၵ်းပႅင်၊ ၶႃမၼ်းတၵ်းယွမ်တၵ်းႁဵဝ်ႇလႄႈ မႄႈယိင်းၼၼ်ႉ တၵ်းပဵၼ်ၵေႃႉဢၼ်ထုၵ်ႇလီၵိၼ်ႇလီဝႃႈ ၵႃႈတီႈၼႂ်းမဵဝ်းမၼ်းဢေႃႈ။- 28ပေႃးမႄႈယိင်းၼၼ်ႉ သီႇလႃႉယင်းဢမ်ႇလူႉလႄႈ မီးတၢင်းဢၼ်မူတ်းသႂ်ယူႇၸိုင်၊ မၼ်းတၵ်းၵၢင်းလွတ်ႈတင်းၽေးလႄႈ မီးဢၶႂၢင်ႉဢၼ်လႆႈပႃးပတိၵ်ႉသၼ်ႇထေႇဢေႃႈ။- 29ဢၼ်ၼႆႉၸမ်ႉ၊ ပဵၼ်တြႃးတၢင်းဢၼ်ၸႂ်ဢၼ်ဢမ်ႇယုမ်ႇၸပ်းၸွႆး ၼႂ်းမိူဝ်ႈဢၼ်မႄႈယိင်းၵူတ်ႉၵၼ်တင်းၵူၼ်းၸၢႆးတၢင်ႇၵေႃႉ ၼွၵ်ႈသေၽူဝ်မၼ်းလႄႈ မီးတၢင်းဢၼ်ၵူဝ်ႈၵိူၵ်ႇ၊- 30ဢမ်ႇၼၼ်ၵေႃႈ ၼႂ်းမိူဝ်ႈဢၼ် ၸႂ်ဢၼ်ၵူၼ်းၸၢႆးဢမ်ႇယုမ်ႇၸပ်းၸွႆးယူႇလႄႈ မၼ်းဢမ်ႇယုမ်ႇမေးမၼ်းၼၼ်ႉဢေႃႈ။ မၼ်းတၵ်းလႆႈဢဝ်မေးမၼ်းၼၼ်ႉ ဝႆႉၵႃႈတီႈၽၢႆႇၼႃႈထႃႇဝရႃႉၽြႃးလႄႈ ယိတ်ႈပရေႃးႁဵၵ်ႈ တၵ်းလႆႈၸီႇယၢင်ႇၸွမ်းၼင်ႇတြႃးၼႆႉဢေႃႈ။- 31ၵူၼ်းၸၢႆးၼၼ်ႉတၵ်းလႆႈၵၢင်းလွတ်ႈတင်းဢပႅတ်ႈလႄႈ မႄႈယိင်းၼၼ်ႉတၵ်းလႆႈၶၢမ်ႇဢပႅတ်ႈမၼ်းဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

Popular Bible Verses from
ၼႂ်းထိူၼ်ႇ 5

Bible:

Shan

Version: သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး - CBMS