Maakusiup Aglangit 9
9
1Jiisusiup uqautivait, “Sulijumik uqautivassi, tavvaniittut ilangit tuqunianngilat Guutiup Ataniuvinganik pijunnarniqarluni tikilaunginningani.”
Jiisusiup Asijjiqtaulluni Iniqunaqtitauninga
Maatiusi 17:1-13; Luukasi 9:28-36
2Ulluit pingasuujuqtut kinguningagut Jiisusiup Piitturuusi Jaimisilu Juanasilu, ilagillugit qaqqamut puqtujumut majuraqput taakkutuullutik; takunnaaqtillugit Jiisusiup tauttua asijjiqtauvuq, 3annuraangit qakuqsivigjuarlutik qaumaliqput, qakurniqpaulirlutik tamaani nunami qakuqsititaujunnaqtunit. 4Taakkununga saqqittuqaqpuq Ilaijjamik Muusisimiglu; uqaqatiqalirlutik Jiisusimik. 5Piitturuusi Jiisusimut uqaqpuq, “Raapai, tamaaniinginnaruminaqsingmat; siniktarviliurumaliqpugut pingasunik, ilingnut atausirmik, Muusisimullu atausirmik, Ilaijjamullu atausirmik.” 6Piitturuusi qanuq uqariaksaq nalulilaurami, ilagijangillu kappiasuluaramik.
7Nuvujamut tarrititauvut, tavvanngallu nuvujamit nilliqtuqaqpuq, “Taanna tavva Irnira nagligimmariktara; taanna naalaksiuk.” 8Ilinniaqtit avammut takusaramik kinamigluunniit takunngilat Jiisusi kisimi takuvaat.
9Qaqqamit aqqaqtilirlutik, Jiisusiup iniqtiqpait kinamulluunniit uqaqunagit takuqqaujamingnik, Inuup Irninga tuqungajunit makilaunginningani.
10Tamanna naalalauqpaat asimingnut uqausirilaurnagu, immigulli apiqsuutiqaliqput qanuq tukiqarmangaat tuqungajunit makinniq. 11Tavva apirivaat, “Sungmat piqujanik ilisaijit uqaqattaqpat Ilaijja sivulliuluni tikitsariaqarnirarlugu?”
12Jiisusiup uqautivait, “Iilaak Ilaijja sivulliulluni tikitsariilauqpuq iluunnanginnik atuinnaruilluni; qanurli aglait uqaqpat Inuup Irninganik, unuqtunut aanniatitaujumaarninganik narrugijaujumaarninganiglu? 13Uqautivassili taanna Ilaijja tikilauqpuq, inungnullu isumaqsuutaulluni piniarviusimavuq, taimaak aglangni titirausiusimangmat piniarniksanga.”
Jiisusiup Nukappiamik Aaqqiksininga Anirnirlungmut Itiqtausimajumik
Maatiusi 17:14-21; Luukasi 9:37-43a
14Ilinniaqtinut tikiutigamik, takuvut inugasagjuanik avataaniittunik, piqujaniglu ilisaijit uqaqatiqaqput taakkuninga. 15Inuit Jiisusimik takugamik quaqsaaqput, tuavirlutik Jiisusimuaqput tunngasuktillugu. 16Ilinniaqtini apirivait, “Sunamingukua aivaqatigillusiuk uqaqatigijasi?”
17Angut tamaanngat inuit akurnganit nilliqpuq, “Ajuriqtuiji, irnira tamaunngautiqqauvara ilingnuaqullugu, anirnirlungmut najuqtauqattarmat uqarunnaqtitsinngittumik. 18Anirnirlungmut pinasuaqtaulituarami nunamut urrutitauqattarmat, qanirmigullu qapualirluni, kigutingit tusaqsauliqattaqput, timingalu sukangajualuuliqattarmat. Tavva ilinniaqtitit uqautiqauvakka taassuminga anirnirlungmik anititsiqullugit, kisianili anititsijunnanngilat.”
19Tavva uqautivait, “Inuuqatigiingujusi ukpirniqanngilasi, qanuq sivitutigijumik najuriaqaqpatssi? Qanurlu sivitutigijumik qinuisaarutigijariaqaqpassi? Nukappiaq#9:19 Turusiq qaitilauqsiuk.” 20Tavva nukappiaq taassumunngautivaat.
Anirnirluup Jiisusi takutuaramiuk, nukappiaq qiiqsuqtiliqpaa, nunamut urruvuq maniqqami aksakaaqattalirluni, qanirmigullu qapualiqpuq. 21Jiisusiup nukappiap ataatanga apirivaa, “Qanurnguna akuniutigijuq taimaittuuliqtuq?”
Ataatangata kiuvaa, “Nutaraunirminit taimailittautilik. 22Unuqtuisurluni anirnirluup tuqunnasuaqattaqsimajanga ikumamut imaanullu; qanutuinnaq pijunnaruvit, nikagiluta ikajulauqtigut.”
23Jiisusiup uqautivaa, “Ivvingaaq pijunnaruvit! Sunatuinarnik ajurnaqtuqanngilaq ukpiruvit.”
24Tavvainnarli nukappiap ataatanga nillirluni uqaqpuq, “Ukpiqpunga; ukpinnginninnit ikajunnga!”
25Jiisusi qaujigami inugasagjuat tuavirlutik qaivallialirmata, anirnirluk iniqtiqpaa, uqautillugu, “Anirnirluk tusaanngittutit uqarunnanngittutillu, piquvagit, tavvanngat nukappiamit anigit, tavvungalu itikkannirniarunniirlutit.”
26Anirnirluk nillialiqpuq, nukappiaq qiiqsuqtilaurlugu, tavvanngat anivuq, nukappiaq tuqungajuujaaliqpuq; tamarmiglu uqaliqput, “Tuquvuq.” 27Jiisusiulli nukappiaq aggangitigut tiguvaa ikajurlugu makitippaa, nikuvilluni.
28Iglumut itiqsimalirmat, ilinniaqtingita inutuuqatigillugu apirivaat, “Sungmat anitittunnanngilavut?”
29Jiisusiup uqautivait, “Taimaittut anirnirluit tuksiarnirmut#9:29 Ilangit uqaqsimajut “Nirittailinirmullu”kisiani anititaujunnaqput.”
Jiisusiup Tuquniksaminik Uqausiqakkannirninga
Maatiusi 17:22-23; Luukasi 9:43b-45
30Jiisusi ilinniaqtingillu tavvanngat aullaramik Galilia aqqusaaqpaat. Jiisusi nalliannigluunniit qaujimaqujinngilaq naniinnirminik; 31ilinniaqtini ajuriqtuqpait, uqautillugit, “Inuup Irninga pijautitaujumaaqpuq inungnut, taakkua tuquttumaaqpaat; tuqungalaurluni, ulluit pingasut aniguqpata makittumaarivuq.”
32Ilinniaqtingilli tukisinngilat uqausirijanginnik, apirijariaksarlu Jiisusimik ilirasuglutik.
Kina Anginiqpauva?
Maatiusi 18:1-5; Luukasi 9:46-48
33Kapiirniamut tikipput; iglumut itiqsimaliramik Jiisusiup ilinniaqtini apirivait, “Qanuq uqaqatigiiqqauvisi tamaunngaliqtilluta?”
34Ilinniaqtingilli kiujunnanngilat; tamaani aqqutimingni pisuglutik uqaqatigiiqqaugamik nallitik anginiqpaungmangaat, 35Jiisusi inginnami ilinniaqtini 12 qaiquvait; uqautillugit, “Nalliat sivulliqpaujumajuq, taanna imminik kingulliqpautittuksauvuq, tamainnullu pijigijauluni.” 36Surusikulungmik tigusivuq, ilinniaqtingita saanganuaqtippaa; iqilluniuk uqautivait, 37“Nalliat taimaittumik surusikulungmik tunngasuktitsijuq atinni taanna uvannik tunngasuktitsivuq; uvanniglu tunngasuktitsijuq, uvannituaq tunngasuktitsinngilaq tilijinnigli tunngasuktitsigivuq.”
Nalliat Uvattinnik Akiraqtunngittuq Ilagivavut
Luukasi 9:49-50
38Juanasiup uqautivaa, “Ajuriqtuiji, angummik takulauqpugut anirnirlungnik anititsiqattaqtumik atirnik, iniqtilauqpavulli nuqqaqullugu, uvattinnut ilagijaunngimmat.”
39Jiisusi uqaqpuq, “Taanna nuqqaqtitaksarinngilasi; nalliat kamanaqtulinirmik pinasuaqtuq atinnik aturluni, uvannik piunngittumik kinguningagut uqausiqaliqpanngimmat. 40Uvattinnik akiraqtunngittuup ilagivaatigut. 41Sulijumik uqautivassi, nalliannut imiqtitaugussi Christuusiup atinganik pigujjinissinnut, taanna imiqtitsijuq asiujinianngimmarikpuq akiliqtauniksaminik.”
Ajuqtulinirmut Pijumisaaqtauniq
Maatiusi 18:6-9; Luukasi 17:1-2
42“Nalliat nutarakuluit ilangannik uvannut ukpiqtumik ajuqtulititsijuq, taanna akauniqsaugajaqpuq niaquujaksanik siqallititsijjutiup ujaraalugnganik qungasingagut qilaksiviuluni imavingmut igitaukpat. 43Aggakpit ajuqtulitippatit, nakakkit; ilingnut akauniqsaugajarmat inuusirmut itirlutit igluanik aggaqanngillutit, igluktut aggaqarlutit igitaugajarnirnit saataanasiqarvingmut, ikumarjuarmut qamisuittumut. [ 44Tavvani quglugiaq taakkuninga nirijuq tuqunianngilaq, ikumalu uutitsijuq qaminniarani.]#9:44 Ijjujutuqait ilanginni pitaqangilluni ilanginni ilijausimalluni. Takulugu Maakusi 9:48 45itigakpillu ajuqtulitippatit, nakakkit; ilingnut akauniqsaugajarmat inuusirmut itirlutit igluanik itigaqanngillutit igluktut itigaqaraluaruvit igitaugajarnirnit saataanasiqarvingmut. [ 46Tavvani quglugiaq taakkuninga nirijuq tuqunianngilaq, ikumalu uutitsijuq qaminniarani.]#9:46 Ijjujutuqait ilanginni pitaqangilluni ilanginni ilijausimalluni. Takulugu Maakusi 9:48 47ijivit ajuqtulitippatit, taanna piiruk; ilingnut akauniqsaugajarmat Guutiup Ataniuvinganut itiruvit ijituaqarlutit igluktut ijiqarlutit igitaugajarnirnit saataanasiqarvingmut. 48Tavvani quglugiaq taakkuninga nirijuq tuqunianngilaq, ikumalu uutitsijuq qaminniarani.
49“Tamarmik salummaqsaqtauniaqput ikumamut. Tunirrutiksaup salummaqsaqtauvangningatut tariurmut.
50“Tariuq piuvuq: Kisianili tariungujuniiqpat, qanurli tariunguqtitaukkannirajaqpa? Tariuliktittut piqannariigissi ilissinnut, saimanaqtumiglu inuulusi ilissinnut atunit.”
Currently Selected:
Maakusiup Aglangit 9: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.
