Luukasiup Aglangit 7
7
Jiisusiup Aaqqiksininga Ruumamiut Unataqtuksaqutingata Pijinganik
Maatiusi 8:5-13
1Jiisusi tamainnik uqallagiirami inungnut Kapiirniamuaqpuq. 2Ruumamiut unataqtuksaqutingita angajuqqaangat tavvani pijiqalauqpuq pinnarijaminik, taanna pijinga qanimavuq tuquligaalluni. 3Jiisusimik tusarami, Juutit angajuqqaangit tilivait; qaiqujauqullugu pijinganik aaqqiksiniarmat. 4Taakkua Jiisusi upakkamijjuk aksururlutik qinuvigivaat upagutiqullugu, uqarlutik, “Unataqtuksait angajuqqaangat ilingnut ikajuqtaujariaqammarikpuq, 5inuuqativut pinnaringmagit, ukpirnirmullu katimaviksattinnik sanajautitsisimavuq.”
6Jiisusiup tavvunngauqatigiliqpait. Iglunga qaglingmajjuk, unataqtuksait angajuqqaangat ilannarijaminik tilisivuq, uqaqullugit, imaak, “Ataniq, qaijunniirit, naluqqutigama ilingnik itiqujijariaksaq iglunnut; 7ilingnut upagutijariaksaq naluqqutigivunga. Uqatuinnarilli, piqujilutit, pijiga tavva aaqqingniaqpuq. 8Uvangattauq angajuqqaaqarama, unataqtuksaqutiqarlungalu sialaarijannik; ilangannut uqaruma, ‘Ikunngarit’ taikunngaqpuq tavva; asianullu uqaruma ‘Qaigit,’ qaivuq tavva; pijinnut uqaruma ‘Una sanalauruk, sanavaa tavva.’”
9Jiisusiup tamanna tusaramiuk kamaniarutigivaa, inugiaktut maliktini takusarlugit uqautivait, “Uqautivassi, Isarialimiuni taimaak ukpirniqaqtigijumik qaujilaunngilanga.”
10Tilijausimajut iglumut utiramik, piji takuvaat aaqqiksimaliqtuq.
Jiisusiup Uummaqtitsininga Uiggarniup Irninganik
11Kinguningagut Jiisusi nunalingnuarivuq Nainimik atilingmut, ilinniaqtini inugiaktullu ilagillugit. 12Nunalinut tikiliqtillugu, takugit, iluviqsijaqtuqtut tuqungajumik agjaqsijut aniliqput, arnaup irnituanganik, taanna uiggarniulluni; inugiaktut tavvanngat nunalingnit ilauvut. 13Ataniup arnaq takugamiuk, nagligimmarikpaa uqautillugu, “Qianngillutit.” 14Akiraqtaujuq upakkamiuk aktuqpaa, akiraqtut nuqqaqput, Jiisusi uqaqpuq, “Inuusuktuq, uqautivagit makittit.” 15Tuqungajuq ingippuq uqallalirluni. Jiisusiup Anaananganuaqtippaa.
16Inulimaat sivuuraliqput; Guuti niqtuqpaat uqarlutik, “Nalauttaijullaringmit tikitauvugut! Guutiup inuqutini upakpait.”
17Tamanna Jiisusiup piniarninga unikkausiuliqpuq Juutiami nunaqaqtulimaanit, qanigijanganiittulimaanillu.
Juanasi Paaptitsirijiup Uqariaqtuqtitangit
Maatiusi 11:2-19
18Juanasi Paaptitsirijiup ilinniaqtingita tamakkuninga Juanasi unikkaarvigivaat. 19Juanasi qaiqujivuq ilinniaqtiminik marruungnik, tilillugik Atanirmut apirijaqtuqullugik taassuminga, imaak, “Tainnauvit tikinniarniraqtausimajuq, uvvaluunniit asingnik niriugiaqaqpita?”
20Taakkuak Jiisusimut tikinnamik uqaqpuuk, “Juanasi Paaptitsirijiup tilivaatikkuk apiriqullunuk imaak, ‘Tainnauvit, tikinniarniraqtausimajuq, uvvaluunniit asingnik niriugiaqaqpita?’”
21Tavvani ikarrami Jiisusi inungnik aanniajunik amisunik aaqqiksivuq, anirnirlungnik inungnit anititsivuq, tautunngittut amisut tautuliqtippait. 22Taakkuak kiuvaak, “Juanasi uqautijaqtuqsikkuk takujassingnik tusaqtassinniglu: tautunngittut tautuliqput, pisugunnanngittut pisugunnaqsivut, paqtiqtut kappiagijaujumik aaqqiktauvut, tusaanngittullu tusaaliqput, tuqungajullu uummaqput, aktlujut uqaujjauvut uqausirnik tusaruminaqtunik. 23Saimaqtitausimajumik inuusiqaqpuq taanna uvannik qularutiqanngittuq.”
24Juanasiup tilisimajangik tavvaniittunniirmatik, Jiisusi inugiaktunut uqaqpuq Juanasimik pijjutiqarluni, “Juanasi takujaqturassiuk inuqanngittumi, qanuittumik takuniarasugilauqpisi? Iviksugarjuamik anurimut aulataujumik takuniarasugilauqpisi? 25Sunamigli takujaqtulauqpisi? Angummik annuraatsiaqsimajumik takujaqtulauqpisi? Takugit, annuraatsiariktut ajuqsanngittuullutik, angajuqqaarjuap iglunginni iniqasuunguvut. 26Sunamik takujaqtulauqpisi? Nalauttaijumik takuniarasugilauqpisi? Ilaak taanna nalauttaijumit pillariuniqsauvuq. 27Juanasi imaak uqausiusimavuq, ‘Takugit, tilijara pinasuariaqtuqtippara, sivunirni aqqutiksarnik aaqqiksuiqullugu.’” 28Suli uqaqpuq, “Uqautivassi, Juanasi Paaptitsirijuq anginiqsauvuq arnamut irniarijaulauqsimajunit tamainnit; kisianili nalliat Guutiup Ataniuvingani mikinniqpaujuq taanna anginiqsauvuq Juanasimit.”
29Tusalauqtut tamarmik Juanasimik Ruumamiullu kiinaujaiqtitsijiqutingit naalalaurmata Guutiup atuqtauqujanganik, Juanasimut paaptitaulauqput; 30Paarisilli piqujaniglu ilisaijit sulijuqsanngilat Guutiup pinasuarninganik taakkununga, paaptitaujumanatiglu Juanasimut.
31“Sunamulli ukua inuit maanna ajjiutittunnaqpakka? Sunamik ajjiqaqpat? 32Ajjiqaqput surusikulungnik niuvirvit saniani iksivajunik immingnut uqaqattautijutitut, ‘Nijjausijarvigigaluarassi taanisinngilasi; qiksaaktuqsiutinik nilliagaluaratta qiasinngilasi.’ 33Juanasi Paaptitsiriji tikilauqpuq nirittailivagluni, uainimik imiqpagani; uqaqpusi, ‘Taanna anirnirlungmik ilummiqtausimavuq.’ 34Inuup Irninga tikimmat nirittailinani imiqtailinanilu; uqaqpusi, ‘Takugit, una niritujualuk aangajaaqtiullunilu, Ruumamiut kiinaujaiqtitsijingita piunngittulijullu ilannaarijangat!’ 35Silatuniup sulitsiarninga saqqititauvuq qiturngalimaangitigut.”#7:35 Qiturngalimaangitigut uvvalu ilaliuqsijulimaatigut
Jiisusiup Pulaariarninga Saimuuniup Paarisiungmijuup Iglunganut
36Paarisit ilangatta Jiisusi niriqatigijumallugu qaiquvaa igluminut, Jiisusi taassuma iglunganuaqpuq, nirivinganut inngilluni. 37Tavvani nunalingni arnaqtaqaqpuq ajuqtulijimik, taanna tusarami Jiisusi niriqataungma Paarisiup iglungani, pullaujamik naksarluni tavvunngaqpuq tipitsiarisaummik imalingmik. 38Jiisusiup tunuani nangiqpuq itigangita saniani, qialluni, quvviminut itigangit qausiliqtiqpait, allaqtirlugillu nujarminut, itigangillu kunikpait, tipitsiariktumik kuvvirillugit. 39Paarisiup qaiqujisimajuup taanna taimailiurninga takugamiuk, isumaliqpuq, “Una sulijumik nalauttaijuuguni, qaujigajaqpuq arnaq qanuittuungmangaat aktuajigijani; ajuqtulijiuninganik qaujigajaqpaa.”
40Jiisusiup nilliutivaa uqautillugu, “Saimuunii, ilingnut uqausiksaqarama.”
Taassuma kiuvaa, “Qanuq ajuriqtuiji.”
41“Marruungnik angutitaqalauqpuq akiliksaqaqtuungnik atunit kiinaujanik atuqtitsijimut; aippanga akiliksaqalauqpuq 500-nik, aippangalu 50-nik. 42Taakkuak atunit akiliutiksaqanngimmatik akiliksaqarvigijingikta akiliiqujunniirlugik isumagijunnairvigivaak. Nalliagli taima akiliksaqarvigijaminik nagligusungniqsaugajaqpaa?”
43Saimuuni kiuvuq, “Isumavunga unurniqsanik akiliksaqalauqtuq.”
Jiisusiup uqautivaa, “Sulivutit.” 44Arnamut takusarami Saimuuni uqautivaa, “Una arnaq takuviuk? Iglungnut itirama, imirmik qaitsilaunngilarma itigannut uasautiksannik, taassumali itigakka qausiliqtiqpait quvviminut allaqtirlugillu nujarminut. 45Tunngasuktillunga kunilaunngilarma, taassumali taimanngat itirami itigakka kuniksainnaqpait. 46Niaqura kuvvirilaunngilat napaaqtuup uqsunganut, taassumali itigakka kuvvirivait, tipitsiariktumut. 47Taimaimmat uqautivagit, arnaup piunngittuliningit amisut isumagijunniiqtauvut, taimaimmat angijumik naglingnirmik saqqititsivuq; mikijumigli piunngittulisimajuq isumagijunniirviujuq, mikijumik naglingniqaqpuq.”
48Jiisusiup arnaq uqautivaa, “Ajurnitit isumagijaujunniiqput.”
49Tavva nirijaqtuqsimajut immingnut uqaliqput, “Kinaugamiuna ajurnirnik aglaat isumagijunniiqsijunnaqpa?”
50Jiisusiup arnaq uqautivaa, “Ukpirnivit piulivaatit; isumajaanngillutit anilirit.”
Currently Selected:
Luukasiup Aglangit 7: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.
