От Иоанна 9

Иисусым На̄лъҳускаңа Ая̄кақ Ю̄к

1Иисусым иглыӷуткылъюку ысҳақа̄ ю̄к ая̄ңаӷми алъхықақ. 2Малихся̄ҳтыңан а̄птыка̄: «Апыҳтуӷиста, китум сыӷлыҳқылъҳан уна ю̄к ая̄ңаӷми алъхыҳтыстагу, лъңан сыӷлыҳқылъҳа̄ налиӷмың аңаюқахкынка?» 3Иисусым кӣмсиқӣ: «Ӯм югым налиӷмың аңаюқахкынка сыӷлыҳқылъҳита ая̄ңасныӷита̄. Уна ю̄к ая̄ңаӷми алъхықа̄гуқ ысҳӣсқылъюку Кияӷныӷым аҳтуӷьяҳқа̄нӷилъҳа лъңакун. 4Нагныӷутыпыста̄ӷьяҳқақапут қыпҳақӣ Каяхтистыма паниның аӷныӷулюку. Унугьяҳтуӷа̄, кина алңунак қыпҳаӷна̄нӷитуқ унугми. 5Паниның нунамылъюңа ниӷука̄ңа нунам юган». 6Таўатын пикаткылъюку нунакун қысиӷлюни сюнамың акумлюку аңиҳыхкакык югым ӣскык. 7Та̄хкын ю̄к пика̄: «На̄йваӷаӷмун Силоамымун аӷмигьяҳта̄». (Силоам хўатын писӣлӷӣ: «Туюқақ».) Ынка̄м ю̄к аӷмигьяҳтуӷлюни тагиялӷӣми ысҳа̄сягулъюни.

8Увилиӷныӷиталъю, иляңиталъю аўын ысҳаӷақыхкаңат та̄на ю̄к туңсиӷралӷӣ ынка̄м а̄пқуӷа̄ӷуткат: «Унаңунӷита̄ ю̄к ақумлюни туңсиӷраӷақсялӷӣ?» 9Иляңи пикат: «А̄а та̄наңӯқ». Иўырңа иляңи пикат: «Нака̄, алъяңӯқ, кинаңӯқ лъңасюгнилңуқ». Ынка̄м ая̄ңаялӷӣм пикӣ: «Та̄наңӯңа». 10А̄птыка̄т: «Натын ысҳа̄сягусин?» 11Кӣмсиқӣ: «Югым а̄тқылӷӣм Иисусымың қысиӷлюни сюнамың акумлюку аңиҳлъюкык ийыхка аӷмигьяҳтӣсқа̄ңа Силоамымун. Ынка̄м аӷмиглюңа ысҳа̄сягутуңа». 12А̄птыка̄т: «На̄гу та̄на ю̄к?» Югым кӣмсиқӣ: «Ся̄, налъюкақа̄!»

Фарисеит А̄пқуӷа̄қаңат Ая̄ңаялӷӣ

13Та̄хкын ая̄ңаялӷӣ югыт агля̄тка̄т Фарисеинун. 14(Таўани аӷныӷми Субботаңулӷӣ Иисусым қысиӷлюни сюнамың акумлюку ысҳа̄сягутыстақңамигу ю̄к.) 15Фарисеит а̄птыка̄т ю̄к: «Натын ысҳаӷьягусин?» Кӣмсиқӣ: «Югым аңиҳлъюкык сюнамың ийыхка, аӷмигьялӷӣңа ысҳаҳтуңа». 16Иляңи Фарисеит пикат: «Уна ю̄к Кияӷныӷмың пиңунӷитуқ, қаюҳлъяк қа̄ткигатӣ Лӣлиҳтӯсят Субботамың аюқылӷӣт». Иўырңа иляңи пикат: «Ю̄к сыӷлыҳқыста, алъя̄ҳлъюхўаҳтиляӷна̄нӷитуқ таўатылңуӷмың». А̄ҳтӣра̄ӷуткат.

17Алъя а̄птыка̄т ю̄к: «Лъңан ысҳаҳтыста̄тын. Сямың пинаяҳсигу?» Югым кӣмсиқӣ: «Ӯкналиқистыңӯқ». 18Иудеит иглыӷутистыңита ухпықумаңилъкаңат ая̄ңая̄таңалъю, ысҳаӷьягутылъҳалъю, ынка̄м ақфастыкахкыт аңаюқакык. 19А̄птыкахкыт: «Уна иӷнықыстыху? Ая̄ңаӷми алъхыӷуманикыси, натын ысҳаӷьягута?» 20Аңаюқахкынка кӣмсиқӣ: «Лӣсимакаҳпут иӷнықаҳпут. Лӣсимакаҳпут ая̄ңаӷми алъхықа̄гуқ, 21иўырңа налъюкаҳпут натын ысҳаӷьягусиматаңа. Талўа налъюкаҳпут китум ысҳаӷьягутыстылъҳа. А̄птыху югуҳтыка̄гуқ, кӣмсиӷна̄ӷӣси лъминың». 22Аңаюқакык таўатын пикак алиңлютык Иудеит иглыӷутистыңитның. Иглыӷутистыт ата̄сӣҳтыңъўа̄қат китум алңунак ухпықникагу Иисус, Христосыңунилюку иқитысяҳқа̄люку синагогамың. 23Та̄на апалъюқлъюку аңаюқакык хўатын пикак: «Югуҳтыка̄гуқ, а̄птыху».

24Ынка̄м Иудеит иглыӷутистыңита туқлъюнқихлъюку ая̄ңаялӷӣ ю̄к, пика̄т: «Усюқигу Кияӷнық. Лӣсимакаҳпут та̄на ю̄к, Иисус, сыӷлыҳқыстыңӯқ». 25Пикӣ: «Налъюкақа̄ сыӷлыҳқыстыңутаңа, иўырңа лӣсимакңўа̄ӷақа ая̄ңаялӷӣңа хўа̄ ысҳаӷьягутуңа». 26Иудеит иглыӷутистыңита а̄птыка̄т: «Ся̄тын? Натын ысҳаӷьягутыстатын?» 27Кӣмсиқӣ: «Уңипа̄тңўа̄ӷамси, иўырңа нагасюгигатаҳпысиңа. Сяңан алъя нагасюгыстыху? Лъпысилъю малихся̄ҳтыңуҳсюгыстык лъңанун?» 28Та̄хкын угумиягулъюку пика̄т: «Лъпык малихся̄ҳтыка̄тын. Хўаңкута Моисейем малихся̄ҳтыкӣлъю. 29Лӣсимакаҳпут Кияӷныӷым алыҳқуқақа̄ Моисей. Иўырңа та̄на ю̄к, Иисус, налъюкаҳпут накын пиңутаңа». 30Югым пикӣ: «Кӣ! Лъпыси иглыӷутистыни налъюкумастыху накын тагика̄таңа, нақамлъю лъңан ысҳаӷьягутыста̄ңа. 31Қамахлъюта лӣсимакңўа̄ӷаҳпут Кияӷныӷым нагасигатӣ сыӷлыҳқыстыт. Иўырңа Кияӷныӷым нагаткаюўа̄ кина алңунак манигӯлъҳӣ, қа̄ткулъҳӣ лъминун. 32Има нуна пӣнлиӷьюхўа̄лъҳаның китум алңунак нагақӣгата̄ кина алңунак ысҳаҳтыстинилюку ая̄ңаӷми алъхықамың. 33Та̄на ю̄к Кияӷныӷмың пиңунӷисяқуми сянаянӷитуқ». 34Пика̄т: «Сыӷлыҳқыстыңӯтын има алъхынӷаҳа̄тыхпының, сяңанңам хўаңкута апыҳтуӷнақуткысикут?» Та̄хкын а̄ныстыстыка̄т синагогамың.

Иисусым Акузиткыхкаңа Ая̄ңалъық

35Иисусым нагақуқа̄ ая̄ңаялӷӣ ю̄к а̄нысиманилюку синагогамың. Ынка̄м иваӷлюку на̄лъкысямигу пика̄: «Ухпықсигу Иӷныӷа Югым?» 36Югым а̄птыка̄: «Югунӣқ, кинаңа̄ўа Иӷныӷа Югым? Уңипа̄тиңа ынка̄м ухпықлъякун». 37Иисусым пика̄: «Ысҳама̄н, алыҳқуӷақа̄тын». 38Югым пика̄: «А̄а, Атанық, ухпыҳтуңа». Та̄хкын сыгысқуҳлъюни манигуқа̄ Иисус.

39Иисус пикақ: «Тагиңӯңа нунамун а̄фқуӷналюки югыт, тама̄кут ысҳӣгасялӷӣт ысҳӣсқылъюки, тама̄кут ысҳақаюгыт ая̄сналюки». 40Иляңита Фарисеит туңаңанилңӯт Иисус нагалъюку а̄птыка̄т: «Сямың пизин? Хўаңкуталъю ая̄ңанизикӯт?» 41Иисусым кӣмсиқӣ: «Ая̄ңаяқуфси Кияӷныӷым пинаянӷитӣси сыӷлыҳқыстыңунилюси. Иўырңа хўатын пика̄тыхпысиның: “Ысҳақаюгӯкут” тама̄кын апалъюқлъюку Кияӷныӷым пӣқӣси сыӷлыҳқыстыңунилюси».

Currently Selected:

От Иоанна 9: ess2

Highlight

Copy