Luukasiup Aglangit 1

Pigiarutingit Sungmallu Taakkua Titiraqtausimangmangaata

1Amisut titiqqatigut aaqqiksutsiaqsimalutik unikkaarasuaqsimangmata piniarniusimajunik akunnattinni. 2Taikkua titiralauqput nangminiq pigiarninganik qaujilauqtamingnik nangminirlu takuqattalauqtaminik, uvattinnut uqausiqaqsimavut ajuriqtuijjutiqarlutik. 3Tavvali Tiupiluusii, tamakkua qaujinasuatsialaurlugit pigiarnivininginnit, piuniqsaunasugilirakku titirausirigukkit, pivalliasimaningillu unikkausirilugit ilingnut. 4Tukisitsiarniaravit sulitsiaqtumik tamakkuninga tusaqtitaujjutigisimajarnik.

Aingiliup Uqariaqturninga Juanasiup Irniangujumaarninganik

5Taissumani Iruutasi angajuqqaarjuangutillugu Juutiami, tunirrusiqtitsijitaqalauqpuq Sakaraiamik atilingmik, tunirrusiqtitsijinut nalliutiqattaqtunut Apaijakkunnut ilagijaulluni; nulianga Ilisapimik atiqaqpuq Airuunikkut kinguvaangat; tunirrusiqtitsijinut kinguvaarijaugilluni. 6Taakkuak inuusiqalauqpuuk Guutiup quviagijanganik, Ataniup piqujalimaanginnik atuqtaukujanginniglu malitsiarlutik. 7Qiturngaqalaunngilagli, Ilisapi qiturngisuittuulaurmat, uigiik tamarmik inutuqaulilauqpuuk.

8Sakaraia pinasuaqtillugu tunirrusirnirmik Guutiup saangani qautamaat atuqtauvaktumik tuksiarvigjuami; pinasuarviksanga nalliutisimalirmat. 9Tunirrusiqtitsijiup iliqqusirivaktangit maliglugit, nalauttaarutikkut nalautaugami pinasualilauqpuq tipitsiariktumik pujuuqtitsijariaqalirluni Ataniup tuksiarvigjuaqutinganut isilauqpuq. 10Inugiakturjuat silataani tuksiaqtillugit tipitsiariktuq pujuuqtitautillugu, 11Ataniup aingilingata Sakaraia saqqivvigivaa tunirrusirviup tipitsiariktumik pujuuqtitsiviup taliqpiani nangirluni. 12Sakaraiaup takugamiuk quaqsaaqpuq, kappiasutualuulirluni. 13Aingiliup uqautivaa, “Sakaraia kappiasunngillutit, Guutiup tuksiarniit tusaqpaa, nuliat Ilisapi irniqtaalaaqpuq, taanna Juanasimik atiqtatitaksarivat. 14Qujalinirmut quviasugumaaqputit, unuqtunut nutaraq irniangukpat quviasuutaujumaaqpuq; 15ajunngitturjuangujumaarmat Ataniup saangani, imiqattarumaanngilaq uainimik imialungmigluunniit sanngijumik, anaanangata iglianganiilluni suli Anirnirmik Ijjurnaittumik ilummiqtaujumaaqpuq. 16Utiqtitsijumaaqpuq Isarialimiunik amisunik Atanirmut taakkua Guutingannut. 17Anirniqarluni pijunnarniqarlunilu nalauttaijutut Ilaijjatut, ataataujut isumagijaqatsialiqtittumaaqpait qiturngamingnik; naalanngittullu utiqtittumaarlugit silatujumik isumaqaliqtillugit; Ataniup inuqutingit upalungaijjarlugit taassumunga.”

18Sakaraia uqaqpuq aingilimut, “Qanurli tamanna qaujimajumaaqpara? Ittuulirama, nuliaralu ningiungulirilluni.”

19Aingiliup kiuvaa, “Gaipuriuliuvunga, Guutiup najuganganinngaaqpunga; taassuma tilivaanga ilingnut uqariaqtuqullunga; tamatuminga tusaruminaqtumik uqaujjauqungmatit. 20Takugit, uqarunnailliniaqputit nillirunnaillilutillu ulluq tainna uqausirijara nalliutilauqqaaqtinnagu, uqausikka ukpirinnginnavigit, nalliutivvisanga tikippat nalautsilaaqput.”

21Inuit utaqqilauqput Sakaraiamik, isumallutik sungmat akuniulualirmangaat. 22Anigami, inungnut uqarunnalaunngilaq, inuit qaujillutik takutitaujuviniuninganik tuksiarvigjuarmiitillugu; Sakaraia uqarunnannginnami inuit uukturarvigivait aggangminut.

23Sakaraiaup pinasuarninga tuksiarvigjuarmi isulimmat, igluminut angirraqpuq. 24Kinguningagut nulianga Ilisapi nutaraksaqaliqpuq, igluminit anilaunngilaq taqqinik tallimanik, uqarluni, 25“Tavva Ataniup ikajuqpaanga takunnaliraminga, qiturngaqtaarunnannginnira kanngusuutigijara inungnut piiqpaa.”

Aingiliup Uqariaqturninga Miarimut Irniqtaalaarninganik

26Taqqiit pingasuujuqtut aniguqtillugit Guutiup aingiliqutini Gaipuriul tilivaa nunalingnut Naasariitimik atilingmut Galiliamiittumut, 27arnamut angummut aktuqtaulauqsimanngittumut Miarimik atilingmut; angirutausimajumut uiksaqaqtluni Juusipimik atilingmik, Taivitiup kinguvaanganut. 28Aingiliup Miari saqqivvigivaa uqautillugu, “Quviasulirit, Guutimut quviagijaugavit, Ataniup ilagivaatit!”

29Miarili quaqsaaqpuq uqausirijanginnut, isumalluni qanuq nilliujjauninga tukiqarmangaat. 30Aingiliup uqautivaa, “Miari kappiasunngillutit, Guutiup quviagingmatit. 31Takugit, nutaraksaqalirniaqputit irniqtaarumaarlutillu, taanna Jiisusimik atiqtaaqtilaaqpat. 32Taanna anginiqpaangujumaaqpuq, taijaujumaarlunilu Qulliqpaujuup Irninganik; Ataniup Guutiup angajuqqaarjuannguqtittumaaqpaa sivuliviningatut Taivititut. 33Angajuqqaarjuangujumaaqpuq Jaikuup kinguvaanginnit isuqanngittumut; ataniuninga isuqarumaanngilaq.”

34Miariup aingili uqautivaa, “Qanuq tamanna pilaaqpa, uiqannginnama?”

35Aingiliup uqautivaa, “Anirniup Ijjurnaittuup tikivviginiaqpaatit, quttingniqpaujuullu pijunnarningata ulingniaqpaatit; taimaimmat qiturngaqtaarilaaqtait ijjurnainniraqtaujumaaqpuq, Guutiup Irninganik taijauluni. 36Takugit, ilagijait Ilisapi inutuqauliraluarluni irniqtaarumaaliqpuq; taqqinik pingasuujuqtunik nutaraksaqaliqpuq taanna qiturngisuittuuniraqtaujuq. 37Guutimi ajurnaqtuqanngimmat.”

38Miari uqaqpuq, “Takugit, Ataniup pijigivaanga; uqausirijait maliglugu taimailirlanga.” Aingiliup tavva qimakpaa.

Miariup Pulaariarninga Ilisapimut

39Ulluit taakkua kingunitsiangattigut Miari parnaliqpuq tuavirluni ailiqpuq nunamut qaqqalingmut, Juutaup iglugasanginnut, 40tikinnami Sakaraiakkut iglungannuaqpuq Ilisapilu nilliutivaa. 41Ilisapiup Miariup nipinga tusaramiuk, nutaraksanga naangani aulajjakpuq; Ilisapilu Anirnirmik Ijjurnaittumik ilummiqtauvuq. 42Nipiqquqtulluni uqaqpuq, “Tusunnarniqpaangujutit arnalimaanit nunamiittunit, nutaraksait igliarniittuq tusunnarniqpaugivuq. 43Tamanna piujurjuaq uvannut ukpirnatsianngimmarikpuq, Atanirma anaanangata upangmanga? 44Takugit, nipiit tusarakku, nutaraksara iglianni quviasungnirmut aulaliqpuq. 45Quviasungniit tusunnammarikpuq ukpirusukkavit Atanirmut uqaujjausimanirnik nallautsijumaaqtumik.”

Miariup Niqtuilluni Inngirninga

46Miari uqaqpuq,

“Tarnirma Ataniq angijuruqtippaa;

47Anirnirma Guuti Piulijiga quviasuutigivaa,

48Taimaak pijaujuksautinnanga pitimmanga,

Takugit, maannamit pigiarlugu quviasungnira inungnut uqausiuvagumaaliqpuq;

49Angijurjuamik pitsiarviugama Guutimut ajugaqanngittumut,

Atinga Ijjurnaittuuvuq.

50Nikagusukpuq sivuuragijiminut,

Kinguvaariinit kinguvaariinut.

51Talirminut suungujumut pijunnarnini saqqitilauqpaa,

Isumamigut piujurijut siammaqtippait.

52Angajuqqaarjuat pijunnarninginnit urrutippait,

Pijunnarniqanngittullu nikuvitippait.

53Kaaktut niqiksanginnik tunisivigivait piujunik,

Ajuqsanngittut sunataaqtinnagit aullaqtippait.

54Nikagusungnini sivullivinittinnut kajusitippaa,

Inuqutinilu Isarialimiut ikajuqpait.

55Iqqaumagami nikagusungnirminik Aiprahaammut,

Kinguvaalimaanginnullu isuqanngittumut.”

56Miari najuutilauqpuq Ilisapimi taqqinik pingasunik, kinguningagut angirraqpuq.

Juanasi Paaptitsirijiup Irnianguninga

57Ilisapiup irniviksanga nalliutingmat, irniqtaaqpuq. 58Nunaqqatingita ilagijangitalu tusaramijjuk Ataniup nikagusungnirminik angijumik saqqititsivigingmagu, quviasuqatigivaat.

59Nutarakuluk ulluqalirmat 8-nik kipijaujaqtuqpuq; atiqaqujaulirluni ataatangatut Sakaraiamik. 60Anaanangali Ilisapi uqaqpuq, “Taimaak atiqaqunngilara, Juanasimigli atiqariaqaqpuq.”

61Taakkua Ilisapimut uqaqput, “Taimaagli atilingmik ilaqanngittutit.” 62Ataatanga Sakaraiasi uukturarvigivaat, qanuq nutarakuluk atiqaqungmangaagu.

63Sakaraiasi titirarviginiaqtaminik qaitauqujivuq, titirarluni, “Juanasimik atiqaqpuq.” Tavvaniittulimaat kamajualuuvut. 64Tavvainnaq Sakaraiasi uqarunnaqsigivuq, Guuti niqturlugu uqallaliqpuq. 65Nunaqatilimaangillu quaqsaangaliqput, tamanna uqausiuliqpuq Juutiami qaqqani nunaqaqtulimaanut. 66Tusaqtulimaat isumaksaqsiuliqput, uqarlutik, “Qanuiliuqtiksaugaamiinna nutarakuluk?” Nalunalaunngimmat Ataniup pijunnarningata najurmagu.

Sakaraiasiup Guutimit Uqaqtitauninga

67Juanasiup ataatanga Sakaraia Anirnirmik Ijjurnaittumik ilummiqtaugami, Guutiup uqausiriqujanginnik uqaliqpuq:

68“Ataniq saimmaqtitauli, Isarialimiut Guutingat,

Inuqutini aqqarvigillugit saputijaqturmagit,

69Piulijirjuamik tunisivigingmatigut,

Pijimi Taivitiup kinguvaanginni.

70Uqaqsimagami nalauttaijuqutimigut ijjurnaittutigut,

71Saputijumalluta akiraqtuqtittinnit,

Qiimigijittalu agganginnit.

72Nikagusungnini saqqitittumallugu sivulivinittinnut,

Angiqsimaninilu ijjurnaittuq iqqaumallugu.

73Aiprahaammut sivulivinittinnut uqaviksimagami,

74Saputijumalluta akiraqtuqtitta agganginnit,

Sivuuragijaqanngilluta pijitsitsiarunnaqulluta Guutimik,

75Ijjurnainnirmi naammagijaunirmilu

Taassuma saangani inuusitta isuanut.

76Ilaak ivvit nutaraq,

Taijaujumaaqputit quttingniqpaap nalauttaijuqutinganik;

Ataniup sivulirijumaarmatit aqqutiksanganik aaqqiksuilutit,

77Qaujititsiqullutit inuqutinginnik piulijauviksamik,

Ajurningita isumagijunnaiqtauningitigut.

78Guutitta nikagusungnirjuangagut,

Piulijauniq qauliqtutut ullaatut saqqitittumaaqpaa uvattinnut.

79Qaummaktillugit taaqtumi inuujut tuquullu tarralininganiittut,

Itigavullu tasiurlugit aqqummut saimmaqtitaunaqtumut.”

80Nutarakuluk piruqpallialiqpuq timimigut anirnikkullu sanngijuulirluni, inuqanngittumi iniqalauqpuq ulluq Isarialimiunut pinasuarviginiaqtani tikillugu.

Currently Selected:

Luukasiup Aglangit 1: EAIBR

Highlight

Copy