Mateo 23

Jesupa p'ariseorã k'orea k'achia pedeada

Marco 12:38-40; Luca 11:37-54; 20:45-47

1Mãɨya bak'ari Jesupa ichi ome p'ɨrrɨapataɨrã́ mãɨnepa waapẽarã ẽpẽrarã́ nãɨya jarasima: 2«Moisepa bɨda jarateapataɨrãpa mãɨnepa p'ariseorãpa Moisepa jaratea bada jarateapatama. 3Mãɨpuru ãchia jarapataɨ jĩra ãarea oot'ɨ. Maamina ãchia ara ãchia jaratea p'anɨ jĩra oodak'ama. Mãɨpuru ãchia oo p'anɨ jĩra oorãt'ɨ. 4Ãchia ẽpẽrarã́ ne chaarea oopipatama, ne chɨk'ɨa at'oopi p'anɨ jĩra. Maamina mãɨ ãchia mi ãpia pida k'aripadak'ama mãɨ oodamẽrá.

5»Ãchia ne ãarea oopatama waapẽarãpa pia ununamẽrá. Tachi Ak'õre pedea k'art'ade bɨda ne yaaparí chak'ede eda bɨdak'ari ãchi tau bɨɨrɨde mãɨnepa juap'ot'ode jɨ̃patama. Maamina chi ne yaaparí jobɨa oopatama waapẽarãpa pia ununamẽrá. Ichiaba mãɨ k'orea ãchia neet'á i jijichoa teesoa be k'osadak'ari jɨ̃patama.#Deuteronomio 6:6-9; Número 15:37-41. 6Nek'ode wãnak'ari waapẽarã ome, suak'abari p'aneenai k'ɨ̃riapatama jõmãɨrã taade, minachia k'awa berã suak'abari p'aneepataɨde. Judiorã ará pedeapataɨ tede pida ara mãɨ jĩra oopatama. 7Ichiaba p'uurude ninane k'ɨ̃riapatama ẽpẽrarãpa ãchiá wap'eadepa “Jarateaparí” adamẽrá.

8»Maamina mãra abarik'a p'anɨẽra ũpẽarã jĩra, mãɨnepa Jarateaparí aba uru p'anɨ pẽra k'ɨ̃riarãt'ɨ ẽpẽrarãpa mãrá “Jarateaparí” adait'a.#23:8 Jarateaparí aba uru p'anɨ pẽra. Griego pedeade chi eda waapẽarã k'art'ade ichiaba bɨ bɨma: Ichi Cristopɨ. 9Mãɨ awara nãɨ ĩjũanepema mi ãpia pida abaɨa pida “tai ak'õre” arãt'ɨ, Ak'õre abapuru pajãne uru p'anɨ pẽra. 10Mãɨnepa k'ɨ̃riarãt'ɨ ẽpẽrarãpa mãrá “tai chipari” adait'a, mãra Chipari abapuru bɨẽra. Ichi Tachi Ak'õrepa Tachi K'aripaparí teai padapɨ. 11Mãranepema chi atepe bɨ waapẽarã pae pari mimiaparí pai bɨma. 12Chi atepe bai k'ɨ̃ria bɨ, Tachi Ak'õrepa mãɨ wariwẽa bɨipɨ. Abaɨ pida ara ichi ãpia bɨ jĩra k'ɨ̃risiasira Tachi Ak'õrepa mãɨ chi atepe bɨ jĩra bɨipɨ.

13»¡Mãra p'ariseorã, Moisepa bɨda jarateapataɨrã, chi pia jĩra berã, chupuri p'anɨma Tachi Ak'õrepa ɨtɨai pẽra! Mãrapa ẽpẽrarã́ Pajãne Bɨpa ichidirã ichi juade ua bɨ k'orea itu k'awapidak'ama. Machia k'ɨ̃riawẽa p'anɨma ichia mãra p'e uru bait'a mãɨnepa waapẽarãpa mãɨya k'ɨ̃ria p'anɨrã mãrapa itu oopidak'ama.

14»¡Mãra p'ariseorã, Moisepa bɨda jarateapataɨrã, chi pia jĩra berã, chupuri p'anɨma Tachi Ak'õrepa ɨtɨai pẽra! Mãrapa p'ẽtãarã neet'á ẽemaripatama mãɨnepa minachia tãaraa ɨt'aa chiidipatama ẽpẽrarãpa mãra pia ununamẽrá. ¡Mãɨpuru Tachi Ak'õrepa mãra mãɨ atepe ɨtɨaipɨ waapẽarã k'aepẽra!#23:14 Griego pedeade chi eda waapẽarã k'art'ade mãɨ versículo newẽma.

15»¡Mãra p'ariseorã, Moisepa bɨda jarateapataɨrã, chi pia jĩra berã, chupuri p'anɨma Tachi Ak'õrepa ɨtɨai pẽra! Nãɨ ĩjũane mãɨnepa seniane wãpatama mãrapa jarateade nipada abaɨa ĩjãapidai k'orea. Maamina mãɨ ẽpẽra mãra ome p'ɨrrɨaparí mãra k'aepea atepe k'achia beeipɨ mãɨnepa mãra k'aepea atepe t'ɨpɨ tau uruade paawãipɨ.

16»¡Mãra chupuri p'anɨma Tachi Ak'õrepa ɨtɨai pẽra! Tau p'ãrio be jĩra p'anɨma. ¿Sãmaasã́ ẽpẽra waapẽarã́ o paritua unupipatama? Nãɨya piawẽa jarateapatama: “Abaɨpa Tachi Ak'õre te minachia bɨ t'ɨ̃ne piarã ne ooi jaraipɨra, maapae mãɨ ooepɨra, mietá oowẽa bɨade apatama. Maamina Tachi Ak'õre tede nee bɨ t'ɨ̃ne ne ooi jaraipɨra, piarã ooi pia bɨade apatama”. 17¡Mãra k'ɨ̃risia nea p'anɨma! ¡Tau p'ãrio berã jĩra p'anɨma! ¿Chi sãɨ pia bɨma? ¿Tachi Ak'õre te minachia bɨ chi nee k'aepẽra atepe piipará bɨwẽk'ãra? Mãɨ nee Tachi Ak'õre pae pia bɨma abapuru Tachi Ak'õre tede bɨẽra.

18»Mãrapa nãɨ sida jarapatama: “Abaɨpa ãnimara paapataɨ t'ɨ̃ne piarã ne ooi jaraipɨra, maapae mãɨ ooepɨra, mietá oowẽa bɨade apatama. Maamina chi ãnimara t'ɨ̃ne ne ooi jaraipɨra, piarã ooi pia bɨma”. 19¡Mãra k'ɨ̃risia nea p'anɨma! ¡Tau p'ãrio berã jĩra p'anɨma!#23:19 Mãra k'ɨ̃risia nea p'anɨma. Griego pedeade chi eda waapẽarã k'art'ade mãɨ newẽma. ¿Chi sãɨ pia bɨma? ¿Chi ne paapataɨ chi ãnimara k'aepẽra atepe piipará bɨwẽk'ãra? Tachi Ak'õremá mãɨ ãnimara pia bɨma abapuru ne paapataɨ ɨ̃rɨ bɨẽra.

20»Ũrit'ɨ: abaɨ pida ne paapataɨ t'ɨ̃ne piarã ne ooi jaraipɨra, abapuru mãɨ t'ɨ̃ne mãɨya jaraiwẽa bɨma. Mãɨpari chi mãɨ ɨ̃rɨ bɨ ãnimara t'ɨ̃ne mãɨya jarai bɨma. 21Mãɨ awara abaɨ pida Tachi Ak'õre te minachia bɨ t'ɨ̃ne piarã ne ooi jaraipɨra, abapuru mãɨ t'ɨ̃ne mãɨya jaraiwẽa bɨma. Mãɨpari Tachi Ak'õre mãɨ tede bɨ t'ɨ̃ne mãɨya jarai bɨma. 22Mãɨ awara abaɨ pida pajã t'ɨ̃ne piarã ne ooi jaraipɨra, Tachi Ak'õre suak'a beeparí t'ɨ̃ne mãɨya ooi jara bɨma ichiaba Tachi Ak'õre mãma suak'abari bɨ t'ɨ̃ne piarã ne ooi jara bɨma.

23»¡Mãra p'ariseorã, Moisepa bɨda jarateapataɨrã, chi pia jĩra berã, chupuri p'anɨma Tachi Ak'õrepa ɨtɨai pẽra! Menta k'irú, anís net'a tau, comino ome Tachi Ak'õre pae awara bɨpatama, mãɨ diezedepemacha, aba. Maamina Moisepa bɨdade chi atepe bɨ oodak'ama; chĩara ome jĩp'a oodak'ama, k'ĩra chupuriadak'ama mãɨnepa Tachi Ak'õrene ĩjãanak'ama. Oodai pia bɨma ichi pedea bɨda jara bɨ jĩra, machi k'irú awara bɨpata jĩra Tachi Ak'õre pae. 24¡Mãra tau p'ãrio be jĩra p'anɨma, o paritua unupimaa p'anɨẽra waapẽarã́! ¡Pania nest'apatama ãnimara chaerã eda wãpidaemaapa pania topataɨde. Maamina mãrapa k'awadawẽa, camello k'ak'ua nepalá ãarea mi peemaa p'anɨ jĩra p'anɨma.#23:24 Judiorãpa camello k'odak'a pasima. Levítico 1:14. Jesupa mãɨya jarasima k'awapii k'orea chi judiorã minachia k'awa berãpa chi Tachi Ak'õre k'orea jarateadada piipará bɨt'a k'ɨ̃risia atuapachidama. Mãɨpari tachi ne ãpia k'ede ooi k'orea minachia jarateapachidama.

25»¡Mãra p'ariseorã, Moisepa bɨda jarateapataɨrã, chi pia jĩra berã, chupuri p'anɨma Tachi Ak'õrepa ɨtɨai pẽra! Mãrapa pasu mãɨnepa p'arat'u ɨ̃rɨpema pia sɨɨpatama, maamina eda mietá bɨma. Ara mãɨ jĩra mãra sõne ne ãarea ara machi pae ata k'ɨ̃riapatama mãɨnepa chi mãrapa k'ɨ̃ria oodat'a mãɨt'u oopatama. 26¡P'ariseo tau p'ãrio be jĩra p'anɨma! Naa pasu mãɨnepa p'arat'u eda sɨɨse; maapae ɨ̃rɨpema sida pia sɨɨ beeipɨ.#23:26 P'arat'u. Griego pedeade chi eda waapẽarã k'art'ade mãɨ newẽma.

27»¡Mãra p'ariseorã, Moisepa bɨda jarateapataɨrã, chi pia jĩra berã, chupuri p'anɨma Tachi Ak'õrepa ɨtɨai pẽra! Mãrapa jãɨrã te mawara ɨ̃rɨpema t'ot'oa p'ɨrɨpatama, pia ununamẽrá. Maamina mãɨ jãɨrã tiida k'ak'ua minachia beraadada chi mik'ia nɨbɨma, chi bɨɨrɨ paara. 28Ara mãɨ jĩra mãra ẽpẽra ɨ̃rɨpema jĩp'a berã jĩra p'anɨma, maamina piarã mãrapa jarateapataɨ oodak'ama. Ichiaba edaria mãra ãarea sõk'achia p'anɨma.

29»¡Mãra p'ariseorã, Moisepa bɨda jarateapataɨrã, chi pia jĩra berã, chupuri p'anɨma Tachi Ak'õrepa ɨtɨai pẽra! Mãrapa Tachi Ak'õre pari pedeapataɨrã jãɨrã te ɨ̃rɨ te chae oopatama. Waapẽarã jĩp'a berã jãɨrã tede pida ara mãɨ jĩra auk'ará oopatama. 30Mãɨne mãrapa jarapatama: “Tachi chõarãenapema ewaride p'ananapara, Tachi Ak'õre pari pedeapataɨrã k'aripa peadaiwẽ pasima”. 31Mãɨya mãrapa jara p'anɨma Tachi Ak'õre pari pedeapataɨrã mĩa peapataɨrãnepa chedaadarãpɨ. Mãra ara ãchi jĩra p'anɨma. 32¡Mãɨpuru mãra chõarãenapemarãpa nemietá oodai pada, jõma oot'ɨ!

33»¡Mãra taama jĩra p'anɨma! ¿Tachi Ak'õrepa machi nepɨra pará bɨade ak'ari, t'ɨpɨ tau urua nɨbɨdea peeiwẽane a k'ɨ̃risia p'anɨk'ãra? 34Mɨa Tachi Ak'õre pari pedeapataɨrã, k'ɨ̃risia k'awa berã mãɨnepa Moisepa bɨda jarateapataɨrã mãramá peeipɨ. Maamina mãrapa chi eda waapẽarã peadaipɨ mãɨnepa chi eda waapẽarã k'urusude barijira bɨdaipɨ. Waapẽarã mãra judiorã ará pedeapataɨ tede soapa p'edaipɨ mãɨnepa p'uurucha ẽp'ẽnaipɨ. 35Mãɨpuru jõma chõarãenapemarã jĩp'a berã peadada k'orea, Tachi Ak'õrepa mãra ɨtɨaipɨ: Abel jĩp'a bɨ peadada k'orea, Berequía warra Zak'aria peadada k'orea mãɨnepa ãarea waapẽarã peadada k'orea pida. Zak'aria Tachi Ak'õre te tajataria chi ãnimara paapataɨ k'ait'a peasidama.#23:35 Abel. Génesi 4:3-8 Zak'aria. Mãɨ Zak'aria ak'õre Joyadá pasima. 2 Crónica 24:20-22. Berequía warra Zak'aria. Zak'aria 1:1. 36Mɨa piarã jararuma: jõma mãɨ ẽpẽrarã peadada k'orea Tachi Ak'õrepa idiapaepema ẽpẽrarã ɨtɨaipɨ.

Jesú Jerusalén k'orea sõ pará bada

Luca 13:34-35

37»¡Jerusalén, Jerusalén, mãrapa Tachi Ak'õre pari pedeapataɨrã peapatama! ¡Tachi Ak'õrepa peedarã sida mawarapa bat'a peapatama!#1 Reye 9:10; Jeremia 2:30. Mɨa bari k'ak'o minachia mãra ará jerep'e k'ɨ̃ria basima et'erre wẽrapa ichi warrarã ĩk'arra ek'ari jerep'epari jĩra. Maamina mãrapa k'ɨ̃rianaé pasima. 38Mãɨpuru Tachi Ak'õre waa mãra ome baiwẽma.#Jeremia 22:5. 39Mɨa jara bɨma: mãrapa mɨ waa ununaiwẽma nãɨya jarautamá: “¡Minachia pia bɨma chi Tachi Chipari t'ɨ̃ne cherut'a!”».#Salmo 118:26.

Currently Selected:

Mateo 23: tdc

Highlight

Copy