Maakusiup Aglangit 16

Jiisusiup Tuqungajunit Makinninga

Maatiusi 28:1-8; Luukasi 24:1-12; Juanasi 20:1-10

1Sapati anigurmat, Miari Maaktaliini, Miarilu Jaimisiup anaananga, Salumilu niuviqput tipitsiariksautinik, Jiisusiup timinganut minguarutigijumajamingnik. 2Ullaammarikkut pinasuarusiup ullungita sivulliqpaangani, siqiniq nuiliqtillugu iluvirmuaqput. 3Immingnut uqaqatigiiglutik, “Kinaup ujaragjuaq aksakaqtinniarmagu iluviup paanganit?” 4Takugialiramik, takulauqput ujaragjuaq aksakaqtitaujariiqtuviniq iluvirmit; taanna ujaragjuaq angijummarialuungmat. 5Iluvirmut itiramik, takullutik angummik inuusuktumik iluviup taliqpiani iksivajumik, annuraaqsimajumik qakuqtamik; taakkua quaqsaaqput.

6Taassuma uqautivait, “Quaqsaarasi; Jiisusi Naasariitimiuq kikiaktuqtaulauqtuq qiniqpisiuk. Makisimaliqpuq, tamaaniinngilaq; takuliqsiuk timingata inigilauqtanga. 7Maanna ilinniaqtinginnut uqariaqtulirissi Piitturuusimullu sivunissinni Galiliamuarniaqpuq; taikani takuniaqpasi, taimaak uqautilaurmasi.”

8Arnait tavvanngat anivut ullaksillutik iluvirmit; sajungnirmut kamaniarnirmut tikitaugamik; tamatuminga uqalaunngilat kinamulluunniit, kappiasuliramik.

Tavvunga aglaksimajutuqait isuqalauqtuviniuvut

Jiisusiup Miari Maaktaliinimut Saqqinninga

Maatiusi 28:9-10; Juanasi 20:11-18

9Jiisusi tuqungajunit makinnami pinasuarusiup ullungita sivulliqpaangani, sivulliqpaamik saqqilauqpuq Miari Maaktaliinimut, taassumunga anirnirlungnik 7-nik anititsivigilauqsimajaminut. 10Taanna uqariaqtuqpuq Jiisusiup ilagiqattalauqtanginnut, qiksaavigjuaqtunut qiajunullu. 11Taakkuali tusaramik Jiisusiup makisimaninganik takuqqaunirarmagu, ukpinngilat.

Jiisusiup Marruungnut Ilinniaqtiingnut Saqqinninga

Luukasi 24:13-35

12Tamatuma kinguningagut Jiisusi saqqikkivuq asianik tauttuqarluni ilinniaqtiingnut marruungnut, taakkuak pisuktillugik nunaup asianut iglugasaqanngittukkut. 13Taakkuak utiramik ilamingnut tamatuminga uqausiqaqpuuk, taakkuali ukpirusunnginnivut.

Jiisusiup Ilinniaqtiminut 11-nut Saqqinninga

Maatiusi 28:16-20; Luukasi 24:36-49; Juanasi 20:19-23; Aapuusitaliit 1:6-8

14Kinguningagut Jiisusi saqqikkivuq ilinniaqtiminut 11-nut niriqatigiiktillugit; Jiisusiup suakpait ukpinngimmata uummatingillu sitijuullutik, ukpirusulaunngimmata Jiisusi uumaliqtillugu takulauqtut uqausinginnik. 15Jiisusiup uqautivait, “Ailirissi pinnguqtitausimajunut tamainnut ajuriqtuilusi uqausirnik tusaruminaqtunik. 16Nalliat ukpiqtuq paaptitauluni taanna piulijaujumaaqpuq; nallialli ukpinngippat taanna iqqaqtuqtaujumaaqpuq. 17Uvannut ukpiqtut nalunaikkutaqarumaaqput makuninga; atira aturlugu anirnirlungnik anititsiqattarumaaqput; uqausirnut nutaanut uqallaqattarumaaqput; 18quglugianik tuqunnaqtulingnik tigusijunnarumaaqput, tuqunnaqtumiglu imiraluarutik qanuiliqatarumaanngilat; qanimajut patimmikpagit qanuittunniiqattarumaaqput.”

Jiisusiup Qilaliaqtitauninga

Luukasi 24:50-53; Aapuusitaliit 1:9-11

19Tavva Ataniq Jiisusi, taakkununga uqallagiirami, qilaliaqtitauvuq, Guutiup taliqpianut ingitsaqturluni. 20Ilinniaqtit ajuriqtuijaqtuqput namutuinnalimaaq, Ataniup pinasuaqatigivait ajuriqtuiningita suliningit nalunaikkutaqalauqput kamanaqtulinikkut pinasuaqtangitigut.#16:20 Ilangit aglaksimajutuqavinit aaqqiksuqtauvaktuvinillu aglatuqait nainniqsaungmata, ilangillu takiniqsaullutik tavvanngat vaasinga 9-mit-20-mut ilasimallutik

Aglaksimajutuqait Asingit Ukuninga Ilajaukkanniqsimavut

9Tavva arnait Piitturuusimuaqput ilannarijanginnullu, uqarlutik naittumik uqaujjaujjutigiqqaujamingnik. 10Tamatuma kinguningagut, Jiisusi nangminiq tilisilauqpuq ilinniaqtiminik siqiniup nuivianit siqiniup nipivianut tikillutik. Tamatuminga uqausiqarlutik ijiqsimalauqtumik inuusiqarnaqtumik piulijaunirmiglu isuqanngittumut.#16:10 Ilangit aglaksimajutuqaviniit aaqqiksuqtauvaktuviniillu aglatuqait nainniqsaungmata, ilangillu takiniqsaullutik tavvanngat vaasinga 9-mit-10-mut ilasimallutik

Currently Selected:

Maakusiup Aglangit 16: EAIBR

Highlight

Copy