एहुना 5

दाह धरीरे गेतेगतो होड़राः नपायगुः

1तोनोंग दिन तयोमरे ईसू एहूदाकूराः परोब लगा एरुसलेमे सेनेडा। 2एरुसलेमरे भेड़ा ञावराः हता दुवार कुटीरे मीटोंग दाह दोहोना। इबरानी भासीरे नाःआ दाहराः ञाव दोहोना बेत-हसदा। अरू हना दाहराः चइरो गतर पाँचगोटोंग मरंग परछी दोहोना। 3हंडा मुरुक बेमरियाकू, अंधा होड़कू, लकवा ञेडतो होड़कू अरू खोड़ा होड़कू गेतेगतोकू दोहोना। 4[तोनोंग तोनोंग बेला परबू भगवानरीग बराहील सेरमो देस अते दाःरे उतरावकियानखन दाःए हिड़कोड़ा। दो दाःरे मड़ंगकू उतराःआ, हँकू तोनोंग इयाःआ बेमरियारेकू दोहोना हों हँकू नपाय जुवाःआ।] 5दो हंडा मी होड़ होड़ दोहोना। हाँय अड़तीस बरिस वरीते लकवा बेमारीरेय दोहोना। 6ईसू हाँयग होड़ हंडा गेतेगतोय ञेलतिरिया अरू हाँय मुरुक बरिस वरीते बेमरियारे इदानिया माःआन सुदीकेडखन हाँये होंबोरतिरिया, “नपायगुः लगाम चहाःतना जा?”

7दो हाँयग बेमरिया होड़ ईसू एचेरेय कतातेड, “ने साहेब, दाः हिड़कोड़गुःता हनमेला ईंग दाःरे गोः उतरावगींग लगा तोनोंगीग होड़ ईंग सुदा कोवाया। ईंग दाःरे उतराः लगायिंग कुरनिस सोयता दो, ईंग अते मड़ंग तोनोंगीग एटाः होड़ उतराव जुवाःता।”

8हनते ईसू हाँय एचेरेय कताया, “रिमुःमे! अरू आमराः पटिया रेमकेडखनमे सलाव जुवाः।” 9हाँय हनन मेलाय नपाययान अरू आँयगराः पटिया रेमतेडखने दँड़ा चुवेरगोडा।

दो हना दिन लोड़ोनराः दिन दोहोना, 10अरू एहूदाकू नपायनेना हाँयग होड़ एचेरेकू कताया, “तिसिंग दो लोड़ोनराः दिन हवे। अबूराः नियम इया तिसिंग पटिया रेम कोवानेःआ।”

11मनदो हाँय कता कुदातेरा, “ईंगे नपायतेरा हाँयग होड़ ईंग एचेरेय कतातेरा, आमराः पटिया रेमकेडखनमे सलाव जुवाः, माःआन।”

12दो हँकू हाँय एचेरेकू होंबोरतेड, “पटिया रेमकेडखनमे सलाव जुवाः, माःआने कतावातेडमेःआ हाँयग होड़ इये हवे?”

13हंडा मुरुक होड़कू दोहोना। हना अते ईसू कगरावयाने। हनालगा नपायनेना हाँयग होड़ मेरेय सुदी अवेगाड, हाँय इये दोहोना, माःआन।

14तयोमरे ईसू सुदा हाँयग होड़ भगवानराः ओड़ाःरेय जुमावनेना। अरू ईसू हाँय एचेरेय कतातेड, “ञेलमे! आम नपाययना। अरू अहम कसूरगे। नाःआ अते बगरा तोनोंग इयाःआ गराह कटसिया आम एचेरे अहा होयाः।” 15हनते हाँयग होड़ सेनेवाडखन एहूदाकू एचेरेय कता उदुःगोतेड, ईसू ईंगे नपायकेरा, माःआन।

16ईसू नाःआ जमाकून लोड़ोनराः दिनरेय एचेतेरा। हनालगा एहूदाकू हाँय संताव लगाकू बुँहड़ीतेरा। 17हनते ईसू कतातेड, “नुँहू वरी ईंग अपांग बुतागोड ञवनताय। हनालगा ईंग हों हाँय इयायिंग बुतागोड ञवनतना।” 18ईसू लोड़ोनराः दिन मेरेय मनावगाड अरू हाँय भगवान ईंग अपांग माःआन कता घड़ीन ईंग भगवान इया इदानिंगा, माःआने कतानता। हना ओजाहते एहूदाकू ईसू ञेड गोजेय लगा अरू मुरुककू कुरनिसतेरा।

बेटातराः हातपात

19दो ईसू हँकू एचेरेय कतातेरा, “अपे ईंगपे अयूम! बेटात अनँयग आँयते तोनोंगाः ओरोय एचे अवेतेरा। मनदो हाँय अपात एचेतेय ञेलता हनानाः एकला हाँय एचेयता। अपात एचेयता, हनन इया बेटात होंय एचेयता। 20अपात बेटाते दुलारता अरू हाँय एचेयता हना जमाकून बेटाते उदुःवाता। नाःआ अते मरंग मरंग बुता एचेय लगा होंय उदुःवायता। अरू अपे मुरुकपे बयाव जुवाःता। 21अपात गोएगतो होड़कूय जियाव रेमा, हनन इया बेटात हों हाँय चहाःता हँकुःआ होड़कू जीवे एमेवाकूता।”

22“अपात तोनोंगीग होड़ मेरेय फड़ियावगेयता, मनदो फड़ियावकूराः बुता बेटाते जिमावारा। 23नाःआते होड़कू अपातकू मान मरजइतता हनन इया बेटात होंकू मान मरजइतता। अरू बेटात मेरेय मान मरजइतगेयता हाँयग होड़, बेटाते वारकेरा हाँयग अपात हों मेरेय मान मरजइतगेयता।”

24“अपे ईंगपे अयूम! ईंगराः सरवने अयूमता अरू ईंगे वारकेरा हाँय एचेरेय बिसवासगेता हाँयग होड़, ओरो टुटीगनेना हना जीवे पवाःता अरू भगवान हाँय ओरोय डंडियावतिरिया। मनदो हाँय गुजुः अते जीव अगीय बोलोयना। 25अपे ईंगपे अयूम, मी बेला सुदुरुःता, अरू हनमेला गोएगतो होड़कू भगवानरीग बेटातराः अरोकू अयूमता अरूकू जियाःता। मनदो हना बेला नुनुँहू बुँहड़ीयना। 26अपात जीवराः सूती हवे। हनन इया बेटात हों जीवराः सूती बड़ाँः लगा हातपाते एमेवाडिया। 27हाँय मनुवारीग बेटात हवे। हनालगा अपात होड़कूय फड़ियाव लगा बेटात हातपाते ओवाडिया। 28मड़गटरे इदानकुःआ हँकुःआ होड़कू हाँयराः अरो अयूमकेडखन उडुंग वेगराः बेला सुदुरुःतना अरू अपे अहापे बयावगुः। 29नपाय बुताकू एचेतेरा, हँकू भगवान अते ओरो टुटीगनेना हना जीव पवाः लगाकू जियाव रिमुःता अरू बेलूर बेलूर बुताकूनकू एचेतेरा, हँकू भगवान अते डंडियाव पवाः लगाकू जियाव रिमुःता।”

30“ईंग इनिंग ईंगते तोनोंगाः मेरिंग एचे अवेयता। ईंग भगवान अगीतेयिंग अयुमेता हनन इयायिंग फड़ियावकूता। ईंग इनिंग ओंगोल इया एचेय लगा मेरिंग चहाःतना, मनदो भगवान ईंगे वारकेरा, अरू हाँयराः ओंगोल इया एचेय लगायिंग चहाःतना। हनालगा ईंगराः फनड़ियाव सताय इदा।”

31ईसू अरूय कतातेड, “ईंग इनिंग बदीरे हिदइतिंग एमे दो, हना हिदइत तोनोंगीग सताय हवे माःआन ओरोकू मनावनेना।#दो. नि. 19:15; मती 18:16 32मनदो एटाः होड़ ईंग बदीरे हिदइते एमेयतना अरू ईंग सुसुदीतना ईंग बदीरे हाँयराः हिदइत सताय हवे।”

33“अपे बतिसमा एमेयीग होड़ एहुना एचेरे होड़कूपे वारतेरा अरू हाँय ईंग बदीरे सताय हिदइते उदुःतेरा।#एहु 1:19 34होड़कू ईंग बदीरे हिदइतकू उदुः लगा मेरिंग चहाःता। मनदो अपे सडावगुः लगा नाःआ कतायिंग कता उदुःकेरा। 35एहुना विड़चेड़तो अरू सलगाःतो ढिबरी इयाय दोहोना अरू अपे तोनोंग बेला वरी हाँयराः कता मरसल इया भगवानराः सतायरे सलाः लगापे संघरावाया।”

36“बुता पुरावगे लगा अपांग ईंग एचेरेय जिमाःतेरा अरू नुँहूयिंग एचेयतना, हना बुता पुरावगे लगा अपांग ईंगे वारकेरा। नाःआ ईंग बदीरे हिदइत इया दोहोनता अरू एहुनाराः हिदइत अते मरंग इदा। 37ईंगे वारकेरा हाँयग अपांग, ईंग बदीरे हिदइते एमेकेरा। मनदो अपे हाँयराः बड़रा मेरपे अयूमगरा अरू हाँय मेरपे ञेलगडिया। 38हाँय ईंगे वारकेरा, मनदो अपे ईंग एचेरे मेरपे बिसवासगरा। हनालगा हाँयराः सरवन अपेराः जीवरे मेर दोहोनता। 39अपे भगवानराः कागदते तिंगीड घड़ीन चिडुः लगापे कुरनिसगेतना। नाःआ अते अपे ओंगलेता, ननते अले ओरो टुटीगनेना हना जीवले पवाव जुवाःता, माःआन अरू ननानाः कागद ईंग बदीरे हिदइत एमेयता। 40हनारे हों अपे ओरो टुटीगनेना हना जीव पवाः लगा ईंग एचेरे वेग लगा मेरपे चहाःता।”

41“ईंग होड़कूराः मान मरजइत मेरिंग चहाःता। 42मनदो ईंग सुदीयतना, अपे एचेरे भगवानराः दुलार कोवानेःआ, माःआन। 43ईंगरीग अपांग भगवानराः ञावते अपे एचेरेयिंग वेगकिया अरू अपे ईंग मेरपे मनेवागाडिंग। मनदो तोनोंगीग होड़ अनँयग ञावतेय वेगता दो अपे हाँय नपायपे मनेवायता। 44अपे अँननपे अपे जाग होड़ेंगता अरू मिनीटोंग इदानिया हाँयग भगवान अगीते मान मरजइत पवाः लगा अपे मेरपे चहाःतना। दो अपे करा उड़ी ईंगपे बिसवास अवे?”

45“अपे अहापे ओंगले, ईंग अपांग मड़ंगरे अपेयिंग जाःता, माःआन। अपे भरसागेतना हाँयग मोसेस हवे अपेरीग जाजाःयीग होड़। 46मोसेस ईंग बदीरेय ओजाःतेरा अरू अपे हाँय एचेरेपे बिसवासकेः दो, ईंग एचेरे होँपे बिसवासकेःआ। 47मनदो मोसेस ओजाःतेरा हना कता अपे मेरपे बिसवागेतना, दो ईंगराः कता अपे करा उड़ीपे बिसवास अवेय?”

Currently Selected:

एहुना 5: kfp

Highlight

Copy