Luukasiup Aglangit 6

Jiisusiup Sapatimik Uqausiqarninga

Maatiusi 12:1-8; Maakusi 2:23-28

1Sapatiutillugu piruqsiivingmi niaquujaksalikkut Jiisusi pisuktillugu, ilinniaqtingit niaquujaksait nuvunginnik piiqsivaglutik aksaliglugit niriliqput. 2Tavva Paarisit ilangit uqaqput, “Suuq Sapatimi piqujanut piqujaunngittumik pivisi?”

3Jiisusiup kiuvait, “Uqalimaalauqsimanngilasi Taiviti kaalirami ilagijangillu pinasualaurninginnik? 4Guutiup iglunganut itilauqpuq; niaquujat Guutimut tunijausimajut nirilauqpait ilagijani niriqatigillugit, taimaak piqujat piqujisimanngitillugit tunirrusiqtitsijit niaquujanik Guutimut tunijausimajunik niriqujaujutuungmata.”

5Jiisusiup uqautivait, “Inuup Irninga Ataniungmat Sapatimut.”

Inuup Aggangit Nukiqanngittut

Maatiusi 12:9-14; Maakusi 3:1-6

6Sapatiuttauq taassuma asiagut, Jiisusi itirivuq Juutit ukpirnirmut katimavingannut, tavvani ajuriqtuilirluni, tavvani angutitaqaqpuq aggangit taliqpingit nukiqanngittumik. 7Piqujanik ilisaijit, Paarisillu qaujisaqpaat patsitiksaqarumallutik, Sapatimi aaqqiksiniarmangaat. 8Jiisusiup isumangit qaujimagamigit, angummut aggangit nukiqanngittumut uqaqpuq, “Nikuvillutit maunga qaigit.” Taanna nikuvinnami Jiisusi upakpaa. 9Jiisusi inungnut uqaqpuq, “Apirivassi piqujat Sapatimi piujumik piqujivaat, piunngittumigluunniit? Inungmik inuuliksiqujivaat, tuqutsiqujivalluunniit?” 10Tavvaniittulimaat Jiisusiup takusaqpait, angummut aggangit nukiqanngittumut uqaqpuq, “Aggatit isakkit.” Tavva isakpait, aggangit qanuittunniiqput nukiqalirlutik.

11Juutit ninngakput uqaqatigiilirlutik qanuq Jiisusi piniarmangaarmijjuk.

Jiisusiup 12-nik Aapuusitalingnik Niruarninga

Maatiusi 10:1-4; Maakusi 3:13-19

12Ulluni taakkunani Jiisusi qaqqamut majuaqpuq tuksiariaqturluni; unnuaq naallugu tavvani tuksiaqpuq Guutimut. 13Ullunnguqtillugu ilinniaqtini qaiquvait, niruarluni taakkunanngat 12-nik, taakkua attiqpait aapuusitalingnik; 14Saimuuni, Piitturuusimik atiqtaaqtippaa, Aanturuulu taassuma qatanngutaa; Juanasilu Jaimisilu, Pilippuusilu, Patiulumiulu, 15Maatiusilu, Tuumasilu, Jaimisilu Aulpiasiup irninga, Saimuunilu Paitturiammik taijaujuq, 16Juutasilu Jaimisiup irninga, Juutasilu Iskariat, taanna Jiisusimik pijautitsilauqtuq.

Jiisusiup Ajuriqtuininga Aaqqiksiningalu

Maatiusi 4:23-25

17Jiisusi qaqqamit ammuakkami aapuusitalit ilagillugit natirnamuurami nangiliqpuq, ilinniaqtini inugiakturjuallu ilagillugit asingillu tusaajaqtuqsimajut Juutiamit, Jiruusalimmillu, tariullu sinaanit Tairimit Saitunimillu pisimajut taakkua tamaunngaqsimavut Jiisusimik tusaajumallutik aaqqiktaujumallutiglu qanimmasimingnit. 18Anirnirlungnut ilummiqtausimajut tavvunngalaurivut aaqqiktaullutik. 19Inugiaktut Jiisusimik aktuinasuaqput, pijunnarniq taassumangat aningmat aanniajulimaat aaqqikpait.

Jiisusiup Ajuriqtuininga Quviasungnirmik Qiksaangnirmiglu

Maatiusi 5:1-12

20Jiisusiup ilinniaqtini takusarlugit uqautivait:

“Saimaqtitaunaqtumiippusi ajuqsaqtusi; Guutiup Ataniuvinga pigilirassiuk.

21Saimaqtitaunaqtumiippusi maanna kaaktusi, naammaksilusi nirititaujumaarassi.

Saimaqtitaunaqtumiippusi maanna qiajusi; iglarumaarassi.

22“Saimaqtitaunaqtumiippusi inuit uumigikpasi, narrugikpasilu uqarnirluutigikpasilu, piunngittualuuniraqpasilu, Inuup Irninga pijjutigillugu! 23Taimaitaulirussi quviasugissi, qiggiqtarlusi taanisirlusilu quviasungnirmut, angijumik akiliqtaujumaarassi qilangmi; sivulivininngittauq taimailiurilaurmingmata nalauttaijunik.

24Kappianaqtumiippusili maanna ajuqsanngittusi, pijariakittumik inuusiqariirassi.

25Kappianaqtumiippusi maanna aqiattusuktusi; kaalirumaarassi.

Kappianaqtumiippusi maanna iglaqtusi, ugguarlusi qiajumaarassi.

26“Kappianaqtumiippusi inungnit piugijaullusi uqausiutsiaqattaqtusi, sivullingittauq taimailiulaurmingmata nalauttaijuniraqtunik sulinngittunik.”

Jiisusiup Ajuriqtuininga Akiraqtuqtittinnik Nagligusuqujilluni

Maatiusi 5:38-48; 7:12a

27“Tusaajusi uqautivassi, akiraqtuqtisi nagligisiuk, pitsiaqpaglugillu ilissinnik uumisuktut, 28ilissinnik uqarnirluutiqaqtut saimmaqtitauqusiuk, ilissinnik pitsianngittut tuksiutisigik. 29Uluakkut patiktauguvit, igluattauq maniliruk; annuraat silalliq pijaukpat, ilulliqtauq annuraat tunilauruk. 30Ilingnit sunamik pijumajut tamarmik tunisivigisiuk; pigijarnik pijuqaqpat utiqtiqulugu uqautiniarnagu. 31Inuuqatingnit qanuq piniarviujumaguvit, taimaaktauq taakkunannga piniarviugajannguarlutit piniarvigikkit.

32“Nagligijitit nagligijatuariguvigit, sunamik akiliqtaujjutiksaqaqpit? Piunngittulijut aglaat nagligijimingnik nagligusukpakkivut. 33Pitsiaqtingnullu kisiani pitsiaqattaruvit, sunamik akiliqtaujjutiksaqaqpit? Piunngittulijut aglaat taimaippakkivut pitsiaqtimingnut. 34Atuqtitsivakkuvit taakkununga utiqtitsiviuniarasugilutit, sunamik akiliqtaujjutiksaqaqpiit? Piunngittulijut aglaat atuqtitsivakput piunngittulijunut taimailluaqtunik utiqtitsiviujumallutik. 35Akiraqtuqtisi nagligisiuk, pitsiarvigilugillu, atuqtippaglugillu utiqtitsiviuniariaksaq isumanngillusi; tavva akiliqtauniksasi angijualuujumaaqpuq, quttingniqpaangujuup irniriniaqpaasi; taanna pitsiarmat qujalinngittunut piunngittulijunullu. 36Nikagusugissi, Ataatasitauq nikagusungmat.”

Asittinnik Iqqaqtuiniq

Maatiusi 7:1-5

37“Iqqaqtuiniarasi, iqqaqtuqtauqunasi; pasijaksannguqtitsiniarasi, pasijaksannguqtitauqunasi; isumagijunaiqsiqattarissi, tavva isumagijunairviuniarivusi. 38Tunisigissi, tavva tunisiviulaarivusi; uuktuummut tatattumik, sitisaqsimajumik, aulatillugu tatatiqsimajumik, amiganngiluaqtumik tavva tunisiviugajaqpusi. Asissinnut pinianiriqattaqtasi maliglugit piniarviujumaarivusi.”

39Ajjiujumik uqautivait: “Tautunngittuq asiminik tautunngittumik tasiuqsijunnaqpa? Tamarmik itiqsamut katagajanngilak? 40Ilinniaqti qaujimaniqsaunngilaq ilisaijiminit, ilinniariirunili ilisaijimitut qaujimatigilirniaqpuq.

41“Sungmat, inuuqativit ijjisimautinga mikijuq takunnaqpiuk uvva nangminiq ijjisimautiit qijualuk kamaginagu? 42Sungmallu inuuqatingnut uqarunnaqpit ‘Inuuqatiik, ijjisimautit ijingniittuq piilaurlagu,’ uvva nangminiq ijingniittuq ijjisimautiit qijualuk kamaginagu? Takkurmuuqtutit, ijjisimautiit nangminiq ijingnit piiqqaaruk, taututsiarlutit inuuqativit ijjisimautinganik mikijumik piiqsijunnarniaravit.”

Jiisusiup Uqausiqarninga Napaaqtumik Paurnganginniglu

Maatiusi 7:16-20; 12:33-35

43“Napaaqtuq qanuingitsiaqtuq piunngittunik paurngaqarunnanngilaq, napaaqtuq piunngittuq piujunik paurngaqarunnannginnivuq; 44napaaqtut tamarmik qaujimajauvut paurngangitigut, paurngait pigilingnik kakillautilingnit pijauvanngilat, paurngaillu uainiksait uqpingnit kakillautilingnit pijauvannginnivut. 45Inutsiavak piujunik saqqititsivakpuq ilumini pigijaminik. Piunngittulijurlu piunngittunik saqqititsivakpuq ilumini pigijaminik piunngittunik; inuk ilungata tatajjutinginnik qaninga uqasuungungmat.”

Igluliuqtiik Marruuk

Maatiusi 7:24-27

46“Qanuimmat Ataniiriniraqataqpisinnga uqallusi, ‘Ataniq, Ataniq,’ atuqujanniglu maligasi? 47Uvannut qaijulimaat uqausinni tusaqtut maliglugillu, taakkua ajjigijanganik uqautiniaqpassi. 48Imaak ajjiqaqput; inuk igluliuqtuq; nuna ilutujumik itiqsaliurlugu, qaiqtuq tikinnamiuk tunngaviliarivaa igluliaminut; kuugaaluk qaamilirmat, iglumullu kuulirmat, iglu aulajjagunnanngilaq tungaviqatsiarmat, 49uqausinnigli tusaqtut malignagillu ajjiqaqput angummik igluliuqtumik tunngaviliutsiaqsimanngittumik; kuungmut qaamittumut tikitaugami, iglu tavvainnaq urruvuq, asiruqtaummarigluni.”

Currently Selected:

Luukasiup Aglangit 6: EAIBR

Highlight

Copy