Mateo 22
22
Miak'ãik'ari arapaapataɨ ewari k'orea nepɨrɨda
Luca 14:15-24
1Jesupa p'aarerã chi mãɨrã chaarearã́ mãɨnepa judiorã chaarearã́ mãicha jarateamaa beek'ari, nepɨrɨsima: 2«Pajãne Bɨpa ichidirã ichi juade ua bɨt'a nãɨ jĩra bɨma: ẽpẽra minachia k'awa bɨ basima. Miak'ãipataɨ arapaapataɨ ewari oopisima ichi warra pae. 3Chi ichi pae pari mimiapataɨrã peesima ichia ẽpẽrarã t'ɨ̃ pee bada atade wãnamẽrá. Maamina chedai k'ɨ̃rianaé pasima.
4»Maapae mãicha ichi pae mimiapataɨrã jara peek'ari, mãɨya jarasima: “Jarade wãpadade asima, mɨa t'ɨ̃ peedarã ẽpẽrarã chedamẽrá chik'o chuu nɨbɨẽra. Peapisima p'ak'a mãɨnepa ãnimara awara porek'ea berã. Mãɨ ãarea chuu nɨbɨẽra, chepadade asima miak'ãipataɨ arapaapataɨ tedea”. 5Maamina mãɨ ẽpẽrarãpa ũrinaé pasima ichia jara peeda. Abaɨpa ichi ĩjũa ak'ɨde wãsima. Abaɨ ichi ne netopataɨmá wãsima. 6Waapẽarãpa chi minachia k'awa bɨ mimiapataɨrã jitadak'ari jok'aedak'ari peasidama. 7Mãɨ k'orea chi minachia k'awa bɨ minachia k'ĩruusima. Ichi papaká berã peek'ari mãɨ ẽpẽrarã mĩa peapataɨrã jitadak'ari, k'enanak'ari, maapae ãchi p'uuru paasidama.
8»Mãɨya bak'ari chi minachia k'awa bɨpa ichi mimiapataɨrã́ jarasima: “Mɨ warra miak'ãipataɨ arapaapataɨ ewari oodaipɨ, maamina mɨa mãɨ t'ɨ̃ peedarã ẽpẽrarã nãma p'ananai pia bɨwẽma. 9Mãɨ k'orea waapẽarã ẽpẽrarã o becha jɨrɨde wãpadade asima. Mãrapa unuutarã́ jarapadade asima mɨ warra miak'ãipataɨ arapaapataɨ tedea chedamẽrá”. 10Ara mãɨne ichi mimiapataɨrã o becha wãsidama. Ẽpẽrarã chok'ará enemeesidama; ẽpẽrarã pia berã mãɨnepa mietá berã. Mãɨya ẽpẽrarã minachia ará nɨbeesima miak'ãipataɨ tede.
11»Chi minachia k'awa bɨpa t'ɨ̃ peedarã ak'ɨde wãside ẽpẽra aba unusima miak'ãipataɨ k'ak'apia neet'á jɨ̃wẽa bɨt'a. 12Chi minachia k'awa bɨpa mãɨ ẽpẽrá idisima: “K'õp'ãero, pɨ ¿sãmaasã́ nãma eda bɨma, neet'á k'ak'apiawẽa bɨt'a?” Mãɨ ẽpẽra k'ĩup'ea beesima. 13Mãɨne chi minachia k'awa bɨpa ichi mimiapataɨrã́ jarasima: “Nãɨ ẽpẽra jua mãɨnepa jĩru bɨradak'ari tajatá p'ãrionea ateewãt'ɨ. Mãma jẽa p'anapatama mãɨnepa p'uapa k'ida k'ɨterrea p'anapatama”. 14Tachi Ak'õrepa chok'ará t'ɨ̃ pee bɨma, maamina waibɨawẽa jɨrɨ ataipɨ».
Romanepema minachia k'awa bɨ pae erreara p'aadai k'orea jarateada
Marco 12:13-17; Luca 20:20-26
15Mãɨya bak'ari p'ariseorãpa pedea ausidama Jesua pedea ãyá pedeapidai k'orea. 16Mãɨ k'orea p'ariseorãpa ãchi ome p'ɨrrɨapataɨrã mãɨnepa Herode lawari p'anɨrã Jesumá peesidama. Mãɨrãpa Jesua jarasidama:
—Jarateaparí, taipa k'awa p'anɨma pɨ ẽpẽra jĩp'a bɨt'a. Abaɨ pida pɨá awara k'ɨ̃risiapik'ama, pɨa ẽpẽrarã ãarea abarik'a unupariideepuru. Mãɨpari Tachi Ak'õre o k'orea piarã jarateaparima. 17Mãɨya bɨpɨra taiyá jarase: Romanepema pae erreara jɨrɨp'epataɨ ¿tachi judiorãpa p'aadai pia bɨk'ãra wa mãɨyawẽ?
18Jesupa k'awa bada pẽra mãɨrãpa k'ɨ̃risia mietá uru p'anɨt'a, mãɨpuru mãɨya jarasima:
—Mãra ẽpẽerã pia jĩra berã, ¿k'ãre k'orea mɨá pedea piawẽa pedeapidayá jãɨya p'anɨma? 19Erreara tau tachia p'aapataɨ aba ak'ɨpit'ɨ.
Ara mãɨne erreara tau aba ak'ɨpisidama.#22:19 Erreara tau. Griego pedeade bɨ bɨma: denario p'arat'a tau. 20Jesupa ak'ɨk'ari idisima:
—¿K'ai k'ĩra nãɨne bɨ bɨma mãɨnepa k'ai t'ɨ̃ eda bɨ bɨma?
21Ãchia p'anoosidama:
—Romanepema chi atepe poro chaarea bɨdé.
Maapae Jesupa jarasima:
—Mãɨyara chi Romanepema chi atepe poro chaarea bɨdé mãɨ ichidí ichiá teat'ɨ, ichiaba chi Tachi Ak'õrené mãɨ chi Tachi Ak'õrea teat'ɨ.
22Mãɨ ũrisidaɨde k'awa k'ɨ̃risiadaé pasima. Ara mãɨne ãyá wãsidama.
Chok'ae p'irabaripataɨ k'orea Jesupa jarada
Marco 12:18-27; Luca 20:27-40
23Ara mãɨ ewaride waapẽarã saduceorã Jesumá chesidama. Saduceorãpa jarapatama piudaadarã chok'ae p'irabaridaiwẽt'a.#Hecho 23:8. Mãɨpuru Jesua nãɨya jarasidama:
24—Jarateaparí, Moisepa tachi pae bɨsima ẽpẽra warra newẽa bɨ piusira, ichi ũpẽapa chi p'ẽtã́ atai pia bɨma chi ũpẽa piuda k'orea warra unui k'orea.#Deuteronomio 25:5-10. 25Ewariaba tai t'ãena siete ũpẽarã p'anasidama. Chi ĩwinipa k'ima atasima maamina warra newẽa piuda pẽra chi mãɨ ɨ̃aripema ũpẽapa chi p'ẽtã́ atasima. 26Maamina mãɨ ichiaba warra newẽa piusima. Mãɨya bak'ari, chi mãɨ ɨ̃aripemapa p'ẽtã́ atasima. Maamina aba mãɨ jĩra warra newẽa piusima. Ãarea mãɨ siete p'anɨ abarik'a mãɨyasidama. 27Mãɨya bak'ari chi wẽra sida piusima. 28Mãɨ ũpẽarã siete p'anɨpa mãɨ wẽra ata p'anasidama. Mãɨyara chok'ae p'irabaripataɨ ewaride ¿chi sãɨpa ichi uru beeima?
29Mãɨpuru Jesupa p'anoosima:
—Mãrapa Tachi Ak'õre pedea mãɨnepa ichi jua chaarea bɨ atua p'anɨ pẽra, pia k'ɨ̃risia atua p'anɨma. 30Ũrit'ɨ. Chok'ae p'irabaripataɨ ewaride ẽpẽrarãpa k'ima waa atadaiwẽma, waa k'ima teadaiwẽma, mãɨpari Tachi Ak'õrepa ɨt'aripa peedaɨrã jĩra p'ananaipɨ. 31Tachi Ak'õrepa piudaadarã chok'ae p'irabaripataɨ k'orea jarada ¿mãrapa eda jaradawẽa p'anɨk'ãra? 32Nãɨya jarasima: “Mɨ Abrahán Pajãnepema Ak'õrepɨ, Isá Pajãnepema Ak'õrepɨ mãɨnepa Jacobo Pajãnepema Ak'õrepɨ”.#Éxodo 3:6. Ichi chi piudaadarã Ak'õrewẽma, mãɨpari chi chok'ae berã Pajãnepema Ak'õrepɨ.
33Jesupa mãɨya jaratea bɨ ũriutade ẽpẽrarãpa k'awa k'ɨ̃risiadaé pasima.
Tachi Ak'õrepa jara bɨeda chi piipará bɨ
Marco 12:28-34
34P'ariseorãpa k'awasidama Jesupa saduceorã k'ĩup'eapida. Mãɨ k'orea ãchi ará nɨbeedak'ari Jesumá wãsidama. 35Mãɨrãnepema aba Moisepa bɨda jarateaparí pasima.#22:35 Moisepa bɨda jarateaparí pasima. Mãɨ griego pedeade chi eda waapẽarã k'art'ade newẽma. Mãɨpa Jesú piawẽa pedeapii k'orea nãɨya idisima:
36—Jarateaparí, Tachi Ak'õrepa oopi bɨ pedeadepema ¿sãɨ chi atepe piipará bɨma?
37-38Jesupa nãɨya p'anoosima:
—Chi naa bɨda nãɨya jara bɨma: “Ãarea pɨ sõnepa, ãarea pɨ jaoredepa mãɨnepa ãarea pɨ k'ɨ̃risiadepa pɨa pɨchi Chipari, Tachi Ak'õre k'ɨ̃riase”.#Deuteronomio 6:4-5. Tachi Ak'õrepa oopi bɨ pedeadepema mãɨt'a chi atepe piipará bɨma. 39Mãɨnepa ara mãɨ ɨ̃aripema nãɨ jĩra bɨma. Nãɨya jara bɨma: “Abaɨ k'ɨ̃riase ara pɨchi k'ɨ̃ria bɨ jĩra”.#Levítico 19:18. 40Mãɨ k'ɨ̃risia atepe ume p'anɨne tachia ĩjãanaipɨra, jõma Moisepa bɨdade mãɨnepa Tachi Ak'õre pari pedeapataɨrãpa bɨdaadade ĩjãanaipɨ.
Tachi Ak'õrepa Tachi K'aripaparí teai jarada ¿k'ai warradema?
Marco 12:35-37; Luca 20:41-44
41Mãɨ P'ariseorã wapida arí p'anɨne Jesupa ãchiá idisima:
42—Mãramá Tachi Ak'õrepa Tachi K'aripaparí teai jarada ¿k'aidí warrama?
Ãchia p'anoosidama:
—Davidepɨ.
43Mãɨne Jesupa idisima:
—Mãɨya bɨpɨra, Davipa ¿k'ãre k'orea Tachi Ak'õre Jaoredepa ichi mɨ Chipariade asima? Davipa nãɨya jarasima nãɨ bɨdade:
44Tachi Chiparipa jarasima Mɨ Chiparia: “mɨ juaraari suak'abari beese, aba mɨa pɨchi nek'ĩramá pɨchi juade bɨrudea”.#Salmo 110:1.
45Tachi Ak'õrepa Tachi K'aripaparí teai jarada Davipa mãɨ mɨ Chipariade a jara bɨpɨra, ¿sãmaasã́ mãɨ Daví warra paima?
46Mãɨne abaɨ pida Jesua p'ue p'anoonaé pasima. Ara mãmãɨpa abaɨ pida Jesua waa ne ididai k'ɨ̃rianaé pasima.
Currently Selected:
Mateo 22: tdc
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
