Maakusiup Aglangit 13

Jiisusiup Uqausiqarninga Tuksiarvigjuap Asiruqtauniksanganik

Maatiusi 24:1-2; Luukasi 21:5-6

1Tuksiarvigjuarmit anilirmat, ilinniaqtingita ilangatta uqautivaa, “Takugit, ajuriqtuiji, makua ujarait sanamaningit aksualuk takuminaqput, iglutsiavammarialuullunilu!”

2Jiisusiup uqautivaa, “Igluliarisimajut makkua sanamatsiaqtut takuvigit? Ujaraktangit atausirluunniit iniminiittuqarunniirumaaqput, tamarmitsiaq urrutitaujumaarmata.”

Iluangijjutiksat Akiraqtuqtauniillu

Maatiusi 24:3-14; Luukasi 21:7-19

3Qaqqaup qaangani iksivalirmat napaaqtulingmik paurngaqaqtuni uqsuksaqtalingnik tuksiarvigjuap nalilluangani, Piitturuusiup Jaimisiullu Juanasiullu Aanturuullu upakpaat taakkutuullutik. 4Uqarlutik, “Uqautilauqtigut, qanga tamanna taimaittumaaqpa, sunanik nalunaikkutaqarumaaqpa tamatuma nalliutininga?”

5Jiisusiup uqautivait, “Qaujisatsiarissi uiviirrijauqunasi. 6Amisut atinni uvangaunirarlutit tikittumaarmata uqarlutik, ‘Taannauvunga!’ Amisut uiviirrijumaaqpait. 7Unataqtunik tusaalirussi unataqtullu unikkausiuninginnik tusaqtitaugussi, kappiasungniarasi; tamakkua nalliutijariaqarmata, silarjuup naggataa suli nalliutinngilaq. 8Inuuqatigiigjuat unatarumaaqput inuuqatigiigjuanut asimingnut, angajuqqauvit unatarumaaqput angajuqqauvingnut asimingnut; nunami nanituinnaq sajukpillaqattarumaaqpuq, kaangnaqturjuaqaqattarlunilu; tamakkua tavva irnisuktuup ikpingnialirningatut pigiaqpallialiqtut.

9“Ilissi nangminiq qaujisarissi; tigujaujumaaqpusi iqqaqtuivingmut pititaulusi; aanniqsiqtaujumaaqpusi Juutit ukpirnirmut katimavinginni; aataujumaaqpusi aulatsijinut angajuqqaarjuanullu nangiqullusi saanginni uvanga pijjutigilunga, nalunaiqsijunnaqullusi taakkununga. 10Uqausit tusaruminaqtut uqausiuqqaariaqaqput inuuqatigiigjuanut tamainnut. 11Tigujaugutsi iqqaqtuivingmullu aataugussi, isumajaarniarasi sivuningani qanuq uqariaqarniarmangaassi; uqausiqarissili tavvani nalliuttumi uqausiksaqtaaqtitaunirijassinnik, nangminiq uqallanginnassi, anirnirli ijjurnaittuq uqallakpuq. 12Inuit tigujautitsijumaaqput qatanngutimingnik tuqutauqullugit, ataataujut taimaittumaarivut qiturngamingnik, qiturngait akiraqtulirumaaqput angajuqqaamingnut tuqutautissilutik. 13Tamainnut uumigijaulirumaaqpusi uvanga pijjutigilunga. Nallialli qinuisaarluni aniguijuq taanna piulijaujumaaqpuq.”

Takuminaitturjuaq Kappianaqtuq

Maatiusi 24:15-28; Luukasi 21:20-24

14“Takulirussi takuminaitturjuarmik nappaqtaujumik tamaani iniksarinngitangani (atuaqsijuup tukisiliuk qanuq tukiqarmangaat), tavva Juutiamiittut qimaajariaqalirumaaqput qaqqanut. 15Igluup qaanganiittuq igluminut aqqariaqarumaanngilaq, sunatuinnarmik naksarumajaminik aiktlirasugluni. 16Piruqsiivingmiittuq aiktliriaqarumaanngilaq uligjuaminik. 17Kappianaqtualuujumaaqpuq arnanut nutaraksaqaqtunut qiturngalaalingnullu! 18Tuksiarissi qimaaviksasi ukiumi nalliutiqunagu. 19Ulluit taakkua kappianaqtut naliqarumaanngimmata silarjuap pigiarninganit Guutiup pinnguqtitsilaurninganit maannamut tikillugu, kinguningagut taimaak kappianaqtigijumik pitaqarumaanngilaq. 20Ataniup ulluit naigligiarnianngippagit, inulimaat piulijaujuqarajanngilat; niruaqsimajanili pijjutigillugit, ulluit taakkua naigligiaqsimavait.

21“Nalliannut uqaujjauguvit, ‘Takugit, una tavva Christuusi!’ Uvvalu, ‘Takugit, Christuusi taika!’ Ukpiriniarasigik. 22Christuusiuniraqtut sulinngittut, nalauttaijuuniraqtullu sulinngittut saqqirumaarmata nalunaikkutarnik saqqititsijumaaqput kamanaqtulinirniglu, tammaqtissilutik, aglaat niruaqtausimajut ajurnanngippata tammaqtinnasuarlugit. 23Qaujisatsiarissi; tamakkuninga tamainnik uqautivassi suli tamakkua nalliutiqqaaqtinnagit.”

Inuup Irningata Tikinninga

Maatiusi 24:29-31; Luukasi 21:25-28

24“Ulluit taakkua kappianaqtut kingurngattigut, siqiniq taaqsijumaaqpuq, taqqirlu qaumajunniirumaaqpuq, 25ulluriallu qilangmit katagarumaaqput, qilangmi pijunnarnit aulatitaujumaaqput. 26Tavva Inuup Irninga takujumaaqpaat nuvujatigut aqqaqtuq pijunnarnirjuaqarluni niqturnarnirjuaqarlunilu. 27Taassuma aingilit tilijumaaqpait, katiqsuiqullugit niruaqsimajanginnik nunarjuap anuraarvigivaktanginnit sitamanit, nunarjuap isuanit qilaup isuanut.”

Napaaqtumit Pigilingnik Paurngalingmit Ilinniarutiksaq

Maatiusi 24:32-35; Luukasi 21:29-33

28“Napaaqtuup pigilingnik paurngaliup ajuriqturlisi ilinniarutiksassinnik: avalangajungit uummarutsiaraangamik pirurviuliqpakput uqaujaqalirlutiglu, tavva qaujivakpusi aujaujariaktlilirmat. 29Taimaaktauq, tamakkua uqausirijakka takulirutsigik pivallialiqtut, tavva qaujimaniaqpusi qanittuulirmat isiqtarvingmiilirlunilu.#13:29 Uvvalu tikituinnariaqalirmat ukkuamiilirlunilu 30sulijumik uqautivassi, maanna inuujut nungulauqqaaqtinnagit tamakkua tamarmik nalliutijumaaqput. 31Qilaglu nunalu nungujumaaqpuuk, uqausikkali nungujumaanngilat.”

Nalliannut Qaujimajaunngilaq Ulluq Ikarrarluunniit

Maatiusi 24:36-44

32“Ullup tamatuma nalliunninga ikarrarluunniit nalliannut qaujimajaunngilaq, aingilit aglaat qilangmiittut, Irniulluunniit qaujimannginnivaa, Ataataup kisimi qaujimavaa. 33Qaujimanasuatsiarissi, qaujisatsiarlusi; qanga nalliutijumaarmangaa qaujimanngginnassiuk. 34Angutitut aullaqtutut taimaittumaaqpuq, angirraminik qimailirami pijiminik kamajiutitsijutut, taakkua atunit pinasuariaqaqtanginnik uqautitsiaqpait, ukkuamik qaujisaqtiuniaqtuq qaujisatsiaquvaa. 35Taimaimmat qaujisatsiarissi, igluup angajuqqaangata tikivviginiaqtanga qaujimannginnassiuk, unnukkut tikituinnariaqarmat, uvvalu unnualluakkut tikituinnariaqarluni, uvvalu qaummaliqtillugu angutiviap nillirvingani, uvvalu ullaannguqtillugu. 36Tavvainnaq tikikallakpat siniktillusi tikitauqunasi. 37Ilissinnut uqausirijara tamainnut uqaqpara: iqqumattiarissi.”

Currently Selected:

Maakusiup Aglangit 13: EAIBR

Highlight

Copy