Maakusiup Aglangit 10
10
Jiisusiup Ajuriqtuininga Katititausimajuk Avillaringningata Miksaanut
Maatiusi 19:1-12; Luukasi 16:18
1Tavvanngat aullarami Juutiap nunanganuaqpuq Kuup Juartaniup akianiittumut, inugasagjuat tavvunga katilirivut; ajuriqtuqpait, piusirivaktamitut.
2Paarisit upakpaat uukturumallugu apirivaat, “Piqujatinni angut nuliaminik avitsillarigunnaqtitauva?”
3Kiuvait, “Qanuq Muusisiup piquvaasi?”
4Taakkua kiuvaat, “Muusisi pijunnaqtitsilauqpuq angut avitsigutinik titirarluni, nuliaminik avitsijunnaqtitsilluni.”
5Jiisusiup uqautivait, “Muusisi taimaak piqujamik titiralauqpuq uummatisi sitijualuuninga pijjutigillugu. 6Pigiarninganilli sunatuinnait pinnguqtitauliqtillugit, ‘Guutiup angut arnarlu pinnguqtippaak. 7Taimaimmat angutiup ataatani anaananilu qimangniaqpaak nuliani katimaangarumalugu, 8taakkuaglu marruuk timikkut atausiulirniaqpuuk.’ Marruujunniirlutik uvinikkut atausinnguqpuuk. 9Tavva taimaimmat Guutiup katititangik, inuup avititaksarinngilaak.”
10Iglumuaramik ilinniaqtit Jiisusimut tamatuminga apiqsuutiqaliqput. 11Jiisusiup uqautivait, “Angut nuliaminik avitsillariktuq asianik nulianigluni, taanna nuliaminik asinniaqpuq nuliariqaalautanga pijjutigillugu. 12Taimaaktauq arnaq uiminik avitsillariktuq asianik uinigluni, taanna uigilauqtaminiktauq asiniarivuq.”
Jiisusiup Nutaqqanik Saimmaqtitsininga
Maatiusi 19:13-15; Luukasi 18:15-17
13Inuit nutarakulungnik Jiisusimut aatsivut, patimmijauqullugit taassumunga; ilinniaqtingitali iniqtiqpait. 14Jiisusiulli tamanna qaujigamiuk, akauksanngimmariliqpuq, ilinniaqtini uqautivait, “Nutarakuluit uvannut qailit, agvianngillusiuk; taakkua Guutiup Ataniuvinganik piqarmata. 15Sulijumik uqautivassi, nalliat Guutiup Ataniuvinganik nutarakuluktitut ilaliuqsinngittuq tavvunga itirnianngilaq.” 16Nutarakuluit iqillugit patimmillugillu saimmaqtipait.
Angut Ajuqsanngittuq
Maatiusi 19:16-30; Luukasi 18:18-30
17Aullaliqtillugu, angummit ullaktumit upaktauvuq saanganut paammaktirluni, Jiisusi apirivaa, “Ajuriqtuiji piujutit, qanuq pinasuaqtuksauvunga, inuusirmik nungusuittumik kingurngujjiqullunga?” 18Jiisusiup uqautivaa, “Sungmat piuniraqpinga? Piujuqanngilaq Guutikisimi piujutuuvuq. 19Piqujanik qaujimavutit: ‘Inuaqtuksaunngilatit, nuliarijarnik uigijarnigluunniit asinniaqtuksaunngilatit, tigliktuksaunngilatit, pasijaksaruqtitsinasuaqtuksaunngilatit sulinngittumut, uiviirriksijuksaunngilatit, ataatangnik anaanangniglu upigusutsiaqtuksauvutit.’”
20Taassuma uqautivaa, “Ajuriqtuiji, tamakkua surusiuninnit taimanngat malilauqpakka.”
21Jiisusiup takusarlugu nagligilluniuk uqautivaa, “Atausirmik suli pinngilatit; ailutit piqutingnik niurrutiqariaqturit, kiinaujaqtaatillu ajuqsaqtunut tunirrutigilugit, tavva piksaqatsiarniaqputit qilangmi; atii qailirit, maliglunga.” 22Taassuma tamanna tusaramiuk kiinarliqpuq, tavvanngat qimaruutiliqpuq qiksaammarigluni; ajuqsanngitturjuangugami.
23Jiisusi qiviarluni ilinniaqtini uqautivait, “Ajuqsanngittunut pijarninngittuuniaqpuq Guutiup Ataniuvinganut isiriaksaq!”
24Ilinniaqtingit tamatuminga tusaramik quaqsaaqput. Jiisusiup uqautivait, “Qiturngakka, ilaak pijarninngittuungmat Guutiup Ataniuvinganut isiriaksaq! 25Kaamili isirunarniqsaugajaqpuq miqqutiup ijingagut ajuqsanngittuup isirasuarnirigajaqtanganit Guutiup Ataniuvinganut.”
26Angijurjuamik quaqsaammarikput, uqautillugu, “Kinali tavva piulijaujunnarniaqpa?”
27Jiisusiup takusarlugit uqautivait, “Tamanna inungnut ajurnaqpuq, Guutimulli ajurnanngilaq; sunalimaat Guutimut ajurnanngimmata.”
28Piitturuusi uqaqpuq, “Takugit, sunatuinnavut tamarmik qimalauqpavut ilinnik malilirluta.”
29Jiisusi uqaqpuq, “Sulijumik uqautivssi, nalliat igluminik qimaijuq, uvvalu qatanngutiminik, uvvalu najaminik, anaanaminik ataataminigluunniit, qiturngaminigluunniit, nunaminigluunniit, uvanga pillunga uqausillu tusaruminaqtut pijjutigilugit, 30taanna anginiqsanik pikkannirniaqpuq tamaani inuutillugu 100-iqtulluaqtunik, iglunik, qatanngutiniglu, najangniglu, anaananiglu, qiturnganiglu, nunaniglu, akiraqtuqtaunirmiglu piqasiujjiluni, pijumaaqtumilu inuusirmik nungusuittumik pijumaaqpuq. 31Unuqtut sivulliit kingulliujumaaqput, kingullillu sivulliujumaarlutik.”
Jiisusiup Tuqutauniksaminik Uqausiqarningata Pingajuat
Maatiusi 20:17-19; Luukasi 18:31-34
32Jiruusalimmut aqqutingagut pisulirivut, Jiisusi ilinniaqtit sivuninganniippuq; ilinniaqtit quaqsaaqsimavut, inuit ilinniaqtingita kinguningani maliktut kappiasulirlutik. Ilinniaqtini 12 aqqummit sanirvaktillugit, uqautivait qanuiliurviulaarnirminik. 33Uqautillugit, “Takugit, tappaunga Jiruusalimmut ailiqpugut; Inuup Irninga tunijaujumaaqpuq tunirrusiqtitsijit angajuqqaanginnut, piqujaniglu ilisaijinut, taakkua tuqutaksannguqtittumaaqpaat, Juutiunngittunut tunilugu; 34taakkua mitautigijumaaqpaat, tivvuluglugu, tiigaqturlugu, tuqullugulu; ulluilli pingajuanni makilaaqpuq.”
Jaimisiup Juanasiullu Qinuningak
Maatiusi 20:20-28
35Tavva Jaimisiup Juanasiullu Sipitiup irningikta Jiisusi upakpaak, uqautillugu, “Ajuriqtuiji, ilingnut pititaujumavuguk sunatuinnarmik qinuarijattinnik.”
36Jiisusiup uqautivaak, “Sumik uvannut piniarviujumagassik?”
37Taakkuak uqautivaa, “Ilingnut iksivajunnaqtitaulaarumavuguk, aippaa taliqpingni aippaalu saumingni, Ataniuvingni niqturnaqturjuami.”
38Jiisusiup uqautivaak, “Qinuarijassingnik qaujimanngilasik. Imiutimik imirniaqtannik imirunnaraluaqpisik? Uvvalu paaptitaujjutiginiaqtannut paaptitaujunnaraluaqpisik?”
39Taakkuak kiuva, “Taimaak pijunnaqpuguk.”
Uqautivaak, “Imiutimik imiriaqaqtannik imirniaraluaqpusik; paaptitaujjutiginiaqtannullu paaptitaujunnarniaraluaqpusik; 40kisianili taliqpinni sauminniluunniit iksivajuksanik aaqqiijunnanngilanga, atuinnaruqtausimajulli kisimi tavvani iksivajumaarmata.”
41Ilinniaqtit qulit tamatuminga tusaramik, Jaimisimik Juanasimiglu akauksarunniiqput. 42Jiisusiup imminut qaiqullugit uqautivait, “Qaujimavusi angajuqqaangujut Juutiunngittuni inuqutimingnut pijunnarniqarmata, angajuqqaangit pijunnarnirjuaqarlutik inuqutiminut. 43Taakkuatitut akunnassinni piniarniqaqtuksaunngilasi; nallisi angajuqqaangujumajuq taanna ilissinnik pijitsiqtuksauvuq, 44nallisi akunnassinni sivulliqpaujumajuq taanna tamainnut pijikataarijaujuksauvuq. 45Aglaat Inuup Irninga tikisimanngimmat pijitsiqtaujaqturluni pijitsiriaqtuqpurli, inuusirminiglu tunisilluni amisut akiliijjujjaujjutiksanginnut.”
Jiisusiup Paaqtimiusimik Tautuliqtitsininga
Maatiusi 20:29-34; Luukasi 18:35-43
46Pisulirmigamik Jirikuumut tikipput; tavvanngat aullalirmata inugiakturjuat ilagillugit, tautunngittuq aqqutiup saniani iksivavuq kiinaujamik qinuji, Paartimiusimik atilik, Timiusiup irninga. 47Taanna tusarami Jiisusi Naasariitimiumik aqqusaaliqtumik, qaigalaaliqpuq uqarluni, “Jiisusi! Taivitiup irninga, nikaginnga!”
48Unuqtunut iniqtiqtauvuq, nipiqaqunagu; taannali qaigalaariakkannituinnaqpuq nipiqquqtugiakkannirluni, “Taivitiup irninga, nikaginnga!”
49Jiisusi nuqqarluni uqaqpuq, “Qaiqujaulaurli.”
Tavva tautunngittuq qaiquliqpaat uqautillugu, “Quviasulirit; nikuvillutit, taassuma qaiqulirmatit.”
50Uligjuani igillugu nikuvikauqtuqpuq Jiisusimuarluni.
51Jiisusiup uqautivaa, “Uvannuut qanuiliurviujumavit?”
Tautunngittuup uqautivaa, “Ajuriqtuiji, tautulikannirumavunga.”
52Jiisusiup uqautivaa, “Aulalirit, ukpirnivit aaqqikpaatit.” Tavvainnarlu takujunnaqsivuq malilirlugulu.
Currently Selected:
Maakusiup Aglangit 10: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.
