ၼႂ်းထိူၼ်ႇ 6
6
ထုင်းတြႃးပုၼ်ႈၵူၼ်းၵိူင်းၼႃႇၸရီႉ
1ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 2သင်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆလႄႈဝႃႈ၊ ပဵၼ်ၵူၼ်းၸၢႆးသေဢမ်ႇဝႃႈ၊ ပဵၼ်ၵူၼ်းယိင်းသေဢမ်ႇဝႃႈ၊ မိူဝ်ႈဢၼ်ၽႄတူဝ်ၸဝ်ႈၵဝ်ႇဝႆႉလႄႈ ႁဵတ်းၵတီႉသဵတ်ႈၸႃႇ ၼႃႇၸရီႉ ႁႂ်ႈတူဝ်ၸဝ်ႈၵဝ်ႇလႆႈပႅၵ်ႇလႆႈပိူင်ႈ ပုၼ်ႈထႃႇဝရႃႉၽြႃး ၼၼ်ႉၸိုင်၊- 3မၼ်းတၵ်းလႆႈဝႄႈပႅတ်ႈ ၼမ်ႉၸပိတ်ႈတင်းလဝ်ႈဢေႃႈ။ ၼမ်ႉၸပိတ်ႈသူမ်ႈတင်းလဝ်ႈသူမ်ႈၵေႃႈ မၼ်းဢမ်ႇလႆႈၵိၼ်လႆႈသူတ်ႉ၊ ၼမ်ႉဢၼ်ဢဝ်တင်းမၢၵ်ႇၸပိတ်ႈႁဵတ်းၼၼ်ႉၸိုင်၊ ဢမ်ႇလႆႈၵိၼ်လႆႈသူတ်ႉလႃးလႃး။ မၢၵ်ႇၸပိတ်ႈဢၼ်လိပ်းဢၼ်ႁႅင်ႈၵေႃႈ မၼ်းဢမ်ႇလႆႈၵိၼ်လႆႈၶူပ်း။- 4ၶိင်ႇၵႃႇလႃႉမိုဝ်ႉဝၼ်းၵႃႈဢၼ်မၼ်းပႅၵ်ႇပိူင်ႈသေလႄႈယူႇၼၼ်ႉ၊ မၼ်းဢမ်ႇလႆႈၵိၼ် ၸႃႉၸဵမ်ၵႅၼ်ၼႂ်းမၢၵ်ႇၸပိတ်ႈ တေႃႇထိုင်ႁွတ်ႈပိူၵ်ႇမၢၵ်ႇၸပိတ်ႈ ၵႃႈဢၼ်ဢဝ်ၵႃႈတီႈတူၼ်ႈမၢၵ်ႇၸပိတ်ႈႁဵတ်းၼၼ်ႉ။- 5ၶိင်ႇၵႃႇလႃႉမိုဝ်ႉဝၼ်း ၵႃႈဢၼ်မၼ်းပႂ်ႉၵတီႉသဵတ်ႈၸႃႇတၢင်းဢၼ်ပႅၵ်ႇပိူင်ႈသေလႄႈယူႇၼၼ်ႉ မိတ်ႈဢၼ်ထႃၶူၼ်ႁူဝ် ဢမ်ႇလႆႈႁွတ်ႈထိုင်ၵႃႈၼိူဝ်ႁူဝ်မၼ်း။ တေႃႇထိုင်ႁွတ်ႈၸူဝ်ႈဢၼ်ၶိင်ႇၵႃႇလႃႉမိုဝ်ႉဝၼ်းဢၼ် ႁႂ်ႈတူဝ်ၸဝ်ႈၵဝ်ႇပႅၵ်ႇပိူင်ႈ ပုၼ်ႈထႃႇဝရႃႉၽြႃးၼၼ်ႉ ဢမ်ႇပႆႇၸေးၼၼ်ႉၸိုင်၊ မၼ်းတၵ်းလႆႈမူတ်းၸၢင်ႇလႄႈ ႁႂ်ႈမုၵ်ႉၶူၼ်ႁူဝ်မၼ်းလႆႈဢွၵ်ႇမႃးယၢဝ်းမႃးယူႇဢေႃႈ။- 6ၶိင်ႇၵႃႇလႃႉမိုဝ်ႉဝၼ်း ၵႃႈဢၼ်မၼ်းႁႂ်ႈတူဝ်ၸဝ်ႈၵဝ်ႇပႅၵ်ႇပိူင်ႈပုၼ်ႈထႃႇဝရႃႉၽြႃးသေလႄႈယူႇၼၼ်ႉ၊ မၼ်းဢမ်ႇလႆႈသုတ်ႉၸပ်းသုတ်ႉၸူးတူဝ်တၢႆ။- 7ၵွပ်ႈပိူဝ်ႈဢၼ်ႁႂ်ႈႁူဝ်မၼ်းပႅၵ်ႇပိူင်ႈပုၼ်ႈၽြႃးပဵၼ်ၸဝ်ႈမၼ်းလႄႈ၊ မႂ်းဢမ်ႇလႆႈၶၢမ်ႇတၢင်းဢၼ်ၵူဝ်ႈၵိူၵ်ႇပုၼ်ႈ ပေႃႈမႄႈမၼ်း၊ ပီႈၸၢႆးၼွင်ႉၸၢႆးမၼ်း၊ ပီႈၼၢင်းၼွင်ႉယိင်းမၼ်း မိူဝ်ႈဢၼ်ၶဝ်တၢႆၼၼ်ႉ။- 8ၶိင်ႇၵႃႇလႃႉမိုဝ်ႉဝၼ်း ၵႃႈဢၼ်မၼ်းႁႂ်ႈတူဝ်ၸဝ်ႈၵဝ်ႇပႅၵ်ႇပိူင်ႈပုၼ်ႈထႃႇဝရႃႉၽြႃးသေလႄႈယူႇၼၼ်ႉ မၼ်းတၵ်းလႆႈမူတ်းၸၢင်ႇပုၼ်ႈထႃႇဝရႃႉၽြႃးဢေႃႈ။- 9ပေႃးသေၵေႃႉသေၵူၼ်း ၶီႉၶႃႉတၢႆၵႃႈတီႈႁိမ်းမၼ်းၵမ်းလဵဝ်လႄႈ ႁႂ်ႈႁူဝ်မၼ်းဢၼ်မၼ်းႁႂ်ႈပႅၵ်ႇပိူင်ႈၼၼ်ႉၵူဝ်ႈၵိူၵ်ႇၸိုင်၊ ၼႂ်းဝၼ်းဢၼ်ႁႂ်ႈမူတ်းသႂ်ဢၼ်ဝႃႈ ဝၼ်းသတ်ႉတမႃႉၼၼ်ႉ၊ မၼ်းတၵ်းလႆႈထႃၶူၼ်ႁူဝ်မၼ်းဢေႃႈ။- 10ၼႂ်းဝၼ်းဢႃႉထမႃႉၼၼ်ႉ၊ မၼ်းတၵ်းလႆႈဢဝ်ၼူၵ်ႉတူႈသွင်တူဝ်၊ ဢမ်ႇၼၼ်ၵေႃႈ ၵႃၵႄဢွၼ်ႇသွင်တူဝ်သေလႄႈ မႃးၵႃႈတီႈယိတ်ႈပရေႃးႁဵၵ်ႈၵႃႈတီႈၽၢႆႇၼႃႈၽၵ်းတူမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈဢေႃႈ။- 11ယိတ်ႈပရေႃးႁဵၵ်ႈတၵ်းလႆႈဢဝ်ပုၵ်ႈၸေႃႇပုၼ်ႈယိတ်ႈဢၼ်ၽေႇဢပႅတ်ႈတူဝ်ၼိုင်ႈ၊ ပုၼ်ႈယိတ်ႈဢၼ်တုတ်ႇၽႆးတူဝ်ၼိုင်ႈလႄႈ ႁဵတ်းတၢင်းဢၼ်ၽေႇဢပႅတ်ႈ ဢၼ်ႁွတ်ႈထိုင်ၵႃႈတီႈမၼ်းၵွပ်ႈပိူဝ်ႈတူဝ်တၢႆၼၼ်ႉသေယဝ်ႉ၊ ႁႂ်ႈႁူဝ်မၼ်းမူတ်းၸၢင်ႇၼႂ်းဝၼ်းၼၼ်ႉၵမ်းလဵဝ်ဢေႃႈ။- 12မၼ်းတၵ်းလႆႈ သမ်ႉႁႂ်ႈၶိင်ႇၵႃႇလႃႉဢၼ်ႁႂ်ႈပႅၵ်ႇပိူင်ႈမိူဝ်ႈဢွၼ်တၢင်းၼၼ်ႉ ၶိုၼ်းပႅၵ်ႇပိူင်ႈတီႈထႃႇဝရႃႉၽြႃးလႄႈ ဢဝ်သူဝ်းပေႃႈဢွၼ်ႇ ဢၼ်ဢမ်ႇပႆႇၶွပ်ႈၶူပ်ႇတူဝ်ၼိုင်ႈ ႁဵတ်းယိတ်ႈဢၼ်ၽေႇတူႉၸရိူၵ်ႈလႄႈပုၵ်ႈၸေႃႇဢေႃႈ။ ၵွပ်ႈပိူဝ်ႈဢၼ်တၢင်းဢၼ်ပႅၵ်ႇပိူင်ႈမိူဝ်ႈဢွၼ်တၢင်းၼၼ်ႉလူႉၵႂႃႇလႄႈ၊ ၶိင်ႇၵႃႇလႃႉဢၼ်ပူၼ်ႉမႃးၼၼ်ႉ တၵ်းလႆႈပဵၼ်ဢၼ်လၢႆလၢႆဢေႃႈ။
13တြႃးၵူၼ်းၼႃႇၸရီႉ ၶိင်ႇၵႃႇလႃႉမိုဝ်ႉဝၼ်းဢၼ်ပႅၵ်ႇပိူင်ႈသေလႄႈယူႇၼၼ်ႉ ထူၼ်ႈတဵမ်ယဝ်ႉၼၼ်ႉၸမ်ႉ၊ တၵ်းလႆႈဢဝ်မၼ်း မႃးၵႃႈတီႈၽၢႆႇၼႃႈၽၵ်းတူ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈလႄႈ၊- 14မၼ်းတၵ်းလႆႈဢဝ်တၢင်းပုၵ်ႈၸေႃႇမၼ်း ဢၼ်ဝႃႈသူဝ်းပေႃႈဢွၼ်ႇဢၼ်ဢမ်ႇပႆႇၶွပ်ႈၶူပ်ႇ ဢၼ်ဢမ်ႇပႃးဢပႅတ်ႈပုၼ်ႈယိတ်ႈဢၼ်တုတ်ႇၽႆးတူဝ်ၼိုင်ႈ၊ သူဝ်းမႄႈဢွၼ်ႇဢၼ်ဢမ်ႇပႆႇၶွပ်ႈၶူပ်ႇ၊ ဢၼ်ဢမ်ႇပႃးဢပႅတ်ႈပုၼ်ႈယိတ်ႈဢၼ်ၽေႇဢပႅတ်ႈတူဝ်ၼိုင်ႈ၊ ပႄႉပေႃႈဢၼ်ဢမ်ႇပႃးဢပႅတ်ႈပုၼ်ႈယိတ်ႈမိၵ်ႉသႃႇႁႃယႃႉတူဝ်ၼိုင်ႈ၊- 15ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈပဵတ်ႈၼိုင်ႈ ဢၼ်ဝႃႈၶဝ်ႈမုၼ်းၶႅပ်းဢၼ်ဢဝ်ၼမ်ႉမၼ်းသႂ်ႇလေႃးၽွင်မၼ်း၊ ၶဝ်ႈမုၼ်းၶွပ်ႈဢၼ်ဢမ်ႇပႃးၸိူဝ်ႉပႅင်ႈလႄႈဢဝ်ၼမ်ႉမၼ်းတႃးၼၼ်ႉ၊ တၢင်းပုၵ်ႈၸေႃႇၽေႃးၸဵၼ်ႇ၊ တၢင်းပုၵ်ႈၸေႃႇဢၼ်သွၼ်းလေႃႇၼၼ်ႉၸိူဝ်းၼၼ်ႉလႄႈ သၢၵ်ႈၵၢပ်ႈတီႈထႃႇဝရႃႉၽြႃးဢေႃႈ။- 16ယိတ်ႈပရေႃးႁဵၵ်ႈၼၼ်ႉ တၵ်းလႆႈဢဝ်တၢင်းပုၵ်ႈၸေႃႇၸိူဝ်းၼၼ်ႉ ၶဝ်ႈၸူးၵႃႈတီႈထႃႇဝရႃႉၽြႃးလႄႈ ပုၵ်ႈၸေႃႇယိတ်ႈဢၼ်ၽေႇဢပႅတ်ႈတင်းယိတ်ႈဢၼ်တုတ်ႇၽႆးၼၼ်ႉဢေႃႈ။- 17ယိတ်ႈပရေႃးႁဵၵ်ႈတၵ်းလႆႈဢဝ် ပႄႉပေႃႈပုၼ်ႈယိတ်ႈမိၵ်ႉသႃႇႁႃယႃႉ ဢိၵ်ႇတင်းၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈပဵတ်ႈၼိုင်ႈ၊ ပုၵ်ႈၸေႃႇတီႈထႃႇဝရႃႉၽြႃးဢေႃႈ။ တၢင်းပုၵ်ႈၸေႃႇၽေႃးၸဵၼ်ႇဢိၵ်ႇတင်း တၢင်းပုၵ်ႈၸေႃႇဢၼ်သွၼ်းလေႃႇၸိူဝ်းၼၼ်ႉၵေႃႈ ယိတ်ႈပရေႃးႁဵၵ်ႈတၵ်းလႆႈပုၵ်ႈၸေႃႇဢေႃႈ။- 18ၵူၼ်းၼႃႇၸရီႉ တၵ်းလႆႈထႃၶူၼ်ႁူဝ်မၼ်း ဢၼ်ပႅၵ်ႇပိူင်ႈၼၼ်ႉ ၵႃႈတီႈႁိမ်းၽၵ်းတူမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈလႄႈ ဢဝ်ၶူၼ်ႁူဝ်မၼ်း ဢၼ်ပႅၵ်ႇပိူင်ႈၼၼ်ႉ သႂ်ႇၵႃႈၼႂ်းၽႆးဢၼ်မီးတႂ်ႈယိတ်ႈမိၵ်ႉသႃႇႁႃယႃႉၼၼ်ႉဢေႃႈ။- 19ယိတ်ႈပရေႃးႁဵၵ်ႈတၵ်းလႆႈဢဝ်ႁူဝ်မႃႇပႄႉပေႃႈ ဢၼ်တူမ်ႈၼၼ်ႉၽၢၵ်ႇၼိုင်ႈ ၶဝ်ႈမုၼ်းၶႅပ်းဢၼ်ဢမ်ႇပႃးၸိူဝ်ႉပႅင်ႈၶႅပ်းၼိုင်ႈ၊ တင်းၶဝ်ႈမုၼ်းၶွပ်ႈဢၼ်ဢမ်ႇပႃးၸိူဝ်ႉပႅင်ႈၶႅပ်းၼိုင်ႈ သေၵႃႈတီႈၼႂ်းပဵတ်ႈၼၼ်ႉလႄႈ သႂ်ႇပၼ်ၵႃႈၼႂ်းမိုဝ်းၵူၼ်းၼႃႇၸရီႉ လိုၼ်းသေဢၼ်မၼ်းထႃၶူၼ်ႁူဝ်မၼ်း ဢၼ်ပႅၵ်ႇပိူင်ႈၼၼ်ႉယဝ်ႉၼၼ်ႉသေယဝ်ႉ၊- 20ယိတ်ႈပရေႃးႁဵၵ်ႈၼၼ်ႉ တၵ်းလႆႈဢဝ်ယွင်ႈၵႂႆပုၼ်ႈတၢင်းပုၵ်ႈၸေႃႇဢၼ်ယွင်ႈၵႂႆ ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။ ဢၼ်ၸိူဝ်းၼၼ်ႉ ဢိၵ်ႇတင်းႁူဝ်ဢူၵ်းဢၼ်ယွင်ႈၵႂႆ တင်းႁူဝ်မႃႇဢၼ်ယုၵ်ႉယွင်ႈၼၼ်ႉ တၵ်းလႆႈမူတ်းၸၢင်ႇ ပုၼ်ႈယိတ်ႈပရေႃးႁဵၵ်ႈဢေႃႈ။ လိုၼ်းၼၼ်ႉ ၵူၼ်းၼႃႇၸရီႉၼၼ်ႉ မီးဢၶႂၢင်ႉဢၼ်လႆႈၵိၼ်ၼမ်ႉၸပိတ်ႈဢေႃႈ။- 21ဢၼ်ၼႆႉၸမ်ႉ၊ ပဵၼ်တြႃးၵူၼ်းၼႃႇၸရီႉ ဢၼ်ႁဵတ်းသဵတ်ႈၸႃႇၼၼ်ႉ ဢိၵ်ႇတင်းတၢင်းပုၵ်ႈၸေႃႇဢၼ်မၼ်းႁဵတ်းတီႈထႃႇဝရႃႉၽြႃး ပုၼ်ႈတၢင်းဢၼ်မၼ်းပႅၵ်ႇပိူင်ႈၼၼ်ႉ ၼွၵ်ႈသေၵႃႈဢၼ်မၼ်းတၢတ်ႈၼိူင်ႇလႆႈၼၼ်ႉဢေႃႈ။ ၸွမ်းၵႃႈၼင်ႇဢၼ်မၼ်းႁဵတ်းၵတီႉသဵတ်ႈၸႃႇၼၼ်ႉ၊မၼ်းတၵ်းလႆႈႁဵတ်းမႅၼ်ႈၸွမ်းၼင်ႇတြႃး တၢင်းဢၼ်ပႅၵ်ႇပိူင်ႈၼၼ်ႉဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။
တၢင်းလီမင်ႇၵလႃႇဢၼ်ယိတ်ႈပရေႃးႁဵၵ်ႈပၼ်
22ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 23သင်ႇလၢတ်ႈတီႈဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉလႄႈဝႃႈ၊ ၵႂၢမ်းဢၼ်သူတၵ်းလႆႈပၼ်တၢင်းလီတီႈၵူၼ်းမဵဝ်းဢီႉသရေႇလႃႉတင်းလၢႆလႄႈ ဢွၵ်ႇသူပ်းဝႃႈၸမ်ႉ၊- 24ႁႂ်ႈထႃႇဝရႃႉၽြႃးပၼ်တၢင်းလီတီႈမႂ်းလႄႈ ပႂ်ႉလူပႂ်ႉတူၺ်းမႂ်းယူႇသေၵမ်းလူၺ်ႈ။- 25ႁႂ်ႈထႃႇဝရႃႉၽြႃးပွႆႇဢၼ်လႅင်းၼႃႈမၼ်းၸဝ်ႈ ထွင်ႇတီႈမႂ်းလႄႈ ႁဵတ်းၵျေးၸူးၵရူႉၼႃႇတီႈမႂ်းသေၵမ်းလူၺ်ႈ။- 26ႁႂ်ႈထႃႇဝရႃႉၽြႃးမုင်ႈတူၺ်းမႂ်းလႄႈ ပၼ်ၵတ်းယဵၼ်ၶျၢမ်းသႃႇတီႈမႂ်းသေၵမ်းလူၺ်ႈ၊ ဝႃႈၼင်ႇၼႆလႄႈ၊- 27ပေႃးၶဝ်ဢဝ်ၼႃႇမႃႉၸိုဝ်ႈသဵင်ၵဝ် တၢင်ႇပၼ်ၵႃႈၼိူဝ်ၵူၼ်းမဵဝ်းဢီႉသရေႇလႃႉတင်းလၢႆ ၸိူဝ်ႉၼင်ႇၼၼ်ၸိုင်၊ ၵဝ်တၵ်းပၼ်တၢင်းလီမင်ႇၵလႃႇ တီႈၶဝ်ၼၼ်ႉဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။
Currently Selected:
ၼႂ်းထိူၼ်ႇ 6: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship